تازيون خبرون

Daily Archives: January 15, 2015

فوجي عدالتون بڻائڻ جو فيصلو جمهوري حڪومت ڪيو: نواز شريف

اسلام آباد (بيورو) وزيراعظم نواز شريف چيو ته انصاف جي تيز فراهمي دهشتگردي جي لعنت جي خاتمي لاءِ ضروري آهي جنهن جي خاتمي لاءِ آئين ۽ آرمي ايڪٽ ۾ ترميم ڪئي وئي آهي، فوجي عدالتون بڻائڻ جو فيصلو مارشل لا ايڊمنسٽريٽر نه جمهوري حڪومت ڪيو، نفرت ۽ فرقيواريت ڦهلائڻ وارن جا ڪيس فوجي عدالتن ۾ هلندا، ايوان صدر ۾ صدر ممنون حسين ۽ وزيراعظم نواز شريف سان بزنس ڪميونٽي جي وفد ملاقات ڪئي ان موقعي تي وزيراعظم جو چوڻ هو ته آپريشن ضرب عضب دهشتگردي جي خاتمي لاءِ انتهائي اهم آهي، مذهب جي نالي تي معاشري کي  دهشتگرد زده ڪندڙن کي انصاف جي ڪٽهڙي ۾ آڻينداسني، هن چيو ته پاڪستان کي اڄ دهشتگردي ۽ توانائي بحران جا 2 وڏا مسئلا سامهون آهن جن کي منهن ڏيڻ لاءِ قدم کنيا پيا وڃن،  2017ع تائين وڌ کان وڌ بجلي پيدا ڪرڻ چاهيون ٿا، مشڪلاتن کان گهٻرايا ناهيون، مسئلا حل ڪنداسين، ڪراچي ۾ ايل اين اي ٽرمينل مڪمل ٿي ويو آهي امپورٽ جا ڪانٽريڪٽ به جلد ٿي ويندا، گهريلو صارفين لاءِ به بجلي ۽ گيس جا مسئلا حل ڪنداسين ڪاروباري طبقي لاءِ پئٽرول ۽ بجلي جا مسئلا حل ڪر ي رهيا آهيون، وزيراعظم چيو ته مشڪلاتن باوجود معيشت صحيح راهه تي هلي رهي آهي، ڌرڻا نه هجن ها ته ملڪ جي معيشت وڌيڪ بهتر هجي ها، انفراسٽرڪچر جي تعمير لاءِ تيزي سان ڪم جاري آهي، منصوبن لاءِ ٽينڊر طلب ڪري ورتا آهن، ڪراچي لاهور موٽروي  جي تعمير لاءِ 55 ارب روپين جو فنڊ جاري ڪري ڇڏيو آهي، ايران کان گوادر تائين گيس پائپ لائن وڇائي ويندي ۽ گوادر کان نوابشاهه گيس پائپ لائن وڇائڻ جو فيصلو به ڪري ورتو آهي،  روپئي جي قدر ۾ اضافو ۽ پاڪستان کي ايندڙ نسلن جي رهڻ جي قابل بڻائڻو آهي، وزيراعظم جو چوڻ هو ته ملڪ جي پرڏيهي ناڻي جا ذخيرا 15 ارب ڊالر ٿي ويا آهن ٽيڪس ريٽ گهٽ ٿيڻ گهرجي.

 

ڀٽو عزم سان پيار ڪندڙ شهادت کان ناهي ڊڄندو: آصف زرداري

ڪراچي(اسٽاف رپورٽر) سنڌ سرڪار، پوليس جي شهيد اهلڪارن جي پونئيرن کي 20 ، 20 لک رپيا معاوضي جا چيڪ فراهم ڪري ڇڏيا، آصف زرداري پاران شهيدن جي ٻارن کي مفت تعليم ڏيڻ جو اعلان، جنهن کي به ڀٽو ازم سان پيار آهي اُهو شهادت کان ناهي ڊڄندو، تفصيل موجب: اڳوڻي صدر آصف علي زرداري چيو آهي ته آخري وقت تائين نظرياتي جنگ وڙهنداسين ڪير به پنهنجي سوچ زبدستي لاڳو نٿو ڪري سگهي. شهرين جي حفاظت لاءِ جانيون قربان ڪندڙ پوليس اهلڪارن کي اڪيلو نه ڇڏينداسين. وزيراعليٰ هائوس ڪراچي ۾ شهيد پوليس اهلڪارڻ جي وارثن ۾ امدادي چيڪ ورهائڻ واري تقريب کي خطاب ڪندي آضف علي زرداري چيو ته پيپلزپارٽي جي تاريخ قربانين سان ڀريل آهي ڀٽو ازم سان پيار ڪندڙ شهادت کان ناهي ڊڄندو، نظرياتي جنگ وڙهي رهيا آهيون جيڪا آخري وقت تائين جاري رهندي ڪير به زبردستي پنهنجي لاڳو نٿو ڪري سگهي. اڳوڻي صدر چيو ته شهرين جي حفاظت لاءِ جانيون قربان ڪندڙ پوليس اهلڪارن کي اڪيلو نه ڇڏيو ويندو. امدادي رقم هڪ ڪروڙ روپيا ڪئي ويندي. شهيدن جي ٻارن لاءِ تعليم به مفت ڪنداسين. آصف زرداري پاران سنڌ حڪومت کي شهيد اهلڪارن جي وارثن جي رجسٽريشن ڪرڻ جي به هدايت ڪئي. وڏي وزير پوليس ۽ رينجرز جي ڪارڪردگي تي فخر جو اظهار ڪندي چيو آهي ته صوبي ۾ امن امان جي صورتحال ڪافي حد تائين بهتر ٿي آهي. سي ايم هائوس ڪراچي ۾ شهيد ٿيل پوليس اهلڪارن جي پونئيرن ۾ چيڪ ورهائڻ واري تقريب ٿي، جنهن ۾ اڳوڻي صدر آصف علي زرداري، وڏي وزير قائم علي شاهه، آءِ جي غلام حيدر جمالي ۽ ٻين پوليس جي اعليٰ عملدارن توڙي شهيدن جي وارثن وڏي انگ ۾ شرڪت ڪئي. تقريب کي خطاب ڪندي وڏي وزير سيد قائم علي شاهه چيو ته پوليس اهلڪار مڙسي سان ڏوهارين جو مقابلو ڪري رهيا آهن. قائم علي شاهه چيو ته پوليس ۽ رينجرز جي بهتر ڪارڪردگي سبب ڪراچي ۾ امن امان جي صورتحال بهتر ٿي آهي. وڏي وزير چيو ته اهلڪارن جانين جا نذرانا ڏئي صوبي اندر دهشتگردي ۾ گهٽتائي آندي آهي. هـُن چيو ته 10 محرم الحرام ۽ 12 ربيع الاول تي بهترين حفاظتي انتظام ڪيا ويا، جڏهن ته ڪراچي آپريشن ۾ وڏيون ڪاميابيون مليون آهن. قائم علي شاهه چيو ته ڪجهه عنصر سنڌ سرڪار تي اجايو تنقيد ڪري رهيا آهن. ان موقعي تي وڏي وزير شهيد ٿيل پوليس اهلڪارن جَي پونئيرن لاءِ معاوضو 5 لک مان وڌائي 20 لک ڪرڻ جو اعلان پڻ ڪيو. تقريب کي خطاب ڪندي آءِ جي سنڌ پوليس غلام حيدر جمالي چيو ته صوبي ۾ امن قائم ڪرائڻ لاءِ سنڌ پوليس جي جوانن وڏيون قربانيون ڏنيون آهن. غلام حيدر جمالي چيو ته پنجاب پوليس جي برابر پگهارون ڪري سنڌ پوليس کي تحفو ڏنو ويو. هـُن چيو ته ڪراچي ۾ ڏوهارين خلاف جاري آپريشن ۾ اهم ڪاميابيون مليون آهن، مڪمل امن قائم ٿيڻ تائين آپريشن جاري رکيو ويندو. آءِ جي سنڌ چيو ته پوليس کي اعليٰ معيار جي جديد تربيت ڏني پئي وڃي، جڏهن ته پوليس جديد هٿيارن ۽ سامان جي ضرورت آهي. غلام حيدر جمالي چيو ته پنجاب پوليس جي مقابلي ۾ سنڌ پوليس کي تمام گهٽ وسيلا فراهم ڪيا ويا آهن. آءِ جي سنڌ پوليس جو وڌيڪ چوڻ هو ته اسپيشل برانچ ۽ سي آءِ ڊي جي سکيا کي وڌيڪ بهتر بڻايو ويندو. غلام حيدر جمالي سنڌ سرڪار کان مطالبو ڪيو ته جاني نقصان گهٽائڻ لاءِ پوليس کي اي پي سي ۽ ٻيو سامان فراهم ڪيو وڃي.

 

اڪبر بگٽي قتل ڪيس ۾ اڳوڻي صدر پرويز مشرف تي فرد جرم لاڳو

ڪوئيٽا(م.ڊ) دهشتگردي ٽوڙ عدالت نواب اڪبر بگٽي قتل ڪيس ۾ غير حاضري تي اڳوڻي صدر پرويز مشرف سميت 3 ڄڻن تي فرد جرم لاڳو ڪري ڇڏيو ڪوئيٽا جي دهشتگردي واري عدالت ۾ نواب اڪبر بگٽي قتل ڪيس جي ٻڌڻي ٿي ان موقعي تي اڳوڻي صدر پرويز مشرف جي وڪيل عدالت کي استدعا ڪئي ته اڳوڻو صدر طبيعت خراب هجڻ سبب پيش نه ٿي سگهيو ان لاءِ ان کي حاضري کان ڇوٽ ڏني وڃي جنهن تي عدالت ميڊيڪل رپورٽ نه جوڙڻ تي سخت ڪاوڙ جو اظهار ڪيو جڏهن ته درخواستگذار جميل بگٽي جي وڪيل عدلات کي ٻڌايو ته اسان مختلف ٽي وي چئنلن تي ڏٺو آهي ته پرويز مشرف انٽرويو ڏئي ٿو پر عدالت سامهون پيش نه ٿو ٿئي، عدالت وڪيلن جا دليل ٻڌڻ کانپوءِ اڳوڻي صدر پرويز مشرف، اڳوڻي وفاقي گهرو وزير آفتاب احمد خان شيرپائو ۽ صوبائي گهرو وزير شعيب نوشيرواني تي فرد جرم لاڳو ڪندي ٻڌڻي 4 فيبروري تائين ملتوي ڪري ڇڏي.

 

گو عمران گو جو نعرو ڏکويل دلين جي ترجماني آهي: پرويز رشيد

اسلام آباد (بيورو) اطلاعات واري وفاقي وزير چيو آهي ته هو بيلٽ پيپرز جي فرانزڪ ٽيسٽ ڪرائڻ جي پيشڪش تي هاڻ به قائم آهي عمران خان 48 ڪلاڪن ۾ ان کي قبول ڪري پارليامينٽ هائوس اسلام آباد ٻاهران ميڊيا سان ڳالهائيندي وفاقي اطلاعات واري وزير جو چوڻ هو ته عمران خان پنهنجي خواهشن کي پورو ڪرڻ لاءِ جمهوري نظام کي ڪمزور ڪرڻ چاهي ٿو هن 6 مهينا جمهوريت خلاف سازش ڪئي ۽ هاڻ دهشتگردن خلاف حڪومتي قدمن جي راهه ۾ رڪاوٽون وجهي رهيو آهي عمران خان جي سياست ڪوڙ تي ٻڌل آهي، هو قوم سماهون سچ نه ٿو رکي، عمران خان پنهنجي سياسي جي طريقي کي تبديل ڪري هن کي گهرجي ته هو جمهوريت کي مضبوط ڪري، عمران خان کي آرمي پبلڪ اسڪول ۾ ” گو عمران گو“ جا نعرا ٻڌڻا پي،ا گو عمران گو جو نعرو پاڪستاني جي ڏکايل دلين جي ترجمان ڪري ٿو، پرويز رشيد وڌيڪ چيو ته جاچ ڪميشن اهڙين شڪايتن تي بڻجي ٿي جيڪي ٽربيونل جي دائري ۾ نه اچن، اين اي 122 جي ووٽن جي جاچ ڪندڙ لوڪل ڪميشن ڪٿي به نه چيو ته ووٽن جي تصديق نٿي ٿي سگهي، هن جو چوڻ هو ته ڪجهه ووٽن جي ڪائونٽر فائل تي صحيحون ناهن، عمران خان بوگس ووٽن جي نشاندهي ڪئي هو بيلٽ پيپرز جي فرانزڪ ٽيسٽ ڪرائڻ جي پيشڪش تي اڄ به قائم آهي عمران خان 48 ڪلاڪن ۾ فرانزڪ ٽيسٽ جي پيشڪش قبول ڪري هن چيو ته عمران خان ڄاڻي ٿو ته ان کي جوڊيشل ڪميشن به شڪست ٿيندي،  ان لاءِ هاڻ هو ان کان پوئتي هٽي رهيو آهي.

 

هارين کان جبري پورهيو وٺڻ خلاف ڪيس: سپريم ڪورٽ سنڌ حڪومت کان رپورٽ طلب ڪري ورتي

اسلام آباد(بيورو) سپريم ڪورٽ سنڌ صوبي ۾ هارين کان جبري پورهيو ڪرائڻ خلاف ڪيس ۾ سنڌ حڪومت کان هڪ مهيني اندر رپورٽ طلب ڪندي چيو آهي ته عدالت کي ٻڌايو وڃي ته ڇا سنڌ ۾ هاڻي به جبري پورهيو ورتو وڃي ٿو ۽ ڇا صوبي ۾ ان حوالي سان موجود قانون لاڳو ٿي رهيا آهن يا نه. عدالت ان معاملي ۾ معاونت لاءِ اٽارني جنرل سلمان اسلم بٽ کي به ايندڙ ٻڌڻي تي طلب ڪري ورتو آهي. اربع تي جسٽس انور ظهير جمالي جي سربراهي ۾ 3 رڪني بئنچ سنڌ قومي تنظيم جي سربراهه عبدالحفيظ قريشي طرفان ايڊووڪيٽ اڪرم شيخ پاران داخل درخواست جي ٻڌڻي ڪئي. ان موقعي تي درخواست گذار جي وڪيل پيش ٿي عدالت آڏو پنهنجي موقف جي حق ۾ دليل ڏنا پر عدالت شروعاتي دليل ٻڌڻ بعد سنڌ حڪومت کان رپورٽ طلب ڪندي معاونت لاءِ اٽارني جنرل کي طلب ڪري ورتو ۽ ڪيس جي وڌيڪ ٻڌڻي هڪ مهيني تائين ملتوي ڪري ڇڏي.

 

آرمي چيف ٽن ڏينهن جي دوري تي برطانيا پهچي ويو

راولپنڊي (مانيٽرنگ ڊيسڪ) آرمي چيف جنرل راحيل شريف ٽن ڏينهن جي دوري تي برطانيه پهچي ويو آهي، آءِ ايس پي آر چيو آهي ته پاڪ فوج جو سربراهه دوري دوران سياسي ۽ عسڪري قيادت سان خطي جي سلامتي جي حوالي سان اهم معاملن تي ڳالهيون ڪندو. آءِ ايس پي آر پاران جاري ڪيل بيان موجب آرمي چيف جنرل راحيل شريف برطانيا جي ٽن ڏينهن جي سرڪاري دوري تي اڄ لنڊن روانو  ٿي ويو آهي. آءِ ايس پي آر موجب، آرمي چيف دوري دوران برطانيا جي سياسي ۽ عسڪري قيادت سان ملاقاتون ڪندو. ذريعن موجب آرمي چيف برطانوي قيادت سان  ملاقاتن دوران دهشتگردي خلاف قدمن سميت خطي جي سلامتي وارن معاملن تي ڳالهيون ڪندو.

 

پنجاب کانسواءِ ڪنهن به صوبي قومي ايڪشن پلان جي هدف جي رپورٽ پيش نه ڪئي: وزير اعظم کي آگاهي ڏئي ڇڏي

اسلام آباد(بيورو) : وزيراعظم نواز شريف کي دهشتگردي جي قومي ايڪشن پلان تي عملدرآمد جي اجلاس ۾ آگاهه ڪيو ويو آهي ته سواءِ پنجاب حڪوم جي ڪنهن صوبي هينئر تائين ايڪشن پلان جي ڏنل هدفن جي باري ۾ وفاقي حڪومت کي رپورٽ پيش ناهي ڪئي، جنهن تي  وزيراعظم گهرو وزير چوڌري نثار ۽ خزاني واري وزير اسحق ڊار کي هدايت ڪئي آهي ته هو ٽنهي صوبائي حڪومتن سان رابطو ڪر يان عمل کي تيز ڪري ۽ ڪجهه ڏينهن ۾ هو ٻيهر قومي ايڪشن پلان تي عملدرآمد کي چيف ڪرڻ لاءِ جائزي اجلاس منعقد ڪندو.

 

آمريڪا ملا فضل الله کي عالمي دهشتگرد قرار ڏئي ڇڏيو

واشنگٽن(م.ڊ) آمريڪا، پابندي مڙهيل تحريڪ طالبان پاڪستان جي سربراهه مــُلا فضل الله کي عالمي دهشتگرد قرار ڏئي ڇڏيو آهي. آمريڪي پرڏيهي کاتي موجب آمريڪا مــُلا فضل الله جو نالو عالمي دهشتگردن جي فهرست  شامل ڪري ڇڏيو. ملا فضل الله کي عالمي دهشتگرد قرار ڏيڻ بعد هاڻي ڪو به آمريڪي شهري تحريڪ طالبان جي سربراهه سان ڪنهن به قسم جي لين دين نه ٿا ڪري سگهن جڏهن ته آمريڪا ۾ ملا فضل الله جا سمورا اثاثا منجمند ڪيا ويندا. واضح رهي ته 2013 ۾ حڪيم الله محسود جي مارجڻ کانپوءِ پابندي مڙهيل تحريڪ طالبان پاڪستان جو سربراهه مــُلا فضل الله کي چونڊيو ويو هو. سورنهن ڊسمبر 2014 تي پشاور ۾ آرمي پبلڪ اسڪول تي ملا فضل الله جي سربراهي ۾ پابندي مڙهيل تحريڪ طالبان حملو ڪيو هو جنهن ۾ 134 ٻارن سميت 144 ماڻهو شهيد ٿيا هئا جنهن بعد آرمي چيف جنرل راحيل شريف ۽ ڊي جــِي ليفٽيننٽ جنرل رضوان اختر افغانستان جو هنگامي دورو ڪري افغان اختيارين کي ملا فضل الله خلاف ڪارروائي جو مطالبو ڪيو هو

 

لاهور: شادي هال جي ڀت ڪري پئي، ڪنوار سميت 5 ڄڻا فوت ، 20 کان وڌيڪ زخمي

لاهور (بيورو) لاهور ۾ شادي جون خوشيون ماتم ۾ تبديل ٿي ويون، شاد باغ واري علائقي ۾ ميندي تقريب دوران شادي هال جي ڀـِت ڪرڻ جي نتيجي ۾ ڪراچي واسي ڪنوار سميت 5 ڄڻا دٻجي فوت ٿي ويا، جڏهن ته گهوٽ سميت 20 کان وڌيڪ زخمي  آهن، گوجرانوالا ۾ به گهر جي ڇت ڪرڻ سبب 2 ٻارڙا فوت ٿي ويا آهن. شادباغ واري علائقي ۾ ميندي جي تقريب جاري هئي ته تيز برسات ۽ هوائن سبب شادي هال جي ڀت ڪري پئي، جنهن جي نتيجي ۾ ڪنوار ۽ ٻن ٻارڙن سميت 5 ڄڻا فوت ٿي ويا ۽ 20 کان زخمي ٿي پيا آهن، جن ۾ گهوٽ به شامل آهي.  واقعي ۾ فوت ٿيل ڪنوار شمائله جو تعلق ڪراچي سان هو، جيڪا پنهنجي گهر وارن ۽ مائٽ سان گڏ چاچي ياسين جي گهر شادي جي تقريب ۾ شرڪت لاءِ لاهور آئي هئي. تقريب ۾ ناقص مٽيريل سان تيار ٿيل شادي هال جي ڀت ڪرڻ سبب  شادي جون خوشيون ماتم ۾ تبديل ٿي ويون. فوتين ۾ ڪنوار شمائله، 2 ٻارڙا علي عامر، نعمان، مووي ٺاهيندڙ عامر ۽ هڪ عورت شامل آهن،  زخمين کي ميو ۽ خواجه سعيد اسپتال منتقل ڪيو ويو آهي، جتي کين طبي امداد ڏني پئي وڃي. پنجاب جي وڏي وزير شهباز شريف واقعي تي افسوس جو اظهار ڪندي ذميوارن خلاف ڪارروائي جو حڪم ڏنو آهي. هوڏانهن گوجرانوالا جي رمضانپور واري علائقي ۾ گهر جي ڇت ڪرڻ سبب 2 معصوم ٻارڙا فوت ٿي ويا ۽ 3 زخمي ٿي پيا. زخمين کي اسپتال منتقل ڪيو ويو آهي، جتي کين طبي امداد فراهم ڪئي پئي وڃي.

 

مشڪل وقت ۾ شهيد ٻارڙن جي والدين سان گڏ آهيون: عمران خان

پشاور (م.ڊ) پاڪستان تحريڪ انصاف جي چيئرمين عمران خان چيو آهي ته آرمي پبلڪ اسڪول ۾ شهيد ٻارڙن جي والدين جي ڏک کي سمجهان ٿو جن جا ٻار شهيد ٿيا انهن لاءِ تمام  مشڪل وقت آهي، آرمي پبلڪ اسڪول پشاور جي دوري کانپوءِ پريس ڪانفرنس کي خطاب ڪندي هن جو چوڻ هو ته ٻارن جو حوصلو ڏسي خوشي ٿي، انهن تمام گهڻي همت ڏيکاري، انهن کي سلام پيش ڪريان ٿو اسان ڪنهن به صورت ملڪ ۾ تعليم کي متاثر ٿيڻ نه ڏينداسين، جيڪڏهن تعليم ناهي ته به قوم ترقي نه ٿي ڪري سگهي پيغام ڏيڻ چاهيان ٿو ته اسان جا ٻار دهشتگردن کان نه ٿا ڊڄن، عمران خان شهيد ٿيندڙ ٻارڙن جي والدين سان ملڻ انهن جي گهرن ۾ وڃڻ جو اعلان ڪندي چيو ته اسان جي خواهش هئي ته پهرئين ڏينهن اچون جڏهن نه اچي سگهياسين.