تازيون خبرون

Daily Archives: January 15, 2015

عمران خان جي آرمي پبلڪ اسڪول پشاور آمد، شهيد ٻارن جي وارثن جو احتجاج، گو عمران گو جا نعرا

پشاور (بيورو) عمران خان ۽ سندس گهر واريءَ کي پشاور ۾ آرمي پبلڪ اسڪول جو دورو ڳچيءَ پئجي ويو، عمران خان ۽ سندس زال ريحام خان جي آمد تي شهيد ٻارڙن جي وارثن سخت احتجاج ڪندي گو عمران گو جي نعريبازي ڪئي،احتجاج ڪندڙن جو چوڻ آهي ته عمران خان ساڻن ڏک ونڊڻ نه پر زال کي گهــُمائڻ لاءِ آيو. شهيد ٻارڙن جي وارثن جي سخت احتجاج سبب ڇڪتاڻ واري صورتحال پيدا ٿي پئي. آرمي پبلڪ اسڪول ٻاهران شهيد ٻارڙن جي وارثن عمران خان جي ڪيترن ئي ڏينهن کانپوءِ آمد تي سخت ڪاوڙ جو اظهار ڪندي گو عمران گو جا نعرا هنيا. مڇريل ماڻهن پي ٽي آءِ سربراهه جي گاڏيءَ تي مڪون پڻ هنيون، ان دوران عمران خان ۽ ريحام خان کي متبادل گيٽ ذريعي اسڪول اندر پهچايو ويو. ميڊيا سان ڳالهائيندي هڪ شهيد ٻار جي امڙ جو چوڻ هو ته عمران خان ڏکئي وقت ۾ کين اڪيلو ڇڏي هليو ويو ۽ جنهن وقت سندن ٻارن تي ظلم ٿي رهيو هو ته هــُو پنهنجي شادي جي تيارين ۾ رڌل هو. هن چيو ته عمران خان ساڻن ڏک ونڊڻ نه پر پنهنجي زال کي گهمائڻ آيو آهي. شهيد ٻار جي امڙ وڌيڪ چيو ته ڇا عمران خان کي پنهنجون خوشيون ايتريون پياريون آهن جو هن سندن ڏک وساري ڇڏيا، ايترن ڏينهن بعد هــُو پي ٽي آءِ سربراهه کي ياد آيا. احتجاج ڪندڙ هڪ ٻئي شخص جو چوڻ هو ته عمران خان کي اڄ آرمي پبلڪ اسڪول اچڻ جي ڪهڙي ضرورت هئي؟ جڏهن ته ڏک جا چاقو هلي رهيا هئا ته هــُو پنهنجي شادي جي معاملي ۾ رڌل هو،کين ڪنهن جي ضرورت ناهي. هن چيو ته نواز شريف وزيراعظم آهي انڪري کيس سڀ کان اڳ اچڻو هو پر اهو به نه آيو ۽ هاڻي کيس به هتي اچڻ نه ڏنو ويندو. شهيد ٻارن جي وارثن چيو ته کين پنهنجي شهيدن جي رت جو حساب وٺڻو آهي،ڀلي پوءِ ڀلي کين حياتيون قربان ڪرڻيون پون. هڪ شهيد ٻار جي والد چيو ته هــُو عمران خان کي ووٽ ڏيڻ تي شرمندگي محسوس ڪري رهيو آهي، هنن پنهنجي ڀلائي لاءِ ووٽ ڏنو پر عمران خان کين ڏکئي وقت ۾ اڪيلو ڇڏي ڏنو

 

دهشتگرد دهشتگرد ٿيندو آهي قانون ۽ آئين سڀني لاءِ هڪ جهڙو هئڻ گهرجي: اياز لطيف پليجو

حيدرآباد (بيورو) قومي عوامي تحريڪ جي مرڪزي صدر اياز لطيف پليجو چيو آهي ته قانون ۽ آئين سڀني جي لاءِ هڪ جهڙو هئڻ گهرجي دهشتگرد دهشتگرد هوندو آهي ڪلاشنڪوف بندوق ڊرل مشين سان سوراخ ڪندڙ ٻوري ۾ بند لاش ڏيندڙ به دهشتگرد آهن ڪجهه دهشتگردن کي ڦاهي تي چاڙهيو پيو وڃي پر ڪراچي ۾ صولت مرزا ڪامران ماڌوري اجمل پهاڙي جاويد بند جهڙي بدنام دهشتگرد جن 12 مئي 9 اپريل 22 مئي 10 محرم الحرام نشترپارڪ ۽ 18 آڪٽوبر تي بيگناهه انسانن جو رت وهايو انهن دهشتگردن کي سرعام ڦاهي ڏني وڃي. قتل قتل ٿيندو آهي وڏي ماڻهو تي حملو ڪرڻ ۾ ملوث دهشتگرد کي ڦاهي جي سزا ۽ عام بيگناهه ماڻهن سياسي ڪارڪنن ميڊيا جي ماڻهن کي وڪيلن ۽ مزدورن کي گولين جو نشانو بڻائي قتل ڪندڙ دهشتگرد ناهي ڇا؟ ته حڪومت واضح ڪري ته پوءِ ڇا آهي سنڌ جو عوام وفاقي حڪومت کان سوال ڪري ٿو ته ڪراچي ۾ بيگناهه قتل ٿيندڙ ماڻهن جو ڇا رت سفيد آهي جيڪي ڪراچي ۾ دهشتگردي ڪندڙ دهستگردن کي رعايت ڏني پئي وڃي انهن دهشتگردن کي ڦاهي تي ڇو نٿو ٽنگيو وڃي حڪومت دهشتگردن سان به مفاهمت وارو رويو رکيو آهي هڪ طرف حڪومت دهشتگردن جي خلاف ضرب عضب آپريشن ڪري رهي آهي ۽ ٻئي پاسي ڪراچي شهر ۾ بدنام دهشتگردن جي ڦاهي جي سزا جو عمل روڪڻ جو حڪم ڏي ٿي اياز لطيف پليجو چيو آهي ته دهشتگردن خلاف بنا فرق ڪارروائي ڪئي وڃي.

 

ايم ڪيو ايم ڪارڪنن کي ڳولهي ڳولهي قتل ڪيو پيو وڃي: خالد مقبول صديقي

ڪراچي (اسٽاف رپورٽر) ايم ڪيو ايم اڳواڻ خالد مقبول صديقي چيو آهي ته دهشتگردي کي وزيرستان مان ڪراچي ڏينهن منتقل ڪيو پيو وڃي، هاڻي وقت اچي ويو آهي ته دهشتگردن ۽ سندن ساٿين خلاف ڪارروائي ڪئي وڃي. ڪراچي جي گُلبرگ واري علائقي ۾ ايم ڪيو ايم ڪارڪن جي جنازي نماز کانپوءِ ميڊيا سان ڳالهائيندي خالد مقبول صديقي چيو ته ايم ڪيو ايم ڪارڪنن کي ڳولهي ڳولهي قتل ڪيو پيو وڃي، سنڌ حڪومت عوام کي تحفظ فراهم ڪرڻ ۾ مڪمل طور تي ناڪام ٿي چڪي آهي. هن چيو ته دهشتگردي کي وزيرستان مان ڪراچي ڏينهن منتقل ڪيو پيو وڃي، هاڻي وقت اچي ويو آهي ته ڪراچي ۾ قانون لاڳو ڪندڙ ادار دهشتگردن ۽ سندن ساٿين خلاف ڪارروائي ڪري. ايم ڪيو ايم اڳواڻ خالد مقبول صديقي جو اهو به چوڻ هو ته ڪراچي جو امن تباهه ڪندڙ پابندي مڙهيل تنظيمن خلاف به سخت ڪارروائي ٿيڻ گهرجي.

 

انجلي مينگهواڙ ڪيس: عدالت جوڙي کي گڏ رهڻ جي اجازت ڏئي ڇڏي، داخل ڪيس ختم ڪرڻ جو حڪم

ڪراچي (اسٽاف رپورٽر) سنڌ هاءِ ڪورٽ ڏهرڪي جي مسلمان ٿيندڙ پيار جو پرڻو ڪندڙ هندو ناري انجلي عرف سلميٰ بي بي کي مڙس رياض سيال حوالي ڪندي رياض سيال ۽ سندن ڀائرن تان اغواه جو ڪيس ختم ڪرڻ جو حڪم ڏئي ڇڏيو آهي ، ڪيس جي ٻڌڻي اربع ڏينهن 14 جنوري تي سنڌ هاءِ ڪورٽ جي جسٽس سيد سجاد شاه تي ٻڌل ٻه رڪني بئنچ ۾ ٿي  گذري ٻڌڻي دوران عدالت حڪم ڏيندي چيو ته سلميٰ بي بي کي پناه شيلٽر هوم کان گهرائي عدالت ۾ پيش ڪيو وڃي عدالت ۾ سلميٰ بي بي پيش ٿي ته ڪيس جي ٻڌڻي ٻيهر شروع ٿي عدالت سلميٰ بي بي کان پڇاڻو ڪيو ته اوهان ڪيڏانهن وڃڻ چاهيو ٿا سلميٰ بي بي چيو ته آءُ اسلام قبول ڪيو آهي ۽ مان مسلمان ٿي آهيان پنهنجي مڙس ڏانهن وڃڻ چاهيان ٿي عدالت هڪ ڀيرو ٻيهر ٻن ڪلاڪن لاءِ ٻڌڻي ملتوي ڪندي سلميٰ بي بي کي حڪم ڏنو ته هو اڌ ڪلاڪ اڪيلي ۾ پنهنجي مڙس رياض سيال ۽ پنهنجي پيءُ ڪندن ۽ پنهنجي ماءُ حليما سان ملاقات ڪري پوءِ عدالت هڪ ڪلاڪ سلميٰ بي بي کي ٻيو موقعيو ڏئي ٿي ته هو سوچي ڪري عدالت کي ٻڌائي ته هو ڪيڏانهن وڃڻ چاهي ٿي عدالت ٻن ڪلاڪن کان پوءِ ٻڌڻي شروع ڪئي ته عدالت ۾ بيان ڏيندي سلميٰ بي بي چيو ته مان پنهنجي مرضي سان اسلام قبول ڪيو آهي ۽ آءُ مسلمان ٿي ڪري رياض سيال سان پنهنجي مرضي سان شادي ڪئي آهي منهنجي مڙس ۽ ان جي ڀائرن تي ڪوڙا اغواه جا ڪيس داخل ڪيا ويا آهن جيڪا ڪوڙا ڪيس آهن اهي ختم ڪيا وڃن ۽ اسان کي تحفظ ڏنو وڃي هن چيو اسان کي حق آهي اسان پنهنجي مرضي سان جيئڻ چاهيون ٿا پر ڪجھ پر نام نهاد عناصر اجايو واويلا ڪري اسان خلاف غلط پروڪينڊا ڪن پيا اهڙن ماڻهن خلاف ڪاروائي ڪئي وڃي اسلام امن جو دين آهي جنهن ۾ آزادي ۽ حقوق ملن ٿا ، ڌرين جي بيانن کان پوءِ عدالت حڪم ڏيندي ڏهرڪي جي مسلمان ٿيندڙ پيار جو پرڻو ڪندڙ هندو ناري انجلي عرف سلميٰ بي بي کي مڙس رياض سيال حوالي ڪندي رياض سيال ۽ سندن ڀائرن تان اغواه جو ڪيس ختم ڪرڻ جو حڪم ڏئي ڇڏيو آهي عدالت ڪيس جي جاچ آفيسر کي حڪم ڏنو ته سلميٰ بي بي ۽ رياض سيال جا بيان ورتا وڃن ۽ سلميٰ بي بي کي پناه شيلٽر هوم اماڻيو وڃي جتي قانوني گهرجون پوريون ڪري سلميٰ بي بي کي شيلٽر هوم مان سندن مڙس حوالي ڪيو وڃي ، عدالتي فيصلي کان پوءِ سلميٰ بي بي جي پيءُ ماءُ ۾ روڄ راڻو عدالت ۾ رڙيون ڪندي روئيندا رهيا سلميٰ بي بي سندن هڪ نه ٻڌي ، هوڏانهن  سميت انجلي ڪماري مينگهواڙ  کي مسلمان ڪندڙ  درگاه عاليه ڀرچونڊي شريف جي گادي نشين جو صاحبزادو حضرت پير عبدالمالڪ عرف مجن شاه ۽ اڳوڻي ايم اين اي عبدالحق ميان مٺو جي جي فرزند ميان اسلم ڏهرڪي کان ڪراچي پهچي ويا آهن جيڪي اڄ سنڌ هاءِ ڪورٽ ۾ سلميٰ بي بي ، انجلي ۽ رياض سيال جي ٻڌڻي ۾ حمايت لاءِ ايندا ، عدالت ۾ انجلي ۽ رياض سيال جي حمايت ۾ ٻڌڻي کان پوءِ انجلي ڪماري جي پيءُ ماءُ ، هندو تنظيمن جي اڳواڻن سول سوسائيٽي جي نمائندن  سياسي ، سماجي ، مذهبي ۽ انساني حقوق جا نمائندا  ٻڌڻي کان پوءِ ميڊيا سان ڳالهائيندي چيو انجلي جي عمر 12 سال کان گهٽ آهي تنهن ڪري انجلي مينگهواڙ جو زبردستي مذهب تبديل ڪري هن کي مسلمان ڪيو ويو آهي تنهن ڪري انجلي کي واپس والدين حوالي ڪيو وڃي ، جڏهن ڀرچونڊي شريف ڏهرڪي جي گادي نشين جي صاحبزادي حضرت پير عبدالمالڪ عرف مجن شاه  ۽ اڳوڻي ايم اين اي عبدالحق ميان مٺو جي جي فرزند ميان اسلم چيو آهي ته اسان ڪا به زبردستي نه ڪئي آهي اسلام ۾ زبردستي نه ڪئي ويندي آهي سلميٰ بي بي پاڻ پنهنجي مرضي سان  اسلام قبول ڪري مسلمان ٿي آهي ۽ اسلام قبول ڪرڻ لاءِ مذهب جي قيد نه  آهي . هنن چيو ته ڪجھ اين جي اوز ، سول سوسائيٽي وارا ، هندو تنظيمن جا اڳواڻ ، قوم پرست ۽ ڪجھ سياسي پارٽيون يهودي لابي سان ملي ڪري پئسن خاطر ۽ پنهنجي سياست چمڪائڻ لاءِ هندو مسلمان جو اشو ٺاهي اسان جي عظيم گادي درگاه عاليه ڀرچونڊي شريف کي بدنام ڪيو وڃي پيو هنن چيو ته ڀرچونڊي شريف ۾ روزانو هندو پنهنجي مرضي سان مسلمان ٿي رهيا آهن جن تي ڪا به زبردستي نه پئي ڪئي وڃي هنن چيو ته اهڙن نام نهاد تنظمن کي دعوت ڏيان ٿو ته هو ڏهرڪي اچي حقيقتن کان آگاهي وٺن پوءِ هي يهودي لابي لاءِ ڪم ڪن ، هنن چيو ته  هنن چيو ته ڏهرڪي ۽ گهوٽڪي ضلعي ۾ ٽي لک کان مٿي هندو رهن ٿا ۽ اسان جي درگاه ڀر چونڊي شريف سان گڏ رهڙڪي شريف ۾ هندن جي دنيا ۾ سب کان وڏي عبادت گاه آهي جتي عبادت ڪرڻ لاءِ سب هندو ڇوڪريون پيادل ، رڪشن تي ، ڪارن وغيره تي اينديون  آهن اتان اڄ تائين هڪ هندو ڇوڪري اغواه نه ٿي آهي هنن چيو ته هندو نياڻيون اسان جون نياڻيون  آهن اتي هنن  جي حفاظت اسان ڪندا آهيون جيڪو هڪ مسلمان جو فرض به آهي باقي جيڪو مرضي سان اسلام قبول ڪندو ته هن کي ڪا جهل پل نه آهي هنن چيو ته اسان عدالتي فيصلي تي مڪمل اعتماد ڪيون ٿا عدالتون آزاد آهن ، ياد رهي ته انجلي 29 سيٽمبر تي ڀرچونڊي شريف ڏهرڪي ۾ مسلمان ٿي 30 سيٽمبر تي صادق آباد جي عدالت ۾ رياض سيال سان شادي ڪئي ۽ 2 آڪٽومبر تي ڏهرڪي سول ڪورٽ ۾ پيش ٿي جتي سول جج ڏهرڪي انجلي مينگهواڙ ، سلميٰ بي بي کي دارالعمان سکر اماڻيو جتان رياض سيال جي درخواست تي سنڌ هاءِ ڪورٽ ڪراچي انجلي کي پناه شيلٽر هوم ڪراچي اماڻيو ۽ ڏهرڪي ۽ ڪراچي پوليس رياض سيال کي ڪراچي مان گرفتار ڪري پريڊي ٿاڻي تي رکيو هو .. جڏهن ته پهرين ڊسمبر تي سنڌ هاءِ جي ٻه رڪني بئنچ جسٽس احمد علي شيخ ۽ جسٽس سيد فاروق شاه سلميٰ بي بي وڪيل غلام قادر جتوئي پاران ڄاڻايل بئنچ تي بداعتمادي ڪرڻ تي ڪيس ڪنهن ٻئي بئنچ تشڪيل ڏيڻ لاءِ واپس چيف جسٽس سنڌ هاءِ ڪورٽ ڏانهن اماڻي ڇڏيو هو ..

 

مٽياري ۾ گورنمينٽ گرلس هاءِ اسڪول وٽان شاگردياڻي کي اغوا ڪرڻ جي ڪوشش ناڪام، شهر ۾ خوف ڇانيل

مٽياري(رپورٽر)مٽياري شهر جي وچ ۾ موجود گورنمنٽ گرلز هاءِ اسڪول وٽان ڏينهن ڏٺي جو  12 ورهين جي ستين ڪلاس جي شاگردياڻي صائمه ڌيءَ حسين بخش چنڊ کي اغوا ڪرڻ جي ناڪام ڪوشش کان پوءِ شهر واسين ۾ خوف جي لهر ڇانيل آهي. شهر واسين ان واقعي تي ڳڻتي جو اظهار ڪندي چيو آهي ته جيستائين اسڪولن ۾ سيڪيورٽي جا انتظام سخت نه ڪيا ويندا تيستائين اسان پنهنجا ٻار اسڪول نه ڇڏينداسين. اغوا واري واقعي کان يڪدم پوءِ ڊپٽي ڪمشنر مٽياري فياض حسين عباس، ايس ايس پي مٽياري امجد شيخ، پاڪستان پيپلز پارٽي ضلع مٽياري جو صدر سيد پير امير علي شاهه هاشمي، پاڪستان پيپلز پارٽي ضلع مٽياري جو نائب صدر سيد حسين علي شاهه ڄاموٽ، ڊي ايس پي مٽياري اورنگزيب عباسي گورنمنٽ گرلز هاءِ اسڪول مٽياري پهچي ويا جتي انهن اسڪول جي هيڊمسٽريس آپا شاهين سمون سان ملاقات ڪري ان واقعي تي سخت ڳڻتي جو اظهار ڪيو. ان موقعي تي صحافين سان ڳالهائيندي ايس ايس پي مٽياري امجد شيخ چيو ته شهر اندر ٿيندڙ ان واقعي تي ايڪشن ورتو ويو آهي ۽ انشاءَ الله تمام جلد ڏوهارين کي ٽريس ڪري قانون جي ڪٽهري ۾ آندو ويندو. ايس ايس پي مٽياري  امجد شيخ اسڪولن جي سيڪيورٽي جي حوالي سان ٻڌايو ته سڀاڻي کان وٺي مٽياري ضلعي جي اسڪولن جي سيڪيورٽي سخت ڪئي ويندي ۽ اسڪولن ٻاهران ڪنهن به گاڏي يا موٽر سائيڪل کي بيهڻ نه ڏنو ويندو. ايس ايس پي مٽياري امجد شيخ چيو ته جيئن ته هن وقت نفري تمام گهٽ آهي مگر تنهن هوندي به سڀني اسڪولن تي سيڪيورٽي جا جوڳا بندوبست ڪرڻ لاءِ پلان تيار ڪيو ويو آهي ۽ پيٽرولنگ ذريعي به اسڪولن جي نگراني ڪئي ويندي. ايس ايس پي مٽياري والدين کي پڻ هدايت ڪئي ته اهي پنهنجن ٻارن کي خود اسڪول جي گيٽ تائين پهچائين ۽ موڪل وقت به خود موجود رهن. ان موقعي تي پاڪستان پيپلز پارٽي ضلع مٽياري جي صدر سيد پير امير علي شاهه هاشمي صحافين سان ڳالهائيندي چيو ته شهر اندر ٿيندڙ اهڙن واقعن تي مونکي تمام گهڻي ڳڻتي آهي ۽ آئون ماٺ ڪري ڪونه ويهندس ۽ هن واقعي تي خاص ايڪشن کڻي ڏوهارين کي ڪيفر ڪردار تائين پهچائيندس. هن چيو ته اسڪولن کي سيڪيورٽي جي حوالي سان آئون وزيراعلي سنڌ سان به ملاقات ڪندس. سيد پير امير علي شاهه هاشمي ان موقعي تي اسڪول انتظاميه کي هدايت ڪئي ته اهي شاگردياڻين کي اسڪول مان تيستائين ٻاهر نه ڪڍن جيستائين انهن جو ڪو قريبي مائٽ انهن کي وٺڻ نٿو اچي. ان موقعي تي گورنمنٽ گرلز هاءِ اسڪول مٽياري جي هيڊمسٽريس آپا شاهين سمون چيو ته اسڪول طرفان سيڪيورٽي جي لاءِ درخواست ضلعي انتظاميه ڏانهن روانا ڪري ڇڏي آهي. ٻي طرف پريس ڪلب مٽياري وٽ شاگردياڻي جي اغوا خلاف سندس مائٽن طرفان ڌرڻو هڻي روڊ بلاڪ ڪيو ويو. جڏهن ته مٽياري ٿاڻي تي ٻن نامعلوم ملزمن خلاف PPC/34/364/A ۽PPC/34/511/A   گناهه نمبر 2 تحت ايف آءِ آر درج ڪئي ويئي آهي.

 

سونم ڪپور 1986ع ۾ هاءِ جيڪنگ جو نشانو بڻجندڙ آمريڪي جهاز جي ڀارتي ڄاول فلائيٽ اٽينڊنٽ جو ڪردار ادا ڪندي

نئين دهلي (شوبز نيوز) بالي ووڊ هيروئن سونم ڪپور 1986ع ۾ هاءِ جيڪنگ جو نشانو بڻجندڙ امريڪي جهاز جي فلائيٽ اٽينڊنٽ نيرجا ڀانوٽ جو ڪردار ادا ڪندي. ڀارتي سڌ سماءَ جي ذريعن مطابق اها فلم رام مدهواني ٺاهيدو. واضح رهي ته ڀارتي شهر ممبئي مان ڪراچي ايندڙ ان مسافر جهاز کي 4 هٿياربند عسڪريت پسندن اغوا ڪرڻ جي ڪوشش ڪئي هئي پر نيرجا ڀانوٽ پنهنجي جان جي پرواهه جي بغير مسافرن جون جانيون بچائڻ جي ڪوشش ۾ ماري وئي هئي. ڀارتي حڪومت نيرجا کي اعليٰ ترين سويلين ايوارڊ اشوڪ چڪر جو حقدار قرار ڏنو هو.

 

دپيڪا پاران ڪترينا ڪيف کي رنبير ڪپور سان شادي نه ڪرڻ جو مشورو

ممبئي(شوبز نيوز)رنبير ڪپور ۽ ڪترينا ڪيف جي مبينا مڱڻي جون خبرون اچڻ کانپوءِ دپيڪا پڊڪون بالي ووڊ باربي ڊول کي ڪپور خاندان جي ان هيرو سان شادي نه ڪرڻ جو مشوروڏئي ڇڏيو رنبير ۽ ڪرينا پنهنجي مبينا مڱڻي جي اطلاع کانپوءِ خبرن جو حصو بڻيل آهن، جيتوڻيڪ باربي ڊول ان جي ترديد ڪئي آهي  پوءِ به اهي افواهون رڪجڻ جو نالو ئي نه ٿيون وٺن انڊين ميڊيا جي مطابق ڪجهه ڏينهن پهريان هڪ ايوارڊ تقريب دوران دپيڪا کي چيو ويو ته هو ڪترينا ڪيف کي ڪهڙو مشورو ڏيندي ته ان تي دپيڪا چيو ته آئون ڪترينا کي چونديس ته رنبير سان شادي نه ڪري.

 

هالي ووڊ سائنس فڪشن فلم ”چيپي“ مارچ ۾ سئنيما گهرن جي زينت بڻجندي

نيويارڪ(شوبز نيوز)سائنس فڪشن فلم چيپي جي ٽريلر فلمي شوقينن کي سحر ۾ گهيري ورتو آهي، 2015ع ۾ رليز ٿيل سائنس فڪشن فلم ڇيپي جو ٽريلر جاري ڪيو ويو آهي، ٽريلر فلمي شوقينن کي سحر م گهيري ورتو آهي، فلم هلندڙ سال 6 مارچ تي سينيماگهرن جي زينت بڻجندي.

 

”دل والي دلهنيا لي جائينگي“ ۾ ڪم مان گهڻو ڪجهه سکيو: ڪرن جوهر

ممبئي (شوبز نيوز) بالي وود جي مشهور هدايتڪار فلمساز ڪرن جوهر چيو آهي ته هو فلم نگري ۾ اڄ اديتيه چوپڙا ۽ شاهه رخ خان جي سبب موجود آهي. فلم ”دل والي دلهنيا لي جائينگي“ سان پنهنجو فلمي ڪيريئر شروع ڪندڙڪرن جوهر ”دل والي دلهنيا لي جائينگي“ جي سينيما ۾ نمائش کي هڪ هزار هفتا مڪمل ٿيڻ تي چيو ته کيس اڄ فلم انڊسٽري ۾ جيڪو مقام حاصل آهي ان جو سبب شاهه رخ سان ۽ اديته چوپڙا اهن. ان فلم کي ٺاهڻ بابت لکيل ڪتاب پڙهي منهنجون يادون ٻيهر تازيون ٿي ويون آهن. ڇو ته فلم منهنجي لاءِ هڪ وڏي تربيت گاهه ثابت ٿي ۽ فلمن بابت سندس کي سڀ ڪجهه ان فلم سيکاريو آهي.

 

آءِ سي سي ون ڊي ورلڊڪپ 2015ع 14 فيبروري کان آسٽريليا ۽ نيوزيلينڊ ۾ گڏ شروع ٿيندو

حيدرآباد (اسپورٽس نيوز) آءِ سي سي ون ڊي ورلڊڪپ 2015ع 14 فيبروري کان آسٽريليا ۽ نيوزيلينڊ ۾ گڏ شروع ٿيندو، ڀارت ٽائيٽل جو دفاع ڪندو، هن وقت تائين ورلڊڪپ جي ديوي آسٽريليا تي مهربان رهي آهي.ورلڊڪپ شروع ٿيڻ ۾ باقي 30 ڏينهن رهجي ويا آهن. جنهن ۾ 14 ٽيمون اهو اعزاز پنهنجي نالي ڪرڻ لاءِ مقابلا ڪنديون. جن کي ٻن گروپن ۾ ورهايو ويو آهي. گروپ اي ۾ انگلينڊ، آسٽريليا، سريلنڪا، بنگلاديش، نيوزيلينڊ، افغانستان ۽ اسڪاٽ لينڊ جڏهن ته گروپ بي ۾ پاڪستان، ڀارت، ڏکڻ آفريقا، ويسٽ انڊيز، زمبابوي، آئرلينڊ ۽ گڏيل عرب امارات جون ٽيمون شامل آهن. پاڪستان پنهنجي ورلڊڪپ جي شروعات 15 فيبروري تي ايڊيليڊ اوول گرائونڊ م ڀارت سان ميچ کيڏي ڪندو. ميگا ايونٽ جو پهريون ڪوارٽر فائينل 18 مارچ، پهرين سيمي فائينل ميچ 24 مارچ، ٻي ميچ 26 مارچ ۽ فائينل 29 مارچ تي کيڏيو ويندو. ورلڊ ڪپ ڪرڪٽ جي دنيا ۾ هن وقت تائين آسٽريليا جي قسمت ٻين ٽيمن جي ڀيٽ ۾ اڳڀري رهي آهي. مجموعي طور تي 10 ورلڊڪپ ٿي چڪا آهن جنهن ۾ آسٽريليا 6 ڀيرا فائينل ۾ آيو 4 کٽيائين ۽ 2 هارايائين. جڏهن ته ڀارت 3 ڀيرا فائينل ۾ آيو ، 2 ڀيرا کٽيو هڪ ڀيرو هارايو. اهڙي ريت ويسٽ انڊيز به 3 ڀيرا فائينل ۾ آيو 2 کٽيائين ۽ هڪ هارايائين. سريلنڪا 3 ڀيرا فائينل ۾ آيو هڪ ڀيرو کٽيائين ۽ 2 ڀيرا هارايائين. پاڪستان 2 ڀيرا فائينل ۾ آيو هڪ ڀيرو کٽيائين ۽ هڪ ڀيرو هارايائين جڏهن ته انگلينڊ جي ٽيم 3 ڀيرا فائينل ۾ آئي آهي ۽ بدقسمتي سان هڪ به ميچ نه کٽي اٿس.