تازيون خبرون

Daily Archives: January 14, 2015

سپر هاءِ وي حادثي جو شڪار ٽئنڪر خالي هو، باهه لڳڻ جو ڪارڻ بس جو سيلينڊر ڦاٽڻ آهي، ابتدائي رپورٽ

ڪراچي (اسٽاف رپورٽر) ڪراچي ۾ سپر هاءِ وي لنڪ روڊ تي ٿيل هولناڪ حادثي جي ابتدائي رپورٽ سامهون اچي وئي. رپورٽ ۾ باهه لڳڻ جو ڪارڻ بس ۾ لڳل گئس سيلينڊر جو ڦاٽڻ ٻڌايو ويو. سپر هاءِ وي لنڪ روڊ حادثي جي ابتدائي رپورٽ موجب بس اندر باهه گئس سيلينڊر ڦاٽڻ سان لڳي. حادثي وقت ٽينڪر ۾ آئل يا ڪيميڪل موجود نه هو پر اهو ٽينڪر بلوچستان جي علائقي لسبيلا ۾ رجسٽرڊ هو ۽ کير جي سپلاءِ لاءِ استعمال ڪيو وڃي ٿو. پوليس موجب ڊرائيور آصف جکراڻي ۽ بس مالڪ بدر ابڙو جي گرفتاري لاءِ گلشن حديد ۽ اندروني سنڌ ڇاپا هنيا پيا وڃن. ٽينڪر جي مالڪ ۽ ڊرائيور جو به سراغ ناهي لڳائجي سگهيو. ٻئي پاسي سنڌ سرڪار گاڏين جي فٽنس جا اختيار پوليس کاتي کان وٺي ٽرانسپورٽ کاتي جي حوالي ڪري ڇڏيا، اها منظوري وڏي وزير ڏني

 

تعليم کاتي ۾ نين ڀرتين لاءِ هڪ هفتي اندر ضلعي وائيز تفصيل طلب,ڀرتيون ميرٽ تي ٿينديون: نثار کهڙو

ڪراچي (اسٽاف رپورٽر) سنڌ جي تعليم واري سينيئر وزير نثار احمد کهڙي تعليم کاتي ۾ نين ڀرتين لاءِ کاتي جي ڊاريڪٽرن ۽ ڊي اي اوز کان رٽايرڊ، فوتي ملازمن جي خالي جاين سميت نئين منظور شده خالي جاين جا  هڪ هفتي اندر ضلعي وائيز تفصيل طلب ڪري ورتا آهن ۽ آفيسرن کي هدايت ڪئي آهي ته هو فوري طور تي خالي جاين جا تفصيل فراهم ڪن. تفصيل فراهم نه ڪندڙ آفيسرن کي معطل ڪيو ويندو.اهڙيون هدايتون هن اڱاري ڏينهن سندس صدارت ۾ ٿيل تعليم کاتي سنڌ جي سڀني آفيسرن جي اجلاس جي صدارت ڪندي جاري ڪيون. اجلاس ۾ تعليم کاتي جي سيڪريٽري سميت سنڌ جي ڊاريڪٽرن ۽ ڊي اي اوز شرڪت ڪئي. نثار احمد کهڙو چيو ته پيپلز پارٽي عوام جي گهرن جا چلها ٻارڻ تي يقين رکي ٿي ان ڪري فوري تي خالي جاين جا تفصيل فراهم ڪيا وڃن ته جيئن اشتهار ڏئي ميرٽ تي بي روزگار نوجوانن کي روزگار فراهم ڪري سگهجي. هن چيو ته جيڪي آفيسر هڪ هفتي اندر تفصيل فراهم نه ڪندا انهن ڊي اي اوز ۽ ڊاريڪٽرن کي شوڪاز نوٽيس جاري ڪرڻ سان گڏوگڏ کين معطل ڪيو ويندو ۽ ان حوالي سان سندن ڪنهن به ٽال مٽول کي برداشت ۽ قبول نه ڪيو ويندو.ان موقعي تي هن تعليم واري سيڪريٽري کي خالي جاين جا تفصيل جمع نه ڪرائيندڙ آفيسرن کي فوري شوڪاز نوٽيس جاري ڪرڻ جون پڻ هدايتون ڪيون.نثار احمد کهڙي آفيسرن تي ڪاوڙ جو اظهار ڪندي چيو ته ميرٽ تي اين ٽي ايس ٽيسٽ ذريعي ڀرتي ڪيل مختلف ضلعن مان ڪيترن اميدوارن کي اڃان تائين پگهارون جاري نه ٿيڻ جون شڪايتون مليون آهن. مون کي عوام جي پريشاني جو احساس آهي ۽ بجيٽ به موجود آهي ته پوءِ کين پگهارون جاري ڇو نه ٿيون  آهن ۽ انهن اميدوارن جي پگهارن بابت ڊيٽا بيس ڇو نه موڪلي وئي آهي ان بابت وضاحت ڏيو جيڪڏهن آفيسرن ڪم نه ٿا ڪري سگهن ته پوءِ گهر هليا وڃن. هن چيو ته ان ڳالهه کي ڪڏهن به برداشت نه ڪندس ته ميرٽ تي ڀرتي ٿيڻ باوجود اهي اميدوار پگهارن لاءِ پريشان ٿين. ان موقعي تي هن آفيسرن کي پي ايس ٽي، جي ايس ٽي ۽ ايڇ ايس ٽي جي سينارٽي لسٽ پڻ فوري طور جمع ڪرائڻ هون هدايتون پڻ جاري ڪيون.

 

تحريڪ انصاف پاران 8 1 جنوري کان مختلف شهرن ۾ ڌرڻو ڪنوينشز ڪوٺائڻ جو اعلان

اسلام آباد (بيورو) پاڪستان تحريڪ انصاف 8 1  جنوري کان مرحليوار تمام وڏي شهرن ۾ ورڪرز ڪنوينشن ڌرڻن جو اعلان ڪري ڇڏيو، 8 1  جنوري تي پهريون ورڪرز ڪنوينشن اسلام آباد، پهرين فيبروري تي ڪراچي، 8  تي لاهور، 5 1  فيبروري تي پشاور ۾ ڪنوينشن ڪوٺرايو ويندو. تفصيل موجب پاڪستان تحريڪ انصاف 8 1  جنوري کان مرحليوار ملڪ جي وڏن شهرن ۾ ورڪرز ڪنوينشن ڌرڻن جو اعلان ڪري ڇڏيو. ترجمان موجب 8 1  جنوري تي ورڪرز ڪنوينشن ڊي چوڪ بدران خانگي ريسٽورنٽ ۾ ٿيندو، جنهن کي عمران خان خطاب ڪندو

 

اڪثر خبرن جي زينت بڻيل ڪترينه ڪيف هڪ ڀيرو ٻيهر خبرن جي سرخين ۾ موجود

ممبئي: بالي ووڊ جي خوبصورت جوڙي ڪترينا ۽ رنبير هونئن ته اڪثر خبرن جي زينت بڻجندا رهندا آهن ۽ پنهنجن چاهيندڙن کي ٿورو پريشان به ڪري ڇڏيندا آهن ۽ هاڻ هڪ ڀيرو ٻيهر ڪترينا خبرن جي سرخين ۾ موجود آهي ڇو ته هن پروزر انداز ۾ رنبير سان پنهنجي مڱڻي جي ترديد ڪري ڇڏي آهي ڀارتي ميڊيا مطابق ڪترينا جي ترجمان ڪترينا جي رنبير ڪپور سان مڱڻي جي ترديد ڪندي چيوآهي ته ان سلسلي ۾ جيتريون به خبرون سماهون اچي رهيون آهن اهي بي بنياد ۽ افواهن تي ٻڌل آهن جڏهن ته گذريل مهيني نئين سال جي شروعات کان ڪجهه ڏينهن پهريان رنبير ڪپور ۽ ڪترينا پاران هڪ ٻئي کي مڱڻي جي منڊي پارائڻ جون خبرون ميڊيا جي زينت بڻيل هيون جڏهن ته ڪنهن جي طرفان ان جي تصديق نه ڪئي وئي، ٻئي طرف رنبير ڪپور به ڪڏهن ڪترنيا سان پنهنجن لاڳاپن جي تصديق ناهي ڪئي ۽ هميشه ميڊيا کي ظاهر ڪيو ته ان جي ۽ ڪترينا جي وچ ۾ دوستي کان علاوه ٻيو ڪجهه ناهي.

 

گولڊن گلوب ايوارڊ، بوائي هوڊ بهترين فلم قرار

لاس اينجلس(شوبز نيوز): لاس اينجلس ۾ گولڊن گلوب ايوارڊز جو ميلو سجايو ويو، بهترين فلم جو ايوارڊ بوائي هوڊ کٽيو ايڊي ريڊ مين بهترين اداڪار جڏهن ته بهترين اداڪاره جو اعزاز جولياني مور جي حصي ۾ آيو، لاس اينجلس جي بيورلي هلٽن هوٽل هالي ووڊ جي چمڪندڙ ستارن سان چمڪي پئي، امل ڪالوني به ريڊ ڪارپيٽ جي رونق وڌائي بهترين فلم جو ايوارڊ بوائي هوڊ جي نالي ٿيو، دي ٿيوري آف ايوري ٿنگ جي ايڊي ريڊمين کي بهترين اداڪار قرار ڏنو ويو سٽيل الائس جي جولياني مور بهترين اداڪاره جو ايوارڊ حاصل ڪيو بوائي هوڊ جي رچرڊ لنڪ ليٽر کي بهترين هدايتڪار قرار ڏنو ويو، اينيميٽيڊ فلم هائو ٽو ٽرين يور ڊريگن ٽو بهترين اينيميٽيڊ فلم جو ايوارڊ حاصل ڪيو جڏهن ته انٽرٽينمينٽ جي دنيا ۾ آئوٽ اسٽينڊنگ پرفارمنس تي جارج ڪلوني کي دي سيسل بي ڊي مائيڪل ايوارڊ سان نوازيو ويو

 

عامر خان پاڪستان ويب سائيٽن تي سندس انٽرويو ۾ غلط نامزد ڪرڻ تي حرجاني جو نوٽيس موڪلي ڇڏيو

ئين دهلي (شوبز نيوز) ڀارتي اداڪار عامر خان پاڪستان ويب سائيٽن تي سندس انٽرويو ۾ غلط نامزد ڪرڻ تي حرجاني جو نوٽيس موڪلي ڇڏيو، عامر خان پنهنجي وڪيل آنند ديسائي وسيلي پاڪستاني ويب سائيٽن کي کيس هڪ انٽرويو ۾ زوري شامل ڪرڻ تي نوٽيس موڪليو، عامر موجب هن ڪنهن به قسم جو انٽريو ناهي ڏنو. عامر خان جي وڪيل موجب ويب سائيٽن جي اهڙي حرڪت سبب هن جي چاهيندڙن سندس بابت غلط راءِ جوڙڻ جي ڪوشش ڪئي وئي آهي، عامر جي وڪيل آنند ديسائي موجب عامر خان هن وقت آمريڪا ۾ آهي ۽ موٽندي ئي سائبر ڪرائيم تحت ممبئي پوليس ۾ ڪيس به داخل ڪرائيندو. ياد رهي ته عامر خان جي مشهور فلم ”پي ڪي“ کان پوءِ ڪجهه پاڪستاني ويب سائيٽن عامر خان بابت هڪ انٽرويو هلايو هو، جنهن ۾ هن کان ڪيترائي سوال ڪيا ويا ۽ انهن مان هڪ سوال هو ته اوهان جي فلم ۾ مندر مان پئسا چورائڻ جو سين ته آهي پر  ڪنهن درگاهه تان چادر چورائڻ جو سين ڇو ناهي، تنهن عامر جو جواب هو ته پئسن سان گذران ٿي سگهي ٿو جڏهن ته چادر سان ڪجهه به نه ٿي سگهندو. تنهن انٽرويو بابت عامر خان جو چوڻ آهي ته اهڙو انٽرويو هن ڏنو ئي ناهي

 

پاڪستاني اداڪار فيضان خواجه به هاڻ بالي ووڊ فلم ۾ پنهنجي اداڪاري جا جوهر ڏيکاريندو

لاهور(شوبز نيوز): فواد خان ۽ علي ظفرجي انڊين فلمي صنعت ۾ ڪاميابين ۽ ماهره خان جو شاهه رخ خان سان ڪاسٽ ٿيڻ کانپوءِ هڪ ٻيو ٽي وي اسٽار فيضان خواجه به پاڙيسري ملڪ ۾ فلمي اداڪار بڻجڻ وڃي رهيو آحي ماضي جي اداڪارهزينت امان جي پٽ اذان خان جي ڊائريڪشن ۾ ٺهندڙ فلم نڪسٽر ۾ پاڪستاني نوجوان اداڪار فيضان خواجه پنهنجي ادڪاري جا جوهر ڏيکارڻ جلد اچي رهيوآهي فيضان خواجه پاڪستاني پرستارن لاءِ اپرو ناهي جنهن گذريل ٽن سالن ۾ ڪيترن ئي ڪامياب ڊرامن ۾ ڪم ڪيو آهي فيضان پنهنجي پهرئين بالي وُڊ پراجيڪٽ مان ڪافي پراميد آهي ۽ ان حوالي سان هن جو چوڻ آهي ته اذان خان ڊرامن ۾ منهنجي پرفارمنس کي ڏسي فلم جي آفر ڪئي ان ۾ پنهنجو رول ٻڌم ته ڏاڍو پسند آيو.

 

عالمي دنيا جو اهم ايونٽ يارهون ورلڊ ڪپ ڪرڪيٽ ٽورنامينٽ 14 فيبروي کان شروع ٿيندو

حيدرآباد (اسپورٽس نيوز) عالمي دنيا جو اهم ايونٽ يارهون ورلڊ ڪپ ڪرڪٽ ٽورنامينٽ 14 فيبروي کان شروع ٿي رهيو آهي جنهن ۾ 14 ٽيمون اهو اعزاز پنهنجي نالي ڪرڻ لاءِ مقابلا ڪنديون.ورلڊ ڪپ ڪرڪٽ جي دنيا ۾هن وقت تائين آسٽريليا جي قسمت ٻين ٽيمن جي ڀيٽ ۾ اڳڀري رهي آهي. مجموعي طور تي 10 ورلڊڪپ ٿي چڪا آهن جنهن ۾ آسٽريليا 6 ڀيرا فائينل ۾ آيو 4 کٽيائين ۽ 2 هارايائين. جڏهن ته ڀارت 3 ڀيرا فائينل ۾ آيو ، 2 ڀيرا کٽيو هڪ ڀيرو هارايو. اهڙي ريت ويسٽ انڊيز به 3 ڀيرا فائينل ۾ آيو 2 کٽيائين ۽ هڪ هارايائين. سريلنڪا 3 ڀيرا فائينل ۾ آيو هڪ ڀيرو کٽيائين ۽ 2 ڀيرا هارايائين. پاڪستان 2 ڀيرا فائينل ۾ آيو هڪ ڀيرو کٽيائين ۽ هڪ ڀيرو هارايائين جڏهن ته انگلينڊ جي ٽيم 3 ڀيرا فائينل ۾ آئي آهي ۽ بدقسمتي سان هڪ به ميچ نه کٽي اٿس. 1975ع واري پهرين ڪرڪيٽ ورلڊڪپ جي فائينل ميچ ۾ ويسٽ انڊيز ۽ آسٽريليا وچ ۾ کيڏي وئي جنهن ۾ ويسٽ انڊيز 17 رنسن تان ڪاميابي ماڻي. 1979ع ۾ کيڏيل ٻئين ڪرڪيٽ ورلڊڪپ جي فائينل ميچ ۾ ويسٽ انڊيز ۽ انگلينڊ جون ٽيمون آمهون سامهون ٿيون جنهن ۾ ويسٽ انڊيز 92 رنسن تان ڪاميابي ماڻي. 1983ع ۾ کيڏيل ٽئين ورلڊڪپ جي فائينل ميچ ۾ ويسٽ انڊيز ۽ ڀارت جون ٽيمون آمهون سامهون ٿيون جنهن ۾ ڀارت 43 رنسن تان ڪاميابي حاصل ڪئي، 1987ع ۾ کيڏيل چوٿين ڪرڪيٽ ورلڊڪپ جي فائينل ميچ ۾ آسٽريليا ۽ انگلينڊ جون ٽيمون آمهون سامهون ٿيون جنهن ۾ آسٽريليا 7 رنسن تان ڪاميابي حاصل ڪئي.. 1992ع ۾ کيڏيل پنجين ڪرڪيٽ ورلڊڪپ جي فائينل ميچ ۾ پاڪستان ۽ انگلينڊ جي ٽيمن وچ ۾ مصابلو ٿيو جنهن ۾ پاڪستان 22 رنسن تان ڪاميابي حاصل ڪئي. 1996ع ۾ کيڏيل ڇهين ورلڊڪپ جي فائينل ميچ سريلنڪا ۽ آسٽريليا جي ٽيمن وچ ۾ کيڏي وئي. جنهن ۾ سريلنڪا 7 وڪيٽن تان ڪاميابي ماڻي. 1999ع ۾ کيڏيل ستين ورلڊڪپ جي فائينل ميچ آسٽريليا ۽ پاڪستان جي ٽيمن وچ ۾ کيڏي وئي. جنهن ۾ آسٽريليا جي ٽيم 8 وڪيٽن تان ڪاميابي حاصل ڪئي. 2003ع ۾ کيڏيک اٺين ڪرڪيٽ ورلڊڪپ جي فائينل ميچ آسٽريليا ۽ ڀارت جي ٽيمن وچ ۾ کيڏي وئي. جنهن ۾ آسٽريليا جي ٽيم 125 رنسن تان ڪاميابي حاصل ڪئي. 2007ع ۾ کيڏيل نائين ورلڊڪپ جي فائينل ميچ آسٽريليا ۽ سريلنڪا جي ٽيمن وچ ۾ کيڏي وئي. جنهن ۾ آسٽريليا جي ٽيم 53 رنسن تان ڪاميابي حاصل ڪئي. 2011ع ۾ کيڏيل ڏهين ورلڊڪپ جي فائينل ميچ ڀارت ۽ سريلنڪا جي ٽيمن وچ ۾ کيڏي وئي.جنهن ۾ ڀارت جي ٽيم 6 وڪيٽن تان ڪاميابي حاصل ڪئي.

 

نيوزيلينڊ ۽ سريلنڪا جون ٽيمون ٻي ون ڊي ۾ (سڀاڻي) آمهون سامهون ٿينديون

هملٽن (اسپورٽس نيوز) نيوزيلينڊ ۽ سريلنڪا جي ڪرڪيٽ ٽيمن وچ ۾ 7 هڪ ڏينهن وارين ميچن تي ٻڌل سيريز جي ٻي ميچ (سڀاڻي) خميس تي هملٽن ۾ کيڏي ويندي. ميزبان ٽيم کي سيريز ۾ 0-1 جي سرسي حاصل آهي. ميزبان ٽيم پهرين ميچ ۾ آئلينڊرز کي دلچسپ مقابلي کان پوءِ 3 وڪيٽن تان شڪست ڏني هئي. پنهنجي هڪ بيان ۾ ڪيوي اڳواڻ چيو ته پهرين ون ڊي ۾ ڪاميابي کان پوءِ ٽيم جو مورال بلند آهي. مخالف ٽيم کي ٻي ميچ ۾ پڻ شڪست ڏئي سيريز ۾ سرسي حاصل ڪري ڇڏينداسين. ٻئي پاسي سريلنڪا جي ڪپتان چيو ته پهرين ميچ ۾ رانديگرن سٺو مقابلو ڪيو پر قسمت اسنا جو ساٿ نه ڏنو، شڪست سبب اسان جا حوصلا گهٽيا ناهن، ٻي ميچ ۾ سيريز برابر ڪرڻ جي ڪوشش ڪنداسين، ٻنهي ٽيمن وچ ۾ سيريز جي ٽين ميچ 17 جنوري تي، چوٿين 20 جنوري، پنجين ميچ 23 جنوري، ڇهين 25 جنوري جڏهن ته ستين ۽ آخري ميچ 29 جنوري تي کيڏي ويندي

 

ڏکڻ آفريقا ۽ ويسٽ انڊيز جون ٽيمون آخري ٽي ٽوئنٽي ۾ اڄ آمهون سامهون ٿينديون

ڊربن (اسپورٽس نيوز) ڏکڻ آفريقا۽ ويسٽ انڊيز جي ڪرڪيٽ ٽيمن وچ ۾ ٽين ۽ آخري ٽي ٽوئنٽي ميچ (اڄ) اربع تي ڊربن ۾ کيڏي ويندي.ڪاري آنڌي کي ٽن ميچن جي سيريز ۾ 0-2 جي فيصلي جوڳي سرسي حاصل آهي. سيريز ۾ کيڏيل پهرين ٽي ٽوئنٽي ميچ ۾ ڪاري آنڌي پروٽيز کي 4 وڪيٽن تان شڪست ڏني هئي. جڏهن ته ٻين ٽي ٽوئنٽي ۾ ڪاري آنڌي پروٽيز کي 4 وڪيٽن تان هارائي سيريز 0-2 تان کٽي ورتي. ان کان اڳ کيڏيل ٽيسٽ سيريز ۾ پروٽيز ڪاري آنڌي کي 0-2 تان هارايو هو. ٽي ٽوئنٽي سيريز کان پوءِ ٻنهي ٽيمن وچ ۾ پنج هڪ ڏينهن وارين عالمي ميچن جي سيريز کيڏي ويندي.