تازيون خبرون

Daily Archives: January 30, 2015

ڪميشن چونڊون شفاف قرار ڏئي ته ڪهڙي گارنٽي آهي ته عمران ڌرڻو نه هڻندو: پرويز رشيد

اسلام آباد (بيورو) اطلاعات، نشريات ۽ قومي ورثي جي وفاقي وزير سينيٽر پرويز رشيد چيو آهي ته عمران خان وزيراعظم محمد نواز شريف ۽ سندس خاندان جي خلاف بي بنياد الزام هڻي رهيو آهي ۽ عوامي ڀلائي لاءِ شروع ڪيل منصوبن جي مخالفت ڪري رهيو آهي، شريف خاندان جا سمورا اثاثا سدائين رڪارڊ تي رهيا، عمران خان جي جائيداد جو رڪارڊ اڄ به صحيح نه آهي. ڪالهه خميس ڏينهن هتي پريس ڪانفرنس کي خطاب ڪندي هن چيو ته جهازن جا مالڪ غريبن جي ڳالهه ڪري رهيا آهن ۽ وزيراعظم نواز شريف، حڪومتي وزيرن اليڪشن ڪميشن آڏو پنهنجا اثاثا ظاهر ڪيا ۽ ٽيڪسن جا گوشوارا جمع ڪرايا، عمران خان ٻين بابت ڪوڙ ڳالهائڻ جو عادي آهي ۽ جڏهن ٻيا سندس باري ۾ سچ ڳالهائين ٿا ته کيس خراب لڳي ٿو. سينيٽر پرويز رشيد چيو ته عمران خان چنيوٽ ۾ چناب درياءِ تي جنهن پل جي مخالفت ڪري رهيو آهي اها شگر ملز کان 50 ميل جي مفاصلي تي آهي. وفاقي وزير چيو ته عمران خان رمضان شگر ملز بابت حقيقتن جي خلاف ڳالهه ڪئي جڏهن ته پنجاب حڪومت پاران چنيوٽ ۾ پل ٺاهڻ تي عمران خان کي خوش ٿيڻ گهرجي ها. پي ٽي آءِ جي سربراهه جي عادت آهي ته هو هر ڏينهن بي بنياد اشوز تي پريس ڪانفرنسون ڪندو رهي ٿو. هن چيو ته عمران خان پنهنجي وليمي جي دعوت جي ڏينهن به پريس ڪانفرنس کان باز نه آيو. اطلاعات واري وزير چيو ته جوڊيشل ڪميشن بابت عمران خان پراڻيون ڳالهيون ورجايون. هڪ سوال تي وفاقي وزير چيو ته اسان ڪميشن ٺاهڻ چاهيون ٿا پر عمران خان نه ٿو چاهي ڇو ته هو ڪنهن ڪميشن جي فيصلي کي تسليم نه ٿو ڪري سگهي. هن چيو ته عمران خان ڪميشن کان ڀڄي رهيو آهي، هو جن چئن تڪن ۾ ڌانڌلي جا الزام هڻي رهيو آهي انهن الزامن جو پول کلي ويو آهي، ڪنهن تڪ ۾ ڌانڌلي جا الزام ثابت ناهن ٿيا. هن چيو ته عمران خان کي ٻين بابت ڳالهائڻ کان اڳ پنهنجي گريبان ۾ ڏسڻ گهرجي، اسان وٽ ڪي بي نام اثاثا نه آهن، اسان مان هر ڪو انڪم ٽيڪس جمع ڪرائي ٿو. هن چيو ته شريف فيملي جي ڪاورباري ادارن جي عمر پاڪستان جي عمر کان وڌيڪ آهي، 1970ع ۾ جڏهن 22 صنعتن کي نيشنلائيزڊ ڪيو ويو ته ان ۾ ميان شريف جون صنعتون به شامل هيون. هن چيو ته حيرت آهي ته پرائيويٽ جهاز ۾ سفر ڪندڙ ٻين تي آڱريون کڻي رهيا آهن، اسان وٽ عمران وانگر 100 ڪينال جو گهر نه آهي. هن چيو ته عمران شيشي جي گهر ۾ ويهي ٻين تي پٿر هڻڻ کان پاسو ڪري. اطلاعات واري وفاقي وزير چيو ته عمران خان اليڪشن ٽربيونلز ۾ پيش نه ٿيو، هو 8 مهينن تائين عدالت ۾ حاضر نه ٿيو. هن چيو ته عمران خان رڳو ان انصاف کي مڃي ٿو جيڪو پي ٽي آءِ چيئرمين ڪري ٿو، هو چيف جسٽس، اليڪشن ٽربيونل يا ڪنهن عدالت جو انصاف نه ٿو مڃي، 4 تڪن بابت جيڪي بي بنياد الزام هنيا ويا اهي غلط ثابت ٿيا. هن چيو ته جوڊيشل ڪميشن ٺهڻ تي جيڪڏهن جوڊيشل ڪميشن به چونڊن کي شفاف قرار ڏئي ڇڏيو ته پو ڇا عمران خان جوڊيشل ڪميشن جي خلاف ڌرڻو هڻندو. عمران خان نجم سيٺي تي 35 پنڪچر جو الزام هنيو ۽ نجم سيٺي انصاف لاءِ عدالت هليو ويو، عمران خان سمجهي ٿو ته انصاف رڳو تحريڪ انصاف جو ميراث آهي ۽ هو اڄ تائين ان ڪيس ۾ پيش نه ٿيو جنهن تي عدالت کي عمران خان جي رهائشگاهه تي اشتهار هڻڻو پيو ۽ ڪجهه اخبارن به شايع ڪيو ته عمران خان کليل طور پيش ٿيڻ کان لاچار آهي ۽ روپوش آهي، اسان کيس مفرور نه چيو، هن چيو ته عمران خان عدالت ۾ معافي نامو جمع ڪرايو ته هو آئنده ڪڏهن الزام بازي نه ڪندو، عدليه جو احترام ڪندو. هن چيو ته عمران خان جي دل ۾ عدالتن جي فيصلن جو جيڪو احترام آهي اسان کي ان جي خبر آهي، فيصلا اچي به وڃن هو پوءِ به تڪرار جاري رکندو. هن چيو ته پاڪستان تحريڪ انصاف جو سربراهه گهپلن جي ڪيس ۾ ملوث ڏوهارين جي حمايت ڪري رهيو آهي، هو اهو ڪيس ميڊيا تي وڙهي رهيو آهي، عمران خان جي اخلاقيات جي سياست جو معيار اهو آهي ته عوامي فائدي لاءِ ٺهندڙ پل تي اعتراض ڪري ٿو جڏهن ته سياستدانن کي پل، اسڪول، اسپتال نه ٺهڻ تي اعتراض هوندو آهي. هن چيو ته عمران خان اي پي سي ۾ فوجي عدالتن کي مڃي هاڻي پاڻ ئي ان جي مخالفت ڪري رهيو آهي. وفاقي وزير چيو ته عمران خان اڄ جن فوجي عدالتن جي مخالفت ڪري رهيو آهي، انهن عدالتن ۾ دهشتگردن جا ڪيس هلائڻا آهن، جن اسان جي معصوم ٻارن، شهرين ۽ فوجي جوانن کي شهيد ڪيو ۽ اسان جي عبادتگاهن، درسگاهن کي نشانو بڻايو. هڪ سوال تي هن چيو ته عمران خان باقي صوبن ۾ پوليس ۾ سياسي مقررين جو الزام هڻي ٿو جڏهن ته بني گالا جي تخت تان هو خيبرپختونخواهه جي پوليس کي ڪنٽرول ڪرڻ چاهي ٿو ۽ انهي رويي تي اتان جي چيف سيڪريٽري استعيفيٰ ڏني ۽ چيو ته هو بني گالا جي مداخلت ۾ ڪم نه ٿو ڪرڻ چاهي. ڪي پي ڪي جو جيڪو نئون چيف سيڪريٽري مقرر ٿيو ان جي خلاف نيب ۾ ڪيس آهن جڏهن ته ڪي پي ڪي جو وڏو وزير ان جون صفايون پيش ڪري رهيو آهي. پنجاب صوبي جي گورنر چوڌري سرور جي استعيفيٰ بابت هڪ سوال تي هن چيو ته گورنر جو آئيني ڪردار هوندو آهي، چوڌري سرور پنهنجي آئيني ڪردار کان ٻاهر ٿي ڪم ڪرڻ چاهيو ٿئي، اسان جي دعا آهي ته هو جنهن نئين سفر جي شروعات ڪري رهيو آهي کيس ڪاميابي ملي. اطلاعات ۽ نشريات واري وفاقي وزير چيو ته پرويز مشرف اي سي ايل مان نالو ڪڍرائڻ جي لاءِ غلط پتي تي درخواست موڪلي، کيس گهرجي ته گهرو وزارت بدران سپريم ڪورٽ درخواست موڪلي. اطلاعات واري وزير چيو ته هي اهي حقيقتون آهن جيڪي اسان ميڊيا ۽ عوام آڏو آڻڻ ضروري سمجهون ٿا، جيڪڏهن توهان کي ڪوڙ لڳي ٿو ته جهڙي طرح نجم سيٺي عمران خان کي عدالت ۾ وٺي ويو عمران خان به اسان کي عدالت ۾ وٺي وڃي، آئون سائيڪل تي اچي هر تاريخ تي عدالت پهچندس، جهانگير ترين به مون کي عدالت وٺي وڃڻ جو چيو هو، آئون انتظار ۾ آهيان ته هو ڪڏهن مون کي عدالت وٺي ويندو. ان موقعي تي قومي اسيمبلي ميمبر چوڌري دانيال عزيز بلدياتي چونڊن جي حوالي سان سوال جي جواب ۾ چيو ته مسلم ليگ (ن) جي پنجاب ۽ وفاقي حڪومت تڪبندين جي اعتراضن جي حوالي سان اختيار اليڪشن ڪميشن ڏانهن منتقل ڪري ڇڏيا. مسلم ليگ (ن) ماضي ۾ به پنجاب ۽ بلوچستان ۾ بلدياتي چونڊون ڪرايون ۽ هي واحد پارٽي آهي جنهن بلوچستان ۾ نيشنل پارٽي کي اقتدار جو موقعو ڏنو جنهن اتي بلدياتي چونڊون ڪرايون، ان لاءِ اسان سمجهون ٿا ته بلدياتي چونڊن جي حوالي سان ڪاميابي ملي آهي.

 

انتقامي سياست تي يقين نٿا رکون، معاملا ڳالهين ذريعي حل ڪيا وڃن: زرداري

ڪراچي (اسٽاف رپورٽر) اڳوڻي صدر آصف علي زرداري جي صدارت ۾ غير رسمي اجلاس کي خطاب ڪندي اڳوڻي صدر آصف علي زرداري چيو آهي ته انتقامي سياست تي يقين نٿا رکون. هن چيو ته صوبي جي معامن کي ڳالهين ذريعي حل ڪيو وڃي. آصف زرداري چيو ته سينيٽ جي ٽڪيٽ ميرٽ تي ڏني وڃي. اڳوڻي صدر سنڌ جي وڏي وزير سيد قائم علي شاهه کي سنڌ جي گورنر ڊاڪٽر عشرت العباد سان رابطو ڪرڻ جو به چيو آهي. هن جو چوڻ هو ته ايم ڪيو ايم جي خدشن کي سنڌ جي گورنر جي مدد سان ختم ڪيو وڃي، آصف زرداري جي صدارت ۾ غير رسمي اجلاس ۾ صوبائي وزير شرجيل ميمڻ، پيپلزپارٽي جي اڳواڻ فريال ٽالپر ۽ سنڌ جي وڏي وزير سيد قائم علي شاهه شرڪت ڪئي. هوڏانهن اڳوڻي صدر آصف علي زرداري سنڌ جي گورنر ڊاڪٽر عشرت العباد خان کي ٽيليفون ڪري ايم ڪيو ايم جي ڪارڪن سهيل احمد جي قتل تي تعزيت ڪئي.  ملاقات ۾ وڏي وزير اڳوڻي صدر کي صوبي جي صورتحال، ڪراچي ۾ امن امان ۽ ترقياتي منصوبن سميت مختلف معاملن تي بريفنگ ڏني، پ پ جي ذريعن جو چوڻ آهي ته ملاقات ۾ سنڌ جي سينيٽ چونڊن لاءِ اميدوارن کي پارٽي ٽڪيٽ جاري ڪرڻ سميت ايم ڪيو ايم پاران پ پ تي الزام لڳائڻ ۽ سنڌ حڪومت تي تقيد جو تفصيلي جائزو ورتو ويو، ذريعن جو چوڻ آهي ته آصف علي زرداري وڏي وزير کي هدايت ڪئي ته صوبي ۾ مڙني جماعتن سان ورڪنگ رليشن شپ بهتر بڻائي وڃي ۽ امن امان جي قيام تي سياسي قوتن کي اعتماد ۾ ورتو وڃي. ذريعن جو چوڻ آهي ته اڳوڻي صدر وڏي وزير کي هدايت ڪئي ته گورنر سان رابطو ڪري صوبي جي سطح تي ايم ڪيو ايم جا جيڪي تحفظات آهن انهن جو حل ڳالهين ذريعي ڪڍيو وڃي.

 

صدر پنجاب جي گورنر جي استعيفيٰ منظور ڪري ورتي

اسلام آباد (بيورو) صدر ممنون حسين پنجاب جي گورنر محمد سرور جي استعيفيٰ منظور ڪري ورتي آهي. ڪالهه خميس ڏينهن ڪابينا ڊويزن پاران سمري تي صدر وزيراعظم جي ايڊوائيس تي پنجاب جي گورنر جي استعيفيٰ منظور ڪري ورتي.

 

وزيراعظم ڪراچي ۾ امن امان جي صورتحال بابت اهم اجلاس اڄ طلب ڪري ورتو

اسلام آباد (بيورو) وزيراعظم نواز شريف ايم ڪيو ايم اڳواڻن ۽ قتل ٿيل ڪارڪنن جي وارثن سان تعزيت لاءِ اڄ ڪراچي جو دورو ڪندو، وزيراعظم ڪراچي ۾ امن امان جي صورتحال بابت اهم اجلاس طلب ڪري ورتو آهي. وزيراعطم نواز شريف ڪراچي ۾ امن امان جي صورتحال بابت اهم اجلاس سڀاڻي گورنر هائوس ۾ طلب ڪري ورتو آهي.وزيراعظم هائوس پاران جاري ڪيل بيان ۾ ڄاڻايو ويو آهي ته وزير اعظم نواز شريف سڀاڻي ايم ڪيو ايم ڪارڪنن سهيل احمد جي گهر وارن سان تعزيت ڪندو.وزيراعظم چيو آهي ته ايم ڪيو ايم ڪارڪن سهيل احمد جي قتل ۾ ملوث جوابدارن خلاف سخت ڪارروائي ڪئي ويندي. وزيراعظم نواز شريف چيو ته ايم ڪيو ايم جا سمورا خدشا دور ڪيا ويندا.

 

وفاقي حڪومت سان اختلافن کانپوءِ پنجاب جي گورنر چوڌري سرور عهدي تان استعيفيٰ ڏئي ڇڏي

لاهور (بيورو) چوڌري سرور جي استعيفيٰ کانپوءِ  پنجاب ۾ نئين گورنر لاءِ هڪ عورت سميت مختلف نالن تي غور شروع  ڪيو ويو آهي، ذڪيه شاهنواز، راجا ظفر الحق ۽ راڻا ثناءُ الله سميت مختلف نالن تي ويچاريو پيو وڃي. چوڌري سرور جي پنجاب جي گورنر طور استعيفيٰ کانپوءِ حڪومت، نئين گورنر لاءِ مختلف نالن تي مشاورت شروع ڪري ڇڏي آهي.ذريعن موجب، نئين گورنر لاءِ ذڪيه شاهنواز، راجا ظفر الحق، راڻا ثناءُ الله، راجا ظفر الحق، مخدوم احمد محمود ۽ جعفر اقبال جي نالن تي غور ڪيو پيو وڃي.ذريعن موجب، ذڪيه شاهنواز  پنجاب جي گورنر جي عهدي لاءِ مضبوط اميدوار سمجهي پئي وڃي، مقرري جي صورت ۾ ذڪيه شاهنواز پنجاب جي پهرين عورت گورنر هوندي.ذريعن موجب، وزيراعظم نواز شريف جي پارٽي جي سينيئر اڳواڻن سان مشاورت جاري آهي، جلد ڪنهن هڪ نالي تي اتفاق ڪري مقرري ڪئي ويندي.پنجاب جي گورنر جي استيعيفيٰ تي رد عمل ظاهر ڪندي سينيئر قانوندان عاصمه جهانگير چيو ته شڪر آهي ڪنهن سرڪاري عملدار پاڻ استعيفيٰ ڏني، وڌيڪ استعيفائون به اچڻ گهرجن.

 

الطاف حسين پارٽي کان الڳ ٿيڻ جو اعلان واپس وٺي ڇڏيو، 36 ڪارڪنن جي قتل جو ذميوار وڏي وزير قرار

ڪراچي (اسٽاف رپورٽر) ايم ڪيو ايم سربراهه الطاف حسين هڪ ڀيرو ٻيهر متحده کان ڌار ٿيڻ جو اعلان ڪندي چيو آهي ته اڄ متحده قائم طور هو آخري خطاب ڪندو، جنهن کانپوءِ سندس پارٽي سان ڪوبه واسطو نه هوندو.لنڊن مان جاري ڪيل بيان ۾ الطاف حسين چيو ته هن هيٺئين  طبقي جي ماڻهن سان گڏجي جدوجهد ڪئي پر اسٽيبلشمنٽ کيس قبول نه ڪيو، ڇاڪاڻ ته سندس تعلق ڪنهن جاگيردار گهراڻي سان نه هو.هن چيو ته 4 ڀيرا مارشل لا لڳا پر ملڪ جي قسمت تبديل نه ٿي، مشرف نيڪ نيتي سان ڪم ڪيو، ايم ڪيو ايم سندس حمايت ڪئي.الطاف حسين چيو ته کيس بدنام ڪرڻ جي ڪوشش ڪئي وئي، را جو ايجنٽ سڏيو ويو ۽ خريد ڪرڻ جي ڪوشش به ڪئي وئي، نيٺ وطن واپسي جا رستا به بند ڪيا ويا.ايم ڪيو ايم سربراهه چيو ته گورنر عشرت العباد کي جيڪو ڪردار ادا ڪرڻ کپندو هو، هن ادا نه ڪيو.هن چيو ته اڄ قائد طور آخري خطاب ڪندس جنهن کانپوءِ متحده کي الواع چئي ڇڏيندس، ڇاڪاڻ ته هو نه ٿو چاهي ته سندس وڌيڪ ساٿين کي قتل ڪيو وڃي. لنڊن: متحده قومي موومينٽ جي قائد الطاف حسين چيو آهي ته مان سهيل احمد سميت ايم ڪيو ايم جي 36 شهيد ڪارڪنن جو قاتل سنڌ جي وڏي وزير سيد قائم علي شاهه کي سمجهان ٿو، هڪ بيان ۾ الطاف حسين 15 ڊسمبر 2014ع تي گرفتار ڪيل سهيل احمد جيڪو يونٽ 64 جو يونٽ انچارج هو ان کي سرڪاري اهلڪارن گرفتار ڪيو هو ان جي گرفتاري جي حوالي سان چيف جسٽس آف سنڌ هاءِ ڪورٽ ۽ سنڌ جي وڏي وزير سميت سڀني کي اطلاع ڏني وئي ۽ ان جي گرفتاري تي ٽي ڀيرا پريس ڪانفرنس به ڪئي وئي پر گذريل ڏينهن 28 جنوري 2015ع تي ان کي سرڪاري اهلڪارن قتل ڪري ڇڏيو الطاف حسين چيو ته جڏهن سهيل احمد جو لاش موچڪو ڳوٺ ۾ اڇلايو پيئي ويو ان وقت وزيراعليٰ سنڌ سيد قائم علي شاهه، سنڌ اسيمبلي ۾ رڙيون ڪري وزيراعليٰ هائوس تي چئن شهيدن جا لاش آڻيندڙ سوڳوارن جي آمد کي حملو قرار ڏئي رهيو هو، الطاف حسين چيو ته سهيل احمد شهيد وانگر ٻين شهيد ڪيل ايم ڪيو ايم جي وڌيڪ 35 ڪارڪنن جو قاتل به قائم علي شاهه کي سمجهان ٿو. الطاف حسين جي پارٽي کان لڳ ٿيڻ جي بيان بعد ِ ڪراچي ۾ ايم ڪيو ايم جي ڪارڪن جي جنازي نماز ۽ هڙتال جي باوجود هزارين ڪارڪن نائن زيرو پهچڻ شروع ٿي ويا آهن ٻئي طرف ايم ڪيو جي سينيٽر ايم اين ايز ۽ ايم پي ايز کي نائن زيرو پهچڻ جا حڪم جاري ڪيا ويا آهن الطاف حسين لندن مان جاري ڪيل بيان ۾ چيو آهي ته هو سڀاڻي حيدرآباد يونيورسٽي واري تقريب کي آخري خطاب ڪندو ان کانپوءِ هن جو ايم ڪيو ايم سان ڪوبه واسطو نه هوندو، هن پنهنجي بيان ۾ قوم کان معافي پڻ گهري آهي، حساس ادارن جو ذڪر ڪندي چيو آهي ته آءِ ايس آءِ ڪڏهن به قبول ناهي ڪيو الطاف حسين جو بيان اهڙي وقت سامهون آيو آهي جڏهن سنڌ ۾ ايم ڪيو ايم جي ڪارڪنن جي قتل خلاف ڪارو ڏينهن ملهايو پيو وڃي، ايم ڪيو ايم جي قائد ان کان اڳ پنهنجي بيان ۾ سهيل احمد سميت 36 ڪارڪنن جي قتل جو ذميوار وڏي وزير کي قرار ڏنو هو.

 

ڪراچي ۾ ڪٿي به لاش ملي ٿو ته ايم ڪيو ايم وارا چون ٿا اهو اسان جو ڪارڪن آهي، لڳايل الزام ڪوڙا آهن: قادر پٽيل

ڪراچي (اسٽاف رپورٽر) پ پ ڪراچي ڊويزن جي اڳواڻن ايم ڪيو ايم جي الزامن کي رد ڪندي چيو آهي ته ناڪاري الزامن واري سياست کي ختم ڪئي وڃي، ٽارگيٽڊ ايڪشن رڳو ڏوهارين خلاف ٿي رهيو آهي، ان کي ناڪام بڻائڻ جي ڪوشش نه ڪئي وڃي. پ پ ميڊيا سيل تي پريس ڪانفرنس ڪندي پ پ جي ڊويزنل صدر قادر پٽيل چيو ته سمجهه نه ٿو اچي ايم ڪيو ايم هر دفعي فوج کي اقتدار ڏيڻ جي ڳالهه ڇو ڪندي آهي.؟ هن چيو ته شهر ۾ جتان به لاش ملندا آهن، ايم ڪيو ايم انهن کي پنهنجو ڪارڪن سڏي احتجاج ڪندي آهي. قادر پٽيل جو چوڻ هو ته کين محسوس ٿئي پيو ته جيڪو ڪجهه ٿئي پيو، جنهن اشاري تي ٿي رهيو آهي. هن چيو ته ڪراچي ۾ پ پ جا سوين ڪارڪن قتل ٿي چڪا آهن پر هنن ڪنهن تي الزام ناهي هنيو، جڏهن ته شڪيل اوج ۽ پروفيسر صبط حسن جي قاتلن جو تعلق متحده سان نڪتو آهي. قادر پٽيل جو چوڻ هو ته ايم ڪيو ايم جي سوڳ واري اعلان کانپوءِ 15 منٽن ۾ ڪاروبار بند ٿي ويندو آهي، شهرين کي ان خوف مان نڪرڻ ۾ وقت لڳندو. ان موقعي تي پ پ اوڀر جي صدر سعيد چاولا چيو ته ايم ڪيو ايم پاران مٿس هنيل الزام درست ناهن، هو سهيل احمد کي سڃاڻي ئي نه ٿو، ساڻس ڏند چڪ جي ڳالهه ته پري آهي. هن چيو ته جنهن کليل ڪچهري جي ڳالهه ڪئي پئي وڃي، اها بهادرآباد نه پر طارق روڊ تي ٿي هئي، جنهن ۾ ڊي سي به موجود هو، اتي ڪا بدمزگي نه ٿي هئي.

 

پاڪ-امريڪا لاڳاپن ۾ گذريل 18 مهينن دوران بهتري آئي آهي:سرتاج عزيز

اسلام آباد (بيورو)  وزيراعظم جَي پرڏيهي معاملن بابت صلاحڪار سرتاج عزيز چيو آهي ته پاڪ-امريڪا لاڳاپن ۾ گذريل 18 مهينن دوران بهتري آئي آهي، دهشتگردن خلاف بنا فرق جي ڪارروائي جاري آهي، جيڪا آخري شدت پسند جي خاتمي تائين جاري رهندي. اسلام آباد مان جاري ڪيل بيان ۾ سرتاج عزيز چيو ته گذريل ڏيڍ سال دوران پاڪ –امريڪا لاڳاپا بهتر ٿيا آهن. هـُن چيو ته پاڪستان روس سميت سمورن ملڪن سان بهتر لاڳاپا چاهي ٿو. پرڏيهي صلاحڪار چيو ته خوشحال پاڪستان ۽ افغانستان خطي جي مفاد ۾ آهن. سندس چوڻ هو ته چين سان سول نيو ڪليئر بابت ڊيل هلي رهي آهي. سرتاج عزيز چيو ته دهشتگردن خلاف سخت ۽ بنا فرق جي ڪارروائي ڪئي پئي وڃي، جيڪا آخري دهشتگردي جي خاتمي تائين جاري رهندي.

 

پشين: ساهه ٻوساٽجڻ سبب هڪ ئي خاندان جا 11 ماڻهو فوت

پشين (م.د) صوبي بلوچستان جي ضلعي پشين ۾ هڪ گه ۾ گئس سان دم گهٽجڻ سبب هڪ ئي خاندان جا 11 ماڻهو مارجي ويا، مارجي ويلن ۾ هڪ ئي خاندان جي ٽي عورتون، 6 ٻارڙا ۽ ٻه مرد شامل هئا. ريسڪيو ذراعن مطابق واقعه کلي ڪربلا جي علائقي ابراهيم زئي ۾ پيش آيو جتي گهر جي هڪ ڪمري سردي جي شدت کان بچڻ لاءِ گيس هيٽر ٻاريو ۽ بند ڪرڻ جي بغير سمهي پيا رات جي ڪنهن وقت گيس خارج ٿيڻ سبب ڪمري ۾ ستل 11 ماڻهو دم گهٽجڻ جي وجهه سان مارجي ويا. اطلاع ملڻ تي ريسڪيو ۽ ليويز فورس متاثر ٿيل گهر تي پهچي تمام ماڻهن جي ضروري ڪارروائي جي لاءِ پشين اسپتال منتقل ڪري ورتو مارجي ويل ماڻهن م هڪ ئي خاندان جون ٽي عورتون، ڇهه ٻارڙا ۽ 2 مرد شامل آهن. هڪ ئي وقت 12 ماڻهن جي مارجي وڃن تي گهر ۾ ڪهرام مچي ويو پوليس حادثي واري هنڌ پهچي ساهديون گڏ ڪري تفتيش جو آغاز ڪري ورتو لاشون وارثن جي حوالي ڪيون ويون.

 

ٻيهر روڊن تي نڪتاسين ته حڪمران برداشت نه ڪري سگهندا: عمران خان

اسلام آباد (بيورو) تحريڪ انصاف جي چيئرمين عمران خان جو چوڻ آهي ته گورنر پنجاب چوڌري سرور جي استعيفيٰ ان طرف اشارو آهي ته ملڪ ۾ سموريون سهولتون اميرن لاءِ آهن ۽ ملڪ ۾ قبضه گروپ وڌيڪ طاقتور آهي، بني گالا ۾ پنهنجي رهائشگاهه تي پريس ڪانفرنس ڪندي عمران خان جو چوڻ هو هت جيڪي ڳالهيون گورنر پنجاب ڪيون اهي مان ڪيترن ئي سالن کان ڪري رهيو آهيان جڏهن ته ملڪ ۾ ٻن وڏين سياسي تنظيمن وچ ۾ ناني ويڙهو آهي جنهن سبب سڀ کان طاقتور قبضا مافيه آهي جنهن جي چوڻ تي هر ڪم ٿئي پيو ۽ هي ئي قبضا مافيا اوور سيز پاڪستانين جي ملڪيت تي قبضو ڪري ٿي، هن چيو ته پاڪستان جي ٽيڪس شرح دنيا ۾ سڀ کانگهٽ آهي ۽ جمهوريت جو حسن آهي ته پئسو جمع ڪيو وڃي ۽ عوام تي خرچ ڪيو وڃي شريف ڀائر پنهنجا اثاثا ان لاءِ ظاهر نه پيا ڪن ڇو ته هو ٽيڪس بچائڻ چاهيان ٿا شهباز شريف جا 18 ڪروڙ ملڪ کان ٻاهر ۽ 10 ڪروڙ ملڪ ۾ آهي ڇا اها مڃڻ جهڙي ڳالهه آهي تحريڪ انصاف جي چيئرمين چيو ته ڪنهن ملڪ ۾ ايئن هوندو آهي جتي پوليس ماڻهن کي غائب ڪري ڇڏيندي آهي حڪومت پنجاب کي پوليس اسٽيٽ بڻائي ڇڏيو آهي ٻڌايو وڃي ته ڪنهن جي چوڻ تي چنيوٽ جي 4 ٻارڙن جي ماءُ آمنه کي جيل ۾ وڌو ويو عورت جو مڙس ڪيترن ئي ڏينهن کان گم هو ۽ مڙس جو ڏوهه اهو هو ته هو رمضان شوگر ملز ۾ ملازم جو ۽ ان کي ڌماڪئڻ لاءِ ان جي گهرواري کي جيل ۾ وڌو ويو  هن چيو ته آزاد عدليه، ميڊيا ۽ صاف شفاف اليڪشن تي جمهوريت جو دارومدار آهي آرٽيڪل 218 مطابق چون ڌانڌلي جي جاچ لاءِ جوڊيشل ڪميشن بڻائي وڃي پر حڪومت ان معاملي تي سنجيدگي جو مظاهرو نه پئي ڪري فوجي عدالتن بابت سوال تي عمران خان جو چوڻ هو ته تحريڪ انصاف ملٽري ڪورٽس جي حمايت ڪئي آهي جڏهن ته حامد خان عدالت ۾ فوجي عدالتن خلاف صرف وڪيلن جو موقف پيش ڪري رهيو آهي. هن چيو ته جيڪڏهن ٻيهر روڊن تي نڪتاسين ته حڪمران برداشٽ نه ڪري سگهندا.