تازيون خبرون

Daily Archives: February 9, 2015

بجلي ۽ گئس جو بحران 2 سالن ۾ حل ٿي ويندو: نواز شريف

اسلام آباد (بيورو) وزيراعظم محمد نواز شريف چيو آهي ته ملڪ آڏو سنگين مسئلا آهن، جيڪي حل ڪرڻ لاءِ ڪوشش ڪري رهيا آهيون، بجلي ۽ گيس جو بحران پنهنجي دور حڪومت ۾ حل ڪنداسين، عوام جي زندگي ۾ سهولت آڻڻ چاهيون ٿا، ملڪ انشاالله جلد خوشحال ٿي ويندو، آچر تي وزيراعظم محمد نواز شريف اوچتو اڻ اعلانيل دوري تي آبپاره مارڪيٽ ۽ جي ٽين مرڪز پهچي هن ڀاڃين ۽ ميوون سميت مختلف شين جي قيمتن بابت دڪاندارن کان معلوم ڪيو، ان موقعي تي عوام جو وڏو انگ گڏ ٿي ويو، جنهن وزيراعظم کي پاڻ سان گڏ ڏسي خوشي جو اظهار ڪيو، وزيراعظم جي معلوم ڪرڻ تي شهرين ٻڌايو ته تيل جي قيمت گهٽ ٿيڻ سان مهانگائي گهٽجي وئي آهي ۽ ڪيترن ئي شين جا گهه ڪري پيا آهن، وزيراعظم چيو ته هن وقت ملڪ آڏو وڏا چيليج آهن جن کي حل ڪرڻ لاءِ ڪوششون ڪري رهيا آهيون، هن چيو ته سالن جي لوڊشيڊنگ جي خاتمي لاءِ ڪوششون ڪري رهيا آهيون ۽ هن حڪومتي دور ۾ بجلي ۽ گيس جا مسئلا حل ٿي ويندا، هن چيو ته اسان جي ڪوشش آهي ته بجلي ۽ گيس جو بحران 2 سالن ۾ حل ٿي وڃي، هن چيو ته اڄ مان ان لاءِ آيو آهيان ته معلوم ڪري سگهان ته تيل جي گهٽجڻ بعد ٻين شين جون قيمتون گهٽ ٿيون آهن يا نه، هن چيو ته پيٽرول 107 رپيا ليٽر مان گهٽائي 70 رپيا تي آندو آهي، ڪوشش ڪري رهيا آهيون ته تيل ۾ لاٿو جو فائدو عوام کي ڏئي سگهون، هن چيو ته مسئلا حل ڪرڻ وارو فقط الله ئي آهي، اسان ڪوشش ڪري سگهون ٿا جيڪا ڪري رهيا آهيون، هن چيو ته انشاالله پاڪستان جلد خوشحال ٿي ويندو، اسان جي ڪوشش آهي ته عوام جي زندگي ۾ خوشحالي آڻي سگهون.

 

دهشتگردي جا پيرا سڌا يا اڻ سڌا ٻاهرين ملڪ سان ملن ٿا: شرجيل ميمڻ

ڪراچي(اسٽاف رپرٽر) اطلاعات ۽ بلديات واري وزير شرجيل انعام ميمڻ چيو آهي ته پاڪستان ۾ ٿيندڙ دهشتگردي جا پيرا سڌا يا اڻ سڌا ٻاهرين ملڪ سان ملن ٿا. ان جو مقصد اسلام ۽ پاڪستان کي عالمي سطح تي بدنام ڪري پاڪستان کي دهشتگردي جي نرسري قرار ڏيڻ آهي. اسان جو عوام هاڻ باشعور ٿي چڪو آهي ۽ کين ان ڳالهه جي بخوبي ڄاڻ آهي ته هتي ٿيندڙ دهشتگردي ڪير ۽ ڇو ڪري رهيو آهي. اسان جو مذهب اقليتن جي تحفظ جو سبق ڏي ٿو ۽ پاڪستان جي آئين تحت اقليتن کي هتي مڪمل آزادي آهي. نفرتون پکيڙيندڙ سوچن خلاف هاڻ اسان کي گڏ ٿيڻو پوندو ۽ اتحاد سان ئي اسان انهن سازشن جو منهن ٽوڙ جواب ڏئي سگهون ٿا. اهڙن خيالن جو اظهار هن پاڪستان علماءِ ڪونسل سنڌ تحت ڪوٺايل پيام امن ڪنوينشن کي خصوصي مهمان جي حيثيت سان ڪندي ڪيو. ڪنوينشن کي پاڪستان علماءِ ڪونسل جي مرڪزي چيئرمين علامه طاهر محمود اشرفي، مولانا زاهد محمود قاسمي، مولانا امجد، مولانا طارق محمود مدني، مولانا عبدالماجد فاروقي، مولانا حبيب الرحمان، قاري محمد اعظم فاروقي، علامه جعفر سبحاني، علامه محمد احسان صديقي، محمد مشتاق ڪلوٽا، مفتي محمد يوسف قصوري، مولانا محمد ساجد، مسلم ليگ (ن) جو علي اڪبر گجر، پنڊت شام لعل شرما سميت سمورن مسلڪ ۽ مذهبن جي عالم سڳورن ۽ اڳواڻن خطاب ڪيو. ان موقعي تي خطاب ڪندي شرجيل انعام ميمڻ چيو ته اسان سڀني جو مقصد هڪ ئي آهي ته پاڪستان جي بقاءُ ۽ سالميت تي ڪو آنچ نه اچي. هن چيو ته اڄ پاڪستان علماءِ ڪونسل پاران ان ڪانفرنس جي بندوبست ان ڳالهه کي ثابت ڪري ڇڏيو آهي ته هاڻ هن ملڪ ۾ ڀاءُ کي ڀاءُ سان وڙهائڻ جي ڪنهن به سازش کي ڪامياب نه ٿيڻ ڏنو ويندو. شرجيل انعام ميمڻ چيو ته ڪجهه سانحن ۽ واقعن کان پوءِ جذباتي تقريرون ڪيون وينديون هيون پر ان جو هرگز اهو مقصد ناهي ته اسان ۾ ڪنهن قسم جو ڪو اختلاف آهي. هن چيو ته اسان جو عوام هاڻ باشعور ٿي چڪو آهي ۽ کين انهن سازشن جي بخوبي ڄاڻ اٿن. شرجيل ميمڻ چيو ته اڄ پورو ملڪ دهشتگردي جي لپيٽ ۾ آهي ۽ اسان ان دهشتگردي کي منهن ڏيڻ لاءِ گڏجي ان خلاف قدم کڻڻا پوندا. هن چيو ته دهشتگرد انسان، پاڪستان ۽ مسلمانن جي دشمن آهي ۽ ان جو ڪوبه مذهب ۽ مسلڪ ناهي هوندو. هن چيو ته مدرسا اسان جي نوجوانن کي علم جي زيور سان مالامال ڪرڻ مصروف عمل ۾ آهن پر جيڪي مدرسا اسلام ۽ مذهب جي آڙ ۾ دهشتگردي جي تعليم ڏئي رهيا آهن انهن خلاف به اسان سڀني کي هڪ ٿيڻو پوندو ۽ انهن جي نشاندهي ڪرڻي پوندي. شرجيل ميمڻ چيو ته دشمن پاڪستان ۾ دهشتگردي ذريعي عالمي سطح تي پاڪستان ۽ اسلام جي تشخص کي بيگاڙڻ چاهي ٿو ۽ ان ۾ ٻاهريون طاقتون شامل آهن. هن چيو ته اسان جي ملڪ ۾ جيڪا دهشتگردي ٿي رهي آهي ان جا سڌا يا اڻ سڌا ٻاهرين ملڪ سان جڙيل آهن، جيڪو پاڪستان ۾ انتشار ۽ انارڪي پکيڙڻ جي سازش ڪري رهيو آهي. هن چيو ته ان جو مقصد قائداعظم محمد علي جناح جي تلقين ۾ ڏار وجهڻ ۽ ڀاءُ کي ڀاءُ سان ويڙهائڻ آهي. هن پشاور سانحي ۽ شڪارپور سانحي جو ذڪر ڪندي چيو ته انهن سانحن تي ڪنهن به پاڪستاني يا مسلمان جو دل رت جي ڳوڙهڻ سان ڀريو پيو آهي، پر جيڪڏهن ان تي ڪنهن کي خوشي ٿي ته اهو مسلمانن، پاڪستانن ۽ انسانيت جي دشمنن کي ٿي هوندي. ان موقعي تي هن اقليتن جي تحفظ کي حڪومتي ۽ مسلمانن جي اولين ذميواري قرار ڏيندي چيو ته پاڪستان ۾ انهن کي اها آزادي موجود آهي، جيڪا هڪ مسلمان کي هتي آهي. هن چيو ته اسان جو مذهب اسلام اقليتن جي احترام جو درس ڏي ٿو ۽ اسان تي لازم آهي ته اسان انهن جي عبادتگاهن ۽ انهن جو مڪل تحفظ ڪريون. ان موقعي تي هن پاڪستان علماءِ ڪونسل جي مرڪزي چيئرمين علامه طاهر اشرفي کي پيام امن ڪنوينشن جي ڪامياب بندوبست ڪرڻ تي مبارڪون ڏنيون ۽ چيو ته پاڪستان پيپلز پارٽي ۽ سنڌ حڪومت امن امان جي قيام ۾ هر وقت سندن گڏ موجود آهي. هن چيو ته جيڪا سوچ هن ملڪ ۾ نفرتون پکيڙڻ جي سازشن ۾ مصروف آهي ان کي شڪست ان صورت ۾ ڏئي سگهجي ٿي ته اسان ۾ مڪمل اتحاد ۽ ٻڌي هجي. هن چيو اسان کي هاڻ ماضي کي ويساري مستقبل جي فڪر ڪرڻي پوندي ۽ ان لاءِ گڏ ٿيڻ وقت جي اهم ضرورت بڻجي وئي آهي. شرجيل ميمڻ چيو ته هن وقت ملڪ کي پيش ايندڙ مسئلن ۽ چئلينجن جو مقابلو صرف ۽ صرف اتحاد ۽ ٻڌي ئي آهي. ڪانفرنس کي خطاب ڪندي علامه طاهر اشرفي ۽ ٻين چيو ته هن وقت ملڪ جن چئلينجن ۽ خاص طور تي دهشتگري کي منهن ڏئي رهيو آهي ان سان نبرڻ لاءِ سمورن مذهبن ۽ عوام هڪ پليٽ فارم تي هاڻ متحد ٿي چڪو آهي ۽ اهو وقت پري ناهي جڏهن هن ملڪ مان دهشتگردن ۽ ملڪ ۽ اسلام دشمن قوتن جو خاتمو ڪيو ويندو.

 

ڪراچي: پ پ جي پارلياماني بورڊ جو اجلاس، سينيٽ اميدوارن جا انٽرويو ورتا ويا

ڪراچي (اسٽاف رپورٽر) سينيٽ چونڊن لاءِ پاڪستان پيپلزپارٽي پنهنجي لائحه عمل کي اڄ آخري شڪل ڏئي رهي آهي. پيپلزپارٽي پارليماني بورڊ اڄ خيبرپختونخواهه، پنجاب ۽ بلوچستان جي معاملن کي ڏسندي جڏهن ته ايم ڪيو ايم سيمت ٻين جماعتن سان رابطا به جاري آهن. آصف علي زرداري جي صدارت ۾ پيپلزپارٽي پارليماني بورڊ جو اجلاس اڄ ٿي رهيو آهي. اسلام آباد، خيبرپختونخواهه، پنجاب ۽ بلوچستان جي سينيٽ چونڊن جي اميدوارن جا انٽرويوز ورتا پيا وڃن. پيپلزپارٽي پنجاب جو صدر منظور وٽو، ڪي پي ڪي جو پارٽي صدر خانزاده خان ۽ بلوچستان پيپلزپارتي جو صدر صادق عمراڻي به بلاول هائوس ۾ موجود آهن. ٻئي پاسي رحمان ملڪ سنڌ جي گورنر ڊاڪٽر عشرت العباد خان ۽ سنڌ جي وڏي وزير سان رابطاو ڪري ڳالهين ۾ اڳڀرائي کان آگاهه ڪيو آهي.

 

 

سينيٽ جون چونڊون 3 مارچ تي ٿينديون، سياسي جماعتن مشاورت جو عمل تيز ڪري ڇڏيو

اسلام آباد (بيورو) سينيٽ جون چونڊون 3 مارچ تي ٿينديون، مسلم ليگ ن، پ پ، ايم ڪيو ايم، جي يو آءِ ف ۽ تحريڪ انصاف سميت سمورين سياسي جماعتن ٽڪيٽن جي ورهاست ۽ اميدوارن جي چونڊ جي سلسلي ۾ مشاورت جو عمل تيز ڪري ڇڏيو آهي، سينيٽ جي چئني صوبن مان 11،11 وفاقي گادي واري شهر مان 2 ۽ فاٽا ۾ چئين ميمبرن جو تناسب نمائندگي جي بنياد تي چونڊ ڪيو ويندو، چونڊن ۾ مسلم ليگ ن اڪثريت جماعتي طور آڏو اچڻ جو امڪان آهي، تفصيل مطابق  سينيٽ جون چونڊون 3 مارچ تي ٿينديون، اليڪشن ڪميشن پاران جاري ڪيل شيڊول مطابق نامزدگي فارم 12 ۽ 13 فيبروري تي جمع ڪرايا ويندا، نامزدگي فارم جي جاچ پڙتال 16 ۽ 17 فيبرروي تي ٿيندي، اميدوارن جي حتمي لسٽ 25 فيبروري تي جاري ڪئي ويندي، سينيٽ جي 52 سينٽن لاءِ پولنگ 3 مارچ تي ٿيندي، چئني صوبن م سنيٽ جي 11،11 سيٽن لاءِ پولنگ صوبائي گادي وارن شهرن، جڏهن ته فاٽا ۽ وفاقي گادي واري هنڌ جي سينيٽ چونڊن لاءِ پولنگ قومي اسيمبلي هال ۾ ٿيندي، اليڪشن ڪميشن مطابق هر صوبي ۾ 11 سيٽن مان 7 عمومي ۽ 2 علماءِ ۽ ٽيڪنوڪريٽس ۽ 2 سينٽون عرتن لاءِ مخصوص هونديون، وفاقي گادي واري شهر مان هڪ عمومي، عڪ عورت، فاٽا لاءِ 4 ۽ اقليتين لاءِ 2 سينٽيون هونديون، 12 مارچ تي سينيٽ جا 50 سيڪڙو ميمبر مدو پورو ٿيڻ تي رٽائرڊ ٿيندا، جنهن کانپوءِ ڪل 52 سينٽن تي چونڊ ٿيندي.

 

28 کان وڌيڪ مذهبي پارٽين پاران دهشتگردي خلاف گڏيل جدوجهد جو اعلان

ڪراچي ( اسٽاف رپورٽر) ملڪ جي 28 کان وڌيڪ مذهبي پارٽين جي نمائندن طرفان پشاور سانحي ۽ سانحه شڪارپور ۽ ڪراچي ٽارگيٽ ڪلنگ جو نشانو بنجندڙ عالمن ،شاگردن، مذهبي ۽ سياسي ڪارڪنن جي قتل جي خلاف 13 فيبروري تي پر امن يوم احتجاج ملهائڻ ۽ دهشتگردي انتها پسندي جي خلاف گڏيل جدوجهد ڪرڻ جو اعلان ڪيو ويو آهي. اهڙو اعلان ڪالهه ڪراچي جي هڪ مقامي هوٽل ۾ پاڪستان علماءَ ڪائونسل پاران ڪرايل پيام امن ڪانفرنس جي موقعي تي پاڪستان علماءِ ڪائونسل جي مرڪزي چيئرمين حافظ طاهر محمود اشرفي پاران ڪيو ويو. ڪنوينشن جي گڏيل پڌرنامي ۾ چيو ويو ته دهشتگردي انتها پسندي ۽ فرقيواريت ملڪ جي هر طبقي کي متاثر ڪيو آهي تنهن ڪري هاڻ ضرورت ان ڳالهه جي آهي ته ملڪ جا سڀئي طبقا، مذهبي ۽ سياسي پارٽيون، دهشتگردي ۽ انتها پسندي جي خلاف گڏجي جدوجهد ڪن. پڌرنامي ۾ اهو به چيو ويو ته قومي ايڪشن پلان هڪ صحيح قدم آهي پر دهشتگردي جي خاتمي جي لاءِ هر قسم جي مصلحت پسندي کان مٿاهون ٿي جدوجهد ڪئي ويندي. ڪنوينشن ۾ اهو به مطالبو ڪيو ويو ته پاڪستان علماءِ ڪائونسل جي ضابطه اخلاق جي مڪمل توثيق جو اعلان ڪندي مسجدن ۾ لائوڊ اسپيڪرن جي ناجائز استعمال تي پابندي ۽ نفرت آميز تقريرن کان پاسو ڪرڻ ۽ پنهنجو مسلڪ ڇڏيو نه ۽ ٻئي جي مسلڪ کي ڇيڙيو نه جي فلسفي تي عمل ڪيو وڃي. ڪنوينشن ۾ ملڪ اندر انتها پسندي ۽ دهستگردي جي خاتمي لاءِ پوري ملڪ ۾ جاڳ پاڪستان جاڳ جي تحريڪ هلائڻ جو به فيصلو ڪيو ويو.چيو ويو ته ڪجهه قوتون مدرسن ۽ مسجدن کي پنهنجي سياسي مقسدن لاءِ استعمال ڪرڻ چاهين ٿيون ديني مدرسن جي قيادت ۽ شاگرد ملڪ مان فرقيواريت، تشدد انتها پسندي جي خاتمي لاءِ حڪومت ۽ ملڪ جي هٿياربند فوج سان مڪمل سهڪار ڪري رهيا آهيون ۽ ڪندا رهنداسين.ڪنوينشن ۾ قومي مصالحتي ڪائونسل جي ڪوششن کي هر سطح تي وڌيڪ موثر بنائڻ ۽ مختلف مذهبن ۽ ملڪن جي وچ م پيدا ٿيندڙ مسئلن کي حل ڪرڻ جي لا3 قدمن تي اطمينان جو اظهار ڪيو ويو. جاري ڪيل گڏيل پڌرنامي ۾ هندو برادري پاران سنڌ اندر پيدا ٿيندڙ ڪجهه مسئلن تي ڳڻتي جو اظهار ڪندي چيو ويو ته اسلام ڪنهن کي به زوري مسلمان ڪرڻ جي اجازت نٿو ڏئي ۽ نه اسلام جبري طور تي ڪنهن ٻئي مذهب جي عورتن يا ٻارڙين سان شادي جي اجازت ڏئي ٿو جيڪڏهن ڪير اسلام جي نالي تي جبري ڪري ٿو ته حڪومت ان جي خلاف ايڪشن وٺي اهڙن واقعن جي مڪمل جاچ عدالت ۽ آئين جي ذريعي ٿيڻ گهرجي جنهن ۾ جبري بنياد تي مسلمان بنائڻ جو چيو وڃي ٿو.ڪنوينشن ۾ ايم ڪيو ايم جي عبد الحسيب، مسلم ليگ ن سنڌ جي نائب صدر چوڌري اڪبر گجر، علامه جعفر صبحاني، قيوم سومرو، بشپ اعجاز سميت ٻين ڪيترن ئي سياسي ۽ مذهبي پارٽين جي نمائندن شرڪت ڪئي ۽ پنهنجن خيالن جو اظهار پڻ ڪيو.

 

سراج الحق ۽ رحمان ملڪ جي جهانگير ترين سان ملاقات

ڪراچي (اسٽآف رپورٽر) جماعت اسلامي جي امير سراج الحق جو چوڻ آهي ته اهم مسئلا  چوراهن بجاءِ ڳالهين جي ٽيبل تي ويهي حل ڪرڻ گهرجن جهانگير ترين چوي ٿو ته حڪومت چونڊن ڌانڌلين جي جاچ لاءِ جوڊيشل ڪميشن جو اعلان ڪري اڄ سياسي جرڳي جا ميمبر سراج الحق ۽ رحمان ملڪ تحريڪ انصاف جي اڳواڻ جهانگير ترين سان ملاقات ڪئي ملاقات ڪرڻ کان پوءِ سراج الحق صحافين سان ڳالهائيندي چيو آهي ته ساسي جرڳي ڊرافٽ تيار ڪري جهانگير ترين جي حوالي  ڪري ڇڏيو آهي. جنهن تي تحريڪ انصاف جا اڳواڻ  صلاح مشورا ڪندا  ايندڙ ٻن ڏينهن ۾ حڪومتي ٽيم سان ملاقات ٿيندي. رحمان ملڪ صحافين کي ٻڌايو ته تحريڪ انصاف ۽ حڪومت وچ ۾ ڊيٽ لاڪ ختم ٿيڻ گهرجي اسحاق ڊار سان به ملاقات ڪرڻ جي ڪوشش ڪنداسين سياسي جرڳي تيار ڪيل ڊرافٽ وزير اعظم نواز شريف کي موڪلي ڇڏيو آهي. ان موقعي تي جهانگير ترين صحافين سان ڳالهيون ڪندي چيو ته حڪومت چونڊ ڌانڌلي جي جاچ لاءِ جوڊيشل ڪميشن جو اعلان ڪري جوڊيشل ڪميشن ئي مسئلن جو حل آهي.

 

 

الطاف حسين جي آءِ ٽي جي رپورٽ کي رد ڪري ڇڏيو، اسڪاٽ ليڊيارڊ يا گڏيل قومن کان جاچ ڪرائڻ جو مطالبو

حيدرآباد (بيورو) متحده سربراه الطاف حسين جي آءِ ٽي رپورٽ کي رد ڪندي چيو آهي ته بلديه فيڪٽري  سانحي ۾ ملوث عنصرن کي الله تعاليٰ هن دنيا ۽ آخرت ۾ سخت سزا ڏيندو. جي آءِ ٽي جي رپورٽ ۾ ايم ڪيو ايم کي قصور وار قرار ڏيڻ تي افسوس جو اظهار ڪندي هن چيو ته بلديه فيڪٽري سانحي جي جاچ غير ملڪي ٽيمن کان ڪرائي وڃي ۽ پوءِ جيڪڏهن ايم ڪيو ايم جو ڪو ڪارڪن ان ۾ ملوث نظر اچي ته ان کي سرعام ڦاهي ڏني وڃي.اهڙن خيالن جو اظهار هن گذريل رات حيدرآباد ۾ الطاف حسين يونيورسٽي قائم ڪرڻ جي خوشي ۾ باغ مصطفيٰ ۾ رٿيل تقريب کي خطاب ڪندي ڪيو . هن چيو ته جيڪڏهن ايم ڪيو ايم جو ڪارڪن بلديه فيڪٽري سانحي ۾ ملوث هوندو ته اهو ان جو انفرادي عمل هوندو ۽ هڪ شخص جي انفرادي عمل جي گناهه کي پوري پارٽي مٿان نه وڌو وڃي ۽ ڪنهن به پارٽي تي بنا ڪنهن ثبوت جي الزام لڳائڻ غير آئيني غير اسلامي آهي. الطاف حسين چيو ته جيڪڏهن ان سانحي ۾ ايم ڪيو ايم جو ڪو ڪارڪن ملوث هجي ته ان کي سرعام ڦاهي ڏني وڃي. جي آءِ ٽي جي رپورٽ جعلي پيرن ۽ فقيرن جيان آهي. ايم ڪيو ايم سربراهه جو چوڻ هو ته تحريڪ انصاف ۽ جماعت اسلامي جي واتان ڪڏهن به القائده ۽ داعش جو نالو ڇو ناهي نڪتو. هن چيو ته پاڪ فوج اتر وزيرستان سميت پاڪستان جي ڪيترن ئي حصن ۾ پنهنجين قيمتي جانين جا نذرانا ڏئي دهشتگردي خلاف وڙهي رهي جنهن تي پوري قوم ۽ هو زبردست خراج پيش ڪري ٿو. حيدرآباد ۾ يونيورسٽي جي قيام جي حوالي سان هن چيو ته حيدرآباد جي عوام جي 55 سالن واري خواهش هاڻي پوري ٿي آهي. هن شاگردن ڏانهن مخاطب ٿيندي چيو ته اهي امتحانن ۾ نقل ڪرڻ بدران فيل ٿيڻ کي ترجيح ڏين ۽ پنهنجي استادن ۽ والدين جي عزت ڪندي ملڪ ۽ قوم جي خدمت ڪن. ا

 

سمورن ڪيسن جي پويان افتخار چوڌري جو هٿ آهي: پرويز مشرف

ڪراچي(اسٽاف رپورٽر) آل پاڪستان مسلم ليگ جي سربراهه پرويز مشرف چيو آهي ته مهنجي خلاف داخل ٿيل سمورن ڪيسن جي پويان اڳوڻي چيف جسٽس افختار  چوڌري جو هٿ آهي. هن چيو ته بينظير ڀٽو جي قتل ۾ ملوث ناهيان ۽ ان ڳالهه جي آصف زرداري کي به خبر آهي ڪشميري مجاهد ڀارت جي خلاف وڙهي رهيا آهن ۽ انهن جي مدد ڪرڻ واري پاليسي جو حامي آهيان نجي ٽي وي سان ڳالهيون ڪندي هن  وڌيڪ چيو ته پاڪستان پيپلز پارٽي هن وقت اختلافن جو شڪار آهي ۽ بينظير جو قتل منهنجي مٿان زوري مڙهيو پيو وڃي. پرويز مشرف چيوته 1979 کان پوءِ جڏهن ڪشميري مجاهد ڀارت جي خلاف اٿي کڙا ٿيا ته پاڪستان جي اها حڪمت عملي هئي ته ڪشميري مجاهدن جي حمايت ڪئي وڃي ۽ اهڙي پاليسي کي اڄ تائين مان صحيح سمجهان ٿو. هڪ سوال جي جواب ۾ پرويز مشرف چيو ته سڄي دنيا ۾ انٽيليجنٽس ايجنسين ۾ رابطا ٿيندا آهن. نائين اليون کان پو ءِ جيڪڏهن آمريڪا جو ساٿ نه ڏيون  ها ته دنيا ۾ اڪيلا ٿي وڃون هان ڀارت افغانستان تي حملي جي لاءِ آمريڪا کي پنهنجا هوائي اڏا ڏيڻ جي آڇ ڪئي هئي.

 

بلديا سانحي ۾ ملوث ماڻهن کي قانون موجب سخت سزا ڏني ويندي: مراد علي شاهه

ڀان سيد آباد(رپورٽر) سنڌ حڪومت خلاف ٿيندڙ سموريون سازشون ناڪام ٿي وينديون، سينيٽ چونڊن ۾ ميرٽ تي پ پ جون ٽڪيون ڏنيون پيون وڃن، سينيٽ چونڊن ۾ پ پ جا سمورا  اميدوار ڪامياب ٿيندا، سينيٽ چونڊن بابت ٻين پارٽين ۽ اپوزيشن سان پ پ قيادت جون ڳالهيون هلندڙ آهن، اهڙن خيالن جو اظهار سنڌ جي ناڻي ۽ انرجي کاتي واري صوبائي وزير سيد مراد علي شاهه ڪالهه ڳوٺ واهڙ ۽ ڳوٺ ٻنڀا ۾ مختلف معزز شخصيتن ۽ پ پ ڪارڪنن سان ڳالهائيندي ڪيو، هن وڌيڪ چيو ته سنڌ حڪومت خلاف سازشون ڪندڙ سياستدانن کي عوام رد ڪري ڇڏيو آهي، سنڌ حڪومت عوامي مسئلن جي حل لاءِ جاکوڙي رهي آهي، پيپلز پارٽي ڪڏهن به عوامي مسئلن تي سوديبازي ناهي ڪئي، عوامي مسئلا حل ڪرڻ اسان جو فرض آهي، سيد مراد علي شاهه چيو ته بلديا سانحي جي رپورٽ تي بنافرق جي ڪاروائي ڪئي ويندي، بلديا سانحي ۾ 250 ماڻهو سڙي فوت ٿيا اهو افسوسناڪ واقعو هو. رينجرز ان بابت رپورٽ پيش ڪئي آهي.بلديا سانحي رپورٽ تي بنافرق جي ڪاروائي ٿيڻ گھرجي.۽ بلديا سانحي ۾ ملوث ماڻهن کي قانون موجب سخت سزا ڏني ويندي، هن وڌيڪ چيو ته پ پ کي ختم ڪرڻ وارا پاڻ ختم ٿي ويا آهن، پ پ چيئرمين بلاول ڀٽو ۽ آصف علي زرداري جي قيادت ۾ مضبوط آهي،پ پ حڪومت عوام کي تعليم، صحت سميت سموريون بنيادي سهولتون فراهم ڪيون آهن، جن علائقن ۾ بنيادي سهولتون ناهن انهن ۾ به سهولت فراهم ڪرڻ لاءِ ڪوششون جاري آهن، ان موقعي تي پ پ ايم اين اي ملڪ اسد سڪندر، ايم پي اي ڊاڪٽر سڪندر علي شورو، ايم پي اي فقير داد کوسو، پ پ تعلقي صدر امان الله شاهاڻي، پ پ ايم پي اي ڊاڪٽر بهادر خان ڏاهري سميت ٻيا پڻ موجود هيا.

 

خيبرايجنسي ۾ امن لشڪر جي چوڪي ڀرسان ڌماڪو، 3 ڄڻا مارجي ويا، 5 زخمي

خيبرايجنسي (مانيٽرنگ ڊيسڪ) وادي تيره ۾ امن لشڪر جي چوڪي جي ڀرسان ڌماڪي ۾ 3 ڄڻا مارجي ويا جڏهن ته 5 زخمي ٿي پيا. خيبرايجنسي جي وادي تيراه جي علائقي نري بابا ۾ امن لشڪر جي چوڪي جي ڀرسان ڌماڪي ۾ 3 رضاڪار موقعي تي ئي مارجي ويا جڏهن ته 5 زخمي ٿي پيا. لاشن ۽ زخمين جي ڀرپاسي جي اسپتال منتقل ڪيو ويو جتي زخمين کي طبي امداد فراهم ڪئي وئي. واقعي کانپوءِ سيڪيورٽي فورسز جي وڏي نفري علائقي جو گهيرو ڪري سرچ آپريشن شروع ڪري ڇڏيو.