تازيون خبرون

Daily Archives: January 22, 2015

قومي ايڪشن پلان تي تڪڙي ۽ اثرائتي طريقي سان عمل ڪرائڻ تي اتفاق

اسلام آباد(بيورو) وزيراعظم نواز شريف جو چوڻ آهي ته ملڪ مان دهشتگردي جو خاتمو ڪري سک جو ساهه کنيو ويندو، ايڪشن پلان تي ان جي روح موجب عمل ڪيو وڃي. وزيراعظم نواز شريف جي صدارت هيٺ دهشتگردي خلاف قومي ايڪشن پلان تي عملدرآمد جو جائزو وٺڻ بابت اجلاس ٿيو. اجلاس ۾ وفاقي گهرو وزير چوڌري نثار، بچاءَ واري وزير خواجا آصف، چئني صوبن جي وڏن وزيرن، آرمي چيف جنرل راحيل شريف ۽ ڊي جــِي آءِ ايس آءِ ليفٽيننٽ جنرل رضوان اختر سميت ٻين عملدارن شرڪت ڪئي. ان موقعي تي وفاقي ۽ صوبائي حڪومتن طرفان قومي حڪمت عملي بابت کنيل قدمن جو جائزو ورتو ويو. اجلاس ۾ شريڪ حڪومتي ميمبرن ۽ اعليٰ فوجي عملدارن دهشتگردي ۽ دهشتگردن کي ملڪ مان ختم ڪرڻ بابت هڪ ڀيرو ٻيهر عزم جو اظهار ڪيو. اجلاس کي خطاب ڪندي وزيراعظم چيو ته قومي ايڪشن پلان تي ان جي روح موجب عمل ڪيو وڃي ۽ ڀرپور عملدرآمد لاءِ سمورا وسيلا ڪتب آندا وڃن. نواز شريف چيو ته دهشتگردي جي خاتمي لاءِ سڄي قوم متحد آهي ۽ دهشتگردن کي ملڪ جي ڪنهن به ڪــُنڊ ۾ لِڪڻ جي اجازت نه ڏني ويندي. وزيراعظم چيو ته دهشتگرديءَ جي پاڙ پٽڻ لاءِ قومي قيادت پــُرعزم آهي ۽ ايڪشن پلان تي عمل انتهائي ضروري آهي، نواز شريف چيو ته  اجلاس جو مقصد قومي ايڪشن پلان تي عملدرآمد ڪرائڻ آهي، قومي ايڪشن پلان تي عملدرآمد ئي ڪاميابي جي ڪنجي آهي. نواز شريف چيو ته قومي ايڪشن پلان نون ليگ جو نه پر سمورين سياسي جماعتن جي اتفاق سان جوڙيون ويو آهي، وزيراعظم نواز شريف چيو ته پشاور سانحي کانپوءِ سمورين جماعتن ايڪشن پلان تي اتفاق ڪري پنهنجون پنهنجون سفارشون اماڻيون ويون، صوبن کي هٿ هٿن ۾ ڏئي گڏجي ڪم ڪرڻو پوندو.. اجلاس دوران وفاقي گهرو وزير چوڌري نثار مدرسن جي رجسٽريشن ۽ ميڊيا جي ضابطا اخلاق بابت بريفنگ ڏني. گهرو وزير چيو ته مدرسن جي رجسٽريشن لاءِ لاڳاپيل ادارن کي اعتماد ۾ ورتو ويو آهي ۽ هــُو مدرسا رجسٽريشن ڪرائڻ لاءِ تيار آهن. چوڌري نثار چيو ته ميڊيا لاءِ ڪوڊ آف ڪنڊٽ جوڙڻ لاءِ هڪ ڪميٽي قائم ڪئي وئي آهي. سنڌ جي وڏي وزير کي ڪراچي ۾ امن امان جي صورتحال تي بريفنگ ڏيڻ لاءِ خاص طور طلب ڪيو ويو هو،

 

سنڌ اسيمبلي گستاخ خاڪن خلاف گڏيل مذمتي قرارداد منظور ڪري ورتي

ڪراچي (اسٽاف رپورٽر) سنڌ اسيمبليءَ فرانسيسي رسالــَي پاران ٻيهر گستاخ خاڪا شايع ڪرڻ خلاف گڏيل مذمتي ٺهراءُ منظور ڪري ورتو، جڏهن ته ڪمند جي اگهن واري معاملي تي مخالف ڌر ۽ ڪارڪنن جي قتل خلاف ايم ڪيو ايم ميمبرن ايوان مان واڪ آئوٽ ڪيو. سنڌ اسيمبليءَ جو اجلاس اسپيڪر آغا سراج دراني جي صدارت هيٺ ٿيو. اجلاس دوران فرانسيسي رسالي پاران ٻيهر گستاخ خاڪا شايع ڪرڻ خلاف مذمتي ٺهراءُ حڪومتي ۽ مخالف ڌر جي ميمبرن گڏيل طور پيش ڪيو جيڪو بحث کانپوءِ ايوان منظور ڪري ورتو. ٺهراءُ جو مسودو متحده ميمبر سيد سردار احمد ۽ صوبائي وزير نثار کهڙي پڙهي ٻــُڌايو.ٺهراءَ جي متن ۾ چيو ويو ته ڊينمارڪ ۽ جرمني کانپوءِ فرانس ۾ گستاخ خاڪا شايع ڪرڻ اظهار جي آزادي جي عالمي قانونن جي ڀڃڪڙي آهي. ٺهراءَ موجب گستاخ خاڪا شايع ڪري اسلامي دنيا ۽ مسلمانن جا جذبا مجروح ڪيا ويا جنهن تي ذميوارن کي سخت سزا ڏني وڃي. ٺهراءَ جي متن ۾ وڌيڪ چيو ويو ته گڏيل قومون، يورپي يونين ۽ او آءِ سي ڏوهي حرڪت جو نوٽيس وٺن. گستاخ خاڪن خلاف ٺهراءَ جي معاملي تي ايم ڪيو ايم ۽ حڪومتي ميمبرن وچ ۾ ڏند چڪ پڻ ٿي، متحده ميمبرن سيد سردار احمد ۽ رئوف صديقي چيو ته گستاخ خاڪن جي معاملي تي اسلامي ملڪن جي خاموشي افسوسناڪ آهي ۽ معاملي تي او آءِ سي جو اجلاس گهــُرايو وڃي. هنن چيو ته توهين رسالت تي ٻڌل لٽريچر سڄي دنيا ۾ سازش تحت شايع ڪيو پيو وڃي، گستاخ خاڪن تي ردعمل کي تهذيبن جو ٽڪراءُ چوڻ غلط آهي. پ پ ميمبرن مخدوم جميل الزمان، ڄام خان شوري، روبينا قائمخاني ۽ خير النساءِ مغل چيو ته مسلمان ٻيو سڀ ڪجهه برداشت ڪري سگهن ٿا پر نبي ڪريم ﷺ جي شان ۾ گستاخي برداشت نه ڪئي ويندي. هنن چيو ته گستاخ خاڪا شايع ڪري مسلمانن جا جذبا مجروح ڪيا ويا ۽ فرانسيسي رسالــَي اهڙي ڪريل حرڪت ڪري اسلامي دنيا ۾ انتشار پيدا ڪرڻ جي ڪوشش ڪئي. ارباب غلام رحيم چيو ته گستاخ خاڪا شايع ڪرڻ اسلام ۽ مسلم دنيا خلاف سازش آهي، مسلمان نبي سڳورن جي حرمت تي يقين رکن ٿا. ارباب غلام رحيم چيو ته او آءِ سي، اوهه آءِ سي بڻجي وئي آهي، نائين اليون کانپوءِ اسلامي دنيا خلاف سازشون ٿي رهيون آهن. اجلاس دوران ڪڻڪ جي سرڪاري اگهه تي عمل نه ٿيڻ بابت ڳالهائڻ تي اجازت نه ملڻ تي اپوزيشن ليڊر شهريار مهر احتجاج ڪيو. شهريار مهر چيو ته سنڌ جي آبادگارن جو مسئلو آهي، ايوان ۾ ڳالهائڻ کان نه روڪيو وڃي. نثار کهڙي چيو ته آبادگارن جي مسئلن جي ڄاڻ آهي، اپوزيشن پوائنٽ اسڪورننگ نه ڪري. ان موقعي تي شهريار مهر کي ڳالهائڻ جي اجازت نه ملڻ تي اپوزيشن ۽ حڪومتي ميمبرن ۾ سخت جملن جي ڏي وٺ ٿي. اپوزيشن ليڊر چيو ته حڪومت طرفان ڪڻڪ جو اگهه هڪ سئو 82 رپيا في مڻ مقرر ڪيو ويو آهي، پر شگر ملز انتظاميه ان تي عمل نه ڪري رهي آهي. نثار کهڙي چيو ته حڪومت شگر ملز بند ٿيڻ ۽ سرڪاري اگهه تي عمل نه ٿيڻ جو نوٽيس ورتو آهي. هن چيو ته حڪومت کي آبادگارن جي تڪليف جو احساس آهي، سنجيدگي سان مسئلو حل ڪرڻ جي ڪوشش ڪئي پئي وڃي. سينيئر وزير چيو ته شگر ملز طرفان عدالت وڃڻ بعد مسئلا آهن ۽ شگر ملز مالڪن جي ڪيس تي عدالت ٻڌڻي لاءِ فيبروري جي تاريخ طئي ڪئي آهي. شهريار مهر چيو ته حڪومت شگر ملز مالڪن خلاف ڪهڙو ايڪشن ورتو آهي، جنهن تي نثار کهڙي چيو ته شگر ملز مالڪن ۽ آبادگارن وچ ۾ تڪرار سان ڪمند جو فصل تباهه ٿي ويندو. سيد سردار احمد چيو ته سپريم ڪورٽ اسٽي آرڊر نه پر ٻــُڌڻي جي تاريخ مقرر ڪئي آهي، سنڌ حڪومت کي هاءِ ڪورٽ جي فيصلي تي عمل ڪرڻ گهرجي. سينيئر وزير نثار کهڙي جي بيان تي مخالف ڌر جي ميمبرن شيم شيم جا نعرا هنيا ۽ ايوان مان علامتي واڪ آئوٽ ڪيو. ان کان اڳ ايم ڪيو ايم ميمبر اشفاق منگي ڪراچي ۾ ڪارڪنن جي عدالت کان مٿانهين قتل جي معاملي تي ڳالهين جي اجازت گهــُري. ڳالهائڻ جي اجازت نه ملڻ تي ايم ڪيو ايم ميمبرن احتجاج ڪيو ۽ نعريبازي ڪئي. ايم ڪيو ايم ميمبرن، ايوان مان علامتي واڪ آئوٽ به ڪيو جيڪي ڪجهه دير بعد واپس اچي ويا. ان موقعي تي صوبائي وزير نثار کهڙي چيو ته ايم ڪيو ايم آپريشن جو مطالبو ڪيو ۽ هاڻي مخالفت پئي ڪري. سيد سردار احمد چيو ته متحده ڪارڪنن کي قتل ڪيو پيو وڃي، سڪيورٽي جا انتظام فوج حوالي ڪيا وڃن. سنڌ ۾ تعليمي ادارن جي سڪيورٽي بابت ايم ڪيو ايم ڌيان ڇڪايو نوٽيس پيش ڪيو. محمد حسين چيو ته سنڌ ۾ ڪيترائي اهڙا سرڪاري ۽ غير سرڪاري اسڪول آهن جن کي پابندي مڙهيل تنظيمن کان دهشتگرديءَ جو خطرو آهي. متحده ميمبر محمد حسين چيو ته تعيلمي ادارن جي سڪيورٽي لاءِ قدمن بابت آگاهه ڪيو وڃي. تعليم واري وزير نثار کهڙي چيو ته سنڌ جي درسگاهن جي سڪيورٽي لاءِ مڪمل انتظام ڪيا ويا آهن. هن چيو ته خانگي تعليمي ادارن جي سڪيورٽي لاءِ به بهتر قدم کنيا ويا آهن، جڏهن ته تعليمي ادارن جي ڀرپاسي ۾ حددخلين کي هٽايو ويو آهي. نثار کهڙي چيو ته ٻاهرين خطرن سبب تعليمي ادارن جي اندر موجود ماڻهن مان به دهشتگردي جو خدشو هوندو آهي. هن چيو ته 50 کان وڌيڪ اهڙا سينٽر قائم ڪيا ويا آهن جيڪي تعليمي ادارن جي سڪيورٽي کي مانيٽر ڪري رهيا آهن. سنڌ پبلڪ سروس ڪميشن جي چيئرمين بابت فنڪشنل ليگ ڌيان ڇڪايو نوٽيس پيش ڪيو. نصرت سحر عباسي چيو ته سنڌ پبلڪ سروس ڪميشن جي اڳوڻي چيئرمين آغا رفيق کان سياسي دٻاءَ تي استعيفيٰ ورتي وئي. صوبائي وزير شرجيل ميمڻ چيو ته اخبارن ۾ مفروضن تي ٻڌل خبرون شايع ڪيون وينديون آهن، آغا رفيق کان استعيفيٰ وٺڻ بابت خبر غلط آهي. شرجيل ميمڻ چيو ته آغا رفيق سنڌ پبلڪ سروس ڪميشن جي چيئرمين جي عهدي تان ذاتي سببن ڪري استعيفيٰ ڏني. ايوان ۾ پيٽروليم شين جي اگهن ۾ گهٽتائي بعد ٽرانسپورٽ ڀاڙا نه گهٽائڻ تي ڌيان ڇڪايو نوٽيس تي متحده ميمبر هير سوهو چيو ته حڪومت طرفان ڀاڙا گهٽائڻ جي دعوائن باوجود مسافرن کي رليف ناهي مليو. هير سوهو ٽرانسپورٽ واري وزير کي مخاطب ٿيندي چيو ته انٽر سٽي ٽرانسپورٽ جا ڀاڙا ڪيترا گهٽايا ويا؟ ان موقعي تي ٽرانسپورٽ واري وزير ممتاز جکراڻي چيو ته ٽرانسپورٽ ڀاڙن ۾ 10 سيڪڙو گهٽتائي ڪئي وئي آهي جنهن تي عملدرآمد نه ٿيڻ جون ڪي به شڪايتون نه مليون آهن. اجلاس ۾ مختلف معاملن تي بحث جاري هو ته اسپيڪر وڌيڪ ڪارروائي سڀاڻي تائين ملتوي ڪري ڇڏي.

 

هڪ ئي وقت 3 طلاقون ڏيندڙن کي سخت سزا ڏني وڃي: اسلامي نظرياتي ڪائونسل جي سفارش

اسلام آباد(بيورو) اسلامي نظرياتي ڪائونسل جو اجلاس محمد خان شيراني جي صدارت ۾ ٿيو اجلاس ۾ فيصلو ڪيو ويو ته هڪ ئي وقت 3 طلاقتون ڏيندڙ سزا جا حقدار آهن ۽ انهن کي قانون جوڙي سزا ڏني وڃي، محمد خان شيراني چيو ته ڪاوڙ ۾ ماڻهو 3 طلاقتون ڏئي ڇڏيندا آهن جنهن کانپوءِ اهي ماڻهو دربدري واري زندگي گذاريندا آهن. اسلامي نظرياتي ڪائونسل 3 طلاقتون ڏيندڙن کي سزا ڏيڻ جو اختيار عدليه مٿان ڇڏي ڏنو آهي، محمد خان شيراني چيو ته هڪ ئي وقت 3 طلاقتون ڏيڻ سنت جي به خلاف آهي، پهرين طلاق تي رابطو ڪرڻ گهڻو ئي آهي پر ٻي طلاق تي ٻيهر نڪاح ڪرڻو پوندو آهي، اجلاس ۾ شريڪ مفتي جو چوڻ هو ته حضور صه طلاق کي پسند نه ڪندو هو 3 گڏي طلاقون ڏيڻ ڏوهه وارو عمل آهي ۽ سفارش ڪئي وئي ته اهڙي عمل کي ختم ڪرڻ جي لاءِ قانون جوڙي سزائون ڏنيون وڃن اسلامي نظرياتي ڪائونسل عورت جج کي پردي ڪرڻ جو پابند بڻائڻ جي به سفارش ڪئي آهي ۽ ان سلسلي ۾ مولانا شيراني چيو ته عورت جج جي عمر چاليهه سال ۽ پردي جي پابند هئڻ گهرجي اسلامي نظرياتي ڪائونسل ٻارن کي جسماني سزا ڏيڻ واري بل کي رد ڪندي نئون ڊرافٽ تيار ڪرڻ جي هدايت ڪئي آهي، جڏهن ته مثالي ڪورس ۾ جنسي تعليم جي متعلق ڪائونسل ڪورس جا ڪتاب طلب ڪري ورتا آهن ان کانسواءِ اجلاس ۾ گڏيل طور تي تيار ڪيل ڊرافٽ ۾ 14 آگسٽ واري موڪل بحال رکڻ ۽ ان ڏينهن تي ڪارو ڏينهن نه ملهائڻ جي سفارش ڪئي وئي.

 

دهشتگردن کي فاٽا ۾ به لڪڻ جي جاءِ نه ڏني ويندي، ائي ڊي پيز جي بحالي لاءِ 100 ارب لڳندا: عبدالقادر بلوچ

اسلام آباد (بيورو) رياستن ۽ سرحدي معاملن واري وزير عبداقادر بلوچ چيو آهي ته پاڪ فوج دهشتگردن کي ڇٿڻ لاءِ آپريشن ضرب عضب ڪاميابي سان جاري آهي، ميڊيا پاڪ فوج، پوليس، سول سوسائٽي جي مدد ڪري. اسلام آباد ۾پريس ڪانفرنس ڪندي چيو ته آءِ ڊي پيز جي ٻيهر گهر ڏانهن واپسي ۽ انهن جي بحالي لاءِ 100 ارب رپيا لڳندا، پاڪ ترڪ اسڪولن جي شاگردن پاران آءِ ڊي پيز جي بحالي لاءِ 1 ڪروڙ رپيا گڏ ڪيا ويا آهن. عبدالقادر بلوچ چيو آهي ته سرڪار آءِ ڊي پيز جي بحالي  انهن جي ٿيل نقصانن جو هر صورت ۾ ازالو ڪندي، جنهن لاءِ عالمي برادري کي به اپيل ڪئي وئي آهي. هن چيو ته هر شهر ۽ گهٽي ۾ به دهشتگرن خلاف آپريسن ضرب عضب ڪيو ويندو، دهشتگردن کي فاٽا ۾ به لڪڻ جي جاءِ نه ڏني ويندي. هن چيو ته هلندڙ سال ڊسمبر تائين افغان مهاجرين کي پنهنجي پنهنجي گهرن ڏانهن باحفاظت پهچايو ويندو، جنهن دوران جيڪي به علائقا ڪليئر ٿيندا  انهن ۾ آءِ ڊي پي کي اماڻيو ويندو. وفاقي وزير عبدالقادر بلوچ جو اهو به چوڻ هو ته پاڪ فوج پنهنجو ڪم بهتر نموني سان ڪرڻ ڄاڻي ٿي.

 

جيڪڏهن فوج اچي وئي ته سڀ کان وڌيڪ دانهون به ايم ڪيو ايم ئي ڪندي: شرجيل ميمڻ

ڪراچي (اسٽاف رپورٽر)  سنڌ جي اطلاعات ۽ بلديات واري وزير شرجيل انعام ميمڻ چيو آهي ته متحده قومي موومينٽ (ايم ڪيو ايم) وارن کي ان ڳالهه جي چڱي ريت ڄاڻ آهي ته هتي فوج نه ايندي، ان لاءِ هو فوج جو مطالبو ڪري رهيا آهن. جيڪڏهن فوج اچي وئي ته سڀ کان وڌيڪ دانهون به ايم ڪيو ايم وارا ئي ڪندا. ايم ڪيو ايم وارن وٽ هاڻ تنقيد کان سواءِ ڪجهه باقي ناهي بچيو. هو 25 سالن کان حڪومت ۾ آهن ۽ اڄ به هو ڪنهن نه ڪنهن طريقي سان حڪومت ۾ شامل آهن ۽ انهن جو گورنر اڄ به انتظامي معاملن کي ڏسي رهيو آهي. سمورين حقيقتن کان هو آگاهه آهن. ڪي ايم سي ۽ واٽر بورڊ ۾ ماضي ۾ ڪيتريون غلطيون ٿيون آهن ۽ ڪيترن آفيسرن ازخود پنهنجو گريڊ وڌايو آهي. ان تي جاچ جي هدايت ڏئي ڇڏي آهي. سموريون وزارتون حڪومت ۽ پارٽي جون امانتون آهن ۽ ان تي اختيار وزيراعليٰ سنڌ جو آهي. اهڙن خيالن جو اظهار هن اربع تي سنڌ اسيمبلي جي اجلاس کان اڳ ميڊيا سان ڳالهائيندي ڪيو. شرجيل انعام ميمڻ صحافين جي سوالن جا جواب ڏيندي چيو ته ايم ڪيو ايم جي قيادت پاران سنڌ ۾ مارشل لا لڳائڻ جو مطالبو غيرسنجيده آهي. هن چيو ته کين ان ڳالهه جي ڄاڻ آهي ته هتي هاڻ فوج نه ايندي. هن چيو ته جيڪڏهن فوج هتي اچي وئي ته سڀ کان وڌيڪ دانهون به ايم ڪيو ايم ئي ڪندي. اڄ رينجرز ۽ پوليس پاران جاري ٽارگيٽيڊ ايڪشن تي انهن پاران جهڙي طرح دانهون ڪيون پيون وڃن. ان جي به سڀني کي خبر آهي. شرجيل انعام ميمڻ چيو ته ايم ڪيو ايم گذريل 25 سالن کان حڪومت ۾ آهي ۽ هو سمورين حقيقتن کان چڱي ريت واقف آهن. هن چيو ته پهريان به دهشتگردي ٿيندي هئي پر جوابدار گرفتار نه ٿيندا هئا هاڻ اها صورتحال ان کان ڪافي ڀيرا مختلف آهي ۽ اڄ جيڪڏهن دهشتگردي ٿئي ٿي ته جوابدار ماريا به وڃن ٿا ۽ گرفتار به ٿي رهيا آهن. هن چيو ته پيپلز پارٽي اشوز تي سياست بجاءِ عوامي خدمت ۽ عوامي ووٽن جي طاقت تي يقين رکي ٿي ۽ هو عوامي ووٽ سان ئي ايوانن ۾ اچي ٿي. هڪ ٻي سوال جي جواب ۾ هن چيو ته ميڊيا ۾ ايندڙ سمورين خبرن جو حقيقت سان ڪوبه تعلق نه آهي. گذريل ڏينهن سنڌ ڪابينا جي حوالي سان ڪجهه خانگي ٽي وي چينلز ۽ اخبارن ۾ سندس ڪارروائي پاڻ مرادو شايع ڪئي وئي ان لاءِ منهنجي ميڊيا کي به استدعا آهي ته رپورٽنگ ۾ حقيقت جي سچائي کي نظر ۾ رکي خبرن جي اشاعت ڪئي وڃي ته بهتر ٿيندو. هڪ ٻي سوال جي جواب ۾ شرجيل انعام ميمڻ چيو ته او پي ايس ۽ ڊيپوٽيشن تي آفيسرن جو معاملو عدليه جي فيصلي تحت حل ڪيو پيو وڃي، پر افسوس ته ماضي ۾ڪي ايم سي ۽ واٽر بورڊ ۾ جيڪي ترقيون ٿيون آهن اهي قانون کان بالاتر ٿي ڪيون ويون آهن ۽ ڪافي آفيسرن پنهنجي پاڻ کي اخود 20 ۽ 21 گريڊ ۾ متعين ڪري ورتو آهي. ان جي حوالي سان جاچ جي هدايت ڏني آهي ۽ ايڊمنسٽريٽر ڪراچي ۽ ايم ڊي واٽر بورڊ کي اهڙن سمورن آفيسرن جون لسٽون تيار ڪرڻ لاءِ چيو ويو آهي ته جيئن انهن سمورن کي قانون مطابق ترقيون ڏنيون وينديون. لياقت جتوئي پاران پيپلز پارٽي ۽ خود شرجيل ميمڻ تي الزامن جي سوال جي جواب ۾ شرجيل ميمڻ چيو ته عوام جا رد ٿيل ماڻهو ۽ اڄ معتصبانه اليڪشن ٽربيونل جي ڪري اسيمبلي ۾ ايندڙ جي ڪنهن به الزام جو جواب ڏيڻ جو ڪوبه فائدو نه آهي. هن چيو ته هن وٽ جيڪڏهن اسان خلاف ڪي ثابتيون آهن ته هو عدالتن ۾ وڃي. سنڌ ڪابينا ۾ ردوبدل جي سوال جي جواب ۾ هن چيو ته ان سلسلي ۾ ڪابه ڳالهه سندس علم ۾ نه آهي ۽ جيڪڏهن ڪنهن قسم جي ڪا تبديلي ٿئي ٿي ۽ جيڪڏهن ڪنهن کي وزير بڻايو ويو مون سميت ڪنهن کي به هٽايو وڃي ٿو ته ان سان به ڪو فرق نه پوندو، ڇو ته وزارتون ڪنهن جون ذاتي ناهن اهي پارٽي ۽ حڪومت جي امانت آهن ۽ ان تي پارٽي ۽ وزيراعليٰ سنڌ جو اختيار آهي. ڪراچي ۾ برسات کان پوءِ جي صورتحال جي سوال تي هن چيو ته هن وقت سڀ کان وڏو معاملو نالن تي قائم وڏي پيماني تي قبضا آهن صرف گجر نالي تي 2 لک کان وڌيڪ جي آبادي آهي، جڏهن ته سمورن ڊرينيج تي قبضا قائم آهن. هن چيو ته شهر جي ترقي جي دعويدارن ڪڏهن ان تي آواز ناهي اٿاريو ۽ نه ئي ان جو خاتمو ڪيو. هن چيو ته شهر کي ماسٽر پلان جي برعڪس بڻايو ويو آهي هاڻ اسان ان حوالي سان اسٽريجٽي تيار ڪئي آهي ۽ جلد عملدرآمد شروع ڪيو ويندو.

 

سنڌ دهشتگردن جي پناهه گاهه بڻجي چــُڪي آهي، ڪراچي ۾ فوج کي گهرايو وڃي: خواجا اظهار الحسن

ڪراچي (اسٽاف رپورٽر) ايم ڪيو ايم اڳواڻ خواجا اظهار الحسن چيو آهي ته سنڌ دهشتگردن جي پناهه گاهه بڻجي چــُڪي آهي،جيڪڏهن ضرورت آهي ته ڪراچي ۾ قتل عام روڪڻ لاءِ فوج کي گهــُرايو وڃي. ڪراچي ۾ سنڌ اسيمبلي ٻاهران ميڊيا سان ڳالهائيندي خواجه اظهار الحسن چيو ته سنڌ ۾ حڪومت نالي ڪابه شيءَ نظر نه ٿي اچي. خواجا اظهار الحسن چيو ته سنڌ ۾ قتل عام ٿي رهيو آهي پر حڪومت توڙي سڪيورٽي ادارا دهشتگردي روڪڻ ۾ ناڪام ٿي ويا آهن. سندس چوڻ هو ته حڪومتکي خبر ئي ناهي ته ڪراچيءَ ۾ آپريشن هلي رهيو آهي، صوبائي سرڪار بدانتظاميءَ ۾ پنهنجو ئي رڪارڊ ٽوڙي ڇڏيو آهي. خواجه اظهار الحسن جو وڌيڪ چوڻ هو ته ڪراچيءَ ۾ هڪ ڏينهن جي مينهن حڪومتي دعوائن کي ڌوڙ ڪري ڇڏيو آهي.

 

حڪومت ۽ پي ٽي آءِ وچ ۾ جڊيشل ڪميشن جي قيام تي ڳجها رابطا، ڳالهيون جاري رکڻ تي اتفاق

اسلام آباد (بيورو) حڪومت ۽ پاڪستان تحريڪ انصاف وچ ۾ جڊيشل ڪميشن جي قيام تي اسلام آباد ۾ نامعلوم هنڌ تي مذاڪرات ٿيا پي ٽي آءِ اڳواڻن مطابق حڪومتي خواهش تي مذاڪرات کي راز ۾ رکيو ويو ذريعن مطابق حڪومتي مذاڪراتي ڪميٽي جي ميمبر اسحاق ڊار بيروني ملڪ دوري تان واپس اچڻ کان پوءِ ڳالهين جو سلسلو ٻيهر بحال ڪيو ڳالهين جو ٻيو دور گذريل رات ڳجهي هنڌ تي ٿيو جنهن ۾ تحريڪ انصاف پاران اسد عمر شرڪت ڪئي حڪومت پاران اسحاق ڊار ۽ قانوني ماهر شريڪ ٿيا اجلاس کي حڪومتي ميمبرن جي خواهش تي ميڊيا کان ڳجهو رکيو ويو مذاڪرات ۾ جڊيشل ڪميشن جي قيام جي حوالي سان خيالن جي ڏي وٺ تي ۽ مذاڪرات جاري رکڻ تي اتفاق ڪيو ويو.

 

سنڌ اسيمبلي جي اسپيڪر تحريڪ انصاف جي ميمبرن جون استعيفائون منظور ڪري ورتيون

ڪراچي (اسٽاف رپورٽر) سنڌ اسيمبلي جي اسپيڪر آغا سراج دراني پاڪستان تحريڪ انصاف جي ميمبرن جون استعيفائون منظور ڪري ورتيون تحريڪ انصاف جي ميمبرن سيپٽمبر ۾ استعيفائون ڏنيون هيون، سنڌ اسيمبلي ٻاهران ميڊيا سان ڳالهائيندي آغا سراج دراني جو چوڻ هو ته پاڪستان تحريڪ انصاف جي ميمبرن پاران ڏنل استعيفائون آخرڪار منظور ڪيون ويون آهن آغا سراج دراني جو چوڻ هو ته پي ٽي آءِ ميمبرن طرفان استعيفائون واپس وٺڻ جو ڏاڍو انتظار ڪيو جڏهن ته ڪوبه جواب نه ملڻ تي استعيفائون منظور ڪري اليڪشن ڪميشن کي موڪلي ڇڏيون آهن استعيفائون ڏيندڙ ميمبرن ۾ ثمر علي خان، ڊاڪٽر سيما ضياءَ، حفيظ الدين ۽ خرم شير زمان شامل آهن.

 

وڏي وزير خلاف بي اعتمادي جي رٿ آڻڻ واري ڳالهه تي قائم آهيون: شهريار مهر

ڪراچي (اسٽاف رپورٽر) سنڌ اسيمبلي ۾ اپوزيشن ليڊر شهريار مهر چيو آهي ته وڏي وزير خلاف بي اعتمادي جي رٿ آڻڻ واري ڳالهه تي قائم آهيون، اپوزيشن پارٽين ۾ڪجهه اختلاف آهن، جيڪي جلد حل ٿي ويندا. سنڌ اسيمبلي ٻاهران ميڊيا سان ڳالهائيندي شهريار مهر چيو ته ٿر بابت ڪميٽي نه جوڙي سنڌ اسيمبلي پنهنجي قائدن جي ڀڃڪڙي ڪئي آهي. هن چيو ته ٿر ۾ روز ڪيترائي معصوم ٻارڙا مري رهيا آهن، جنهن خلاف اسيمبلي جي فلور تي آواز اٿاريو ويندو. شهريار مهر چيو ته سنڌ حڪومت ڪمند جي مقرر ڪيل اگهه تي عمل ناهي ڪرائي سگهي،اهڙي جمهوريت ڪهڙي ڪم جي جيڪا عوام کي رليف نه ڏياري سگهي. شهريار مهر چيو ته وڏي وزير خلاف بي اعتمادي واري رٿ آڻڻ واري ڳالهه تي قائم آهيون، اپوزيشن پارٽين جا ڪجهه معاملن تي اختلاف آهن، ڪوشش آهي ته جلد حل ٿي وڃن.

 

پي ۽ پٽ ۾ ڪي به اختلاف ناهن، مداخلت وارا الزام ڪوڙا آهن: فريال ٽالپر

لاڙڪاڻو (بيورو) پاڪستان پيپلز پارٽي جي مرڪزي اڳواڻ ايم اين اي فريال ٽالپر چيو آهي ته آصف زرداري ۽ بلاول ڀٽو زرداري پيءُ پٽن ۾ ڪو به اختلاف نه آهي، بلاول ڀٽو زرداري جلد پاڪستان ايندو ۽ پارٽي جون واڳون سنڀالي عوام جي خدمت ڪندو. لاڙڪاڻي شهر لاءِ هڪ ارب 13 ڪروڙ روپين جي لاڳت سان لاڙڪاڻي شهر لاءِ ڊرينيج اسڪيم منظور ڪئي وئي آهي. جنهن جو پيڙهه جو پٿر پوليس لائين ۾ رکيو ويو آهي. اهڙن خيالن جو اظهار هن ڪالهه سر شاهنواز ڀٽو لائبرري جي هال ۾ ڊرينيج اسڪيم جو پيڙهه جو پٿر رکندي هڪ وڏي تقريب کي خطاب ڪندي ڪيو. ان موقعي تي سرشاهنواز ڀٽو لائبرري ۾ پوليس پاران سڪيورٽي جا سخت انتظام ڪيا ويا جڏهن ته ايم اين اي فريال ٽالپر، ايم اين اي محمد اياز سومرو، ايم پي اي خورشيد احمد جوڻيجو ۽ ٻيا پارٽي اڳواڻ تقريب ۾ شرڪت ڪرڻ لاءِ سرشاهنواز ڀٽو لائبرري پهتا ته پوليس اهلڪارن پيپلز پارٽي جي ڪارڪنن کي اندر نه ڇڏيو ۽ ڌڪا ڏئي لائبرري جي دروان کي تالا هڻي ڇڏيا. ان وقت لائبرري جي دروازي جا شيشا پٽ ٽٽي پيا جنهن ۾ ڪيترائي ڪارڪن شيشا لڳڻ ۽ پوليس اهلڪارن جي ڌڪن سبب هيٺ ڪري زخمي ٿي پيا. جڏهن ته ڪيترن ئي صحافين توڙي ڦوٽو گرافرن کي پڻ پوليس اهلڪارن اندر حال ۾ داخل ٿيڻ نه ڏنو. پيپلز پارٽي جي ڪارڪنن پوليس اهلڪارن خلاف نعريبازي ڪئي ۽ ڪيترائي ڪارڪن پروگرام ۾ شرڪت ڪرڻ بنا ئي واپس هليا ويا ۽ پنهنجي اڳواڻ جو خطاب نه ٻڌي سگهيا. تقريب کي خطاب ڪندي پيپلز پارٽي جي ايم اين اي فريال ٽالپر وڌيڪ چيو ته پارٽي جا وزير، ايم اين اي ۽ ايم پي اي پاڻ ۾ هڪ پل جو ڪردار ادا ڪري رهيا آهن. هن چيوته ملڪ ۾ پئٽرول جي قلت سمجھه کان ٻاهر آهي. هن چيوته سمجھه ۾ ڳالهه نه ٿي اچي ته اهو بحران هٿرادو آهي يا اصل ان لاءِ پاڪستان پيپلز پارٽي قومي اسيمبليءَ جي اجلاس ۾ رٿ جمع ڪرائي آهي. جتي ان ڳالهه تي بحث ڪيو ويندو. هن چيوته مان دعوى سان چئي سگهان ٿي ته جيڪي پاڻ کي سنڌ جو ٺيڪيدار  ۽ وڏيرو سڏائيندڙ حڪومت ۾ آيا ته انهن سنڌ کي ڇا ڏنو آهي ۽ نقصان کان سواءِ ڪجھه به نه ڪيو پر پاڪستان پيپلز پارٽي واحد پارٽي آهي جيڪا سٺي ڪارڪردگيءَ جي ڪري عوام ۾ مقبول ۽ عوام جي دلن جي حڪومت ڪري رهي آهي. هن چيوته ايم اين ايز ۽ ايم پي ايز جو ڪم صرف اسيمبلين ۾ قانون سازي ڪرڻ نه آهي پر اهي پنهنجو سڄو توجهه ۽ وقت پنهنجي علائقي جي عوام جي مسئلن کي حل ڪرڻ لاءِ ڏين. هن چيوته لاڙڪاڻي شهر ۾ ڊرينيج جي حوالي سان وڏيون شڪايتون هيون جنهن کي ختم ڪرڻ لاءِ هڪ ارب 13 ڪروڙ روپين جو منصوبو ڏنو ويو آهي. جنهن سان ٻن مهينن جي اندر شهر ۾ بيٺل پاڻي يا گندو پاڻي ختم ٿي ويندو. جڏهن ته پراجيڪٽ جون 2016 تائين مڪمل ٿي ويندو. جنهن سان لاڙڪاڻي شهر جي 10 لک ماڻهن کي فائدو ملندو. هن چيوته ڊرينيج اسڪيم جو ٺيڪو سٺن ٺيڪيدارن کي ڏنو ويندو جيڪي سٺي ساک رکندڙ هوندا. جڏهن ته انهن جي ڪم کي چيڪ ڪرڻ لاءِ هڪ مانيٽريننگ ڪاميٽي به ٺاهي وئي آهي. جنهن سان منصوبو ڪاميابي سان پنهنجي پڄاڻي تي پهچندو. هن چيوته لاڙڪاڻو شهر شهيدن جو شهر آهي هن شهر کي اسان پئرس وانگر ڏسڻ چاهيون ٿا اهو خواب شهيد ذوالفقار علي ڀٽو ۽ شهيد محترمه بينظير ڀٽو جو به هيو جنهن کي اسان هر صورت ۾ پورو ڪنداسين. ان موقعي تي تقريب کي ايم اين اي محمد اياز سومرو، ڪمشنر لاڙڪاڻو ڊاڪٽر سعيد احمد مڱڻيجو پڻ خطاب ڪيو. جڏهن ته تقريب ۾ ايم پي اي خورشيد احمد جوڻيجو، پيپلز پارٽي جا ضلعي اڳواڻ خير محمد شيخ، عبدالفتاح ڀٽو، پ پ پ ضلعي اطلاعات سيڪريٽري سليم سومرو ۽ ٻيا پڻ موجود هئا.