تازيون خبرون

Daily Archives: January 27, 2015

وزيراعظم ڪراچي کي 650 ميگاواٽ بجلي فراهمي معاهدي ۾ واڌ جي منظوري ڏئي ڇڏي

اسلام آباد (بيورو) وزيراعظم نواز شريف، ڪي اليڪٽرڪ کي 650 ميگاواٽ بجلي جي فراهمي لاءِ نئين معاهدي جي اصولي منظوري ڏيندي بجلي بريڪ ڊائون بابت 48 ڪلاڪن اندر رپورٽ طلب ڪري ورتي آهي، وزيراعظم هدايت ڪئي آهي ته سڪيورٽي ادارا ٽرانسميشن لائينز جو تحفظ يقين بڻائين، مستقبل ۾ اهڙي واقعن کان بچڻ لاءِ قدم کنيا وڃن. اسلام آباد ۾ وزيراعظم نواز شريف جي صدارت هيٺ توانائي بحران بابت اعليٰ سطحي اجلاس ٿيو، جنهن ۾ پاڻي ۽ بجلي واري وفاقي وزير خواجه آصف، ناڻي واري وزير اسحاق ڊار، پاڻي ۽ بجلي واري سيڪريٽري سميت ٻين لاڳاپيل عملدارن شرڪت ڪئي. اجلاس ۾ بجلي گهرن کي فرنس آئل جي فراهمي، گردشي قرضن وارن معاملن ۽ ڪراچي کي 650 ميگاواٽ بجليءَ جي فراهمي واري معاهدي ۾ واڌ سميت  ٻين معاملن تي غور ڪيو ويو. پاڻي ۽ بجلي واري وفاقي وزير خواجه آصف وزيراعظم نواز شريف کي بجلي جي بريڪ ڊائون بابت بريفنگ ڏيندي ٻڌايو ته آهستي آهستي بجلي جي فراهمي بحال ٿي رهي آهي، اڄ شام تائين سموري ملڪ ۾ بجلي جي فراهمي بحال ٿي ويندو. وزيراعظم نواز شريف بجلي جي بريڪ ڊائون بابت 48 ڪلاڪن اندر ٽيڪنيڪي رپورٽ طلب ڪندي هدايت ڪئي ته سڪيورٽي ادارا ٽرانسميشن لائين جو تحفظ يقيني بڻائين، مستقبل ۾ اهڙي واقعن کان بچڻ لاءِ قدم کنيا وڃن. اجلاس ۾ وزيراعظم نواز شريف پاران ڪي اليڪٽرڪ کي 650 ميگاواٽ بجلي فراهم ڪرڻ لاءِ نئين معاهدي جي اصولي منظوري ڏني وئي، معاهدو سپريم ڪورٽ جي حڪمن جي روشني ۾ ڪيو ويندو.

 

سنڌ حڪومت پاران شگر ملز کي نوٽيس جاري، آبادگارن سان گڏ آهيون : شرجيل ميمڻ

ڪراچي/حيدرآباد(نمائندن وٽان) آبادگارن کي ڪمند جو حڪومت پاران مقرر ڪيل اگهه نه ملڻ خلاف ڪيترن ڏينهن کان هلندڙ احتجاج کانپوءِ سنڌ حڪومت 28 شوگر ملن کي نوٽيس جاري ڪري ڇڏيا آهن نوٽيس ۾ ڄاڻايو ويو آهي ته شوگر ملون حڪومت پاران مقرر ڪيل اگهه تي عمل نه ڪرڻ تي سندن خلاف سخت ڪارروائي ڪندي، سنڌ جي اطلاعات ۽ بلديات واري وزير شرجيل انعام ميمڻ چيو آهي ته ڪمند جي اگهه ۽ آبادگارن جي آڙ ۾ سياست ڪندڙن کي ڪوبه فائدو نه ٿيندو. اهي سڀئي اسان جا ووٽرز آهن ۽ کين ان ڳالهه جي چڱي ريت خبر آهي ته سنڌ حڪومت انهن لاءِ اهو سڀ ڪجهه ڪري رهي آهي، جيڪو حڪومت کي انهن لاءِ ڪرڻ گهرجي. جيڪي ملون انهن آبادگارن ۽ هارين کان حڪومت جي مقرر ڪيل 182 رپيا في مڻ ڪمند جي حساب سان خريد ناهن ڪري رهيون انهن کي وزيراعليٰ سنڌ جي هدايتن تي ڪين ڪمشنر جي ذريعي نوٽيس جاري ڪيا ويا آهن. تحريڪ انصاف جي سنڌ اسيمبلي ميمبرن جي استعيفا جي منظوري يا نه منظوري جو اڃا ڪوبه حتمي فيصلو منهنجي حساب ۾ ناهي ٿيو ۽ ان جي منظوري لاءِ شايد ميمبرن جي اسپيڪر وٽ ذاتي طور تي موجودگي ضروري آهي. اهڙن خيالن جو اظهار هن سومر تي سنڌ اسيمبلي جي اجلاس کان اڳ ميڊيا سان ڳالهائيندي ڪيو. شرجيل انعام ميمڻ چيو ته ڪمند جي مسئلي تي وزيراعليٰ سنڌ سيد قائم علي شاهه جو واضح موقف آهي ته سنڌ حڪومت پاران مقرر ڪيل 182 رپيا في مڻ ڪمند جي حساب سان شگرملز آبادگارن کان ڪمند خريد ڪنديون. هن چيو ته ان کان پوءِ ملز مالڪ عدالتن ۾ هليا ويا ۽ هاڻ به اهو معاملو سپريم ڪورٽ ۾ زير التوا آهي، جڏهن ته وزيراعليٰ سنڌ گذريل ڏينهن شگر ڪين ڪمشنر کي تاڪيد ڪئي آهي ته هو ملز مالڪن کي ان حوالي سان نوٽيس جاري ڪري ته هو آبادگارن ۽ هارين کان ڪمند سرڪاري مقرر ڪيل اگهه تي خريد ڪن. هن چيو ته آبادگارن ۽ هارين جي نالي تي ڪجهه سياستدان پنهنجي سياست چمڪائڻ جي پوري ڪوشش ڪري رهيا آهن، پر کين مايوسي کان سواءِ ڪجهه حاصل نه ٿيندو. هن چيو ته آبادگار ۽ هاري جيڪي اسان جا ووٽر آهن کين ان ڳالهه جي چڱي ريت ڄاڻ آهي ته سنڌ حڪومت ۽ پيپلز پارٽي انهن سان گڏ بيٺي آهي ۽ ان کان اڳ به جڏهن شگرملن پاران ڪريشنگ سيزن جي شروع ٿيڻ جي باوجود ملون نه شروع ڪيون ويون تڏهن به اسان ئي ملن کي ڪريشنگ شروع ڪرڻ جا حڪم ڏنا هئا. هڪ سوال جي جواب ۾شرجيل ميمڻ چيو ته پهريان وفاقي حڪومت کنڊ تي سبسڊي ڏيندي هئي، جيڪا هاڻ ختم ڪئي وئي آهي، جنهن سان به 6 کان 8 رپين جو فرق آيو آهي. هڪ ٻي سوال جي جواب ۾ هن چيو ته وزيراعليٰ سنڌ پاڻ سمورن آبادگارن سان مسلسل رابطي ۾ آهي ۽ آبادگارن کي به ڄاڻ آهي ته پيپلز پارٽي ۽ سنڌ حڪومت انهن سان گڏ آهي. هن چيو ته ڪمند جي فصل سان لاڳاپيل آبادگار اسان جي زرعي آمدني جو سڀ کان وڏو ذريعو آهن ۽ اسان کي سندن مشڪل ۽ پريشانين جو به احساس آهي. تحريڪ انصاف جي سنڌ اسيمبلي جي ميمبرن جي استعيفائن جي حوالي سان پڇيل سوال جي جواب ۾ شرجيل انعام ميمڻ چيو ته ان سلسلي ۾ اسپيڪر سنڌ اسيمبلي ئي ٻڌائي سگهي ٿو البته منهنجي ڄاڻ جي مطابق اڃان تائين شايد انهن جون استعيفائون منظور ناهن ٿيون ۽ اهي اسپيڪر وٽ ئي آهن ۽ انهن جي منظوري لاءِ انهن ميمبرن جي ذاتي طور تي اسپيڪر وٽ موجودگي هجڻ ضروري آهي.

 

سپريم ڪورٽ مارشل لا کي جائز قرار ڏيڻ خلاف ظفر علي شاهه جي نظرثاني درخواست رد ڪري ڇڏي

اسلام آباد (بيورو) سپريم ڪورٽ 1999 واري مارشل لا کي جائز قرار ڏيڻ خلاف نواز ليگ جي ظفر علي شاهه جي نظرثاني درخواست دير سان داخل ٿيڻ تي رد ڪري ڇڏي آهي، جسٽس اعجاز افضل ريمارڪس ڏنا آهن ته جيڪڏهن هن درخواست تي ٻڌڻي ڪئي ته نصرت ڀٽو ڪيس به هلائڻو پوندو. جسٽس ثاقب نثار جي سربراهي ۾ سپريم ڪورٽ جي 3 رڪني بينچ ظفر علي شاهه ڪيس ۾ نظرثاني درخواست رد ڪئي. جسٽس ثاقب نثار ريمارڪس ڏنا ته هيءَ درخواست 4 هزار 3 سئو 34 ڏينهن دير سان داخل ڪئي وئي آهي، ان ڪري قانون موجب، نظرثاني درخواست جو مدو ختم ٿي چڪو آهي. جسٽس اعجاز افضل، ظفر علي شاهه ڏانهن مخطاب ٿيندي ريمارڪس ڏنا ته جيڪڏهن هن درخواست تي ٻڌڻي ڪئي وئي ته نصرت ڀٽو ڪيس به هلائڻو پوندو. ظفر علي شاهه چيو ته عدالت، 40 سالن کانپوءِ ڀٽو  ڪيس جي ٻڌڻي ڪئي، سندس نظرثاني درخواست تي به ٻڌڻي ڪئي وڃي. جسٽس ثاقب نثار ريمارڪس ڏنا ته ڀٽو ڪيس ۾ ڪا به درخواست نه آئي هئي، ان حوالي سان صدارتي ريفرنس داخل ڪيو ويو هو. واضح رهي ته ن ليگ اڳواڻ ظفر علي شاهه، 1999 جي مارشل جائز قرار ڏيڻ بابت سپريم ڪورٽ جي فيصلي خلاف درخواست داخل ڪئي وئي هئي.

 

مذهبي هستين جي توهين خلاف عالمي قانون جوڙيو وڃي: علماءُ ڪائونسل اي پي سي

اسلام آباد (بيورو) سڄي دنيا ۾ اسلام جا اربين پيروڪار آهن گستاخ خاڪا شايع ڪري مذهبن وچ ۾ ٽڪراءُ  پيدا ڪيو پيو وڃي  ۽ اتحاد کي ختم ڪرڻ لاءِ وڏي سازش ڪئي پئي وڃي، وفاقي وزير پرويز رشيد اي پي سي کي خطاب ڪندي چيو ته اولهه جي ملڪن ۾ اسلام دشمن گستاخ خاڪا شايع ڪري مسلمانن جي دل آزاري ڪري چڙ ڏياري رهيا آهن، اسان پنهنجي نبي ڪريم صه جي شان ۾ ڪابه گستاخي برداشت نه ڪنداسين، پاڪستان فرانس حڪومت سان سرڪاري سطح تي سطح تي سخت احتجاج ڪيو آهي گستاخ خاڪا شايع ڪرڻ مذهبن جي اتحاد خلاف سازش آهي.

 

چيني قيادت پاڪستان جي خدشن کي پنهنجا خدشا قرار ڏئي ڇڏيو

بيجنگ (م.ڊ) آرمي چيف جنرل راحيل شريف چين جي دوري دوران اعليٰ چيني قيادت سان ملاقاتون ڪيون جڏهن ته چيني اڳواڻن پاڪستان جي خدشن کي پنهنجا خدشا قرار ڏئي ڇڏيو آهي پاڪ فوج جي ترجمان آءِ ايس پي آر مطابق آرمي چيف جنرل راحيل شريف چيئرمين پيپلز ڪانفرنس زو ينگشينگ سان ملاقات ڪئي، ملاقات دوران چيئرمين پيپلز ڪانفرنس جو چوڻ هو ته پاڪستان چين جو سڀ کان وڌيڪ پراعتماد دوست ملڪ آهي، پاڪستان جا خدشا اسان جا خدشا آهن چيني حڪومت ۽ عوام پاڪستان سان گڏ بيٺل آهن ۽ هر سطح تي دوست ملڪ جي مدد ڪئي ويندي، آرمي چيف جنرل راحيل شريف چيني قيادت طرفان دهشتگردي خلاف جنگ ۾ پاڪستان جي حمايت ۽ تعاون تي شڪر جو اظهار ڪندي چيو ته دهشتگردي خلاف جنگ کي منطقي انجام تائين پهچائڻ لاءِ عالمي تعاون ضروري آهي، آءِ ايس پي آر مطابق آرمي چيف جنرل راحيل شريف چيني پرڏيهي وزير سان به ملاقات ڪئي جڏهن ته ملاقات دوران چيني پرڏيهي وزير جو چوڻ هو ته چين لاءِ پاڪستان جو ڪوبه متبادل نه ٿو ٿي سگهي ۽ ٻنهي ملڪن جي منزل هڪ آهي.

 

بجلي جي قيمتن ۾ ڪوبه اضافو نه پيو ٿئي، نه ئي فرنيس آئل جي کوٽ آهي: خواجه آصف

اسلام آباد (بيورو) پاڻي ۽ بجلي واري وفاقي وزير خواجه محمد آصف چيو آهي ته بجلي جي قيمتن ۾ ڪوبه اضافو نه پيو ڪيو وڃي، فرنيس آئل جي ڪابه کوٽ ناهي، ڪراچي اليڪٽرڪ سپلاءِ ڪمپني سان نئين شرط تي معاهدو ڪيو ويندو. نجڪاري جي حوالي سان اڳوڻي حڪومت جي فيصلن تي عمل ڪيو پيو وڃي. اهڙو اظهار هن سومر ڏينهن هڪ پريس ڪانفرنس کي خطاب ڪندي ڪيو. هن چيو ته ڪنهن نئين اداري جي نجڪاري ناهيون ڪري رهيا آهن، صنعتي شعبي لاءِ ڪجهه ڏينهن ۾ لوڊشيڊنگ ختم ٿي ويندي، 2017ع جي گرمين واري موسم تائين لوڊشيڊنگ جو خاتمو ٿي ويندو. ٽرانسميشن لائين کي تباهه ڪرڻ جي تخريبڪاري جي واقعي جي جاچ جو حڪم ڪيو ويو آهي. خواجه آصف چيو ته گذريل 10 ڏينهن دوران ٽرانسميشن لائين کي اڏائڻ جي حوالي سان دهشتگردي جو اهو ٽيون واقعو هو، ٻه ڏينهن اڳ گئس پائيپ لائين به تباهه ڪئي وئي هئي. هن چيو ته ايم ڊي نيسپاڪ کي جاچ جي ذميواري ڏني وئي آهي، 48 ڪلاڪن اندر هو رپورٽ پيش ڪندو. هن چيو ته ٽرانسميشن لائين جي حفاظت لاءِ فني رهنمائي حاصل ڪرڻ لاءِ چائنا سيٽ گرڊ ۽ يو ايس ايڊ سان به رابطو ڪيو آهي. هن چيو ته پي ايس او جا 10 سامونڊي جهاز جلد فرنيس آئل کڻي بندر پهچندا. گذريل حڪومت جي دور ۾ ڪراچي اليڪٽرڪ سپلاءِ ڪمپني سان ٿيل معاهدو ختم ٿي چڪو آهي ۽ هاڻي حڪومت نئين شرط تي معاهدو ڪندي ان معاملي جو هاڻي گڏيل مفادن واري ڪائونسل سي سي آءِ ۾ فيصلو ٿيندو. هن چيو ته پاڻي ۽ بجلي واري وزارت پي ايس او کي اٽڪل 171 ارب رپيا ادا ڪرڻا آهن.لوڊ شيڊنگ جي خاتمي لاءِ ڪوششون جاري آهن ۽ 2017ع جي گرمي واري موسم تائين لوڊشيڊنگ مان ڇوٽڪارو ملي ويندو. هڪ سوال جي جواب ۾ هن چيو ته ڊيزل تي پيداواري يونٽ هلائي عوام کي مهانگي بجلي نٿا ڏئي سگهون، واهن جي بندش جي ڪري پن بجلي جي پيداوار ۾ گهٽتائي ٿي پر هاڻي صورتحال بهتر ٿيڻ شروع ٿي وئي آهي ۽ پن بجلي جي پيداوار جيڪا اڳ 800 ميگا واٽ هئي، وڌي 1300 کان 1400 ميگاواٽ ٿي وئي آهي. لوڊشيڊنگ جي برابري واري ورڇ جي حوالي سان سپريم ڪورٽ جي فيصلي تي عمل ڪيو پيو وڃي.

 

پشاور آرمي پبلڪ اسڪول تي حملي جي سخت لفظن ۾ مذمت، قرارداد کان اڳ شهيدن لاءِ خاص فاتح خواني

ڪراچي( اسٽاف رپورٽر) سنڌ اسيمبلي جي اجلاس ۾ پشاور سانحي جي شهيدن جي چاليهي تي هڪ ٺهراءُ اتفاق راءِ سان منظور ڪيو ويو، جنهن ۾ اسڪول تي ٿيل حملي جي سخت لفظن ۾ مذمت ڪئي وئي ۽ شهيدن جي وارثن سان دلي تعزيت جو اظهار ڪيو ويو. قرارداد کان اڳ شهيدن لاءِ خصوصي فاتح خواني ڪئي وئي، قرارداد منظور ٿيڻ بعد شهيدن جي عظيم قربانين جي احترام ۾ سنڌ اسيمبلي جو اجلاس ملتوي ڪيو ويو. اها قرارداد سينيئر وزير نثار احمد کهڙو ، مخالف ڌر جي اڳواڻ شهر يار مهر، پي پي جي مهيش ملاڻي، ايم ڪيو ايم جي خواجه اظهار الحسن مسلم ليگ ن جي شفيع محمد ڄاموٽ پيش ڪئي جنهن تي سڀني ميمبرن صحيحون ٿيل هنيون . قرارداد ۾ چيو ويو ته اسان 16 ڊسمبر 2014 تي آرمي پبلڪ اسڪول پشاور ۾ طالبان جي بربريت، وحشياڻي حملي جي سخت مذمت ڪيون ٿا جنهن ۾ 6 کان 14 سالن جي عمر جا 132 ٻارڙا ۽ اسٽاف جا ڪجهه ماڻهو شهيد ٿيا ۽ اٽڪل ايترا ئي ماڻهو زخمي ٿيا اسان نه صرف ان واقعي جي مذمت ڪيون ٿا پر جوابدارن جي فوري گرفتاري جو مطالبو پڻ ڪيون ٿا . اسان شهيدن جي والدين ۽ گهر ڀاتين سان دلي تعزيت ڪيون ٿا ۽ دعا ڪيون ٿا ته ڌڻي تعاليَ انهن شهيدن جا درجات بلند فرمائي . ان کان اڳ وزير اعليَ سنڌ سيد قائم علي شاهه چيو ته اڄ وڏو ڏک وارو ڏينهن آهي ڇو ته اڄ سانحي پشاور جي شهيدن جو چاليهو آهي اسان ان موقعي تي اسڪولن ۽ آفيسن ۾ دعا جي لاءِ تقريبون منعقد ڪرايون آهن ايوان ۾ به شهيدن جي لاءِ خاص دعا ڪرائي وڃي وڏي وزير جي ان تجويز تي ايوان اتفاق ڪيو ۽ نه صرف خصوصي دعا ڪرائي پر هڪ متفقه طور تي قرارداد به منظور ڪئي ۽ اجلاس ملتوي ڪرڻ جي اسپيڪر اغا سراج دراني جي تجويز جي به تائيد ڪئي.

 

خيرپور ميڊيڪل ڪاليج کي ٻن مهينن اندر فعال بڻائي رجسٽرڊ ڪرايو وڃي: قائم علي شاهه

ڪراچي( اسٽاف رپورٽر) سنڌ جي وڏي وزير سيد قائم علي شاهه لاڳاپيل انتظاميه کي هدايت ڪئي آهي ته ٻن مهينن جي اندر خيرپور ميڊيڪل ڪاليج کي بحال ڪري ان کي فعال بنائي 10 ڏينهن جي اندر ڪاليج کي پاڪستان ميڊيڪل اينڊ ڊينٽل ڪائونسل کان رجسٽرڊ ڪرايو وڃي. اهڙيون هدايتون هن سي ايم هائوس خيرپور۾ ميڊيڪل ڪاليج بابت ڪيل اجلاس جي صدارت ڪندي جاري ڪيون. وڏي وزير صحت کاتي، قانون واري کاتي ۽ ڪاليج جي انتظاميه کي هدايت ڪئي ته 15 ڏينهن جي اندر ڪاليج جي داخلا پاليسي کي حتمي شڪل ڏئي ايندڙ 15 فيبروري تائين داخلا جي لاءِ اميدوارن کان درخواستون وصول ڪيون وڃن. اجلاس کي خطاب ڪندي وڏي وزير چيو ته ڪاليج جو منصوبو 2012 ۾ 433 ملين روپين جي لاڳت سان شروع ڪيو ويو هو ۽ ان منصوبي لاءِ مالي سال 15 – 2014ع ۾ مختص ڪيل باقي 433 ملين روپيه به جاري ڪيا ويا آهن ته جيئن هي منصوبو جلد از جلد مڪمل ٿي سگهي ۽ تدريسي عمل شروع ڪري سگهجي. هن چيو ته خيرپور ۾ ڪاليج جي قيام سان نه رڳو مقامي آبادي کي فائدو ٿيندو پر آس پاس جا علائقا ۽ ٻين ضلعن جي ماڻهن کي به فائدو ٿيندو. هن ڪاليج جي انتظاميه کي چيو ته تعليمي پاليسي جي مطابق ڪاليج جون 50 سيڪڙو سيٽون شاگردياڻين جي لاءِ مختص ڪيون وڃن.

 

سنڌ جي اڳوڻي وڏي وزير 18 آڪٽوبر ۽ 27 ڊسمبر سانحن جي فوج کان جاچ ڪرائڻ جو مطالبو ڪري ڇڏيو

ڪراچي( اسٽاف رپورٽر) سنڌ جي اڳوڻي وڏي وزير ارباب غلام رحيم 18 آڪٽوبر ۽ 27 ڊسمبر 2007 جي سانحن جي جاچ فوج کان ڪرائڻ جو مطالبو ڪندي چيو آهي ته اهو معلوم ڪيو وڃي ته محترمه بينظير ڀٽو جي شهادت مان ڪنهن کي فائدو ٿيو. اهڙو اظهار هن ڪالهه سنڌ اسيمبلي جي اجلاس بعد لياقت علي جتوئي ۽ مسلم ليگ نواز جي ايم پي اي اعجاز شاهه شيرازي سان گڏ پريس ڪانفرنس ڪندي ڪيو. لياقت جتوئي چيو ته پي پي جي سنڌ حڪومت ختم ٿيڻ بعد نه صرف پارٽي ڌڙا بندي ٿيندي پر ماڻهو پي پي وارن کي رستن تي گهليندا. اعجاز شاهه شيرازي الزام هنيو ته آصف علي زرداري ٺٽي ۾ ساڍا 3 لک ايڪڙ زمين تي قبضو ڪيو آهي. ارباب رحيم چيو ته آرمي چيف جنرل راحيل شريف فوج جي ذريعي محترمه بينظير ڀٽو جي قتل جي جاچ ڪرائي ۽ جاچ بعد اهو ڪيس ملٽري ڪورٽ ۾ هلايو وڃي ته جيئن اڇو ڪارو پڌرو ٿئي ڇو ته پيپلز پارٽي محترمه بينظير ڀٽو جي شهادت جي حوالي سان گهڻن ماڻهن کي بليڪ ميل ڪري رهي آهي، جن ۾ مخدوم امين فهيم ۽ ناهيد خان به شامل آهن. هن چيو ته مان فوج کان جاچ ڪرڻ جو مطالبو ان ڪري ڪري رهيو آهيان جو صوبائي وزير شرجيل انعام ميمڻ منهنجي خلاف جاچ ڪرائڻ جي ڳالهه ڪئي آهي، مان چاهيان ٿو ته ان ڪيس جي اصل حقيقت پڌري ٿيڻ گهرجي ته جيئن عوام کي خبر پوي ته بينظير ڀٽو جي شهادت جو فائدو ڪنهن کي ٿيو آهي. هن چيو ته اهو به فيصلو ٿيڻ گهرجي ته گذريل 5 سالن ۾ ڪهڙي ٻلي کير پيتو ۽ ڪهڙي ٻلي ملائي کاڌي. هن چيو ته اسڪاٽ لينڊ يارڊ جي ٽيم به ان سانحي جي جاچ ڪئي هئي پر ڪا به خبر نه پئجي سگهي، اسان چاهيون ٿا ته اصل قاتلن تائين پهچجي. ان کان اڳ لياقت علي جتوئي چيو ته گذريل 7 سالن کان پي پي جي صوبائي حڪومت سنڌ جي خلاف قدم کڻي رهي آهي، اسان کي سنڌ اسيمبلي ۾ ڳالهائڻ نٿو ڏنو وڃي، بندوق جي زور تي حڪومت ڪئي پئي وڃي. هن چيو ته مان ڪمند جي قيمتن بابت سنڌ جي زراعت واري وزير وٽ تحريڪ استحقاق جمع ڪرائي ڇڏي آهي پر ان تي نٿو ڳالهايو وڃي. سنڌ اسيمبلي جو اجلاس قاعدن ضابطن موجب نٿو هلايو وڃي. هن چيو ته صرف ڪمند جي اگهه جو مسئلو ناهي پر چانورن جي قيمتن جو به وڏو مسئلو آهي، سنڌ حڪومت ڪنهن به عوامي مسئلي تي ڌيان نٿي ڏئي. لياقت جتوئي چيو ته لياقت ميڊيڪل يونيورسٽي ڄامشورو ۽ پاور پلانٽ ڄامشورو جي زمين تي قبضو ڪري اها زمين بلڊرز جي حوالي ڪئي وئي آهي. هن چيو ته سنڌ حڪومت جي ماڻهن کي اها خبر ئي ناهي ته عوام انهن کان ڪيترو ناراض آهي، اهي جڏهن پروٽوڪول ۽ اسڪواڊ مان ٻاهر ايندا ته انهن کي اندازو ٿي ويندو ته سنڌ جو عوام انهن جو ڪيئن ٿو استقبال ڪري، سنڌ جو عوام انهن کي رستن تي گهليندو. هن چيو ته پي پي جي حڪومت ختم ٿيندي ئي پارٽي ۾ ڪيترائي ڌڙا ٿي ويندا. اعجاز شاهه شيرازي چيو ته پي پي جي ماڻهن ٺٽي ۽ سجاول ۾ ٻيلي کاتي جي ساڍا 3 لک ايڪڙ زمين جعلي نالن تي قبضو ڪري رکي آهي جنهن تي صحافين سوال ڪيو ته ان قبضي ۾ ڇا سائين قائم علي شاهه به شامل آهي ته هن چيو ته توهان زرداري جو نالو ٻڌو آهي، اهو زرداري آهي جنهن قبضو ڪيو آهي. هن چيو ته مان صرف ٺٽو سجاول جي ڳالهه ڪري رهيو آهيان، نوابشاهه، سانگهڙ، دادو ۽ ٻين ضلعن ۾ زمينن تي قبضن جي ڳالهه نٿو ڪيان. ٻين ضلعن ۾ به گهڻا قبضا ڪيا ويا آهن. هن چيو ته ٺٽي ۽ سجاول ۾ سرڪاري ملازمن جون پگهارون بند ڪيون ويون آهن، جن شيرازين کي ووٽ ڏنا هئا. اسان جي ٻنهي ضلعن ۾ ڪيترائي اسڪول بند پيا آهن. هن چيو ته پي پي جي حڪومت پاڻي جي فراهمي جي لاءِ جيڪي ريورس آسموسز (آر او) پلانٽ لڳايا هئا اهي ناڪاره ٿي رهيا آهن. مٺي ۾ لڳايل ايشيا جي سڀ کان وڏي آر او پلانٽ جي ليڪيج شروع ٿي وئي آهي حڪومت کي ڪنهن به ڳالهه جي پرواهه ناهي.ا

 

استادن جي ترقي ڪارڪردگي جي بنياد تي ٿيندي، 6 هزار نوان استاد اين ٽي ايس ذريعي ڀرتي ڪبا: نثار کهڙو

ڪراچي( اسٽاف رپورٽر) سنڌ جي سينيئر ۽ تعليم واري وزير نثار احمد کهڙو چيو آهي ته تعليم کاتي ۾ استادن کي اڳئين گريڊ ۾ ترقي سندن ڪارڪردگي جي بنياد تي ڪرڻ تي غور ڪيو پيو وڃي، ان سان معياري تعليم ۾ بهتري ايندي. بهتر ڪارڪردگي جو مظاهرو نه ڪرڻ وارن استادن کي ترقي نه ڏني ويندي، ان سان غير حاضر استادن مان به نجات ملندي، تعليم کاتي جي 5 کان 6 هزار خالي پيل جاين تي ڀرتي لاءِ جلد اين ٽي ايس جي ذريعي ٽيسٽ منعقد ڪرائي ويندي. اهڙو اظهار هن ڪالهه سنڌ اسيمبلي جي اجلاس ۾ سوالن جواب جي وٿي دوران ميمبرن جي تحريري ۽ ضمني سوالن جا جواب ڏيندي ڪيو. سينيئر وزير چيو ته گذريل 5 سالن جي دوران سرڪاري شعبي ۾ 10 يونيورسٽيون ۽ انسٽيٽيوٽس جڏهن ته نجي شعبي ۾ 7 يونيورسٽيون ۽ ڊگري ڏيڻ وارا انسٽيٽيوٽس قائم ڪيا ويا آهن. سرڪاري شعبي ۾ قائم ڪيل يونيورسٽي آف صوفي ازم اينڊ ماڊرز سائنسز ڀٽ شاهه اڃا تائين فعال نه ٿي سگهي آهي، ڪوشش آهي ته اها جلد فعال ٿي وڃي. هن چيو ته صوفي ازم هڪ فلسفو آهي ۽ سنڌ صوفين جي ڌرتي آهي، ان جي ڪري ضرورت محسوس ڪئي وئي ته صوفي از جي تعليم کي هٿي ڏني وڃي. هن چيو ته مٺي ۾ ڪراچي يونيورسٽي جو ڪيمپس اڃا قائم ناهي ٿي، ان جي لاءِ اسان ڪراچي يونيورسٽي جي انتطاميا سان ڳالهائينداسين ته جيئن اها ڪيمپس به جلد قائم ٿي سگهي. هن چيو ته صوبي ۾ ڪل 269 ڪاليج آهن، اهو تعداد تمام گهٽ آهي انهن جو تعداد وڌڻ گهرجي. سنڌ پهريون ڀيرو 5 سالن جو ايجوڪيشن پلان جوڙيو آهي، ان م پرائمري کان اعليٰ تعليم تائين منصوبا بندي جو ويزن ڏنو ويو آهي. صوبي ۾ 152 بوائز ڪاليجز ۽ 107 گرلز ڪاليجز جڏهن ته پرائيويٽ پارٽنرشپ تحت 9 ڪاليج آهن، پوري صوبي ۾ شاگردن جي ڪاليج ۾ انرولمينٽ 2 لک 20 هزار 117 آهي. فنڊ جي گهٽتائي جو مسئلو آهي اسان جي ڪوشش آهي ته هر تعلقي هيڊ ڪوارٽر ۾ ڪاليج هجي. هن چيو ته هن وقت ڪنهن به ڪاليج تي قبضو ناهي. صوبائي وزير چيو ته 2012 ۾ نيشنل ٽيسٽنگ سروس اين ٽي ايس جي ذريعي استادن جي ڀرتي لاءِ امتحان ٿيا هئا ۽ اهليت جي بنياد تي 15 هزار 538 استاد ڀرتي ڪيا ويا هئا. اهي ڀرتيون يو سي سطح تي هنيون ۽ اهو شرط لڳايو ويو هو ته ان تي ڀرتي ٿيندڙ استادن کي ان جاءِ تي گهٽ ۾ گهٽ 3 سال ڪم ڪرڻو پوندو، ڪجهه ڪامياب اميدوارن جو معاملو زير التوا آهي انهن کي به جلد آفر ليٽر ڏنا ويندا. ڪجهه جايون خالي رهجي ويون 5 کان 6 هزار خالي آسامين تي جلد ٻيهر ٽيسٽ ٿيندي. هن چيو ته استادن جي ڀرتي لاءِ اين ٽي ايس ٽيسٽ ضروري آهي. هن چيو ته هاڻ اسان ان تي غور ڪري رهيا آهيون ته استادن جي ترقي انهن جي ڪاڪردگي سان لاڳاپيل هجي. ايم ڪيو ايم جي پارلياماني ليڊر سيد سردار احمد چيو ته 2012 ۾ اين ٽي ايس جي ڀرتين ۾ شهري ۽ ٻهراڙي ڪوٽا جو خيال نه رکيو ويو، جيڪا آئين جي خلاف ورزي آهي. نثار احمد کهڙو چيو ته اهي ڀرتيون ورلڊ بينڪ سان هڪ معاهدي جي تحت ڪيون ويون، يو سي ۾ ضرورت ۽ اهليت جي بنيادت تي ڀرتيون ڪيون ويون آهن، شهري ۽ ٻهراڙي ٻنهي علائقن ۾ ڀرتيون ٿيون آهن، ان سان آئين جي ڪا به خلاف ورزي ناهي ٿي.