تازيون خبرون

Daily Archives: January 14, 2015

آزاد ڪشمير ۽ گلگت بلستان ۾ به فوجي عدالتون قائم ڪرڻ جو فيصلو

اسلام آباد (بيورو) وفاقي حڪومت، 21 هين آئيني ترميم تحت گلگت بلتستان ۽ آزاد ڪشمير ۾ به فوجي عدالتون قائم ڪرڻ جو فيصلو ڪري ورتو، وزيراعظم نواز شريف جو چوڻ آهي ته آخري دهشتگرد جي خاتمي تائين سک جو ساهه نه کنيو ويندو. اسلام آباد ۾ دهشتگرديءَ خلاف قومي ايڪشن پلان جي حڪمت عملي جو جائزو وٺڻ لاءِ وزيراعظم نواز شريف جي صدارت هيٺ اجلاس ٿيو. اجلاس ۾ وفاقي گهرو وزير چوڌري نثار، سڌ سماءُ واري وزير پرويز رشيد، نيڪٽا آفيسرن ۽ ٻين عملدارن شرڪت ڪئي. اجلاس ۾ فيصلو ڪيو ويو ته 21 هين آئيني ترميم تحت گلگت بلتستان ۽ آزاد ڪشمير به فوجي عدالتون قائم ڪيون وينديون. ان موقعي تي وزيراعظم جو چوڻ هو ته دهشتگردن جي خاتمي لاءِ سمورا قدم کنيا پيا وڃن، معاهشري ۾ دهشتگردن لاءِ ڪا به جڳهه ناهي ۽ آخري دهشتگردي جي خاتمي تائين هــُو ســُک سان نه ويهندا. نواز شريف چيو ته قومي حڪمت عملي تي اڳڀرائي ۽ جلد عملدرآمد جي هــُو پاڻ نگراني ڪري رهيو آهي. اجلاس دوران نيڪٽا آفيسرن، وزيراعظم کي نيشنل ايڪشن پلان تي عملدرآمد بابت بريفنگ به ڏني. اجلاس دوران ايڪشن پلان تي عمل بابت اسلام آباد ۽ پنجاب جي رپورٽ پيش ڪئي وئي جنهن ۾ چيو ويو آهي ته نفرت تي ٻڌل تقريرون ڪرڻ تي 164 ڪيس داخل ڪيا ويا جڏهن ته هڪ سئو 54 ماڻهن کي حراست ۾ ورتو ويو. نفرت تي ٻڌل مواد شايع ڪرڻ تي 40 پرنٽنگ پريس سيل ڪيون ويون جڏهن ته لائوڊ اسپيڪرن جي غلط استعمال جا 88 ڪيس سامهون آيا. پنجاب کانسواءِ ٻين ٽن صوبن رپورٽس جمع نه ڪرايون. واضح رهي ته 25 ڊسمبر تي وزيراعظم نواز شريف 20 نقطن تي ٻڌل قومي ايڪشن پلان جو اعلان ڪيو هو جنهن ۾ فوجي عدالتون به شامل آهن جڏهن ته ٻنهي ايوانن مان ايڪشن پلان جي منظوري بعد چئني صوبن ۾ فوجي عدالتون قائم ڪيون ويون آهن.

 

ڪشمير بغير پاڪ-ڀارت ڳالهين جو سوال ئي پيدا نه ٿو ٿئي: سرتاج عزيز

اسلام آباد(بيورو) آمريڪي پرڏيهي وزير جان ڪيري چيو آهي ته حقاني نيٽورڪ ۽ لشڪر طيبه پاڪستان ۽ آمريڪا سميت پوري دنيا لاءِ خطرو آهن دهشتگردن کي صرف دهشتگرد ئي سمجهڻو پوندو، اسلام آباد ۾ پاڪ آمريڪا اسٽريٽجڪ ڳالهين کانپوءِ آمريڪي پرڏيهي وزير سان گڏيل پريس ڪانفرنس دوران سرتاج عزيز چيو ته آمريڪا دهشتگردي خلاف جنگ ۾ پاڪستان سان گڏ آهي، ڳالهين دوران خطي جي صورتحال ۽ امن امان تي ڳالهه ٻولهه ٿي ان موقعي تي پاڪستان ۽ افغانستان جا لاڳاپن تي ڳالهه ٻولهه ٿي جڏهن ته پاڪستان ايل او سي تي ڀارت جي بنا سبب فائرنگ تي پاڪستان جي خدشن جو اظهار ڪيو هن چيو ته ڀارت  ورڪنگ بائونڊري ۽ لائن آف ڪنٽرول تي ڇڪتاڻ پيدا ڪئي آهي، ڪشمير کان بغير پاڪ ڀارت ڳالهين جو سوال ئي پيدا نه ٿو ٿئي، پرڏيهي صلاحڪار وڌيڪ چيو ته پاڪستان قبائلي علائقن ۾  مضبوط آپريشن شروع ڪري ڇڏيو آهي، پاڪستان پنهنجي سرحد جي امن جي لاءِ هڪ لک 70 هزار وفجي مقرر ڪيا، آپريشن ضرب عضب کانپوءِ حقاني نيٽورڪ کي ختم ڪيو ويو آهي ۽ هاڻ هو سرحد پار ڪارروايون نه ٿا ڪري سگهن فاٽا ۾ تعمير ۽ ترقي لاءِ ڏيڍ ارب ڊالر جي ضرورت آهي ان کان علاوه آءِ ڊي پيز جي واپسي ۾ 10 کان 12 مهينا لڳندا، ميڊيا بريفنگ دوران آمريڪي پرڏيهي وزير جو چوڻ هو ته هن کي پاڪستان اچڻ تي خوشي ٿي اسٽريٽجڪ ڳالهيون پاڪ آمريڪا دوستي کي مضبوط ڪنديون هن چيو ته پشاور سانحي تي آمريڪي حڪومت ۽ عوام کي تمام گهڻو ڏک ٿيو دهشتگردي خلاف جنگ ۾ آمريڪي تعاون جاري رهندو، پاڪستان ضرب عضب ۾ دحشتگردن خلاف اهم ڪاميابيون حاصل ڪيون آهن حقاني نيٽورڪ ۽ لشڪر طيبه پاڪستان، آمريڪا سميت بين ملڪن لاءِ به خطرو آهي دهشتگردن کي صرف دهشتگرد ئي سمجهڻو پوندو، افغانستان ۾ به دهشتگردن جون پناهه گاهون آهن جان ڪيري وڌيڪ چيو ته آمريڪا پاڪستان ۾ سيڪويرٽي قدم تيز ڪرڻ لاءِ مدد لاءِ  تيار آهي، آمريڪا پاڪستان کي فاٽا ۾ تعمير ۽ ترقي لاءِ 25 ڪروڙ ڊالر ڏيندو، ان کان علاوه 25 ڪروڙ ڊالر آءِ ڊي پيز جي واپسي لاءِ به ڏنا ويندا هن چيو ته افغانستان ۾ آمريڪا جو ڪردار گهٽ ضرور ٿيو آهي پر ختم نه ناهي ٿيو آمريڪا افغان فوج کي ٽريننگ ۽ سيڪيورٽي معاملن تي مدد فراهم ڪندو رهندو گڏيل لاڳاپن کي مثبت طريقي سان اڳتي وڌائڻ پاڪستان ۽ ڀارت ٻنهي جي مفاد ۾ آهي آمريڪا پاڪستان ۽ ڀارت وچ ۾ لاڳاپن کي بهتر بڻائڻ جي قدمن جي حمايت ڪري ٿو.

 

آمريڪي پرڏيهي وزير پاران جي جي ايڇ ڪيو جو دورو، آرمي چيف سان ملاقات

راولپنڊي(م.ڊ) آمريڪي پرڏيهي وزير جان ڪيري اڱاري ڏينهن جنرل هيڊ ڪوارٽر راولپنڊي جو دورو ڪيو. آمريڪي پرڏيهي وزير پنهنجي دوري دوران چيف آف آرمي اسٽاف جنرل راحيل شريف سان ملاقات ڪئي. ٻنهي اڳواڻن وچ ۾ ٿيل گڏجاڻي ۾ خطي جي سيڪيورٽي جي صورتحال، دهشتگردي ۽ افغانس تان جي صورتحال سميت گڏيل دلچسپي جي معاملن تي خيالن جي ڏي وٺ ڪئي وئي. آءِ ايس پي آر جي ڊائريڪٽر جنرل ميجر جنرل عاصم سليم باجوه طرفان ڪيل ٽوئيٽ مطابق آمريڪي پرڏيهي وزير دوري دوران پاڪ فوج جي شهيدن جي يادگار تي گل پڻ چاڙهيا ۽ شهيدن کي خراج تحسين پيش ڪيو. آءِ ايس پي آر مطابق جان ڪيري جو جي ايڇ ڪيو پهچڻ تي شاندار استقبال ڪيو ويو ۽ کيس گارڊ آف آنر پيش ڪيو ويو

 

قومي اسيمبلي ۾ وزير اعظم جي غير حاضري تي خورشيد شاهه پاران ڪاوڙ جو اظهار

اسلام آباد(بيورو) قومي اسيمبلي ۾ اپوزيشن ليڊر خورشيد شاهه وزير اعظم، وفاقي وزير ن ۽ ميمبرن جي گهٽ حاضري تي سخت ڪاوڙ جو اظهار ڪيو . خورشيد شاهه ايوان ۾ چيو ته پهرين اپوزيشن ليڊر نه ايندو هو ته وزير اعظم ايندو هو هاڻي اپوزيشن ليڊر اچي ٿو ته وزير اعظم نه ٿو اچي. هاڻي ڪا قرارداد پيش ڪئي وڃي ته خبر پئجي ويندي. فاٽا جا مسئلا حل نه ٿيڻ ڪري فاٽا ميمبرن ۽ پيپلز پارٽي واڪ آئوٽ ڪيو. قومي اسيمبلي جو اجلاس ڊپٽي اسپيڪر مرتضيٰ جاويد عباسي جي صدارت ۾ جاري آهي. اڄ  نجي ڪارروائي جي ڏينهن ايوان ۾ صرف25 کان 30  ميمبر موجود آهن.  ڊپٽي اسپيڪر پي ٽي آءِ جي وڌيڪ 5 ميمبرن ساجد نواز، امجد علي، شاهه محمود قريشي، عارف علوي ۽ شيري مزاري جي چاليهه ڏينهن کان مسلسل غير حاضر رهڻ بابت ايوان کي آگاهه ڪيو.  اپوزيشن ليڊر خورشيد شاهه وفافي وزيرن جي غير حاضري تي شديد تنقيد ڪندي چيو ته هن ايوان کي اهميت ڏني وڃي  جيڪي وزير پاڻ کي سينيئر سمجهن ٿا  ۽ پنهنجون هيڊلائنز لڳرائين ٿا اهي ڪٿي آهن. ماڻهو اسان کي فرينڊلي اپوزيشن جو تعنو ڏين ٿا. پارليامينٽ ۾ائين ٿيندو ته پوءِ فيصلا رستن تي ٿيندا. هن چيو ته وزير اعظم کي پيغام ڏيان ٿو ته فرنٽ لائن جي وزيرن کي ٽن ڏينهن لاءِ معطل ڪري ڇڏي. باقي ته معصوم آهن. ان جا وزير  پنهنجي بي اختياري جو شڪايتون اسان سان ٿا ڪن.اسان پنهنجي ايم اين ايز کي 50 ڪروڙ تائين فنڊ ڏنا. اڄ حڪومت 5 روپيا ڏيڻ لاءِ تيار ناهي.  اسان کي فنڊ نه ڏيو پر پنهنجن ايم اين ايز کي ته ڏيو.

 

راولپنڊي، فيصل آباد، سکر ۽ ڪراچي جيلن ۾ 7 قيدي ڦاهي چڙهي ويا

راولپنڊي (م.ڊ) راولپنڊي، فيصل آباد، سکر ۽ ڪراچي جي جيلن ۾ موت جي سزا جي 7 ڏوهارين کي ڦاهي ڏني وئي. پي ٽي وي جي رپورٽ موجب گذريل ڏينهن صبح جو اڳوڻي صدر پرويز مشرف تي حملي، دفاع واري وزارت جي ڊائريڪٽر، پوليس اهلڪارن ۽ وڪيل جي قتل ۾ ملوث 7 ڏوهارين کي راولپنڊي، فيصل آباد، سکر ۽ ڪراچي جي جيلن م ڦاهي ڏني وئي. ڪراچي سينٽرل جيل ۾ بهرام خان کي ڦاهي ڏني وئي، جنهن 2003ع ۾ عدالت جي ڪمري ۾ داخل ٿي محمد اشرف ايڊووڪيٽ کي قتل ڪيو هو. سکر سينٽرل جيل ۾ 3 ڏوهارين کي ڦاهي ڏني وئي جنهن ۾ محمد شاهد حنيف، محمد طلحه ۽ خليل احمد شامل هئا جن تي الزام هو ته هنن 2001ع ۾ ڪراچي منس ٽري آف ڊفينس جي هڪ ڊائريڪٽر ظفر حسين شاهه کي قتل ڪيو هو. راولپنڊي اڊيالا جيل ۾ ذوالفقار علي کي ڦاهي ڏني وئي جنهن ڪراچي ۾ آمريڪي قونصل خاني تي حملو ڪري ٻن پوليس اهلڪارن کي قتل ڪيو. فيصل آباد ۾ مشتاق احمد ۽ نوازش علي کي ڦاهي ڏني وئي جيڪي اڳوڻي صدر مشرف تي حملي جا ڏوهاري هئا.

 

سپريم ڪورٽ ۾ زرداري جي بريت خلاف نيب جي اپيل ٻڌڻي لاءِ منظور

اسلام آباد (بيورو) سپريم ڪورٽ اسٽيل ملز ڪرپشن ريفرنس ۾ اڳوڻي صدر آصف زرداري جي بريت خلاف نيب جي اپيل ٻڌڻي لاءِ منظور ڪري ورتي آهي جسٽس اعجاز چوڌري جي سربراهي ۾ سپريم ڪورٽ جي 3 رڪني بينچ آصف زرداري خلاف نيب جي اپيل ٻڌڻي جي ڪئي عدالت اڳوڻي صدر کي نوٽيس جاري ڪندي  ڪيس جي ٻڌني اڻڄاڻايل مدي ائين ملتوي ڪري ڇڏي ماتحت عدالت آصف زرداري کي اسٽيل ملز ڪرپشن ڪيس ۾ بري ڪري ڇڏيو هو جنهن تي نيب ماتحت عدالت جي فيصلي خلاف سپريم ڪورٽ سان رابطو ڪيو هو اسٽيل ملز ڪرپشن ريفرنس ۾ آصف زرداري تي رشوت وٺڻ جو الزام آهي.

 

ڪمند جا اگهه وڌائڻ بابت درخواستن تي شگر ملز مالڪن کي نوٽيس جاري

ڪراچي (اسٽاف رپورٽر) ســُپريم ڪورٽ، ڪمند جا اگهه وڌائڻ بابت داخل درخواستن تي شگر ملز مالڪن کي نوٽيس جاري ڪري ڇڏيا. جسٽس ثاقب نثار جي سربراهي ۾ 3 رڪني بينچ ڪيس جي ٻڌڻي ڪئي. شگر ملز مالڪن جي وڪيل حفيظ پيرزادي دليل ڏيندي چيو ته ڪمند جي قيمت وڌائڻ کان پهرين کنڊ جو اگهه به وڌايو وڃي. جسٽس ثاقب نثار رمارڪس ڏيندي چيو ته عدالت ڌرين کي ٻڌڻ کان اڳ کنڊ جون قيمتون وڌائڻ جو حڪم نه ٿي ڏئي سگهي. درخواستگذار جي وڪيل چوڌري اڪرام دليل ڏيندي چيو ته زمينن تي بيٺل ڪمند سڪي رهيو آهي،جڏهن ته شگر ملز مالڪ سرڪار پاران مقرر ڪيل ڪمند جو اگهه نه ڏئي رهيا آهن . عدالت شگر ملز مالڪن کي نوٽيس جاري ڪندي ٻڌڻي 20 جنوري تائين ملتوي ڪري ڇڏي.

 

مٺي سول اسپتال ۽ اسلام ڪوٽ ۾ 3 ٻارڙا فوت

مٺي (رپورٽر) مٺي سول اسپتال ۽ اسلام ڪوٽ ۾ وڌيڪ ٽي ٻارڙا فوت ٿي ويا آهن هلندڙ مهيني غذائي کوٽ ۽ ٿڌ سبب ٻارن سميت 43 ماڻهو فوت ٿي ويا ٿرپارڪر ۾ ڏڪار کي منهن ڏيڻ لاءِ سنڌ حڪومت جون سموريون د عوائون ڪنهن به ڪم جون ثابت نه ٿيون آهن مٺي سول اسپتال، ڇاڇرو، ڏيپلو، اسلام ڪوٽ ۽ ٻين ڏڪار سٽيل علائقن ۾ موت جو سلسلو رڪجي نه سگهيو آهي، حڪومت جي بيحسي ۽ مقامي انتظاميه جي غفلت سبب ڪيترين ئي مائرن جي جهولي اجڙي چڪي آهي مختلف علائقن ۾ پاڻي ۽ خوراڪ جي کوٽ جو سلسلو برقرار آهي ٻار هاڻ بک ۽ اڃ کانپوءِ بيمارين کي برداشت نه ٿا ڪري سگهن جنهن سبب موت جو سلسلو وڌندو پيو وڃي ٿر واسي ان ظلم جي باوجود ان اميد سان اسپتالن جو رخ ڪن ٿا ته شايد ڪنهن مسيحا کي انهن تي رحم اچي وڃي.

 

ايم ڪيو ايم پاران جماعت اسلامي تي پابندي جي گهر، پاڪ فوج خلاف ڳالهائيندڙن جي گرفتاري جو مطالبو

لنڊن(م.ڊ) متحده قومي موومينٽ جي قائد الطاف حسين حڪومت کان اپيل ڪئي آهي ته جماعت اسلامي تي پابندي لڳائي وڃي، هن اهو به چيو ته فوج کي خراب چوندڙ اڳواڻن کي گرفتار ڪيو وڃي، الطاف حسين وڌيڪ چيو ته سراج الحق اسلام جي نالي تي قوم کي بيوقوف نه بڻائي، 50 سيڪڙو کان وڌيڪ طالبان ۽ القاعده جا ماڻهو جماعت اسلامي جي اڳواڻن جي گهرن مان گرفتار ٿيا، هن اهو به چيو ته پاڪستان ٺهڻ وقت مذهبي جماعتن نئين ملڪ جي مخالفت ڪئي هئي، انهن ئي جماعتن قائد اعظم خلاف ڳالهيون ڪيون، پاڪستان کي ڪافرستان ۽ قائد اعظم کي ڪافر اعظم چيو هو، قرآن ۽ حديثن سڀ کان پهرين پنهنجي حفاظت جو حڪم ڏنو آهي.

 

ملڪي حالتن کان مايوس نه ٿيڻ گهرجي جلد حالتون معمول تي اچي وينديون: سراج الحق

پشاور (بيورو) جماعت اسلامي جي امير سراج الحق جماعت اسلامي جي وفد سان گڏ پشاور جي آرمي پبلڪ اسڪول جو دورو ڪيو، سراج الحق چيو آهي ته ملڪي حالتن کان مايوس نه ٿيڻ گهرجي جلد حالتون معمول تي اچي وينديون. جماعت اسلامي جي امير سراج الحق پشاور ۾ دهشتگردي جو شڪار بڻيل آرمي پبلڪ اسڪول جو دورو ڪيو ۽ استادن توڙي ٻارڙن سان ملاقات ڪئي. ميڊيا سان ڳالهائيندي سراج الحق چيو ته پشاور سانحي ۾ معصوم ٻارڙن جي شهادت سڄي قوم کي متحد ڪري ڇڏيو آهي، وقت اچي ويو آهي حڪومت پنهنجي رِٽ قائم ڪرڻ لاءِ اثرائتا قدم کڻي. هن چيو ته موجوده ملڪي حالتن مان مايوس نه ٿيڻ گهرجي، جلد حالتون معمول تي اچي وينديون، هن مرحلي تي ذات ۽ سياست کي وساري قوم لاءِ سوچڻ گهرجي. سراج الحق جو وڌيڪ چوڻ هو ته پاڪستاني قوم گڏ ٿي وڃي ته ائٽم بم کان به وڌيڪ سگهه رکي ٿي.