تازيون خبرون

Daily Archives: January 12, 2015

ڪراچي: گلشن حديد لڳ آئل ٽينڪر جو مسافر بس کي ٽڪر، 59 مسافر سڙي فوت

ڪراچي(اسٽاف رپورٽر) ملير ويجهو هنيانءُ ڏاريندڙ روڊ حادثي جي نتيجي ۾ 59 مسافر سڙي فوت ٿي ويا، ڊاڪٽرن ڊي اين اي کانسواءِ لاشن جي سڃاڻپ کي ناممڪن قرار ڏئي ڇڏيو آهي. ملير جي گلشن حديد واري علائقي کان شڪارپور ويندڙ مسافر ڪوچ ۽ آئل ٽينڪر ۾ سپر هاءِ وي وٽ ڪاٺوڙ لنڪ روڊ وٽ زوردار ٽڪر ٿي پيو. حادثي جي نتيجي ۾ مسافر ڪوچ کي باهه لڳي وئي، جنهن سبب معصوم ٻارڙن ۽ عورتن سميت 59 مسافر سڙي فوت ٿي ويا،جڏهن ته بس جي ڇت تي ويٺل 12 مسافر زخمي ٿي پيا. هنيانءُ ڏاريندڙ حادثي کانپوءِ بچي ويل مسافرن ۾ رڙيون پئجي ويون ۽ زخمي ڪيتري ئي دير تائين روڊ تي تڙپندا رهيا. حادثي جي نتيجي ۾ حياتيون وڃائيندڙن ۾ هڪ ئي ڪٽنب جا 8 ڄڻا آدم، خورشيد، خالده، عمراه، ثريا، خديجا، احمد علي، امتياز علي ۽ ٻئي ڪٽنب جون ٽي عورتون حسنا، جميلا ۽ جويريا به شامل آهن. اکين ڏٺن شاهدن موجب بس ۾ 60 کان 70 مسافر سوار هئا. اطلاع ملڻ بعد ريسڪيو ٽيمن پهچي سڙي فوت ٿي ويل مسافرن جا لاش کڻائي جناح ۽ عباسي شهيد اسپتال پهچايا، جيڪي ضروري ڪارروائي بعد سڃاڻپ لاءِ سرد خاني ۾ رکرايا ويا آهن. پنهنجي پيارن جا لاش سڃاڻڻ لاءِ فوتين جا مائٽ پڻ اسپتالن ۾ پهتا، جڏهن ته ان موقعي تي انتهائي ڏکوئيندڙ منظر پڻ ڏسڻ ۾ آيا. جناح اسپتال جي انتظاميا 59 لاش پهچائڻ جي تصديق ڪئي. ميڊيا سان ڳالهائيندي ڊاڪٽر سيمي جمالي ٻڌايو ته جناح اسپتال ۾ پيل 59 لاش مڪمل طور سڙيل آهن، جن جي سڃاڻپ ڊي اين اي ٽيسٽ کانسواءِ ممڪن ناهي. هن چيو ته لاشن جي ڊي اين اي ٽيسٽ ۾ هڪ هفتو لڳي سگهي ٿو. ٻئي طرف ٽرانسپورٽ واري وزير ممتاز جکراڻي جناح اسپتال پهچي حادثي جي زخمين جي عيادت ڪئي. ان موقعي تي ميڊيا سان ڳالهائيندي صوبائي وزير ممتاز جکراڻي چيو ته خراب روڊ هجڻ ڪري حادثو پيش آيو،اسٽيل ٽائون انتظاميه وقت سر فائربرگيڊ موڪلي ها ته ايڏو وڏو نقصان نه ٿئي ها، جاچ مڪمل ڪري رپورٽ وڏي وزير کي ڏني ويندي. هوڏانهن ڊي آءِ جي اوڀر منير شيخ جو چوڻ هو ته حادثي بعد گاڏي جو دروازو نه کلڻ سبب وڌيڪ جاني نقصان ٿيو. آخري اطلاعن تائين سنڌ سرڪار توڙي ڪراچي انتظاميا حادثي ۾ فوت ٿي ويلن جي وارثن توڙي زخمين لاءِ ڪنهن امداد جو اعلان نه ڪيو هو.

 

ملڪ ۾ دهشتگردن کي ڪٿي به پناهه لاءِ جاءِ نه ملندي: وزيراعظم

لاهور(م.ڊ) وزيراعظم نواز شريف چيو آهي ته دهشتگردي خلاف جنگ ۾ پوري قوم، حڪومت ۽ ملڪ ۾ سمورا ادارا هڪ صف تي موجود آهي، دهشتگردن کي ڪٿي به پناهه لاءِ جاءِ نه ملندي، جاتي امرا رائيونڊ ۾ وزيراعظم نواز شريف سان پنجاب جي وڏي وزير شهباز شريف ملاقات ڪئي، ملاقات دوران ملڪ ۾ امن امان جي مجموعي صورتحال ۽ ٻين معاملن تي خيالن جي ڏي وٺ ڪئي وئي ان موقعي تي ٻنهي سياسي اڳواڻن دهشتگردن خلاف سخت ۽ تيز ترين ڪارروايون جاري رکڻ جو عزم ظاهر ڪيو، ان موقعي تي وزيراعظم نواز شريف جو چوڻ هو ته دهشتگردي خلاف جنگ ۾ پوري قوم، حڪومت ۽ ملڪ جا سمورا ادارا هڪ صف تي موجود آهن، پاڪ فوج ضرب عضب ۾ وڏيون ڪاميابيون حاصل ڪيون آهن، وطن ۾ دهشتگردن کي ڪٿي به پناهه لاءِ جاءِ نه ملندي، ملڪ مان هڪ هڪ دهشتگردي جو خاتمو ڪري ان کي امن جو گهوارو بڻائينداسين.

 

چوڌري ڀائرن جي آصف زرداري سان ملاقات، ملڪي صورتحال تي ڳالهيون

لاهور(م.ڊ) چوڌري ڀائرن بلاول هائوس لاهور ۾ اڳوڻي صدر آصف علي زرداري سان ملاقات ڪئي آهي ذريعن مطابق پيپلزپارٽي جي شريڪ چيئرمين آصف علي زرداري جو ان موقعي تي چوڻ هو ته امن قائم ڪرڻ لاءِ مشڪل ترين فيصلا ڪيا آهن مولانا فضل الرحمان سميت سمورين سياسي پارٽين جا خدشا  ختم ڪرڻ حڪومت جي ذميواري آهي، هن جو چوڻ هو ته پشاور سانحي کانپوءِ دهشتگردي خلاف جنگ لاءِ پيدا  ٿيندڙ قومي اتفاق راءِ کي ڪنهن صورت نقصان نه پهچائڻ گهرجي، دهشتگردي خلاف جنگ سياسي اختلافن کان مٿي تي وڙهڻي پوندي، هن چيو ته ڪابه جنگ قومي اتفاق راءِ بغير نه ٿي کٽي سگهجي، ان موقعي تي مسلم ليگ جي سربراهه چوڌري شجاعت چيو ته پوري قوم دهشتگردي خلاف جنگ م فوج سان گڏ بيٺل آهي.

 

سرڪاري نوڪري جو آسرو ڇڏي برياني يا ڇولا کپايو، خورشيد شاهه جو نوجوانن کي مشورو

سکر (بيورو) قومي اسيمبليءَ ۾ مخالف ڌر جي اڳواڻ سيد خورشيد  احمد شاھ  چيو آهي ته، متحده  کي هاڻوڪي صورتحال ۾ هڙتالن وارو سلسلو بند ڪري احتجاج ڪرڻ گھرجي. تعليمي ادارن جاحفاظتي انتظام پورا ڪري پوءِ کوليا وڃن،  گوسڙو ملازمن تعليم سان گڏ صحت کاتي کي به تباهه ڪري ڇڏيو آهي، سکر جي ماڻهن کي گوري به نه ٿي ملي پر دانهون ڪرڻ باوجود وڏو وزير سکر سول اسپتال جي بجيٽ وڌائڻ لاءِ تيار ئي ناهي، سکر جي ڊي ايڇ او آفيس ۾ ويڪسينيٽرز ۾ موٽرسائيڪلون ورهائڻ واري تقريب ۾ ميڊيا سان ڳالهائيندي ۽ تقريب کي خطاب ڪندي سيد خورشيد احمد شاهه چيو ته، ملڪ جنگ جي حالت ۾ آهي ان ڪري متحده کي هڙتالن بجاءِ احتجاج ڪرڻ گھرجن ۽ روز روز هڙتالن وارو سلسلو بند ٿيڻ گھرجي. هن چيوته، پوري ملڪ ۾ تعليمي ادارن کي فول پروف سيڪيورٽي ڏني وڃي جيڪڏهن تعليمي ادارن جي حفاظت جا انتظام مڪمل ناهن ته پوءِ موڪلون وڌائي حفاظتي انتظام مڪمل ڪرڻ بعد اسڪول کوليا وڃن. سيد خورشيد احمد شاھ جو چوڻ هو ته، سکر سول اسپتال جي بجيٽ نه هجڻ برابر آهي، جنهن لاءِ هو ڪيترائي دفعا وڏي وزير آڏو دانهون ڪوڪون ڪري چڪو آهي پر قائم علي شاهه سندس ڳالهه ٻڌڻ لاءِ تيار ئي ناهي، وڏي وزير پنهنجي ضلعي خيرپور جي اسپتال جي بجيٽ به وڌائي 16 ڪروڙ ڪئي آهي پر سکر اسپتال جي بجيٽ ورهين کان ساڳي 6 ڪروڙ آهي، مٿان وري گوسڙو ملازمن به صحت کاتي کي تباهه ڪرڻ ۾ ڪا ڪسر ناهي ڇڏي، هن چيو ته سندس در تي روزانو هزارين نوجوان نوڪرين جي آسري بيٺا آهن، سڀني کي نوڪريون ڏيڻ سندس وس ۾ ناهي، بيروزگار نوجوان سرڪاري نوڪري جو آسرو ڇڏي برياني يا ڇولا کپائي گهرڀاتين جو ڀرجهلو ٿين، هن چيو ته سنڌ ۾ 19 هزار هيلٿ ورڪرز کي پڪو ڪري سندن پگهار 5 هزار مان وڌائي 15 هزار ڪئي وئي آهي پر اڳ جيان هاڻي به اهي گهر ويٺي پگهارون کڻي رهيون آهن، سنڌ سرڪار کي گهرجي ته گوسڙو ماسترن سميت سڀني کاتن جي گوسڙو ملازمن کي فوري طور نيڪالي ڏني وڃي، ان کان اڳ قومي اسيمبليءَ ۾ مخالف  ڌر جي اڳواڻ سيد خورشيد شاهه 50 ويڪسينيٽرز ۾ عالمي اداري طرفان موڪليل موٽرسائيڪلون ورهايون.

 

سنڌ جي وڏي وزير ايم ڪيو ايم جي ڪارڪن جي قتل جي عدالتي جاچ جو حڪم ڏئي ڇڏيو

ڪراچي(اسٽاف رپورٽر) سنڌ جي وڏي وزير سيد قائم علي شاهه ايم ڪيو ايم جي ڪارڪن جي فوتگي تي عدالتي جاچ جو حڪم ڏئي ڇڏيو وزيراعليٰ هائوس سامهون ايم ڪيو ايم جي احتجاج دوران سنڌ جي وڏي وزير قائم علي شاهه ايم ڪيو ايم جي ڪارڪن جي فوتگي تي عدالتي جاچ جو حڪم ڏئي ڇڏيو سنڌ جي وڏي وزير چيو ته عدالتي جاچ جي روشني ۾ جيڪو به پوليس اهلڪار ڏوهاري نڪتو ان خلاف ڪارروائي ٿيندي هن چيو ته ايم ڪيو ايم جي ڪارنن ۽ همدردن جي پوليس تحويل ۽ ٽارگيٽ ڪلنگ م شهي دٿيڻ تي افسوس جو اظهار ڪيون ٿا.

 

الطاف حسين پاران رابطه ڪميٽي کي هڙتال وارو سڏ واپس وٺڻ جي هدايت

لنڊن (م.ڊ) متحده قومي موومينٽ جي قائد الطاف حسين رابطه ڪميٽي کي اڄ هڙتال وارو سڏ واپس وٺڻ جي هدايت ڪري ڇڏي، رابطه ڪميٽي طرفان ايم ڪيو ايم جي ڪارڪنن جي قتل خلاف اڄ پوري صوبي ۾ هڙتال جو سڏ ڏنو ويو هو جڏهن ته الطاف حسين رابطه ڪميٽي کي اڄ ٿيندڙ هڙتال جو سڏ واپس وٺڻ جي هدايت ڪري ڇڏي الطاف حسين جو چوڻ هو ته حڪومت امن امان قائم ڪرڻ ۾ ناڪام ٿي چڪي آهي ان لاءِ شهري سيڪيورٽي لاءِ بازارن ۽ محلن ۾ ڪميٽيون بڻايو ته جيئن پنهنجي حفاظت کي يقيني بڻائي سگهجي، هن حڪومت کي اپيل ڪئي ته ڪارڪنن تي تشدد ڪندڙ سرڪاري اهلڪارن خلاف فوري ڪارروائي ڪندي واپارين کي هٿيارن جا لائسنز جاري ڪيا وڃن ۽ جڏهن حڪومت دهشتگردن جو خاتمو ڪري ڇڏي ته لائسنز واپس ورتا وڃن.

 

ايم ڪيو ايم جا سمورا مطالبا مڃي ورتا آهن، يوم سوڳ جو سڏ واپس ورتو وڃي : شرجيل ميمڻ

ڪراچي(اسٽاف رپورٽر) اطلاعات واري  صوبائي وزير شرجيل مميڻ جو چوڻ آهي ته ايم ڪيو ايم طرفان ڪارڪنن جي فوتگي جي حوالي سان ڪيل سمورا مطالبا مڃي ورتا آهن ان ڪري انهن کي اڄ يوم سوڳ جي ڏنل سڏ کي واپس وٺڻ گهرجي، وزيراعليٰ هائوس ٻاهران ميڊيا سان ڳالهائيندي شرجيل ميمڻ جو چوڻ هو ته مان ۽ ٻيا حڪومتي ميمبر پوري رات ايم ڪيو ايم جي اوڳاڻن سان رابطي ۾ هئاسين جڏهن ته سنڌ جو وڏو وزير سيد قائم علي شآهه به مسئلي جي حل لاءِ گورنر ڊاڪٽر عشرت العباد سان مسلسل رابطي ۾ رهيو هن جو چوڻ هو ته ايم ڪيو ايم جي ڪارڪنن جي مرڻ جي پزور مذمت ڪريون ٿا ۽ حڪومت ايم ڪيوايم طرفان معامل جي جاچ لاءِ جج کان انڪوائري ڪرائڻ ۽ پوليس آفيسرن کي معطل ڪرڻ جو مطالبو مڃي ورتو آهي ان ڪري ايم ڪيو ايم اڳواڻن کي درخواست آهي ته سڀاڻي اسڪول کلڻ جو پهريون ڏينهن آهي ان لاءِ پنهنجي يوم سوڳ وارو سڏ واپس ورتو وڃي، ايم ڪيو ايم طرفان 15 منٽن جي ڊيڊ لائن جو مطالبو درست ناهي اسان جمهوري ماڻهو آهيون ۽ ڳالهين ذريعي سمورا مطالبا حل ڪري سگهجن ٿا،  شرجيل ميمڻ جو چوڻ هو ته جاچ ڪميٽي جي جيڪا به رپورٽ ايندي ان کي نظر ۾ رکندي ذميوارن خلاف ڪارروائي ڪئي ويندي هڪ سوال جي جواب ۾ شرجيل ميمڻ جو چوڻ هو ته ڪراچي آپريشن کان پهريان روزاني جي بنياد تي 20 کان 25 ماڻهو قتل ٿيندر هئا پر هاڻ حالتن ۾ ڪافي بهتر آئي آهي.

 

ايم ڪيو ايم پاران 4 ڪارڪنن جي عدالت کان مٿانهين قتل خلاف سوڳ ملهايو ويو، اڄ به سوڳ ملهائڻ جو اعلان

ڪراچي(اسٽاف رپورٽر) ايم ڪيو ايم جي 4 ڪارڪنن جي مبينا عدالت کان مٿانهين قتل خلاف پوري سنڌ ۾ يوم سوڳ ملهايو ويو، جڏهن ته ايم ڪيو ايم اڄ به صوبي ۾ شٽربند هڙتال جو اعلان ڪري ڇڏيو، گذريل ڏينهن ڪراچي ۾ 4 ڪارڪنن جي مبينا عدالت کان مٿانهين قتصل خلاف ايم ڪيو ايم 9 ڪلاڪن کانپوءِ وزيراعليٰ هائوس سامهون پنهنجو ڌرڻو ختم ڪري ڇڏيو ۽ ڪارڪنن جون ميتون تدفين ۽ جنازي نماز لاءِ جناح گرائونڊ عزيز آباد آنديون ويون، ڌرڻو ختم ڪرڻ جو اعلان ڪندي حيدر عباس رضوي چيو ته پورو ملڪ ان ڳالهه جو شاهد آهي ته اسان ڪابه اهڙي حرڪت نه ڪئي جيڪا مذمت جوڳي هجي، ايم ڪيو ايم جا ڪارڪن پوري رات پنهنجن ساٿين جون ميتون کڻي وزيراعليٰ هائوس سامهون موجود رهيا، اسان جو هڪ ئي مطالبو هو ته وزيراعليٰ سنڌ مارجي ويل ڪارڪنن جي وارثن جي فرياد ٻڌي ۽ اسان جي ڪارڪنن جو آخري ديدار ڪري، اسان کي افسوس سان چوڻ پئي ٿو ته پوري رات ايم ڪيو ايم جا ڪارڪن انتظار ڪندا رهيا پر وڏو وزير يا ان جي ڪابينا جي وزير  به ائين ڪرڻ گوارا نه سمجهيو هاڻ اسان پرامن طور تي پنهنجن ڪارڪنن جون ميتون ۽ انهن جي وارثن جي اميدن کي دفنائينداسين، ايم ڪيو ايم اڄ به پوري ملڪ ۾ پنهنجن ڪارڪنن جي قتل خلاف يوم سوڳ ملهائيندي جڏهن ته ڪراچي سميت پوري سنڌ ۾ شٽر ڊائون ڪيو ويندو اسان ڪاروباري تنظيمن، ٽرانسپورٽرن ۽ شعبن سان لاڳاپيل ماڻهن کي اپيل ٿا ڪيون ته اڄ به پنهنجو ڪاروبار بند رکن، ٻئي طرف ايم ڪيو ايم جي اپيل تي ڪراچي ۾ ڪاروباري زندگي مڪمل طور تي معطل رهيو، ڪاروباري مرڪز، بازار ۽ مارڪيٽن کان علاوه پئٽرول پمپ ۽ سي اين جي اسٽيشنز به بند رهيا، ان کان علاوه رستن تي پبلڪ ٽرانسپورٽ به نه هجڻ برابر هئي، ڪراچي کان علاوه ٺٽو، حيدرآباد، سجاول، ميرپورخاص، نوابشاهه، سکر، روهڙي، پنوعاقل، دوڙ، باندي، بدين ٽنڊوآدم، ٽنڊوالهيار، ٽنڊو محمد خان، نوشهروفيروز ۽ خيرپور سميت ٻين شهرن ۾ به هڙٽال ڪئي وئي، ان کان علاوه انٽراسٽي بسون نه هلڻ سبب ماڻهن کي شخت مشڪلاتن کي منهن ڏيڻو پيو پيو. متحده قومي موومينٽ جي مارجي ويل ڪارڪنن جي جناز نماز جناح گرائونڊ ۾ ادا ڪئي وئي، مولانا تنوير الحق ٿانوي جنازي نماز پڙهائي، جنازي نماز ۾ متحده جي عهديدارن ۽ ڪارڪنن جي وڏي تعداد شرڪت ڪئي، ان موقعي تي ڊاڪٽر فاروق ستار، حيدر عباس رضوي، فيصل سبزواري، بابر غوري، ڊاڪٽر نصرت، امن الحق سميت ٻيا اهم عهديدار شريڪ ٿيا. هوڏانهن ايم ڪيو ايم جي قائد الطاف حسين جي هدايت تي ايم ڪيو ايم جي رابطا ڪميٽِي اڄ ڏنل هڙتال جو سڏ واپس وٺڻدي اعلان ڪيو آهي ته هڙتال نه ڪئي ويندي پر اڄ به ڪارڪنن جي قتل تي سوڳ ملهايو ويندو.

 

آءِ ايس آءِ سربراهه جي افغان صدر سان ملاقات، ٻه طرفي لاڳاپن تي ڳالهيون

اسلام آباد (بيورو) آءِ ايس آءِ جي سربراهه ليفٽيننٽ جنرل رضوان اختر آچر تي ڪابل ۾ افغان صدر ڊاڪٽر اشرف غني سان ملاقات ڪئي جنهن ۾ دهشتگردي خلاف جنگ سميت امن امان ۽ خطي جي صورتحال تي ڳالهيون ڪيون ويون، افغان صدارتي محل مان جاري ٿيل بيان ۾ چيو ويو ته آچر جي منجهند ٿيندڙ ملاقات ۾ ٻنهي اڳواڻن دهشتگردي ۽ انتهاپنسدي خلاف جنگ ٻنهي ملڪن جي گڏيل ڪوششن، پاڪ افغان لاڳاپا، خطي ۾ امن ۽ سلامتي جي مضبوطي ۽ ٻين معاملن تي ڳالهه ٻولهه ڪئي، پشتون بيان ۾ جاري ڪيل بيان ۾ وڌيڪ تفصيل نه ٻڌايا ويا آهن.

 

حڪومت جي ايڪشن پلان تي اختلاف آهي: سراج الحق

لاهور(م.ڊ) جماعت اسلامي جي امير سراج الحق چيو آهي ته فوجي عدالتون مسئلي جو  حل ناهن قومي ايڪشن پلان تي اختلاف راءِ موجود آهي جماعت اسلامي جي مجلس شوريٰ جي اجلاس کانپوءِ پريس ڪانفرنس دوران جماعت اسلامي جي امير جو چوڻ هو ته تحفظ پاڪستان آرڊيننس آندو ويو جنهن تحت عدالتون به ٺهوين پر ڪابه اڳڀرائي نه ٿي، هر ڀيري قانون تبديل ڪيا ٿا وڃن پر فائدو ڪجهه ناهي ٿيو نيڪٽا جي قائم ٿيڻ کي 5 سال ٿي ويا آهن پر هينئر تائين اهم ترين اداري جو هڪ به اجلاس ناهي گهرايو ويو ان مان ظاهر ٿئي ٿو ته حڪومت عملي طور تي بي عملي جو شڪار آهي حڪومت جي ايڪشن پلان تي اختلاف راءِ موجود آهي پشاور سانحي جي جيتري مذمت ڪئي وڃي گهٽ آهي ان واقعي کانپوءِ ملڪ جي پارٽين ۾ اتفاق راءِ پيدا ٿيو پر ديني مدرسن کي ٽارگيٽ بڻائڻ جي ضرورت نه هئي، جماعت اسلامي جي امير جو چوڻ هو ته فوجي عدالتون مسئلي جو حل ناهن پوري ملڪ جي جيلن ۾ هن وقت 8 هزار کان وڌيڪ موت جي سزا جي منتظر قيدي موجود آهن انهن سمورن جوابدارن کي ملڪ جي سول عدالتن سزائون ٻڌايون آهن حڪومت پاڻ موت واري سزا تي عملدرآمد تي پابندي لڳائي حڪومت پاڻ قدم نه ٿي کڻي ۽ پوءِ عدالتن کي بدنام ڪري ٿي جمهوري حڪومت طرفان سول عدالتن جو ڪورٽ مارشل افسوس جي قابل آهي حڪومت عوام کي تحفظ ڏيڻ ۾ مڪمل طور ناڪام ٿي وئي آهي جيڪڏهن سيڪيورٽي جو بندوبست عوام کي ئي ڪرڻو آهي ته حڪومت جو ڪوبه فائدو ناهي.