تازيون خبرون

Daily Archives: February 10, 2015

بلديه ٽائون سانحو: وزير اعظم ۽ آرمي چيف جمعي تي ڪراچي پهچندا، اهم اجلاس طلب

اسلام آباد/ڪراچي (اسٽاف رپورٽر) وزيراعظم ميان نواز شريف سنڌ ۾ امن امان جي صورتحال خاص طور تي بلديه ٽائون سانحي جي تحقيقاتي رپورٽ سامهون اچڻ ۽ ان ۾ واضح طور تي هڪ سياسي پارٽي تي ذميداري پوڻ سان پيدا صورتحال تي ويچارڻ لاءِ جمعي ڏينهن 3 1  فيبروري تي گورنر هائوس مان نهايت اعليٰ سطحي اجلاس گهرائي ورتو، اعليٰ سطح جي اجلاس ۾ آرمي چيف کان علاوه سنڌ گورنر ڊاڪٽر عشرت العباد، وڏو وزير سيد قائم علي شاهه، آءِ جي سنڌ، چيف سيڪريٽري سنڌ، ڪور ڪمانڊر ڪراچي، ڊي جي رينجرز، گهرو سيڪريٽري، آءِ ايس آءِ، ايم آءِ ۽ آءِ بي جا نمائندا به شريڪ ٿيندا، ٻئي طرف وزير اعظم ميان نواز شريف جي صدارت هيٺ اعليٰ سطحي اجلاس جاري آهي، جنهن ۾ مختلف کاتن جي ڪارڪردگي جو جائزو ورتو پيو وڃي، نواز شريف چيو آهي ته عوام جي زندگي جو معيار بهتر بڻائڻ لاءِ حڪومت ڪوششن ۾ رڌل آهي. اعليٰ سطحي اجلاس ۾ وفاقي وزير ۽ صلاحڪار شريڪ آهن، جيڪي وزير اعظم کي پنهنجن پنهنجن کاتن جي ڪارڪردگي بابت بريفنگ ڏئي رهيا آهن. وزير اعظم ميان نواز شريف چيو آهي ته حڪومت عوام جي زندگي جو معيار بهتر ڪرڻ ۾ رڌل آهي هن چيو ته بنيادي سهولتون مهيا ڪرڻ حڪومت جي ذميواري آهي ۽ اُن لاءِ ڪوششون ڪري رهيا آهن.

 

سنڌ حڪومت فوجي عدالتن لاءِ 0 1 ڪيس وفاق کي موڪلي ڇڏيا

ڪراچي (اسٽاف رپورٽر) سنڌ حڪومت فوجي عدالتن لاءِ 0 1  ڪيس وفاق کي موڪلي ڇڏيا، 3 1  فيبروري تائين وڌيڪ 7 4  ڪيس موڪليا ويندا. سنڌ جي ڏي وزير سيد قائم علي شاهه سان آءِ جي سنڌ سان آءِ جي غلام حيدر جمالي ملاقات ڪئي. ملاقات ۾ وڏي وزير سيد قائم علي شاهه ابتدائي طور تي فوجي عدالتن ڏانهن موڪلڻ لاءِ 0 1  ڪيس وفاق کي موڪلڻ جي منظوري ڏئي ڇڏي، انهن ڪيسن ۾ ڪارساز، مهراڻ بيس ۽ ايئرپورٽ حملو ڪيس به شامل آهن، ملاقات ۾ چيو ويو ته جمعي تائين وڌيڪ 7 4  ڪيس وفاق کي موڪليا ويندا. ياد رهي ته ايپڪس ڪميٽي جي اجلاس ۾ 0 1  ڏينهن ۾ 7 5  ڪيس وفاق کي موڪلڻ جو فيصلو ڪيو ويو هو ۽ آچر تائين ڪو ڪيس نه موڪلڻ تي وفاق طرفان سنڌ حڪومت سان ناراضگي جو اظهار ڪيو ويو هو ، ٻئي طرف سنڌ جي وڏي وزير سيد قائم علي شاهه چيو آهي ته بلديا فيڪٽري سانحي جي 255 متاثرن مان 252 کي معاوضو ڏنو ويو آهي. وڏي وزير پنهنجي بيان ۾ چيو آهي ته بلديا سانحي ۾ شهيد ٿيل ٽن ڄڻن جي وارثن ۾ قانوني مسئلي سبب معاوضي جي ادائگي رڪيل آهي. وڏي وزير چيو آهي ته سانحي جي متاثرن لاءِ وزيراعظم طرفان 4 لک رپيا ۽ سنڌ حڪومت پاران 3،3 لک رپيا ادا ڪيا ويا آهن. بلديا سانحي ۾ 255 ماڻهو سڙي فوت ٿيا هئا پر ان ۾ ملوث دهشتگردن کي اڃا تائين ڪابه سزا نه ملي آهي. ڪجهه ڏينهن اڳ سنڌ هاءِ ڪورٽ ۾ رينجرز جي آءِ ٽي جي رپورٽ پيش ڪندي چيو هو ته فيڪٽري ۾ باهه لڳي نه هئي پر باهه لڳائي وئي هئي، جنهن ۾ هڪ سياسي پارٽي جو گروپ ملوث آهي.

 

ايم ڪيو ايم ڏوهارين کان ايئن لاتعلق ٿئي جيئين اسين الذوالفقار سان لاتعلق ٿيا هئاسين: خورشيد شاهه

اسلام آباد (بيورو) پاڪستان پيپلز پارٽي جي اڳواڻ ۽ قومي اسيمبلي ۾ اپوزيشن ليڊر خورشيد شاهه چيو آهي ته ايم ڪيو ايم ڏوهارين کان ايئن لاتعلق ٿئي جيئين اسين الذوالفقار سان لاتعلق ٿيا هئاسين. اسلام آباد ۾ صحافين سان ڳالهائيندي خورشيد شاهه چيو ته پاڪ فوج ۽ آءِ ايس آءِ خلاف ڳالهائڻ جو سلسلو بند ڪيو وڃي. خورشيد شاهه جو چوڻ هو ته ڪراچي جي علائقي بلديه ٽائون جي فيڪٽري کي لڳل باهه واري سانحي جي رپورٽ دير سان آئي آهي،  ڪجهه ته صداقت هوندي.هن ايم ڪيو ايم کي صلاح ڏني ته اها ڏوهارين کان ايئن لاتعلق ٿئي جيئن هو ڪڏهن الذوالفقار کان لاتعلق ٿيا هئا.

 

12 مئي ۽ بلديه سانحي بابت جي آءِ ٽي رپورٽون عدالت ۾ جمع ڪرايون آهن: شرجيل ميمڻ

ڪرچي (اسٽاف رپورٽر) سنڌ جي اطلاعات ۽ بلديات واري صوبائي وزير شرجيل انعام ميمڻ چيو آهي ته پيپلز پارٽي ڪڏهن ڪنهن سان ڪو ڳجهو معاهدو نه ڪيو آهي ۽ نه ئي ڪنهن شرط تي ڪنهن سان ڳالهايو آهي. ايم ڪيو ايم سميت سمورين سياسي جماعتن سان سينيٽ جي چونڊن سميت سمورن سياسي معاملن تي ڳالهه ٻولهه جو سلسلو هميشه جاري رهي ٿو. اسان صوبي ۽ ملڪ ۾ امن امان جي قيام ۽ بهتر ورڪنگ رليشن شپ لاءِ ڳالهه ٻولهه جاري آهي. جي آءِ ٽي هڪ شخص ناهي ٺاهيندو پر ان ۾ سمورن ادارن جا اعليٰ آفيسر شامل هوندا آهن، ان لاءِ ان کي غلط قرار ڏيڻ درست نه آهي. سي پي ايل سي جي سربراهه جي معاملي تي وزيراعليٰ سنڌ ۽ گورنر سنڌ کي فيصلو ڪرڻ گهرجي. هو سومر تي سنڌ اسيمبلي جي اجلاس کانپوءِ صحافين سان ڳالهائي رهيو هو. شرجيل انعام ميمڻ چيو ته ايم ڪيو ايم سميت ڪنهن به سياسي جماعت سان ڪوبه ڳجهو معاهدو نه ٿيو آهي ۽ نه ئي پيپلز پارٽي ڪنهن شرط تي ڪنهن سان ڪو معاهدو ڪري ٿي. هن چيو ته سينيٽ جي چونڊن ۾ ايم ڪيو ايم کي گڏ کڻي هلڻ يا سنڌ حڪومت ۾ شامل ڪرڻ جي حوالي سان پارٽي جو اڳواڻ رحمان ملڪ وڌيڪ بهتر ٻڌائي سگهي ٿو، هو لنڊن ويو آهي ۽ اتي ايم ڪيو ايم جي سربراهه ۽ ٻين سان ملاقات کانپوءِ جيڪا به صورتحال سامهون ايندي اهو ئي بهتر ٻڌائي سگهندو. هڪ سوال جي جواب ۾ شرجيل ميمڻ چيو ته پيپلز پارٽي چاهي ٿي ته صوبي ۾ امن امان قائم رهي ۽ بهتر ورڪنگ رليشن شپ قائم رهي ۽ ان لاءِ ايم ڪيو ايم سميت سمورين سياسي جماعتن سان ڳالهه ٻولهه جو سلسلو هميشه جاري رهي ٿو. ايم ڪيو ايم پاران جي آءِ ٽي رپورٽ تي تحفظات جي سوال تي شرجيل ميمڻ چيو ته جي آءِ ٽي رپورٽ ڪو هڪ شخص ناهي ٺاهيندو پر ان ۾ امن امان جي بحالي جي سمورن ادارن جا اعليٰ آفيسر شامل هوندا آهن ۽ ڳجهن ادارن جا آفيسر به ان ۾ موجود هوندا آهن ۽ ان رپورٽ کي غلط قرار ڏيڻ ڪا عقلمندي نه آهي. 12 مئي واري سانحي سميت ٻين سانحن جي حوالي سان ٿيندڙ گرفتاريون ۽ ان ۾ ملوث جوابدارن جي حوالي سان سوال جي جواب ۾ هن چيو ته اهي معاملا عدالتن ۾ زير التوا ۾ آهن، ان تي هو ڪابه ڳالهه نه ڪندو البته 12 مئي سانحي کي گذري 6 سال ٿي ويا آهن پر ان ڪيس جي ٻڌڻي صرف 2 ڀيرا ٿي آهي. اپوزيشن ليڊر پاران ڊپٽي اسپيڪر لاءِ استعمال ٿيندڙ زبان تي هن چيو ته لفظن جي چونڊ سان ئي انسان جي شخصيت واضح ٿئي ٿي. سي پي ايل سي سربراهه جي اسڪينڊل تي سوال جي جواب ۾ هن چيو ته سي پي ايل سي اهم ادارو آهي ۽ ان حوالي سان گورنر ۽ وزير اعليٰ سنڌ کي فيصلو ڪرڻو آهي.

وفاق سنڌ حڪومت کي افغان پناهگيرن خلاف خلاف ڪارروائيءَ کان روڪي ڇڏيو

ڪراچي (اسٽاف رپورٽر) وفاقي وزير عبدالقادر بلوچ چيو آهي ته پشاور سانحي سميت ملڪ جي ڪنهن به ٻئي حصي ۾ دهشتگردي جي ڪنهن به وڏي واقعي ۾ افغان مهاجر جي ملوٽ هجڻ جو ثبوت نه مليو آهي، هو سومر تي چيف سيڪريٽري سنڌ جي آفيس ۾ اجلاس کانپوءِ ميڊيا سان ڳالهائي رهيو هو، اجلاس ۾ افغان پناهگيرن جي رجسٽريشن ۽ انهن جي وطن واپسي  بابت معاملن جو جائزو ورتو ويو، ان موقعي تي هوم سيڪريٽري سنڌ عبدالرحيم سومرو، غزنفر علي آغا ۽ ٻيا لاڳاپيل عملدار موجود هئا، چيف سيڪريٽري سنڌ سجاد سليم هوتيانا اجلاس ۾ شريڪ نه ٿيو، عبدالقادر بلوچ ٻڌايو ته ملڪ ۾ 30 لک افغان مهاجرن جي رجسٽريشن جو ڪم ٿي چڪو آهي جيڪي اڃاتائين رجسٽرڊ نه ٿيا انهن کي 2 مهينن ۾ رجسٽرڊ ڪيو ويندو، صوبائي حڪومتن کي چيو ويو آهي ته ان عرصي دوران غير رجسٽرڊ افغان مهاجرن خلاف ڪارروائي کان پاسو ڪن، هن چيو ته افغان مهاجرن کي به پاڪستان جو امن عزيز آهي، عبدالقادر بلوچ چيو ته مسلم ليگ ن جي حڪومت افغان مهاجرن سان ناانصافي نه ٿيڻ ڏيندي.

 

ٽيڪنو ڪريٽ سيٽ فاروق ايڇ نائيڪ کي ملي وئي، پ پ سينيٽ چونڊ لاءِ نالن جو اعلان ڪري ڇڏيو

ڪرچي (اسٽاف رپورٽر) پيپلز پارٽيءَ سينيٽ چونڊن لاءِ 12 اميدوارن جي لسٽ پڌري ڪري ڇڏي، راجا پرويز اشرف جو چوڻ آهي ته امين فهيم ملڪ کان ٻاهر هئڻ باوجود فيصلن ۾ شامل رهيو، بلاول ڀٽو زرداري ۽ آصف علي زرداري وچ ۾ ڪي به اختلاف ناهن. اڳوڻي وزيراعظم ۽ پ پ جي مرڪزي اڳواڻ راجا پرويز اشرف، شيري رحمان ۽ ٻين پارٽي اڳواڻن سان گڏ پريس ڪانفرنس ڪندي سينيٽ چونڊن لاءِ حتمي اميدوارن جي لسٽ جاري ڪئي. راجا پرويز شرف چيو ته ٽيڪنوڪريٽ سيٽ لاءِ فاروق ايڇ نائيڪ کي ٽڪيٽ ڏني وئي جڏهن ته عورتن جي مخصوص سيٽ تي سسئي پليجو کي اميدوار نامزد ڪيو ويو آهي. هن ٻڌايو ته جنرل سيٽن تي رحمان ملڪ، اسلام الدين شيخ، سليم مانڊوالا، گيانچند ايسراڻي ۽ عبداللطيف انصاري پ پ جا اميدوار هوندا. راجا پرويز اشرف چيو ته خيبر پختون خواهه مان نور عالم خان ۽ خانزده خان اميدوار نامزد ڪيا ويا آهن. هن ٻڌايو ته خيبر پختون خواهه مان ٽيڪنوڪريٽ سيٽ تي همايون خان کي ٽڪيٽ ڏني وئي آهي. راجا پرويز اشرف موجب پنجاب مان نديم افضل چــَن ۽ اسلام آباد ۾ جنرل سيٽ تي نرگس فيض ملڪ اميدوار طور شامل آهي. پ پ اڳواڻ راجا پرويز اشرف چيو ته مخدوم امين فهيم ملڪ کان ٻاهر آهي پر فيصلن ۾ شامل آهي. هن چيو ته بلاول ڀٽو ۽ آصف علي زرداري وچ ۾ ڪي به اختلاف ناهن. راجا پرويز اشرف چيو ته هـُو هارس ٽريڊنگ تي يقين نه ٿا رکن، سڀني پارٽين لاءِ ڳالهين جا دروازا کــُليل آهن.

 

عمران خان جي تقرير طي ٿيل هئي، ڪپتان ڪراچي جو امن تباهه ڪرڻ جي ڪوشش پيو ڪري: ايم ڪيو ايم

ڪراچي (اسٽاف رپورٽر) ايم ڪيو ايم اڳواڻ حيدر عباس رضوي چيو آهي ته عمران خان جي چر ڏياريندڙ تقرير جو مقصد ڪراچي کي بدامني ڏانهن ڌڪڻ هو. عمران خان طالبان خلاف قومي اتفاق راءِ کي تباهه ڪرڻ چاهي ٿو۔ متحده قومي موومينٽ جي رابطا ڪميٽي هنگامي پريس ڪانفرنس کي خطاب ڪندي حيدر عباس رضوي جو چوڻ هو ته رابطا ڪميٽي اڄ جي ڏينهن کي سياسي تاريخ جو ڪارو ڏينهن سمجهي ٿي. عمران خان قائد الطاف حسين خلاف فعونيت ۽ بازاري زبان استعمال ڪئي. حالتون ۽ واقعا ٻڌائي رهيا آهن ته عمران خان جي پريس ڪانفرنس ڌرڻي وانگر ڪنهن طي ٿيل منصوبي جو حصو آهي. عمران خان جي تقرير پهريان کان ئي طي ٿيل هئي. ايم ڪيو ايم خلاف جيڪو سلسلو هلي رهيو آهي عمران خان جي تقرير اُن جو حصو آهي. عمران خان جي پريس ڪانفرنس انتهائي مذمت جوڳي آهي. حيدر عباس رضوي چيو ته عمران خان الطاف حسين لاءِ نهايت ڪريل زبان استعمال ڪئي پر اُن جي باوجود اسان جي ڪارڪنن انتهائي صبر جو مظاهرو ڪيو. هن چيو ته ملڪي تاريخ ۾ پهريون ڀيرو دهشتگردي خلاف سياسي پارٽين اتفاق ڪيو پر تحريڪ انصاف قومي اتفاق راءِ کي تباهه ڪري رهي آهي. عمران خان وزيراعظم نوازشريف ۽ آرمي چيف جنرل راحيل شريف جي ڪراچي جي دوري کان اڳ ۾ بامني چاهي ٿو. عمران خان ملڪ ۾ سياسي افراتفري چاهي ٿو. هن الزام هنيو ته جنهن شخص اسان جي قائد تي الزام هنيو اُن جو پنهنجو ڪردار ڪهڙو آهي سندس سڄي زندگي دنيا آڏو آهي. نشي واريون دوائون ڪير اسعتمال ڪري ٿو سڄي دنيا کي خبر آهي. عمران جي ڪارنامن سان سڄي دنيا ڏسي چڪي آهي. ايم ڪيو ايم اڳواڻ الزام هنيو ته تحريڪ انصاف پابندي مڙهيل دهشتگرد تنظيم طالبان جي سياسي ونگ آهي. عمران يا تحريڪ انصاف پاران ڪڏهن به طالبان خلاف هڪ به مذمتي لفظ ادا ناهي ڪيو. حيدر عباس رضوي چيو ته عمران فاروق قتل ڪيس اسان جي ڪنهن اڳواڻ خلاف داخل ناهي. عمران خان صاحب اسڪاٽ لينڊ يارڊ کي اليڪشن ٽربيونل سمجهيو آهي. هو لنڊن وڃي پنهنجو شوق پورو ڪري.

 

بلديه ٽائون سانحي جو ڪيس فوجي عدالت ۾ هلايو وڃي: پي ٽي آءِ جو مطالبو

اسلام آباد (بيورو) تحريڪ انصاف جي چيئرمين عمران خان الطاف حسين تي تنقيد ڪندي چيو آهي ته متحده جي هٿياربند ونگ ختم ڪرڻ کانسواءِ ٽارگيٽ ڪلنگ ختم نه ٿيندي. وزيراعظم بلديه ٽائون سانحي جي متاثرن کي انصاف ڏياري، سڄي قوم الطاف حسين جي دهشتگردي خلاف اُٿي وڃي. اسلام آباد ۾ پريس  ڪندي عمران خان چيو ته ايم ڪيو ايم جي سربراهه پي ٽي آئي جي عورتن بابت ڪريل زبان استعمال ڪئي. هو بزدل ماڻهو آهي، موت کان ڊڄي ٿو ۽ لنڊن ۾ ويهي پاڪستان ۾ ماڻهن کي مارائيندو آهي. عمران خان حڪومت کي مخاطب ٿيندي چيو ته بلديه سانحي ۾ ڀتي لاءِ فيڪٽري کي باهه ڏني وئي. وزيراعظم بلديه ٽائون سانحي جي متاثرن کي انصاف ڏياري ۽ جانچ ٽيم جي رپورٽ ۾ شامل ماڻهن کي گرفتار ڪرائي. هڪ سوال جي جواب ۾ هن چيو ته بلديه ٽائون سانحو پشاور سانحي جهڙو سانحو آهي. اُن جو ڪيس فوجي عدالت ۾ هلايو وڃي. هن اُهو به مطالبو ڪيو ته عمران فاروق قتل ڪيس جي ٻنهي گواهن کي برطانوي حڪومت جي حوالي ڪيو وڃي. عمران خان چيو ته ايم ڪيو ايم همدردي حاصل ڪرڻ لاءِ پاڻ ئي پنهنجي ماڻهن کي مارائيندي آهي. متحده جي يادت پارٽي کي هٿياربند گروپن کان الڳ ڪري. ايم ڪيو ايم جي هٿياربند ونگ ختم ڪرڻ کانسواءِ ٽارگيٽ ڪلنگ ختم نه ٿيندي. عمران خان چيو ته ايم ڪيو ايم کي سندس اتحادي کي بچائيندا آهن. مشرف ۽ زرداري حڪومت ڪجهه نه ڪيو. هن اعلان ڪيو ته آئينده جنهن به فورم تي ايم ڪيو ايم هوندي اُتي نه ويهنداسين. عمران خان چيو ته کين خبر آهي ته زهره شاهد کي ڪنهن قتل ڪيو ايم ڪيوا يم ملوث آهي پر ڪير به اُنهن کي نٿو پڪڙي. ولي خان بابر کي به ايم ڪيو ايم مارايو، وزيراعظم پنهنجي ڪاروبار سبب مصلحتن جو شڪار آهي، وقت اچي ويو آهي ته ڪراچي ۾ امن لاءِ ٺوس قدم کنيا وڃن ۽ ڪراچي کي خوف مان حڪومت ڪڍي اي پي سي ۾ وزيراعظم کي طاقت ڏني، هاڻي ماڻهن کي پڪڙي وڃي. بلديه ٽائون سانحو به پشاور سانحي جهڙو آهي. عمران خان چيو ته ميڊيا پي ٽي آئي جو 3 ڪلاڪن تائين ميڊيا ٽرائيل ڏيکاريندي رهي اُن وقت پيمرا ڪٿي هئي. ڪوريج نه ملڻ تي الطاف حسين جا ماڻهو ميڊيا هائوسز کي ڌمڪيون ڏين ٿا جڏهن ته ڪراچي جي واپارين ۽ صحافين کي به ڌمڪيون ڏنيون وڃن ٿيون.

 

عدالت 12 مئي سانحي جي جوابدار کي 90 ڏينهن جي رمانڊ تي رينجرز حوالي ڪري ڇڏيو

ڪراچي (اسٽاف رپورٽر) دهشتگردي روڪٿام عدالت 2 1  مئي سانحي ۾ ملوث جوابدار عبدالرفيق ڪائيان کي 0 9  ڏينهن لاءِ رينجرز جي قبضي ۾ ڏئي ڇڏيو. رينجرز 2 1  مئي سانحي ۾ مبينا طور تي ملوث جوابدار عبدالرفيق کي دهشتگردي روڪٿام عدالت ۾ پيش ڪيو جڏهن ته ان موقعي تي سيڪيورٽي جا سخت انتظام ڪيا ويا هئا. رينجرز عدالت کي اپيل ڪئي ته جوابدار کي 0 9  ڏينهن لاءِ رمانڊ تي حوالي ڪيو وڃي، جنهن جي منظوري بعد عدالت جوابدار عبدالرفيق کي 0 9  ڏينهن لاءِ رينجرز جي قبضي ۾ ڏئي ڇڏيو. عدالت ٻاهران ميڊيا سان ڳالهائيندي جوابدار جي وڪيل جو چوڻ هو ته عبدالرفيق سياسي پارٽي جو ڪارڪن آهي جنهن ڪري ان کي نشانو بنايو پيو وڃي ۽ ممڪنه طور تي سياسي پارٽي کي بدنام ڪرڻ جي ڪوشش ڪئي پئي وڃي. ياد رهي ته رينجرز گذريل ڏينهن محمود آباد ۾ ڪاروائي ڪندي جوابدار عبدالرفيق عرف ڪائيان کي گرفتار ڪيو هو، جنهن بعد رينجرز دعويٰ ڪئي هئي ته جوابدار سانحي 2 1  مئي ۾ ملوث آهي جنهن جو سياسي پارٽي سان تعلق آهي

 

سپريم ڪورٽ سنڌ جي وڏي وزير خلاف توهين عدالت درخواست خارج ڪرڻ واري درخواست رد ڪري ڇڏي

اسلام آباد (بيورو) سپريم ڪورٽ سنڌ جي وڏي وزير خلاف توهين عدالت جي درخواست خارج ڪرڻ واري سنڌ حڪومت جي درخواست رد ڪندي پنهنجي ريمارڪس ۾ چيو آهي ته عدالت کي پڪ آهي ته اڃان ڪيترائي آفيسر عدالتي حڪم باوجود ٻين کاتن ۾ ڪم ڪري رهيا هوندا، تنهنڪري هن درخواست کي آئوٽ آف ٽرن پروموشن ۽ ٻين کاتن ۾ ضم ڪرڻ واري مک ڪيس سان ملائي ٻڌو ويندو. جسٽس سرمد جلال عثماني جي سربراهي ۾ قائم سپريم ڪورٽ جي ٻه رڪني بينچ سنڌ جي وڏي وزير خلاف توهين عدالت جي درخواست کي ٻڌو. درخواست گذار جو موقف هو ته عدالتي حڪم باوجود وسيم خواجه کي عهدي تان نه هٽايو ويو آهي، جنهن تي سنڌ حڪومت عدالت کي آگاهي ڏني ته وسيم خواجه کي هٽايو ويو آهي، تنهنڪري وڏي وزير خلاف درخواست کي خارج ڪيو وڃي. عدالت پنهنجي آبزرويشن ۾ چيو ته عدالت کي لڳي ٿو ته اڃان ڪيترائي آفيسر عدالتي حڪمن باوجود نه هٽيا آهن، تنهنڪري هن درخواست کي آئوٽ آف ٽرن پروموشن ۽ ٻين کاتن ۾ ضم ڪرڻ واري ڪيس سان ملائي ٻڌو ويندو. عدالت سنڌ حڪومت جي وڏي وزير خلاف توهين عدالت جا جاري نوٽيس واپس وٺڻ واري درخواست رد ڪندي ٻڌڻي اڻ ڄاتل مدي تائين ملتوي ڪري ڇڏي آهي.