تازيون خبرون

Daily Archives: January 19, 2015

پئٽرول بحران جي ذميوارن کي نه ڇڏينداسين: نواز شريف

اسلام آباد (بيورو) وزيراعظم نوازشريف چيو آهي ته پيٽرول بحران جي ذميوارن کي نه ڇڏيو ويندون جيڪڏهن وزيرن سميت ڪوبه  ذميوار هوندو ته اُن کي نه ڇڏيو ويندو. رائيونڊ ۾ پنجاب جي وڏي وزير شهباز شريف وزيراعظم سان ملاقات ڪئي. ملاقات دوران ٻنهي اڳواڻن ملڪ ۾ امن امان جي صورتحال ۽ دهشتگردي خلاف قومي ايڪشن پلان تي عملدرآمد جي حوالي سان خيالن جي ڏي وٺ ڪئي. انهيءَ موقعي تي پنجاب ۾ هلندڙ پيٽرول بحران ۽ اُن جي جلد کان جلد خاتمي لاءِ هنگامي قدمن تي به غور ڪيوويو. وزيراعظم جو چوڻ هو ته حڪومت کي پيٽرول تي سخت ڳڻتي آهي. پيٽرول بحران جي ذميوارن کي لاڳاپيل ادارن ۾ رهڻ جو ڪوبه حق ناهي. وزيرن سميت جيڪڏهن ڪوبه اُن جو ذميوار ٿيو ته اُن خلاف ڪارروائي ويندي، ناڻي وارو وزير اسحاق ڊار ۽ پيٽرول جا لاڳاپيل ادارن جون اختياريون اچي بريفنگ ڏين. پيٽرول جي سپلائي وڌائي اُن جي فراهمي کي يقيني بڻايو وڃي ۽ اهڙا قدم کنيا وڃن جنهن سان اهڙي صورتحال پيدا نه ٿئي. ٻئي پاسي وزيراعظم نواز شريف ملڪ ۾ پيٽرول جي بحران جو نوٽيس وٺندي پيٽروليم واري سيڪريٽريءَ سميت چئن عملدارن کي معطل ڪري ڇڏيو. سعودي عرب مان واپسي تي وزيراعظم نواز شريف جي صدارت هيٺ لاهور ايئرپورٽ تي هنگامي اجلاس ٿيو. اجلاس ۾ پيٽرول جي کوٽ سبب پيدا ٿيل صورتحال تي غور ويچار ڪيو ويو. اجلاس دوران وزيراعظم پيٽروليم واري سيڪريٽري عابد سعيد،ايڊيشنل سيڪريٽري پيٽروليم نعيم ملڪ، ڊي جي آئل محمد اعظم ۽ پي ايس او جي ايم ڊي امجد جنجوعا جي معطلي جا حڪم جاري ڪيا. ميان نواز شريف پيٽروليم وزارت جي اختيارين کي تيل جي صورتحال فوري طور بهتر بڻائڻ ۽ صوبن کي پيٽرول بليڪ تي وڪرو ڪندڙن خلاف ڪارروائي جو حڪم ڏنو. اجلاس دوران وزيراعظم لاڳاپيل اختيارين کي هدايت ڪئي ته پيٽرول جي کپت ۽ رسد جو توازن برقرار رکيو وڃي.

 

وڏي وزير ڪيڊٽ ڪاليج خيرپور جو سنگِ بنياد رکي ڇڏيو ، 2 هزار بند اسڪول کولرائڻ جو اعلان

خيرپور(ڊ.ر) سنڌ جي وڏي وزير سيد قائم علي شاهه چيو آهي ته صوبائي حڪومت تعليم جي شعبي اندر بهتري آڻي صوبي جي عوام کي معياري تعليم جي فراهمي لاءِ وڌ ۾ وڌ قدم کڻي رهي آهي جڏهن ته استادن کي ميرٽ تي ڀرتي ڪري ٻن سالن جي لاءِ پڙهائڻ جي تربيت پڻ ڏني پئي وڃي. هن اهڙو اظهار خيرپور جي ڳوٺ بگو ميتلو ڀرسان 59 ڪروڙ 30 لک روپين جي لاڳت سان تعمير ٿيندڙ شهيد بينظير ڀُٽو ڪيڊٽ ڪاليج خيرپور جو پيڙهه جو پٿر رکڻ واري تقريب کي خطاب ڪندي ڪيو . هن چيو ته صوبائي حڪومت پاران تعليم جي شعبي جي ترقي جي سلسلي ۾ تعليم کاتي جي بجيٽ کي وڌائي ماسترن جي پگهارن ۾ پڻ ٻيڻ ۽ ٽيڻ تي اضافو ڪيو ويو آهي جڏهن ته صوبي اندر 11 نيون يونيورسٽيون قائم ڪيون ڪيون ويون آهن. وزير اعلى چيو ته ماضي جي حُڪمرانن پاران تعليم کاتي ڏانهن ڪو به ڌيان نه ڏنو ويو جنهن جي نتيجي ۾ صوبي جا 7 هزار اسڪول بند پيل هئا ۽ مئٽرڪ پاس ڪرڻ کانپوءِ 50 سيڪڙو شاگرد ڪاليج تائين ۽ ڪاليج کان وري يونيورسٽي جي تعليم تائين پهچندڙ شاگردن جو تعداد تمام گهڻو گهٽجي ويندو هو. جڏهن ته موجوده حڪومت پاران تعليم جي شعبي ڏانهن خاص ڌيان ڏيندي صوبي جي عوام کي معياري تعليم جي فراهمي لاءِ هر ممڪن ڪوششون ورتيون پيون وڃن. 7 هزار بند پيل اسڪولن مان 5 هزار اسڪولن کي ٻيهر کولرايو ويو آهي جڏهن ته باقي ٻه هزار بند پيل اسڪولن کي پڻ جلد کولرايو ويندو. هن چيو ته ماسترن جي ڀرتي جي سلسلي ۾ ٻاهرين اداري کان ٽيسٽ ڪرائي ميرٽ تي ماستر ڀرتي ڪيا ويا ۽ مستقبل ۾ ميرٽ تي ڀرتي ڪيا ويندا ۽ استادن جي تربيتي ادارن کي پڻ ٻيهر فعال ڪيو ويندو جن ۾ استادن جي ٻن سالن جي لاءِ تربيت پڻ ڪئي ويندي. هن چيو ته سنڌ جا ماڻهو باشعور آهن ۽ کين ماضي ۾ موقعن جي کوٽ ڪري سندن ذهانت منظر عام تي نه اچي سگهي پر موجوده حڪومت پاران صوبي جي هوشيار شاگردن کي پنهنجي ذهانت مڃرائڻ جي لاءِ هر ممڪن موقعا فراهم ڪيا پيا وڃن ان سلسلي ۾ تازو ڪيڊٽ ڪاليج پيٽارو جي 11 شاگردن ملڪي سطح جي امتحان جي مقابلي ۾ اي ون گريڊ حاصل ڪري پوزيشنون حاصل ڪيون. هن چيو ته تعمير ٿيندڙ شهيد بنظير ڀُٽو ڪيڊٽ ڪاليج خيرپور هن علائقي جو مثالي ادارو ثابت ٿيندو. هي ادارو پارٽي ڪو چيئرمين آصف علي خان زرداري پاران خيرپور واسين جي لاءِ هڪ بهترين تحفو آهي. جنهن مان نه صرف خيرپور پر علائقي جي مختلف ضلعن جي ماڻهن کي معياري تعيلم جي فراهمي جا موقعا ملندا ۽ علائقي ۾ معاشي ۽ سماجي خوشحالي ايندي. تعمير ٿيندڙ ڪيڊٽ ڪاليج جي بهتر انتظامن جي سلسلي ۾ آرمي جي رٽائرڊ ڪرنل تنوير حيدر کي پروجيڪٽ ڊائريڪٽر مقرر ڪيو ويو آهي جيڪو مستقبل ۾ هن اداري جو پرنسپال هوندو ۽ آرمي آفيسرن جي نگراني ۾ شاگردن کي پڙهائي جو بهتر ماحول فراهم ٿيندو ۽ کين نظم و ضبط جي سلسلي ۾ پڻ تربيت حاصل ٿيندي. وڏي وزير چيو ته خيرپور جي نارا ، فيض گنج توڙي ٻين تعلقن جي عوام کي خيرپور ۾ قائم ٿيل توڙي قائم ٿيندڙ ادارن مان سهولتون حاصل ٿينديون. تقريب ۾ شهيد بينظير ڀُٽو ڪيڊٽ ڪاليج خيرپور جي پروجيڪٽ ڊائريڪٽر ڪرنل رٽائرڊ تنوير حيدر پاران تعمير ٿيندڙ ڪيڊٽ ڪاليج جي سلسلي ۾ بريفنگ ڏيندي ٻُڌايو ته 59 ڪروڙ 30 لک روپين جي لاڳت سان تيار ٿيندڙ هن اداري ۾ تعليم جي فراهمي جي لاءِ مختلف جديد سهولتون فراهم ڪيون وينديون جن ۾ هاسٽل، سائينٽفڪ ليبارٽريون، ڪمپيوٽر ليب، توڙي راندين جا گرائونڊ ۽ ٻيو انفرا اسٽرڪچر پڻ تعمير ڪيو ويندو. هن وڌيڪ چيو ته شهيد بينظير ڀُٽو ڪيڊٽ ڪاليج جو ترقياتي ڪم 18 مهينن اندر مڪمل ڪيو ويندو. ان کان اڳ سنڌ جي وڏي وزير سيد قائم علي شاهه 6 ڪروڙ 50 لک روپين جي جي لاڳت سان لقمان سرڪي موڙ کان روهڙي ڪئنال تائين روڊ جي ترقياتي ڪم جو افتتاح ڪيو جڏهن ته شاهه حُسين باءِ پاس چوڪ وٽ نئين نيشنل هاءِ وي تي 88 ڪروڙ 40 لک روپين جي لاڳت سان تعمير ٿيندڙ اوور هيڊ برج جو سنگِ بنياد پڻ رکيو 3.9 ڪلوميٽر جي ڊيگهه رکندڙ هن پُل جو ترقياتي ڪم پڻ 18 مهينن اندر مڪمل ڪيو ويندو. ان موقعي تي وڏي وزير سان سندس پوليٽيڪل سيڪريٽري لعل بخش منگي، ڪمشنر سکر ڊويزن محمد عباس بلوچ، ڊي آءِ جي پوليس سکر ڊاڪٽر سائين رکيو ميراڻي، ڊپٽي ڪمشنر خيرپور منور علي مٺاڻي، ايس ايس پي خيرپور ناصر آفتاب خان ، پي ايس مظهر علي مڱڻهار ورڪس اينڊ سروسز کاتي جا لاڳاپيل عملدار ۽ وڏي انگ ۾ پارٽي عهديدار ساڻس گڏ هئا.

 

چارئي حلقا کلي چڪا ، ڪپتان کي هر تڪ ۾ ناڪامي نصيب ٿي: پرويز رشيد

اسلام آباد (بيورو) وفاقي وزير اطلاعات ۽ نشريات سينيٽر پرويز رشيد چيو آهي ته 4 تڪ کلي چڪا آهن، عمران خان کي هر تڪ ۾ ناڪامي ڏسڻي پئي، ڌرڻي کان ڌرڻا ڪنوينشن جو سفر ڪوڙ جي شڪست آهي، وقت ڪوڙ ڳالهائڻ ۽ سياست جو نه آهي، دهشتگردي خلاف ڪجهه ڪري ڏيکارڻ جو آهي، پاڪستان تحريڪ انصاف جي ڌرڻا ڪنويشن تي پنهنجي رد عمل جو اظهار ڪندي هن چيو ته عمران خان جي مطالبي تي 4 تڪ کلي چڪا آهن، هر تڪ ۾ عمران خان کي ناڪامي ڏسڻي پئي، پرويز رشيد چيو ته دهشتگردي خلاف جنگ ۾ ڪي پي ڪي جي ڪارڪردگي ڪهڙي رهي آهي، عمران خان جواب ڏئي.

 

سنڌ کي اين ايف سي ايوارڊ تحت جائز حصو نه پيو ڏنو وڃي :مراد علي شاهه

ڪراچي (م.ڊ) سنڌ جي ناڻي واري وزير مراد علي شاهه چيو آهي ته وفاق کي سنڌ جا وسيلا ڦٻائڻ نه ڏنا ويندا، ورڇ جوڳي پول جي رهيل رقم وٺڻ لاءِ جلد سپريم ڪورٽ سان رابطو ڪيو ويندو. ناڻي واري صوبائي وزير سيد مراد علي شاهه ڳوٺ واهڙ پهچي پنهنجي والد ۽ اڳوڻي وڏي وزير سيد عبدالله شاهه جي مزار تي حاضري ڀرڻ بعد ميڊيا سان ڳالهائيندي هن چيو ته سنڌ کي اين ايف سي ايوارڊ تحت جائز حصو نه پيو ڏنو وڃي. هن چيو ته پ پ سرڪار سنڌ جي عوام جا مسئلا ترجيحي بنيادن تي حل ڪرڻ لاءِ پاڻ پتوڙي رهي آهي،شهيد بينظير ڀٽو جي مشن تحت هزارين بيروزگارن کي روزگار فراهم ڪيو پيو وڃي. صوبائي وزير سيد مراد علي شاهه وڌيڪ چيو ته سيوهڻ کي سنڌ جو ماڊرن تعلقو بڻايو ويندو. ان موقعي تي امان الله شاهاڻي، سيد محمد شاهه، سيد حسنين شاهه، غلام حسين هاليپوٽو، نبن خان لنڊ، سڪندر راهپوٽو ۽ ٻيا پڻ موجود هئا.

 

ڪوئي غلط فهمي ۾ نه رهي، موقف تان پوئتي نه هٽنداسين، جوڊيشل ڪميشن نه ٺهيو ته پاڪستان جو هر شهر بند ڪنداسين: عمران خان

اسلام آباد (بيورو) پاڪستان تحريڪ انصاف جي سربراهه عمران خان واضح ڪيو آهي ته ڪير غلط فهمي ۾ نه رهي موقف تان پوئتي نه هٽينداسين، جوڊيشل ڪميشن نه ٺهيو ته پاڪستان ج هر شهر بند ڪري سگهون ٿا، نئون خيبرپختونخواهه ٺاهڻ لاءِ پورو زور لڳائينداسين، راڻا ثناءُ الله 2015 ۾ جيل ۾ هوندو، ڪنهن ڏکئي وقت ۾ ساٿ ڏنو ۽ ڪنهن ساٿ ڇڏيو هو مون کي سڀ ياد آهي، حڪومت عوام کي پهريائين مشڪلات ۾ وجهي ڇڏيو آهي، عوام لاءِ اهنج پيدا نه ڪنداسين،قوم کي ورهائڻ نٿا چاهيون، دهشتگردي خلاف جنگ ۾ حڪومت سان مڪمل تعاون ڪنداسين، ڪنهن قسم جي رنڊڪ پيدا نه ڪنداسين، قبائلي علائقن ۾ امن جي چاٻي قبائلي ماڻهن وٽ آهي، قبائلي علائقن لاءِ نئون قانون آڻينداسين، آچر تي ڌرڻا ڪنويشن کي خطاب ڪندي عمران خان چيو ته اسان کي چيو ويو ته اسڪرپٽ لکيل آهي ۽ ان مطابق هلي رهيا آهيون، هن چيو ته آئين اسٽائين به اهڙي اسڪرپٽ نٿو لکي سگهي، 126 ڏينهن تائين ماڻهو مسلسل ايندا رهيا ۽ جنهن شهر ۾ ماڻهن کي گهرايو آيا، ڌرڻن ۾ شرڪت تي عورتن ۽ شهرين جو ٿورائتو آهيان، ڪيترن ئي علائقن ۾ عورتون مردن کان وڌيڪ هيون، جڏهن هڪ عورت جاڳندي آهي ته پورو گهر جاڳندو آهي، تبديل تڏهن ايندي آهي جڏهن نوجوان ۽ عورتون سجاڳ ٿينديون آهن، روئيداد هر ڌرڻي ۾ پهتو جنهن تي ان جو مان ٿورائتو آهيان، ميڊيا کي خراج تحسين پيش ڪريان ٿو، ڪوريج دوران صحافين جي زندگي کي سڀ کان وڌيڪ خطرو آهي، هن پيلٽ فارم ورڪنگ جرنسلٽس جو آواز اٿاريون ٿا ۽ انهن کي حق ڏنا وڃن، هن چيو ته پشاور سانحي ڏينهن اسپتال پهتس، زخمين کي ڏسي گهڻي تڪليف ٿي، ٻارڙن کي سوچي سمجهي شهيد ڪيو ويو، 16 ڊسمبر کانپوءِ منهنجو ذهن نه پيو مڃي ته هيڏي سانحي کانپوءِ احتجاج ڪيون، شهيد ٻارڙن جي والدين تي جيڪو ڪجهه گذريو آهي ان کي گهٽائڻ نهايت مشڪل آهي، اسان کي پنهنجن ٻارڙن جي والدين جو ڏک گهٽائڻو آهي، هر حال ۾ گهٽائڻ گهرجي، صوبائي حڪومت کي هدايت ڪئي ته هو شهيد ٻارڙن جي والدين سان ملي ۽ مان ٻيهر والدين سان ملندو، هن چيو ته اهو ڪوئي سمجهي ٿو ته اسان پنهنجي موقف تان پوئتي هٽي ويا آهيون، اهو غلط فهمي ۾ نه رهي، هن چيو ته اسان جي جوانن کي شهيد ڪيو ويو، جهلم ۾ گلو بٽن گوليون هلايون، اسان زخمي نوجوان نعمان جو بهتر کان بهتر علاج ڪرائينداسين، هن چيو ته جهلم ۾ 6 نوجوانن تي گوليون هلايون ويون، فيصل آباد ۾ حق نواز کي شهيد ڪيو ويو، ٻنهي جي قاتلن کي جيل ۾ نه وڌو ويو، اسان قاتلن کي جيل ۾ وجهينداسين، هن چيو ته فيصل آباد ۾ حق نواز کي گولي هڻندي ڏٺو ويو، واقعي ۾ راڻا ثناءُ الله کي ڪنهن به نه پڪڙيو پر اسان جي ماڻهن تي شاهدي وجهڻ لاءِ پريشر وڌو پيو وڃي، پاڪستان جي جمهوريت لاءِ نڪتا هئاسين، اسان کي ڌرڻي مان سڀ کان وڏو فائدو اهو ٿيو جو قوم سجاڳ ٿي وئي، هن چيو ته جمهوريت ۾ حڪمران پنهنجي عوام تي پيسو خرچ ڪن ٿا، جمهوريت تي ميٽرول تي تمام گهڻي رقم خرچ نٿي ڪئي وڃي، هن چيو ته عورتن جي حقن لاءِ اين جي اوز ٺهيل هيون پر تحريڪ انصاف عورتن کي مضبوط ڪيو ۽ هنن فيصلو ڪيو ته اسان به نئون پاڪستان ٺاهڻ ۾ ڪردار ادا ڪنديوسين، الله جو شڪر آهي جو قوم جاڳي پئي آهي، هن چيو ته پاڪستان جو انصاف جو نظام ڪم نه پيو ڪري، 30 آگسٽ تي پوليس کي غلط استعمال ڪيو ويو، ان دوران ڪيترن ئي اهلڪارن عوام تي تشدد کان انڪار ڪيو.

 

گڏيل قومن جي مستقل نمائنده ڊاڪٽر ملحيا لوڌي جي سراح الحق سان ملاقات

اسلام آباد (بيورو) جماعت اسلامي گڏيل قومن ۾ پاڪستان جي نامزد مستقل نمائندي ملحيا لوڌي تي زور ڏنو آهي ته گڏيل قومن ۾ ڪشمير مسئلو ۽ فلسطين کي اجاگر ڪرڻ تي زور ڏئي، پاڪستاني نمائندي جي حيثيت سان عالمي برادري تي توهين رسالت صلم جي نازڪ مسئلي جي اهميت اجاگر ڪري، گڏيل قومون پيغمبر سڳورن ۽ آسماني ڪتابن جي احترام لاءِ قانونسازي ڪري، ملحيا لوڌي ۽ نائب امير جماعت اسلامي ميان محمد اسلم جي رهائشگاهه تي ملاقات ٿي، سراج الحق گڏيل قومن ۾ ڪشمير ۽ فلسطين مسئلو اجاگر ڪرڻ تي زور ڏنو.

 

پيٽرول جي بحران تي قوم کان معافي گهرون ٿا: خواجه سعد رفيق

لاهور (م.ڊ) ريلوي جي وفاقي وزير خواجه سعد رفيق پيٽرول جي بحران تي قوم کان معافي وٺندي چيو آهي ته تسليم ڪريون ٿا ته اسان کان وڏي غلطي ۽ ڪوتاهي ٿي آهي، پيٽرول جون قيمتون گهٽجڻ کانپوءِ طلب وڌڻ جو لاڳاپيل وزارت کي اندازو هئڻ گهرجي ها، ريلوي وٽ ڊيزل جي ڪا کوٽ نه آهي ۽ اسان وٽ 14 ڏينهن جو ذخيرو موجود آهي جيڪو انشاالله 30 ڏينهن تائين ٿي ويندو، اسان جوڊيشل ڪميشن ناهيون ڀڳا، اڃا اين اي 122 جو فيصلو نه آيو آهي، عمران خان پنهنجو فيصلو ٻڌائي ڇڏيو آهي، چوڌري پرويز الاهي جي نالائقي سبب باب پاڪستان منصوبي جي مد ۾ عوام جو هڪ سئو 10ڪروڙ رپيا زمين ۾ دفن ٿي ويو ۽ هي منصوبو نئين سر شروع ڪيو آهي، اهڙن خيالن جو اظهار هن گذريل ڏينهن سيون اپ فاٽڪ کان فيروز پل روڊ تائين روڊ جي افتتاح جي موقعي تي خطاب ڪندي ڪيو، هن ٻڌايو ته هي روڊ 10 ڪروڙ رپين جو لاڳت سان 3 مهينن ۾ مڪمل ڪيو ويندو جنهن سان نه صرف ويجهن آبادين کي سهولتون مهيا ٿينديون پر والٽن روڊ تي ٽريفڪ جو دٻاءَ گهٽ ٿي ويندو، هن ٻڌايو ته باب پاڪستان جو عظيم منصوبو هن سال شروع ٿيندو، اسان ڪيترن ئي سالن جي محنت کانپوءِ اهو ڇڏائڻ ۾ ڪامياب ٿيا آهيون، هن جو ٽرسٽ ٺهي ويو آهي، وزيراعليٰ ان جو چيئرمين ۽ مان وائيس چيئرمين آهيان، وزيراعليٰ خاص دلچسپي وٺي رهيو آهي، اسان هن منصوبي کي نئين سر ڊزائين ڪيو آهي.

 

پي آءِ اي کي نئين دلي آفيس بند ڪرڻ ۽ عملي کي ڀارت ڇڏڻ جو حڪم

نئين دلي (م.ڊ) ڀارتي اختيارين نئين دهلي ۾ پاڪستان انٽرنيشنل ايئرلائنز جي آفيس ۽ اختيارين تي چڙهائي ڪري ڇڏي ۽ حڪم جاري ڪري ڇڏيو ته دلي ۾ پي آءِ اي آفيس نه صرف فوري طور تي بند ڪئي وڃي پر مينيجر سعيد احمد به فوري وطر تي دلي ڇڏي ڏئي، دلي ۾ پي آءِ اي جي آفيس بند ڪئي وڃي، ڀارتي اختيارين پي آءِ ي کي نوٽيس موڪلي ڇڏيو، اسٽيشن مينيجر سعيد احمد کي فوري طور تي دلي ڇڏڻ جو حڪم ڏنو، پاڪستاني اسٽاف جي ويزائن ۾ واڌ کان انڪار ڪيو ويو، ڀارتي اختيارين هي قدم پي آءِ اي تي دلي ۾ غير قانوني طور تي فليٽ خريدڻ جا الزام لڳائي کنيا آهن، جڏهن ته حيقيت ۾ فليٽ ۽ آفيسن جو معاملو اڃان عدالت ۾ آهي ۽ پي آءِ اي اختيارين مطابق سموري خريداري ڀارتي قاعدن ۽ ضابطن تحت ڪئي وئي آهي معاملو هي آهي هت پي آءِ 2005ع ۾ نئين دلي ۾ کمبا روڊ تي 4 فليٽ خريد ڪيا هئا جن ۾ پي آءِ اي جي آفيس به شامل هئي، 2005ع ۾ خريد ڪيل انهن فليٽن تي ڀارتي اختيارين گذرلي سال پي آءِ اي کي نوٽيس موڪليو ته پاڪستاني ادارا فليٽن جي خريداري ۾ ڀارتي قاعدن جي پاسداري نه ڪئي ۽ ان ئي سبب هي خريداري غير قانوني ٿي وئي آهي پي آءِ اي نومبر 2014ع ۾ ان ليگل نوٽيس جو جواب ڏنو جنهن ۾ چيو ويو ته هي پراپرٽي خريد ڪرڻ وقت 2005ع ۾ ڀارتي اختيارين کان ڪليئرنس ملي هئي سمورا قائدا پورا ڪيا ويا ۽ سٽي بينڪ ذريعي ادائگي ڪئي وئي، هاڻ هي معاملو عدالت ۾ آهي پر ڀارتي اختيارين کان فيصلو اچڻ تائين صبر نه ٿيو ۽ هنن پي آءِ اي جي آيس ۽ عملي تي چڙهائي ڪري ڏني ذريعن مطابق پي آءِ اي جي اسٽيشن مينيجر سعيد احمد کي حراسان به ڪيو ويو ۽ عملي کي به چيو ويو ته انهن کي هتي نه رهڻ ڏنو ويندو ذريعن مطابق ڀارتي اختياريون پرڏيهي سيڪريٽري جي سطح تي ٿيندڙ ڳالهيون ملتوي ٿيڻ کانپوءِ دلي ۾ پي آءِ اي جي آفيس پويان پيل آهن، هن وقت هفتيوار 2 اڏامون لاهور کان دلي لاءِ ويندوين آحن جيڪڏهن هي آپريشن بند ٿيو ته مسافرن کي واهگا بارڊر ذريعي ئي وڃڻو پوندو.

 

فرانسيسي رسالي پاران گستا خ خاڪا شايع ڪرڻ خلاف سنڌ جي مختلف شهرن ۾ احتجاجي مظاهرا، ڌرڻا

ڪراچي (نمائندن وٽان) فرانسيسي رسالي پاران گستا خ خاڪا شايع ڪرڻ خلاف سنڌ جي مختلف شهرن ۾ احتجاجي ريليون ڪڍي ڌرڻا هنيا پيا وڃن. نوابشاھه ۾ مولانا محمد شريف لغاري،سيد غلام علي شاھه،محمد حسن چانڊئي،مولانا محمد عالم مري، مولانا محمد صالح شر ۽ ممتاز سيال جي اڳواڻي ۾ شيعه عـُلماءِ ڪائونسل پاران ريلي ڪڍي پريس ڪلب آڏو احتجاجي مظاهرو ڪيو ويو. شڪارپور جماعت اھلسنت پاران مولوي حبيب الرحمان قادري جي اڳواڻي ۾ ڪارڪنن مدرسه غوثيه جيلاني کان پريس ڪلب تائين احتجاجي ريلي ڪڍي نعريبازي ڪئي وئي. خيرپور ۾ جميت علماءِ اسلام جي سڏ تي مولانا عبدالله عباسي،مولانا مفتي اصغر علي آرائين ۽ مولانا پريل شاهه‎ جي اڳواڻي ۾ حماديه مدرسي اسٽيشن روڊ کان پـَنجگـُلا چوڪ تائين ريلي ڪڍي وئي. تنگواڻي ۾ جماعت اهلسنت جي اڳواڻ مولوي اڪرم لاشاري،فقير محمد عارف، نور محمد قادري ۽ نظر محمد ڪرمي جي اڳواڻي ۾ احتجاج ريلي ڪڍي نعريبازي ڪئي. مختلف شهرن ۾ احتجاجي مظاهرن ۽ ريلين کي خطاب ڪندي اڳواڻن چيو ته عالمي سازش تحت فرانسيسي رسالي ۾ گستاخ خاڪا شايع ڪري مسلم دنيا کي چڙ ڏياري وئي آهي. ھنن چيو ته اسلام مخالف عـَنصرن ،مسلمانن جي جذبن سان کيڏڻ جي ڪوشش ڪئي آھي،جيڪو عمل برداشت جوڳو ناهي. اڳواڻن چتاءُ ڏنو ته گستاخ خاڪا شايع ڪرڻ جهڙيون ڪريل حرڪتون بند نه ڪيون ويون ته سڄي دنيا جو امن خراب ٿي ويندو.

 

ڪراچي ۾ دهشتگردي تيز، 24 ڪلاڪن دوران 5 پوليس اهلڪار شهيد

ڪراچي(اسٽاف رپورٽر) ڪراچي ۾ هڪڀيرو ٻيهر پوليس دهشتگردن جي نشاني تي اچي وئي، هٿياربندن وڌيڪ ٻن اهلڪارن کي فائرنگ ڪري قتل ڪري ڇڏيو، رات کان شهيد ٿي ويل اهلڪارن جو انگ 5 ٿي ويو، مجاهد ڪالوني مان حساس ادارن ٻن دهشتگردن کي گرفتار ڪري ورتو. ناظم آباد 3 نمبر ۾ نور امام بارگاهه ڀرسان موٽرسائيڪل سوار هٿياربندن گشت ڪندڙ پوليس تي فائرنگ ڪري ڏني جنهن جي نتيجي ۾ 2 اهلڪار غفور ۽ فاروق ٿڏي تي شهيد ٿي ويا. پوليس ٻنهي شهيد اهلڪارن جا مڙهه عباسي شهيد اسپتال منتقل ڪيا، پوليس جو چوڻ آهي ته ٻنهي اهلڪارن کي موٽرسائيڪل سوار هٿياربندن گشت دوران نشانو بڻايو.. هوڏانهن، لياري جي علائقي موسيٰ لين ۾ پوليس چوڪي تي موٽر سائيڪل سوار هٿياربندن فائرنگ ڪري ڏني، جنهن جي نتيجي ۾ 2 اهلڪار شهيد ٿي ويا. شهيد پوليس اهلڪارن جا مڙهه اسپتال منتقل ڪيا ويا، جتي شهيد ٿيل ٻنهي اهلڪارن جي سڃاڻپ سعيد ۽ نياز نالي طور ٿي. ملير هالٽ واري علائقي ۾ هٿياربندن فائرنگ ڪري ڏني، جنهن جي نتيجي ۾ هڪ ٽرئفڪ پوليس اهلڪار ڏوڪري واسي جاويد جروار شهيد ٿي ويو. رات کان شهيد ٿي ويل اهلڪارن جو انگ وڌي 5 ٿي ويو. هوڏانهن، ناظم آباد جي مجاهد ڪالوني ۾ حساس ادارن ڪارروائي ڪري پابندي مڙهيل تنظيم جي ٻن دهشتگرد کي گرفتار ڪري ورتو آهي، جن وٽان وڏي انگ ۾ هٿيار هٿ آيا آهن. . ياد رهي ته گذريل رات کان هينئر  تائين 4 پوليس اهلڪار مارجي چڪا آهن جڏهن ته هلندڙ مهيني دهشتگردن جو نشانو بڻجندڙ اهلڪارن جو تعداد 18 ٿي ويو آهي.