تازيون خبرون

Daily Archives: February 3, 2015

دهشتگردي جا 57 ڪيس فوجي عدالتن کي موڪلڻ جو فيصلو

ڪراچي (اسٽاف رپورٽر) سنڌ ۾ ايپڪس ڪميٽي جي اجلاس دوران دهشتگردي جي خاتمي لاءِ 10هزار اهلڪارن تي مشتمل فورس قائم ڪرڻ ۽ سنڌ کي ٽن زونز ۾ ورهائڻ جو فيصلو ڪيو ويو آهي، جڏهن ته دهشتگردي جا 57 ڪيس 10ڏينهن اندر وفاقي حڪومت ذريعي فوجي عدالتن کي موڪلڻ جو فيصلو ڪيو ويو آهي. سنڌ جي ايپڪس ڪميٽي جو اجلاس وزيراعليٰ هائوس ڪراچي ۾ وڏي وزير سيد قائم علي شاهه ۽ گورنر عشرت العباد جي صدارت هيٺ ٿيو، جنهن ۾ ڪور ڪمانڊر ڪراچي، ڊي جي رينجرز ۽ ٻين عملدارن شرڪت ڪئي. اجلاس ۾ قومي ايڪشن پلان تي عملدرآمد جو جائزو وٺي مختلف فيصلا ڪيا ويا. ايپڪس ڪميٽي جي اجلاس ۾ سنڌ کي ٽن زونز ۾ ورهائڻ جو فيصلو ڪيو ويو، جنهن تحت ڪراچي زون جي نگراني ڊي جي رينجرز ڪندو، جڏهن ته حيدرآباد زون جي نگراني جي او سي حيدرآباد ۽ سکر جي زون جي نگراني جي او سي پنو عاقل ڪندو. حيدرآباد زون ۾ ميرپورخاص، نوابشاهه شامل هوندا، جڏهن ته سکر ۾ لاڙڪاڻو ڊويزن شامل هوندي. ايپڪس ڪميٽي جي اجلاس ۾ دهشتگردي جا 57 ڪيس 10ڏينهن اندر وفاقي حڪومت ذريعي فوجي عدالتن کي موڪلڻ جو فيصلو ڪيو ويو. اجلاس ۾ دهشتگردي جي خاتمي لاءِ 10 هزار اهلڪارن تي ٻڌل فورس قائم ڪرڻ جو به فيصلو ڪيو ويو، جنهن کي تربيت آرمي ڏيندي.

 

سنڌ اسيمبلي ۾ شڪارپور سانحي خلاف گڏيل مذمتي ٺهراءُ منظور

ڪراچي (اسٽاف رپورٽر) سنڌ اسيمبليءَ شڪارپور سانحي خلاف گڏيل مذمتي ٺهراءُ اتفاق راءِ سان منظور ڪري ورتو، ميمبرن واقعي جي عدالتي جاچ ڪرائڻ ۽ دهشتگردي کي منهن ڏيڻ لاءِ صوبائي سطح تي انٽيليجنس ادارو قائم ڪرڻ جو مطالبو ڪري ڇڏيو. سنڌ اسيمبليءَ جو اجلاس اسپيڪر آغا سراج درانيءَ جي صدارت هيٺ ٿيو. اجلاس ۾ شڪارپور سانحي خلاف گڏيل مذمتي ٺهراءُ پيش ڪيو ويو جيڪو ڪجهه دير بحث کانپوءِ اتفاق راءِ سان منظور ڪيو ويو. ٺهراءَ ۾ ميمبرن چيو ته شڪارپور واقعو قومي سانحو آهي، شهيدن جي معاوضي ۾ واڌ ۽ زخمين کي بنا دير معاوضو ڏنو وڃي. ٺهراءَ ۾ مطالبو ڪيو ويو ته سنڌ ۾ حفاظتي قدم سخت ڪرڻ ۽ دهشتگردي کي منهن ڏيڻ لاءِ صوبائي سطح تي انٽيليجنس ادارو قائم ڪيو وُڃي. اسيمبلي ميمبرن،چيف جسٽس آف پاڪستان کان پاڻمرادو نوٽيس وٺڻ جي اپيل ڪندي چيو ته شڪارپور واقعي جي عدالتي جاچ ڪرائي وڃي. ميمبرن سنڌ ۾ افغانين ۽ ٻين پرڏيهين جي وڌندڙ آبادڪاري تي ڳڻتي جو اظهار پڻ ڪيو. فنڪنشل ليگ ميمبر امتياز شيخ چيو ته شڪارپور واقعو قومي سانحو آهي، وزيراعظم ۽ گهرو وزير جي ڪراچي ۾ موجودگي باوجود متاثرن سان رابطو نه ڪرڻ افسوسناڪ آهي. امتياز شيخ مطالبو ڪيو ته چيف معاملي جو پاڻمرادو نوٽيس وٺي واقعي جي عدالتي جاچ ڪرائي وڃي. هن اهو به مطالبو ڪيو ته سنڌ حڪومت شهيدن جي وارثن لاءِ معاوضو وڌائي 50 لک رپيا ڪري ۽ سندن پوئنرن کي سرڪاري نوڪريون ڏئي. نصرت سحر عباسي چيو ته شڪارپور واقعي کان 3 ڏينهن اڳ ڌمڪي وارا پمفليٽ ورهايا ويا، پر ان باوجود امام بارگاهه تي سڪيورٽي نه ڏني وئي رڳو هڪ پوليس اهلڪار مقرر ڪيو ويو. هن چيو ته صحت کاتي ۾ ڀرتي ٿيل ڊاڪٽر پرڏيهه ۾ ملازمتون ڪري رهيا آهن،جڏهن ته صحت کاتي ۾ ڪرپشن به دهشتگردي آهي. اپوزيشن ليڊر شهريار مهر چيو ته شڪارپور ۾ ڏوهارين ۽ مذهبي انتهاپسندن ۾ ڳٺ جوڙ ٿي چــُڪو آهي، اهو شهر 2010ع کان دهشتگردن جي نشاني تي آهي. هن چيو ته امن امان لاءِ ڪنهن سٺي آفيسر کي شڪارپور ۾ ٽِڪڻ نه ٿو ڏنو وڃي ۽ شڪارپور اسپتال ۾ اڃا تائين ايم ايس مقرر ناهي ڪيو ويو. شهريار مهر چيو ته شڪارپور واقعي تي سياست بدران حالتن جو مقابلو ڪرڻ لاءِ ايڪي جي ضرورت آهي، وڏو وزير اڳرائي ڪري سڀني کي گڏ ڪري مشاورت سان حڪمت عملي طئي ڪري. صوبائي وزير نثار کهڙي، ڄام مهتاب ڏهر، ساجد جوکئي، عبدالستار راڄپر ۽ ٻين حڪومتي ميمبرن شڪارپور سانحي تي افسوس جو اظهار ڪيو. نثار کهڙي چيو ته سانحي تي سڄي سنڌ سوڳوار آهي، واقعي جي ذميواري صوبائي حڪومت تي وجهي سياست نه چمڪائي وڃي. سندس چوڻ هو ته شڪارپور سانحي تي پوائنٽ اسڪورنگ ڪرڻ بدران دهشتگردي جي خاتمي بابت تجويزون ڏنيون وڃن. صوبائي وزير چيو ته جنرل ضياءَ جي دور ۾ ملڪ هٿيار ۽ هيروئن جي منڊي ۾ تبديل ٿيو، جڏهن ته بينظير ڀٽو جي حڪومت ملڪ کي هٿيارن کان پاڪ ڪرڻ لاءِ مهم هلائي. نثار کهڙي چيو ته ملڪ کي هٿيارن کان پاڪ ڪرڻ واري مهم تي ڪنهن ڌيان نه ڏنو، قرآن شريف هڪ انسان جي قتل کي سڄي انسانيت جو قتل قرار ڏئي ٿو. هن چيو ته شڪارپور واقعي تي تنقيد ڪندڙ ٻــُڌائين ته مهراڻ بيس ۽ جي ايڇ ڪيو واقعن جا ذميوار ڪير آهن؟ نثار کهڙي چيو ته حڪومت تي تنقيد ڪندڙن غير قانوني طور رهندڙ پرڏيهين کي رجسٽرڊ ڪرڻ جي ڳالهه نه ڪئي، پرڏيهين کي جڏهن ڪراچي مان ڪڍڻ جي ڳالهه ڪئي وئي ته ڪنهن دفاع ڪيو؟ صوبائي وزير ڄام مهتاب ڏهر چيو ته حڪومت دهشتگردي خلاف قدم کڻي رهي آهي،اسيمبلي فلور تي سهڪار وٺڻ باوجود اڄ تائين ڪنهن تجويزون پيش نه ڪيون ۽ نه ئي ڪو مشورو ڏنو. سهراب سرڪي چيو ته سنڌ ۾ انٽيليجنس نظام کي مضبوط بڻائڻ تي ڌيان ڏنو وڃي ۽ دهشتگردي جو مقابلو ڪرڻ لاءِ اجتماعي ڪوششون ڪرڻيون پونديون. پ پ ميمبرن چيو ته جنرل ضياءَ جو متعارف ڪرايل ڪلچر جيئڻ جنجال بڻائي ڇڏيو آهي، سنڌ ۾ پرڏيهين جي وڌندڙ آبادي تي نظر رکڻ جي ضرورت آهي. هن چيو ته پرڏيهين کي نادرا پاران سڃاڻپ ڪارڊ جاري ڪيا پيا وڃن، جڏهن ته سنڌ کي پرڏيهين کان پاڪ ڪرڻ کانسواءِ امن قائم ٿيڻ ممڪن ناهي. متحده ميمبرن سيد سردار احمد، فيصل سبزواري، خواجا اظهار الحسن، عبدالحسيب، پونجو ڀيل شڪارپور واقعي تي ڏک جو اظهار ڪندي چيو ته شيعا برادري کي منظم انداز ۾ نشانو بڻايو پيو وڃي. هنن چيو ته دهشتگردي بلوچستان کان شڪارپور پهچي وئي، مذهبي ۽ اقليتي برادري جي عبادتگاهن جي حفاظت يقيني بڻائي وڃي. سندن چوڻ هو ته سنڌ حڪومت کي پنهنجو انٽيليجنس ادارو ٺاهڻ گهــُرجي، وفاق تي ڀاڙي سڪيورٽي بهتر نه ٿي بڻائي سگهجي. هنن چيو ته شڪارپور سانحي مان ثابت ٿئي ٿو ته حملو ڪندڙ کي سهولت ڪار جي سپورٽ حاصل هئي، ڪراچي آپريشن جو دائرو سڄي سنڌ تائين وڌايو وڃي. متحده ميمبرن چيو ته شڪارپور سانحو صوبي ۾ دهشتگردي جو پهريون واقعو ناهي، ڪراچي ۾ جڏهن دهشتگردي ٿيندي آهي ته ڪنهن کي احساس ناهي ٿيندو، سنڌ ۾ افغانين جي آبادڪاريءَ جو نوٽيس ورتو وڃي. ن ليگ ميمبر سورٺ ٿيٻي چيو ته شڪارپور واقعي حڪومتي غفلت جو ڀانڊو ڦاڙي ڇڏيو، مستبقل ۾ اهڙن واقعن کان بچڻ لاءِ قدم کنيا وڃن. شڪارپور سانحي خلاف مذمتي ٺهراءُ منظور ٿيڻ بعد اسپيڪر اجلاس سڀاڻي تائين ملتوي ڪري ڇڏيو.

 

ڌانڌلي ثابت نه ڪري سگهڻ تي عمران خان وائڙائپ جو شڪار ٿي ويو آهي: پرويز رشيد

اسلام آباد(بيورو) سڌ سماءَ واري وفاقي وزير پرويز رشيد جو چوڻ آهي ته عمران خان ڌانڌلي ثابت نه ٿيڻ تي غلط ڳالهيون ڪري رهيو آهي ۽ هو ڪهڙي قانون تحت قومي اسيمبلي جي اسپيڪر کي عهدو ڇڏڻ جو چئي رهيو آهي جڏهن ته ان جا صلاهڪار ان جي معاشري ۾ بدنامي جو سبب بڻجي رهيا آهن، عمرانخان جي بيان تي ردعمل جو اظهار ڪندي پرويز رشيد جو چوڻ هو ته عمران خان جنهن تي اعتماد جو اظهار ڪري اهو سمجهي وڃي ته ايندڙ وارو ان جو ئي آهي جنهن اليڪشن ڪميشن جي پويان عمران خان هٿ ڌوئي پيل آهي ان تي ئي اعتماد ڪري رهيو عمران خان چئي ٿو ته خيبرپختونخواهه کان علاوه پوري پاڪستان ۾ ڌانڌلي ٿي ۽ ان مطابق اسيمبليون جعلي آهن پر سينيٽ صحيح آهي، هن چيو ته تحريڪ انصاف جي چيئرمين جو ڏوهه ناهي ڇو ته ان کي ڪابه خبر ناهي ان لاءِ ان جي صلاحڪارن کي پڪڙڻ گهرجي جيڪي معاشي ۾ ان کي بدنام ڪري رهيا آهن. پرويز رشيد چيو ته ڌانڌلي ثابت نه ڪري سگهڻ تي عمران خان وائڙائپ جو شڪار ٿي حوال ڪري رهيو آهي، کيس سُرت کان ڪم وٺڻ گهرجي.

 

شڪارپور سانحو: وزير اعظم جي نه اچڻ خلاف قومي اسيمبلي ۾ مخالف ڌر جو احتجاج

اسلام آباد(بيورو) قومي اسيمبليءَ ۾ مخالف ڌر جي ميمبرن، امام بارگاهه سانحي باوجود وزيراعظم طرفان شڪارپور جو دورو نه ڪرڻ خلاف احتجاج ڪيو ويو،خورشيد شاهه چيو آهي ته پشاور سانحو ٿيو ته سڀ اتي پهچي ويا،نواز شريف سنڌين جي ڏک ۾ شريڪ نه ٿي ٻٽي معيار جو مظاهرو ڪيو آهي. قومي اسيمبلي جو اجلاس اسپيڪر اياز صادق جي صدارت هيٺ شروع ٿيو ته مخالف ڌر جي اڳواڻ سيد خورشيد شاهه جي درخواست تي معمول جي ڪارروائي معطل ڪندي شڪارپور سانحي تي بحث ڪرايو ويو. بحث شروع ٿيڻ کان اڳ شڪارپور سانحي جي شهيدن جي روحن جي ثواب لاءِ دعا گهرائي وئي. بحث ۾ حصو وٺندي مخالف ڌر اڳواڻ سيد خورشيد شاهه چيو ته وزيراعظم نواز شريف ڪراچي ۾ هئڻ باوجود شڪارپور سانحي جي شهيدن سان ڏک ونڊن نه آيو. هن چيو ته پشاور سانحو ٿيو ته سڀ اتي پهچي ويا، پر شڪارپور ۾ 61 ماڻهو شهيد ٿيڻ باوجود وفاق جو به نمائندو شڪارپور نه آيو. خورشيد شاهه چيو ته وزيراعظم نواز شريف سنڌين کي پنهنجو نه ٿو سمجهي. اپوزيشن ليڊر چيو ته وزيراعظم نواز شريف کي ايوان ۾ پهچي صورتحال بابت ڳالهائڻ گهرجي ها. ان موقعي تي خطاب ڪندي فنڪشنل ليگ ميمبر غوث بخش مهر چيو ته ڇا سنڌ پاڪستان جو حصو نه آهي؟. هن چيو ته وزيراعظم کي سنڌ کي به پاڪستان جو حصو سمجهي، نواز شريف ڪراچي ۾ هوندي به شڪارپور نه آيو، جنهن جو کين تمام گهڻو ڏک ٿيو آهي.

 

فوجي عدالتن جي مخالفت ڪندڙ ٻڌائين ته قوم سان گڏ آهن يا طالبان سان: خواجه سعد رفيق

لاهور(م.ڊ) ريلوي واري وزير خواجه سعد رفيق جو چوڻ آهي هت ملڪ هن وقت جنگ واري حالت ۾ آهي فوجي عدالتن خلاف ڳالهائيندڙ ٻڌائين ته هو قوم سان گڏ آهن يا طالبان سان، ريلوي وزير وزير خواجه سعد رفيق لاهور ڪينٽ ريلوي اسٽيشن تي 10 نين پاور وينز جو افتتاح ڪيو ان موقعي تي ميڊيا سان ڳالهائيندي هن وج چوڻ هو ته پي ٽي آءِ سميت سمورين سياسي تنظيمن فوجي عدالتن کي وقت جي ضرورت قرار ڏنو هاڻ ان خلاف ڳالهائيندڙ منافقت کان ڪم وٺي رهيا آهن خواجه سعد جو چوڻ هو ته ريلوي جا مالي معاملا ڪافي حد  تائين حل ٿي ويا آهن هاڻ نجيڪاري جي ضرورت ناهي ڪابه ٽرين بند نه پئي ڪئي وڃي پرائيويٽ پبلڪ پارٽنرشپ کي وڌيڪ هٿي ڏني ويند،ي هن چيو ته کاتي مان ڪنهن به مزدور کي نه پيو ڪڍيو وڃي، ڪرپشڻ ۾ ملوث اهلڪارن کي نه بخشيو ويندو.

 

ايمرجنسي لڳائڻ مسئلي جو حل ناهي، دهشتگردي کي منهن ڏيڻ لاءِ فوجي عدالتون قائم ڪيون پيون وڃن: شرجيل انعام ميمڻ

ڪراچي (اسٽاف رپورٽر)   سنڌ جي اطلاعات ۽ بلديات واري صوبائي وزير شرجيل انعام ميمڻ چيو آهي ته اڄ پوري قوم دهشتگردن ۽ انتهاپسندي خلاف متحد آهي ۽ امن امان جي بحالي جا سمورا ادارا انهن خلاف ڪوششن ۾ مصروف آهن. ايمرجنسي ڪنهن شيءِ جو علاج ناهي. سنڌ ۾ ايمرجنسي جو مطالبو ڪا عقلمندي نه آهي. شڪارپور سانحي کان پوءِ ڊاڪٽرن ۽ اسپتالن ۾ سهولتن جي عدم دستيابي جي الزامن ۾ ڪابه صداقت ناهي. پوليس، رينجرز ۽ پاڪ فوج دهشتگردي جي خاتمي لاءِ هڪ پچ تي متحد آهن. اهڙن خيالن جو اظهار هن سومر تي سنڌ اسيمبلي جي اجلاس کان اڳ ميڊيا سان ڳالهائيندي ڪيو. شرجيل انعام ميمڻ چيو ته شڪارپور سانحو هڪ قومي سانحو آهي. هن وقت پورو ملڪ دهشتگردي جي لپيٽ ۾ آهي ۽ دهشتگردن کي جتي موقعو ملي ٿو هو اتي دهشتگردي ڪري رهيا آهن. چاهي اها مسجد هجي يا امام بارگاهه، تعليمي ادارا هجن، مارڪيٽ هجي يا بازار هجي، امن امان جي بحالي جا ادارا هجن، عوام يا سياستدانن کي اهي نشانو بڻائي رهيا آهن. شرجيل ميمڻ چيو ته ملڪ ۾ امن امان جي صورتحال بهتر ناهي ان لاءِ فوجي عدالتون ٺاهيون ويون آهن، جنهن لاءِ سمورين سياسي جماعتن ۽ امن امان جي بحالي جا ادارا هڪ نڪتي تي گڏ آهن ته انهن دهشتگردن جو خاتمو ڪيو وڃي. هن چيو ته شڪارپور سانحو ان جو ردعمل آهي ۽ ان جي حتمي رپورٽ ايندڙ ٻن ڏينهن ۾ آئي جي سنڌ کان وزيراعليٰ سنڌ طلب ڪئي آهي. جنهن سان معاملو سامهون اچي ويندو. هن چيو ته حالتن ۽ واقعن کي ڏسندي ئي سنڌ حڪومت فورسز جي تعداد ۾ اضافو ڪرڻ شروع ڪري ڇڏيو آهي ۽ ان فورسز کي جديد هٿيار ۽ ٻين سهولتن جي فراهمي لاءِ ڪوشان آهيون. هن چيو ته موجوده حالتون جيڪي آئيڊيل ناهن انهن کي منهن ڏيڻ ۾ مصروف آهيون. هڪ سوال جي جواب ۾ شرجيل انعام ميمڻ چيو ته پهريان پنج وقت جي نماز دوران فورسز مسجدن ۽ امام بارگاهن جي سڪيورٽي ۾ مصروف هئي، پر هاڻ تعليمي ادارا به نشانو بڻجي رهيا آهن ۽ هاڻ انهن تي سڪيورٽي فورسز مقرر ڪئي وئي آهي ۽ اهو هڪ مشڪل ٽارگيٽ آهي. هن چيو ته هاڻ اسان کي پنهنجي سڪيورٽي فروسز جا هٿ مضبوط ڪرڻا پوندا. ايم ڪيو ايم پاران صوبي ۾ ايمرجنسي لڳائڻ واري مطالبي جي سوال تي شرجيل انعام ميمڻ چيو ته ايمرجنسي ڪنهن شيءِ جو علاج نه آهي. اسان جي پوليس، رينجرز ۽ فوج هڪ پچ تي متحد آهن ۽ جتي ضرورت پوي ٿي اتي اها فورسز گڏجي انهن دهشتگردن جو مقابلو ڪري رهي آهي. شڪارپور سانحي کان پوءِ صحت جي سهولتن جي کوٽ تي مخالف جماعتن جي الزامن جي جواب ۾ شرجيل انعام ميمڻ چيو ته سانحي کان فوري پوءِ هن وزير صحت سان رابطو ڪيو ته هن ٻڌايو ته سانحي جي فوري بعد سکر، لاڙڪاڻو ۽ شڪارپور جي سمورين اسپتالن ۾ ايمرجنسي لاڳو ڪئي وئي آهي ۽ سول اسپتال ۾ فوري طور تي 17 ڊاڪٽرن ۽ سرجن تائين اتي موجود هئا. جڏهن ته امام بارگاهه ۾ جنهن جاءِ تي اهو سانحو پيش ٿيو انتهائي تنگ جاءِ هئي، جنهن سبب شهادتون وڌيڪ ٿيون. سانحي جي جاچ جي سوال تي هن چيو ته جلد ئي ٻين ڪيسن جيان ان سانحي جي جوابدارن کي به گرفتار ڪيو ويندو ۽ ان ۾ ملوث جوابدارن ۽ ان جي پشت پناهي ڪندڙن کي ڪيفر ڪردار تائين پهچايو ويندو. سنڌ حڪومت پاران اڃان تائين فوجي عدالتن ۾ ڪنهن قسم جو ڪيس نه موڪلڻ واري سوال جي جواب ۾ شرجيل ميمڻ چيو ته ايپيڪس جو ٻيو اجلاس اڄ ٿيڻو آهي ۽ ان ۾ سمورن ڪيسن جو جائزو ورتو ويندو، پر ڪيس عدالتن ۾ صوبا نه بلڪ وفاق موڪليندو. ارباب غلام رحيم جي اپوزيشن ليڊر ٿيڻ لاءِ شروع ڪيل ڀڄ ڊڪ جي سوال جي جواب ۾ هن چيو ته اهو معاملو اپوزيشن جو آهي ۽ جيڪو به اپوزيشن ليڊر ٿيندو اسان ان جو احترام ڪنداسين.

 

ايم ڪيو ايم، سنڌ ۾ ايمرجنسي لڳائڻ جو مطالبو ڪري ڇڏيو، آپريشن جو دائرو پوري صوبي ۾ وڌايو وڃي: خواجه اظهار

ڪراچي (اسٽاف رپورٽر) ايم ڪيو ايم، سنڌ ۾ ايمرجنسي لاڳو ڪرڻ جو مطالبو ڪري ڇڏيو، خواجا اظهار الحسن چيو آهي ته شڪارپور سانحو صوبائي حڪومت جي نااهلي آهي، ڪراچي آپريشن جو دائرو سڄي سنڌ تائين وڌائي دهشتگرديءَ کي منهن ڏيڻ لاءِ فوج کان مدد ورتي وڃي. ڪراچي ۾ سنڌ اسيمبلي ٻاهران ميڊيا سان ڳالهائيندي خواجا اظهار الحسن چيو ته دهشتگردن ڪراچي جيان صوبي جَي ٻين شهرن ۾ به ڪارروايون ڪرڻ شروع ڪري ڇڏيون آهن. هـُن چيو ته شڪارپور ۽ پشاور سانحا صوبائي حڪومتن جي نااهلي آهن. خواجا اظهار الحسن چيو ته سنڌ جي صورتحال انتهائي خراب آهي، جنهن کي منهن ڏيڻ لاءِ ايمرجنسي لاڳو ڪئي وڃي. متحده اڳواڻ چيو ته ڪراچي آپريشن جو دائرو سڄي صوبي تائين وڌايو وڃي، جنهن لاءِ ضرورت پوڻ تي فوج کان به مدد ورتي وڃي. هـُن چيو ته طالبانائيزيشن خلاف وقت سر ڪارروائي ڪئي وڃي ته اڄ ملڪي حالتون ٻي طرح هجن ها.

 

عمران خان جي چيف اليڪشن ڪمشنر سان ملاقات، اسپيڪر اياز صادق کي معطل ڪرڻ جو مطالبو

اسلام آباد (بيورو) پي ٽي آءِ چيئرمين عمران خان اين اي 122 تي ڌانڌلي بابت ڪيس جو اليڪشن ٽربيونل جو فيصلو اچڻ تائين قومي اسيمبلي جي اسپيڪر اياز صادق کي معطل ڪرڻ جو مطالبو ڪري ڇڏيو، سندس چوڻ آهي ته پرڏيهه ۾ رهندڙ 70 لک پاڪستانين کي ووٽ جو حق ڏنو وڃي ۽ ايندڙ عام چونڊون اليڪٽرانڪ ووٽنگ مشين جي مدد سان ڪرايون وڃن. پي ٽي آءِ سربراهه عمران خان اسلام آباد ۾ چيف اليڪشن ڪمشنر سردار رضا خان سان ملاقات ڪري اليڪشن ٽربيونل جي ڪارڪردگي جي حوالي سان ڳالهيون ڪيون. ملاقات کانپوءِ ميڊيا سان ڳالهائيندي ڪپتان چيو ته هن چيف اليڪشن ڪمشنر آڏو 2 مطالبا رکيا آهن ۽ درخواست ڪئي ته پرڏيهه ۾ رهندڙ 70 لک پاڪستانين کي ووٽ جو حق ڏنو وڃي ۽ ايندڙ عام چونڊون اليڪٽرانڪ ووٽنگ مشين جي مدد سان ڪرايون وڃن. هن چيو ته چار مهينا گــُذرڻ باوجود چئن تڪن خلاف درخواست تي فيصلو ناهي آيو ۽ قانوني طور تي اليڪشن ڪميشن وٽ ڊي سيٽ ڪرڻ جو اختيار آهي. عمران خان مطالبو ڪيو ته جيسيتائين اين اي هڪ سئو 22 جو فيصلو نه ٿو اچي تيسيتائين قومي اسيمبلي جي اسپيڪر اياز صادق کي ڊي سيٽ ڪيو وڃي. هن چيو ته نواز ليگ اهڙي نااهل ثابت ٿي آهي جو ان کي ڌانڌلي به ڪرڻ نه ٿي اچي ۽ کين شاهديون مليون آهن جنهن ذريعي ڌانڌلي ثابت ڪئي ويندي. عمران خان چيو ته سڄي قوم چئن تڪن جي نتيجن جو انتظار ڪري رهي آهي ۽ جيڪڏهن غلطي ٿي ته هــُو سڀني جي سامهون چوندو ته غلط هو.

 

آرمي چيف ڪور ڪمانڊر ڪانفرنس اڄ طلب ڪري ورتي

راولپنڊي(م.ڊ) آرمي چيف جنرل راحيل شريف ماهوار ڪور ڪمانڊر ڪانفرنس اڄ جنرل هيڊ ڪوارٽر (جي ايڇ ڪيو) ۾ طلب ڪري ورتي، پاڪ فوج جي ترجمان آءِ ايس پي آر مطابق اڄ ٿيندڙ ڪور ڪمانڊر ڪانفرنس  4 فيبروري تي به جاري رهندي جنهن ۾ آرمي چيف جنرل راحيل شريف برطانيه ۽ چين جي دوري بابت ڪور ڪمانڊرز کي اعتماد ۾ وٺندي جڏهن ته ڪانفرنس ۾ سيڪيورٽي صورتحال ۽ پيشيوراڻن معاملن تي به خيالن جي ڏي وٺ ڪئي ويندي.

 

پاڪستان ڪروز ميزائيل رعد جو ڪامياب تجربو ڪري ورتو

راولپنڊي (مانيٽرنگ ڊيسڪ) پاڪستان ڪروز ميزائيل رعد جو ڪامياب تجربو ڪري ورتو آهي، آءِ ايس پي آر چيو آهي ته اهو ميزائيل 350 ڪلوميٽرن تائين روايتي ايٽمي هٿيار کڻي ٽارگيٽ کي نشانو بڻائي سگهي ٿو. آءِ ايس پي آر چيو آهي ته ڪروز ميزائيل رعد جو ڪامياب تجربو ڪيو ويو آهي. آءِ ايس پي آر موجب ڪروز ميزائيل رعد 350 ڪلوميٽرن تائين ٽارگيٽ کي نشانو بڻائي سگهي ٿو. آءِ ايس پي آر جو چوڻ آهي ته بنا آواز واري ڪروز ميزائيل رعد کي ريڊار سسٽم به Detect نه ٿو ڪري سگهي. آءِ ايس پي آر موجب ميزائيل سمنڊ کان زمين تائين ٽارگيٽ کي نشانو بڻائي سگهي ٿو ۽ اهو پاڪستاني انجنيئرز ۽ سائنسدانن جي گڏيل ڪوشش جو نتيجو آهي.