تازيون خبرون

Daily Archives: January 4, 2015

ڪراچي(اسٽاف رپورٽر) ڪراچي ۾ دهشتگردي جي خاتمي واري عدالت 6 ڊيٿ وارنٽس تي صحيحون ڪري ڇڏيون آحن سنڌ جي جيل اختيارين پاران اٺن موت واري سزا ٻڌايل قيدين جا ڊيٿ  وارنٽ جاري ڪرڻ لاءِ لاڳاپيل عدالتن کي خط موڪليو هو، عدالت 6 ڊيٿ وارنٽس تي صحيحون ڪيون آهن.

 

پارٽي قيادت سان اختلاف واريون خبرون ڪوڙيون ۽ بي بنياد آهن مخدوم امين فهيم

اسلام آباد(بيورو) پاڪستان پيپلز پارٽي پارليامينيٽرين جي صدر مخدوم امين فهيم وضاحت ڪئي آهي ته پارٽي قيادت سان سندس ڪو به اختلاف نه آهي، جڏهن ته بلاول ڀٽو زرداري جو معاملو پيءُ ۽ پٽ جو مسئلو آهي، تِنهن سان اسان جو ڇا؟ صحافين سان ڳالهائيندي مخدوم امين فهيم چيو ته پارٽي قيادت سان اختلاف واريون خبرون ڪوڙيون ۽ بي بنياد آهن. هن چيو ته پارٽي ۾ سُڌارن جي ضرورت پيش آئي ته هو پنجاهه ڀيرا ڳالهائيندو. امين فهيم جو چوڻ هو ته بلاول ڀٽو کي سائيڊ ڪرڻ وارين خبرن جي کيس خبر نه آهي، اهڙين ڳالهين تي هو توجهه نه ڏيندو آهي، سندس چوڻ هو ته بلاول وارو معاملو پي پٽ جو مسئلو آهي، تنهن سان سندن ڇا؟ مخدوم امين فهيم جو اهو به چوڻ هو ته هن نه ڪڏهن فارورڊ بلاڪ ٺاهيو آهي ۽ نه وري ٺاهيندو، پهرئين ڏينهن کان هو پارٽي سان آهي ۽ ڪڏهن به ڌڙا بندي ته هُن يقين نه رکيو آهي. هن چيو ته وزارت تان پارٽي قيادت سان جهيڙي يا اختلاف هجڻ وارين ڳالهين ۾ ڪا به صداقت نه آهي، اهڙيون سموريون ڳالهيون غلط آهن. مخدوم امين فهيم جو چوڻ هو ته سندس پٽ اڄ به وزير آهي، تنهنڪري اهڙين ڳالهين کي خاطِر ۾ نه آندو وڃي. هن چيو ته ٿر جي صورتحال جيڪا پهرئين ڏينهن هئي، اها اڄ به جيئن جو تيئن آهي، باقي انتظاميه جي تبديلي حڪومت جو حق آهي.

 

پيپلز پارٽي سان جنهن به غداري ڪئي ان جو سياسي وجود ختم ٿي ويو: آغا سراج دراني

ڀٽ شاهه(رپورٽر)  ملڪ ۾ ڪنهن به تبديلي جي ضرورت ناهي، جيڪر ضرورت پئي ته تبديلي ضرور ايندي. پيپلز پارٽي شهيدن جي خون سان ٺهيل آهي، هنن پاڪستان کي بچايو آهي، آصف علي زرداري پاڪستان کپي جو نعرو هڻي ملڪ کي ٽٽڻ کان بچايو، پ پ پ ۾ ڪو به فارورڊ بلاڪ نه پيو ٺهي، جنهن به پي پي سان غداري ڪئي آهي انهن جو سياسي وجود ختم ٿي ويو آهي. اهڙن خيالن جو اظهار سنڌ اسيمبلي جي اسپيڪر آغا سراج دراني  ڀٽ شاهه ۾ سيد نثار حسين شاهه جي تعزيت ڪرڻ بعد ميڊيا سان ڳالهائيندي ڪيو. هن چيو  هن وقت ملڪ کي ڪنهن به تبديلي جي ضرورت نه آهي جيڪر ضرورت محسوس ٿي ته تبديلي کي ڪير به روڪي نه سگهندو هن پاڪستان پيپلز پارٽي اندر پيدا ٿيل اختلافن واري خبرن کي رد ڪندي چيو ته پيپلز پارٽي شهيدن جي خون سان ٺهيل آهي ۽ اڄ به پاڪستان جي وڏي سياسي قوت آهي. هن وڌيڪ چيو ته شهيد ذوالفقار علي ڀٽو ۽ محترمه بينظير ڀٽو شهيد ٿي ملڪ کي بچايو ۽ اڳوڻي صدر آصف علي زرداري پاڪستان کپي جو نعرو هڻي ملڪ کي ٽٽڻ کان بچايو. هن چيو ته پ پ پ جي سموري قيادت متحد آهي، ۽ سمورن اڳواڻن کي پارٽي قيادت تي پورو اعتماد آهي ان ڪري پ پ پ ۾ ڪو به فارورڊ بلاڪ نه پيو ٺهي. هڪ سوال جي جواب ۾ هن چيو ته بلاول ڀٽو ۽ فاطمه ڀٽو جي وچ ۾ ٺاهه وارين ڳالهين  جي حوالي سان ميڊيا ۾ آيل خبرن ۾ ڪا به صداقت نه آهي. پشاور سانحي بعد سموري ملڪ جي پارٽين اتحاد ۽ اتفاق جو اظهار ڪيو آهي ۽ فوجي عدالتون قائم ڪرڻ بابت سمورين پارٽين گڏيل فيصلو ڪيو آهي جنهن تي پيپلز پارٽي کي ڪجهه تحفظات هيا جيڪي دور ڪيا ويا ۽ سڀني پارٽين گڏيل طور تي فوجي عدالتن جي اجازت ڏني آهي فقط پيپلز پارٽي اهڙو قدم ناهي کنيو. ڀٽ شاهه جي ترقياتي ڪمن ۾ ٿيل ڪرپشن بابت پڇيل هڪ سوال جي جواب ۾ هن چيو ته ڀٽ شاهه ڊيولپمينٽ پراجيڪٽ ۾ ڪيل ڪرپشن جي حوالي سان ضرور متعلقه ادارن کي ياد ڏياريندس ۽ ڪرپشن ۾ ملوث ماڻهن خلاف سخت ڪارروائي ڪئي ويندي. انهيءَ موقعي تي سيد علي اڪبر شاهه، حاجي غلام رسول ملاح، ڊاڪٽر جواد حسين شاهه ۽ پ پ پ جا مقامي رهنما ساڻس گڏ موجود هئا.

 

پي آءِ اي جو ڪارنامو، قومي اڏام پي ڪي 350 بنا مسافرن جي اڏامي وئي، مسافرن جو احتجاج

ڪراچي(اسٽاف رپورٽر)قومي ايئر لائن پي آءِ اي جي اڏام پي ڪي 350 مسافرن کڻي وڃڻ بغير پشاور لاءِ روانو ٿي وئي، مسافرن جو ڪراچي ايئرپورٽ تي سخت احتجاج ، ڇنڇر ڏينهن ڪراچي ۾ پي آ اي هڪ ٻيو وڏو ڪارنامو سرانجام ڏئي ڇڏيو، پي آءِ اي انتظاميه پاران مسافرن کي ڪراچي کان پشاور لاءِ اڏام پي ڪي 350 جي ساڍي 12 وڳي ڏينهن جي ٽڪيٽ جاري ڪئي وئي پر مٿي ذڪر ڪيل اڏام کي صبح 9 وڳي بغير مسافرن جي روانو ڪيو ويو، جڏهن مسافر ٽڪيٽ وٺي ايئرپورٽ تي 11 وڳي تي پهتا ته باڪامال ماڻهو، لاجواب سروس جي دعويدار ايئر لائن خالي جهاز وٺي وڃي چڪي هئي جنهن تي مسافرن ڪراچي ايئرپورٽ تي سخت احتجاج ڪيو.

 

انتها پسند هندن جي احتجاج باوجود پي ڪي فلم ڪاميابين جو سلسلو جاري

ممبئي (شوبز نيوز) انتها پسند هندن جي احتجاج ۽ سينيماگهرن ۾ بند ٿيڻ باوجود عامر خان جي فلم پي ڪي جي ڪاميابين جو سلسلو جاري آهي، فلم ڪجهه ڏينهن ۾ پنج سو ڪروڙ کان وڌيڪ روپيه ڪمائي بالي ووڊ ۾ تاريخ لکي ڇڏي، بالي ووڊ مسٽر پرفيڪشنسٽ عامر خان جي فلم پيڪي 19 ڊسمبر تي رليز ڪئي وئي هئي، ڀارت ۾ فلم خلاف احتجاج ۽ ڪيترين ئي سينيماگهرن ۾ بند ٿيڻ جي فلم جي ڪاميابين جو سلسلو نه رڪجي سگهيو، پي ڪي فلم صرف 14 ڏينهن ۾ عالمي سطح تي 5 سو 16 ڪروڙ روپيه ڪمائنيدڙ پهرين فلم بڻجي چڪي آهي، فلم صرف ڀارت ۾ 394 ڪروڙ رپيه ڪمايا جڏهن ته بين الاقوامي باڪس آفيس تي 122 ڪروڙ روپيه ڪمايا، فلمي پنڊتن چيو آهي ته هلندڙ هفتي فلم 6 ڪروڙ ڪمائي هڪ نئون رڪارڊ قائم ڪندي

 

هالي ووڊ جي ايڪشن ۽ سسپنس سان ڀرپور فلم بليڪ هيٽ جو نئون ٽريلر جاري

نيويارڪ(شوبز نيوز) هالي ووڊ جي ايڪشن ۽ سسپنس سان ڀرپور فلم بليڪ هيٽ جو نئون ٽريلر جاري ڪيو ويو آهي فلم ۾ مرڪزي ڪردارا اداڪار ڪرس هيمسورٿ ادا ڪيو آهي، ان کي آمريڪي ۽ چيني اختيارين جي هڪ سائبر ڏوهاري کي پڪڙڻ ۾ مدد لاءِ جيل مان آزاد ڪيو ويندو آهي هي فلم 16 جنوري تي نمائش لاءِ پيش ڪئي ويندي.

 

سلمان خان به هاڻي شاهه رخ خان جي نقش قدم تي هلندو

ممبئي (شوبز نيوز) ڀارتي اداڪار  سلمان خان به هاڻي ڪنگ خان شاهه رخ خان جي نقش قدم تي هلندي پنهنجي ايندڙ فلم پريم رتن ڌان پايو  جي مشهوري مهم دنيا جي مختلف ملڪن ۾ ڪرڻ جو اعلان ڪري ڇڏيو. اداڪار سلمان خان ۽ سندس هيروئن سونم ڪپور پنهنجي ايندڙ فلم پريم رتن ڌان پايو  جي مشهوري مهم دنيا جي ڪيترن ئي ملڪن ۾ ڪرڻ جو اعلان ڪري ڇڏيو جڏهن ته اداڪار سلمان خان جو چوڻ آهي ته سندس هي فلم ٻين فلمن کان تمام گهڻي مختلف آهي جنهن ۾ هن مختلف ڪردار ادا ڪيو آهي واضع رهي ته هن کان پهرين اداڪار شاهه رخ خان پنهنجي نئين فلم هيپي نيو ايئر جي مشهوري مهم دنيا جي ڪيترن ئي ملڪن ۾ ڪئي هئي هاڻي ڏسو ته سلمان خان جي هي ڪوشش ڪيترو ٿي رنگ لاهي.

 

ورلڊ ڪپ جي تياري ۾ پينٽينگيولر ڪپ مددگار ثابت ٿيندو: سهيل تنوير

ڪراچي(اسپورٽس نيوز)قومي ڪرڪيٽر سهيل تنوير چيو آهي ته هو ورلڊ ڪپ ۾ ٽيم ۾ شموليت لاءِ پراميد آهي، ۾ پينٽينگيولر ڪپ لاءِ بگ بيش ليگ ڇڏي ڏني آهي، نيشنل اسٽيڊيم ڪراچي ۾ ميڊيا سان ڳالهائينديهن چيو ته ورلڊ ڪپ جي تياري ۾ پينٽينگيولر ڪپ مددگار ثابت ٿيندو، هو ميگا ايونٽ ۾ ٽيم ۾ شموليت لاءِ پراميد آهي انهي ڪري بگ بيش ليگ به ڇڏي ڏني آهي، هن وڌيڪ چيو ته آسٽريليا خلاف آخري سيريز ۾ شارٽ سليڪشن غطل هئي جنهن تي هو آئوٽ ٿيو سموري سيريز ۾ سٺو پرفارم ڪيو، آسٽريليا ۽ نيوزي لينڊ جي پچز تي قومي ٽيم جا فاسٽ بالرز مايوس نه ڪندا، هن چيو ته ملڪ ۾ گهڻي عزت ملي آهي ڪجهه ماڻهو آهن جيڪي تنقيد به ڪندا آهن پر ڪرڪيٽ جي حيثيت سان اسان کي دل وڏي ڪرڻ جي ضرورت آهي، ورلڊ ڪپ ۾ ٽيم ۾ شموليت لاءِ پراميد آهيان

ڪنهن به رانديگر جو نمبر هر هر تبديل ڪرڻ سان ان جو اعتماد متاثر ٿئي ٿو: ڪامران اڪمل

ڪراچي(اسپورٽس نيوز)وڪيٽ ڪيپر بيٽسمين ڪامران اڪمل چيو آهي ته ڪنهن به رانديگر جو نمبر بار بار تبديل ڪيو وڃي ته ان سان اعتماد متاثر ٿيندو آهي، جيڪڏهن ان کي موقعو مليو ته هو اوپننگ بيٽسمين جي حيثيت سان کيڏڻ کي ترجيح ڏيندو، ڪامران اڪمل اڃا ٽيم ۾ آيو نه آهي پر ان چيو آهي ته بار بار بيٽنگ آرڊر تبديل نه ٿيڻ گهرجي، مان قومي ٽيم ۾ اوپنر جي حيثيت سان کيڏڻ لاءِ تيار آهيان.

 

ڊيل اسٽين ٽيسٽ ڪرڪيٽ ۾ مخايا اين ٽيني جي وڌيڪ وڪيٽن وارو رڪارڊ ٽوڙي ڇڏيو

ڪيپ ٽائون (اسپورٽس نيوز) ڏکڻ آفريقي ڪرڪيٽ ٽيم جي اسٽاف فاسٽ بالر ڊيل اسٽين ٽيسٽ ميچن ۾ پنهنجي ئي هم وطن بالر مخايااين ٽيني جي وڌيڪ وڪيٽن وارو رڪارڊ ٽوڙي ڇڏيو، اسٽين ملڪ طرفان ٽيسٽ ڪرڪيٽ ۾ شان پولاڪ کان پوءِ وڌيڪ وڪيٽون حاصل ڪندڙ ٻيو بالر بڻجي ويو آهي، هن ويسٽ انڊيز خلاف جاري ٽين ٽيسٽ ميچ جي پهرين اننگز ۾ دنيش رامدين کي آئوٽ ڪري اهو اعزاز حاصل ڪيو، ڏکڻ آفريقا طرفان ٽيسٽ ۾ وڌيڪ وڪيٽون وٺڻ جو اعزاز شان پولاڪ کي حاصل آهي، جنهن 108 ميچن ۾ 421 وڪيٽون ورتيون آهن، جڏهن ته اسٽين 78 ميچن جون 97 اننگز کيڏي 391 وڪيٽون ورتيون آهن