تازيون خبرون

Daily Archives: February 2, 2015

دهشتگردي خلاف قوم۽ سياسي پارٽيون هڪ آواز بڻجي چڪيون آهن: نواز شريف

رائيونڊ(م.ڊ) وزيراعظم نواز شريف چيو آهي ته قوم ۽ ملڪ جون سموريون سياسي نتظيمون دهشتگردي خلاف هڪ صف تي موجود آهن رائيونڊ ۾پنجاب جي وڏي وزير شهباز شريف وزيراعظم نواز شريف سان ملاقات ڪئي، ملاقات دوران ٻنهي اڳواڻن ملڪ ۾ امن امان جي مجموعي صورتحال، پنجاب ۾ نئين گورنر  جي مقرري ۽ سينيٽ چوندن لاءِ مسلم ليگ ن جي اميدوارن بابت معاملن تي تفصيلي خيالن جي ڏي وٺ ڪئي وئي ملاقات دوران وزيراعظم نواز شريف وڏي وزير شهباز شريف کي دهشتگردي جي خاتمي واري فورس بابت ڪوششن کي ساراهيو، هن چيو ته ملڪ کي هن وقت دهشتگرد جهڙين سنگين چئلينجز کي منهن ڏيڻو پئجي رهيوي آهي، قوم ۽ ملڪ جون سموريون سياسي تنظيمن دهشتگرد خلاف هڪ صف تي موجود آهن، سمورن مسئلن جي حل لاءِ سڀني کي گڏجي اڳتي وڌڻو پوندو حڪومت عوام کي رليف ڏيڻ لاءِ ڏينهن رات ڪم ڪري رهي آهي، حڪومت پيٽروليم مصنوعات جي قيمتن ۾ گهٽتائي ڪئي آهي، جنهن جو فائدو عوام  تائين پهچائڻ لاءِ صوبا مناسب قدم کڻن، پنجاب جي وڏي وزير جو چوڻ هو ته دهشتگردي ملڪ ۽ معيشت کي بي پناهه نقصان پهچايو سمورا ادارا دهشتگردي جي خاتمي لاءِ پرعزم آهن قوم دهشتگردي ۽ فرقيواريت خلاف گڏ ٿي چڪي آهي دهشتگردن جي ناپاڪ عزم کي رخ ۾ ملايو ويندو.

 

ڪراچي ۾ پيءُ پٽ ۽ ٻه عورتن سميت 4 ڄڻا قتل، 5 ڏوهاري مارجي ويا

ڪراچي(اسٽاف رپورٽر) ملير ويجهو رينجرز سان مقابلي ۾ سنگين وارداتن ۾ ملوث لياري گينگ وار جا 5 جوابدار مارجي ويا، رينجرز ترجمان مطابق جوابدارن جي موجودگي جي خفيه اطلاع  تي وڏي نفري سان ملير ندي ويجهو ڇاپو هنيو ته رينجرز اهلڪارن تي فائرنگ شروع ڪري ڏني جوابي ڪارروائي ۾ لياري گينگ وار جا 5 جوابدار مارجي ويا مارجي ويلن ۾ شيراز عرف ڪامريد، اڪبر مليري، خالد لاشاري ۽ غلام حسين به شامل آهن، اڪبر مليري عرب پنجابي لياري گينگ وار ملير جو ڪمانڊر هو ۽ گينگ وار جي جوابدار سهيل دادا جو ڀيڻائو هو، جوابدارن جا لاش جناح اسپتال منتقل ڪيا ويا آهن، رينجرز ترجمان جو چوڻ آهي ته مقابلي ۾ مارجي ويل جوابدار قتل  ۽ ڀتاخوري سميت سنگين ڏوهن جي وارداتن ۾ گهربل ئا جوابدار ڪراچي جي مختلف علائقن ۾ ڏوهاري اڏا به هلائيندا هئا. ٻئي طرف اورنگي ٽائون ۾ اڻڄاتل ماڻهن فائرنگ ڪري مذهبي تنظيم جي ڪارڪن پيءُ ۽ پٽ کي قتل ڪري ڇڏيو، ڪراچي جي علائقي اورنگي ٽائون نمبر 11 ۾ اسلام چوڪ ويجهو 2 موٽرسائيڪل سوار اتي موجود 2 ڄڻن تي فائرنگ ڪري فرار ٿي ويا جنهن جي نتيجي ۾ ٻئي ڄڻا موقعي تي ئي مارجي ويا، لاشن کي عباسي شهيد اسپتال منتقل ڪيو ويو جتي ٻنهي جي سڃاڻپ اختر ۽ اطهر  جي نالن سان ٿي ٻئي مقتول پيءُ، پٽ هئا، اهلسنت والجماعت جو چوڻ آهي ته فائرنگ سبب مارجي ويل ٻئي ڄڻا انهن جي تنظيم جا ڪارڪن هئا. چڪرا ڳوٺ سميت ٻين هنڌن تان ٻه عورتن جا لاش هٿ ڪيا ويا.

 

علائقائي ترقي ۽ امن لاءِ ڪشمير مسئلي جو حل ضروري آهي: پرويز رشيد

اسلام آباد (بيورو) سڌ سماءَ جي وفاقي وزير سنيٽر پرويز رشيد چيو آهي ته علائقائي ترقي ۽ امن لاءِ ڪشمير جي مسئلي جو حل ضروري آهي، ڀارت ڪشمير تي واعدا پورا ڪرڻ کانسواءِ سلامتي ڪائونسل جو ميمبر نه ٿو بڻجي سگهي. ڪشميرين سان ٻڌيءَ جي اظهار لاءِ اسلام آباد ۾ هڪ تقريب جو اهتمام ڪيو ويو، جنهن ۾ مختلف سياسي جماعتن جي اڳواڻن شرڪت ڪئي. تقريب کي خطاب ڪندي پرويز رشيد ڪشميرين جي جدوجهد جي حمايت ڪندي چيو ته جواهر لعل نهرو ڪشميرين سان واعدو ڪيو هو ۽ انهن ڀارتي حڪمرانن جو حق آهي ته اهي پنهنجو واعدو پورو ڪن. پرويز رشيد ڀارت کي خطي ۾ بهتر لاڳاپن لاءِ ڪشميرين جون دليون کٽڻ جو مشوروڏنو، جڏهن ته قراردادن جي خلاف ورزين جي نقصان کان پڻ آگاهه ڪيو.

 

سينيٽ چونڊون: ن ليگ اميدوارن سان رابطي جون ذميواريون راڻا ثناءُ الله کي حوالي

لاهور (م.ڊ) پاڪستان مسلم ليگ (ن) پنجاب ۾ سنيٽ جي يارنهن سيٽن تي ڪاميابي لاءِ ميمبرن سان رابطن ۽ ٻين معاملن جي سموري ذميواري اڳوڻي قانون واري وزير رانا ثناءُ الله کي ڏئي ڇڏي. اڳوڻي قانون واري وزير جي سربراهي ۾ ڪميٽي به جوڙي وئي جنهن حڪمت عملي جوڙڻ لاءِ عملي ڪم شروع ڪري ڇڏيو آهي. ذريعن جي حوالي سان ٻڌايو ويو آهي ته سنيٽ جي گذريل چونڊن ۾ به رانا ثناءُ الله خان بهترين حڪمت عملي اختيار ڪئي هئي جنهن سبب اپوزيشن کي ووٽ هئڻ جي باوجود هڪ سيٽ تان شڪست ملي هئي ۽ ق ليگ کان ٽڪيٽ نه ملڻ تي آزاد حيثِيت ۾ وڙهندڙ محسن خان ڪامياب ٿيو هو. انهيءَ کي نظر ۾ رکندي قيادت ايندڙ مهيني ۾ ٿيندڙ سنيٽ جي چونڊن ۾ سموري حڪمت عملي رانا ثناءُ الله کي ڏئي ڇڏي آهي. رانا ثناءُ الله کي هدايت ڪئي وئي آهي ته اهڙي قسم جي حڪمت عملي جوڙي وڃي جنهن تحت پنجاب مان سنيٽ جون يارنهن مان يارنهن سيٽون کٽي سگهجن.

 

شڪارپور سانحي جي شهيدن جو ٽيجو، آهن ۽ سسڪين سان تڏا کنيا ويا احتجاجي مظاهرا ۽ ڌرڻا جاري

شڪارپور/ڪراچي/حيدرآباد/سکر (نمائندن وٽان) شڪارپور امام بارگاهه ۾ ٿيل بم ڌماڪي ۾ 61 کان وڌيڪ شهيدن جو ڪالهه ٽيجهو ٿيو، شهر جي مختلف علائقن خانچندآباد، هڪڙا محلا، سويدر محلا، حيدري محلا، ميهر شاهه قبو، لکيدر، هاٿيدر، داودائي روڊ، نبي شاهه محلا، قلعه قافلا، جماڻي هال، واڳڻو در، اسٽورٽ گنج، ڪڙي نواب خان سميت شهر جي مختلف محلن کان سواءِ ڳوٺ کيڏو جعفري، ماڙي شريف، خانپور، ڳوٺ محمد خان ٻرڙو سميت ٻين هنڌن تي رکيل شهيدن جا رکيل تڏا کنيا ويا ۽ ٽيجهي جو دعائون گهريون ويون، شڪارپور جي تاريخ ۾ پهريون ڀيرو شڪارپور ۾ هڪ ئي ڏينهن گڏيل طور تي مختلف محلن ۽ علائقن مان 60 کان وڌيڪ تڏا کڻڻ تي هر طرف آنهون ۽ دانهون پئجي ويون ۽ شهيدن جا تڏا کڻڻ وقت عجيب ۽ تمام ڏکائيندڙ منظر هئا، هر گهر ۾ قيامت برپا هئي جيڪا گذريل 3 ڏينهن کان متل آهي، ٻئي طرف ڪالهه ٽئين ڏينهن به شڪارپور جو سمورو شهر سوڳ ۾ بند رهيو، شهر جا سمورا ڪاروباري مرڪز ۽ بازارون بند رهيا، جڏهن ته مختلف تنظيمن جن ۾ ايس يو پي، شڪارپور جي نوجوانن ۽ سول سوسائٽي سان تعلق رکندڙ ماڻهن واقعي خلاف احتجاجي ريليون ڪڍي ڌرڻا هنيا ويا، هوڏانهن شڪارپور واقعي جي ٽئين ڏينهن تي شڪارپور پوليس طرفان باضابطه طور تي دهشتگردن خلاف ڪاروائي شروع ڪئي آهي جنهن ۾ ايس ايس پي ثاقب اسماعيل ميمڻ جي اڳواڻيءَ ۾ شڪارپور شهر توڙي ٻين هنڌن تي ڇاپا هڻي شڪ جي بنياد تي 10 کان وڌيڪ ماڻهن کي گرفتار ڪري ورتو آهي، پوليس گرفتار ٿيلن کي نامعلوم هنڌ رکي پڇاڳاڇا وارو عمل شروع ڪري ڇڏيو آهي، ٻڌايو وڃي پيو ته شڪ جي بنياد تي  گرفتار ڪيل ماڻهن کان سنڌ حڪومت طرفان واقعي جي جاچ لاءِ جوڙيل سي آءِ ڊي ٽيم جي عملدارن آڏو پيش ڪيو ويو آهي. شڪارپور سانحي جي شهيدن جو ٽيجهو ملهايو ويو، شڪارپور جي لکيدر چوڪ تي لڳل ڌرڻو جاري آهي، جڏهن ته شهر جو سمورو ڪاروبار بند آهي، پوليس ڌماڪي جي جاچ ۾ ڪا به اڳڀرائي نه ڪري سگهي. شڪاپور سانحي ۾ شهيد ٿيلن جو ٽيجهو ملهايو ويو، قرآن خوانين ۽ خصوصي دعائن جو اهتمام ڪيو ويو. شڪارپور جي لکيدر چوڪ تي لڳل ڌرڻو علامه محمد امين شهيدي، علامه ناصر عباس، علامه عارف واجي ۽ ٻين جي اڳواڻي ۾ جاري آهي. شڪارپور ۾ ڪاروبار مڪمل طور تي بند آهي، پيٽرول پمپس، ٽرئفڪ ۽ تعليمي ادارا بند پيل آهن. ڌماڪي کانپوءِ شهر ۾ سيڪيورٽي انتظام سخت ڪيا ويا آهن، شهر جي اهم روڊ رستن تي پوليس سان گڏ رينجرز کي به مقرر ڪيو ويو آهي. . ٻئي طرف شڪارپور سانحي خلاف سنڌ جي مختلف شهرن ۾ ٻئي ڏينهن به هڙتال ڪئي وئي آهي، جڏهن ته مختلف تنظيمن پاران احتجاجي مظاهرا ڪيا پيا وڃن. شيعا علماءُ ڪائونسل جي سڏ تي شڪارپور سانحي خلاف مختلف شهرن ۾ شٽربند هڙتال ڪئي وئي آهي. سانگهڙ ضلعي جي ننڍن وڏن شهرن ۾ سانحي جي سوڳ ۾ ڪاروبار بند آهي، جڏهن ته مٽياري ضلعي جا ننڍا وڏا شهر پڻ بند آهن. شڪارپور ضلعي جي ننڍن وڏن شهرن ۾ پڻ سوڳ جي لهر برقرار آهي، ڳڙهي ياسين سميت مختلف شهرن ۾ ڪاروبار مڪمل طور تي بند آهي. شيعا علماءُ ڪائونسل سميت مختلف تنظيمن پاران شڪارپور سانحي خلاف احتجاجي مظاهرا ڪيا پيا وڃن. حيدرآباد: شڪارپور سانحي خلاف ملڪ جي مختلف شهرن ۾ احتجاجي ريليون ڪڍيون ويون ۽ مظاهرا ڪيا ويا نوابشاهه ۾ شيعا علماءَ ڪائونسل مرتضيٰ امام بارگاهه موهني بازار مان ريلي ڪڍي ريلي ۾ شريڪ ماڻهو مختلف علائقن کان ٿيندا پريس ڪلب پتي جتي مظاهر ڪيو ويو، مظاهرين مطالبو ڪيو ته شڪارپور سانحي ۾ ملوث عنصرن کي فوري طور تي گرفتار ڪيو وڃي ٽنڊو محمد خان ۾ شيعا علماءَ ڪائونسل تحت پريس ڪلب سامهون احتجاج ڪيو ويو سانگهڙ ۾ انجمن امام بارگاهه حيدري جي اپيل تي هڙتال ڪئي وئي لاڙڪاڻي ۾ شيعا علماءَ ڪائونسل ۽ مجلس وحدت المسلمين شهيدن جي ايصال ثواب لاءِ جناح باغ ۾ قرآن خواني جو اهتمام ڪيو ڀڪر ۾ شڪارپور سانحي خلاف پاڪستان عوامي تحريڪ قصره زينبيه کان محمدي چوڪر تائين ريلي ڪڍي ريلي کي خطاب  ۾ رحيق عباسي چيو ته شڪارپور سانحي جي سخت مذمت ڪروين ٿا هن شڪارپور سانحي ۽ ماڊل ٽائون سانحي جي شهيدن سميت سمورن شهيدن جي قاتلن کي ڪيفر ڪردار تائين پهچائڻ جو مطالبو ڪيو جڏهن ته حيدرآباد ۾ پڻ مختلف سياسي، سماجي تنظيمن پاران شڪارپور سانحي خلاف ريلي ڪڍي وئي.

 

داعش پاڪستان لاءِ ڪو مسئلو ناهي، نه ئي دولتِ اسلاميه وڏو خطرو آهي: سرتاج عزيز

اسلام آباد (بيورو) وزيراعظم جي پرڏيهي صلاحڪار سرتاج عزيز چيو آهي ته داعش پاڪستان جي حوالي سان اهم مسئلو نه آهي نه ئي دولتِ اسلاميه وڏو خطرو آهي، اتر وزيرستان ۾ جاري آپريشن جي ڪري داعش ڪو ئي وڏو مسئلو نه بڻجندو. خانگي ٽي وي مطابق سرتاج عزيز چيو ته داعش وڏو خطرو ناهي ۽ هي پاڪستان جي حوالي سان اهم مسئلو ناهي. اميد آهي اتر وزيرستان ۾ ٿيندڙ آپريشن جي ڪري داعش ڪو وڏو مسئلو نه بڻجندو. هن چيو ته قبائلي علائقن ۾ آپريشن ٿي رهيو آهي جيڪڏهن صورتحال اهڙي طرح صحيح رهي ته داعش ڪو وڏو مسئلو نه بڻجي سگهندي.

 

موقعو مليو ته سنڌ سميت پوري ملڪ ۾ تعليمي ادارن جو ڄار وچايو ويندو: الطاف حسين

ڪراچي(اسٽاف رپورٽر) متحده قومي موومينٽ جي قائد الطاف حسين چيو آهي ته اسان ماضي ۾ به سنڌ ۾ اسڪولن ۽ ڪاليجن جو ڄار وڇايو هو ۽ جيڪڏهن آئنده به اسان کي موقعو مليو ته اسان سڄي سنڌ ۾ اسڪولن، ڪاليجن ۽ عورتن جي ووڪيشنل سينٽرن جو ڄار وڇائي ڇڏينداسين، اسان سنڌ ئي نه پر بلوچستان، خيبرپختونخواهھ، هزاري وال ۽ گلگت بلتستان جي محروم علائقن ۾ به تعليمي ادارا قائم ڪنداسين، اسان جي ڪوشش ۽ جدوجهد اها آهي ته ملڪ ۾ تعليم عام  هڪ جهڙو تعليمي نظام رائج ٿئي. اها ڳالھ هن نائن زيرو تي رابطا ڪميٽي ۽ شعبن جي ميمبرن سان ڳالھه ٻولهھ ڪندي ڪئي. الطاف حسين سڀني شعبن جي ميمبرن کي حيدرآباد ۾ الطاف حسين يونيورسٽي جو سنگ بنياد رکڻ جي مبارڪباد به پيش ڪئي. حيدرآباد ۾ يونيورسٽي جو قيام اتان جي شهرين جي ڪيترن ئي سالن کان خواهش هئي ۽ آخر ڪار ان جو سنگ بنياد رکجي ويو آهي. جنهن کي ڏسي ڪري حيدرآباد جا بزرگ ، امڙيون ، ڀينرون ۽ شاگرد وڏا خوش آهن. انهن حيدرآباد جي عوام کي دل جي گهرائين سان مبارڪباد پيش ڪندي چيو ته سنگ بنياد رکڻ جو ڏينهن منهنجي لاءِ وڏي خوشي جو ڏينهن هو ڇو ته حيدرآباد ۾ يونيورسٽي منهنجو ڪيترن ئي سالن کان خواب هو. هن چيوته مون کي يقين آهي ته حيدرآباد جا شاگرد تعليم جي معيار کي بهتر کان بهتر بڻائيندا. هن يونيورسٽي جو سنگ بنياد رکڻ تي گورنر سنڌ ڊاڪٽر عشرت العباد ۽ ملڪ رياض کي به خصوصي طور تي خراج تحسين پيش ڪيو ۽ انهن جي لاءِ دعا به ڪئي.هن چيوته خدا ڪري ڪراچي ۾ به جلد يونيورسٽي قائم ٿئي. هن چيو ته الله تعالٰي اسان کي تورڙو به موقعو ۽ اختيار ڏنو ته اسان سنڌ ئي نه پر بلوچستان، خيبرپختونخواھ، هزاري وال ۽ گلگت بلتستان جي محروم علائقن ۾ به تعليمي ادارا قائم ڪنداسين. اسان جي ڪوشش ۽ جدوجهد اها آهي ته ملڪ ۾ تعليم عام ۽ آسان ٿي وڃي. هڪ جهڙو نظام تعليم رائج ٿئي، جيڪڏهن اهڙو ٿي ويو ته ملڪ ترقي ڏانهن نه صرف وڌنڌو پر ڊوڙندو.الطاف حسين ان موقعي تي سانحه شڪارپور جي شهيدن جي لاءِ دعا به ڪئي.

 

ظالم سرڪار ۽ ظالم سردار بلوچستان جي مسئلن جا ذميوار آهن: سراج الحق

سبي(م.ڊ) جماعت اسلامي جي امير سراج الحق جو چوڻ آهي ته اسلام آباد جي ظالم سرڪار ۽ بلوچستان جا ظالم سردار صوبي جي مسئلن جا ذميوار آهن سبي ۾ سيمينار کي خطاب ڪندي هن چيو ته پاڪستان ٺهڻ کانپوءِ هينئر تائين ملڪ ۾ اسلامي نظام هڪ ڏينهن لاءِ به لاڳو ناهي ڪيو ويو جڏهن ته ڪنهن سياسي تنظيم اقتدار ۾ اچي ماضي جي ڪنهن حڪومت جو احتساب ناهي ڪيو سراج الحق جو چوڻ هو ته وزيراعظم محب وطن آهي ته سڀني کان پهريان بلوچستان جا مسئلا حل ڪري.

 

نوبل انعام حاصل ڪندڙ ملالا دنيا جي ٻئين سڀ کان مقبول عورت قرار

لنڊن(م.ڊ) پاڪستان ۾ نارين جي تعليم لاءِ  جدوجهد ڪندڙ ۽ نوبل انعام حاصل ڪندڙ ملالا يوسفزئي دنيا جي ٻئين سڀ کان مقبول عورت بڻجي وئي آهي، برطانوي اداري يوگوو طرفان دنيا جي مقتول ترين عورتن ۽ مردن جي چونڊ لاءِ عالمي سروي ڪرايو ويو جنهن ۾ 23 ملڪن جي 25 هزار کان وڌيڪ ماڻهن حصو ورتو سروي دوران هالي ووڊ اداڪاره ۽ گڏيل قومن جي سفير انجلينا جولي کي دنيا جي مقبول ترين عورت قرار ڏنو ويو جڏهن ته پاڪستان ۾ ٻارڙين جي تعليم لاءِ آواز اٿاري پوري دنيا ۾ نالو ٺاهيندڙ ملالا يوسفزئي ٻئين نمبر تي آهي دنيا جي مقتول ترين عورتن جي فهرست ۾ برطانيه جي راڻي الزبيٿ، جرمني جي چانسلر انجيلا مرڪل، اڳوڻي آمريڪي پرڏيهي وزير هيلري ڪلنٽن ۽ ڀارتي اڳواڻ سونيا گانڌي به شامل آهي، سروي تحت مردن ۾ سڀ کان مقبول شخص جو خطاب مائيڪرو سافٽ جي باني ۽ دنيا جي امير ترين شخص بل گيٽس کي ڏنو ويو جڏهن ته انجلينا جولي جو مڙس ۽ هالي ووڊ اسٽار بريڊ پٽ جو 13 هون نمبر آهي.

 

اسڪاٽلينڊ ۾ ريفرنڊم ٿي سگهي ٿو ته ڪشمير ۾ ڇو نه: فضل الرحمان

اسلام آباد(بيورو) جميعت علماءِ اسلام ف جي سربراهه مولانا فضل الرحمان چيو آهي ته ڪشمير ۾ شورش ان لاءِ آهي ته ڪشميري هندوستان جي قبضي ۽ ظلم کي برداشت ڪرڻ لاءِ تيار ناهن، اسڪاٽلينڊ ۾ ريفرنڊم ٿي سگهي ٿو ته ڪشمير ۾ ڇو نه اسلام آباد ۾ سيمينار کي خطاب ڪندي هن چيو ته سلامتي ڪائونسل جي قرارداد تي عمل نه ڪندڙ ملڪ مستقل ميمبرشپ جو خواب ڏسي رهيو آهي ڪشمير معاملي ۾ عالمي برادري مداخلت ڪري ڪشمير مسئلي جو حل حق راءِ ۾ آهي جڏهن اس ڪاٽلينڊ ۾ ريفرنڊم ٿي سگهي ٿو ته پوءِ ڪشمير ۾ ڇو نه ٿو ٿي سگهي مولانا فضل الرمان جو چوڻ هو ته ڪشمير پاڪستان لاءِ ضروري آهي ۽ ان تي پاڪستان جو موقف اصولن تي ٻڌل آهي عالمي برادري ڪشمير مسئلي تي ڇو گونگي ۽ ٻوڙي بڻيل آهي.