تازيون خبرون

Daily Archives: January 2, 2015

قومي ايڪشن پلان دهشتگردن کي برباد ڪري ڇڏيندو: وزيراعظم

اسلام آباد (بيورو) وزيراعظم نواز شريف چيو آهي ته دهشتگردي خلاف جنگ کان ڪو اڻڄاڻ نٿو رهي سگهي، پاڪستان کي دهشتگردن مان پاڪ ڪرڻ اسان جو مشن آهي، دهشتگردن ۽ سندن مددگارن ۾ ڪو فرق نه رکيو ويندو، صحيح وقت تي موضون قدمن سان ڪاميابي ماڻينداسين، پنهنجي پاڪ فوج جي ڀرپور حمايت ڪنداسين، دهشتگردي کان ڊڄڻ بدران ان کي هارائينداسين، جنگ سفارتي حڪمت عملي، انٽيليجنس ۽ فوجي قيادت سان گڏجي کٽنداسين، دهشتگرد خوف جو ماحول پيدا ڪرڻ جي ناڪام ڪوشش ڪري رهيا آهن، اسان هي جنگ دهشتگردن جي ٺڪاڻن تائين کڻي وينداسين. هو خميس ڏينهن قومي سلامتي متعلق اعليٰ سطحي اجلاس کي خطاب ڪري رهيو هو. اجلاس ۾ آرمي چيف جنرل راحيل شريف، آءِ ايس آءِ ڊي جي رضوان اختر، آءِ ايس پي آر ڊي جي عاصم سليم باجوه، خيبر پختونخوا گورنر سردار مهتاب خان ۽ وفاقي وزيرن چوڌري نثار علي خان، اسحاق ڊار، سينيٽر پرويز رشيد ۽ احسن اقبال شرڪت ڪئي. اعليٰ سطحي اجلاس ۾ وزيراعظم نواز شريف کي آپريشن ضرب عضب ۽ قومي پلان آف ايڪشن تي بريفنگ ڏني وئي. وزيراعظم کي بريفنگ آءِ ايس پي آر ڊي جي عاصم سليم باجوه ۽ گهرو سيڪريٽري ڏني. ان کان علاوه آرمي چيف جنرل راحيل شريف ڪور ڪمانڊرز ڪانفرنس جي فيصلن کان اجلاس کي آگاهه ڪيو. وزيراعظم طرفان آپريشن ضرب عضب ۽ قومي ايڪشن پلان ۾ پيشرفت تي اطمينان جو اظهار ڪيو ويو. اجلاس ۾ وزيراعظم گذريل ڏينهن ڀارتي فورسز طرفان ڪيل سخت فائرنگ جي نتيجي ۾ شهيد ٿيل رينجرز اهلڪارن لاءِ فاتحه خواني ڪندي پرڏيهي صلاحڪار سرتاج عزيز کي هدايت ڪئي ته هو ڀارت سان ورڪنگ بائونڊري جي ڀڃڪڙي ۽ فائرنگ سبب پيش آيل معاملو اٿاري. اجلاس ۾ ڳالهائيندي وزيراعظم وڌيڪ چيو ته پاڪستان کي دهشتگردن مان پاڪ ڪرڻ اسان جو مشن آهي، پوري سياسي قيادت ۽ قوم دهشتگردي خلاف جنگ تي متحد آهي، اسان پنهنجي فوج جي ڀرپور حمايت ڪنداسين، دهشتگردي خلاف نه صرف وڙهنداسين پر ان کي روڪينداسين به، حڪومت جو پلان آف ايڪشن دهشتگردن جو خاتمو ڪري ڇڏيندو. ان کان پهريان اجلاس ۾ وفاقي گهرو وزير چوڌري نثار علي خان وزيراعظم کي دهشتگردي روڪٿام جي اداري نيڪٽا جي باضابطا اجلاس متعلق بريفنگ ڏني ۽ جنهن ۾ هن ٻڌايو ته پابندي مڙهيل تنظيمن کي ڪم کان روڪڻ لاءِ حڪمت عملي تيار ڪئي وئي آهي، جنهن تي وزيراعظم اطمينان جو اظهار ڪيو

 

قومي ايڪشن پلان تي سمورن ادارن کي فوري عمل ڪرڻو پوندو: آرمي چيف

راولپنڊي(م.ڊ) چيف آف آرمي اسٽاف جنرل راحيل شريف دهشتگردن ۽ سندن حامين خلاف سخت ترين ڪارروائي خاطر بامقصد فيصلي لاءِ سڄي قوم جون نظرون سياسي ۽ فوجي قيادت تي آهن. هن اهڙو اظهار 178 هين ڪور ڪمانڊرز ڪانفرنس کي خطاب ڪندي ڪيو. ڪور ڪمانڊرز ڪانفرنس خميس ڏينهن جنرل هيڊڪوارٽر ۾ ٿي جنهن جي صدارت چيف آف آرمي اسٽاف جنرل راحيل شريف ڪئي. ڪانفرنس ۾ شرڪت ڪندڙ ڪمانڊرن اميد ظاهر ڪئي ته آل پارٽيز ڪانفرنس ۾ دهشتگردي جي خلاف سياسي اتفاق راءِ قائم ٿيو آهي جنهن کي ننڍن معاملن جي ڪري ناڪام نه ٿيڻ گهرجي. آرمي چيف جنرل راحيل شريف زور ڀريو ته وقت ضايع ڪرڻ کانسواءِ سمورن ادارن کي گڏجي دهشتگردي خلاف طئي ڪيل قومي ايڪشن پلان تي عمل کي يقيني بنائڻ گهرجي. ڪور ڪمانڊر ڪانفرنس ۾ شرڪت ڪندڙ ڪمانڊرن پشاور ۾ آرمي پبلڪ اسڪول سانحي تي سخت ڏک ۽ افسوس جو اظهار ڪيو ۽ سانحي ۾ شهيد ٿيلن جي ڪٽنبن سان يڪجهتي جو اظهار ڪندي ان عزم کي ورجايو ته دهشتگردي جي مڪمل خاتمي تي تائين آپريشن جاري رکيو ويندو. ڪانفرنس ۾ ملڪ جي اندروني توڙي بيروني صورتحال تي غور ويچار ڪيو ويو جنهن ۾ خاص طور تي دهشتگردن خلاف جاري آپريشن تي غور ويچار ڪيو ويو. ملڪ اندر تازو شروع ڪيل انٽيليجنس معلومات جي بنياد تي آپريشن تي ويچاريو ويو ۽ ان جي مثبت نتيجن تي اطمينان جو اظهار ڪيو ويو.

 

صدر ڦاهي جي منتظر پنجن قيدين جون رحم واريون اپيلون رد ڪري ڇڏيون

اسلام آباد(بيورو) صدر ممنون حسين، ڦاهي جي منتظر پنجن قيدين جون رحم واريون اپيلون رد ڪري ڇڏيون. قتل جي ڏوهه ۾ موت جي سزا جي جوابدار صولت مرزا، محمد سعيد اعواڻ، طلحهٰ حسين، شاهد حنيف ۽ خليق احمد جون رحم واريون اپيلون رد ڪيون ويون. وفاقي گهرو وزارت، سنڌ حڪومت کي خط ذريعي آگاهه ڪيو آهي ته صدر پنجن جوابدارن جون رحم واريون اپيلون رد ڪيون آهن جنهن ڪري قانوني طريقي تحت ڏوهارين کي ڪيفر ڪردار تائين پهچايو وڃي. واضح رهي ته ڦاهيءَ جي منتظر قيدي صولت مزار، ڪــَي اليڪٽرڪ جي اڳوڻي ايم ڊي ملڪ شاهد حامد جي قتل ۾ ملوث هو جنهن کي عدالت 1999ع ۾ ڦاهي جي سزا جو حڪم ڏنو هو. محمد سعيد اعواڻ تي الفلاح ٿاڻي ۾ قتل جا 20 ڪيس داخل آهن جڏهن ته ٻين جوابدار طلحهٰ حسين، محمد شاهد ۽ خليق احمد خلاف گلبهار ٿاڻي تي قتل جا ڪيس داخل هئا.

 

پ پ جو اجلاس، سنڌ حڪومت خلاف ٿيندڙ سازشن تي ويچاريو ويو

ڪرچي(اسٽاف رپورٽر) بلاول هائوس ڪراچي ۾ پ پ ڪو چيئرمين آصف زرداري جي صدارت هيٺ اجلاس ٿيو آهي، سنڌ حڪومت خلاف سازشن ۽ ٿر جي صورتحال تي غور ويچار ڪيو ويو آهي.  آصف زرداري جي صدارت هيٺ اجلاس ۾ سنڌ جي وڏي وزير سيد قائم علي شاهه، سنڌ اسيمبلي جي اسپيڪر آغا سراج دراني، شرجيل ميمڻ ۽ ٻين اڳواڻن شرڪت ڪئي آهي. اجلاس ۾ سنڌ حڪومت خلاف ٿيندڙ سازشن ۽ موجودهه سياسي صورتحال تي غور ويچار ڪيو ويو. اجلاس ۾ ٿر جي صورتحال تي به غور ويچار ڪيو ويو آهي. اجلاس کي خطاب ڪندي اڳوڻي صدر آصف علي زرداري چيو ته پ پ حڪومت خلاف هر دور ۾ سازشون ڪيون ويون پر اهي هميشه ناڪام ويون هاڻي به انهن کي ناڪامي ئي نصيب ٿيندي.

 

اي پي سي ۾ خصوصي عدالتون قائم ٿيڻ متعلق آئين ۾ ترميمن جي ڳالهه ناهي ٿي: خورشيد شاهه

اسلام آباد (بيورو) قومي اسيمبلي ۾ مخالف ڌر اڳواڻ سيد خورشيد شاهه چيو آهي ته ڪل جماعتي ڪانفرنس ۾ خصوصي عدالتن جي قيام بابت آئين ۾ ترميمن جي ڳالهه ناهي ٿي خصوصي عدالتون دهشتگردن انهن جي مالي مدد ڪندڙن جي خلاف ڪيس ٻڌنديون پارليمينٽ هائوس ۾ پنهنجي چيمبر ۾ ميڊيا سان غير رسمي ڳالهه ٻولهه ڪندي اپوزيشن ليڊر چيو ته اي پي سي ۾ خصوصي عدالتن جي قيام تي ڳالهه ٿي هئي سمورين جماعتن جو خصوصي عدالتن جي قيام لاءِ فوجي ايڪٽ ۾ترميمن تي اتفاق ٿيو هو هن چيو ته خصوصي عدالتون دهستگردن انهن جي مالي مدد ڪندڙن جي خلاف ڪيس ٻڌنديون.

 

ڀارتي فورسز جي ورڪنگ بائونڊري تي ٻيهر فائرنگ, ڀارت امن جي خواهش کي ڪمزوري نه سمجهي: خواجه آصف

اسلام آباد(بيورو) ڀارتي فورسز ورڪنگ بائونڊري تي ٻيهر بنا سبب فائرنگ ڪئي آهي، شڪر ڳڙهه سيڪٽر ۾ فائرنگ جو سلسلو ڪيترن ئي ڪلاڪن تائين جاري رهيو گذريل ڏينهن به ان ئي سيڪٽر ۾ فائرنگ سبب 2 رينجرز اهلڪار شهيد ٿي ويا هئا، ڀارت جي ڇڪتاڻ بند نه ٿي 2 ريجرز اهلڪارن جي شهادت کانپوءِ به ڀارتي فورسز پاڪستاني علائقن تي گوليون وسائي رهي آهي پنجاب رينجرز جي مطابق شڪر ڳڙهه سيڪٽر ۾ گذريل رات کان صبح تائين فائرنگ جو سلسلو جاري رهيو، پاڪستاني فورسز جواب ڏنو ته ڀارتي مورچن ۾ خاموشي ڇانئجي وئي، گذريل ڏينهن شهيد ٿيندڙ ٻن رينجرز اهلڪارن جي جنازي نماز ڪالهه رات رينجرز هيڊ ڪوارٽر ونگ شڪر ڳڙهه ۾ ادا ڪئي وئي ڀارتي فورسز جي بنا سبب فائرنگ ۽ جاني نقصان تي پاڪستان ڀارتي ڊپٽي هاءِ ڪمشنر کي طلب ڪري سخت احتجاج رڪارڊ ڪرايو آهي پاڪستان چيو آهي ته ڀارتي فائرنگ سيز فائر معاهدي جي ڀڃڪڙي آهي ڀارتي حڪومت ذميوارن کي انصاف جي ڪٽهڙي ۾ آڻي. ٻئي طرف دفاع واري وزير خواجه آصف جو چوڻ آه يته ڀارت اسان جي امن واري خواهش کي ڪمزوري نه سمجهي، هڪ بيان ۾ دفاع واري وزير خواجه آصف فليت ميٽنگ تي ٿيندڙ ڀارتي جارحيت جي سخت لفظن ۾ مذمت ڪئي، هن جو چوڻ هو ته پوري دنيا ۾ فليگ ميٽنگ تي حملا عالمي قانونن جي ڀڃڙي سمجهيا ويندا آهن، ڀارت مسلسل عالمي قانونن جي ڀڃڪڙي ڪري رهيو آهي خواجه آصف جو چوڻ آهي ته اسان جي امن جي ڪوششن ۾ مشڪلاتون پيدا نه ڪيون وڃن، امن جي خواهش کي ڀارت اسان جي ڪمزوري نه سمجهي، اسان ڀارت کي هر قسم جي جارحيت جو منهن ٽوڙ جواب ڏيڻ جي صلاحيت رکون ٿا.

 

جي ايس ٽي ۾ واڌ خلاف سينيٽ ۾ مخالف ڌر جو احتجاج، واڪ آئوٽ

اسلام آباد(بيورو) جنرل سيلز ٽيڪس ۾ پنج سيڪڙو واڌ خلاف سينيٽ ۾ مخالف ڌر جا ميمبر ايوان مان واڪ آئوٽ ڪري هليا ويا، ناڻي واري وفاقي وزير اسحاق ڊار پيٽروليم شين جي اگهن ۾ هڪ ٻيهر واڌ ڪرڻ جو اشارو ڏيندي چيو آهي ته پيٽروليم شين تي جــِي ايس ٽي ۾ واڌ عارضي آهي. سينيٽ جو اجلاس چيئرمين نيئر بخاري جي صدارت هيٺ ٿيو. اجلاس ۾ حڪومت طرفان جنرل سيلز ٽيڪس ۾ 5 سيڪڙو واڌ واري عمل خلاف مخالف ڌر جي ميمبرن احتجاج ڪندي ايوان مان واڪ آئوٽ ڪيو. سينيٽ ۾ خيالن جو اظهار ڪندي ناڻي واري وفاقي وزير اسحاق ڊار چيو آهي ته هلندڙ مالي سال لاءِ حڪومت محصولات جي وصولي جو هڪ ڏکيو ٽارگيٽ مقرر ڪيو آهي. هن چيو ته آپريشن وارن علائقن ۾ نئين سر اڏاوت ۽ بحالي لاءِ هڪ سئو ارب رپين جو ڪاٿو لڳايو ويو آهي. اسحاق ڊار ٻڌايو ته آپريشن ضرب عضب تي هن وقت تائين 30 ارب رپيا واڌ خرچ ٿي چڪا آهن جن مان 15 ارب رپيا پاڪ فوج جي آپريشن جڏهن ته 15 ارب رپيا آءِ ڊي پيز تي خرچ ٿيا آهن. سندس چوڻ هو ته حڪومت کي آءِ ڊي پيز جي واپسي ۽ آپريشن متاثر علائقن ۾ ترقياتي منصوبن لاءِ هڪ ارب ڊالرز جي ضرورت آهي. ناڻي واري وفاقي وزير چيو ته پيٽروليم شين جي اگهن ۾ گهٽتائي سان عوام کي س4 سئو ارب رپين جو فائدو ٿيو آهي، حڪومت بجلي جي اگهن ۾ 2 رپيا 32 پئسا في يونٽ گهٽتائي ڪئي آهي ۽ هن وقت مهانگائي جي شرح 11 سالن ۾ گهٽ ترين سطح تي آهي. اسحاق ڊار چيو ته پيٽروليم شين جي گهٽتائي سبب عوام کي رليف ملڻ سان گڏ ملڪ ۾ جاري کاتن جي خساري ۾ به گهٽتائي ٿي آهي پر حڪومت کي قرضن جو وياج ۽ قسطون به ڏيڻيون هونديون آهن. هن چيو ته جيڪڏهن حڪومت جي ايس ٽي لاڳو نه ڪندي ته ترقياتي خرچ گهٽ ڪرڻا پوندا. ناڻي واري وزير اسحاق ڊار پيٽروليم شين جا اگهه ايندڙ ڪجهه مهينن ۾ ٻيهر وڌائڻ جو اشارو ڏيندي چيو ته ان صورت ۾ حڪومت سياسي جماعتن سان صلاح مشورا ڪري جــِي ايس ٽي ۾ ڪيل واڌ واپس وٺندي. ان کان اڳ پ پ سينيٽر تاج حيدر چيو ته ملڪ ۾ وچ ٿرو عدالتي نظام آندو پيو وڃي. هن وڌيڪ چيو ته توانائي واري معاملي تي سنڌ سان زيادتي ڪئي پئي وڃي، سنڌ ۾ ڪوئلو موجود آهي، گئس به نڪري ٿي، قدرتي وسيلا هجڻ باوجود سنڌ کي حصو نه ٿو ملي. اجلاس ۾ سيڪيورٽيز بل 2014ع بل پيش ڪيو ويو جيڪو چيئرمين غور ويچار لاءِ ڪميٽي حوالي ڪري ڇڏيو. اجلاس ۾ اڪثر ميمبرن جي غير حاضري تي چيئرمين ڪاوڙ جو اظهار ڪيو جڏهن ته پ پ سينيٽر رضا رباني جو چوڻ هو ته سينيٽ کي انتهائي غير سنجيدگيءَ سان ورتو پيو وڃي. اجلاس ۾ مختلف معاملن تي بحث جاري هو ته سينيٽ چيئرمين وڌيڪ ڪارروائي سڀاڻي تائين ملتوي ڪري ڇڏي.

 

گلستان جوهر ۾ فرنيچر مارڪيٽ کي باهه لڳڻ جو وڏي وزير نوٽيس وٺي ڇڏيو

ڪراچي(اسٽاف رپورٽر) ڪراچي جي گلستان جوهر واري علائقي ۾  فرنيچر مارڪيٽ کي باهه لڳي وئي، جنهن جي نتيجي لکين رپين جو فرنيچر سڙي ويو، وڏي وزير سيد قائم علي شاهه باهه واقعي جو نوٽيس وٺندي ڪمشنر ڪراچي کي معاملي جي ذاتي طور نگراني ڪرڻ جي هدايت ڪئي  آهي. ڪامران چورنگي ويجهوپراڻي فرنيچر جي مارڪيٽ کي باهه لڳي وئي، جنهن  کانپوءِ شهر جي مختلف علائقن مان گهرايل 6 فائر برگيڊز گاڏين هڪ ڪلاڪ جي ڪوششن بعد باهه تي ضابطو آندو. مارڪيٽ ۾ باهه لڳڻ سبب لکين رپين جو فرنيچر سڙي ويو، جڏهن ته باهه لڳڻ سبب گلستان جوهر کان مختلف علائقن ڏانهن ايندڙ ويندڙ ٽريفڪ معطل ٿي وئي. وڏي وزير سيد قائم علي شاهه باهه واقعي جو نوٽيس وٺندي ڪمشنر ڪراچي کي معاملي جي ذاتي طور نگراني ڪرڻ جي هدايت ڪئي.

 

حڪومت ذڪي الرحمان لکوي جي نظربندي ختم ڪرڻ وارو فيصلو سپريم ڪورٽ ۾ چئلينج ڪري ڇڏيو

اسلام آباد (بيورو) حڪومت ذڪي الرحمان لکوي جي نظربندي ختم ڪرڻ وارو فيصلو سپريم ڪورٽ ۾ چئلينج ڪري ڇڏيو، گهرو وزارت طرفان داخل درخواست ۾ اپيل ڪئي وئي آهي ته اسلام آباد هاءِ ڪورٽ کي ذڪي الرحمان لکوي جي نظربندي جو فيصلو ختم ڪرڻ جواختيار ناهي ان لاءِ ان کي فوري طور تي ڪالعدم قرار ڏنو وڃي، ياد رهي ته ممبئي حملي ڪيس ۾ ضمانت تي آزادي کانپوءِ حڪومت ان کي اڊيالا جيل ۾ نظربند ڪري ڇڏيو هو جڏهن ته اسلام آباد هاءِ ڪورٽ ان حڪم کي ڪالعدم قرار ڏيندي ان جي فوري آزادي جو حڪم ڏنو هو.

 

ٻئي شادي بابت خبرن جي ترديد، هينئر شادي جو وقت ناهي، پشاور سانحي سبب قوم سوڳ جي عالم ۾ آهي: عمران خان

اسلام آباد(بيورو) تحريڪ انصاف جي چيئرمين عمران خان ٻِي شادي بابت خبرن جــِي ترديد ڪندي چيو آهي ته ان حوالي سان خبرون افواهن کانسواءِ ڪجهه به ناهن. هڪ بيان ۾ عمران خان چيو ته سندس ٻِي شاديءَ جون ڳالهيون درست ناهن. هن چيو ته هن اسلام آباد جي ڌرڻي ۾ سڀني آڏو ٻي شادي جي خواهش جو اظهار به ڪيو هو، پشاور سانحي سبب کيس تمام گهڻو ڏک پهتو آهي. عمران خان چيو ته ملڪ هن وقت جنگ جي حالت ۾ آهي، ٻي شادي لاءِ مناسب وقت جو انتظار آهي، ان حوالي سان شايع ۽ نشر ٿيل خبرون بي بنياد آهن انهن ۾ ڪا به صداقت ناهي. واضح رهي ته برطانيه جي هڪ اخبار، پنهنجي رپورٽ ۾ دعويٰ ڪئي هئي ته عمران خان خانگي ٽي وي چينل جي ميزبان ريهام خان سان لنڊن ۾ ڳــُجهي شادي ڪئي آهي.