تازيون خبرون

Daily Archives: February 4, 2015

ڪور ڪمانڊرس ڪانفرنس: دهشتگردي ۽ انتهاپسندي جو خاتمو بنا فرق آڻڻ جو فيصلو

راولپنڊي(بيورو) پاڪ فوجي جي سربراهه جنرل راحيل شريف جي صدارت هيٺ ڪور ڪمانڊر ڪانفرنس ۾ ملڪ مان دهشتگردي، انتهاپسندي ۽ فرقيواريت جو بنا فرق خاتمو آڻڻ جي عزم جو اظهار ڪيو ويو، پاڪ فوج جي ترجمان مطابق آرمي چيف جنرل راحيل شريف جي صدارت هيٺ 8 ڪلاڪن کان وڌيڪ جاري رهندڙ ڪور ڪمانڊر ڪانفرنس ۾ ملڪ ۽ خطي جي سيڪيورٽي صورتحال سميت فوج جي پيشيوراڻن معاملن تي خيالن جي ڏي وٺ ڪئي وئي جڏهن ته ان موقعي تي اجلاس ۾ شريڪ ڪمانڊرن اندروني ۽ پرڏيهي سلامتي وارن معاملن جو جائزو وٺندي آپريشن ضرب عضب، خيبر ون ۽ پاڪ افغان لاڳاپن تي به ڳالهه ٻولهه ڪئي، اجلاس ۾ فيصلو ڪيو ويو ته وفاقي ۽ صوبائي سطح تي نيشنل ايڪشن پلان تي عملدرآمد ڪندي ملڪ مان دهشتگردي، انتهاپسندي ۽ فرقيواريت  جو بنا فرق خاتمو ڪيو ويندو،پاڪ فوج جي ترجمان مطابق  ڪور ڪمانڊر ڪانفرنس جو ٻيون مرحلو سڀاڻي به ٿيندو جنهن ۾ آرمي چيف جنرل راحيل شريف برگيڊيئر پوسٽن تي رڪيل مقررين جي حوالي سان اعلان ڪندو

 

وفاق پاران ڪي اليڪٽرڪ کي 650 ميگاوٽ بجلي نه ڏيڻ جو فيصلو

اسلام آباد(بيورو) ڪراچي جي شهرين لاءِ نئين پريشاني شروع ٿي وئي وفاقي حڪومت ۽ ڪي اليڪٽرڪ هڪ ڀيرو ٻيهر آمهوهن سامهون اچي ويا وفاق ڪراچي کي نيشنل گرڊ مان 650 ميگاوٽ بجلي نه ڏيڻ وج فيصلو ڪيو آهي هي بجلي ملڪ جي ٻين حصن کي فراهم ڪئي ويندي ان فيصلي بابت پاڻي ۽ بجلي واري سيڪريٽري يونس ڊاهگا قومي اسيمبلي جي ڪميٽي کي بريف ڪيو يونس ڊاهگه چيو ته وفاق جي فيصلي سان نيپرا ۽ اين ٽي ڊي سي کي به آگاهه ڪيو ويو آهي ڪي اليڪٽرڪ پنهنجن پلانٽس مان اڍائي هزار ميگاواٽ بجلي پيدا ڪري سگهي ٿي هو پنهنجي تعداد مطابق ڪم ڪري ڪي اليڪٽرڪ جي ترجمان جو موقف آهي ته 1700 ميگاوٽ کان وڌيڪ بلجي پيدا نه ٿي ڪري سگهجي 650 ميگاوٽ بجلي جي فراهمي جو معاملو سنڌ هاءِ ڪورٽ ۾ آهي جيڪڏهن بجلي بند ڪئي وئي ته وفاقي حڪومت توهين عدالت ڪندي، ڪي اليڪٽرڪ جي بيان تي ردعمل ڏيندي ان ٽي ڊي سي جي ترجمان جو چوڻ آهي ته معاهدي جو مدو ختم ٿي چڪوآهي، جنهن کانپوءِ توهين عدالت نٿي ٿي سگهي، ڪراچي جي بجلي جي طلب 1700 ميگاوٽ آهي جڏهن ته ڪي اليڪٽرڪ جي پيداواري صلاحيت 2 هزار ميگاواٽ آهي سنڌ اسيمبلي ۾ به وفاق ۽ ڪي اليڪٽرڪ ۾ جاري  ڇڪتاڻ جي گونج ٻڌي وئي ايم ڪيو ايم جي ميمبر سيد خال احمد جي قرار منظور ڪري ورتي، قرارداد مطابق سنڌ حڪومت وفاق کي معاهدي تي عملدرآمد لاءِ خط به لکيو آهي متحده جي اسيمبلي ميبر خواجه اظهار الحق چيو آهي ته ڪي اليڪٽرڪ کي 650 ميگاوٽ بجلي فراهمي نه روڪي وڃي ڪي اليڪٽرڪ کي پنهنجي پيداوار کان هٽي نيشنل گرڊ مان 650 ميگاواٽ بلجي جي فراهمي وارو معاهدو پيپلز پارٽي حڪومت ۾ ڪيو ويو هو.

 

سنڌ اسيمبلي ۾ ڪراچي کي 650ميگاواٽ بجلي جي فراهمي يقيني بڻائڻ جو ٺهراءُ منظور

ڪراچي (اسٽاف رپورٽر) سنڌ اسيمبلي ۾ ڪراچي کي 650ميگاواٽ بجلي جي فراهمي يقيني بڻائڻ ۽ سرڪاري نوڪرين ۾ اقليتن جي 5 سيڪڙو ڪوٽا تي عملدرآمد وارا ٺهراءُ اتفاق راءِ سان منظور ڪيا ويا، جڏهن ته شهر يار مهر جي مخالف ڌر اڳواڻ کي پي اي سي چيئرمين بڻائڻ واري رٿ ۽ متحده جي محمد حسين جي تعليم کاتي ۾ هڪ لک گوسڙو ملازمن بابت مهملي واري رٿ رد ڪئي وئي. سنڌ اسيمبلي جو اجلاس اسپيڪر آغا سراج دراني جي صدارت هيٺ ٿيو، جنهن دوران فنڪشنل ليگ جي ميمبر نصرت سحر عباسي سوال اٿاريو ته ورڪس اينڊ سروسز کاتي ۾ اربين رپين جي ڪرپشن ٿي آهي پر الزام هيٺ آيل ايڪسين منير عباسي ۽ ٻين عملدارن کي ٻيهر مقرر ڪيو ويو آهي. ورڪس اينڊ سروسز واري وزير هزار خان بجاراڻي چيو ته منير عباسي ۽ ٻين عملدارن کي چيف سيڪريٽري الزامن کان آجو ڪري ڇڏيو آهي، جنهن ڪري کين ٻيهر مقرر ڪيو ويو آهي. ايم ڪيو ايم جي پونجو مل ڀيل چيو ته اينٽي ڪرپشن کاتو بدعنوانين ۾ ملوث عملدارن خلاف ڪارروائي ڪرڻ لاءِ تيار نه آهي ۽ اينٽي ڪرپشن کاتو آنٽي کاتو بڻجي ويو آهي. ان موقعي تي اسپيڪر اينٽي ڪرپشن کاتي جي وزير کي مخاطب ٿيندي چيو ته رڳو ننڍن ملازمن خلاف ڪارروائي نه ڪريو پر وڏن عملدارن کي به انصاف جي ڪٽهڙي ۾ آڻيو. اجلاس دوران ف ليگ جي نندڪمار گوڪلاڻي سرڪاري نوڪرين ۾ اقليتن لاءِ مخصوص 5 سيڪڙو ڪوٽا تي عملدرآمد بابت ٺهراءُ پيش ڪيو، جنهن جي اتفاق راءِ سان منظوري ڏني وئي. اجلاس دوران متحده جي خالد احمد ڪراچي کي 650 ميگاواٽ بجلي جي فراهمي يقيني بڻائڻ وارو ٺهراءُ پيش ڪيو، جنهن جي به اتفاق راءِ سان منظوري ڏني وئي. اجلاس دوران شهر يار مهر رٿ پيش ڪئي ته چارٽر آف ڊيموڪريسي تحت پي اي سي چيئرمين مخالف ڌر جو اڳواڻ ٿيڻو آهي، جنهن تي وفاق ۾ عمل ٿي رهيو آهي پر سنڌ ۾ ان تي عمل نه پيو ٿئي. پ پ ميمبرن پاران رٿ جي مخالفت سبب شهر يار مهر جي رٿ رد ڪئي وئي. شهر يار مهر ڳالهائيندي چيو ته سندس رٿ رد ڪئي وئي ته هو سنڌ جي عوام کي ٻڌائيندو ته بينظير جي نالي تي اربين رپين جي ڪرپشن ٿي رهي آهي. اجلاس دوران متحده جي محمد حسين تعليم کاتي ۾ هڪ لک گوسڙو ملازمن بابت التويٰ واري رٿ پيش ڪئي، جنهن جي تعليم واري وزير نثار کهڙو پاران مخالفت ڪرڻ سبب ان کي رد ڪيو ويو. اجلاس دوران نصرت سحر عباسي طئي ٿيل فارمولا تحت ڊاڪٽرن کي پروموشن نه ملڻ خلاف رٿ پيش ڪئي، اها به پ پ ميمبرن جي مخالفت سبب رد ڪئي وئي. سنڌ اسيمبلي ۾ مختلف معاملن تي بحث جاري هو ته اسپيڪر ڪارروائي جمعي تائين ملتوي ڪري ڇڏي.

 

پاڪ فوج جو آپريشن ضرب عضب جاري آهي، جلد ئي ملڪ مان انتهاپسندن ۽ دهشتگردن جو انت ٿي ويندو: صدر

اسلام آباد (بيورو) پاڪستان جي صدر ممنون حسين چيو آهي ته دهشتگردن جي خلاف پاڪ فوج جو آپريشن ضرب عضب جاري اهي جلد ئي ملڪ مان انتهاپسندن ۽ دهشتگردن جو انت ٿي ويندو پاڪستان ۽ قزاقستان جي وچ ۾ ايئر لنڪ بحال ڪرڻ جي ڪوشش ڪئي وڃي ايئر لنڪ بحال ٿيڻ سان ٻنهي دوست ملڪن جي عوام وچ ۾ رابطو وڌندو ٻطرفو واپار کي به هٿي ملندي صدرممنون حسين اها ڳالهه قزاقستان جي لاءِ پاڪستان جي نامزد سفير عبدالصالق کان سان ڳالهه ٻولهه ڪندي ڪئي جنهن صدر سانايوان صدر اسلام آباد ۾ ملاقات ڪئي ۽ پنهنيج ذميواري بابت معاملن تي خيالن جي ڏي وٺ ڪئي صدر ممنون حسين قزاقتسان لاءِ نئين سفير جي حيثيت سان مقرري تي کيس واڌايون ڏيندي هدايت ڪئي ته ٻنهي ملڪن وچ ۾ اقتصادي ۽ تجارتي لاڳاپا وڌائڻ تي ڪوشش ڪن صدر چيو ته قزاقستان ۾ سيڙپڪار کي ٻڌايون ته پرڏيهي سيڙپڪاري لاءِ پاڪستان جا قانون خطي ۾ سڀ کان بهتر آهن ۽ هو حڪومت پاڪستان جي سيڙپڪار دوست پاليسين مان فائدو وٺن. صدر چيو ته دهشتگردن جي خلاف پاڪ فوج جو آپريشن ضرب عضب جاري آهي ۽ جلد ئي ملڪ مان انتهاپسندن ۽ دهشتگردن جي پاڙ پٽي ويندي صدر چيو ته قوم دهشتگردن جي خاتمي لاءِ متحد آهي آپريشن ضرب عضب کان پوءِ ملڪ ۾ سيڙپڪاري ۽ ڪاروبار جا موقعا وڌيڪ وڌندا صدر چيو ته قزاقستان سان برآمدات کي وڌيڪ وڌائڻ جي ضرورت آهي صدر هدايت ڪئي ته ٻنهي ملڪن وچ ۾ تجارتي توازن قائم ڪرڻ جي ڪوشش ڪئي وڃي صدر ممنون حسين چيو ته ٻنهي ملڪن وچ ۾ ايئر لنڪ هڪ مسئلو آهي ۽ ان کي بحال ڪرڻ جي ڪوشش ڪئي وڃي صدر چيو ته وچ ايشيائي رياستون پاڪستان جي لاءِ وڌي منڊي ثابت ٿي سگهن ٿيون جتي پاڪستان گارمينٽس چانور ۽ کنڊ برآمد ڪري سگهي ٿو پاڪستان پنهنجون شيون وڪرو ڪري سگهي ٿو صدر چيو ته سڄي وچ ايشيائي رياستن ۾ ننڍيون ننڍيون زندگي جي ضرورتن جي گهڻي گهرج آهي پاڪستان هي شيون برآمد ڪري ان خال کي پورو ڪري سگهي ٿو صدر اميد ظاهر ڪئي ته نامزد سفير قزاقتسان سان پاڪستان جي تجارتي ۽ اقتصادي لاڳاپن کي وڌيڪ مضبوط بنائڻ لاءِ پوري دلچسپي سان ڪم ڪندو نامزد سفير ملاقات تي صدر جو شڪريو ادا ڪندي کيس يقين ڏياريو ته هو قزاقتسان سان خاص ڪري تجارتي ڪاروباري ۽ سيڙپڪاري لاڳاپا وڌائڻ تي توجهه ڏيندي ٻطرفي لاڳاپن جي استحڪام لاءِ خلوص نيت سان ڪم ڪندو.

 

وفاقي حڪومت جي رويي سان سنڌ ۾ احساس محرومي وڌي رهي آهي: خورشيد شاهه

اسلام آباد (بيورو) قومي اسيمبلي ۾ مخالف ڌر شڪارپور سانحي تي وفاقي حڪومت جو جواب نه اچڻ تي حڪومت مٿان ڇـِتي تنقيد ڪئي آهي، خورشيد شاهه چيو آهي ته وزيراعظم ۽ وفاقي گهرو وزير وٽ شڪارپور وڃڻ لاءِ وقت ئي ناهي، حڪومت جي رويي سان سنڌ ۾ احساس محرومي وڌي رهي آهي. قومي اسيمبلي جو اجلاس اسپيڪر سردار اياز صادق جي صدارت هيٺ ٿيو، جنهن ۾ شڪارپور سانحي سميت مختلف معاملن تي بحث ڪيو ويو. اپوزيشن ليڊر خورشيد شاهه اجلاس ۾ اعتراض اٿاريو ته گذريل ڏينهن پشاور سانحي تي ايترو بحث ڪيو ويو پر حڪومت طرفان ڪو به جواب ناهي آيو، وفاقي گهرو وزير ايوان ۾ اچڻ جي زحمت نٿو ڪري ۽ نه ئي وٽس ڳالهائڻ لاءِ وقت آهي. خورشيد شاهه چيو ته وزيراعظم توڙي وفاقي گهرو وزير هن وقت تائين شڪارپور جو دورو ناهي ڪيو، حڪومت جي اهڙي رويي سان سنڌ ۾ احساس محرومي وڌي رهي آهي. مخالف ڌر جي اڳواڻ چيو ته جيڪو وفاقي گهرو وزير اسلام آباد ۾ هڪ سڪندر کي نه سنڀالي سگهيو، اهو ملڪ ڪيئن هلائي سگهندو. مملڪتي وزير شيخ آفتاب چيو ته شڪارپور رڳو سنڌين جو نه پر سڀني جو شهر آهي، گذريل پنجن سالن تائين پ پ جي سنڌ ۾ حڪومت هئي پر امن امان جي صورتحال سڀني جي آڏو آهي. شيخ آفتاب چيو ته حڪومت جي پهرين ترجيح ڪراچي سميت سڄي ملڪ ۾ امن قائم ڪرڻ آهي، وزيراعظم نواز شريف جي ايجنڊا ملڪ کي پر امن بڻائڻ آهي، جيترو ڪم نواز شريف ڪيو آهي، ڪنهن به وزيراعظم پنهنجي دور ۾ نه ڪيو هوندو. اجلاس ۾ عوامي مسلم ليگ جي سربراهه شيخ رشيد اعتراض واري نقطي تي ڳالهائڻ جي ڪوشش ڪئي ته اسپيڪر کيس روڪي ورتو. شيخ رشيد ايوان ۾ اٿي گوڙ شروع ڪيو، جنهن کي اسپيڪر کيس چيو ته جيڪڏهن اوهان ئي اهڙو ڪجهه ئي ڳالهائڻو آهي ته ايوان کان ٻاهر وڃي ڳالهايو، جنهن تي خورشيد شاهه پاران مداخلت ڪئي وئي ته شيخ صاحب کي ڳالهائڻ ڏنو وڃي. خورشيد شاهه جي مداخلت بعد شيخ رشيد کي ڳالهائڻ جي اجازت ڏني وئي پر عوامي مسلم ليگ جو سربراهه ڪاوڙ مان ايوان هليو ويو.

 

سنڌ ۾ رينجرز امن امان قائم ڪرائڻ لاءِ دهشتگردن سان وڙهي رهي آهي: شرجيل ميمڻ

ڪراچي (اسٽاف رپورٽر)  سنڌ جي اطلاعات ۽ بلديات واري صوبائي وزير شرجيل انعام ميمڻ چيو آهي ته دهشتگردي هن ملڪ لاءِ ناسور بڻجي وئي آهي ۽ ماضي ۾ ان جو ٻج پوکيو ويو هو حڪومت ان خلاف ڀرپور ايڪشن کڻي رهي آهي، جيڪي سياسي ۽ مذهبي جماعتون ڪڏهن ان کي پنهنجي سسٽم جو حصو تصور ڪري انهن سان ڳالهيون ڪرڻ لاءِ چوندا هئا اهي به اڄ کين انهن خلاف آپريشن لاءِ چئي رهيا آهن. اڄ ملڪ جي عسڪري ۽ سموريون سياسي قوتون انهن دهشتگردن خلاف هڪ پليٽ فارم تي متحد آهن ته ان جو هن ملڪ مان خاتمو ڪري ئي ساهه کڻنداسين. سنڌ حڪومت صوبي ۾ ٿيندڙ سنگين واقعن جو سختي سان جوٽيس وٺي سمورا گهربل وسيلا ۽ اسٽريجٽي سان امن جي قيام لاءِ قدم کڻي رهي آهي. هو اڱاري تي سنڌ اسيمبلي جي اجلاس کان اڳ ميڊيا سان ڳالهائي رهيو هو. شرجيل ميمڻ چيو ته اڱاري جي صبح جو گلشن اقبال جي اسڪول ويجهو ۽ سائيٽ ايريا ۾ رينجرز جي موبائيل تي حملا افسوسناڪ آهن. هن چيو ته اهڙي طرح جي سنگين واقعن جي ڪري ئي سنڌ حڪومت پنهنجن سمورن وسيلن کي استعمال ڪندي صوبي ۾ امن امان جي قيام لاءِ قدم کڻي رهي آهي. هن چيو ته گذريل ڏينهن ايپڪس جي اجلاس ۾ به ڪور ڪمانڊر سنڌ، آئي جي سنڌ ۽ ڊي جي رينجرز سميت سمورن اعليٰ آفيسرن ان ڳالهه تي اتفاق ڪيو آهي ته صوبي ۾ امن امن جي قيام لاءِ هر ممڪن اپاءُ ورتا ويندا ۽ دهشتگردن جو خاتمو ڪري ئي سک سان ويهنداسين. هن چيو ته دهشتگردي ۽ دهشتگردن کي منهن ڏيڻ لاءِ هڪ هزار پوليس اهلڪارن کي ايس ايس جي جو ڪمانڊو تحت سکيا ڏني ويندي. شرجيل ميمڻ چيو ته اسان کي هاڻ طالبان ۽ پابندي مڙهيل تنظيمن خلاف سخت کان سخت قدم کڻڻ جي ضرورت آهي ۽ اڄ به اسان جي ڪوشش آهي ته هن ملڪ کي دهشتگردي ۽ ان جي سوچ وارن ماڻهن کان پاڪ ڪرايو وڃي ڇو ته اهي اسان جي تعليم، مذهب، انسان ۽ معيشيت سان گڏوگڏ ملڪ دشمن سوچ رکن ٿا. هن چيو ته ماضي ۾ انهن قوتن کي واڌ ويجهه جو موقعو ڏنو ويو ۽ ڪجهه سياسي ۽ مذهبي طاقتن جيڪي کين پنهنجي سسٽم جو حصو قرار ڏئي انهن سان ڳالهيون ڪرڻ جو به چيو پر اڄ اهي ئي سياسي ۽ مذهبي قوتون دهشتگرد لاءِ ڪارروائي لاءِ راضي آهن ۽ اڄ ملڪ جي عسڪري ۽ سياسي قوتون ان تي متحد آهن ته انهن جو خاتمو ڪيو وڃي. شرجيل ميمڻ چيو ته اڄ به اسان جي فوج ۽ سول حڪومت هڪ آواز ٿي انهن خلاف وڙهي رهيون آهن. هڪ سوال جي جواب ۾ شرجيل انعام ميمڻ چيو ته ڪنهن به دهشتگرد کي ڪنهن به صورت ۾ نه ڇڏيو ويندو ۽ اسان جي پوليس ۽ رينجرز بردباري سان انهن خلاف آپريشن ڪري رهي آهي ۽ ڪيئي دهشتگرد ماريا ويا آهن ۽ پڪڙيا ويا آهن ۽ اڄ به اهڙي طرح انهن خلاف ٽارگيٽيڊ آپريشن جو سلسلو جاري آهي. سنڌ ۾ نئين سياسي اتحاد جي حوالي سان سوال جي جواب ۾ شرجيل ميمڻ چيو ته ڀلي ڪيترا ئي سياسي اتحاد ٺهن انهن سان ڪوبه فرق نٿو پوي، پر هن وقت سياست جو وقت نه آهي بلڪ هڪ قوم بڻجي ملڪ جي مسئلن کي حل ڪرڻ جي ضرورت آهي. هڪ ٻي سوال جي جواب ۾ هن چيو ته اسان مدرسن خلاف نه آهيون، پر اهي مدرسا جيڪي تعليم بجاءِ دهشتگردي کي فروغ ڏيڻ ۾ ملوث هوندا انهن خلاف ڪابه رعايت نه ٿيندي. هن چيو ته گذريل ڏينهن ايپڪس جي اجلاس ۾ سمورن ڪمشنرن ۽ ڊپٽي ڪمشنرن کي اهي هدايتون جاري ڪيون ويون آهن ته هو پنهنجن پنهنجن ضلعن ۾ ان حوالي سان رپورٽ تيار ڪن ۽ نون مدرسن کي تعمير کان اڳ انهن جي اين او سي کي يقيني بڻائين. هن چيو ته سنڌ حڪومت ۽ گهرو کاتو مختلف مذهبي اسڪالرز سان به رابطا ڪندي ۽ انهن کان مدد طلب ڪندي ۽ جتي جتي اهڙي طرح جا غلط مدرسا ٺهيل آهن انهن خلاف ڪارروائي ٿيندي. هڪ ٻي سوال جي جواب ۾ شرجيل ميمڻ چيو ته هاڻ تبديلي يقيني آهي ۽ دهشتگردي جي سوچ، اداري ۽ ان ۾ ملوث يا ان جي پشت پناهي ڪندڙن خلاف ڪاررائي يقيني آهي.

 

ڪراچي ۾ پشاور سانحي جهڙو واقعو ٿيو ته ذميوار حڪمران هوندا: الطاف حسين

لنڊن (مانيٽرنگ ڊيسڪ) متحده قومي موومينٽ جي اڳواڻ الطاف حسين چيو آهي ته ڪراچي جي ڪنهن به اسڪول تي آرمي پبلڪ اسڪول تي حملي جيان ڪوئي واقعو ٿيو ته حڪمران ان جا ذميوار هوندا اڱاري تي لنڊن مان جاري پنهنجي بيان ۾ الطاف حسين چيو ته پشاور ۾ آرمي پبلڪ اسڪول تي طالبان دهشتگردن جي حملي ۽ معصوم ٻارڙن جي قتل عام کان پوءِ دهشتگردن پاران ڪراچي ۾ به اسڪولن تي دهشتگردن جي حملن جو خطرو هو پر ان جي باوجود به صوبائي حڪومت پاران ڪراچي جي اسڪولن تي تحفظ ۽ ڪراچي جي اسڪولن جي معصوم بارڙن کي دهشتگردن جي حملن کان محفوط رکڻ لاءِ جوڳا قدم ناهن کنيا ويا دهشتگردن گلشن اقبال بلاڪ 7 ۾ اسڪولن تي دستي بم اڇلايا ۽ سولائي سان فرار ٿي ويا الطاف حسين چيو ته جيڪي دهشتگرد اسلام جي نالي تي اسڪولن جي معصوم ٻارڙن کي پنهنجي دهشتگردي جو نشانو بڻائي رهيا آهن اهي ڪنهن به صورت اسلام ۽ مسلمانن جا دوست نه آهي هي انسانيت جا دشمن آهن ۽ هي عنصر ڪنهن به قسم جي رعايت جي مستحڪ نه آهن جيڪڏهن خدا نه ڪري ڪراچي جي ڪنهن به اسڪول تي آرمي پبلڪ اسڪول تي حملي جهڙو ڪوئي واقعو ٿيو ته حڪمران ان جا ذميوار هوندا حڪومت ۽ سمورا قانون لاڳو ڪندڙ ادارا ڪراچي ۾ اسڪولن جي تحفظ لاءِ جلد قدم کڻن. اسڪولن جي استادن کي جلد هٿيارن جا لائسنس ڏنا وڃن ۽ رياستي وسيلا ڪتب آڻي انهن دهستگردن کي چٿيو وڃي.

 

ڪراچي سينٽرل جيل ۾ پابندي پيل تنظيم جي ٻن ڪارڪنن کي ڦاهي ڏني وئي

ڪراچي (اسٽاف رپورٽر) ڪراچي سينٽرل جيل ۾ ٻن دهشتگردن کي ڦاهي ڏني وئي، جوابدارن 2001ع ۾ ڊاڪٽر علي رضا پيراڻي کي قتل ڪيو هو. پابندي مڙهيل تنظيم تحريڪ طالبان جي دهشتگرد عطاءَ الله عرف قاسم ۽ محمد اعظم عرف شريف کي ڦاهيءَ تي لٽڪايو ويو. جوابدارن عطاءَ الله ۽ محمد اعظم 2001ع ۾ ڪراچي جي سولجر بازار واري علائقي ۾ گولي هڻي ڊاڪٽر علي رضا پيراڻي کي قتل ڪيو هو. ٻنهي جوابدارن کي 2002ع ۾ ڊفينس ٿاڻي جي حد مان گرفتار ڪيو ويو ۽ دهشتگردي ٽوڙ عدالت کين 2004ع ۾ موت جي سزا ٻــُڌائي هئي. عطاءَ الله ۽ محمد اعطم جو تعلق پابندي مڙهيل تنظيم لشڪر جهنگوي سان هو ۽ هنن فرقيوراڻي بنياد تي ڊاڪٽر کي قتل ڪيو هو. سينٽرل جيل ڪراچي تي حملي جي خدشي سبب ٻنهي دهشتگردن کي سکر سينٽرل جيل ۾ رکيو ويو هو جتان کين 31 جنوري تي هيليڪاپٽر ذريعي ڪراچي پهچايو ويو هو.

 

ايندڙ ڪجهه ڏينهن ۾ ڪرپشن جا وڏا ڪيس سامهون آندا ويندا: منظور وساڻ جو اعلان

ڪراچي (اسٽاف رپورٽر) سنڌ اسيمبليءَ ۾ اڱاري ڏينهن ورڪس اينڊ سروسز کاتي ۾ ڪرپشن جي حوالي سان سوال ڪيا ويا، جن تي اينٽي ڪرپشن ۽ جيلز واري وزير منظور حسين وساڻ چيو ته ايندڙ ڪجهه ڏينهن ۾ ڪرپشن جا وڏا ڪيس سامهون آندا ويندا. سنڌ حڪومت وڏن وڏن آفيسرن کي گرفتار پڻ ڪيو آهي ۽ انهن جا چالان پڻ پيش ڪيا ويا آهن. آءِ ٽي واري وزير مڪيش ڪمار چاولا ان ڳالهه جو اعتراف ڪيو آهي ته 2008ع کان 2013ع تائين آءِ ٽي کاتي ۾ 197 ماڻهن جي غير قانوني طور تي ڪانٽريڪٽ جي بنياد تي ڀرتي ٿي ۽ ان ۾ شهري توڙي ٻهراڙيءَ واري ڪوٽا جو خيال پڻ نه رکيو ويو. صوبائي وزيرن اهي ڳالهيون سوالن واري وقفي دوران ٻُڌايون. سوالن وارو وقفو ورڪس اينڊ سروسز ۽ آءِ ٽي کاتي بابت هو. هڪ سوال جي جواب ۾ ورڪس اينڊ سروسز واري وزير هزار خان بجاراڻي ٻُڌايو ته بلڊنگ ڊويزن ضلعي ٺٽي جي لاءِ 10-2011ع کان 13-2012ع تائين مينٽيننس ۽ مرمت جي اسڪيمن لاءِ 20 ڪروڙ 37 لک رپيا رکيا ويا هئا ۽ ان مان 13 ڪروڙ 30 لک رپيا جاري ڪيا ويا، جڏهن ته اَي ڊي پي اسڪيمن لاءِ رکيل 28 ڪروڙ رپين مان 13 ڪروڙ 74 لک رپيا جاري ڪيا ويا. ورڪس اينڊ سروسز واري وزير ٻُڌايو ته دادو ۾ روڊس کاتي ۾ جعلي بل ٺاهڻ ۽ جعلي ادائيگيون ڪرڻ جي الزامن جي جاچ لاءِ اينٽي ڪرپشن اسٽيبلشمينٽ 11 جولاءِ 2013ع تي ڇاپو هنيو هو، بعد ۾ اينٽي ڪرپشن جي جاچ ۾ ڪي شاهديون نه مليون. هن وقت اهو ڪيس اينٽي ڪرپشن ڪورٽ حيدرآباد ۾ شنوائيءَ هيٺ آهي. سڄي سنڌ ۾ ڪرپشن خلاف مهم هلندڙ آهي ۽ ڪيترن ئي آفيسرن توڙي اهلڪارن کي گرفتار ڪيو ويو آهي. 20هين گريڊ جا آفيسر پڻ گرفتار ٿيا آهن ۽ ايندڙ 2-3 ڏينهن ۾ ڪرپشن جا ڪيترائي اهم ڪيس سامهون ايندا. مير هزار خان بجاراڻي چيو ته منهنجي کاتي ۾ پڻ ڪرپٽ آفيسرن خلاف ڪارروايون جاري آهن. مڪيش ڪمار چاولا پڻ ڀرتين جي حوالي سان آگاهي ڏني. هن چيو ته جعلي ڀرتين جي حوالي سان پڻ معاملي جي جاچ ڪرائي ويندي.

 

ڪراچي: 2 خانگي اسڪولن تي ڪريڪر حملا، وزير تعليم نوٽيس ورتو، رپورٽ طلب

ڪراچي (اسٽاف رپورٽر) ڪراچي جي علائقي گلشن اقبال بلاڪ 7 ۾ خانگي اسڪولن تي ڪريڪر سان حملا ڪيا ويا حملن وقت اسڪولن ۾ ڪوئي ٻارڙو موجود نه هو حملو ڪندڙ فرار ٿيڻ وقت دهشتگردن کي ڦاهي ڏيڻ جي عمل کي فوري روڪرائڻ لاءِ ڌمڪي وارو پمفليٽ به اڇلائي ويا. سنڌ اسيمبلي ۾ اپوزيشن ميمبرن ڪراچي جي خانگي اسڪول تي ڪريڪرحملي تي ڳڻتي ظاهر ڪندي مطالبو ڪيو ته اسڪولن جي سيڪيورٽي انتظامن ۾ اضافو ڪيو وڃي تفصيل مطابق گلشن اقبال جي علائقي بلاڪ 7 ۾ نامعلوم موٽر سائيڪل سوار خانگي اسڪول تي ڪريڪر اڇلائي فرار ٿي ويا جنهن سان علائقي ۾ ڏهڪاءُ پکڙجي ويو جڏهن ته خوشقسمتي سان ڪوئي جاني نقصان نه ٿيو حملي وقت ٻنهي اسڪولن ۾ ٻارڙا موجود نه هئا واقعي کان پوءِ پوليس واقعي واري هنڌ پهتي ۽ ثبوت گڏ ڪيا علائقي واسين جو چوڻ آهي ته موٽر سائيڪل تي آيل ٻه ڄڻا دستي بم اڇلائي فرار ٿي ويا ٻنهي جي هٿن ۾ هڪ ڪاغذ هو جيڪو انهن گهٽي ۾ اڇلايو ڪاغذ تي لکيل هو ته جيڪڏهن ڦاهين جو سلسلو بند نه ٿيو ته اسڪولن تي حملا جاري رهندا حملي وقت اسڪولن ۾ ٻارڙا موجود نه هئا ان لاءِ خوشقسمتي سان ڪنهن به قسم جو جاني نقصان ناهي ٿيو ڊي آءِ جي ايسٽ منير شيخ جو چوڻ آهي ته دستي بم حملو ظاهر ۾ اسڪولن تي ناهي ڪيو ويو هڪ ئي اسڪول جي ٻن سيڪشن جي وچئين رستي تي ڌماڪو ٿيو آهي ڊي رينجرز بلال اڪبر به اسڪولن جو دورو ڪيو جڏهن ته سنڌ جي سينيئر تعليم واري وزير نثار کهڙو گلشن اقبال ۾ اسڪولن تي ڪريڪر حملي جو نوٽيس وٺندي ايڊيشنل آءِ جي کان رپورٽ طلب ڪري ورتي آهي جاچ لاءِ اسڪولن جي سي سي ٽي وي فوٽيج حاصل ڪئي ويئي آهي جنهن کان پوءِ صورتحال واضح ٿي سگهندي ٻئي پاسي اسپيڪر آغا سراج دراني جي صدارت ۾ اڱاري تي ٿيل سنڌ اسيمبلي جي اجلاس ۾ اپوزيشن ميمبر نصرت سحر عباسي، هير سوهو ۽ ٻين گلشن اقبال جي خانگي اسڪولن تي ڪريڪر حملن تي ڳڻتي جو اظهار ڪيو آهي انهن چيو ته قوم پهريان ئي ٻن وڏن سانحن جو ڏک اڃا وساري نه سگهي آهي ان لاءِ حڪومت کي گهرجي ته اسڪولن جي حفاظت لاءِ جوڳا قدم کڻي ايم ڪيو ايم جي هير سوهو جو چوڻ هو ته ملير جي ڪجهه علائقن ۾ پابندي مڙهيل تنظيمن پاران اسڪولن کي ڌمڪي وارا خط مليا آهن ان لاءِ حڪومت کي ان پاسي ڌيان ڏيڻ گهرجي.