تازيون خبرون

Daily Archives: January 29, 2015

ڀارت سان برابري بنياد تي معمول جا لاڳاپا چاهيون ٿا: نواز شريف

اسلام آباد (بيورو) وزيراعظم نواز شريف چيو آهي ته پاڪستان ڀارت سان برابري جي بنياد تي معمول جا لاڳاپا چاهي ٿو، خطي ۾ امن لاءِ ٻنهي ملڪن کي ڪشمير سميت سمورا معاملا ڳالهين ذريعي طئي ڪرڻ گهــُرجن. وزيراعظم نواز شريف سان پي ايم هائوس اسلام آباد ۾ ڀارت ۾ مقرر پاڪستاني هاءِ ڪمشنر عبدالباسط ملاقات ڪئي. ملاقات دوران عبدالباسط، وزيراعظم کي پاڪ – ڀارت لاڳاپن ۽ آمريڪي صدر براڪ اوباما جي ڀارتي دوري بابت تفصيلن کان آگاهه ڪيو. ملاقات دوران نواز شريف جو چوڻ هو ته پاڪستان سمورن پاڙيسري ملڪن سان سٺن لاڳاپن جو خواهشمند آهي. سندس چوڻ هو ته ڀارت پاڪستان لاءِ اهم ملڪ آهي، ان ڪري هــُو نئين دهلي سان برابري جي بنياد تي لاڳاپا چاهين ٿا. وزيراعظم چيو ته خطي ۾ امن لاءِ ٻنهي ملڪن کي ڪشمير سميت سمورا معاملا ڳالهين ذريعي حل ڪرڻ گهــُرجن.

 

پ پ ۾ ڪابه ڌڙا بندي ناهي، امين فهيم صدر ۽ آءُ وڏو وزير آهيان: قائم علي شاهه

شهيدبينظيرآباد (ڊ.ر) سنڌ جي وڏي وزير سيد قائم علي شاھ اڄ هتي روهڙي ڪئنال تي واقع چنيسر ريگيوليٽر تي صحافين سان ڳالهائيندي چيو آهي ته سنڌ صوبي ۾ ڪمند جو اگهھ مقرر ڪرڻ بابت هڪ ڪيس سپريم ڪورٽ ۾ هلي رهيو آهي پر سنڌ حڪومت صوبي ۾ ڪمند جي اگهھ مقرر ڪرڻ واري  سنڌ هائي ڪورٽ جي موجوده فيصلي تحت في الحال ڪمند جو سرڪاري اگهھ  182 روپيه مقرر ڪيو آهي جئين سپريم ڪورٽ طرفان ڪيس جو فيصلو آيو ته سپريم ڪورٽ جي فيصلي تحت اگھه مقرر ڪيو ويندو . هي ڳالھ هن اڄ نواب شاھ جي ويجهو روهڙي ڪينال جي لائيننگ جي پائليٽ پروجيڪٽ جو افتتاح ڪندي  ڪئي. ان موقعي تي صوبائي وزير اطلاعات کاتو شرجيل انعام ميمڻ، صوبائي وزير خزانه سيد مراد علي شاھ، ايم پي اي غلام قادر چانڊيو، سيد فصيح احمد شاھ ۽ ٻين پارٽي اڳواڻن کان علاوه سيڪريٽري سيد ظهير حيدر شاھ ۽ واسطيدار عملدار موجود هئا. هن چيو ته سنڌ صوبي ۾ ڪمند جو اگهھ پنجاب جي ڪمند جي اگھ کان وڌيڪ آهي. ايم ڪيو ايم پاران حڪومت ۾ ٻيهر شامل ٿيڻ بابت پڇيل هڪ سوال جي جواب ۾ هن چيو ته سياست ۾ ڪابه ڳالهھ حرف آخر نه هوندي آهي ۽ جيڪڏهن ان سلسلي ۾ ڪا ڳالھ ٻولھ ٿي آهي ته کيس ان بابت هن وقت خبر نه آهي. پڇيل هڪ ٻئي سوال جي جواب ۾ هن چيو ته پيپلز پارٽي صوبي ۾ تعليم جي واڌاري لاءِ الطاف حسين يونيورسٽي حيدرآباد کي تمام مهانگي زمين ڏني آهي ته جئين صوبي ۾ تعليم کي هٿي وٺرائي سگهجي هن چيو ته سنڌ حڪومت صوبي ۾ تعليم جي فروغ ۽ بهتري ۾ گهري دلچسپي وٺي رهي آهي ۽ ان سلسلي ۾ هڪ ڏينهن اندر سنڌ اسيمبلي ۾ 4 قانون پاس ڪيا ويا آهن هن چيو ته پارٽي ۾ ڪابه ڌڙا بندي نه آهي ۽ پارٽي پنهنجي قيادت ۾ مضبوط آهي هن چيو ته سنڌ ۾ کنڊ جي اگھه تي ضابطي لاءِ پرائيس ڪنٽرول ايڪٽ موجود آهي جنهن تحت کنڊ تي ناجائز منافعو وٺندڙن خلاف قانوني قدم کنيو ويندو ۽ اسان ان کان غافل نه آهيون ان موقعي تي سنڌ جي وڏي وزير سيد قائم علي شاھ چيو ته پارٽي ڪو چئيرمين جناب آصف علي زرداري جي هدايتن تحت روهڙي ڪينال تي چنيسر ريگيولٽر کان سڪرنڊ ريگيوليٽر تائين پائليٽ پروجيڪٽ تحت ٿيندڙ ترقياتي ڪمن سبب 194 ڪيوبڪ فٽ پاڻي جي بچت ٿيندي جنهن سان ٻنهي پاسن جي  65 هزار ايڪڙ کان وڌيڪ بنجر زمين کي پاڻي ملندو ۽ اها آباد ٿيندي جڏهن ته 2500 ايڪڙ کان وڌيڪ زمين قابل ڪاشت ٿيندي. هن ٻڌايو ته مذڪوره پروجيڪٽ تي 3.44 بلين روپيه  لاڳت ايندي. هن چيو ته مذڪوره پروجيڪٽ 10 جنوري 2015 کان شروع ڪيو ويو جيڪو 31 جنوري 2015 ۾ مڪمل ڪيو ويندو. هن چيو ته مذڪوره پروجيڪٽ تحت روهڙي ڪينال جي آر ڊي 616 کان آر ڊي 647 تائين لائيننگ ڪئي پئي وڃي جنهن سان سم ۽ ڪلر جو خاتمو ايندو. هن چيو ته آبادگارن کي واڌو پاڻي ملڻ سان فصلن جي پيداوار وڌندي جنهن سان سنڌ ۾ خوشحالي ايندي. هن چيو ته جئين ته ٿرپارڪر ضلعي ۾ پاڻي جي کوٽ آهي ان جي ڪري ئي اتي ڏڪار ڇانيل آهي پر سنڌ حڪومت ٿرپارڪر ضلعي ۾ پنهنجي وس آهر خدمت ڪري رهي آهي هن چيو ته هن سال سنڌ ۾ ڪڻڪ جو بمپر فصل لٿو آهي ۽ اميد آهي ته هن سال سنڌ حڪومت ڪڻڪ ٻاهر موڪلي پرڏيهي ناڻو ڪمائڻ جي حيثيت ۾ آهي. هن چيو ته صوبي جي آبادگارن ۽ زميندارن کي هن سال مختلف فصلن جي بمپر پيداوار سبب فائدو ٿيو آهي ۽ مذڪوره منصوبي سبب ڀرپاسي جي زميندارن ۽ آبادگارن کي اڳ کان وڌيڪ فائدو ٿيندو هن چيو ته ماهرن پاران ڏنل بريفنگ ۾ ٻڌايو ويو آهي ته تمام جلد لائيننگ جو ڪم اڃان به وڌايو ويندو ته 1200 ڪيوسڪ کان وڌيڪ پاڻي جي بچت ٿيندي جنهن سان ٻيون بنجر ٿيل زمينون آباد ٿينديون ۽ اها شڪايت ختم ٿيندي ته صوبي ۾ پاڻي جي کوٽ آهي هن چيو ته مذڪوره منصوبي جي جيتري تعريف ڪجي اوتري گهٽ آهي.  هن چيو هن منصوبي کي مڪمل ٿيڻ کانپوءِ ٽيل جي آبادگارن جي زرعي پاڻي جي کوٽ جي شڪايت هميشه جي لاءِ ختم ٿي ويندي. هن چيو ته موجوده حڪومت پارٽي جي ڪو چئيرمين آصف علي زرداري جي هدايت تي اهڙا تمام منصوبا جنهن ۾ آبادگارن ۽ عام ماڻهن کي فائدو پهچي شروع ڪيا آهن ۽ هي پائليٽ پروجيڪٽ به ان سلسلي جي هڪ ڪڙي آهي. ان کان اڳ منصوبي جي چيف انجنئير جنيد احمد ميمڻ وڏي وزير کي منصوبي بابت تفصيلي آگاهي ڏني ان موقعي تي وزيراعلى سنڌ سيد قائم علي شاھ پريس ڪلب نواب شاھ لاءِ 5 لک روپيا ڏيڻ جو اعلان ڪيو.

 

عمران خان کي اهڙي ڪميشن گهرجي جيڪا سندس مرضيءَ موجب فيصلا ڏئي : پرويز رشيد

اسلام آباد (بيورو) اطلاعات واري وفاقي وزير پرويز رشيد، عمران خان کي يوٽرن جو بادشاهه قرار ڏيندي چيو آهي ته ڪپتان جنهن ڪميشن تي اعتماد جو اظهار ڪيو، هاڻي ان تي ئي بي اعتمادي ظاهر ڪري پيو. عمران خان جي درخواست تي رد عمل ظاهر ڪندي پرويز رشيد چيو ته پي ٽي آءِ سربراهه پنهنجي ٽن پريس ڪانفرنس ۾ لوڪل ڪميشن تي اعتماد جو اظهار ڪيو آهي. هن چيو ته يوٽرن جي بادشاهه عمران خان هاڻي نئون يوٽرن ورتو آهي، ثابت ٿي ويو ته پي ٽي آءِ سربراهه عوام کي ڌانڌلي جي نالي تي گمراهه ڪري پيو.  پرويز رشيد چيو ته عمران خان کي اهڙي ڪميشن گهرجي، جيڪا سندس حق مرضيءَ موجب ۽ حق ۾ فيصلا ڏئي.

 

آرمي چيف جو سعودي سفارتخاني جو دورو، پاڪستاني قوم ڏک جي گهڙي ۾ سعودي عوام سان گڏ آهي: جنرل راحيل شريف

اسلام آباد(بيورو) آرمي چيف جنرل راحيل شريف سعودي سفارتخاني پهچي، لاڏاڻو ڪري ويل سعودي بادشاهه شاهه عبدالله جي لاڏاڻي تي تعزيت ڪئي آهي، پاڪ فوج جي سربراهه چيو آهي ته ڏکي جي هن  گهڙيءَ ۾ سعودي عوام سان گڏ آهيون. آرمي چيف جنرل راحيل شريف سعودي سفارتخاني اسلام آباد پهتو، جتي وقتي سعودي سفير جاسم الخالدي ۽ سفارتخاني جي دفاعي معاملن بابت مشير سندس آجيان ڪئي. آرمي چيف، سعودي بادشاهه شاهه عبدالله جي لاڏاڻي تي تعزيت ڪئي   تعزيتي ڪتاب ۾ پنهنجا تاثر پڻ لکيا. جنرل راحيل شريف، شاهه عبدالله جي لاڏاڻي کي وڏو نقصان قرار ڏيندي چيو ته پاڪستاني قوم ڏکي جي هن گهڙي ۾ سعودي عوام سان گڏ آهي.

 

 

 

جسٽس فيصل عرب کي سنڌ هاءِ ڪورٽ چيف جسٽس بڻائڻ جي سفارش

اسلام آباد(بيورو) اعليٰ عدليه ۾ ججن جي مقرري ڪندڙ جوڊيشل ڪميٽي پارلياماني ڪميٽي کي چيف جسٽس سنڌ هاءِ ڪورٽ مقبول باقر کي سپريم ڪورٽ جو جج ۽ ان جي جاءِ تي جسٽس فيصل عرب کي چيف جسٽس سنڌ هاءِ ڪورٽ بڻائڻ جي سفارش ڪري ڇڏي آهي، چيف جسٽس ناصر الملڪ جي سربراهي ۾ اعليٰ عدليه ۾ فاضل ججن جي مقرري جي حوالي سان غور ڪيو ويو ڪميٽي لاڳاپيل پارلياماني ڪميٽي کي چيف جسٽس سنڌ هاءِ ڪورٽ جسٽس مقبول باقر کي سپريم ڪورٽ جو جج ۽ ان جي جاءِ تي جسٽس فيصل عرب کي سنڌ هاءِ ڪورٽ جو چيف جسٽس جڏهن ته جسٽس (ر) رياض احمد کي چيف جسٽس وفاقي شرعي ڪورٽ بڻائڻ جي سفارش ڪئي.

 

پهرين فيبروري کان پيٽرول 10 کان 12 روپين تائين سستو ٿيڻ جو امڪان

اسلام آباد(بيورو) پوري ملڪ ۾ پهرين فيبروري کان پيٽرول جي قيمت ۾ 8 کان 14 روپيا في ليٽر گهٽتائي جو امڪان آهي، خزاني اوري وزارت جي ذريعن مطابق پهرين فيبروري کان پيٽرول جي قيمت ۾ في ليٽر 10 روپيا، هاءِ اسپيڊ ڊيزل 8 روپيا 50 پئسا، لائٽ ڊيزل 11 روپيا، ايڇ او بي سي 14 روپيا ۽ گاسلٽ جي قيمت 12 روپيا في ليٽر گهٽ ٿيڻ جو امڪان آهي، عالمي سطح تي جون کان هينئر تائين ڪچي تيل جي قيمت 50 سيڪڙو تائين گهٽجي چڪي آهي، جنهن جو فائدو عوام کي منتقل ڪرڻ لاءِ حڪومت گذريل 4 مهينن ۾ پيٽرول 29 روپيا ۽ ڊيزل 23 روپين تائين سستو ڪري چڪي آهي.

 

 

اُتر وزيرستان ۾ ڊرون حملو، 7 ڄڻا مارجي ويا

اُتر وزيرستان (مانيٽرنگ ڊيسڪ) تحصل شوال ۾ آمريڪي ڊرون حملي ۾7 ڄڻا مارجي ويا ۽ 3 زخمي ٿي پيا. آمريڪي ڊرون جهازن اُتر وزيرستان جي تحصل شوال ۾ هڪ گهر تي 3 ميزائل حملا ڪيا جنهن ۾ 7 ڄڻا مارجي ويا 3 زخمي ٿي پيا. مقامي ماڻهن پنهنجي مدد پاڻ تحت فوتين زخمين کي اسپتال منتقل ڪيو جڏهن ته ڊرون جهازن جون اُڏايون گهڻي دير تائين علائقي ۾ جاري رهيون.

 

عمران خان اين اي 122 تي ڌانڌلي جي جاچ لاءِ جوڙيل ڪميشن تي بي اعتمادي ظاهري ڪري ڇڏي، ٽربيونل ۾ درخواست داخل

لاهور (بيورو) پـِي ٽـِي آءِ سربراهه عمران خان، لاهور جـَي قومي تڪ اين اي هڪ سئو 22 تي رڪارڊ جي جاچ پڙتال لاءِ جوڙيل لوڪيشن ڪميشن تي بي اعتمادي ظاهر ڪندي اليڪشن ٽربيونل ۾ درخواست داخل ڪرائي ڇڏي آهي. تحريڪ انصاف جي سربراهه عمران خان جي وڪيل پاران اليڪشن ٽربيونل لاهور ۾ درخواست داخل ڪرائي وئي. درخواست ۾ موقف اختيار ڪيو ويو ته لوڪل ڪميشن جي رپورٽ کان اڳ بيانن جاري ڪيا ويا، جنهن سان شڪ پيدا ٿيا آهن، کيس ان تي اعتماد ناهي. عمران خان اهو به موقف اختيار ڪيو ته لوڪل ڪميشن پاران رپورٽ غلط ٺاهي وئي آهي، غلط رپورٽ ٺاهڻ تي لوڪل ڪميشن خلاف ڪارروائي ڪئي وڃي. واضح رهي ته عمران خان جي درخواست تي اليڪش ٽربيونل پاران رڪارڊ جي جاچ پڙتال لاءِ غلام حسين اعواڻ جي سربراهي ۾ لوڪل ڪميشن قائم ڪئي وئي هئي، جنهن پنهنجي رپورٽ ٽربيونل ۾ جمع ڪرائي آهي.

 

ڀارت-امريڪا نيو ڪليئر معاهدي تي اعتراض ناهي: يوسف رضا گيلاني

پشاور (بيورو) اڳوڻي وزير اعظم يوسف رضا گيلاني چيو آهي ته ڀارت ۽ آمريڪا وچ ۾ائٽمي معاهدي تي ڪوبه اعتراض نه آهي، هڪ طرفن معاهدن سان دهشتگردي خلاف جنگ ڪامياب نه پر ناڪام ٿيندي آهي. پشاور  ۾ ميڊيا سان ڳالهائيندي يوسف رضا گيلاني چيو ته امريڪي صدر باراڪ اوباما پاران پاڪستان جو دورو نه ڪرڻ پرڏيهي پالسين جي ناڪامي آهي، جنهن تي خاص ڌيان ڏيڻ جي ضرورت آهي. هن چيو ته امريڪا ۽ ڀارت وچ نيو ڪليئر معاهدي تي ڪوبه اعتراض نه آهي، پر هڪ طرفن معاهدن سان دهشتگردي خلاف جنگ ڪامياب نه پر ناڪام ٿيندي. اڳوڻي وزيراعظم جو اهو به چوڻ هو ته آصف زرداري ۽ بلاول ڀٽو زرداري وچ ۾ اختلاف واريون خبرون بي بنياد آهن.

 

ايم ڪيو ايم اسيمبلي جو تقدس پائمال ڪندي غير پارلياماني ٻولي استعمال ڪري رهي آهي: نثار کهڙو

مورو(رپورٽر) متحده اسيمبلي جو تقدس پائمال ڪندي اسيمبلي اندر غير پارليامني ٻولي استعمال ڪري رهي آهي اگر هنن کي ڪي خدشا آهن ته مهذب طريقي سان اعوان ۾ پيش ڪن، تعليم واري صوبائي وزير نثار احمد کهڙو صوبائي صلاحڪار ممتاز علي چانڊيو جي ڏنل مانجھاندي جي دعوت دوران چانڊيا هائوس تي صحافين سان ڳالهائيندي چيو ته ڪمند جي آبادگارن سان نا انصافي ٿيڻ نه ڏينداسين ۽ مل جي مالڪن کي وارننگ ڏني آهي، جيڪڏهن مل مالڪن پنهنجو قبلو درست ه ڪيو ته سندن خلاف ڪاروائي ڪنداسين ۽ ڪجھ ٽانگي مان نڪتل گھوڙا ڪمند جي اشو تي سياست چمڪائڻ جي ڪوشش ڪري رهيا آهن هنن کي سواءِ مايوسي جي ڪجھه به هٿ نه ايندو، هڪ سوال جي جواب ۾ هن چيو ته پ پ سنڌ جي نوجوانن کي ميرٽ جي بنيادن تي نوڪريون ڏئي رهي آهي ۽ اڄ به ضلعي نوشهروفيرز جي نوجوانن کي ميرٽ جي بنياد تي 900 آرڊر ڏئي رهيا آهيون، هن چيو ته گوسڙو استادن کي هرگز برداشت نه ڪيو ويندو ۽ جنهن به اسڪول ۾ استادن جو تعداد وڌيڪ آهي انهن اسڪولن مان استاد ڪڍي بند پيل اسڪولن ۾ مقرر ڪري سنڌ جو هر بند پيل اسڪول کولي پوءِ دم پٽينداسين ان موقعي تي ساڻس گڏ ڊائريڪٽر سکر زيب النساءَ منگي، ڊپٽي ڪمشنر نوشهروفيروز آغا ناصر علي، مختيارڪار نوشهروفيروز اعجاز علي چانڊيو، ارشاد مشوري، محمد اعظم مستوئي، پ پ اڳواڻ فيروز احمد جمالي، محمد ٻڍل ملڪ، سهيل احمد عباسي، صحافي وحيد رزاق مستوئي، پروفيسر آصف علي مستوئي، ڊاڪٽر ڪاشف مستوئي ۽ ٻيا پڻ موجود هئا.