تازيون خبرون

Daily Archives: January 21, 2015

پيٽرول بحران: جاچ ڪميٽي اوگرا کي ذميوار قرار ڏئي ڇڏيو

اسلام آباد (بيورو) پيٽرول بحران جي ذميوارن جو تعين ڪرڻ لاءِ جوڙيل جاچ ڪميٽي، شروعاتي جاچ رپورٽ وزيراعظم آڏو پيش ڪري ڇڏي، ڪميٽي بحران جو ذميوار اوگرا کي قرار ڏئي ڇڏيو آهي. وزيراعظم نواز شريف جي صدارت هيٺ پيٽرول بحران جي صورتحال جو جائزو وٺڻ لاءِ اجلاس ٿيو. گذريل ڏينهن پيٽرول بحران جي ذميوارن جو تعين ڪرڻ لاءِ جوڙيل جاچ ڪميٽيءَ شروعاتي رپورٽ وزيراعظم کي پيش ڪري ڇڏي. جاچ رپورٽ ۾ بحران جو ذميوار اوگرا کي قرار ڏنو ۽ چيو ته پيٽرول جي اوچتو کوٽ ٿيڻ اوگرا جي سنگين ناڪامي آهي. اجلاس دوران پيٽرول جي کوٽ تي معطل ڪيل 4 آفيسرن کي معطل ڪرڻ واري فيصلي جي به منظوري ڏني وئي. ان موقعي تي وزيراعظم نواز شريف اختيارين کي هدايت ڪئي ته بنا دير پيٽرول بهران جو حل ڪڍيو وڃي ۽ اهڙا قدم کنيا وڃن جو مستبقل ۾ اهڙي صورتحال پيدا نه ٿئي. واضح رهي ته وزيراعظم پيٽرول بحران جو نوٽيس وٺندي 4 آفيسرن کي معطل ڪري ڇڏيو هو، جنهن ۾ پيٽروليم سيڪريٽري عابد سعيد، ايم ڊي پي ايس او امجد جنجوعا، ايڊيشنل سيڪريٽري نعيم ملڪ ۽ ڊي جِي آئل محمد اعظم شامل آهن.

 

سنڌ سرڪار پاران مڪاني چونڊن لاءِ نيون ترميمون ڪرڻ جو فيصلو

ڪراچي (اسٽاف رپورٽر) سنڌ جي تعليم واري سينيئر وزير نثار احمد کهڙو چيو آهي ته سپريم ڪورٽ جيڪڏهن هڪ مهيني اندر مڪاني چونڊون ڪرائڻ چاهي ٿي ته عدالت جو حڪم اکين تي آهي پر نين تڪبندين کان بغير هڪ مهيني اندر مڪاني چونڊون ڪرائڻ ممڪن ناهن، نه ئي ان عرصي ۾ مڪاني چونڊون ٿيندي نظر اچي رهيون آهن. اهڙن خيالن جو اظهار هن اڱاري ڏينهن سنڌ اسيمبليءَ ۾ لوڪل گورنمينٽ بابت ڪميٽيءَ جي اجلاس جي صدارت ڪرڻ کانپوءِ ميڊيا سان ڳالهائيندي ڪيو. اجلاس ۾ صوبائي وزير ڊاڪٽر سڪندر ميندرو، شرجيل ميمڻ، مير هزار خان بجاراڻي، سيڪريٽري قانون ۽ سيڪريٽري لوڪل گورنمينٽ شرڪت ڪئي. نثار احمد کهڙو چيو ته مڪاني چونڊون هاڻي پينل سسٽم تحت نه پر وارڊز تحت ٿينديون ۽ وارڊز ٺاهيا ويندا جنهن تحت عوام چونڊن ۾ حصو وٺندو. هن چيو ته وارڊز جون تڪبنديون الڪيشن ڪميشن آف پاڪستان ڪندي. هن چيو ته مڪاني چونڊون پينل سسٽم بدران وارڊز تحت ٿيڻ بابت ايڪٽ ۾ ترميم ڪئي ويندي. هن چيو ته نين تڪبندين جو اختيار اليڪشن ڪميشن کي ڏنو ويو آهي ۽ تڪبندين جي ايڪٽ ۾ ڪجهه زير زبر ۽ ٻي مناسب ترميم کانپوءِ اليڪشن ڪميشن نين تڪبنديون ڪرڻ جو ڪم شروع ڪري ڇڏيندي. نثار احمد کهڙو هڪ سوال جي جواب ۾ چيو ته مارشل لا جو مطالبو ڪا سياسي جماعت ڪري اها ان غير جمهوري سوچ آهي. مارشل لا مسئلن جو حل ناهي، مسئلن جو دائمي حل جمهوريت ۾ آهي.

 

دهشتگردي خلاف جنگ تي سڄي دنيا جون نظرون آهن: پرويز رشيد

اسلام آباد (بيورو) سڌ سماءُ وارو وفاقي وزير پرويز رشيد چيو آهي ته قبائلي علائقن ۾دنيا جو امن ۽ پاڪستان جو مستقبل جڙيل آهي، ملڪ کي دهشتگردي جي لعنت کان ڇوٽڪاريو ڏياريو ويندو. اسلام آباد ۾ ميڊيا سان ڳالهائيندي پرويز رشيد چيو ته حڪومت امن جي بحالي لاءِ اتر وزيرستان سميت مختلف علائقن ۾ دهشتگردن خلاف آپريشن جاري آهي، جنهن گهڻي ڀاڱي ڪاميابيون به مليون آهن. هن چيو ته دهشتگردن خلاف جنگ تي سڄي دنيا جون نظرون آهن، قوم کي متحد ٿيڻ گهرجي.  سندس چوڻ هو ته پاڪستان کي اهڙو ملڪ بڻايو ويندو، جتي ڪنهن به ٻار جا والدين کيس ٻاهر موڪلڻ بعد پريشان نه ٿين. پرويز رشيد عمران خان تي تنقيد ڪندي چيو ته پي ٽي آءِ سربراهه ڌرڻن جي سياست ڪري ملڪ کي مالي نقصان پهچائڻ جي سازش ڪئي، جنهن ۾ ناڪام رهيو.

 

سنڌ حڪومت رعايتي اگهه تي ڪڻڪ فراهم ڪرڻ واري تاريخ ۾ واڌ ڪري ڇڏي

ڪراچي(اسٽاف رپورٽر) سنڌ حڪومت رعايتي اگهه تي ڪڻڪ فراهم ڪرڻ واري تاريخ ۾ توسيع ڪندي اپريل تائين فراهم ڪرڻ جو فيصلو ڪري ورتو.. ڪراچي ۾ وڏي وزير جي صدارت هيٺ وزير اعلي هائوس ڪراچي ۾ اجلاس ٿيو، اجلاس ۾ رعايتي اگهه تي ڪڻڪ وڪرو ڪرڻ واري معاملي تي غور ڪيو ويو. اجلاس ۾ فيصلو ڪيو ويو ته ڪڻڪ جو امداي اگهه 3 هزار 250 روپيا ٻوري وڪرو ڪرڻ واري تاريخ وڌائي اپريل تائين وڪرو ڪرڻ جو فيصلو ڪري ڇڏيو. سنڌ جو خوراڪ کاتو هاڻي اپريل تائين ڪڻڪ امدادي رعايتي اگهه تي خريد ڪري سگهي ٿو. اجلاس ۾ فيصلي بعد وڏي وزير قائم علي شاهه وفاقي حڪومت کي سنڌ کان 6 لک ٽن ميٽرڪ ٽن ڪڻڪ خريد ڪرڻ لاءِ خط اماڻي ڇڏيو. اجلاس ۾ فيصلو ڪيو ويو ته ڪڻڪ جي فراهمي کي فوري طور يقيني بڻائي ويندي.

 

اتر وزيرستان ۾ دهشتگرد افغانستان سان لاڳاپيل علائقي ۾ مزاحمت ڪري رهيا آهن: جنرل عاصم باجوه

واشنگٽن (م.ڊ) پاڪ فوج جي ترجمان ميجر جنرل عاصم باجوه چيو آهي ته اتر وزيرستان ۾ پاڪ فوج افغان سرحد سان لاڳاپيل علائقي ۾ دهشتگردن جي مزاحمت کي منهن ڏئي رهي آهي، آمريڪي خابرو اداري کي انٽرويو۾ پاڪ فوج جي ترجمان جو چوڻ هو ته دهشتگردي بابت پاڪستان جو موقف واضح ۽ پوري قوم دهشتگردي خلاف متحد آهي ڪوبه سٺو يا خراب ناهي سمورا طالبان دهشتگرد آهن دهشتگردن خلاف بنا فرق آپريشن جاري آهي ۽ عالمي برادري کي به گهرجي ته هو دهشتگردي خلاف  جنگ ۾ پاڪستان جو ساٿ ڏين اتر وزيرستانجو ڪيترو ئي علائقو آپريشن ذريعي ڪليئر ڪرايو ويو آهي جڏهن ته افعان سرحد ويجهو ننڍي علائقي ۾ دهشتگردن جي مزاحمت کي منهن ڏيڻو پئجي رهيو آهي. ڊي جي آءِ ايس پي آر جو چوڻ هو ته موجوده حالتن ۾ پوري دنيا ۾ ڪٿي به 100 سيڪڙو تحفظ جي ضمانت نه ٿي ڏئي سگهجي جنهن جي مثال پيرس ۾ ٿيندڙ واقعو آهي ان واقعي سان ظاهر ٿئي ٿو ته دهشتگرد ڪڏهن به ۽ ڪٿي به ۽ ڪنهن به وقت حملو ڪري سگهن ٿا، هن وڌيڪ چيو ته پاڪ افغان لاڳاپا پهريان ئي بهتر هئا جڏهن ته پشاور سانحي کانپوءِ انهن ۾ وڌيڪ بهتري آئي آهي.

 

آصف زرداري گذريل هفتي دبئي ۾ تنوير زماني سان شادي ڪري ڇڏي: برطانوي ويب سائيٽ جي دعويٰ

لنڊن (مانيٽرنگ ڊيسڪ) برطانوي ويب سائيٽ دعويٰ ڪئي آهي ته اڳوڻي صدر ۽ پيپلزپارٽيءَ جي ڪو چيئرمين آصف علي زرداري گذريل هفتي دبئي ۾ مسلمان عورت تنوير زماني سان شادي ڪري ورتي آهي. شادي جي تقريب سادگي سان ملهائي وئي. شادي اسلامي قانون موجب ڪئي وئي آهي. شاديءَ جي موقعي تي 9 ڪاريون ٻڪريون، 6 ڳئون ۽ هڪ اُٺ جو صدقو ڏنو ويو. تنوير زماني آمريڪي شهري آهي پاره، مين هٽن نيويارڪ ۾ رهندي آهي. زماني ڀٽوکي پيپلزپارٽيءَ جو وفادار سمجهيو وڃي ٿو هن  برطانيا مان عالمي سياست تي پي ايڇ ڊي جي ڊگري حاصل ڪئي آهي. هوءَ لنڊن، دبئي، اسلام آباد ۽ مين هٽن ۾ جائيداد جي پڻ مالڪ آهي. زماني کي ڊيموڪريٽڪ طور سڃاتو وڃي ٿو ۽ هن اوباما جي 2008 جي چونڊ مهم جي حمايت ڪئي هئي. فعال طور تي جوڙڻ ۽ آمريڪي صدر جي صحت جي سار سنڀال بابت بل ۾ به شرڪت ڪئي هئي. ويجهڙ ئي ۾ کيس ڪجهه سببن جي ڪري کيس حفاظتي معاملن ۽ عوامي سياسي اجلاسن ۾ شرڪت کان منع ڪيو ويوهو. آصف زرداري اوباما سان هڪ اجلاس ۾ زماني لاءِ سيڪيورٽي حاصل ڪرڻ ۾ کيس مدد جي درخواست ڪئي هئي.

 

تحريڪ انصاف پيٽرول بحران کي حڪومت جي اندروني سازش قرار ڏئي ڇڏيو

اسلام آباد (بيورو) پاڪستان تحريڪ انصاف جي سربراهه عمران خان پيٽرول بحران کي حڪومت جي اندروني سازش قرار ڏيندي چيو آهي ته موجوده سرڪار گذريل حڪومت کان بدترين آهي. اسلام آباد ۾ ميڊيا سان ڳالهائيندي پي ٽي آءِ سربراهه عمران خان چيو ته ن ليگ جي حڪومت پاڻ ئي پيٽرول بحران پيدا ڪري سازش ڪري رهي آهي. پي ٽي آءِ سربراهه جو چوڻ هو ته بجليءَ جي اگهه تي سرچارج ٽيڪس لڳائڻ ڀتو وٺڻ برابر آهي. هن چيو ته ن ليگ جي موجوده حڪومت پ پ جي گذريل سرڪار کان به وڌيڪ بدتر آهي. عمران خان چيو ته عالمي مارڪيٽ ۾ تيل جي اگهن ۾ 60 سيڪڙو گهٽتائي ٿي،پر هتي سرچارج لڳائي وئي،جڏهن ته 40 سيڪڙو بجلي تيل مان پيدا ٿي رهي آهي. هن چيو ته دهشتگردي خلاف جنگ ۾ سڄو بار فوج تي وڌو ويو آهي،جڏهن ته عدليه جي مضبوطي بدران فوجي عدالتون قائم ڪيون ويون آهن،جيڪو جمهوري حڪومت جو ڪم ناهي. هن چيو ته پنجاب ۾ پيٽرول جو بحران پيدا ڪري چند خاندان امير ترين ٿي رهيا آهن هن وڌيڪ چيو ته خدا جو شڪر آهي ته اسلام آباد ۾ ڌرڻو لڳل ناهي نه ته حڪومت پيٽرول بحران جو ذميوار به ڌرڻي کي قرار ڏئي ڇڏي ها، پر اها سازش هاڻي حڪمران جماعت جي اندر ئي آهي، ملڪ ۾ ميرٽ جو جنازو ڪڍيو ويو آهي حڪمرانن جي خراب ڪارڪردگي بحرانن جي مٿان بحران پيدا ڪري رهي آهي، بجلي تي سرچارجز ورتي پئي وڃي ڪراچي ۾ جيئن ڀتو ورتو ويندو آهي اهڙي طرح حڪومت عوام کان ڀتو وصول ڪري رهي آهي اڳوڻي چيف جسٽس افتخار چوڌري پاران داخل ڪرايل درخواست جي جواب ۾ هن چيو ته مون وٽ 20 ارب روپيا ته نه آهن پر افتخار چوڌري خلاف ڪيس ضرور وڙهندس. عمران خان چيو ته ڌانڌلين جي جاچ لاءِ عدالتي ڪميشن نه جوڙي وئي ته حڪومت کي هلڻ نه ڏنو ويندو. پي ٽي آءِ سربراهه جو چوڻ هو ته پشاور سانحي جي شهيد ٻارڙن جي چاليهي جي موقعي تي هو اڄ ڏکويل والدين کي گهرائي ساڻن ڏک ونڊڻ چاهي ٿو. عمران خان وڌيڪ چيو ته موجوده حڪمران واپاري آهن، جيڪي ملڪ تي ڌيان ڏيڻ بدران پنهنجي واپار تي ڌيان ڏئي رهيا آهن.

 

وفاق پاران سنڌ حڪومت جي مطالبي باوجود صوبي کان 6 لک ٽن ڪڻڪ خريدڻ کان انڪار

ڪراچي (اسٽاف رپورٽر) وفاق،سنڌ حڪومت جي مطالبي باوجود صوبي کان 6 لک ٽن ڪڻڪ خريد کان انڪار ڪندي رڳو 4 لک ٽن ڪڻڪ جي خريداريءَ تي راضپو ظاهر ڪيو آهي. سنڌ جي پارلياماني معاملن واري وزير ڊاڪٽر سڪندر مينڌري وفاقي حڪومت کي خط لکي صوبي کان 6 لک ٽن ڪڻڪ خريد ڪرڻ جو مطالبو ڪيو. سنڌ سرڪار پاران وفاق کي لکيل خط ۾ چيو ويو آهي ته صوبي ۾ اسٽاڪ ٿيل ڪڻڪ خريد ڪئي وڃي ته جيئن صوبائي حڪومت تي چڙهيل قرض لاهي سگهن. سنڌ سرڪار جي مطالبي باوجود وفاقي حڪومت 6 لک ٽن ڪڻڪ خريد ڪرڻ کان صاف انڪار ڪيو آهي. وفاق پاران سنڌ حڪومت کان رڳو 4 لک ٽن ڪڻڪ خريد ڪرڻ تي راضپو ڏيکاريو ويو آهي

 

ڪوٽ ادو ويجهو اسڪول وين ۽ مسافر بس ۾ ٽڪر سبب 4 ٻارڙن سميت 6 ڄڻا فوت

مظفر آباد(م.ڊ) ڪوٽ ادو باءِ پاس ويجهو بس ۽ اسڪول جي وين ۾ ٽڪر جي نتيجي ۾ 2 ٻارڙن سميت 6 ماڻهو فوت، جڏهن ته 15 زخمي ٿي پيا. پوليس مطابق سي پبلڪ اسڪول جي بس جيڪا تونسا بئراج ۽ ڀرپاسي وارن علائقن جي ٻارڙن ۽ استادن کي کڻي ڪوٽ ادو اچي رهي هئي ته اسڪول وين جو ڪوٽ اد باءِ پاس ويجهو سامهون ايندڙ تيز رفتار بس سان ٽڪر ٿيو جنهن جي نتيجي ۾ ڊرائيور حسن رضا ۽ 2 ٻارڙن سميت 6 ڄڻا فوت ٿي ويا ۽ 15 زخمي ٿي پيا. فوتين ۽ زخمين  شاگرد ۽ استاد پڻ شامل آهن. زخمين کي اسپتال ۾ طبي امداد فراهم ڪئي وئي. هوڏانهن واقعي جي اطلاع تي پوليس پهچي وڌيڪ جاچ شروع ڪري ڇڏي آهي.

 

ٿر ۾ موت جو راڄ برقرار، وڌيڪ 2 ٻارڙا فوت، انگ 363 ٿي ويو

مٺي (نمائندو) ڏُڪاريل ڏيهه ٿر ۾ معصوم گلن جي ڪومائجڻ جو سلسلو نه رُڪجي سگهيو، وڌيڪ ٻن ٻارڙن جي فوت ٿيڻ کانپوءِ هڪ سئو 12 ڏينهن دوران حياتيون وڃائيندڙن جو انگ 363 ٿي ويو آهي. ڏيپلي جي ڳوٺ ساچي مورا ۾ ڇهن ڏينهن جي نورين ڀيل ۽ ننگرپارڪر جي ڳوٺ سونڊار ۾ تازو ڄاول ٻارڙو فوت ٿي ويو. مٺيءَ جي سول اسپتال ۾ هن وقت 50 کان وڌيڪ ٻارڙا داخل آهن،جڏهن ته اسلام ڪوٽ، ڏيپلي، ڇاڇري، عمرڪوٽ ۽ ٻين شهرن جي اسپتالن ۾ پڻ ڪيترن ئي ٻارڙن جو علاج هلندڙ آهي. اڄوڪي ڏينهن دوران وڌيڪ ٻن ٻارڙن جَي فوت ٿيڻ بعد هڪ سئو 12 ڏينهن دوران فوتي ٻارڙن جو انگ وڌي 363 ٿي ويو آهي.