تازيون خبرون

Daily Archives: January 1, 2015

سنڌو سومرو قتل ڪيس: پوسٽ مارٽم رپورٽ جاري، ڏاڍائي جي تصديق

لاڙڪاڻو(بيورو) لاڙڪاڻي ۾ قتل ڪيل ٻارڙي سنڌو سومرو جي پوسٽ مارٽم رپورٽ جاري ڪئي وئي، لاڙڪاڻي ۾ قتل ڪيل ٻارڙي فوزيا عرف سنڌو سومرو جي فائنل پوسٽ مارٽم رپورٽ جاري ڪئي وئي، رپورٽ موجب ٻارِڙي کي ڌاڍائي بعد گهٽا ڏئي قتل ڪيو ويو آهي. شهر جي يار محمد ڪالوني ۾ 4 ڏينهن اڳ 5 ورهين جي ٻارڙي فوزيا عرف سنڌو سومرو کي اغوا ڪرڻ بعد جنسي ڏاڍائي بعد قتل ڪيو ويو هو. چانڊڪا سپتال پاران ٻارڙي جي حتمي پوسٽ مارٽم رپورٽ جاري ڪئي وئي آهي،جنهن ۾ ٻارڙي کي جنسي ڏاڍائي بعد گهٽا ڏئي قتل ڪيو ويو آهي. واضح رهي ته ٻارڙي جي قتل ڪيس ۾ پوليس جوابدار يونس عرف ببلو، شعيب جتوئي ۽ نياز جتوئي کي گرفتار ڪيو هو، جن کي گذريل ڏينهن عدالت ٽن ڏينهن جسماني رمانڊ تي پوليس حوالي ڪيو هو

 

2014 جي آخري سج کي ڄامشوري ۾سول سوسائٽي، سياسي، سماجي اڳواڻن ۽ اديبن پاران سنڌو درياهه جي پيٽ ۾ الوداع ڪيو

ڄامشورو (ڊ ر) سال 2014ع جي آخري سج کي سڄي ملڪ جيان ڄامشوري ۾ به سول سوسائٽي جي نمائندن، سياسي سماجي اڳواڻن سميت اديبن ۽ دانشورن المنظر پل تي پهچي سنڌو درياهه جي پيٽ مان الوداع ڪيو، جتي سال 2014ع جي ڪلورن، پشاور سانحي، ٿر ۾ ڏڪار سبب معصوم ٻارڙن جي موت، قومپرست ڪارڪنن جي عدالت کان مٿانهين قتلن ۽ دهشتگردي تي ڳڻتي جو اظهار ڪندي نئين سال ۾ دهشتگردي جي خاتمي، امن امان، وطن جي خوشحالي ۽ ترقي لاءِ خاص دعائون گهريون ويون، المنظر پل وٽ درياهه جي هيٺئين پاسي کان حيدرآباد ۽ ڄامشوري سان تعلق رکندڙ اديبن، دانشورن ذوالفقار هاليپوٽو، پنهل ساريو، علي آڪاش، بدر سومرو، حاڪم چانڊيو، مشتاق ميراڻي، آزاد ميرواهي، مصطفيٰ ميراڻي، علي مراد چانڊيو، محبوب شاهه، حاجي خان سيال، ڄامشورو شهري ايڪشن ڪاميٽي جي اڳواڻن روشن برهماڻي، عرفان برفت، صادق بليدي، علي گل بليدي، رحيم جمالي، پ پ اڳواڻ عبدالرئوف راهمون، سنڌ دوست نيشنل فورم جي آسي ڀٽو، دليپ دوشي، مهراڻ ميمڻ، ديوان سهيل، راجا سنڌي ۽ ٻين سنڌو درياهه جي ڪناري ۾ آخري سج کي الوداع ڪيو ۽ سنڌو درياهه ۾ گلاب جا گل نڇاور ڪيا، جڏهن ته ميڻ بتيون ٻاري سنڌي قوم جي خوشحالي، ترقي، امن جي بحالي، دهشتگردي جي خاتمي لاءِ خاص دعائون گهريون ويون ۽ تقريبون منعقد ڪيون ويون، جن کي ناليوارن فنڪارن وقار ملاح، دانش منظور ٿهيم، افتخار سومرو، غلام عباس ٻٻر، يوسف چنا، منظور چانڊيو ۽ ٻين سرن جي ڀيٽا ڪري خوب داد حاصل ڪيو، ان موقعي تي سول سوسائٽي جي نمائندن، اديبن، دانشورن، صحافين، سياسي سماجي تنظيمن جي اڳواڻن ۽ فنڪارن ڳالهائيندي چيو ته سال 2014ع سنڌين لاءِ تمام ڏکوئيندڙ رهيو، جنهن ۾ اسان جي سنڌي نوجوانن کي اغوا ڪري انهن جا لاش ڏنا ويا، ٿر ۾ ڏڪار سبب سوين معصوم ٻارڙا توڙي رهواسي موت جي ور چڙهي ويا، سوڀو گيانچنداڻي، ڪومل ڀاٽيا سميت سنڌ جا ڪيترائي اديب ۽ دانشور وڇڙي ويا، جڏهن ته هن رياست اندر دهشتگردي ۽ طالبان  جي ظلم سبب پشاور جو واقعو پيش آيو، هنن اميد ڪئي ته ايندڙ سال 2015ع ملڪ ۽ قوم لاءِ سٺو ثابت ٿيندو، جنهن ۾ دهشتگردي  جو خاتمو ايندو، امن امان بحال ٿيندو، غريب ماڻهن کي اٽي، لٽي ۽ اجهي جي سهولت ملندي ۽ پيار، امن ۽ محبت جي پرچار ٿيندي

 

مشرف تي حملي جي هڪ ٻئي جوابدار کي ڦاهي ڏني وئي

پشاور(م.ڊ) اڳوڻي صدر جنرل رٽائرڊ پرويز مشرف تي حملي جي هڪ ٻئي جوابدار نياز محمد کي ڦاهي ڏني وئي. ڏوهاري نياز محمد کي سينٽرل جيل پشاور ۾ ڦاهيءَ تي لٽڪايو ويو. ڊاڪٽرن طرفان موت جي تصديق بعد جيل انتظاميه نياز محمد جو لاش وارثن حوالي ڪري ڇڏيو. ان موقعي تي سڪيورٽيءَ جا انتظام سخت ڪيا ويا هئا ۽ ڪنهن به اڻ لاڳاپيل شخص کي جيل ڏانهن اچڻ جي اجازت نه هئي. واضح رهي ته صوابي سان تعلق رکندڙ نياز محمد کي پرويز مشرف تي راولپنڊي ۾ حملي جي ڏوهه ۾ 2006ع تي ملٽري ڪورٽ ڦاهي جي سزا ٻڌائي هئي ۽ ان جي ڪجهه ڏينهن بعد ئي هري پور مان پشاور منتقل ڪيو ويو هو. 10 ڏينهن اڳ به ڊسٽرڪٽ جيل فيصل آباد ۾ اڳوڻي صدر پرويز مشرف تي حملي جي 4 ڏوهارين کي انجام تائين پهچايو ويو هو.

 

نئين سال جي آمد، ڪراچي سمنڊ طرف ويندڙ رستا بيريئر ۽ گاڏيون بيهاري بند

مظفرآباد(م.ڊ) آزاد ڪشمير جي گادي واري هنڌ مظفر آباد لڳ اصغر آباد ۾ مسافر وين اونهي کاهيءَ ۾ ڪرڻ جي نتيجي ۾ 7 مسافر اجل جو شڪار ۽7 زخمي ٿي پيا. ذريعن مطابق مظفر آباد کان 10 ڪلوميٽر پري اصغر آباد وٽ مسافر وين تيز رفتاري سبب ڪلٽي ٿيڻ بعد اونهي کاهي ۾ ڪرڻ جي نتيجي ۾ 7 ڄڻا فوت ۽ 7 زخمي ٿي پيا. پوليس واقعي جي اطلاع بعد علائقي ۾ پهچي امدادي سرگرميون شروع ڪري ڇڏيون ۽ لاشن ۽ زخمين کي مقامي اسپتال منتقل ڪيو. زخمين مان گهڻن جي حالت نازڪ آهي.سال 2014 ويندي ويندي به اک ڏيکاريندو ويو.

 

سلمان خان کي سريلنڪن صدر جي چونڊ مهم ۾ حصو وٺڻ مهانگو پئجي ويو

چنائي(شوبز نيوز)بالي ووڊ سپر اسٽار سلمان خان کي ڏک ايشيا جي نوجوان نسل ۾ سڀ کان وڌيڪ پسند ڪيو ويندو آهي پر ڪڏهن ڪڏهن ان کي سخت تنقيد جو نشانو بڻايو ويندو آهي ۽ اهڙو ڪجهه ان وقت ٿيو جڏهن هو سريلنڪن صدر مهيندر راجا پاڪسي جي چونڊ مهم ۾ حصو وٺڻ لاءِ ويو ته ڀارت ۾ ئي ان خلاف مظاهرا شروع ٿي ويا ڀارتي ميڊيا مطابق سلمان خان جي سريلنڪا جي موجوده صدر مهيندر راجا پاڪسي جي پٽ نمل راجا پاڪسي سان سٺي دوستي آهي هن سرلينڪا ڄائي اداڪاره جيڪولين فرنانڊس سان گڏ سلمان کي دعوت ڏني ته هو ان جي والد جي چونڊ مهم جو حصو بڻجي، ٻئي اداڪار ڪولمبو ويا ۽ اتي هنن مهيندر راجا پاڪسي جي چونڊ مهم ۾ حصو ورتو سلمان خان جي ان قدم تي سريلنڪا سان لاڳاپيل ڀارت جي ڏاکڻي رياست تامل ناڊو ۾ ان خلاف مظاهرا شروع ٿي ويا مظاهرين جو چوڻ هو ته سلمان خان اهڙي شخص جي حمايت ڪري رهيو آهي جيڪو پنهنجي ملڪ ۾ تامل ماڻهن جي قتل عام ۾ ملوث آهي.ياد رهي ته سريلنڪا ۾ تامل نسل جا ماڻهو گذريل ڪيترن ئي ڏهاڪن کان آزادي لاءِ وڙهي رهيا آهن جڏهن ته مهيندر راجا پاڪسي جي حڪومت ان تحريڪ کي سختي سان دٻائي ڇڏي.

 

عامر خان جي نئين فلم ”پي ڪي“ 10 ڏينهن ۾ 433 ڪروڙ ڪمائي ورتا

ممبئي(شوبز نيوز): عامر خان جي نئين فلم پي ڪي 10 ڏينهن  ۾ 236 ڪروڙ ڪمائي ورتا جنهن کانپو ءِهي فلم ڀارتي فلمن ۾ سڀ کان وڌيڪ ڪاروبار ڪندڙ فلمن ۾ ٻئي نمبر تي اچي وئي آهي ڀارتي فلم پي ڪي ڀارت ۾ 236 ڪروڙ جڏهن ته پوري دنيا ۾ 433 ڪروڙن جو ڪاروبار ڪري ورتو جنهن کانپوءِ ان فلم بزنس جي حوالي سان شاهه رخ جي فلم چنائي ايڪسپريس جو به رڪارڊ به ٽوڙي ڇڏيو ڀارتي فلم چنائي ايڪسپريس پوري دنيا ۾ 10 ڏينهن ۾ 422 ڪروڙ ڪمايا هئا، پرستارن جو چوڻ آهي ته هي فلم انهن کي ڏاڍي پسند آئي آهي جنهن سبب هو هر هر ان فلم کي ڏسڻ لاءِ اچن ٿا جنهن سبب ان فلم رڪارڊ بزنس ڪيو آهي.

 

پاڪستان ڄائي آمريڪي ماڊل سعيده امتياز جي پهرين بالي ووڊ فلم رليز لاءِ تيار

لاهور(شوبز نيوز)پاڪستان ڄائي آمريڪن اداڪاره ۽ ماڊل سعيده امتياز جي بالي ووڊ ۾ پهرين فلم ريڊرم جي شوٽنگ ۽ پوسٽ پروڊڪشن مڪمل ٿيڻ کانپوءِ تشهيري مهم جو شيڊول ترتيب ڏنو ويو آهي فلم ۾ مرڪزي ڪردار ادا ڪندڙ سعيده امتياز تشهيري مهم ۾ حصو وٺڻ لاءِ ايندڙ مهيني ممبئي پهچندي، جتي هوءَ فلم جي باقاعده تشهيري مهم جي شروعات ڪندي، جڏهن ته فلم کي دنيا جي ڪجهه ملڪن ۾ رليز ڪرڻ لاءِ هوءَ برطانيه ۽ مڊل ايسٽ سميت ٻين ملڪن ۾ به ويندي، ياد رهي ته سعيده امتياز اڳوڻي ڪرڪيٽ عمران خان جي زندگي تي ٺهندڙفلم ڪپتان ۾ جمائمه جو ڪردار ادا ڪري چڪي آهي.

 

ناليواري اداڪاره سلميٰ هائيڪ جي ايڪشن سان ڀرپور نئين فلم ايورلي جو ٽريلر جاري

لاس اينجلس(شوبز نيوز)هالي ووڊ جي ناليواري اداڪاره سلميٰ هائيڪ جي ايڪشن سان ڀرپور نئين فلم ايورلي جو ٽريلر جاري ڪيو ويو آهي هدايتڪار جوئي لينچي جي ان فلم جي ڪهاڻي هڪ اهڙي بهادر عورت جي چوڌاري گم ٿي جيڪي پنهنجي اڳوڻي دوست طرفان موڪليل ڏوهاري ماڻهن جو اڪيلي سر مقابلو ڪندي آهي ۽ ان جو بنا خوف خاتمو ڪري ڇڏيندي آهي جڏهن ته سلسلو اتي ئي ختم نه ٿو ٿئي پر ان جي نتيجي ۾ ان کي ڪيترائي خطرا سامهون اچن ٿا روب پيرس، اينڊريو پيف ۽ ايڊم رپ جي گڏيل پروڊڪشن ۾ ٺهندڙ ان فلم ۾ مرڪزي ڪرداري ناليواري ميڪسيڪن آمريڪي اداڪاره سلميٰ هائيڪ ادا ڪري رهي آهي جڏهن ته فلم جي ٻي ڪاسٽ ۾ جينيفر بلينچ، ڊوٽو لگاوا، لورا ڪپيڊا ۽ ڪيرولين چوڪوزي شامل آهن. ايڪشن سان ڀرپور هي فلم ايندڙ سال 27 فيبروري تي سئنيما گهرن جي زينت بڻجندي

 

ميگا ايونٽ ۾ ڀارت سان رٿيل پهرين ميچ آسان نه هوندي شاهد آفريدي

ڪراچي(اسپورٽس نيوز)پاڪستان جي ٽي-ٽوئنٽي ٽيم جي ڪپتان اسٽار الرائونڊر شاهد آفريدي چيو آهي ته ڪرڪيٽ ورلڊڪپ ۾ ٽيم جي سمورن رانديگرن کي ٽنهي شعبن ۾ سخت محنت ڪرڻي پوندي جنهن بعد ٽيم جي ڪاميابي جا امڪان پيدا ٿيندا. ڪراچي ۾ ميڊيا سان ڳالهائيندي قومي ڪرڪيٽ ٽيم جي نالي واري آلرائونڊر شاهد آفريدي چيو ته ميگاايونٽ جي پهرين ميچ ۾ ڀارت سان رٿيل ميچ آسان نه هوندي. شاهد آفريدي جو  چوڻ هو ته ڪرڪيٽ ورلڊ ڪپ ۾ دنيا جي ڪرڪيٽ جي مداحن جون نظرون پاڪ-ڀارت ميچ تي کتل هونديون. هن  چيو ته ميگا ايونٽ ۾ ڪاميابي حاصل ڪرڻ لاءِ ٽيم جي سمورن رانديگرن کي ٽنهي شعبن ۾ سخت محنت ڪرڻي پوندي خاص ڪري فيلڊنگ ۾ بهتري جي ضرورت آهي، جڏهن ته ميچ دوران بيٽسمينن کي پارٽنرشپ قائم ڪرڻي پوندي، جنهن لاءِ ٽيم مينيجمنٽ کي خبر آهي ته ڪهڙي ڪهڙي شعبي ۾ وڌيڪ ڪم ڪرڻ جي ضرورت آهي.

 

باصلاحيت رانديگرن جي کيپ تيار ڪرڻ لاءِ ميانواليءَ ۾ اڪيڊمي ٺاهڻ چاهيان ٿو؛ مصباح الحق

لاهور (اسپورٽس نيوز) قومي ڪرڪيٽ ٽيم جي ڪپتان مصباح الحق رٽائرمينٽ کان پوءِ نوجوانن جي ٽريننگ جي لاءِ اڪيڊمي ٺاهڻ جو فيصلو ڪيو آهي، ان سلسلي ۾ هُن ڪوششون به شروع ڪري ڇڏيون آهن، ذريعن موجب مصباح الحق پنجاب جي صوبائي اسيمبليءَ جي اسپيڪر رانا اقبال سان ملاقات ڪئي، جنهن دوران آف اسپنر سعيد اجمل به ساڻس موجود هو، ملاقات دوران مصباح الحق چيو ته باصلاحيت رانديگرن جي کيپ تيار ڪرڻ لاءِ هو ميانواليءَ ۾ اڪيڊمي ٺاهڻ چاهي ٿو ۽ اسپيڪر کيس ڀرپور سهڪار جو يقين ڏياريو، ملاقات دوران سعيد اجمل فيصل آباد ۾ ٺهندڙ پنهنجي ڪرڪيٽ اڪيڊميءَ ۾ پيش ايندڙ مسئلن کان اسپيڪر کي آگاهه ڪيو ۽ شڪايت ڪئي ته زرعي يونيورسٽيءَ ۾ قائم اڪيڊميءَ سان انتظاميا سهڪار نه پئي ڪري، جنهن ڪري کيس ڪيترن ئي مسئلن سان منهن ڏيڻو پئجي رهيو آهي، پنجاب اسيمبليءَ جي اسپيڪر شڪايت تي فوري نوٽيس وٺندي زرعي يونيورسٽي فيصل آباد جي وائيس چانسلر کي فون ڪري قومي ڪرڪيٽر سان ڀرپور سهڪار جي هدايت ڪئي.