تازيون خبرون

Monthly Archives: December 2014

ٽمبر مارڪيٽ واقعو، سنڌ حڪومت پاران في متاثر هڪ لک روپيا امداد جو اعلان

ڪراچي (اسٽاف رپورٽر)سنڌ جي وڏي وزير سيد قائم علي شاهه ٽمبر مارڪيٽ ۾ باهه واري واقعي سبب متاثر ۽ بي گهر ٿيندڙ هر هڪ ڪٽنب جي روز مره جي خرچن لاءِ هڪ لک رپيا امداد ڏيڻ جو فيصلو ڪيو آهي، حڪومت متاثر ن کي اڪيلو نه ڇڏيندي ۽ هر طرح سان  انهن جي واهر ڪندي. اهو فيصلو وزير اعليٰ سنڌ سيد قائم علي شاهه وزير اعليٰ هائوس ۾ هڪ اعليٰ  سطح جي اجلاس جي صدارت  ڪندي ڪيو. اجلاس ۾ ناڻي واري وزير سيد مراد علي شاهه، مڪاني کاتي جي وزير شرجيل انعام ميمڻ، ڪچي آبادي جي وزير جاويد ناگوري، سي ايم ڪو آرڊينيٽر ناديا گبول، پرنسپل سيڪريٽري ٽو سي ايم، ڪمشنر ڪراچي شعيب صديقي، ايم ڊي واٽر بورڊ هاشم رضا زيدي، ڪي ايم سي ايڊمنسٽريٽر رئوف اختر صديقي، سيڪريٽري فنانس سهيل راجپوت سميت وزير اعلي سنڌ جو ترجمان وقار مهدي، راشد رباني ۽ ٻيا به موجود هئا. صوبائي وزير شرجيل انعام ميمڻ وزير اعليٰ سنڌ سيد قائم علي شاهه کي ٽمبر مارڪيٽ سانحي جي حوالي سان بريفنگ ڏيندي ٻڌايو ته باهه لڳڻ جي شڪايت  فائر اسٽيشن تي 1:10am  تي داخل ڪرائي وئي. موقعي تي ٻه فائر برگيڊ ٽينڊر موڪليا ويا ۽ بعد ۾ 28 فائر ٽينڊر باهه وسائڻ ۾ مصروف هئا. جنهن کان پوءِ حڪومت جي درخواست تي ڪي پي ٽي، ڊي ايڇ اي ۽ پاڪستان نيوي جا فائر ٽينڊر پڻ واقعي واري جڳهه تي پهتا ۽ باهه تي ضا بظو آندو. بعد ۾ سيد مراد علي شاهه چيو ته وزير اعليٰ سنڌ متاثر خاندان جي  امداد جو اعلان ڪيو آهي. پر  نقصان جو تعين ڪرڻ ضروري آهي ان لاءِ حڪومت متاثرن جي واهر لاءِ فنڊ جاري ڪندي. ڪمشنر ڪراچي واقعي واري جڳهه تي 3:15 منٽن تي پهتو جنهن جي پويان ايم ڊي واٽر بورڊ هاشم رضا زيدي ۽ ڪي ايم سي ايڊمنسٽريٽر رئوف اختر فاروقي  ۽ ميونسپل ڪمشنر به اتي پهتا. جڳهه جو جائزو وٺي علائقي جي بجلي ۽ گيس جو ڪنيڪشن ڪاٽيو ويو ۽ نجي هائڊرينٽ مان فائر ٽينڊرن لاءِ پاڻي جو انتظام ڪيو ويو. ڪچي آبادي جي وزير جاويد ناگوري ٻڌايو ته اعليٰ سطحي اجلاس 4  بجي ڪوٺايو ويو. متاثر علائقن جي ننڍين گهٽين سبب آپريشن پٺي طرف کان ڪيو ويو. ناديا گبول ٻڌايو ته آئون متاثر علائقي جو ٻه ڀيرا معائنو ڪيو  آهي ۽ متاثر ماڻهن سان ملاقات ڪئي. ايس ايس پي سائوٿ پوليس فورس سان گڏ پوري رات علائقي ۾ هئو جنهن جي ڪري پوري علائقي جو لا اينڊ آرڊر درست رهيو. وقار مهدي چيو ته واقعي جي انڪوائري ڪرائڻ جي ضرورت آهي ته جيئن خبر پئجي سگهي ته باهه ڪيئن لڳي.وزير اعليٰ سنڌ پاڪستان نيوي، ڪي پي ٽي، ڊي ايڇ اي ۽ ڪينٽونمينٽ جو شڪريه ادا ڪيو ۽ ڪچي آبادي جي وزير کي هدايت ڪئي ته هو پاڻ متاثر علائقي جو دورو ڪري  ۽ متاثر خاندانن سان ملاقات ڪري. وزير اعليٰ سنڌ سيد قائم علي شاهه فنانس جي وزير کي هدايت ڪئي ته فنڊ رليز ڪري ڪمشنر ڪراچي کي ڏنا وڃن ته جيئن هو متاثر خاندانن جي روز مره جي خرچن جي مد ۾ في خاندان هڪ لک رپيا ڏنا وڃن. اهي فنڊ ڊپٽي ڪمشنر ڪراچي پاران ويريفاءِ ڪري ماڻهن کي ڏنا وڃن. وزير اعليٰ سنڌ اعليٰ سطحي اجلاس کان پوءِ وزيراعظم سان فون تي رابطو ڪري ٽمبر مارڪيٽ جي متاثر خاندانن جي مالي سهائتا لاءِ چيو ۽ وزير اعليٰ ڪمشنر ڪراچي کي هدايت ڪئي ته انڪوائري کي حتمي شڪل ڏئي واقعي جو اصل ڪارڻ معلوم ڪيو وڃي ۽ متاثر واپارين، خاندانن ۽ گهرن جي تعداد جو پتو لڳائڻ لاءِ پڻ وزير اعليٰ ڪمشنر ڪراچي کي هدايت ڪئي.

 

لاهور: پلازه ۾ باهه لڳڻ سبب 12 ڄڻا سڙي فوت

لاهور (بيورو) لاهور ۾ انارڪلي پلازه ۾ باهه لڳڻ سبب 12 ڄڻا سڙي فوت ٿي ويا آهن جڏهن ته عمارت ۾ ڦاٿل ماڻهن کي ڪڍڻ ۽ باهه تي ڪنٽرول ڪرڻ لاءِ ريسڪيو آپريشن جار ي آهي. لاهور جي انارڪلي پلازه جي هيٺين منزل ۾ شارٽ سرڪٽ سبب باهه لڳي وئي جيڪا ڏسندي ئي ڏسندي سڄي عمارت ۾ پکڙجي وئي، فائربرگيڊ ۽ ريسڪيو ٽيمون واقعو واري هنڌ پهچي ويو، ڦاٿن ڪيترن ئي ماڻهن کي ڪڍيو ويو پر انهيءَ دوران 12 ڄڻا زخمي ۽ ساهه گهٽجڻ سبب فوت ٿي ويا. پلازه ۾اڃا تائين ڪيترائي ماڻهون ڦاٿل آهن جن کي ڪڍڻ لاءِ ريسڪيو آپريشن جاري آهي. ٻئي پاسي ايم ايس ميو اسپتال جوچوڻ هو ته باهه سبب سڙيل 13 ماڻهن کي اسپتال آندو ويو جن ۾ 12 ماڻهو پهريان ئي فوت ٿي ويا هئا جن ۾ هڪ عورت به شامل آهي جڏهن ته مرندڙن جي سڃاڻپ مظهر، سيد شيراز، وليد، ثناءُ الله، نعمان، اعظم، عتيق ۽ محمد اعظم جي نالن سان ٿي آهي جڏهن ته وڏي وزير شهباز شريف باهه جو نوٽيس وٺندي واقعي جي رپورٽ طلب ڪري ورتي آهي.

 

دهشتگردي خلاف جنگ فوج ۽ عوام جي مدد سان کٽڻي آهي: عامر خان

پشاور (بيورو) پاڪستاني ڄائي برطانوي باڪسر عامر خان راولپنڊي ۾ آرمي چيف سان ملاقات ڪرڻ بعد پشاور ۾ آرمي پبلڪ اسڪول جو دورو ڪندي چيو آهي ته فوج ۽ عوام جي مدد سان دهشتگردي خلاف جنگ کٽڻي آهي. باڪسر عامر خان جي ايڇ ڪيو راولپنڊي ۾ آرمي چيف جنرل راحيل شريف سان ملاقات ڪري پشاور سانحي تي ڏک جو اظهار ڪيو. هن چيو ته آرمي چيف سان ملاقات لاءِ ڊي جي آءِ ايس پي آر ڪردار ادا ڪيو، جنهن لاءِ هو سندس ٿورائتو آهي. آرمي چيف سان ملاقاتبعد باڪسر عامر خان پشاور ۾ آرمي پبلڪ اسڪول جو دورو ڪيو. ان موقعي تي ميڊيا سان ڳالهائيندي عامر خان چيو ته پشاور ۾ دهشتگردي واري واقعي دوران رڳو معصوم شاگردن ۽ استادن کي  شهيد نه ڪيو ويو پر ملڪ جي مستقل تي حملو ڪيو ويو. هن چيو ته اسان جي ٻارڙن کي لازمي تعليم حاصل ڪرڻي آهي ۽ دهشتگردي خلاف جنگ فوج ۽ عوام جي مدد سان کٽڻي آهي.

 

وفاقي وزير اسحاق ڊار سان آمريڪي سفير رچرڊ اولسن جي ملاقات، پاڪ امريڪا لاڳاپن تي ڳالهيون

اسلام آباد(بيورو) پاڪستان ۾ مقرر آمريڪي سفير رچرڊ جي سومر ڏينهن ناڻي واري وفاقي وزير سينيٽر اسحاق ڊار سان ملاقات ڪري پشاور ۾ دهشتگردن هٿان معصوم شاگردن ۽ عملي جي ملازمن جي قتل عام واري واقعي تي تعزيت جو اظهار ڪيو. ان موقعي تي گالهائيندي اسحاق ڊار چيو ته اهو واقعو ملڪي تاريخ جو سڀ کان وڏو ڏکوئيندڙ واقعو هو پر حڪومت ملڪ اندر دهشتگردي جي هميشه لاءِ پاڙ پٽڻ جو عزم ڪيو آهي ۽ ان سلسلي ۾ سڄي قوم ۽ سياسي قيادت ۾ مڪمل اتفاق راءِ قائم آهي. آمريڪي سفير رچرڊ اولسن چيو ته ناڻي واري وزير کي آءِ ايم ايف جي چوٿين ۽ پنجين جائزي جي ڪاميابي سان مڪمل ٿيڻ ۽ پرڏيهي مٽاسٽا جي ناڻي جا ذخيرا 15 ارب ڊالرز تائين پهچائڻ تي مبارڪون پڻ ڏنيون. 15 ارب ڊالرز جي حد عبور ڪرڻ بعد پاڪستان کي نئين سر تعمير ۽ ترقي واري عالمي بينڪ (آءِ بي آر ڊي) ميمبر ٿيڻ ۽ بهتر پيڪيج حاصل ڪرڻ جو موقعو ملي ويو آهي. اولسن ناڻي واري وزير سان ملاقات دوران ڪيري لوگر ايڪٽ تحت سول امداد واري پيڪيج جي معاملن تي خيالن جي ڏي وٺ پڻ ڪئي. آمريڪي سفير چيو ته ڪانگريس پاڪستان لاءِ 53 ڪروڙ 20 لک ڊالر جي امدادي پيڪيج جي منظوري ڏئي ڇڏي آهي. ناڻي واري وزير چيو ته حڪومت ان امداد واري رقم جو گهڻو حصو اتر وزيرستان ايجنسي ۾ بي گهر ٿيل ماڻهن جي بحاليءَ تي خرچ ڪندي. آمريڪي سفير ان موقعي تي آمريڪا جي پرڏيهي وزير جان ڪيري جي ايندڙ مهيني امڪاني دوري جي حوالي سان معاملن تي پڻ خيالن جي ڏي وٺ ڪئي. ناڻي واري وزير اسحاق ڊار آمريڪي سفير سان بوئنگ جهازن جي کيپ ترت فراهم ڪرڻ جي معاملن تي پڻ ڳالهايو. وفاقي وزير آمريڪي سفير کي ٻڌايو ته حڪومت امداد ڏيندڙ ادارن ۽ ملڪن جي نمائندن کي آءِ ڊي پيز جي بحالي لاءِ ورتل اپائن بابت آگاهي ڏيڻ لاءِ تيار آهي. ان موقعي تي ناڻي واري کاتي جو صلاحڪار راڻا اسد امين ۽ شاهد محمود خان ۽ آمريڪي ٽيم جا ميمبر پڻ موجود هئا.

 

وڏي وزير هن مهل تائين ٽمبر مارڪيٽ واري علائقي جو دورو نه ڪيو آهي: الطاف حسين

لنڊن (مانيٽرنگ ڊيسڪ) ايم ڪيو ايم سربراهه الطاف حسين چيو ته ٽمبر مارڪٽ ۾ لڳل باهه سبب علائقي واسين جي سڄي زندگي جي ڪمائي رک کي ٿئي ۽ وڏي وزي اڃا تائين مارڪيٽ جو دودرو ناهي ڪيو. لنڊن مان جاري ڪيل بيان ۾ الطاف حسين چيو ته کيس سمجهه ۾ نه ٿو اچي ماڻهو سياست م ڇو ٿا اچن، ٽمبر مارڪيٽ ۾ لڳل باهه علائقي واسين جي سڄي ڪمائي رک ٿي وئي. هن  چيو ته باهه سڀ ڪجهه ساڙي رک ڪري ڇڏيو آهي ۽ وڏي وزير هن مهل تائين علائقي جو دورو نه آهي ڪيو.سندس وڌيڪ چوڻ هو ته ٽمبر مارڪيٽ ۾ لڳل باهه سان ڪروڙين نه پر اربين رپين جو نقصان ٿيو آهي.

 

سمورو ڌيان جوڊيشل ڪميشن جي معاملي ۽ پشاور حڪومت تي آهي: عمران خان

اسلام آباد (بيورو) پاڪستان تحريڪ انصاف جي سربراهه عمران خان چيو آهي ته ڌانڌلين جي جاچ جوڊيشل ڪميشن جي قيام ۽ ان جا نتيجا اچڻ تائين هو اسيمبلين ۾ واپس نه ويندا  ۽ جڏهن قوم کي  پنهنجي حقن جو پتو پئجي وڃي ته تبديلي اچي ويندي آهي. اسلام آباد ۾ پريس ڪانفرنس ڪندي عمران خان چيو  قومي اشوز تي قوم کي متحد ٿيڻ گهرجي. هن چيو سندن سمورو ڌيان جوڊيشل ڪميشن جي معاملي ۽ پشاور حڪومت  تي آهي. عمران خان پشاور ۾ شوڪت خانم اسپتال جي اڏاوٽ لاءِ ڏيهه توڙي پرڏيهه ۾ رهندڙ پاڪستانين کي امداد جي اپيل ڪندي چيو  اسپتال لاءِ ڏيڍ ارب رپين جي ضرورت آهي ۽ جيڪڏهن رقم هڪ مهيني اندر نه ملي ته اسپتال جي تعمير هڪ سال لاءِ رڪجي ويندي. عمران خان چيو 67 سالن ۾ ڌرڻي جهڙي تحريڪ نه هلي آهي ۽ ملڪ ۾  تعليم، صحت ۽ انصاف سڀ کان وڌيڪ مهانگو آهي. پي ٽي آءِ سربراهه پارٽي جي سمورن ميمبرن کي مهم ۾ حصو وٺڻ جي هدايت ڪندي چيو ته ڪينسر جي هر مريض تي 8 کان 10 لک رپيا خرچ اچي ٿو.

 

عزير جان بلوچ انٽرپول ذريعي دبئي مان گرفتار ، 30 ڏينهن اندر ڏيهه آڻڻ جا امڪان

اسلام آباد/ڪراچي(م.ڊ) لياري گينگ وار جي مک ڪردار ۽ پابندي مڙهيل پيپلز امن ڪميٽي جي سربراهه عــُزير جان بلوچ کي انٽرپول پاران دبئي مان گرفتار ڪرڻ جا اطلاع مليا آهن. ذريعن موجب عزير بلوچ ايراني پاسپورٽ تي اومان جي گادي واري شهر مسقط کان دبئي ۾ داخل ٿيو جتي انٽرپول تصديق بعد کيس حراست ۾ وٺي ڇڏيو. سرڪاري سطح تي عزير بلوچ جي گرفتاري بابت ڪنهن به قسم جي تصديق يا ترديد نه ڪئي وئي آهي. واضح رهي ته عزير بلوچ قتل، قتل جي قدمن، ڀنگ عيوض اغوا ۽ ڀتي خوري جي ڪيترن ئي ڪيسن ۾ پوليس کي گهــُربل آهي ۽ 2013ع ۾ ڏوهارين خلاف ڪراچي ۾ آپريشن شروع ٿيڻ تي هــُو پرڏيهه فرار ٿي ويو هو.  لياري گينگ وار جي اهم جوابدار عزير بلوچ کي پاڪستان آڻڻ جون تياريون شروع ڪيون ويون، عزير بلوچ کي 30 ڏينهن اندر پاڪستان آڻڻ جو امڪان آهي، ذريعن مطابق ڪراچي پوليس عزير بلوچ جي حوالگي جا دستاويز تيار ڪري گهرو وزارت کي موڪليندي گهرو وزارت پرڏيهي وزارت ذريعي يو اي اي اختيارين سان رابطو ڪندي جڏهن ته يو اي اي ۾ موجود ايف آءِ اي آفيسر عزير بلوچ جي حوالگي لاءِ مدد فراهم ڪندا، 3 ڏينهن تائين ڪاغذ نه موڪليا ويا ته عزير بلوچ کي آزاد ڪيو ويندو.

 

پيپلز پارٽيءَ ۾ ڪو به فارورڊ بلاڪ نه پيو ٺهي، پارٽي متحد آهي: نثار کهڙو

لاڙڪاڻو(بيورو) سنڌ جي سينيئر وزير نثار احمد کهڙو چيو آهي ته پيپلز پارٽيءَ ۾ ڪو به فارورڊ بلاڪ نه پيو ٺهي ۽ پارٽي متحد آهي، پيپلز پارٽيءَ جي حڪومت جي خلاف سازشون پهريان به ٿينديون رهيون آهن ۽ هاڻي به جنهن کي سازش ڪرڻي آهي اهو سازش ڪندو رهي ان کي منهن جي کائڻي پوندي ۽ اسان تي ڪو به فرق نه ٿو پوي ۽ اسين مستقبل جي باري ۾ ٿيندڙ سازشن جو مقابلو ڪنداسين ،پيپلز پارٽيپرويز مشرف سان گڏجي وڃي اهو ٿي نه ٿو سگهي. اهڙين خيالن جو اظهار هن سومر ڏينهن لاڙڪاڻي پريس ڪلب ۾ پريس ڪانفرنس ڪندي ڪيو. نثار احمد کهڙو چيو ته مخدوم امين فهيم پارٽيءَ جو پراڻو ساٿي آهي هو ڪو به فارورڊ بلاڪ نه ٺاهيندو نه ئي پارٽيءَ کي ڪمزور ڪرڻ لاءِ ڪو اهڙو عمل ڪندو جڏهن هو پاڻ 27 ڊسمبر واري جلسي ۾ پارٽيءَ سان هميشه لاءِ گڏ رهڻ جو اعلان پڻ ڪري چڪو آهي. هن هڪ سوال جي جواب ۾ چيو ته آمر پرويز مشرف کان پيپلز پارٽيءَ کي ڪو به خطرو ناهي ۽ مشرف کي پاڻ کي خبر آهي ته سندس پارٽي غير مقبول آهي جڏهن ته پرويز مشرف سياست ۾ تڪراري هيو، آهي ۽ رهندو. هن چيو ته پرويز مشرف کي عدالتن ضمانت تي آزاد ڪيو آهي ۽ هو سوشلي سرگرميون ڪري رهيو آهي سندس سرگرمين سان پيپلز پارٽيءَ تي ڪو به فرق نه ٿو پوي. هن چيو ته بلاول ڀٽو ۽ آصف علي زرداريءَ وچ ۾ اختلافن ۽ بلاول ڀٽو جي 27 ڊسمبر واري جلسي ۾ شرڪت نه ڪرڻ وارو اشو ختم ٿيڻ گهرجي ڇاڪاڻ ته بلاول ڀٽو زرداريءَ پنهنجي ٽوئيٽر پيغام ۾ اهو چئي چڪو آهي ته آصف علي زرداري ڪمان ۽ هو تير آهي سندس اهڙي بيان کان پوءِ اختلافن وارين افواهن جو باب بند ٿيڻ گهرجي. فوجي عدالتن جي قيام بابت هڪ سوال جي جواب ۾ هن چيو ته جيڪڏهن دهشتگردن کي سزائون ملن ها ۽ دهشتگرد عدالتن مان آزاد نه ٿين ها ته اڄ فوجي عدالتن جي قيام جو فيصلو نه اچي ها. جمهوري حڪومت ۾ فوجي عدالتن جو قيام جمهوري تصور جي خلاف آهي پر جتي معصوم ٻارن ۽ بي گناهه ماڻهن کي قتل ڪيو وڃي اتي فوجي عدالتن جي قيام جو فيصلو غلط ناهي. هن چيو ته فوجي عدالتن بابت قيام جو مسودو اڃان تائين منظوريءَ لاءِ پارليامينٽ ۾ ناهي آندو ويو. مسودي کي پارليامينٽ ۾ آڻڻ کان اڳ ان ڳالهه جي خاطري ڪرائي ويندي ته  فوجي عدالتون محدود مدي لاءِ هجن ۽ فوجي عدالتن جو غلط استعمال نه ڪيو ويندو ۽ فوجي عدالتن جو غلط استعمال نه ٿيڻ گهرجي. هن چيو ته پشاور سانحي تي پوري قوم غم ۾ آهي پر مولانا عبدالعزيز کي پشاور سانحي بابت پنهنجي بيان تي شرمندو ٿيڻ گهرجي جيڪو هو شرمندو نه ٿو ٿئي. هڪ سوال جي جواب ۾ نثار احمد کهڙو چيو ته واٽر بورڊ، تعليم کاتي سميت ٻين کاتن ۾ گوسڙو ملازمن جي خلاف ڪاروائي ٿيڻ گهرجي چاهي انهن جو تعلق ڪنهن سان به هجي. هن چيو ته تعليم کاتي جي گوسڙو ملازمن جي خلاف ڪاروائي ڪئي پر عدالت انهن کي اسٽي ڏنو ۽ ڪيس هلڻ دوران کاتي پاران پنهنجو ڀرپور موقف عدالت ۾ پيش ڪيو ويندو ۽ گوسڙو ملازمن جي خلاف ڪاروائي جاري رکي ويندي. هن چيو ته اسان ڪنهن جي نوڪريءَ جي خلاف ناهيون پر ملازمن کي پنهنجون ڊيوٽيون بهتر نموني ادا ڪرڻ گهرجن. هن چيو ته ٽمبر مارڪيٽ ۾ باهه لڳڻ واري واقعو افسوسناڪ آهي ان بابت جاچ ڪرائي ويندي ته باهه ڪيئن لڳي ۽ ان وقت جيڪي عملدار وقت سر ڊيوٽيءَ تي نه پهتا ته انهن کان پڻ سخت پڇاڻو ڪيو ويندو. هن چيو ته سنڌ ۾ هاير ايجوڪيشن کي پڻ هٿي وٺرائڻ چاهيون ٿا ۽ جيڪڏهن حيدرآباد ۾ الطاف حسين نالي پرائيويٽ يونيورسٽي ٺهي رهي آهي ته ان ۾ ڪنهن کي اعتراض نه هجڻ گهرجي. هن چيو ته سنڌ ۾ ميرٽ تي 20 هزار کان وڌيڪ استادن جي ڀرتي جاري آهي ته جيئن استاد پڙهيل لکيل هوندو ته ٻارن کي به بهتر نموني پڙهائي سگهندو. هن چيو ته ميرٽ کي ترجيح ڏئي رهيا آهيون ته جيئن ڪاپي ڪلچر جو خاتمو اچي سگهي.

 

ايم ڪيو ايم پاران ٽمبر مارڪيٽ باهه واقعي تي سنڌ اسيمبلي ۾ مهملي رٿ جمع ، وزيرن کان استعيفيٰ جو مطالبو ڏين: خواجه اظهار

ڪراچي (اسٽاف رپورٽر) ايم ڪيو ايم،ٽمبر مارڪيٽ ۾ باهه واري واقعي تي مهملي رٿ،پشاور سانحي ۽ مولانا عبدالعزيز خلاف 2 ٺهراءَ توڙي ڪراچي ميڊيڪل اينڊ ڊينٽل ڪاليج کي يونيورسٽي جو درجو ڏيارڻ لاءِ سنڌ اسيمبلي ۾ بل جو مسودو جمع ڪرائي ڇڏيو. سنڌاسيمبلي ۾ متحده قومي موومينٽ جي پارلياماني پارٽي جو اجلاس ٿيو،جنهن ۾ مختلف معاملن تي غور ويچار ڪيوويو. اجلاس بعد متحده اڳواڻن ٽمبر مارڪيٽ واري واقعي تي مهملي واري رٿ،پشاور سانحي ۽ مولانا عبدالعزيز خلاف 2 ٺهراءَ ۽ ڪراچي ميڊيڪل اينڊ ڊينٽل ڪاليج کي يونيورسٽي جو درجو ڏيارڻ لاءِ بل جو مسودو اسيمبلي سيڪريٽري جي آفيس ۾ جمع ڪرايو. ان موقعي تي ميڊيا سان ڳالهائيندي متحده اڳواڻ خواجه اظهارالحسن،سيد سردار احمد، عبدالحسيب ۽ ٻين چيو ته جيڪڏهن ٽمبر مارڪيٽ ۾ باهه لڳڻ وارو واقعو سازش آهي ته پوءِ ان جي ذميوار سنڌ سرڪار آهي. متحده اڳواڻن جو چوڻ هو ته صوبائي وزير بيوسيءَ جو اظهار ڪرڻ بدران استعيفيٰ ڏين، آصف علي زرداري ۽ بلاول ڀٽو کي سنڌ ۾ پ پ جي ڪارڪردگي جو نوٽيس وٺڻ گهرجي. هنن چيو ته پشاور سانحي ۾ پاڪستان جي مستقبل کي نشانو بڻايو ويو،جيڪڏهن ته طالبانائيزيشن بابت الطاف حسين جي بيانن تي ڌيان ڏنو وڃي ها ته سانحو پيش نه اچي ها. متحده اڳواڻن اهو به مطالبو ڪيو ته مولانا عبدالعزيز خلاف ڪيس داخل ڪري کيس گرفتار ڪيو وڃي. خواجه اظهار الحسن، سيد سردار احمد ۽ ٻين اڳواڻن جو چوڻ هو ته سنڌ اسيمبلي جي ايندڙ اجلاس ۾ ٽمبر مارڪيٽ باهه واقعي ۽ پشاور سانحي تي ڀرپور آواز اٿاريو ويندو

 

سنڌ سرڪار خلاف سازش ۾ مشرف جو ڪو نه رول ناهي: بابر غوري

ڪراچي (اسٽاف رپورٽر) متحده اڳواڻ بابر غوري ٽمبر مارڪيٽ باهه جي متاثرن جي بحالي لاءِ في خاندان 25 لک رپيا ڏيڻ جو مطالبو ڪندي چيو آهي ته سنڌ سرڪار پاران متاثرن لاءِ هڪ لک رپين جو اعلان ڪيو ويو، جيڪو سندن بحالي لاءِ ناڪافي آهي. ڪراچي ۾ پريس ڪانفرنس ڪندي متحده اڳوڻ بابر غوري چيو ته آهي ته سنڌ سرڪار خلاف سازش ۾مشرف جو ڪوبه رول ناهي، کين اپيل آهي ته عوام ۾ نفرتون نه پکيڙيون وڃن. هن چيو ته سنڌ سرڪار عوام کي ڪجهه به ڏيڻ ۾ مڪمل طور تي ناڪام ٿي وئي آهي، شهري ادارن ٽمبر مارڪيٽ متاثرن سان رابطو ئي نه آهي ڪيو. بابر غوري جو چوڻ هو ته وڏو وزير اجلاس گهرائي اعلان نه ڪري، پر باهه واري هنڌ پهچي متاثرن ۾ امداد ورهائي.