تازيون خبرون

Daily Archives: February 7, 2015

دهشتگردن خلاف آپريشن تيز ڪيو وڃي: سياسي ۽ عسڪري قيادت

اسلام آباد(بيورو) وزيراعظم نواز شريف ۽ آرمي چيف جنرل راحيل شريف نيشنل ايڪشن پلان تي عمل ۽ دهشتگردن خلاف آپريشن تيز ڪرڻ تي اتفاق ڪري ورتو، ملاقات ۾ فوجي عدالتون قائم ڪرڻ ۽ ٻين تي به غور ويچار ڪيو ويو. وزيراعظم نواز شريف سان آرمي چيف جنرل راحيل شريف وزيراعظم هائوس ۾ ملاقات ڪئي، ملاقات ۾ نيشنل ايڪشن پلان تي عمل، فوجي عدالتون قائم ڪرڻ، آپريشن ضرب عضب ۽ فوج جي پيشواراڻن معاملن تي غور ويچار ڪيو ويو. ذريعن جو چوڻ آهي ته عسڪري ۽ سول قيادت ملاقات ۾ نيشنل ايڪشن پلان تي عمل ۽ دهشتگردن خلاف آپريشن تيز ڪرڻ تي اتفاق ڪري ورتو آهي. ملاقات ۾ آرمي چيف جنرل راحيل شريف وزيراعظم کي آپريشن ضرب عضب ۽ آپريشن خيبر ون بابت تفصيلي بريفنگ ڏني. ٻئي طرف وزيراعظم نوازشريف اقوام متحده ۾ نامزد مستقل نمائندي ڊاڪٽر مليهه لوڌي کي اقوام  متحده جي سترهين يوم تاسيس تي پاڪستان جو موثر آواز اٿارڻ جي هدايت ڪندي چيو آهي ته ڪيترن ئي اشوز تي پاڪستان بابت غلط تاثرن کي دور ڪرڻ ضروري آهي جمعي تي هتي اقوام متحده ۾ نامزد مستقل نمائندي ڊاڪٽر مليهه لوڌي وزيراعظم نوازشريف سان وزيراعظم هائوس ۾ ملاقات ڪئي ان موقعي تي وزيراعظم چيو ته اقوام متحده جي سترهين يوم تاسيس جي موقعي تي پاڪستان جو موثر آواز هئڻ گهرجي وزيراعظم نئين ذميواري تي ان لاءِ نيڪ خواهشن جو اظهار ڪندي چيو ته ڪيترن ئي اشوز تي پاڪستان بابت غلط تاثر دور ڪرڻ ضروري آهي ڊاڪٽر مليهه لوڌي اهم ذميواري جي حوالي سان اعتماد جو اظهار ڪرڻ تي حڪومت جو شڪريو ادا ڪندي ويراعظم کي يقين ڏياريو ته هو پاڪستان جي مفاد جو تحفظ ۽ حڪومت پاران ترجيحي طور تي اهم معاملن تي ملڪ جي اصولي موقف کي اجاگر ڪرڻ جي چئلينج تي پورو لهڻ لاءِ پنهنجون بهترين ڪاوشون ڪتب آڻيندي.

 

 

ايم ڪيو ايم سان ڳالهيون هلن پيون، مشرف جي چوڌاري گهمندڙ مايوس ٿيند: شرجيل ميمڻ

ڪراچي (اسٽاف رپورٽر) سنڌ جي بلديات ۽ اطلاعات واري وزير شرجيل انعام ميمڻ چيو آهي ته سينيٽ جي چونڊن ۾ سنڌ ۾ پيپلز پارٽي جي شڪست جو خواب مخالفن لاءِ خواب ئي هوندو. ايم ڪيو ايم، مسلم ليگ فنڪشنل سميت پارليامينٽ ۾ موجود سمورين سياسي جماعتن سان ڳالهه ٻولهه جو سلسلو جاري آهي. پوليس ۾ ڀرتيون ميرٽ تي ٿي رهيون آهن، ڪنهن کي اعتراض هجي ته هو اسان کي لسٽون فراهم ڪري يا وري عدالت ۾ وڃي. سنڌ حڪومت جو هن وقت مڪمل فوڪس صوبي ۾ امن امان جي قيام تي آهي، قياس آرائين جو حقيقت سان ڪوبه تعلق ناهي. پرويز مشرف جي ترجيح سياست ناهي پر ملڪ کان ٻاهر  وڃڻ آهي ۽ ان سان گڏ هلندڙ صرف منهن ڏسندا رهجي ويندا. سياست ۾ ڪابه حتمي دوستي يا حتمي دشمني ناهي هوندي ۽ ڳالهه ٻولهه جو سلسلو جمهوريت جو حسن آهي. هو جمعي تي سنڌ اسيمبلي اجلاس کان اڳ ميڊيا سان ڳالهائي رهيو هو. اپوزيشن ليڊر شهر يار مهر پاران ڪيل تنقيد جي حوالي سان پڇيل سوال جي جواب ۾ شرجيل انعام ميمڻ چيو ته هر جماعت کي اختيار آهي ته هو اتحاد ٺاهي. هن چيو ته سنڌ ۾ پيپلز پارٽي کي سينيٽ جي چونڊن ۾ شڪست ڏيڻ جي دعويٰ ڪندڙن جا خواب صرف خواب ئي رهجي ويندا. هن چيو ته پي پي پي سينيٽ جي چونڊن ۾ صوبي ۾ ڪامياب ٿي ڏيکاريندي ۽ ان جي نتيجن ۾ ڪيتريون حيران ڪندڙ شيون به سامهون اينديون. هڪ سوال جي جواب ۾ هن چيو ته چونڊن جي حوالي سان ايم ڪيو ايم، مسلم ليگ فنڪشنل سميت پارليامينٽ ۾ موجود سمورين سياسي جماعتن سان ڳالهه ٻولهه جو عمل جاري آهي. پوليس ۾ ميرٽ تي ڀرتيون نه ٿيڻ جي شهر يار مهر جي الزام جي جواب ۾ صوبائي وزير شرجيل انعام ميمڻ چيو ته ڀرتيون مڪمل طور تي ميرٽ تي ڪيون پيون وڃن ۽ جيڪڏهن ڪنهن کي ان تي اعتراض آهي ته هو اسان کي لسٽون فراهم ڪري يا وري عدالتن ۾ وڃي. هن چيو ته هن وقت صوبي ۾ ايس ايس يو، ريپڊ رسپانس سيل سميت پوليس جا مختلف يونٽ صوبي ۾ قيام امن لاءِ ڪم ڪري رهيا آهن ۽ گذريل ڏينهن  ايپڪس جي اجلاس ۾ اهو به فيصلو ڪيو ويو آهي ته پوليس جي هڪ هزار نوجوانن کي فوجي سکيا ڏني ويندي. هن چيو ته اسان صوبي ۾ پوليس جي پگهارن کي ٻين صوبن جي برابر ڪري ڇڏيو آهي. شهيدن جي معاوضي کي وڌائي ڇڏيو آهي. سنڌ حڪومت جو مڪمل فوڪس هن وقت صوبي ۾ امن امان جي قيام تي آهي ۽ ان تي جيڪڏهن ڪير قياس آرائيون ڪري رهيو آهي ته ان جو حقيقت سان ڪوبه تعلق نه آهي. پيپلز پارٽي جي سنڌ اسيمبلي ميمبر طارق آرائين تي ڪيس داخل ٿيڻ جي سوال تي هن چيو ته هڪ سينيئر ۽ معزز ميمبر آهي ان تي مخالفن ڪيس داخل ڪرايو آهي ان جو اهو مقصد هرگز ناهي ته هو ڏوهاري آهي. هن چيو ته ان جو فيصلو عدالت کي ڪرڻو آهي. هن چيو ته طارق آرائين ڪوبه غلط ڪم نه ڪيو آهي. اڳوڻي صدر پرويز مشرف جي حوالي سان سوال جي جواب ۾ شرجيل ميمڻ چيو ته ان جي ترجيح دراصل سياست نه پر ملڪ کان ٻاهر وڃڻ آهي ۽ جنهن ڏينهن کيس وفاقي وزارت داخلا کان اجازت ملي هو هن ملڪ مان هليو ويندو ۽ ان سان گڏ سياست ڪندڙ منهن ڏسندا ئي رهجي ويندا. هن چيو ته ان جي آسري تي سياست ڪندڙن کي مايوسي کانسواءِ ڪجهه حاصل نه ٿيندو. هڪ ٻي سوال جي جواب ۾ شرجيل ميمڻ چيو ته سياست ۾ ڪابه حتمي دوستي يا حتمي دشمني ناهي هوندي ۽ ڳالهه ٻولهه جو سلسلو جمهوريت جو حسن آهي.

 

دهشتگردي تي وڏي وزير کان استعيفيٰ گهرڻ صحيح ناهي، شڪارپور سانحي جا جوابدار انجام تي پهچندا: خورشيد شاهه

ڪراچي(اسٽاف رپورٽر) قومي اسيمبلي ۾ مخالف ڌر جي اڳواڻ خورشيد شاهه جو چوڻ آهي ته دهشتگردي جا واقعا ٿيندا رهندا پر ان تي سنڌ جي وڏي وزير کان استعيفيٰ گهرڻ صحيح ناهي، نجي هوٽل ۾ سنڌي لوڪ ڪانفرنس جي افتتاح سيشن کي خطاب ۾ خورشيد شاهه چيو ته ڊاڪٽر خالد محمود سومرو جي قاتلن کي 10 ڏينهن ۾ گرفتار ڪيو ويو هو ۽ جلد ئي دهشتگردن جي انهن واقعن جو توڙ ڪڍي وٺنداسين، حڪومت ويهندي آهي ۽ پنهنجو لائحه عمل طئه ڪندي آهي 21 هين ترميم تي ڳالهائيندي  هن مولانا فضل الرحمان کي مشورو ڏنو ته هو پاڻ نواز شريف کي مڃائي آخر حڪومت جو حصو به ته آهي، شڪارپور سانحي جي حوالي سان هن جو چوڻ هو ته شڪارپور ۾ اسپتال آهي پر جديد سهولتون ناهن ان لاءِ زخمين کي ڪراچي منتقل ڪيو ويو.

 

ڪمند جي آبادگارن ۽ شگر مل مالڪن سان اجلاس ڪوٺائي معاملا نبيريا وڃن: وڏي وزير جي هدايت

ڪراچي (اسٽاف رپورٽر) سنڌ جي وڏي وزير سيد قائم علي شاه زراعت واري صوبائي سيڪريٽري کي ڪمند جي آبادگارن ۽ شگر مل مالڪن سان ڌار ڌار اجلاس ڪري ڪمند جي اگهن جي مسئلي جو حل ڳولهڻ جي هدايت ڏني آهي. وڏي وزير چيو آهي ته ڪمند جي اگهن جي تڪرار سبب ٻنهي ڌرين کي مالي نقصان ٿي رهيو آهي جيڪو اسين سنڌ صوبي جو نقصان سمجهون ٿا ۽ اهڙي نقصان جي اسين سٽ نه ٿا سهي سگهون. اها هدايت وڏي وزير زراعت واري صوبائي وزير علي نواز مهر،وڏي  وزير جي پرنسپل سيڪريٽري علم الدين بلو ،زراعت واري صوبائي سيڪريٽري گلزار شيخ ۽ ٻين آفيسرن سان چيف منسٽر هائوس ۾ منعقد اجلاس ۾ ڏني آهي. چيف منسٽر هائوس مان جاري هينڊ آئوٽ موجب اجلاس ۾ ڪمند جي مسئلي ۽ ان تڪراري اشو کي حل ڪرڻ جي حوالي سان تفصيلي غور ويچار ڪيو ويو آهي.اجلاس ۾ صوبائي وزير بريفنگ ۾ ٻڌايو ته جيتوڻيڪ اهو مسئلو سپريم ڪورٽ ۾ ٻڌڻي هيٺ آهي ان لاءِ هو ان حتمي فيصلي جو انتظار ڪري رهيو آهي ۽ ان معاملي ۾ مداخلت کان پاسو ڪري رهيو آهي. پر سندس انتظاميه سنڌ حڪومت پاران ڪمند جي مقرر ڪيل اگهه تي عمل نه ڪندڙ مل مالڪن کي نوٽيس جاري ڪيا آهن. هن چيو ته زراعت وارو صوبائي سيڪريٽري ۽ هو پاڻ ٻنهي ڌرين سان اجلاس ڪري کين ڪورٽ کان ٻاهر ان مسئلي جو حل ڳولڻ لاءِ هر ممڪن ڪوشش ڪندا. وڏي وزير صوبائي سيڪريٽري کي ايندڙ 9 فيبروري تائين ٻنهي ڌرين جو اجلاس طلب ڪرڻ ۽ وڌيڪ دير کانسواءِ مسئلي جو حل ڳولهڻ جي هدايت ڏني. هن چيو ته جيڪڏهن اهو مسئلو عدالت ۾ چيلينج نه ڪيو ويو هجي ها ته هن وقت سنڌ حڪومت ان مسئلي کي انتظامي طور تي حل ڪري چڪي هجي ها.

 

سنڌ اسيمبلي خاص ماڻهن لاءِ سنڌ بورڊ آف ٽيڪنيڪل ايجوڪيشن ترميمي بل 2015 اتفاق راءِ سان منظور ڪري ورتو

ڪراچي(اسٽآف رپورٽر) سنڌ اسيمبلي خاص ماڻهن لاءِ سنڌ بورڊ آف ٽيڪنيڪل ايجوڪيشن ترميمي بل 2015 اتفاق راءِ سان منظور ۽ سنڌ ۾ تعليم کاتي جي بند پيل 40 سيڪڙو اسڪولن بابت مهملي واري رٿ رد ڪري ڇڏي. اسپيڪر آغا سراج دراني جي صدارت هيٺ سنڌ اسيمبلي جي اجلاس ۾ پارلياماني معاملن واري وزير ڊاڪٽر سڪندر مينڌرو خاص ماڻهن لاءِ سنڌ بورڊ آف ٽيڪنيڪل ايجوڪيشن ترميمي بل 2015 ايوان ۾ پيش ڪيو، بل ۾ متحده جي عورت ميمبر  ثمينا افضل جي ڪيل ترميمن کي شامل ڪرڻ کانپوءِ بل اتفاق راءِ سان منظور ڪيو ويو. ان کان اڳ متحده ميمبر محمد حسين تعليم کاتي جي 40 سيڪڙو بند پيل اسڪولن بابت مهملي واري رٿ ايوان ۾ پيش ڪئي. تعليم واري صوبائي وزير نثار کهڙي پاليسي بيان ڏيندي چيو ته بند پيل اسڪول کولرائڻ لاءِ قدم کنيا ويا آهن، مختلف شهرن ۾ اڍائي هزار گوسڙو استادن کي معطل ڪيو ويو آهي نثار کهڙي جي پاليسي بيان کانپوءِ مهملي واري رٿ رد ڪئي وئي. ان کان اڳ اجلاس ۾ حيدرآباد مان چونڊيل ايم ڪيو ايم جي ايم پي اي راشد خلجي ۽ دلاور قريشي ڌيان ڇڪايو نوٽيس تي ڳالهائيندي چيو ته حڪومت حيدرآباد جي شهرين کي فلٽر پلانٽ لڳائي پاڻي جي فراهمي جو خاص پيڪيج ڏيڻ جو ڪو ارادو رکي ٿي. هنن چيو ته حيدرآباد جا شهري پيئڻ جي پاڻي لاءِ سڪي رهيا آهن. مڪاني ادارن واري صوبائي وزير شرجيل ميمڻ جواب ڏيندي چيو ته حيدرآباد ۾ بجلي جي بلن جي ادائگي نه ٿيڻ سبب مسئلو هيو جيڪو هاڻي حل ٿي ويو آهي. اسپيڪر آغا سراج دراني رولنگ ڏيندي چيو ته صوبائي وزير چونڊيل نمائندن کي پنهنجي آفيس ۾ گهرائي مسئلو حل ڪرائي. اسپيڪر بعد ۾ اجلاس سومر تي صبح جو 10 وڳي تائين ملتوي ڪري ڇڏيو. سنڌ اسيمبلي جي اجلاس ۾ ايم ڪيو ايم جي ميمبر محمد حسين شڪايت ڪئي ته قومي مالياتي ايوارڊ بابت ايوان کي اعتماد ۾ نه پيو ورتو وڃي، ناڻي واري وزير سيد مراد علي شاهه ٻڌايو ته اين ايف سي بابت رپورٽ اسيمبلي سيڪريٽريٽ ۾ جمع ڪرائي ڇڏي آهي ايم ڪيو ايم جي خواجه اظهار الحسن چيو ته پوليس موبائيل جي اڪثريت ايڪسائيز ڊپارمٽينٽ مان رجسٽرڊ ناهي، پارلياماني معاملن واري وزير سڪندر مينڌرو جواب ڏنو ته پوليس جون چار هزار کان وڌيڪ موبائيل آهن جيڪي سڀ رجسٽرڊ آهن ايم ڪيو ايم جي ڪامران اختر جي سوال تي شرجيل ميمڻ ٻڌايو ته عدالتي اسٽي آرڊر ختم ٿيندي ئي فائر ٽينڊر جي خريداري مڪمل ٿي ويندي.

 

ڀارت ڪشميرين جي خودمختياري بابت نهرو جو واعدو وساري ڇڏيو: پاڪستان

اسلام آباد(بيورو) پرڏيهي ترجمان جو چوڻ آهي ته ڀارت ڪشميرين جي حقن کي پائمال ڪري رهيو آهي هن چيو ته ڀارت ڪشميرين جي خودمختياري بابت نهرو جو واعدو وساري ڇڏيو نهرو چيو هو ته ڪشمرين کي انهن جي مرضي جي خلاف گڏ نه رکنداسين اسلام آباد ۾ هفتيوار بريفنگ ۾ پرڏيهي ترجمان تسنيم اسلم جو چوڻ هو ته تقريبن 3 سئو پاڪستاني زائرين عراق ۾ آهن، اتحاد ايئرلائن جي بدانتظامي سبب زائرين کي واپسي ۾ دير ٿي، هن چيو ته بغداد ۾ هيڊ آف مشن زائرين سان ملاقات ڪئي ۽ سهولتون مهيا ڪيون، زائرين جي واپسي لاءِ اتحاد ايئرلائن سان رابطي ۾ آهيون، والاريل ڪشمير بابت پرڏيهي ترجمان جو چوڻ هو ته ڀارت ڪشميرين جا حق پائمال ڪري  رهيو آهي ڀارت ڪشميرين جي خودمختياري بابت نهرو جو واعدو وساري ڇڏيو نهرو چيو هو ته ڪشميرين کي انهن جي مريض جي خلاف گڏ نه رکنداسين، چين جي صدر جي پاڪستاني دوري بابت خبرن تي تسنيم اسلم جو چوڻ هو ته چين جو پرڏيهي وزير هن مهيني پاڪستان ايندو چين جي پرڏيهي وزير جي دوري جي تاريخ جو اعلان بعد ۾ ٿيندو چين جي صدر جي دوري جي تاريخ طئه ناهي اخباري خبرون افواهن تي ٻڌل آهن افغان مهاجرن جي واپسي بابت ترجمان ٻڌاوي ته يو اين ايڇ سي آر کي افغان مهاجرن جو خيال رکڻو هو، هڪ ڏهاڪي کان پاڪستان افغان مهاجرن جو وزن کنيو ويٺل آهي افغان سان جا ڀيڻ، ڀاءُ آهن انهن جي رضاڪاراڻي واپسي چاهيون ٿا اميد آهي ته افغان مهاجرن جي جلد واپسي لاءِ قدم کنيا ويندا.

 

شڪارپور سانحي جي ماسٽر مائنڊ جي ڪافي حد تائين سڃاڻپ ڪري ورتي آهي: چوڌري نثار

اسلام آباد(بيورو) وفاقي گهرو وزير چوڌري نثار انڪشاف ڪيو آهي ته شڪارپور سانحي جي جاچ ۾ اڳڀرائي ٿي آهي مشهوري نه ٿا ڪرڻ چاهيون ذميوارين کي ڪيفر ڪردار تائين پهچائينداسين، قوم پشاور سانحي کي نه وساري سگهندي، قومي اسيمبلي ۾ چوڌري نثار انڪشاف ڪيو آهي ته شڪارپور سانحي جي عنصرن جو پتو لڳايو ويو آهي ماسٽر مائنڊ جي ڪافي حد تائين سڃاڻپ ڪئي وئي آهي شڪارپور سانحي جي جاچ جي مشهوري نه ٿا ڪرڻ چاهيون، ان واقعي ۾ ملوث ماڻهن کي منتقي انجام تائين پهچائينداسين، هن چيو ته مشڪل جنگ ۾ بهتري آڻڻ جي ڪوشش ڪري رهيا آهيون، وفاقي وزير چيو ته قوم پشاور سانحي کي ڪڏهن به وساري نه سگهندي قومي لائحه عمل  تي قوم متفق آهي رت جي هڪ هڪ قطري حساب وٺنداسين چوڌري نثار جو چوڻ هو ته پاڪستان  ۽ افغانستان هڪ ٻئي سان ڀرپور تعاون ڪري رهيا آهن معلومات جي ڏي وٺ جي نظام ۾ بهتري آئي آهي.

 

ڀارت مسلسل لائين آف ڪنٽرول جي ڀڃڪڙي ڪري رهيو آهي: خواجه آصف

اسلام آباد(بيورو) قومي اسيمبلي ۾ اسلام آباد ماتحت عدليه سروس ٽربيونل جي قيام جو بل 2015 لاڳاپيل ڪميٽي حوالي ڪري ڇڏيو، بچاءَ واري وزير خواجه آصف ايوان کي آگاهي ڏني آهي ته ڀارت مسلسل لائين آف ڪنٽرول جي ڀڃڪڙي ڪري رهيو آهي، ڀارتي فائرنگ  جي نتيجي ۾ هن وقت تائين 16 شهادتون ٿي چڪيون آهن. قومي اسيمبلي جو اجلاس اسپيڪر سردار اياز صادق جي صدارت هيٺ ٿيو، جنهن ۾ مختلف معاملن تي بحث ڪيو ويو.  اجلاس کي لکت ۾ آگاهي ڏيندي بچاءَ واري وزير خواجه آصف چيو ته ڀارتي فوج سيپٽمبر 2014 کان هن وقت تائين هڪ سئو 59 ڀيرا پاڪستاني سرحد تي فائرنگ ڪئي آهي. خواجه آصف چيو ته لائين آف ڪنٽرول ۽ ورڪنگ بائونڊري تي 14 فوجي ۽ 2 شهري شهيد ٿيا، جڏهن ته 60 شهري ۽ 14 فوجي زخمي به ٿيا هئا. اجلاس ۾ قانون ۽ انصاف واري وفاقي وزير پرويز رشيد ماتحت عدليه سروس ٽربيونل جي قيام جو بل 2015 پيش ڪيو.  اسپيڪر بل لاڳاپيل ڪميٽي حوالي ڪندي اجلاس سومر شام 4 وڳي تائين ملتوي ڪري ڇڏيو.

 

اليڪشن ڪميشن سنڌ ۽ پنجاب ۾ ٻيهر مڪاني چونڊن جي تاريخ ڏئي ڇڏي

اسلام آباد(بيورو) اليڪشن ڪميشن سنڌ ۽ پنجاب ۾ هڪ دفعو ٻيهر مڪاني چونڊن جي تاريخ ڏئي ڇڏي، اليڪشن ڪميشن جي ايڊيشنل سيڪريٽري شير افگن چيو آهي ته پنجاب ۾ مڪاني چونڊون نومبر 2015 ۽ سنڌ ۾ مارچ 2016 ۾ ڪرايون وينديون، ڪي پي ڪي ۾ مڪاني چونڊون مئي جي آخر ۾ ڪرايون وينديون. چيف اليڪشن ڪمشنر سردار رضا جي صدارت هيٺ اليڪشن ڪميشن جو اهم اجلاس ٿيو، اجلاس ۾ پنجاب، سنڌ ۽ خيبرپختونخواهه جي صوبائي اليڪشن  ڪمشنرز، نادرا عملدارن ۽ ٻين شرڪت ڪئي. اجلاس ۾ مڪاني چونڊن، تڪ بندين ۽ ٻين معاملن تي غور ويچار ڪيو ويو ۽ سنڌ ۽ پنجاب ۾ مڪاني چونڊن لاءِ نيون تاريخون طئي ڪيون ويون. اليڪشن ڪميشن جي سيڪريٽري شير افگن چيو آهي ته پنجاب ۾ مڪاني چونڊون نومبر 2105 ۽ سنڌ ۾ مارچ 2016 ۾ ڪرايون وينديون، ڪي پي ڪي ۾ مڪاني چونڊون مئي جي آخر ۾ ڪرايون وينديون. اجلاس کان پوءِ ميڊيا کي بريفنگ ڏيندي هن چيو ته مڪاني چونڊن لاءِ صوبن جي ڏنل تاريخن تي عمل ڪيو ويندو……

 

پ پ وارن حڪومت کي هميشه ذاتي مفادن لاءِ استعمال ڪيو، نوڪريون وڪيون پيون وڃن: شهريار مهر جو الزام

ڪراچي(اسٽاف رپورٽر) سنڌ اسيمبلي ۾ مخالف ڌر جَي اڳواڻ شهريار مهر چيو آهي ته پ پ وارن حڪومت کي هميشه ذاتي مفادن لاءِ استعمال ڪيو آهي، هاڻ صوبي ۾ ڪو به اڻوڻندڙ واقعو پيش آيو ته ان جا ذميوار وڏو وزير ۽ اسپيڪر هوندا. سنڌ اسيمبلي ٻاهران ميڊيا سان ڳالهائيندي شهريار مهر چيو ته سنڌ پوليس ۾ 10 هزار ڀرتيون سياسي بنيادن ۽ پئسن عيوض ڪيون ويون، جيڪو سلسلو اڃا تائين جاري آهي. هـُن چيو ته 32 ڊي ايس پيز سڌا سنوان ڀرتي ڪيا پيا وڃن، جيڪا قانون جي ڀڃڪڙي آهي. اپوزيشن ليڊر چيو ته گهوٽڪي ۾ هڪ ايم پي اي تي نوڪرين لاءِ پئسا وٺڻ جو ڪيس داخل ٿيو آهي، جنهن مان سنڌ سرڪار جا ڪرتوت واضح آهن. سندس چوڻ هو ته پنجاب ۾ پوليس جي جوانن جي پاسنگ آئوٽ پريڊ ۾ وزيراعظم، آرمي چيف ۽ وڏي وزير شرڪت ڪئي، جڏهن ته لاڙڪاڻي ۾ ٿيل پريڊ ۾ صرف آءِ جي شريڪ ٿيو. شهريار مهر چيو ته شڪارپور ۾ امن امان جي صورتحال انتهائي خراب آهي، هاڻ صوبي ۾ ڪو به اڻوڻندڙ واقعو پيش آيو ته ان جا ذميوار وڏو وزير ۽ اسپيڪر هوندا. پرويز مشرف بابت ڳالهائيندي مخالف ڌر جي اڳواڻ چيو ته هو مستقل ۾ اڳوڻي صدر جو سياسي رول نٿو ڏسي.