تازيون خبرون

Daily Archives: January 16, 2015

وزيراعظم جي سعودي ولي عهد سان ملاقات، ٻه طرفي لاڳاپن تي ڳالهيون

اسلام آباد/رياض(م.ڊ) وزيراعظم ميان نواز شريف ٻن ڏينهن جي دوري تي سعودي عرب پهچي ويو، وزيراعظم نواز شريف سعودي ولي عهد شزادي سلمان بن عبدالعزيز سان ملاقات ڪئي، ان ملاقات ۾ پاڪستان ۽ سعودي عرب وچ ۾ مختلف شعبن ۾ تعاون تي خيالن جي ڏي وٺ ڪئي وئي وزيراعظم نواز شريف سعودي عرب جي 2 ڏينهن واري دوري تي اڄ رياض پهتو وزيراعظم محمد نواز شريف سعودي ولي عهد شهزادي سلمان بن عبدالعزيز سان ملاقات ڪئي، هن خادم الحرمين شريفين شاهه عبدالله جي خيريت بابت پڇيو ۽ پاڪستاني عوام طرفان ان جي صحتيابي لاءِ دعا به پهچائي، ان ملاقات ۾ پرڏيهي معاملن بابت صلاحڪار طارق فاطمي، پاڪستان جو سفير منظور الحق، سعودي پرڏيهي وزير ۽ ڪابينا جا وزير ۽ ميمبر به موجود هئا، ان ملاقات دوران ٻه طرفن لاڳاپن ۽ گڏيل دلچسپي جي معاملن، علائقي مسئلن تي به ڳالهه ٻولهه ٿي. وزير اعظم نواز شريف جو سعودي عرب پهچڻ تي شاندار استقبال ڪيو ويو، وزير اعظم نواز شريف سعودي عرب ۾ عمري جي سهادت حاصل ڪندو ۽ حضور صلي الله واله وسلم جن جي روزي مبارڪ تي حاضري به ڀريندو. ذريعن موجب وزير اعظم نواز شريف ٻن ڏينهن جي دوري دوران سعودي ولي عهد ۽ ٻي سياسي قيادت سان  پڻ ملاقاتون ڪندو. سعودي مان واپسي بعد نواز شريف 19 جنوري تي هڪ ڏينهن جي دوري تي  ڪراچي پهچي گورنر هائوس ۾ قومي ايڪشن پلان  بابت رٿيل اجلاس جي صدارت ڪندو. اجلاس ۾ سنڌ جو وڏو وزير سيد قائم علي شاهه ۽ گورنر عشرت العباد سميت عسڪري قيادت جا اعليٰ عملدار شرڪت ڪندا. وزيراعظم جي ڪراچي دوري سبب 19 جنوري تي رٿيل سنڌ اسيمبلي جو اجلاس ملتوي ڪيو ويو، جيڪو هاڻ 21 جنوري تي ٿيندو

 

بلوچستان ۾ دهشتگردي کي پاڙيسري ملڪن جي مدد حاصل آهي: پاڪ فوج

لنڊن(م.ڊ) ڊي جي آءِ ايس پي آر ميجر جنرل عاصم سليم باجوه لنڊن ۾ بريفنگ ڏيندي چيو آهي ته حڪومت دهشتگردن سان ڳالهين ذريعي فائدو حاصل ڪرڻ جي ڪوشش ڪئي، پر ڪراچي ايئرپورٽ تي حملي کانپوءَ آپريشن ضرب عضب شروع ڪيو ويو، دهشتگردن خلاف آپريشن بنا فرق جي جاري آهي. آرمي چيف سان گڏ دوري تي لنڊن ويل ڊي جي آءِ ايس پي آر ميجر جنرل عاصم سليم باجوه دهشتگردن خلاف هلندڙ آپريشن ضرب عضب بابت بريفنگ ڏني. عاصم سليم باوجوه چيو ته طالبان جو اتر وزيرستان ۾ ڪافي ڪنٽرول هو، جتي دهشتگردن اثرائتو مواصلاتي نظام به قائم ڪيو هو، جتان افغان طالبان سان به رابطا ڪيا ويندا هئا. ڊي جي آءِ ايس پي آر چيو ته دهشتگرد اتر وزيرستان ۾ بم ٺاهڻ واريون ڪيتريون ئي فيڪٽريون قائم ڪيون هيون، آپريشن ضرب عضب دوران بم ٺاهڻ واريون فيڪٽريون ۽ ڌماڪيدار مادي جا ذخيرا به تباهه ڪيا ويا  آهن. عاصم سليم باوجوه چيو ته اتر وزيرستان ۾ دهشتگردن خلاف آپريشن ضرب عضب بنا فرق جي جاري آهي، جنهن ۾ ڪاميابيون مليون آهن. عاصم سليم باوجوده چيو ته حڪومت طرفان دهشتگردن سان ڳالهين ذريعي فائدو حاصل ڪرڻ جي ڪوشش ڪئي وئي پر ڪراچي ايئرپورٽ تي حملي کانپوءِ حڪومت آپريشن ضرب عضب شروع ڪرڻ جو فيصلو ڪيو.

 

عمران خان اليڪشن ٽربيونل تي دٻاءُ وجهي فيصلن تي اثرانداز ٿيڻ چاهي ٿو: پرويز رشيد

اسلام آباد (بيورو) اطلاعات واري وفاقي وزير پرويز رشيد چيو آهي ته عمران خان سياست ۾ اسپن ماسٽر بڻجي چڪو آهي، هو عدالتن کي دٻاءُ ۾ آڻي پنهنجي مرضي جا فيصلا وٺڻ جي ڪوشش ڪري رهيو آهي، اسلام آباد ۾ پريس ڪانفرنس دوران پرويز رشيد چيو ته عمران خان اليڪشن ٽربيونل جي فيصلي تي اثرانداز ٿيڻ جي ڪوشش ڪر يرهيو آهي، عمران خان حقيقتن کي ٽوڙي مروڙي پيش ڪرڻ جو ماهر بڻجي چڪو آهي، هو هر روز سچ جو قتل ڪري ٿو، هن چيو ته ڌانڌلي جي جاچ لاءِ ٽرم آف ريفرنس پاڻ عمران خان طئه ڪرايو هو عمران خان چيو ته ڪميشن ٻيهر ڳڻپ ناهي ڪئي، عمران هاڻ وڪڙ ڳالهائڻ ڇڏي ڏئي، اسان کي سچ ڳالهائڻ گهرجي، لوڪل ڪميشن مطابق هڪ لک 80 هزار 115 ووٽ درست آهن، اين اي 122 ۾ عمران خان کي 84 هزار 542 ووٽ مليا، اياز صادق کي 92 هزار 393 ووٽ مليا آهن پرويز رشيد استفسار ڪيو ته رپورٽ ۾ ڪٿي لکيل آهي ته 30 هزار ووٽ ڪوڙا آهن؟ عمرانخنا هاڻ پنهنجي ناڪام مان سبق سکي، رپورٽ جي حقيقتن ۽ عمران خان جي بيانن ۾ فرق آهي پرويز رشيد جو چوڻ هو ته عمران خان ڪوڙ تي قوم کان معافي گهري، عمران خان پنهنجي حصي جو سچ ڳالهائي ٿو سرڪاري سچ نه ٿو ڳالهائي، هو پاڻ ڪيس لڙڪائي رهيو آهي، اها جاچ چاهي ٿو جنهن ۾ ان جي مرضي جو نتيجو اچي، پرويز رشيد جو چوڻ هو ته جهانگير ترين پنهنجي تڪ ۾ ٻيهر ڳڻپ کي قبول ڪيو، جوڊيشل ڪميشن لاءِ 5 مهينا اڳ خط لکي چڪا آهيون، عمران خان کي شرمندگي جو اظهار ڪرڻ گهرجي، هن نوجوانن کي گمراهه ڪيو..

 

دهشتگردن جي مالي مدد روڪي وڃي: آرمي چيف

لنڊن (مانيٽرنگ ڊيسڪ)  پاڪ فوج جي سربراهه جنرل راحيل شريف برطانيا جي سياسي ۽ فوجي قيادتن سان ملاقاتون ڪري دهشتگردي سميت مختلف معاملن تي ڳالهيون ڪيون آهن. آرمي چيف جنرل راحيل شريف برطانوي وزيراعظم ڊيوڊ ڪيمرون سان ملاقات لاءِ لنڊن ۾ 10 ڊائوننگ اسٽريٽ پهتو، جتي سندس شاندار استقبال ڪيو ويو. 10 ڊائوننگ اسٽريٽ ۾ جنرل راحيل شريف فل گارڊ آف آنر پيش ڪيو ويو، جنهن بعد هن جي برطانوي وزيراعظم ڊيوڊ ڪيمرون سان ملاقات ٿي. ملاقات دوران دهشتگردي سميت مختلف معاملن تي ڳالهيون ڪيون ويون. آءِ ايس پي آر جو چوڻ آهي ته آرمي چيف جنرل راحيل شريف برطانيا جي بچاءَ واري سيڪريٽري ۽ نيشنل سڪيورٽي ايڊوائيزر سان پڻ ملاقات ڪئي. ملاقات ۾ دهشتگردي خلاف سهڪار ۽ ڳجهن معاملن بابت ڳالهيون ڪيون ويون. آئي ايس پي آر موجب آرمي چيف برطانوي وزيراعظم ڊيوڊ ڪيمرون سان ملاقات ۾ پرڏيهه مان ڪارروائي ڪندڙن جو معاملو به کنيو آهي، آرمي چيف دهشتگردن جي مالي مدد روڪڻ تي به ڳالهه ٻولهه ڪئي.

 

آصف زرداري پاران سنڌ حڪومت کي صوبي جي سموري زمين جو رڪارڊ ڪمپيوٽرائزڊ ڪرڻ جي هدايت

ڪراچي (اسٽاف رپورٽر) اڳوڻي صدر آصف علي زرداري سنڌ حڪومت کي هدايت ڪئي آهي ته فوري طور تي صوبي جي سموري زمين جي رڪارڊ کي ڪمپيوٽرائيزڊ ڪيو وڃي ته جيئن نه صرف مالڪاڻن حقن جي رڪارڊ کي محفوظ بڻايو وڃي پر ڍل جي وصولي جي نظام کي به سنڌ بئنڪ سان ڳنڍيو وڃي، ان ڪمپيوٽرائيزڊ وصولي سسٽم سان سرڪاري روينيو ڪليڪشن ڪيتري ئي وڌڻ جي اميد آهي. اهڙو اظهار هن گذريل رات وزيراعليٰ هائوس ۾ لينڊ رڪارڊ جي ڪمپيوٽرائيزيشن جي حوالي سان هڪ اعليٰ سطحي اجلاس کي خطاب ڪندي ڪيو. اجلاس کي خطاب ڪندي وڏي وزير سيد قائم علي شاهه چيو ته سنڌ جي زمين جي سموري رڪارڊ کي ڪمپيوٽرائيزڊ ڪرڻ جو عمل اڳوڻي صدر آصف علي زرداري جي حڪم تي 14 سيپٽمبر 2011 تي 4997.45 ملين رپين جي لاڳت سان شروع ڪيو ويو جيڪو هلندڙ سال جون ۾ مڪمل ٿي ويندو. هن ٻڌايو ته سنڌ ۾ مجموعي طور تي 6000 ديهه آهن جن مان اسان 2224 ديهن جي ڊيٽا جي تصديق لاءِ پروسيس ڪيو آهي جنهن مان 1237 ديهه يا 55 سيڪڙو جي تصديق جو عمل مڪمل ٿي چڪو آهي. وڏي وزير ٻڌايو ته سنڌ ۾ ٽوٽل 3 ڪروڙ ايڪڙ کان وڌيڪ زمين آهي جنهن مان 12.539 ملين ايڪڙ عوام جي ملڪيت جڏهن باقي سرڪاري زمين آهي. ان موقعي تي بورڊ آف روينيو ميمبر سيد ذوالفقار شاهه اجلاس کي بريفنگ ڏيندي چيو ته روينيو رڪارڊ جي ڪمپيوٽرائيزيشن لاءِ سنڌي سافٽ ويئر تيار ڪيو ويو آهي ڇو ته روينيو جو سمورو رڪارڊ سنڌ ۾ درج آهي ان کان سواءِ ڪمپيوٽرائيزيشن جي عمل ۾ زمين مالڪن جا آڱوٺن جانشان ۽ تصوير به شامل ڪئي ويندي. اجلاس دوران جڏهن اڳوڻي صدر کي ٻڌايو ويو ته آءِ ٽي جي شعبي ۾ 1000 کان وڌيڪ روزگار جا موقعا موجود آهن ته هن چيو ته هو چاهي ٿو ته عورتن کي اڳتي اچڻ گهرجي ۽ آءِ ٽي جي ميدان ۾ پنهنجون صلاحيتون ڏيکارڻ گهرجن. ذولفقار شاهه چيو ته روينيو رڪارڊ جي ڪمپيوٽرائيزيشن مختلف مرحلن جيئن اسڪينگ، رڪارڊ جي ترتيب بنائڻ، اسڪيننگ ڪيل رڪارڊ جي معلومات کي ڪمپيوٽر ۾ وجهڻ ۽ پوءِ لاڳاپيل ڊپٽي ڪمشرن کان ان معلومات جي تصديق ڪرائڻ ۽ ان جي ڪراچي ۾ قائم ڊيٽا سينٽر تي سموري ڊيٽا محفوظ ڪرائڻ شامل آهي جڏهن ته ڪنهن به غير متوقع صورتحال کي منهن ڏيڻ لاءِ بورڊ آف روينيو حيدرآباد ۾ ڊزاسٽر ريڪوري سينٽر قائم ڪيل آهي جڏهن ته ان کان سواءِ سنڌ ۾ 27 سينٽر قائم ڪيا ويندا ۽ ”سنڌ زمين“ جي نالي سان ان جي ويب سائيٽ به بڻائي ويندي. هن سنڌ ۾ زمين جي مالڪاڻنحقن جي حوالي سان ٻڌايو ته 3.5 ملين ماڻهن وٽ 4.4 ايڪڙ جڏهن ته 267178 ماڻهن وٽ 5 کان 16 ايڪڙ ۽ 105841 ماڻهو 16-16 ايڪڙ زمين جا مالڪ آهن جنهن تي آصف علي زرداري چيو ته ان مان پتو پوي ٿو ته 90 سيڪڙو هارين وٽ 4-4 ايڪڙ زمين آهي. آصف عل زرداري طرفان روينيو رڪارڊ ۾ موجود خامين بابت ڪيل سوال جي جواب ۾ روينيو بورڊ  جي ميمبر ذوالفقار شاهه ٻڌايو ته سموري لينڊ رڪارڊ جو 29 سيڪڙو شيئر غير تقسيم شده آهي، 19 سيڪڙو سروي نمبر موجود نه آهن، 20 سيڪڙو انٽريون ڪنهن خريدار يا تاجر کان سواءِ ڪيون ويون آهن جڏهن ته 2 سيڪڙو انٽريون غير تصديق شده ۽ هڪ سيڪڙو ۾ يا ته سروي نمبر غائب هو يا پوءِ ڊپليڪيٽ انٽري ڪئي وئي هئي…

 

 

وڏي وزير سان پ پ خيبرپختونخواهه جي وفد ۽ ڪراچي ۾ رهندڙ پختونن جي ملاقات

ڪراچي (اسٽاف رپورٽر) پ پ سنڌ جي صدر ۽ وڏي وزير سيد قائم علي شاهه چيو آهي ته پ پ عوام جي ڪنهن رنگ، نسل ۽ بنا سياسي فرق جي غريبن جي خدمت تي يقين رکي ٿي ۽ اهو ئي سبب آهي جو پ پ چئني صوبن سان گڏ آزاد ڪشمير ۽ گلگت بلتستان جي مقبول سياسي پارٽي آهي. هن چيو ته پ پ جي باني شهيد ذوالفقار علي ڀٽو ملڪ ۽ قوم کي اهڙو متفقه آئين ڏنو، جنهن جي تحت سمورن شهرين کي برابري جا حق حاصل آهن. هن چيو ته سڌ ۾ پ پ جي حڪومت ڪراچي ۾ عرصي کان رهندڙ سمورن پر امن پختون ڀائرن کي بنيادي سهولتن جي فراهمي سان گڏ انهن کي آئين ۾ ڏنل حقن جو به تحفظ ڪندي. هن چيو ته پ پ جي حڪومت سماجي، معاشي، تعليمي، پروفيشنل ۽ ڪاروباري ضرورتن جو به خيال رکندي. اهڙي خيالن جو اظهار هن وزيراعليٰ هائوس ۾ پ پ خيبرپختونخواهه جي وفد ڪراچي ۾ رهندڙ پختونن جي نمائندن سان گڏ پ پ خيبرپختونخواهه لاءِ شريڪ چيئرمين جي سياسي صلاحڪار ۽ اڳوڻي ايم اين اي نور عالم جي سربراهي ۾ ملاقات جي موقعي تي ڳالهائيندي ڪيو. ملاقات ۾ پ پ جي نائب چيئرمين شيرين رحمان به موجود هئي. وڏي وزير وفد جي نشاندهي تي پيش ڪيل مسئلن جي حل لاءِ خاص معاونن وقار مهدي، راشد رباني ۽ پ پ اڳواڻ لعل بخش ڀٽو تي مشتمل گڏيل ڪميٽي جوڙي ڇڏي ۽ پختون ڪميٽيز جي ميمبر اڳواڻن کي چيو آهي ته ڪميتي ۾ شموليت لاءِ پنهنجي طرفان نالا پيش ڪن ته جيئن اڳوڻي صدر آصف علي زرداري جي هدايتن تي پختونن کي پيش ايندڙ مسئلن ۽ تڪليفن کي فوري طور حل ڪري سگهجي. ڪراچي ۾ رهندڙ پختون ڪميونٽيز لاءِ ڌار قبرساتن لاءِ زمين جي فراهمي واري مطالبي تي وڏي وزير چيو ته سپريم ڪورٽ سرڪاري زمينن جي الاٽمينٽ تي پابندي لڳائي آهي پر هن وفد جي ميمبرن کي چيو ته رهائشي علائقن جي ويجهو زمين جي نشاندهي ڪن ۽ ان جي الاٽمينٽ لاءِ درخواست ڏني، جنهن تحت قاعدن موجب ڪارروائي ڪئي ويندي ۽ پابندي ختم ٿيڻ بعد زمين الاٽ ڪئي ويندي. ڪمپيوٽرائيزڊ سڃاڻپ ڪارد جي تايري، پاڻي جي فراهمي، بجلي گيس جي سهولتن بابت مسئلن تي وڏي وزير خاطري ڪرائي ته ان جي حل لاءِ لاڳاپيل ادارن کي هدايتون جاري ڪيون وينديون. ..

 

عدليا چوي ته چونڊن ۾ ڌانڌليون ناهن ٿيون ته سرڪار جو مينڊيٽ تسليم ڪرڻ لاءِ تيار آهيون: عمران خان

اسلام آباد (بيورو)  تحريڪ انصاف جي چيئرمين عمران خان چيو آهي ته چونڊن ۾ ڌانڌلين بابت فيصلو عدالت کي ڪرڻ ڏنو وڃي، جيڪڏهن عدليا چوي ته سرڪار جو مينڊيٽ حقيقي آهي ته هو به تسليم ڪرڻ لاءِ تيار آهن. اسلام آباد ۾ پنهنجي رهائشگاهه تي پريس ڪانفرنس ڪندي عمران خان چيو ته دهشتگرديءَ خلاف سڄي قوم متحد آهي، انڪري هو ماحول خراب نٿا ڪرڻ چاهين. ڪپتان چيو ته 30 ڊسمبر تي معاملا طئي ٿي ويا هئا پر انکانپوءِ حڪومت طرفان ساڻن ڪو به رابطو ناهي ڪيو ويو. پي ٽي آءِ سربراهه چيو ته رابطو نه ٿيڻ ڪري مجبور ٿي هنن اسحاق ڊار کي 3 نقطن تي ٻڌل خط اماڻيو آهي، جنهن ۾ ڳالهين بابت ايم او يو ۽ ٽي او آر شامل آهن. جهانگير طرفان سرڪار کي لکيل خط بابت ڳالهائيندي عمران خان چيو ته سرڪار ۽ پي ٽي آءِ وچ ۾ جوڊيشل ڪميشن آرڊيننس ذريعي جوڙڻ تي اتفاق ٿيو هو. ڪپتان چيو ته سموريون جماعتون چون ٿيون ته اليڪشن ۾ ڌانڌلي ٿي، ان باوجود اهو فيصلو عدليا کي ڪرڻ ڏنو وڃي، جيڪڏهن عدالت چوي ته سرڪار جو مينڊيٽ حقيقي آهي ته هو به مڃڻ لاءِ تيار آهن. تحريڪ انصاف جي چيئرمين واضح ڪيو ته ڌانڌلين جي جاچ واري لڙائي نواز شريف ۽ سندس وچ ۾ نه پر اها جمهوري ويڙهه آهي. سندس چوڻ هو ته هو ان حوالي سان پنهنجي لائحه عمل جو اعلان 18 جنوري تي ڪندو. دهشتگردي بابت ڳالهائيندي عمران خان چيو ته دهشتگردي خلاف جنگ ۾ سرڪار سان هر ممڪن سهڪار جاري رکندا. پرويز رشيد کي تنقيد جو نشانو بڻائيندي ڪپتان چيو ته وفاقي وزير جو دماغي توازن درست ناهي، آرمي پبلڪ اسڪول آڏو احتجاج ڪندڙن جو ڏک هو چڱيءَ ريت سمجهي سگهي ٿو. عمران خان چيو ته آرمي پبلڪ اسڪول جي دوري دوران سندس پروٽوڪول لاءِ رڳو 6 گاڏيون هيون، انڪري پرويز رشيد کي غلط بياني کان ڪم نه وٺڻ گهرجي. تحريڪ انصاف جي چيئرمين پريس ڪانفرنس جي آخر ۾ گستاخيءَ وارن خاڪن جي مذمت پڻ ڪئي.

 

ايم ڪيو ايم طرفان ڪارڪنن جي قتل جو الزام سنڌ حڪومت تي مڙهڻ مذمت جوڳو عمل آهي،: تاج حيدر

ڪراچي (اسٽاف رپورٽر) پاڪستان پيپلز پارٽي سنڌ جي جنرل سيڪريٽري تاج حيدر ايم ڪيو ايم پاران ڪارڪنن جي قتل جو الزام سنڌ حڪومت تي مڙهڻ ۽ ان کي ناڪام قرار ڏيڻ جي مذمت ڪندي ايم ڪيو ايم کي ياد ڏياريو آهي ته آمريت جي دور ۾ جڏهن سنڌ جي گهرو وزارت ايم ڪيو ايم وٽ هئي ته ڪراچي جي رستن تي 12 مئي تي 50 کان وڌيڪ مخالف جماعت جي ڪارڪنن جي خون سان هولي کيڏي وئي هئي جنهن جا داغ اڄ تائين ايم ڪيو ايم پنهنجي دامن تان صاف نه ڪري سگهي آهي. پنهنجي بيان ۾ هن چيو آهي ته دهشتگردي جو سڀ کان وڌيڪ شڪار پي پي پي رهي آهي، رڳو ڪراچي ۾ ئي پي پي پي جي 650 کان وڌيڪ ڪارڪنن کي شهيد ڪيو ويو آهي. هن چيو ته سڄو ملڪ دهشتگردي جي سخت لپيٽ ۾ آهي ۽ دهشتگرد مسلسل حملا ڪري رهيا آهن ته ڇا ٻين صوبن ۾ ٿيندڙ قتلن تي ايم ڪيو ايم کي ٻين صوبائي حڪومتن ۽ وفاقي حڪومت جي ناڪامي به نظر آئي يا نه. هن چيو ته ملڪ کي هن وقت سياسي پوائنٽ اسڪورنگ جي نه پر مثبت ۽ تعميري سياست جي ضرورت آهي ته جيئن ملڪ مان دهشتگردي جو خاتمو آڻي سگهجي. هن چيو ته سنڌ حڪومت کي غير مستحڪم ڪرڻ سان ايم ڪيو ايم کي ڪو به فائدو نه ٿيندو.

 

شوال وادي ۾ آمريڪي ڊرون حملي جي نتيجي ۾ 7 ڄڻا مارجي ويا

اتر وزيرستان(م.ڊ) اتر وزيرستان جي علائقي شوال وادي ۾ آمريڪي ڊرون حملي جي نتيجي ۾ 7 ڄڻا مارجي ويا، آمريڪي جاسوس جهاز هڪ گهر کي نشانو بڻايو ۽ ٻه ميزائل فائر ڪيا، حملي ۾ اهم دهشتگردن جي مارجڻ جا اطلاع آهن  آمريڪي جاسوس جهاز اتر وزيرستان جي علائقي شوال وادي ۾ هڪ گهر تي ٻه ميزائل فائر ڪيا جنهن جي نتيجي ۾ 7 ڄڻا مارجي ويا، ميزائل حملي ۾ گهر کي باهه لڳي وئي ۽ اهو مڪمل طور تي تباهه ٿي ويو. ذريعن جو چوڻ آهي ته ڊرون حملي ۾ اهم دهشتگرد مارجي ويا آهن. آمريڪي ڊرون جهاز گهر تي ميزائل حملي کانپوءِ علائقي ۾ ڪيتري ئي وقت تائين اڏام ڪندا رهيا.

 

ملير حادثو، فوتين جي سڃاڻپ لاءِ ورتل ڊي اين اي نمونا ضايع ٿيڻ جو انڪشاف

ڪراچي(اسٽاف رپورٽر) ملير حادثي ۾ فوتين جي سڃاڻپ لاءِ انتظاميا ۽ پوليس ڪي به سنجيده قدم نه کنيا،جڏهن ته 51 ڄڻن جا ورتل ڊي اين اي نمونا ضايع ٿيڻ جو انڪشاف ٿيو آهي. ملير حادثي ۾ سڙي فوت ٿي ويل 62 ڄڻن جي سڃاڻپ لاءِ سندن 51 وارثن جا ورتل ڊي اين اي نمونا ميمڻ ڳوٺ ٿاڻي ۾ ضايع ٿيڻ جو انڪشاف ٿيو آهي. حادثي ۾ فوت ٿي ويل 62 ڄڻن جا لاش اڃا تائين ايڌي جي سرد خاني ۾ پيل آهن. جناح اسپتال جي انتظاميا حادثي ۾ سڙي فوت ٿي ويلن جي وارثن کي ٻيهر رابطو ڪري کين ٻيهر نمونا ڏيڻ جي هدايت ڪئي. ٺل واسي فوتي بچل بنگلاڻي جي ڀاءُ نواب بنگلاڻي کي ٻيهر جناح اسپتال گهرائي ڊي اين اي لاءِ نمونو ورتو ويو. ذريعن موجب ڊي اين اي جي نمونن جي چڪاس لاءِ اڄ شام ڊاڪٽر اسلام آباد کان ڪراچي پهچي رهيا آهن.