تازيون خبرون

Daily Archives: January 28, 2015

وڏي وزير سي ايم هائوس اڳيان ايم ڪيو ايم جي ڌرڻي کي حملو قرار ڏئي ڇڏيو، متحده جو احتجاج

ڪراچي (اسٽاف رپورٽر) سنڌ اسيمبلي ۾ وڏي وزير پاران ايم ڪيو ايم جي سي ايم هائوس آڏو احتجاج کي حملو قرار ڏيڻ تي متحده ميمبرن سخت احتجاج ڪندي واڪ آئوٽ ڪيو آهي، سيد قائم علي شاهه چيو آهي ته متحده وارن احتجاج نه پر غنڊا گردي ڪئي آهي، ايم ڪيو ايم وارن ۾ سگهه آهي ته سندس تقرير کي پورو ٻڌن ها، ڪراچي ڪنهن هڪ نه پر سڀني جو شهر آهي، ڪنهن کي به شهر جو امن خراب ڪرڻ جي اجازت نه ڏني ويندي. سنڌ اسيمبلي جو معمول موجب هلندڙ اجلاس ان وقت مڇي مارڪيٽ بڻجي ويو، جڏهن ايم ڪيو ايم ميمبرن پاران ڪارڪنن جي ٽارگيٽ ڪلنگ جو معاملو اٿاريو ويو. متحده اڳواڻ خواجه اظهار چيو ته ايم ڪيو ايم جي ڪارڪنن کي سادا ڪپڙا پهريل ماڻهو اغوا ڪري رهيا آهن، جنهن بعد انهن جا لاش ملن ٿا پر ڪو به سندن آواز ٻڌڻ لاءِ تيار ناهي، آپريشن رڳو متحده خلاف ٿي رهيو آهي. خواجه اظهار چيو ته ڪارڪنن جي قتل خلاف سي ايم هائوس آڏو احتجاج ڪيو ويو پر 10 کان ڪلاڪ کان وڌيڪ گذرڻ باوجود نه ڪو حڪومتي عملدر آيو نه ئي وڏو وزير گهر مان نڪتو. خواجه اظهار جي خطاب بعد وڏي وزير سيد قائم علي شاهه دونهادار تقرير ڪندي متحده ميمبرن کي سخت جواب ڏنو. وڏي وزير چيو ته ايم ڪيو ايم وارن سندس غير موجودگي ۾ احتجاج نه پر سي ايم هائوس تي حملو ڪيو آهي، شرجيل ميمڻ ڪيترائي ڀيرا قمر منصور کي فون ڪري ملاقات جي خواهش ظاهر ڪئي پر هن انڪار ڪيو. وڏي وزير جي اهڙي تقرير تي متحده ميمبرن سيٽن تان اٿي اسپيڪر جي ڊائيس جي سامهون اچي ويا ۽ سخت احتجاج ڪندي  شيم شيم جا نعرا هنيا. متحده ميمبرن جي نعريبازي باوجود وڏي وزير پنهنجو خطاب جاري رکيو ۽ چيو ته جيڪڏهن کيس ڳالهائڻ نه ڏنو ويو ته پوءِ ڪير به هن ايوان ۾ نه ڳالهائي سگهندو، هن ايم ڪيو ايم وارن جي ڏکندڙ رڳ تي هٿ رکيو آهي، وٽس سگهه آهي ته پوري تقرير ٻڌن. متحده وارن وڏي وزير جو موڊ ڏسي ايوان ۾ وڌيڪ ويهڻ جي زخمت نه ڪئي ۽ سمورا ميمبر نعريبازي ڪندي واڪ آئوٽ ڪري هليا ويا. ايم ڪيو ايم جي واڪ آئوٽ کانپوءِ به وڏي وزير سيد قائم علي شاهه خطاب جاري رکندي چيو ته ڪراچي ۾ آپريشن سمورين پارٽين اتفاق راءِ سان شروع ڪيو آهي، جيڪو ڪاميابي سان جاري آهي، رينجرز ۽ پوليس کي فري هينڊ ڏنو ويو آهي، ڪنهن کي به امن امان خراب ڪرڻ جي اجازت نه ڏني ويندي. هن چيو ته وزيراعظم نواز شريف ۽ آرمي چيف به سندن ڪارڪردگي جي ساراهه ڪئي آهي، خبر ناهي ايم ڪيو ايم کي ئي ڇو ڪراچي آپريشن کان خدشا آهن. سيد قائم علي شاهه چيو ته تحفظ پاڪستان آرڊيننس تحت قانون لاڳو ڪندڙ ادارن کي اختيار ڏنا ويا آهن پر امن امان قائم ڪرڻ سياسي پارٽين جي به ذميواري آهي. وڏي وزير چيو ته ايم ڪيو ايم هڪ طرف ڪراچي ۾ فوج گهرائڻ جو مطالبو ڪري رهي آهي ته ٻي پاسي فوجي عدالتن جي مخالفت ڪئي پئي وڃي، ٻڌايو وڃي ته 12 مئي واقعي وقت ڪنهن جي حڪومت هئي.

 

دهشتگردي خلاف ايڪشن پلان تي عملدرآمد تيز ڪرڻ جي هدايت

اسلام آباد (بيورو) وزيراعظم نواز شريف چيو آهي ته دهشتگردي ۽ انتهاپسندي جي خاتمي لاءِ پُرعزم آهيون، قومي ايڪشن پلان تي تمام صوبا فوري عملدرآمد يقيني بنائن، تيل جي پهچ يقيني بنائڻ لاءِ متعلق وزارتون ۽ ادارا ڪوششون جاري رکن. اڱاري ڏينهن وزيراعظم نواز شريف جي سربراهي ۾ توانائي ۽ قومي ايڪشن پلان تي عملدرآمد جو جائزه اجلاس ٿيو جنهن ۾ پنجاب جي وڏي وزير شهباز شريف، ناڻي وزير اسحاق ڊار ۽ وفاقي گهرو وزير چوڌري نثار علي خان به شرڪت ڪئي. اجلاس ۾ پنجاب جي وڏي وزير قومي ايڪشن پلان تي عملدرآمد متعلق بريفنگ ڏني ۽ اجلاس ۾ وزيراعظم چيو ته دهشتگردي ۽ انتهاپسندي جي خاتمي لاءِ پُرعزم آهيون ۽ ان جي خاتمي لاءِ هر صورت پهه ڪري رکيو آهي، دهشتگردي روڪٿام جو قومي ايڪشن پلان تمام سياسي پارٽين متفقه طور تي بنايو هاڻ ان تي تمام صوبا تڪڙو تيز رفتار عملدرآمد يقيني بنائن ۽ وفاق جي سمورن يونٽس جي اها ذميداري آهي ته قومي ايڪشن پلان تي عمل ڪن، اجلاس ۾ وزيراعظم پيٽرول جي سپلاءِ صورتحال تي اطمينان جو اظهار ڪندي چيو ته لاڳاپيل وزارتون ۽ ادارا تيل جي پهچ يقيني بنائڻ لاءِ ڪوششون جاري رکن.

 

بدقسمتي سان پاڪستان صحافين لاءِ خطرناڪ ملڪ بڻجي چڪو آهي: پرويز رشيد

اسلام آباد (بيورو) اطلاعات واري وفاقي وزير پرويز رشيد چيو آهي ته پاڪستان دهشتگردي خلاف جنگ وڙهي رهيو آهي، دهشتگردي زبردستي عوام تي پنهنجو نظريو مڙهڻ چاهين ٿا. اسلام آباد ۾ صحافين جي تحفظ بابت عالمي ڪانفرنس کي خطاب ڪندي وفاقي وزير پرويز رشيد چيو ته بدقسمتي سان پاڪستان صحافين لاءِ خطرناڪ ملڪ بڻجي چڪو آهي، صحافي آزاد نه هوندا ته ميڊيا آزادي سان ڪم نه ڪري سگهندو. هن چيو ته حڪومت ميڊيا ۽ صحافين کي تحفظ فراهم ڪرڻ جو عزم ورجايو آهي، ان سلسلي ۾ تحفظ ڪميٽي پڻ جوڙي وئي آهي، جنهن جو اجلاس اڄ ٿيندو. پرويز رشيد چيو ته حڪومت صحافي برادري جي بهتري لاءِ ڪم ڪري رهي آهي، شهيد  صحافين لاءِ 10 لک ۽ زخمين لاءِ 3 لک رپين جو اعلان ڪري چڪي آهي. اطلاعات واري وفاقي وزير وڌيڪ چيو ته پاڪستان دهشتگردي خلاف جنگ کي منهن ڏئي رهيو آهي، دهشتگرد زبردستي پنهنجو نظريو مڙهڻ چاهين ٿا پر حڪومت دهشتگردي جي خاتمي جو عزم ورجايو آهي.

 

قبائلي علائقن ۾ نئين تعمير بحالي لاءِ گڏيل ۽ هڪجهڙي پاليسي تي عملدرآمد جي ضرورت آهي: آرمي چيف

راولپنڊي (بيورو) چيف آف آرمي اسٽاف جنرل راحيل شريف قبائلي علائقن ۾ نئين تعمير ۽ بحالي لاءِ گڏيل ۽ هڪجهڙي پاليسي تي عملدرآمد جي ضرورت تي زور ڏيندي چيو ته نوجوانن کي تعليم ۽ معاشي موقعا فراهم ڪرڻ جا منصوبا تويل مدتي بنيادن تي دهشتگردي جي خاتمي ۾ مدد ڏيندا، علائقي مان دهشتگردن کي ڪڍڻ لاءِ قبائلي ڀائرن جو ڪردار  قابل فخر آهي، افغان اختيارين پاران مهمند ۽ باجوڙ اينجسي جي بلمقابل افغان علائقن ۾ جاري آپريشن سان سرحد پار دهشتگردي جي واقعن تي ڪنٽرول ڪرڻ ۾ مدد ملندي، آءِ ايس پي آر موجب چيف آف آرمي اسٽاف جنرل راحيل شريف اڱاري تي مهمند ايجنسي فاٽا جو دورو ڪيو، آرمي چيف کي استحڪام لاءِ ڪيل آپريشن جي اڳڀرائي ۽ آرمي انجنيئرز پاران جاري ترقياتي منصوبن جي باري ۾ بريفنگ ڏني وئي، پاڪ فوج جو اڳواڻ آفيسرن ۽ جوانن کي خطاب ڪندي سندن پيشواريت جدوجهد ۽ دهشتگردي خلاف جنگ ۽ مهمند ايجنسي ۾ استحڪام لاءِ ڏنل قربانين کي ساراهيو، جنرل راحيل شريف دهشتگردن کان علائقو ڪليئر ڪرائڻ کانپوءِ وفاق جي انتظام هيٺ قبائلي علائقن ۾ نئين تعمير ۽ بحالي لاءِ هڪ گڏيل ۽ هڪجهڙي پاليسي تي عملدرآمد جي ضرورت تي زور ڏنو.

 

وڏي وزير ايم ڪيو ايم جي لڳايل سمورن الزامن جو تفصيلي طور جواب ڏئي ڇڏيو آهي: شرجيل ميمڻ

ڪراچي (اسٽاف رپورٽر) سڌ سماءَ واري صوبائي وزير شرجيل ميمڻ چيو آهي ته وڏي وزير ايم ڪيو ايم جي لڳايل سمورن الزامن جو تفصيلي طور جواب ڏئي ڇڏيو آهي، وڏي وزير خلاف استحاق واري رٿ آڻڻ جو ڪوبه جواز نه آهي. سنڌ اسيمبلي اجلاس کانپوءِ شرجيل ميمڻ ميِڊيا سان ڳالهائيندي چيو ته الزامن مڙهيندڙ جواب ٻڌڻ جي سگهه نٿا رکن، سرڪار چاهي ٿي ته  سمورا معاملا ڳالهين ذريعي حل ڪيا وڃن. هن چيو ته وڏي وزير اجلاس ۾ پنهنجي خطاب دوران ايم ڪيو ايم جي لڳايل سموران الزامن جا تفصيلي طور جواب ڏئي ڇڏيو آهي، سندس خلاف استحاق واري رٿ آڻڻجو ڪوبه جواز نه آهي. شرجيل ميمڻ جو اهو به چوڻ هو ته سرڪار ۽ قانون لاڳو ڪندڙن ادارن پاران لڳيايل رنڊڪون پار ڪندڙن کي حملو ئي چئبو آهي، سرڪار نٿي چاهي ته ڪنهن جي به خلاف بنا جواز ڪارروائي ڪئي وڃي.

 

آبادگارن کي ڪمند جو سرڪاري اگهه نه ملڻ خلاف قومي شاهراهه تي ڌرڻو، هزارين ماڻهو شريڪ

ڄامشورو (ڊ.ر) ڪمند جو سرڪاري مقرر ڪيل اگهه 182 روپيا نه ڏيڻ ۽  هڪ هٽي قائم ڪري شگر ملون بند هجڻ خلاف سنڌ حڪومت جي مخالف پارٽين ۽ آبادگارن طرفان ڄامشوري ۾ سپر هاءِ وي تي هزارين ماڻهن جو  ڪنٽينر بيهاري ڌرڻو هنيو جنهن سبب سپرهاءِ وي  8 ڪلاڪن تائين مڪمل طور تي بند رهيو، ڌرڻي جي ڪري ڦيٿو نه ڦريو، ٽريفڪ معطل، سوين گاڏيون بيهجي ويون، مهراڻ يونيورسٽي سامهون ٽي موڙ وٽ سنڌ يونائيٽڊ پارٽي مرڪز جي ميزباني هيٺ هنيل احتجاجي ڌرڻي جي اڳواڻي سنڌ يونائٽيڊ پارٽي جو سربراهه سيد جلال محمود شاهه ڪري رهيو هو، جڏهن ته احتجاجي ڌرڻي  ۾ سنڌ اسيمبلي ۾ حڪومت مخالف ڌر جي اسيمبلي ميمبر ڊاڪٽر ارباب غلام رحيم، سيد جلال محمود شاهه، ڄام مدد علي، اعجاز علي شاهه شيرازي، عبدالمجيد نظاماڻي، جسقم اڳواڻ ڊاڪٽر نياز ڪالاڻي، ڊاڪٽر راحيلا مگسي، اسماعيل راهو، نادر اڪمل لغاري، غازي صلاح الدين، سيد زين شاهه، روشن ٻرڙو، ڊاڪٽر دودو مهيري، وشنو مل سميت قوم پرست مرڪزي اڳواڻ توڙي سڄي سنڌ مان مسلم ليگ ق، مسلم ليگ ن، مسلم ليگ فنڪشنل، پاڪستان تحريڪ انصاف، متحده قومي موومينٽ، حق سچ، سنڌ ساگر پارٽي، قومي عوامي تحريڪ، عوامي جمهوري ڪائونسل، جسقم بشير خان قريشي، سنڌ آبادگار بورڊ، سنڌ يونائٽيڊ پارٽي سميت ٻين پارٽين جا اڳواڻ ۽ ڪارڪن هزارن جي تعداد ۾ شرڪت ڪئي، احتجاجي مظاهري ۾ شريڪ مظاهرين جي هٿن ۾ ڪمند جون ڇڙيون، پارٽين جا جهندا ۽ مطالبا حل ڪرڻ وارا بينر کنيل هئا، احتجاجي مظاهري ۾ عورتن جو وڏو انگ پڻ موجود هو، احتجاجي مظاهري کي مقررين خطاب ڪندي ڪمند جوسرڪار طرفان مقرر ڪيل اگهه1 82 روپيا ڏيڻ، بند پيل شگر ملون کولڻ، شگرملز مالڪن طرفان غير قانوني ڪٽوتي ڪرڻ، ڪمند جي خريداري ۾ دلال جو نظام ختم ڪرڻ، آبادگارن کي پريميئر ڏيڻ، آبادگارن کي ڪمند جون رهيل بقائون ڏيڻ ۽ هر سال 15 آڪٽوبر کان شگرملون چالو ڪرڻ جو مطالبو ڪيو ويو ۽ مطالبا پورا نه ٿيڻ تي ٻيهر 11 فيبروري تي ساڳئي هنڌ ڄامشوري ۾ سپر هاءِ وي تي احتجاجي مظاهرو ڪري ڌرڻو هڻڻ ۽ ان ڌرڻي کي مطالبو پورو نه ٿيڻ تائين جاري رکڻ جو اعلان ڪيو ويو.احتجاجي ڌرڻي ۾ شامل هزارين ماڻهن جي ميڙ کي خطاب ڪندي سنڌ اسيمبلي ميمبر ڊاڪٽر ارباب غلام رحيم چيو ته اسان هي روڊ بند ڪري عوام توڙي مسافرن کي پريشان نه پئي ڪرڻ چاهيو پر حڪمرانن جي بي حسي ۽ سندن مرده روحن کي جاڳائڻ لاءِ احتجاجي مظاهرو ڪري ڌرڻو هنيو، ڇاڪاڻ ته آبادگارن جو مسئلو اسيمبلي ۾ کنيو ويو پر اتي به ڪمند جي مسئلي تي ڳالهائڻ تي ڪورٽ ۾ مسئلو هلندڙ آهي جو چئي اسان جا مائيڪ بند ڪيا وڃن ٿا، منهنجي دور حڪومت ۾ ڪمند جو اگهه 300 روپيا هيو، پر هاڻ هڪ فرد واحد جو شگرملز تي قبضو هڪ مافيا بڻجي وئي آهي، مون وٽ شگر ملز ته ڇا به ڳڙ ٺاهڻ لاءِ هڪ چيچڙو به نه آهي، اڄوڪي احتجاج ۾ ٿر ۽ ڪوهستان جا هزارين ماڻهو شريڪ آهن جن وٽ ڪمند ته ڇا پر پاڻي به نه آهي، پ پ پ اڳ ڀٽن جي پارٽي هئي ۽ هاڻ اها زردارين جي پارٽي آهي. ارباب غلام رحيم چيو ته اڳ ۾ سائين جي ايم سيد اسان کي پاڪستان ڏياريو، هاڻ سيد جلال محمود شاهه صوبائي خودمختياري جي نالي سان وري سنڌين کي ڦاسائي رهيو آهي، پر هر دور ۾ سنڌين کي ڪجهه نه به مليو آهي، وفاق توڙي صوبي وچ ۾ ڳٺ جوڙ جي ڪري سنڌي ماڻهن جا مسئلا حل نه پيا ٿين، اڳ ۾ چوڌري افتخار، آصف رزرداري، ڪياني ۽ ٻين جي پاڻ ۾ ڳٺ جوڙ ۽ هڪ ٻئي کي بليڪ ميلنگ هئي، هاڻ پورا ٻه سال اسان ميان نواز شريف وٽ دانهيو ته هو سنڌ ۽ سنڌين طرف ڌيان ڏئي پر انهن ڪجهه به نه ڪيو ۽ اسان مجبور ٿي الڳ ٿيا سين. اسماعيل راهو جو هت اچڻ سندس وفاق وارن کي پسند نه آيو هوندو، کيس ٻڌائڻ ٿو چاهيان ته انهن ترن مان تيل نڪرڻ وارو ناهي، ڪمند جي مامري تي ڳالهائڻ تي شرجيل انعام ميمڻ مون 18 آڪٽوبر واقعي واري ڪيس ۾ ڦاسائڻ جون ڌمڪيون ڏئي رهيو آهي، جيڪڏهن اسان ڪمند جي مامري تي نه ڳالهائينداسين ته ان الزام کان آجا هونداسين، پ پ پ وارا پرويز مشرف، پرويز ڪياني، امين فهيم، ذوالفقار مرزا ۽ ٻين کي بينظير ڀٽو جي قتل ڪيس ۾ ڦاسائڻ جون ڌمڪيون ڏئي بليڪ ميل ڪري رهيا آهن، جيڪا پڻ دهشتگردي آهي، ان ڪري جنرل راحيل شريف کي اپيل ڪندس هو انهن دهشتگردن خلاف به ڪارروائي ڪري، ڊاڪٽر ارباب غلام رحيم چيو ته جيڪڏهن آبادگارن جو مسئلو حل نه ٿيو ته ڪراچي ۾ زرعي ڪانفرنس ڪوٺائڻ کان علاوه 11 فيبروري تي هتي ساڳئي هنڌ تي احتجاجي مظاهرو ڪري ڌرڻو هنيو ويندو جيڪو ڌرڻو مطالبي پوري ٿيڻ تائين جاري رهندو، جنهن ۾ لکن جي تعداد ۾ ماڻهو شريڪ ٿيندا. سنڌ يونائيٽڊ پارٽي جي سربراهه سيد جلال محمود شاهه چيو ته اڄوڪي هن ڌرڻي سنڌ جي ماڻهن کي اميدن جو سهارو ڏنو آهي،  پ پ پ وارا سدائين غلط فيصلا ڪندا آهن ۽ پوءِ عوام جي سخت رد عمل تي معافيون گهري اهي فيصلا واپس وٺندا آهن ۽ هي فيصلو به جلد واپس وٺندا. اهو سڀ ڪجهه ڪرپشن جي ڪري ٿي رهيو آهي، هاڻ صحت، تعليم، روينيو ۽ ڪمند بعد ڪڻڪ، سارين ۽ ڦٽين ۾ ڪرپشن ٿيندي، اسان ڪرپشن جي مخالف آهيون ان ڪري ڪرپشن جي خلاف جدوجهد ڪندي عمران خان جي احتجاجن جي حمايت ڪئي،  سيد جلال محمود شاهه چيو ته ملڪ جو واحد وڏو وزير سيد قائم علي شاهه آهي جيڪو بي وس هجڻ تي پاڻ فخر ڪندو آهي، اڄوڪي احتجاج ۾ شگر ملز جا متاثر ٿيل پ پ پ جا ووٽر به شريڪ آهن پر وٽن پ پ جا جهندا ناهن، ان ڪري وفاقي حڪومت شگر ملز مالڪن جي مونو پولي ختم ڪرڻ لاءِ مداخلت ڪري ڇاڪاڻ ته صوبائي حڪومت ناڪام ٿي چڪي آهي، اسان وٽ به شهيد آهن پر اسان شهيدن جي خونن تي سياست ڪرڻ جا عادي ناهيون، سنڌ جا آبادگار بنا ڪنهن فرق جي گڏ ٿين، سندن مسئلا حل نه ٿيا ته سنڌ جو عوام روڊن تي نڪري ايندو. نواز ليگ سنڌ جي صدر اسماعيل راهو خطاب ڪندي چيو ته اڄوڪي احتجاج ۾ سنڌ جي ڪنڊ ڪڙڇ مان هزارين ماڻهو پهتل آهن ن ليگ به آبادگارن ۽ سنڌ جي عوام سان گڏ آهي اڄوڪو احتجاج حڪمران لاءِ نياپو آهي ته هڪ سنڌ جي آبادگارن توڙي سنڌ جي عوام جا مسئلا حل ڪن نه ته سنڌ مان سندن تڏا ويڙهه ٿي ويندي، سنڌ ۾ گذريل 7 سالن کان سنڌ جي صنعت تي قبضو ڪيو ويو آهي. پاڪستان تحريڪ انصاف سنڌ جي اڳواڻ نادر اڪمل لغاري خطاب ڪندي چيو ته گهوٽڪي ۾ شگر ملون 182 ۽ 183 روپين عيوض ڪمند خريد ڪري رهيون آهن پر لاڙ ۽ وچولي سنڌ ۾ خبر ناهي شگر ملز مالڪن جي ڇو هڪ هٽي آهي، جنهن سان سنڌ جي زرعي معشيت تباهه ٿي رهي آهي، اسان جي ملڪ جي اڪثريت آبادي جو گذارو زراعت تي آهي اسان جي معشيت ۾ زراعت ڪرنگهي جي هڏي واري حيثيت رکي ٿي، پر افسوس جو اسان وٽ زراعت، ان تي تحقيق، جديد مشينري جي گهرجن تي ڪوبه ڳالهائڻ لاءِ تيار نه آهي، اڳي ڀٽي جي دور ۾ پ پ پ جي حمايت ۾ ڌرڻا لڳندا هئا ۽ هاڻ ان جي قيادت جي غلط پاليسين سبب پ پ پ خلاف ڌرڻا لڳي رهيا آهن،  اڄ جو نوجوان تبديلي چاهي ٿو اهو پي ٽي آءِ طرف اچي رهيو آهي، تبديلي ۽ عوام جي مسئلن جي حل لاءِ انهن سان ملي جدوجهد ڪنداسين. جيئي سنڌ قومي محاذ جي سينيئر وائيس چيئرمين ڊاڪٽر نياز ڪالاڻي خطاب ڪندي چيو ته سائين جي ايم سنڌ شناسي جي ڳالهه ڪندو هو ته کيس غدار چيو ويندو هو پر اڄ سنڌ جو هر ماڻهو اڄ ان ڳالهه تي متفق آهي ته سنڌ اسان جي ماءُ آهي، جڏهن مختلف طريقن سان خدائي عذاب ايندا آهن ته قومون  تباهه ٿي وينديون آهن هن وقت سنڌي قوم مٿان پ پ پ عذاب الاهي جيان آيل آهي، جيسيتائين سنڌي ماڻهو متحد تي ڀرپور جدوجهد نه هلائينداسين تيستائين اسان مٿان اهو نازل عذاب الاهي ختم نه ٿيندو، نوجوان شهريار مهر سيد قائم علي شاهه کي جانٺو هنيو آهي ڪامياب ويندو، ڪمند جي اگهه تي سنڌ جي آبادگارن سان جسقم گڏ آهي ڇاڪاڻ جسقم چيئرمين شهيد بشير خان قريشي عوام جي مسئلن جي حل لاءِ روڊن واري جدوجهد تي يقين رکندو هو ۽ اسان به هر ڏک سک ۾ عوام سان گڏ آهيون. متحده قومي موومينٽ جي اڳواڻ غازي صلاح الدين خطاب ڪندي چيو ته ڪومت آبادگارن جا مسئلا حل ڪرڻ لاءِ تيار نه آهي، اڄوڪي احتجاج سان دوا پي سُتل سنڌ جو وڏو وزير سيد قائم علي شاهه ننڊ مان نه جاڳيو ته کيس جاڳائڻ لاءِ اسان وزير اعليٰ جو رخ ڪنداسين، سنڌ ۾ شهر تباهه ٿي ويا آهن، ترقياتي ڪمن ۾ ڪرپشن ٿي رهي آهي، سرڪاري زمينون قبضو ٿي رهيون آهن، ملڪ جي ٻين صوبن ۾ پ پ پ کي گذريل عام چونڊن دوران عوام رد ڪيو، سنڌ ۾ به اهڙي صورتحال رهي ته ايندڙ چونڊن ۾ سنڌ ۾ پ پ پ ۽ زرداري خاندان کي عوام رد ڪري ڇڏيندو.  غازي صلاح الدين چيو ته سنڌ ۾ مهاجر سنڌي جهيڙا ڪرائي سنڌ ڪارڊ استعمال ڪرڻ جون سازشون ٿي رهيون آهن پر اسان انهن کي ناڪام بڻائينداسين، اڄوڪي هن اجتماع ۾ هڪ نئون اتحاد پيدا ٿيو آهي، جنهن ۾ سنڌ ۾ رهندڙ سنڌي، اردو، پنجابي، پٺاڻ،سرائيڪي، امير غريب، سياستدان، سماج سڌارڪ سڀ گڏ بيٺل آهن. پاڪستان مسلم ليگ جي اڳواڻ ڊاڪٽر راحيلا گل مگسي خطاب ڪندي چيو ته سنڌين سان هر ڏکئي وقت ۾ ساٿ رهندو، سنڌ جي خوشحالي لاءِ زندگي جي آخري دم تائين جدوجهد جاري رکنديس، وزير اعظم ميان نواز شريف کي چوان ٿي ته اکيون کوليو، سنڌ ۾ اچو، سنڌين جا مسئلا حل ڪيو، عوام جو ساٿ ڏيو. سيد اعجاز علي شاهه شيرازي چيو ته سنڌ جي عوام سان ظلم ٿي رهيو آهي، ان ظلم جو شڪار اسان پاڻ رهيا آهيون، جيڪو عوام جو دشمن آهي اهو ملڪ جو دشمن آهي ان ڪري ڪيتريون به لالچون ڏيو پر ملڪ ۽ عوام جي دشمنن سان ٺاهه نه ڪنداسين، ٺٽي، سجاول ۽ ڄامشوري جون سرڪاري زمينون قبضا ڪري ڪوڙن کاتن ذريعي وڪرو ڪيون پيون وڃن، ذوالفقار آباد رٿا سنڌين کي اقليت ۾ تبديل ڪرڻ جي سازش آهي، سنڌي ماڻهو پنهنجو قدر ڪيو شيرازي ڀائر اوهان سان گڏ آهن، فنڪشنل ليگ جي اڳواڻ ڄام مدد علي چيو ته سنڌ ۾ صحت، تعليم ۽ زراعت کي تباهه ڪيو ويو آهي، سنڌ جي آبادگارن کي مهانگائي ۽ جنسن جا مناسب اگهه نه ملڻ ڪري  گهاڻي ۾ پيڙهيو پيو وڃي، اسان وزيراعظم ميان نواز شريف کي چئون ٿا ته هو آبادگارن جا مسئلا حل ڪري ايئن نه ٿئي هو هتي ٻاريل باهه پنجاب تائين پهچي وڃي. سنڌ آبادگار بورڊ جي اڳواڻ عبدالمجيد نظاماڻي خطاب ڪندي چيو ته سنڌ جي آبادگارن هر دور ۾ مسئلن جي حل ڪرڻ جي ڪوشش ڪئي آهي پر اسيمبلين، ڪورٽن توڙي احتجاجن باوجود اسان جا مسئلا ۽ مطالبا حل ناهن ٿيا، هن چيو ته اسان آبادگارن سان پ پ پ جي حڪومتن ۾ ناانصافيون ٿينديون رهيون آهن، هن وقت به سنڌ ۾ وڌ ۾ وڌ شگر ملون پ پ پ سربراهه آصف علي زرداري جون آهن ان ڪري کيس گذارش آهي ته ڪجهه نرمي جو مظاهرو ڪري سنڌ جي آبادگارن جا مسئلا حل ڪيا وڃن ۽ ڪمند جو مناسب اگهه ڏنو وڃي، احتجاجي ڌرڻي کي روشن علي ٻرڙو، مير مولابخش لغاري ۽ ٻين پڻ خطاب ڪيو، احتجاجي ڌرڻي دوران امڪاني دهشتگردي ۽ گڙٻڙ کي منهن ڏيڻ لاءِ وڏي انگ ۾ پوليس ۽ رينجرز جي نفري مقرر ڪئي وئي هئي، جڏهن ته ايڌي طرفان پڻ جهيڙي يا حادثي جي ڪري ايمبوليسون بيهاري ڇڏيون هيون، احتجاجي مظاهري ۽ ڌرڻي دوران پاڪستان تحريڪ انصاف جي اڳواڻ نادر اڪمل لغاري خطاب دوران نبي ڪريم صلي الله عليه وسلم جي شان ۾ گستاخ خاڪن جي فرانس ۾ اشاعت جي سخت لفظن ۾ مذمت ڪئي وئي.

 

سنڌ اسيمبليءَ ۾ مک شاهراهن تي ڌرڻا هڻڻ تي پابندي وارو ٺهراءُ منظور

ڪراچي (اسٽاف رپورٽر) سنڌ اسيمبليءَ مک شاهراهن تي ڌرڻا هڻڻ تي پابندي، قومي گرڊ اسٽيشن مان ڪراچي کي 650 ميگاواٽ بجلي فراهم ڪرڻ واري معاهدي ۾ واڌ ۽ باهه سبب سڙندڙ مريضن کي طبي امداد جي فراهمي لاءِ قومي شاهراهه تي برننگ سينٽر قائم ڪرڻ وارا ٺهراءَ منظور ڪري ورتا. اسيمبلي اجلاس دوران پيپلز پارٽي جي ميمبر خيرالنساءِ مغل، مرڪزي شاهراهن تي ڌرڻن ۽ مظاهرن تي پابندي لاءِ ٺهراءُ پيش ڪيو جيڪو منظور ڪيو ويو. خير النساءِ مغل چيو ته مرڪزي شاهراهن تي ڌرڻن، جلسن ۽ مظاهرن سبب عوامي ڏکيائين ۾ واڌ ٿي رهي آهي، جڏهن ته روڊ بلاڪ هئڻ سبب مريضن کي طبي امداد جي فراهمي ۾ ڏکيائيون ۽ حياتي وڃڻ جو به خطرو هوندو آهي. هن چيو ته حڪومت مرڪزي شاهراهن تي ڌرڻن بابت سخت قانون سازي ڪري. صوبائي وزير شرجيل ميمڻ چيو ته احتجاج لاءِ روڊ بلاڪ ڪرڻ بابت قانونسازي وقت جي ضرورت آهي. هن چيو ته ٺهراءَ بدران اسيمبلي ۾ بل پيش ٿيڻ گهــُرجي ها، احتجاج ۽ ذاتي مقصدن لاءِ روڊ بلاڪ ڪرڻ وارو عمل ختم ڪرايو وڃي. صوبائي وزير نثار کهڙي، قومي گرڊ اسٽيشن مان ڪراچي کي ساڍا 6 سئو ميگاواٽ بجلي فراهم ڪرڻ واري معاهدي ۾ واڌ وارو ٺهراءُ پيش ڪيو ، جيڪو پڻ ايوان اتفاق راءِ سان منظور ڪري ورتو. ناڻي واري وزير مراد علي شاهه چيو ته ڪــَي اليڪٽرڪ کي ڪراچي لاءِ نيشنل گرڊ مان 650 ميگاواٽ بجلي فراهم ڪرڻ وارو معاهدو ختم ٿي ويو آهي. هن چيو ته وڏي وزير، وزيراعظم کي پهرين جنوري تي ئي معاهدي ۾ واڌ بابت خط لکيو هو، معاهدو 25 جنوري تي ختم ٿي چڪو آهي. باهه لڳڻ سبب سڙندڙ مريضن کي طبي امداد فراهم ڪرڻ لاءِ قومي شاهراهه تي برننگ سينٽر قائم ڪرڻ جو ٺهراءُ پيش ڪيو ويو. ٺهراءُ پ پ ميمبر سائره شهلياڻي پيش ڪيو، جيڪو ايوان اتفاق راءِ سان منظور ڪري ورتو. ٺهراءَ جي متن ۾ چيو ويو ته قومي شاهراهه ۽ ٻين اهم روڊن تي هر 30 ڪلوميٽرن تي برننگ سينٽر قائم ڪيا وڃن جڏهن ته شاهراهن تي مقرر پوليس ۽ ٻين ادارن کي ايمبولنس توڙي فائر برگيڊ به فراهم ڪئي وڃي. ٺهراءَ ۾ وڌيڪ چيو ويو ته شاهراهن تي برننگ سينٽر قائم ٿيڻ سان باهه سبب سڙندڙ ماڻهن جي حياتي بچائڻ ۾ مدد ملندي. ان موقعي تي صوبائي وزير ڄام مهتاب ڏهر چيو ته سڄي سنڌ ۾ ٽراما سينٽر قائم ڪرڻ جو عمل هلندڙ سال مڪمل ٿي ويندو، برننگ سينٽر قائم ڪرڻ لاءِ جلد منصوبي جي شروعات ڪئي ويندي. ايوان ۾ مختلف معاملن تي بحث جاري هو ته اسپيڪر اجلاس جمعي تائين ملتوي ڪري ڇڏيو.

 

ايم ڪيو ايم وڏي وزير خلاف استحقاق واري رٿ اسيمبلي ۾ جمع ڪرائي ڇڏي

ڪراچي (اسٽاف رپورٽر) ايم ڪيو ايم،وڏي وزير سيد قائم علي شاهه خلاف استحقاق وارِي رٿ سنڌ اسيمبليءَ ۾ جمع ڪرائي ڇڏي، متحده اڳواڻن سيد قائم علي شاهه کي عهدي تان هٽائڻ جو مطالبو ڪندي چيو آهي ته ڪراچي وڏي وزير جي اوطاق نه پر سجاڳ ماڻهن جو شهر آهي. ‎ سنڌ اسيمبلي جي اجلاس جي واڪ آئوٽ کانپوءِ متحده اڳواڻن سيد سردار احمد، خواجا اظهار الحسن ۽ فيصل سبزواريءَ اسيمبلي سيڪريٽري عمر فاروق وٽ وڏي وزير خلاف استحقاق واري رٿ جمع ڪرائي. ان موقعي تي ميڊيا سان ڳالهائيندي متحده ايم پي ايز خواجه اظهار الحسن ۽ فيصل سبزواري وڏي وزير کي هٽائڻ جو مطالبو ڪيو. فيصل سبزواري جو چوڻ هو ته وڏي وزير سيد قائم علي شاهه کان صوبو نه ٿو هلي سگهي،جڏهن ته وڏي وزير تعصباڻي انداز ۾ جواب ڏنا آهن. فيصل سبزواري چيو ته سيد قائم علي شاهه رينجرز ۽ پوليس جي ڪوششن کي لئه مٽي ڪرڻ چاهي ٿو. هنن چيو ته جيڪڏهن مٿن وزيراعلي ٰ هائوس تي حملي جو الزام ثابت ٿي وڃي ته ڀلي ڪيس داخل ڪيو وڃي، سنڌ حڪومت خلاف احتجاج جا سمورا طريقا استعمال ڪيا ويندا. سندس چوڻ هو ته هنن وزيراعليٰ هائوس آڏو ڪنٽينر هٽايا هئا پر گوليون نه هلايون هيون، طاقت جي نشي ۾ شهرين کي پيهڻ جي ڪوشش ڪندڙ بيوقوفن جي جنت ۾ رهن ٿا، ڪراچي پوليس جي چيف جي بيان بابت وڏي وزير کان وضاحت طلب ڪرڻ سندن حق آهي. فيصل سبزواري وڌيڪ چيو ته وڏي وزير صورتحال جي سڄي ذميواري ڊي جي رينجرز تي وجهي رهيو آهي. ان موقعي تي ڳالهائيندي خواجه اظهارالحسن چيو ته سنڌ ۾ قتلام تي سپريم ڪورٽ نوٽيس وٺي ته ڪير ملوث آهي؟ هن چيو ته وڏو وزير مقتول جي وارثن جي احتجاج کي حملو قرار ڏئي ٿو ته شايد ان جي عمر جي تقاضا آهي. خواجه اظهار الحسن چيو ته پ پ چيئرمين ۽ ڪو چيئرمين وڏي وزير جي بد انتظامي جو نوٽيس وٺن. سندس چوڻ هو ته جنهن ميمبر وڏي وزير کي ڪراچي جي شهرين ۽ متحده جي زخمن کي لوڻ ٻرڪڻ تي مبارڪباد ڏني آهي ان جو اڇو چٺو جلد پيش ڪيو ويندو. خواجه اظهار الحسن چيو ته پوليس نسلي بنيادن تي سندن ڪارڪن کي قتل ڪري رهي آهي.

 

رينجرز جو سي پي ايل سي چيف جي گهر تي ڇاپو، مغوي جي والده ۽ 15 لک ڪيش برآمد

ڪراچي (اسٽاف رپورٽر) رينجرز سي پي ايل سي چيف احمد چنائي جي گهر تي ڇاپو هڻي مغوي جي والده ۽ 15 لک روپيا برآمد ڪري ورتا آهن جڏهن ته احمد چنائي الزامن جي ترديد ڪري ڇڏي آهي. رينجرز سي پي ايل سي چيف احمد چنائي جي گهر تي اطلاع ملڻ تي ڇاپو هڻي مغوي نوجوان جي والده ۽ گهر مان 15 لک روپيا برآمد ڪري ورتا جڏهن ته رينجرز ذريعن جو چوڻ هو ته احمد چنائي اغوا ۽ ڀنگ جي جوابدارن سان مليل آهي جڏهن ته ڇاپي جي ڪارروائي دوران احمد چنائي مغوي جي والده کي فون تي جوابدارن ڳالهائي رهيو هو. ٻئي پاسي سي پي ايل سي چيف رينجرز جي الزامن کي رد ڪندي چيو آهي ته رينجرز کي غلط فهمي ٿي هئي جيڪا هيڊڪوارٽر وڃي ختم ڪئي وئي آهي. منهنجي گهر مان 1 لک روپيا ۽ ڪنهن مغوي جي والده کي بازياب ناهي ڪرايو ويو جڏهن ته انهيءَ حوالي سان رينجرز اختيارين ۽ گورنر سنڌ سان به ڳالهايو آهي. هن چيو ته ڪيترن ئي سالن کان ڪرچاي جي عوام جي خدمت ڪري رهيو آهيان ۽ اهڙن الزامن سان بدنام ڪرڻ جي ڪوشش ڪئي پئي وڃي، اختياريون الزامن جي عدالتي جانچ ڪرائين. ڪراچي پوليس چيف غلام قادر ٿيٻو چيو آهي ته احمد چنائي جي گهر تي ڇاپي بابت ڪابه خبر ناهي، ان معاملي تي ڪنهن مون سان شڪايت ناهي ڪئي، ايڊيشنل آءِ جي غلام قادر ٿيٻو وڌيڪ چيو ته هر پارٽي ۾ خراب ۽ سٺا ماڻهو هوندا آهن ضروري ناهي ته هڪ ئي سياسي پارٽي ۾ ڏوهاري ماڻهو هجن پوليس وارا به ڪڏهن ڏوهه ڪندا آهن جن کي اسان گرفتار ڪندا آهيون، هن چيو ته اسان ڪنهن پارٽي جي نه پر ڏوهارين خلاف آهيون ڏوهاري ماڻهن خلاف بنا فرق ڪارروائي جاري رکي ويندي.

 

داعش حافظ سعيد خان کي پاڪ افغان خطي جو ڪمانڊر مقرر ڪري ڇڏيو

لنڊن (م.ڊ) داعش حافظ سعيد خان کي افغانستان پاڪستان خطي جو ڪمانڊر مقرر ڪري ڇڏيو آهي، برطانوي ميڊيا مطابق طالبان جي اڳواڻي ترجمان حافظ سعيد خان کي ڪمانڊر بڻايو ويو آهي حافظ سعيد خان ان کان اڳ طالبان  کان لاتعلق ٿي ويو هو، ۽ داعش  ۾ شموليت جو اعلان ڪيو هو.