تازيون خبرون

Daily Archives: January 20, 2015

پيٽرول جو بحران پيدا ڪندڙن کي معاف نه ڪيو ويندو: نواز شريف

اسلام آباد (بيورو) وزير اعظم ميان نواز شريف چيو آهي ته نائين اليون کانپوءِ سڄي دنيا خاص  ڪري پاڪستان ۾ دهشتگردي ۽ انتهاپسندي کي هٿي ملي آهي، صورتحال تي ضابطي جون ڪوششون ڪري رهيا آهيون، اين ايف سي ايوارڊ ۾ بلوچستان جو حصو وڌائي 9 ڏهائي 9 ڪيو ويو آهي. بلوچستان ترقياتي فورم جي تقريب کي خطاب ڪندي وزير اعظم نواز شريف چيو ته هو دل سان بلوچستان جي ترقي لاءِ ڪوشش ڪري رهيو آهي ۽ 142 صوبائي منصوبن ۾ وفاق بلوچستان جي مدد ڪري رهيو آهي. هن چيو ته ڏيڍ سال ۾ بلوچستان مثالي ترقي ڪئي آهي، جنهن ۾ سڪيورٽي صورتحال جي بهتري، مڪاني حڪومت جي چونڊ ۽ ترقياتي منصوبن جو ڄار شامل آهي. وزير اعظم چيو ته ستين اين ايف سي ايوارڊ ۾ بلوچستان جو حصو 5 ڏهائي 8 سيڪڙو مان وڌائي 9 ڏهائي 9 ڪيو ويو آهي، جڏهن ته مختلف پراجيڪٽس تي ڪم هلندڙ آهي. هن چيو ته ڪيچ ۾ ڪولڊ اسٽوريج جي قيام لاءِ 500 ملين رپيا بلوچستان جي حڪومت جي درخواست تي مخصوص ڪيا آهن. وزير اعظم چيو ته گوادر-تربت-خوشاب-رتوديرو روڊ ۽ ڪيترائي بجلي منصوبا به بلوچستان لاءِ قائم ڪيا پيا وڃن، جنهن سان خوشحالي جي نئين دور جي شروعات ٿيندي. وزير اعظم جو چوڻ هو ته دهشتگردي جو خاتمو آڻي بلوچستان سميت ملڪ کي ترقي وٺرائي ويندي. وزيراعظم نواز شريف پيٽرول جــِي بحران تي سخت ڪاوڙ جو اظهار ڪنديَ بحران جي جاچ جو حڪم ڏئي ڇڏيو، سندس چوڻ آهي ته شهرين کي پريشان ڪندڙن کان حساب ورتو ويندو. وزيراعظم نواز شريف جي صدارت هيٺ اسلام آباد ۽ پنجاب ۾ پيٽرول جي بحران تي 2 اهم اجلاس ٿيا. اجلاس ۾ ناڻي واري وفاقي وزير اسحاق ڊار، پيٽروليم واري وزير شاهد خاقان عباسي، پنجاب جي وڏي وزير شهباز شريف ۽ بچاءَ واري وزير خواجا آصف سميت مختلف کاتن جي سيڪريٽريز شرڪت ڪئي. اجلاس دوران وزيراعظم کي اختيارين پاران پيٽرول بحران تي بريفنگ ڏني وئي. وزيراعظم پيٽرول جي کوٽ تي سخت ڪاوڙ جو اظهار ڪيو ۽ چيو ته عوام جي شڪايتن جو کين احساس آهي. نواز شريف چيو ته شهرين کي پريشان ڪندڙن کان حساب ورتو ويندو ۽ کين معاف نه ڪيو ويندو. وزيراعظم جي صدارت هيٺ ٿيل پهرين اجلاس دوران پيٽروليم ۽ ناڻي وارن وزيرن وچ ۾ سخت جملن جي ڏي وٺ ٿي جڏهن ته هڪٻئي تي الزام به هنيا ويا.

 

اعتزاز احسن اين اي 124 تي ڌانڌلي خلاف اڇو چٺو جاري ڪري ڇڏيو

لاهور (م.ڊِ) پاڪستان پيپلزپارٽي جي مرڪزي اڳواڻ سينيٽر اعتزازاحسن عام چونڊن ۾ قومي اسيمبلي جي تڪ 124 ۾ ٿيل ڌانڌلي جي خلاف وائيٽ پيپر جاري ڪندي چيو آهي ته شفاف جاچ لاءِ جلد جڊيشل ڪميشن جوڙيو وڃي عوام جو مينڊيٽ چورائيندڙن ۾ آرٽيڪل 6 لڳي سگهي ٿو اليڪشن ڪميشن سيڪشن 45 جي تحت چونڊ مواد جو معائنو ڪرائي اين اي 124 جي ٿيلن مان شير نه 20 ٻليون نڪتيون آهن جن جا پڇ پاڻ ۾ ٻڌل هئا اسان حڪومت کي عدم استعمال جو شڪار نٿا ڪرڻ چاهيون جڏهن ته وزيراعطم نوازشريف پاڻ ئي پنهنجن پيرن تي ڪهاڙي هڻڻ جو ماهر آهي ۽ ان جي خلاف ڪنهن ڌماڌم مست ڪرڻ جي  ضرورت نه آهي اهڙن خيالن جو اظهار هن مرڪزي سيڪريٽري اطلاعات قمرزمان ڪائره بشره اعتزاز ۽ چوڌري منظوري سان گڏ پريس ڪانفرنس ڪندي ڪيو اعتزاز احسن چيو ته اليڪشن ڪميشن آفيسرن فرضي نتيجا ٺاهيا جڏهن ته ڪائونٽر فائل بابت آفيسر اجيب ڳالهيون ڪري رهيا آهن ۽ چون ٿا ته پنجن بيگن ۾ فارم نڪرڻ غلطي آهي پر 33 بيگن مان فارم نڪرڻ غلطي نه آهي پنجاب حڪومت جي تحويل ۾ ايندڙ ٿيلن جون سيلون ٽٽن هيون جيڪو ڌانڌلي جو چٽو ثبوت آهي اين اي 124 ۾ ڌانڌلي جي ثبوتن تي ٻڌل ڪتاب عمران خان وٽ پهچي چڪو آهي وزيراعظم وزيراعليٰ پنجاب ۽ وفاقي وزير اطلاعات تائين به هي پهچندو. جيڪڏهن انهن شخصيتن مان ڪوئي مون سان انهن ثبوتن تي مناظرو ڪرڻ گهري ٿو ته مان ڪنهن به وقت ڪنهن به هنڌ ڪرڻ لاءِ تيار آهيان ڇو ته هن ڪتاب ۾ ڏنل 227 سرٽيفڪيٽ ۾ ڌانڌلي جي تصديق صوبائي اليڪشن ڪميشن پنهنجي صحيحن سان پاڻ ڪري چڪو آهي ۽ انهن مان صرف 12 سرٽيفڪيٽس ۾ مبينه ڪامياب اميدوار شيخ روحيل اصغر جي وڪيل خالد اسحاق اعتراض ڪيو آهي. ڪيل 215 جي هو به تصديق ڪن ٿا اسان جي جاچ مطابق 264 پولنگ اسٽيشنن جي ٿيلن جي معائني ۾ هي ڳالهه آڏو آئي آهي ته 145 ٿيلن جون سيلون ٽٽن هيون ۽ 107 شروع کان ئي نه لڳايون ويون هيون باقي رهيل 119 ٺپو لڳل ٿيلن ۾ 82 جو رڪارڊ تلف ڪيو ويو آهي 38 اهڙا ٿيلا هئا جن تي شروع کان ٺپو نظر نه آيو پولنگ اسٽيشن 84 ۽ 221 جي ٿيلن ۾ فالتو پيپر مليا جڏهن ته 10 پولنگ اسٽيشن جي ٿيلن ۾ مليل ڪاغذن جو اليڪشن سان ڪوئي تعلق نه هو جنهن جي تصديق شيخ روحيل اصغر جي وڪيل پاڻ ڪئي 53 ٿيلن ۾ فارم 14 طلب ڪيو ويو 82 ٺپو لڳل ٿيلن ماڻ 57 فارم 15 ۽ 34 ڪائونٽر فائيل مفقود هو رٽرننگ آفيسر پاران ايڏو وڏو ۽ سنگين عمل ڪنهن مقتدر شخص جي حڪم تي ئي ٿي سگهي ٿو ۽ هي لاڳاپيل رٽرننگ آفيسر کان پڇا ڳاڇا کان پوءِ ئي واضح ٿي سگهي ٿو.

 

پيپلز پارٽي پيٽرول بحران تي قومي اسيمبلي ۾ تحريڪ التوا جمع ڪرائي ڇڏي

اسلام آباد (بيورو) پاڪستان پيپلز پارتي قومي اسيمبلي سيڪريٽريٽ ۾ ملڪ ۾ جاري پيٽرول بحران تي تحريڪ التوا جمع ڪرائي ڇڏي، قومي اسيمبلي سيڪريٽريٽ ۾ جمع ڪرايل تحريڪ التوا ۾ چيو ويو آهي ته پيٽرول بحران سبب عوام سخت مشڪلاتن جو شڪار آهي جڏهن ته حڪومت جو ڪم عوام کي رليف فراهم ڪرڻ هوندو آهي پر ان بحران سان عوام جي مشڪلاتن ۾ اضافو ٿيو آهي، متن ۾ چيو ويو آهي ته موجوده بحران جي ذميوار پيٽروليم، خزاني ۽ پاڻي ۽ بجلي واريون وزارتون آهن پر ذميوارن خلاف ڪارروائي بغير ئي 4 آفيسرن کي معطل ڪيو ويو قرارداد ۾ مطالبو ڪيو ويو آهي ته حڪومت ان بحران جي اصل ذميوار خلاف ڪارروائي ڪري ايوان ۾ وضاحت پيش ڪري ان کان علاوه عالمي منڊين ۾ تيل جي قيمت 50 ڊالر في بيرل کان به گهٽ ٿي آهي ان صورتحال ۾ حڪومت پيٽروليم مصنوعات جي قيمتن جي مد ۾ عوام کي وڌيڪ رليف ڏئي.

 

قوم دهشتگرديءَ جي لعنت ختم ڪرڻ لاءِ پرعزم آهي: چوڌري نثار

اسلام آباد (بيورو) وفاقي گهرو وزير چوڌري نثار چيو آهي ته دهشتگرديءَ خلاف قومي اتحاد مثالي آهي، دهشتگردن جي خاتمي لاءِ عالمي سطح تي ڪوششون ڪرڻ جي ضرورت آهي. اسلام آباد ۾ گڏيل قومن ۾ مقرر پاڪستان جي مسقتل نمائندي مليحا لوڌي گهرو وزير چوڌري نثار سان ملاقات ڪئي. ملاقات دوران ڳالهائيندي چوڌري نثار جو چوڻ هو ته قوم دهشتگرديءَ جي لعنت ختم ڪرڻ لاءِ پرعزم آهي. هن چيو ته ايڪشن پلان کي سمورين سياسي پارٽين توڙي سول سوسائٽي جي ڀرپور حمايت حاصل آهي ۽ ان ڏس ۾ قومي اتحاد بي مثال آهي. وفاقي گهرو وزير چوڌري نثار جو چوڻ هو ته دهشتگرديءَ خلاف عالمي سطح تي ڪوششون ورتيون وينديون .

 

اسحاق ڊار پيٽرول بحران کي حڪومت خلاف گهري سازش قرار ڏئي ڇڏيو

اسلام آباد(بيورو) خزاني واري وفاقي وزير اسحاق ڊار چيو آهي ته ايئن لڳي ٿو ته پيٽرول جو بحران حڪومت خلاف سازش آهي جنهن جو پتو لڳائڻ گهرجي اسلام آباد ۾ پريس ڪانفرنس دوران وفاقي خزاني واري وزير جو چوڻ هو ته پيٽرول بحران تي ڪيل ڳالهيون بي بنياد ۽ ڪوڙيون آهن پاڻي ۽ بجلي جي وزارت جي بلن جي ادائيگي اسان جي پهرين ترجيح آهي، خزاني واريوزارت تيل جي خريداري جي ذميوار ناهي، پي ايس او کي غير ذميواري به خزاني واري وزارت تي نه ٿي وجهي سگهجي، پيٽروليم بحران ۾ رقم جي فراهمي جو ڪوبه معاملو ناهي، خزاني واري وزارت پي ايس او جي هڪ روپئي جي به قرضي ناهي،هو مڃن ٿا ته ڪنهن به شعبي ۾ ڪنهن غفلت يا بدانتظامي جو ذميوار سڌو سنئون ان جو سربراهه هوندو آهي، پيٽرول جي بحران ۾ بدانتظامي ٿي آهي، تيل جي ڪمپنين تيل جو ذخيرو ناهي رکيو،  جن ادارن ذميواري پوري ناهي ڪئي انهن خلاف ڪارروائي ٿيڻ گهرجي، پيٽروليم وارو وزير ان بحران بابت سمورا رڪارڊ جمع ڪرائي رهيو آهي ايئن لڳي ٿو ته هن بحران ذريعي حڪومت خلاف گهري سازش ٿي آهي، جنهن جو جلد کان جلد پتو لڳائڻ گهرجي، اسحاق ڊار وڌيڪ چيو ته هن وقت بجلي جي مد ۾ قوم کي 480 ارب روپين جي سبسڊي ڏني پئي وڃي اسان کي پنهنجي خساري تي قابو آڻڻ پوندو، اسان کي ترقياتي منصوبا ختم ڪري سبسڊي ڏيڻ جي روش کي ختم ڪرڻو پوندو، بجلي جي سرڪلر ڊيٽ جي مد ۾ ڏنل رقم جو رڪارڊ موجود آهي ۽ ان جو آڊٽ به ٿي چڪو آهي، هن جو چوڻ هو ته جهانگير ترين طرفان لکيل خط هن کي جاپان ۾ مليو آهي تحريڪ انصاف جا اڳواڻ حقيقتن تي ٻڌل ڳالهه ڪن ته اسان کي جوڊيشل ڪميشن جوڙڻ ۾ ڪوبه مسئلو ناهي پر آئين ۽ قانون کان ٻاهر ڪنهن ڳالهه کي قبول نه ڪيو ويندو.

 

سينيٽ جي 52 سيٽن تي چونڊن جو شيڊول جاري، چونڊ 3 مارچ تي ٿيندي

اسلام آباد(بيورو) اليڪشن ڪميشن سينيٽ جي 52 سيٽن تي چونڊون 3 مارچ تي ڪرائڻ جو شيڊول جاري ڪري ڇڏيو، سينيٽ جي 52 ميمبر 11 مارچ تي رٽائرڊ ٿي ويندا جڏهن ته انهن سيٽن تي چونڊن لاءِ اليڪشن ڪميشن شيڊول جاري ڪري ڇڏيو شيڊول مطابق سينيٽ جي 52 سيٽن تي چونڊون 3 مارچ تي ٿينديون جڏهن ته اميدوارن جي نامزدگي ڪاغذن جي وصولي 12 ۽ 13 فيبروري تي ڪئي ويندي، اليڪشن ڪميشن مطابق اميدوار 25 فيبروري تائين پنهنجا درخواست فارم واپس وٺندي هٿ کڻي سگهن ٿا.

 

الطاف حسين هڪ ڀيرو ٻيهر ڪراچي ۾ مارشل لا جو مطالبو ڪري ڇڏيو

لنڊن (مانيٽرنگ ڊيسڪ) ايم ڪيو ايم جي سربراهه الطاف حسين چيو آهي ته ڪراچي ۾ هر ايندڙ ڏينهن تي ماڻهن جي مرڻ ۾ اضافو ٿي رهيو آهي، معصوم شهرين جي قتل عام ۾ اضافوٿي رهيو آهي، جڏهن ته سنڌ حڪومت امن امان قائم ڪرڻ ۾ ناڪام ٿي چڪي آهي، نجي ٽي وي سان ڳالهائيندي هن چيو ته اردو يونيورسٽي جي سامهون 2 ڄڻن کي قتل ڪيو ويو پر ڪير به پڇڻ وارو نه آهي الطاف حسين چيو ته آپريشن ضرب عضب ڪاميابي سان جار ي آهي، وزيراعظم شهرين جي جان ۽ مال جي تحفظ لاءِ سنڌ ۾ مارشل لا جو اعلان ڪري ۽ مارشل لاءِ صدر پاڪستان کي درخواست ڪري، مارشل نٿا هڻڻ چاهين ته شهرين کي هٿيارن جا لائسنس جاري ڪيا وڃن، هن چيو ته شهرين جي تحفظ لاءِ غيرمقبول فيصلا ڪرڻا پوندا. شهر ۾ ماڻهن مرڻ تي ڪير به جواب ڏيڻ لاءِ تيار ناهي. مون محلا ڪميٽيون بڻائڻ لاءِ چيو هو پر معلوم ٿيو آهي ته قانون لاڳو ڪندڙ ادارا انهن کي ڪم ڪرڻ کان روڪين ٿا ۽ تنگ ڪندا آهن. اها صورتحال ڳڻتي جوڳي آهي،

 

پيٽرول بحران حيران ڪندڙ آهي، حڪومت خاتمي لاءِ قدم کڻي: مولانا فضل الرحمان

اسلام آباد (بيورو) جمعيت علماءِ اسلام پاڪستان جي سربراهه مولانا فضل الرحمان ان ڳالهه تي زور ڏنو آهي ته حڪومت پيٽرول جو بحران ختم ڪرڻ لاءِ جلد قدم کڻي ته جئين عوام جون قطارون ختم ٿين  ۽ ملڪ نئين بحران مان نجات حاصل ڪري سگهي، فرانس ۾ گستاخ خاڪا ڇاپڻ جو اعلان مسلمانن جي جذبن سان کيڏڻ جي برابر آهي، گڏيل قومون ۽ عالمي ادارا ان بيان ۽ فيصلو جو نوٽيس وٺن، او آءِ سي کي هنگامي اجلاس سڏائي اهڙن واقعن کي روڪڻ لاءِ قدم کڻڻ گهرجن. اهڙن خيالن جو اظهار هن پارٽي اڳواڻن مولانا سائين عبدالڪريم هالجوي، مولانا محمد امجد خان، محمد اسلم غوري، صاحبزاده راشد محمود سومرو، انجنيئر عبدالرزاق عابد لاکو اسان ڳالهائيندي ڪيو، هن چيو ته ملڪ مان بحران ختم ڪرڻ لاءِ قدم کنيا وڃن، هن چيو ته پيٽرول جي قيتمن جي لاٿ سان عوام کي رليف جو عمل شروع ٿي ويو آهي پر ان ۾ تيزي جي ضرورت آهي، هن چيو ته پيٽرول جو بحران حيران ڪندڙ آهي، حڪومت بحران جو اصل حقيقتون قوم آڏو آڻي. .

 

پهرين فيبروري کان پيٽروليم مصنوعات جي قيمتن ۾ گهٽتائي جو امڪان

اسلام آباد (بيورو) ملڪ ۾ جاري پيٽرول بحران جي باوجود پهرين فيبروري کان پيٽروليم مصنوعات جي قيمتن ۾ وڌيڪ گهٽتائي جو امڪان آهي پيٽروليم مصنوعات جي قيمتن ۾ 11 روپيا في ليٽر گهٽتائي ٿي سگهي ٿي، ذريعن مطابق اوگرا پهرين فيبروري کان پيٽروليم مصنوعات ۾ گهٽتائي جي سمري تيار ڪري ورتي آهي، پيٽرول جي قيمت ۾ 8 روپيا 65 پئسا ۽ گاسليٽ جي قيمت ۾ 5 روپيا 28 پئسا في ليٽر تائين گهٽتائي جو امڪان آهي هاءِ اسپيڊ ڊيزل 7 روپيا 66 پئسا ۽ لائيٽ ڊيزل 7 روپيا 38 پئسا في ليٽر سستو ٿي سگهي ٿو، هاءِ آڪٽين جي قيمت ۾ 11 روپيا في ليٽر تائين گهٽتائي جو امڪان آهي.

 

اتر وزيرستان ۾ امريڪي جاسوس جهاز جي حملي ۾ 6 ڄڻا مارجي ويا، 6 زخمي

اُتر وزيرستان (مانيٽرنگ ڊيسڪ) اتروزيرستان جي شوال واري علائقي ۾ امريڪي جاسوس جهاز جي حملي ۾ 6 ڄڻا مارجي ويا ۽ 6 زخمي ٿي پيا ، حملي کانپوءِ مختلف علائقن ۾ اڏمون جاري آهن. سڪيورٽي ذڙيعن موجب، امريڪي جاسوس جهازن شاهي خيل واري علائقي ۾ هڪ گهر تي 2 ميزائل فائر ڪيا، جنهن ۾ 6 ڄڻا مارجي ويا ۽ 6 زخمي ٿي پيا. سڪيورٽي ذريعن موجب، جاسوس جهازن ڄاڻايل علائقي مٿان اڌ ڪلاڪ تائين اڏامن بعد هڪ گهر تي 2 ميزائل فائر ڪيا. سڪيورٽي ذريعن موجب، جاسوس جهاز جي حملي کانپوءِ جاسوس جهاز جون علائقي ۾ اڏامون جاري آهن، جنهن سبب رهواسين ۾ خوف ڇائنجي ويو آهي. ياد رهي ڪجهه ڏينهن اڳ شوال واري ئي علائقي ۾ هڪ گهر تي حملي ۾ 8 ڄڻا مارجي ويا هئا. .