تازيون خبرون

Daily Archives: January 23, 2015

پئٽرول بحران: وزير اعظم ذميوارن خلاف ڪارروائي جو حڪم ڏئي ڇڏيو

اسلام آباد (بيورو) وزيراعظم نواز شريف، پيٽرول جي فراهمي هر صورت ۾ يقيني بڻائڻ ۽ بحران پيدا ڪري عوام لاءِ ڏکيائون پيدا ڪندڙن خلاف سخت ڪارروائي جي هدايت ڪندي چيو آهي ته سموريون لاڳاپيل وزارتون رابطو بهتر ڪ ۽ پيٽرول فراهمي يقيني بڻائي سگهجي ٿي. اسلام آباد ۾ وزيراعظم نواز شريف جي صدارت هيٺ پيٽرول بحران بابت اعليٰ سطحي اجلاس ٿيو، جنهن ۾ پيٽروليم واري وفاقي وزير شاهد خاڪان عباسي، ناڻي واري وزير اسحاق ڊار، پاڻي ۽ بجلي واري وفاقي وزير خواجه آصف ۽ ٻين لاڳاپيل عملدارن شرڪت ڪئي.اجلاس ۾ ايندڙ ٻن مهينن لاءِ پيٽرول جي طلب ۽ رسد واري معاملن تي غور ڪيو ويو. اجلاس ۾ وزيراعظم کي بريفنگ ۾ ٻڌايو ويو ته پيٽرول بحران ختم ٿي چڪو آهي، معمول موجب پيٽرول جي فراهمي يقيني بڻائي پئي وڃي. ان موقعي تي وزيراعظم نواز شريف هدايت ڪئي ته سموريون لاڳاپيل وزارتون رابطو بهتر ڪن ۽ پيٽرول جي فراهمي يقيني بڻائي ان حوالي سان ميڊيا ذريعي عوام کي آگاهه ڪيو وڃي. وزيراعظم نواز شريف چيو ته پيٽرول بحران پيدا ڪري عوام لاءِ ڏکيائون پيدا ڪندڙن خلاف سخت ڪارروائي ڪئي وڃي.

 

ارباب رحيم ڪو وڏو پير ناهي جو بلاول بابت اڳڪٿيون ڪري، آبادگارن سان گڏ آهيون: شرجيل ميمڻ

ڪراچي (اسٽاف رپورٽر) سڌ سماءُ واري صوبائي وزير شرجيل انعام ميمڻ چيو آهي ته ارباب رحيم ڪو وڏو پير نه آهي، جو اڳڪٿيون ڪندو وتي، کيس سوچي سمجهي ڳالهائڻ ۽ ٻين جو انجام به ياد رکڻ گهرجي، جڏهن ته شهيد بينظير ڀٽو قتل ڪيس جي هڪ ايف آءِ آر ارباب رحيم تي به داخل ٿيڻ گهرجي. سنڌ اسيمبلي ٻاهران ميڊيا سان ڳالهائيندي ارباب رحيم جي بلاول ڀٽي بابت پير پاڳاري جي اڳڪٿي سچ ٿيڻ واري بيان تي ڳالهائيندي شرجيل انعام ميمڻ چيو ته ارباب رحيم ڪو وڏو پير نه آهي، جو سندس اڳڪٿيون سچ ثابت ٿين، کيس سوچي سمجهي ڳالهائڻ گهرجي، کيس بلاول ڀٽو زرداري جو نالو ئي نه وٺڻ گهرجي. شرجيل انعام ميمڻ جو چوڻ هو ته ارباب رحيم ۽ ٻين تي بينظير ڀٽو شهيد جي قتل جي ايف آءِ آر ٿيڻ گهرجي، ارباب رحيم تي ان ڪري ٿيڻ گهرجي ته هو ان وقت وڏو وزير هو ۽ هن ٻارهين وڳين شو ختم ٿي وڃڻ جي ڳالهه ڪئي هئي جڏهن ته محترمه تي پوڻين ٻارهين وڳين حملو ٿيو هو. سنڌ جي اطلاعات ۽ بلديات واري وزير شرجيل انعام ميمڻ چيو آهي ته آمرن جي جهولي ۾ پلجندڙ ۽ موسم کان وڌيڪ تيزي سان سياسي جماعتون تبديل ڪندڙن جي ڪنهن ڳالهه جو جواب ڏيڻ ضروري ناهي. 18 آڪٽوبر سانحي ڪارساز جي موقعي تي ارباب غلام رحيم جيڪو ان وقت جو وزيراعليٰ سنڌ هو پهريان ئي اهو قرار ڏنو هو ته اهو شو 12 وڳي کان اڳ ختم ٿي ويندو ان لاءِ ان تي بي بي جي قتل جو ڪيس بڻجي سگهي ٿو. پيپلز پارٽي انتقامي سياست تي يقين نٿي رکي. اسان سنڌ ۾ آبادگارن ۽ هارين کي ڪنهن به صورت ۾ اڪيلو نه ڇڏينداسين. ڪمند جي قيمتن جي حوالي سان مل مالڪن سپريم ڪورٽ سان رجوع ڪيو آهي، پر اسان ان معاملي کي جلد کان جلد حل ڪري وٺنداسين. لياري سميت ڪراچي ۾ حالتون سالن کان خراب آهن ۽ انهن کي بهتر بڻائڻ لاءِ وزيراعليٰ سنڌ پوليس ۽ رينجرز کي مڪمل فري هينڊ ڏئي ڇڏيو آهي. ڪراچي ۾ ٽارگيٽيڊ آپريشن جي شروعات کان ايستائين سڀ کان وڌيڪ ڇاپا لياري ۾ هنيا ويا آهن، پر ڪير به اهو ثابت ڪري ته اسان ڪنهن کي ڇڏڻ لاءِ ڪنهن تي دٻاءُ وڌو هجي جڏهن ته لياري پيپلز پارٽي جو ڳڙهه آهي. اهڙن خيالن جو اظهار هن خميس تي سنڌ اسيمبلي جي اجلاس کان اڳ ميڊيا سان ڳالهائيندي ڪيو. شرجيل انعام ميمڻ چيو ته ارباب غلام رحيم اسان جي چيئرمين جي حوالي سان ڳالهه ڪرڻ کان اڳ ٻڌائي ته هو ڪنهن پارٽي سان آهي. هن چيو ته هتي جيتري موسم تيزي سان ناهي بدلجندي ان کان وڌيڪ تيزي سان هو ۽ ان جهڙا ٻيا پارٽيون بدلائين ٿا. شرجيل ميمڻ چيو ته ارباب غلام رحيم جي ڪنهن ڳالهه جو جواب ڏيڻ ان لاءِ به مناسب نه آهي ته هو آمرن جي جهولي ۾ نپنو آهي ۽ انهن جي جهولي ۾ ئي ويهي هميشه سياست ڪئي آهي. هن چيو ته هو هن ڀيري به قسمت سان اسيمبلي آيو آهي. هن چيو ته ارباب غلام رحيم ماضي ۾ به پيپلز پارٽي جي شهيد قائد محترمه بينظير ڀٽو جي حوالي سان جيڪا زبان استعمال ڪئي هئي ان کان پوءِ هن پارٽي جي ڪارڪنن ۽ بي بي جي متوالن جو ري ايڪشن ڏسي ورتو هو ان لاءِ آئون ان کي گذارش ڪريان ٿو ته هو سوچي سمجهي ڳالهائي. هڪ سوال جي جواب ۾ شرجيل انعام ميمڻ چيو ته ارباب ۽ لياقت جتوئي ٻنهي جي دورن ۾ پيپلز پارٽي سان انتقامي ڪارروايون ڪيون ويون. اسان جي ڪارڪنن ۽ اڳواڻن ايستائين جو اسيمبلي ميمبرن خلاف به ڪوڙا ڪيس قائم ڪيا ويا، پر پيپلز پارٽي سياسي انتقامي ڪاررواين تي يقين نٿي رکي. اهو ئي سبب آهي ته گذريل 5 سالا دور حڪومت ۽ موجوده ڏيڍ سال جي دور ۾ جتي پيپلز پارٽي جي حڪومت آهي هڪ به سياسي انتقامي ڪارروائي نه ڪئي وئي ۽ نه ئي ڪنهن پارٽي جي ڪارڪن يا اڳواڻ خلاف ڪو ڪيس داخل ڪيو ويو آهي. صوبي ۾ شگرڪين جي بحران ۽ آبادگارن ۽ هارين پاران ان تي احتجاج جي سوال جي جواب ۾ شرجيل ميمڻ چيو ته سنڌ حڪومت 182 رپيا في مڻ ڪمند جي قيمت مقرر ڪئي آهي، پر ان تي شگرملز مالڪن سپريم ڪورٽ سان رجوع ڪيو آهي. هن چيو ته اسان سنڌ جي هارين ۽ آبادگارن سان گڏ آهيون، ڇو ته اهي 100 سيڪڙو اسان جا ووٽر آهن. لياري ۾ امن امان جي بگڙجندڙ صورتحال جي سوال جي جواب ۾ صوبائي وزير چيو ته لياري سميت ڪراچي ۾ امن امان جي خراب صورتحال سالن کان آهي ۽ ان جي تدارڪ لاءِ ڪراچي ۾ ٽارگيٽيڊ ايڪشن شروع ڪيو ويو آهي ۽ ان جا خاطر خواهه نتيجا به حاصل ٿي رهيا آهن. هن چيو ته وزيراعليٰ سنڌ پوليس ۽ رينجرز کي مڪمل طور تي فري هينڊ ڏنو آهي. ۽ ڪير اهو ثابت ڪري ته حڪومتي سطح تي پوليس يا رينجرز تي ڪنهن قسم جو ڪو دٻاءُ وڌو ويو آهي. هن چيو ته لياري پيپلز پارٽي جو هميشه کان ڳڙهه رهيو آهي ۽ اڄ به آهي، ان جي باوجود آپريشن جي شروعات کان اڄ تائين سڀ کان وڌيڪ ڇاپا لياري ۾ ئي لڳا آهن ان جي باوجود به حڪومت پاران پوليس ۽ رينجرز کي ڪنهن قسم جي رڪاوٽ کي منهن ڏيڻو نٿو پوي. سينيٽ جي چونڊن کان اڳ تحريڪ انصاف جي سنڌ اسيمبلي جي ميمبرن جي استعيفيٰ منظور ڪرڻ جي سوال تي هن چيو ته هن حوالي سان ڪجهه ميڊيا ۾ اهڙو تاثر ڏنو پيو وڃي ته شايد تحريڪ انصاف کي سينيٽ ۾ نشت نه ملي ان لاءِ ايئن ڪيو ويو آهي، جڏهن ته صوبي ۾ سينيٽ جي هڪ سيٽ لاءِ گهٽ ۾ گهٽ 21 ميمبرن جا ووٽ ملڻ تي هڪ سيٽ الاٽ ٿئي ٿي. جڏهن ته پي ٽي آئي جي صرف سنڌ ۾ 4 ئي سيٽون هيون ته تنهنڪري انهن جي سينيٽ ۾ سيٽ جو سوال ئي پيدا نٿو ٿئي ان لاءِ اهو تاثر مڪمل طور تي غلط آهي، جڏهن ته 5 مهينن کان وڌيڪ عرصي تائين انهن ميمبرن پنهنجي استعيفيٰ اسپيڪر وٽ جمع ڪرائي هئي. ان تي اسپيڪر ڪافي ڀيرا کين گهرايو، پر هو نه آيا، جنهن کان پوءِ اسپيڪر سندن استعيفائون منظور ڪيون آهن.

 

جماعت الدعويٰ سميت پابندي مڙهيل تنظيمن جا اثاثا منجمد

اسلام آباد (بيورو) پاڪستان،گڏيل قومن پاران دهشتگرد تنظيم قرار ڏيڻ بعد جماعت الدعويٰ سميت سمورين پابندي مڙهيل تنظيمن جا اثاثا منجمد ڪري ڇڏيا،پرڏيهي ترجمان تسنيم اسلم جو چوڻ آهي ته پابندي مڙهيل تنظيمن کي ملندڙ پرڏيهي فنڊز جي مانيٽرنگ ڪئي پئي وڃي، اميد ته بارڪ اوباما ڀارتي دوري دوران نريندر موديءَ کان سرحد تي اڳرائي بابت وضاحت طلب ڪندو. پرڏيهي آفيس اسلام آباد ۾ هفتيوار بريفنگ ڏيندي تسنيم اسلم ٻڌايو ته پاڪستان گڏيل قومن جي پابندي لڳائيندڙ ڪميٽي جي فهرست ۾ شامل سمورين تنظيمن جا اثاثا منجمد ڪري ڇڏيا جن ۾ جماعت الدعويٰ به شامل آهي. پرڏيهي ترجمان جو چوڻ هو ته حڪومت پابندي مڙهيل تنظيمن کي ملندڙ پرڏيهي امداد جي مانيٽرنگ ۽ دهشتگردن جي مدد ڪندڙن تي به نظر رکي پئي وڃي. هن ٻڌايو ته شرپسندن جي مالي مدد ڪندڙن جا اڪائونٽس بند ڪيا پيا وڃن،جڏهن ته دهشتگردي ۾ ملوث ماڻهن جي لڏ پلاڻ ۽ سفر ڪرڻ تي به پابندي مڙهي وئي آهي. پرڏيهي ترجمان واضح ڪيو ته قومي ايڪشن پلان جوڙڻ واري فيصلي جو آمريڪي پرڏيهي وزير جان ڪيري جي دوري سان ڪو به تعلق ناهي. هڪ سوال جي جواب ۾ پرڏيهي کاتي جي ترجمان جو چوڻ هو ته وفاقي وزير رياض پيرزادو پنهنجي بيان جي اڳ ئي وضاحت ڪري چڪو آهي. تسنيم اسلم چيو ته دنيا جي ڪنهن به حصي ۾ مذهب جي نالي تي تشدد مذمت جوڳو عمل آهي، ڀارت ۾ زبردستي هندو بڻائڻ واري مهم انساني حقن جي ڀڃڪڙي آهي. پرڏيهي ترجمان چيو ته پاڪستان ڀارت ۾ مسلمانن کي ساڙڻ واري واقعي تي به ڳڻتي آهي. هن چيو ته براڪ اوباما جو نئين دهلي وارو دورو ڀارت ۽ آمريڪا جو گڏيل معاملو آهي، ان تي پاڪستان کي ڪي به خدشا ناهن، اميد ته آمريڪي صدر ڀارتي دوري دوران ڪنٽرول لائين تي ڇڪتاڻ وارو معاملو اٿاريندو.

 

سپريم ڪورٽ حڪومت کان پابندي مڙهيل تنظيمن جي لسٽ طلب ڪري ورتي

اسلام آباد (بيورو) سپريم ڪورٽ، حڪومت کان پابندي مڙهيل تنظيمن جي لسٽ طلب ڪري ورتي، جسٽس جواد ايس خواجه رمارڪس ڏنا آهن ته ايڪيهين آئيني ترميم جو معاملو شايد عدالت ۾ اچي وڃي. سپريم ڪورٽ ۾ قانون جي ڪتابن ۾ غلطين بابت ڪيس جي ٻڌڻي ٿي. ٻڌڻي دوران جسٽس جواد ايس خواجا رمارڪس ڏيندي چيو ته حڪومت سنجيدگي ڏيکاري ته دهشتگرديءَ جو خاتمو اچي سگهي ٿو. جسٽس جواد ايس خواجه رمارڪس ڏنا ته ممڪن آهي ته ڪا پابندي مڙهيل تنظيم ٿر جي نالي تي چندو وٺندي هجي،دهشتگردن جي خاتمي لاءِ حڪومت کي سنجيده ٿيڻو پوندو. جسٽس جواد ايس خواجه پنهنجي رمارڪس ۾ وڌيڪ چيو ته عدالت وفاقي ۽ صوبائي حڪومتن کي دهشتگردي خلاف سنجيده ٿيڻ لاءِ ڊيڊ لائين ڏئي رهي آهي. انکانپوءِ عدالت، وفاقي حڪومت کان پابندي مڙهيل تنظيمن جي لسٽ طلب ڪندي ٻڌڻي ملتوي ڪري ڇڏي.

 

توهين عدالت ڪيس: سپريم ڪورٽ آصف علي زرداري خلاف ڪيس اڪلائي ڇڏيو

اسلام آباد (بيورو) سپريم ڪورٽ، اڳوڻي صدر آصف علي زرداري خلاف سوئس اختيارين کي ٻيو خط لکڻ بابت توهين عدالت وارو ڪيس اڪلائي ڇڏيو، جسٽس آصف سعيد کوسا جو چوڻ آهي ته ٻيو خط لکڻ سان عدالتي حڪم جي توهين ناهي ٿي. سوئس اختيارين کي ٻيو خط لکڻ بابت ڪيس جــِي ٻــُڌڻي جسٽس آصف سعيد کوسا جــِي سربراهي ۾ سپريم ڪورٽ جي ٽه رڪني بينچ ڪئي. جسٽس آصف سعيد کوسا رمارڪس ڏيندي چيو ته اڳوڻي وزيراعظم يوسف رضا گيلاني کي عدالتي حڪم تي سوئس اختيارين کي خط نه لکڻ تي توهين عدالت جي سزا ملي، جڏهن ته راجا پرويز اشرف سوئس اختيارين کي خط لکي عدالتي حڪم جي پوئواري ڪئي هئي. ان موقعي تي درخواست گــُذار محمود اختر نقوي چيو ته پهرين خط کانپوءِ حڪومت سوئس اختيارين کي ٻيو خط لکي پهرين خط جو اثر ختم ڪري ڇڏيو،ٻيو خط لکڻ سان به عدالتي حڪم جي توهين ٿي. جسٽس آصف سعيد کوسا رمارڪس ڏنا ته سپريم ڪورٽ حڪومت کي سوئس اختيارين کي ٻيو خط لکڻ کان نه روڪيو هو،ٻيو خط لکڻ سان عدالتي حڪم جي توهين ناهي ٿي،انڪري توهين عدالت جو ڪيس نه ٿو ٺهي. جسٽس آصف سعيد کوسا وڌيڪ رمارڪس ڏنا ته سوئس حڪومت اهي ڪيس پاڻ کوليا ۽ بند ڪيا، اهو سوئس سرڪار جو صوابديدي حق آهي ته ان ڪيس کي هلائي يا نه؟ انکانپوءِ، عدالت، اڳوڻي صدر آصف علي زرداري خلاف توهين عدالت جو ڪيس اڪلائي ڇڏيو.

 

وڏي وزير ليڊي هيلٿ ورڪرز کي يرغمال بڻائي زيادتي ڪوشش جو نوٽيس ورتو، رپورٽ طلب، ڪارروائي جي هدايت

خيرپورناٿن شاهه (نمائندو) خيرپور ناٿن شاهه ۾ ليڊي هيلٿ ورڪرز کي يرغمال بڻائي ڏاڍائي جي ڪوشش واري معاملي بعد گرفتار چئن ڄڻن خلاف ڊيوٽي اٽڪاءُ جو ڪيس داخل ڪيو ويو، وڏي وزير قائم علي شاهه واقعو جو نوٽيس وٺي ڊي سي دادو کان رپورٽ طلب ڪري ورتي آهي. گذريل ڏينهن خيرپور ناٿن شاهه ويجهو يوسي گوزو نمبر ٽَي جي ڳوٺ رسول بخش ٻرڙو ۾ ٻارڙن کي پوليو جا ڦڙا پيارڻ لاءِ ويل پوليو ٽيم مٿان اڻڄاتل جوابدارن حملو ڪيو. جوابدارن عورت رضاڪار ڪنول ملاح ۽ عائشه سيال تي تشدد بعد موبائل ۽ ٻيو سامان ڦرڻ ڪئي ۽ مبينا طور ڏاڍائي جي ڪوشش ڪئي. ڪي اين شاهه پوليس پهچي چئن جوابدارن روشن چانڊيو، امتياز چانڊيو، منٺار چانڊيو ۽ حنيف چانڊيو کي گرفتار ڪيو. ڪي اين شاهه ٿاڻي تي بنيادي صحت مرڪز جي انچارج ڊاڪٽر اياز جوکيو جي فرياد تي چئني جوابدارن خلاف ڊيوٽي اٽڪاءُ جو ڪيس داخل ڪيو ويو آهي. وڏي وزير قائم علي شاهه واقعي جو نوٽيس وٺي ڊي سي دادو کان رپورٽ طلب ڪري ورتي آهي. ٻئي پاسي گرفتار جوابدارن کي بچائڻ لاءِ تر جا ڀوتار ميدان تي لهي پيا آهن ۽ واقعي کي لئي مٽي ڪرڻ لاءِ راڄوڻي ڪوششون ڪيون پيون وڃن. ليڊي هيلٿ ورڪرز جي اڳواڻ نور بانو ملاح ميڊيا سان ڳالهائيندي چيو ته ورڪرز سان اهڙي قسم جا واقعا پهرين به ٿيا آهن، انتظاميا کي آگاهي ڏيڻ باوجود ڪنهن کي به انصاف ناهي مليو. نور بانو ملاح چيو ته ليڊي هيلٿ ورڪز انتهائي خراب حالت ۾ پنهنجي ڊيوٽي ڪرڻ تي مجبور آهن، کين تحفظ فراهم ڪيو وڃي. ڊي ايڇ او دادو جاويد ڏاوچ جو چوڻ هو ته ليڊي هيلٿ ورڪرز اهڙو معاملو لکت ۾ نه ڏنو آهي، ڳوٺ وارن سان ڳالهيون ٿيون آهن، آئندي  اهڙو واقعو پيش نه ايندو. ليڊي هيلٿ ورڪرز انصاف جي فراهم لاءِ پوليو مهم جو بائيڪاٽ ڪيو، جيڪو انتظاميه جي خاطري بعد ختم ڪيو ويو تنهن هوندي به ليڊي ورڪرز واضح ڪيو ته هو يو سي گوزو ۾ نه وينديون.

 

سنڌ حڪومت بجلي جي ورهاست جو نظام پاڻ هلائڻ لاءِ وفاقي حڪومت سان ڳالهائيندي: مراد علي شاهه

ڪراچي (اسٽاف رپورٽر) سنڌ حڪومت بجلي جي ورهاست جو نظام پاڻ هلائڻ جي لاءِ وفاقي حڪومت سان ڳالهائيندي، سنڌ حڪومت حيدرآباد اليڪٽرڪ سپلاءِ ڪمپني حيسڪو ۽ سکر اليڪٽرڪ سپلاءِ ڪمپني (سيپڪو) به وٺڻ جي لاءِ تيار آهي. اهڙو اظهار سنڌ جي ناڻي واري صوبائي وزير سيد مراد علي شاهه خميس ڏينهن سنڌ اسيمبلي جي اجلاس ۾ سوالن جواب جي وٿي دوران ڪيترن ئي ميمبرن جي تحريري ۽ ضمني سوالن جا جواب ڏيڻ دوران ڪيو. سيد مراد علي شاهه چيو ته بجلي جي ورهاست جو معاملو آئين جي تحت صوبن کي منتقل ٿي چڪو آهي جيڪڏهن وفاقي حڪومت سان ڪو سٺو معاهدو ٿيو ته اسان انهن ڪمپنين جو ڪنٽرول به سنڀالينداسين. هن چيو ته پاڪستان جي بجلي جي بحران جو حل سنڌ مان ٿيندو.  سنڌ ۾ توانائي جا گهڻا وسيلا آهن، ٿر جي ڪوئلي جي بجلي مان توانائي جون ضرورتون پوريون ٿين ٿيون، هتي تمام وڏو ونڊ ڪوريڊور به موجود آهي. سنڌ ۽ بلوچستان سولر انرجي منصوبن لاءِ بهترين آهن. سنڌ ۾ ونڊ انرجي جا ڪيترائي منصوبا مڪمل ٿي چڪا آهن، پبلڪ پرائيويٽ پارٽنرشپ تحت 100 ميگاواٽ جي سولر پاور منصوبن تي به ڪم هلي رهيو آهي، اسان اها بجلي 5 شهرن ۾ مقامي طور تي ورهائينداسين. هن چيو ته نوري آباد ۾ گيس تي هلندڙ 100 ميگاواٽ جا 2 پاور پلانٽ پڻ ٺهي رهيا آهن، اسان اها بجلي ڪي اي ايس سي کي سنئون سڌو سپلاءِ ڪنداسين. هن چيو ته اسان وفاقي حڪومت کي اهو خط لکي رهيا آهيون ته ڪي اي ايس سي کي 650 ميگاواٽ بجلي جاري رکي وڃي. هڪ سوال جي جواب ۾ صوبائي وزير چيو ته لاکڙا ڪول پاور  پلانٽ جا 3 يونٽ آهن انهن مان 2 خراب پيا آهن جڏهن ته هڪ جزوي طور تي ڪم ڪري رهيو آهي، جتا صرف 15 کان 20 ميگاواٽ بجلي پيدا ٿي رهي آهي. هن چيو ته لاکڙا ۾ هڪ ارب 32 ڪروڙ ٽن ڪوئلي جي ذخيرا موجود آهن، اتي واپدا پاران لاکڙا ڪول پاور پلانٽ نصب ڪيو ويو هو، جنهن جي پيداواري گنجائش 150 ميگاواٽ هئي پر ان کان گهٽ بجلي پيدا ٿي رهي آهي، ان کان علاوه ميسرز فتح ٽيڪسٽائيل ملز کي 8625 ايڪڙ ايراضي 30 سالن جي ليز تي ڏني وئي هئي اها ليز رد ڪئي وئي آهي. سنڌ حڪومت 16 هزار ايڪڙ ايراضي تي پاڻ پبلڪ پرائيويٽ پارٽنرشپ تحت 300 ميگاواٽ جا پاور پلانٽ لڳائيندي. هن چيو ته اولهه جي ملڪن ۾ ماحولياتي تحفظ جي ڪري ٿر ۾ سرمائيڪاري ڪرڻ کان گهٻرائي رهيا آهن، چين اتي سيڙپڪاري ڪرڻ چاهي ٿو، اسان ان سان گڏ منصوبا مڪمل ڪنداسين.

 

ڪرڪ/قلات روڊ حادثا، 11 ڄڻا اجل جو شڪار، 10 زخمي

ڪرڪ/قلات(م.ڊ) جي ٽي روڊ تي 2 مسافر گاڏين وچ ۾ ٽڪر جي نتيجي ۾ 8 ڄڻا فوت جڏهن ته 10 زخمي ٿي پيا، ڪرڪ ۾  دائود شاهه چوڪ ويجهو زاڙه ڪنده واري جاءِ تي جي ٽي روڊ ٽي پشاور ويندڙ وين رستي تي ترڪڻ سبب مقامي بس اڏي تان نڪرندڙ وين سان ٽڪرائجي وئي، حادثي جي نتيجي ۾ 6 ڄڻار فوت جڏهن ته 12 زخمي ٿي پيا، زخمين کي بانڊه دائود اسپتال منتقل ڪيو ويو جتي وڌيڪ 2 زخمين دم ڌڻي حوالي ڪيو، زخمين مان ڪيترن ئي جي حالت ڳڻتي جوڳي آهي جنهن سبب  فوتگين جي تعداد ۾ واڌ جو خدشو آهي. ٻئي طرف قلات ۾ ٽريفڪ حاثي ۾ 3 ڄڻا فوت ٿي ويا، ليويز ذريعن مطابق قلات ۾ قومي شاهراهه تي لاڪوريان واري جاءِ تي پڪ اپ گاڏي رستي جي ڪناري تي بيٺل ٽريلر سان ٽڪرائجي وئي، حادثي ۾ 3 ڄڻا گل محمد، نبي بخش ۽ محمد ياسين موقعي تي فوت ٿي ويا.

 

ڪمند جي سرڪاري اگهه تي عمل نه ٿيڻ سبب آبادگارن کي وڏو نقصان پيو ٿئي: شهريار مهر

ڪراچي (اسٽاف رپورٽر) سنڌ اسيمبليءَ ۾ مخالف ڌر جي اڳواڻ شهريار مهر چيو آهي ته شگر ملز مافيا پاران ڪمند جي سرڪاري اگهه تي عمل نه ٿيڻ سبب آبادگارن کي وڏو نقصان پهچي رهيو آهي. سنڌ اسيمبلي ٻاهران ميڊيا سان ڳالهائيندي شهريار مهر چيو ته ڪمند جي اگهه تي عمل نه ٿيڻ واري معاملي تي حڪمران جماعت جا ميمبر به ساڻن گڏ آهن. اپوزيشن ليڊر چيو ته حڪومت جي بيوسي سڀني جي سامهون آهي،سنڌ ۾ ڪمند جي آبادگارن سان ظلم ٿي رهيو آهي، جنهن خلاف هو آواز اٿاريندا رهندا.

 

ستين پير پاڳاري جي اڳڪتي درست ثابت پئي ٿئي، بلاول جلد ن ليگ ۾ شامل ٿيندو: ارباب رحيم

ڪراچي (اسٽاف رپورٽر) اڳوڻي وڏي وزير ارباب غلام رحيم چيو آهي ته ستين پير پاڳاري جي اڳڪٿي درست ثابت ٿي رهي آهي، بلاول ڀٽو زرداري جلد نواز ليگ ۾ شامل ٿيندو، جڏهن ته لياقت جتوئي چيو آهي ته تاريخ ۾ پهريون ڀيرو پلاند وٺڻ واري سياست ٿي رهي آهي، الزام تراشيون بند نه ٿيون ته اسان به پينڊورا باڪس کولينداسين. سنڌ اسيمبلي جي اجلاس کان اڳ ميڊيا سان ڳالهائيندي ڊگهي عرصي کانپوءِ ڪالهه پهريون ڀيرو منظر تي آيل اڳوڻي وڏي وزير ارباب غلام رحيم چيو ته فنڪشنل ليگ ۽ نواز ليگ هڪ آهي ۽ ستين پاڳاري جي اڳڪٿي سچ ثابت ٿيڻ واري آهي، بلاول ڀٽو زرداري جلد نواز ليگ ۾ شامل ٿيندو. هن چيو ته سنڌ جي معاملن تي فنڪشنل ليگ ۽ ايم ڪيو ايم جو موقف هڪ آهي، پ پ شروع کان ئي غير مهذب رهي آهي. ان موقعي تي ميڊيا سان ڳالهائيندي هڪ ٻئي اڳوڻي وڏي وزير لياقت جتوئي به حڪومت جي ناقص ڪارڪردگي ۽ جيالن جي الزام تراشي واري سياست تي تنقيد ڪئي، هن چيو ته جيڪڏهن پيپلز پارٽي وارن رويا تبديل نه ڪيا ته هو به سندن خلاف پينڊورا باڪس کوليندا. هن چيو ته سنڌ ۾ پسند نا پسند جي سياست ٿي رهي آهي، جيڪا بند ٿيڻ گهرجي، ماڻهو اهڙي سياست کان تنگ اچي روڊن تي اچي رهيا آهن. لياقت جتوئي چيو ته سڄي سنڌ ۾ روڊ رستا اکڙيل، ڊرينيج جو نظام تباهه ۽ امن امان جي صورتحال غير تسلي بخش آهي، حالتون بهتر نه ٿينديون ته ماڻهو ضرور ڳالهائيندا ۽ انهن کي ڏاڍ سان نه ٿو روڪي سگهجي.