تازيون خبرون

Monthly Archives: December 2014

پاڪستاني فلم ”گڊ مارننگ ڪراچي“ نئين سال جي شروع ۾ رليز ٿيندي

ڪراچي (شوبز نيوز) پاڪستاني فلم ”گڊ مارننگ ڪراچي“ نئين سال جي شروع ۾ رليز ٿي رهي آهي، 90 منٽن جي هيءَ فلم هڪ غريب ڇوڪريءَ جي ماڊل بڻجڻ واري خواهش ۽ جدوجهد جي چوڌاري گھمي ٿي، هڪ وچين درجي جي گھراڻي سان تعلق رکندڙ ڇوڪري جنهن جي ماءُ سندس شادي ڪرائڻ ٿي چاهي، پر رفينا جي اکين ۾ هڪ وڏي ۽ ناليواري ماڊل بڻجڻ جا خواب هوندا آهن، رنگ ۽ روشنيءَ واري سفر ۾ رفينا کي تمام گھڻيون ڏکيائين سان منهن ڏيڻو پوندو آهي، ماڊل ۽ اداڪارا آمنه الياس فلم ۾ رفينا جو ڪردار ادا ڪيو آهي، جيڪا سندس ”زنده ڀاڳ“ کان پوءِ ٻين پاڪستاني فلم آهي، فلم جي هدايتڪارا صبيحه ثمر آهي جڏهن ته ٻي ڪاست ۾ سويرا نديم، صبا حميد، فرحان علي آغا، خالد ملڪ ۽ ٻيا شامل آهن، ٻه سال اڳ انگريزي زبان ۾ ٺهندڙ هِن فلم کي ڪيترن ئي بين الاقوامي فلمي ميلن ۾ ڏيکاريو ويو آهي

 

هي سال مون مٿان تمام گهڻو مهربان رهيو آهي گلوڪار راحت فتيح علي خان

ڪراچي(شوبز نيوز) سڄي دنيا ۾ مشهور پاڪستني گلوڪار راحت فتيح علي خان جو چوڻ آهي ته سال 2014 سندس مٿان تمام گهڻو مهربان رهيو آهي. گلوڪار راحت فتيح علي خان پنهنجي هڪ انٽرويو دوران ميڊيا سان ڳالهائيندي اهو چيو ته هي سال سندس لاءِ تمام گهڻو بهترين ثابت ٿيو ڇو ته هن سال سندس البم بيڪ ٽو لوَ سڄي دنيا ۾ تمام گهڻي ڌوم مچائي ۽ هلندڙ سال هن نوبل ايوارڊ تقريب ۾ پهريون دفعو پرفارم ڪيو ۽ سندس لائيو پرفامنس کي هڪ ئي وقت دنيا جي 111 ملڪن ۾ ڏٺو ويو  راحت فتح علي خان جو چوڻ هو ته هي سال سندس ڪرئير جو بهترين سال هو ڇو ته هن سڄي دنيا ۾ پاڪستان جو نالو روشن ڪيو .سندس چوڻ هو ته اميد آهي ته ايندڙ سال 2014 وانگر ڪامياب ترين گذرندو.

 

ڀارتي ڪپتان مهيندر سنگهه ڌوني ٽيسٽ ڪرڪيٽ مان رٽائرمينٽ جو اعلان ڪري ڇڏيو

ميلبرن(اسپورٽس نيوز)ڀارتي ڪرڪيٽ ٽيم جي ڪپتان مهيندر سنگهه ڌوني ٽيسٽ ڪرڪيٽ مان رٽائرمينٽ جو اعلان ڪري ڇڏيو ذريعن مطابق آسٽريليا کان سيريز هارائڻ کانپوءِ مهيندر سنگهه ڌوني ٽيسٽ ڪرڪيٽ مان فوري طور تي رٽائرمينٽ جو اعلان ڪري ڇڏيو آهي آسٽريليا خلاف ٽيسٽ سيريز جي آخري ميچ ۾ هو حصو نه وٺندو، ان جي جاءِ تي ويرات ڪوهلي قومي ٽيم جي قيادت ڪندو جڏهن ته ون ڊي ۽ ٽي 20 ۾ ڪپتاني جون ذميواريون نڀائيندو، ياد رهي ته مهيندر سنگهه ڌوني ڪرڪيٽ ٽيم جو سڀ کان ڪامياب ڪپتان مڃيو ويندو آهي جنهن جي قيادت ۾ ڀارت سڀ کان گهڻيون ڪاميابيون حاصل ڪيون آهن

 

آسٽريليا ۽ ڀارت وچ ۾ ٽين ٽيسٽ ميچ ڊرا، بارڊر- گواسڪر ٽرافي آسٽريليا پنهنجي نالي ڪري ڇڏي

ميلبورن(اسپورٽس نيوز) آسٽريليا بارڊر- گواسڪر ٽرافي ٽيسٽ ميچن جي سيريز جي ٽين ميچ ڊرا ٿيڻ بعد چئن ميچن جي سيريز ۾ ڀارت کان ٻڙي جي مقابلي ۾ 2 ميچن تان سيريز پنهنجي نالي ڪري ڇڏي آهي، جڏهن ته ميلبورن ۾ گذريل 17 سالن دوران پهريون ڀيرو ڪا ٽيسٽ ميچ ڊرا ٿي آهي. اڱاري ڏينهن ٽين ٽيسٽ ميچ ۾ ڀارتي ٽيم آخري ڏينهن 384 رنسن جي هدف جي جواب ۾ 174 رنسون ٺاهيون ۽ ان جا 6 رانديگر آئوٽ ٿيا، جڏهن ته ميچ کي 4 اوور اڳ ئي ختم ڪيو ويو هو. ڪپتان مهندر سنگهه ڌوني ۽ روي ايشون بيٽنگ ڪري رهيا هئا. 4 ميچن جي سيريز جي چوٿين ۽ آخري ٽيسٽ ميچ ايندڙ هفتي سڊني ۾ کيڏي ويندي، ان کان اڳ آسٽريليا ايڊيليڊ ۽ برسبين ۾ ٿيل 2 ٽيسٽ ميچون اڳ ئي کٽي چڪي آهي. ٽين ٽيسٽ ڊرا ٿيڻ بعد آسٽريليا ٽيم سيريز پنهنجي نالي ڪري چڪي آهي

 

مون کي يقين آهي ته هڪ ڏينهن پاڪستان ۾ امن ضرور ٿيندو؛ باڪسر عامر خان

لاهور (اسپورٽس نيوز) پاڪستاني ڄائي برطانوي باڪسر عامر خان پشاور سانحي تي افسوس ۽ ڏک جو اظهار ڪندي چيو آهي ته پشاور سانحي تي تمام گھڻو ڏک ٿيو آهي. هي اهڙو واقعو آهي جنهن کي وساري نٿو سگھجي. داتا درٻار تي حاضري ڀرڻ کانپوءِ ميڊيا سان ڳالهائيندي عامر خان چيو ته مون کي يقين آهي ته هڪ ڏينهن پاڪستان ۾ امن ضرور ٿيندو. ڇاڪاڻ ته پاڪستان هڪ خوبصورت ۽ محفوظ ملڪ آهي، ان جهڙو ملڪ ڪٿي به ناهي. ان موقعي تي عامر خان پاڪستان ۾ باڪسنگ اڪيڊمي ٺاهڻ جو اعلان ڪندي چيو ته پاڪستان ۾ تمام گھڻو ٽيلنٽ آهي بس انهن کي پليٽ فارم جي ضرورت آهي.  ٻئي پاسي عامر خان جي اعلان کانپوءِ عامر خان ۽ پنجاب اسپورٽس بورڊ وچ ۾ باڪسنگ اڪيڊمي ٺاهڻ جي حوالي سان مفاهمتي يادداشت نامي تي صحيحون ٿي ويون آهن، جنهن کانپوءِ ايندڙ سال جولاءِ تائين پاڪستاني ٻارن کي باڪسنگ جي تربيت ڏيڻ لاءِ اڪيڊمي ٺاهي ويندي. پنجاب جي راندين واري صوبائي وزير رانا مشهود سان گڏ پريس ڪانفرنس ڪندي عامر خان چيو ته هتان جا ماڻهو راند دوران منهنجي تمام گھڻي سپورٽ ڪندا آهن. هتي ٽيلنٽ موجود آهي ۽ ايندڙ پنجن سالن تائين پاڪستان ۾ باڪسنگ راند کي اهم حيثيت ڏياريندس. هن چيو ته هن اڪيڊمي ۾ هر ان ٻار جي آجيان ڪئي ويندي جيڪو باڪسنگ سان دلچسپي رکي ٿو

 

مشڪل فيصلي کي پاڪستان ڪرڪيٽ بورڊ جي مفاد تحت قبول ڪيو آهي؛چيف سليڪٽر معين خان

ڪراچي(اسپورٽس نيوز) پاڪستان ڪرڪيٽ ٽيم جي اڳوڻي ڪپتان ۽ موجوده ٽيم جي چيف سليڪٽر معين خان چيو آهي ته مشڪل فيصلي کي پاڪستان ڪرڪيٽ بورڊ جي مفاد تحت قبول ڪيوآهي، جيئن پاڪستان ڪرڪيٽ جا معاملا بهتر انداز سان هلي سگهن. قومي ٽيم جي اڳوڻي ڪپتان معين خان مينيجر جو عهدو ڇڏڻ بعد ميڊيا سان ڳالهائندي چيو ته هو وقت اچڻ تي ان حساس معاملي تي ڳالهائيندو، ڇاڪاڻ جو هن وقت قومي ٽيم ورلڊڪپ جي  تيارين ۾ مصروف آهي ۽ هو هن معاملي تي بيان ڏئي تيارين کي متاثر نٿو ڪرڻ چاهي. معين خان جو وڌيڪ چوڻ هو ته بورڊ جي پاليسي تحت هو ٻيو عهدو به ڇڏڻ لاءِ تيار هو پر ٽيم جي مفاد ۾ هن مينيجر واري عهدي کان ڌار ڪرڻ واري بورڊ جي فيصلي کي قبول ڪيو آهي. هن چيو ته سندس ڪيريئر صاف رهيو آهي هو، ڪڏهن به ڪنهن تڪرار ۾ ملوث نه رهيو آهي. هن چيو ته پاڪستان جي موجوده ٽيم بهترين رانديگرن تي ٻڌل آهي ۽ هو گهڻو پراميد آهي ته ڪرڪيٽ ورلڊڪپ ۾ ٽيم سٺي ڪارڪردگي جومظاهرو ڪندي.

 

ليڊي هيلٿ ورڪرن جو احتجاج

 

400کان وڌيڪ ليڊي هيلٿ ورڪرن کي پڪا آرڊر اڃا تائين نه ملي سگهيا، سوين ليڊي هيلٿ ورڪرن پڪا آرڊر نه ملڻ، 29 مهينن جون رهيل پگهارون، اسڪيل مطابق مقرري نه ٿيڻ ۽ 3 سالن کان گاڏين جو پئٽرول نه ملڻ خلاف حيدرآباد پريس ڪلب سامهون احتجاجي مظاهرو ڪري ڌرڻو هنيو، مظاهري ۾ شامل ليڊي هيلٿ ورڪرن مطالبن جي مڃتا لاءِ سخت نعريبازي ڪندي چتاءُ ڏنو ته جيڪڏهن 15ڏينهن ۾ مطالبا حل نه ٿيا ته ڪم ڇڏ هڙتال جو اعلان ڪيو ويندو. آل پاڪستان ليڊي هيلٿ ورڪرز ايمپلائيز ايسوسيئيشن سنڌ جي سڏ تي مطالبن جي مڃتا لاءِ ٿيل احتجاجي مظاهر کي خطاب ڪندي اڳواڻن حليما لغاري، رخسانه مغل، راحيلا شيخ، هما شيخ ۽ ٻين چيو ته سپريم ڪورٽ آف پاڪستان جي حڪم تي سنڌ سميت ملڪ جي ٻين صوبن جي ليڊي هيلٿ ورڪرن کي پڪو ڪيو ويو آهي، جڏهن ته سنڌ ۾ هن وقت به 400 ليڊي هيلٿ ورڪرون مقررين جي آرڊر کان محروم آهن. هنن چيو ته سپريم ڪورٽ پاران جاري ڪيل حڪم کان وٺي 29 مهينن جون رهتون بقايا آهن، جڏهن ته گذريل 3 سالن کان ليڊي هيلٿ ورڪرن کي گاڏين لاءِ ملندڙ پئٽرول بند ڪيو ويو آهي. هنن چيو ته اسڪيل مطابق پگهارون نه ملڻ 29 مهينن جون رهتون نه ملڻ 3 سالن کان پئٽرول نه ملڻ سبب ليڊي هيلٿ ورڪرن ۾ سخت مايوسي ڇانيل آهي. هنن حڪومت کان مطالبو ڪيو ته ليڊي هيلٿ ورڪرن جا مطالبا حل ڪري سندن بيچيني ختم ڪئي وڃي، ٻئي صورت ۾15ڏينهن کان پوءِ سڄي سنڌ ۾ ڪم ڇڏ هڙتال ڪئي ويندي.

جنسي ڏاڍائي کان پوءِ قتل ڪيل پنجن ورهين جي فوزيه سومرو جي خون سان انصاف ڪير ڪندو

لاڙڪاڻي جي يار محمد ڪلهوڙو ڪالونيءَ ۾ ٽي ڏينهن اڳ وحشي جوابدارن هٿان جنسي ڏاڍائي کانپوءِ گهٽا ڏئي بي رحمي سان قتل ڪيل پنجن ورهين جي نينگري فوزيه عرف سنڌو سومرو جي ڪيس ۾ گرفتار  ڪيل ٽن جوابدارن يونس عرف اربيلو جتوئي، شعيب جتوئي ۽ نياز جتوئي کي وليد ٿاڻي جي پوليس ڪالهه رمانڊ لاءِ ٿرڊ جوڊيشل مئجسٽريٽ جي عدالت ۾ پيش ڪيو. جتي پوليس جسماني رمانڊ لاءِ عدالت کي درخواست ڏني. ان موقعي تي چائلڊ رائيٽس موومينٽ طرفان وڪيل عبدالرحمان ڀٽو، جاويد گوپانگ، آصف چانڊيو، گلشن دايو ۽ ٻين وڪيلن تي مشتمل پينل عدالت ۾ گڏيل درخواست ڏني، جنهن ۾ هنن موقف اختيار  ڪيو ته نينگري فوزيه جي وحشتناڪ قتل سان وڏو خوف ڇانيل آهي. جنهن لاءِ سندس قتل ڪيس ۾ دهشتگردي جو قلم لاڳو ڪري ان کي دهشتگردي جي انت واري خاص عدالت ۾ هلايو وڃي. درخواست کانپوءِ عدالت ڊي ايس پي سول لائين يار محمد رند ۽ ڊي ايس پي معصومي سميت ايس ايڇ او وليد منتظر حسين مهدي کي طلب ڪري ورتو. جن عدالت کي لکي ڏنو ته جيڪڏهن عدالت جو حڪم ٿيو ته کين ڪيس ۾ دهشتگردي جو قلم لاڳو ڪرڻ تي ڪو به اعتراض نه هوندو.  جنهن کانپوءِ  پوليس ڪيس ۾ دهشتگرد جو قلم 7/6 لاڳو  ڪري ڇڏيو آهي، ياد رهي ته جوابدارن جي گرفتاري باوجود نينگري جي وارثن خدشو ظاهر ڪيو هو ته دهشتگردي جو قلم لڳو نه ڪيو ويو ته ڪيس ڪمزور ٿي ويندو، جنهن کانپوءِ سياسي سماجي تنظيمن پڻ دهشتگردي جو قلم لاڳو ڪرڻ جو مطالبو ڪيو  هو، ٽنهي جوابدارن کي اڄ  دهشتگرد ٽوڙ عدالت ۾ پيش ڪيو ويندو.

 

نوجوان نسل جي ڪتابن کان دُوري ؛زهريٰ

انسان جو تعلق ڪتاب سان تمام گهڻو پراڻو آهي. ڪتاب نه صرف انسان جو بهترين دوست آهي پر ڪتاب انسان جي علم، هنر ۽ ذهني نشوونما ۾ اضافي جو باعث آهي. قومن ۽ تهذيبن جي ترقي ۾ ڪتاب جو ڪردار تمام گهڻو اهم آهي. هن وقت ٽي وي چئنلز جي ڀرمار آهي، موبائيل فون ۽ انٽرنيٽ جهڙي جديد ٽيڪنالاجي سبب ڪتاب پڙهڻ جو رجحان ختم ٿي رهيو آهي. غير معياري ڪتابن جي اشاعت ۽ قيمتن ۾ اضافي سبب ماڻهن جي ڪتابن مان دلچسپي ختم ٿيندي پئي وڃي. گهڻو ڪري ڪتابن جي عالمي ڏينهن جي موقعي تي جيڪڏهن هڪ ٻئي کي ڪو ڪتاب تحفي ۾ ڏنو وڃي ته ان سان پڻ بهتر نتيجا حاصل ڪرڻ جي توقع آهي.

بازار ۾ ڪو نئون ڪتاب آيو آهي، جيڪو پڙهڻ لائق آهي؟ انور صاحب جيڪو هڪ سرڪاري ملازم هو ۽ هاڻ رٽائرڊ ٿي چڪو آهي. رٽائرمينٽ کان پهرين ۽ هاڻ به جڏهن ان سان ملاقات ٿيندي آهي ته سڀ کان پهرين هو اهو ئي سوال ڪندو آهي ۽ پاڻ اهڙي ڪتاب جي تلاش ۾ رهندو آهي، جيڪو ان جي ذوق مطابق هجي. ان وقت تمام گهڻي مايوسي ٿيندي آهي، جڏهن ڪوبه معياري ۽ علمي ڪتاب ڪوشش ڪرڻ جي باوجود مارڪيٽ مان ملي نه سگهي. ڪتاب پڙهڻ اسان جي بهترين روايت جي عڪاسي ڪري ٿي. چين ۽ روس جي انقلابن ۾ ڪتابن ۽ لٽريچر جي ڪردار کي نظرانداز نٿو ڪري سگهجي. ڪتابن جي اهميت جي لحاظ کان فرانسيسي ليکڪ والٽيئر چيو هو ته ”وحشي قومن کان سواءِ باقي سڄي مهذب دنيا تي ڪتابن جي حڪمراني آهي.“ ۽ حقيقت به اها آهي ته دنيا جي ڪيترن ئي ملڪن ۾ خاص طور تي مهذب ملڪن ۾ ڪتابن ۾ دلچسپي جو عالم اهو آهي ته اهي ماڻهو سفر دوران ڪو نه ڪو ڪتاب پڙهندا رهن ٿا ۽ سدائين ڪنهن سٺي ڪتاب جي تلاش ۾ ڪتابن جي دڪانن تي چڪر هڻندا رهندا آهن. اهوئي سبب آهي جو انهن ملڪن ۾ معياري ۽ نوان ڪتاب شايع ٿيندا رهندا آهن.

تاريخ جي مطالعي مان معلوم ٿئي ٿو ته تهذيبن جي نشوونما ۽ قومن جي زندگي جو عمل ڪتاب کان پهرين آهي. ڪتابن جو علم ۽ دانش هڪ نسل کان ٻئي نسل تائين منتقل ٿيندو رهيو آهي، پر اهو چوڻ اڃا به وڌيڪ درست ٿيندو ته مطالعي جي عادت تهذيب جي علامت آهي ۽ جيڪڏهن ڪتاب جي اشاعت ۽ مطالعي جو عمل رُڪجي وڃي ته پوءِ قومن جو رهيل شعور به ختم ٿي ويندو. موجوده دؤر ۾ ڪتاب دوستي ۽ ڪتاب پڙهڻ جي رجحان ۾ تمام گهڻي گهٽتائي آئي آهي ۽ ان جو سبب هي آهي ته جديد دؤر جي طرز زندگي ۾ ڪيتريون ئي نيون تبديليون اچي چڪيون آهن. جديد ٽيڪنالاجي جي عيوض عام ماڻهو جي دلچسپي موبائيل، ڪمپيوٽر، انٽرنيٽ ۽ ٽي وي چينلز تائين محدود ٿي وئي آهي. 20-25 سال پهرين هي صورتحال ايتري ڳنڀير نه هئي. ماڻهو ڪتاب پڙهندا هئا ۽ نوان ڪتاب خريد ڪرڻ لاءِ مارڪيٽ ۾ تلاش جاري رکندا هئا. ان وقت ليکڪ ذوق ۽ شوق سان ڪتاب لکندا هئا. اسان جي ملڪ ۾ ڪتاب لکڻ ۽ پڙهڻ جي رجحان ۾ تمام گهڻي گهٽتائي ڏسڻ ۾ آئي آهي. ٻار جن سان اسان جو مستقبل وابسته آهي، هر وقت موبائيل ۽ انٽرنيٽ جي دنيا ۾ گم هوندا آهن، پنهنجي نصابي سرگرمين لاءِ به انٽرنيٽ جو سهارو وٺن ٿا. افسوس جي ڳالهه هي آهي ته ڪتاب کي نظرانداز ڪري آن لائن پڙهڻ جي رواج ۾ واڌارو ٿيو آهي. هڪ سينئر صحافي هن سلسلي ۾ پنهنجن خيالن جو اظهار ڪندي چيو ته ”آن لائن پڙهڻ ۾ تمام گهڻيون ڏکيائيون آهن.“ هن جو چوڻ هو ته آن لائن تي پڙهيل مضمون اسين وساري ڇڏيندا آهيون، پر ڪتاب وارو مضمون اسان کي ڪڏهن به نه وسرندو آهي. ٻارن ۾ مطالعي جي عادت پيدا ڪرڻ والدين ۽ استادن جي ذميواري آهي، جنهن کان پوءِ استادن تي اها ذميواري عائد ٿئي ٿي ته هو ٻارن کي مطالعي طرف راغب ڪرڻ لاءِ پنهنجون سڀئي صلاحيتون ڪتب آڻين.

اڄڪلهه والدين ٻارن کي خانگي تعليمي ادارن ۽ اڪيڊمين تائين محدود ڪري ڇڏيو آهي ۽ مائٽن اهو طئي ڪري ورتو آهي ته اسان پنهنجون ذميواريون صحيح طريقي سان نڀائي رهيا آهيون. ٻار به پنهنجن والدين کان موبائيل، ليپ ٽاپ، آئي پيڊ ۽ ڪمپيوٽر وٺي ڏيڻ جو مطالبو ڪندا رهندا آهن. اڄڪلهه تمام گهٽ ٻار اهڙا آهن، جيڪي ڪتاب جو مطالعو ڪندا آهن. تعليمي معيار جي ڪمزوريءَ جو عالم هي آهي ته اسان تعليمي شرح جي لحاظ کان پاڻ کان پوءِ آزاد ٿيندڙ ملڪن کان به تمام گهڻو پوئتي رهجي ويا آهيون. هڪ طرف ملڪ ۾ تعليمي شرح گهٽ آهي ته ٻئي طرف مهانگائي سبب ڪتاب دوستي ۾ گهٽتائي آئي آهي. ڏک جي ڳالهه اها آهي ته هڪ دائري تائين محدود رهڻ جو سبب تمام سٺو تخليقي ڪم نظر نه اچڻ آهي.

ماضي ۾ پاڪستان ٽيليويزن تي پيش ٿيندڙ ڊرامن تمام گهڻي مقبوليت حاصل ڪئي، ڇاڪاڻ ته اهي عوامي امنگن ۽ گهرجن مطابق هئا، جيڪي ڏسندڙن ۾ تمام گهڻي حد تائين پسند ڪيا ويندا هئا. ان ڳالهه مان اهو معلوم ٿئي ٿو ته اسان وٽ سٺو ۽ معياري ادب تخليق ٿيندو رهيو آهي.

هڪ وقت اهڙو هو جو اسان جا پبلشر باذوق ۽ ادبي، علمي تقاضن کي نظر ۾ رکي ڪتاب ڇپرائيندا هئا، پر هاڻ پبلشرن ان کي ڪاروبار بڻائي ڇڏيو آهي. ڪيترائي پڙهيل لکيل بيروزگار ماڻهو ڪجهه پئسن خاطر ڪتاب لکي پنهنجو گذر سفر ڪري رهيا آهن. اهڙي صورتحال ۾ معياري ڪتابن جو ڇپجڻ ڏاڍو مشڪل آهي. مارڪيٽ ۾ جڏهن معياري ڪتاب موجود نه هجي ته پوءِ پڙهندڙ جي به دلچسپي ختم ٿي ويندي آهي.

ڪتابن جي اهميت جي پيش نظر ۽ ماڻهن ۾ ڪتابن متعلق شعور بيدار ڪرڻ لاءِ دنيا ۾ هر سال 23 اپريل تي ڪتابن جو عالمي ڏينهن ملهايو ويندو آهي. هن ڏينهن کي ملهائڻ جو تصور اسپين جي علائقي ڪانگونيا کان مليو، جتي ڪيتري ئي عرصي کان ماڻهو عوامي هيرو سينٽ جارج جي ياد ۾ ملهائي ويندڙ ڏينهن جي موقعي تي هڪ ٻئي کي گلاب جي گلن جا تحفا ڏيندا هئا، خاص طور تي ڪانگونيا جي گادي واري شهر بارسلونا جي رستن، گهٽين ۽ بازارن ۾ لڳل اسٽالن تي لکن جي تعداد ۾ گلاب ۽ ڪتاب وڪرو ٿين ٿا، پر هن ڏينهن کي عالمي سطح تي ڪتابن جي ڏينهن طور ملهائڻ جو هڪ سبب هي به آهي ته عالمي ليول جي ٻن نامور اديبن انگريز ڊرامه نگار وليم شيڪسپيئر ۽ هسپانوي شاعر دي سير دانتي جي وفات جي تاريخ به اها ساڳي آهي. هن فيصلي جو ڪيترن ئي ملڪن آڌرڀاءُ ڪيو. دنيا ۾ سؤ کان وڌيڪ ملڪن ۾ ڪتابن ۽ ڪاپي رائيٽس جو عالمي ڏينهن ملهايو ويندو آهي. هن ڏينهن جو مقصد ڪتاب پڙهڻ جي شوق کي فروغ ڏيڻ ۽ سٺا ڪتاب لکندڙ ليکڪن جي حوصلا افزائي ڪرڻ آهي.

اسان جو شايد اهو سماجي رويو آهي ته وقت گذرڻ کان پوءِ اسان کي اهو ياد ايندو آهي ۽ جيڪڏهن ڪنهن کي اهو ياد به هوندو آهي ته سيمينار وغيره ۾ ڪجهه ڳالهيون ڪري پنهنجو فرض پورو ڪيو ويندو آهي. جيڪڏهن ڪتابن جي عالمي ڏينهن جي موقعي تي ماڻهن ۾ اهڙي دلچسپي پيدا ٿي پوي ته ڪتاب دوستي کي تمام گهڻي اهميت ملندي، پر هتي افسوس جهڙي ڳالهه اها آهي ته ماڻهو اها ڳالهه سمجهن نه ٿا يا وري سمجهڻ ئي نٿا چاهين.

 

ٿر ۾ ترسيل موت جو راڪاس ۽ بي حس حڪمران ؛نند لال لهاڻو

ڏڪار جي سخت ترين حالتن ۾ گذريل ٻن سالن کان لاڳيتو ڀوڳيندڙ ٿر، جيڪو موت جو راڪاس بي دعوتي مهمان جيان ترسي پيو آهي ۽ روزانو ٿر جا معصوم ڪلين جهڙا ٻارڙا موت جي ڏاٺ ۾ وڃي رهيا آهن، اهو بک، بدحالي، احساس محرومي، غربت ۽ حڪمرانن جي بي حسي جو ڪمال آهي. آڪٽوبر کان وٺي هن وقت تائين 300 کن معصوم ٻارڙا پنهنجي مائرن جي جهولين کان هميشه هميشه جي لاءِ پري هليا ويا آهن، پر حڪمران غذائي قلت سبب ٿيندڙ موت کي قبولڻ لاءِ تيار ناهن ۽ چون ٿا ته اهي موت غربت ۽ بيمارين سبب ٿي رهيا آهن، پر عقل جي انڌن کي اها ڳالهه سمجهه ۾ ڇو نٿي اچي ته غذائي کوٽ آهي، جڏهن ته غربت هوندي ته هڪ گهر جو پاليندڙ پنهنجي گهر ڀاتين لاءِ ڪپڙي لٽي ۾ مجبور هوندو ته کاڌ خوراڪ ڪٿان آڻي سگهندو، جڏهن حامله عورت کي گهربل کاڌو نه ملي سگهندو ته اها امڙ پنهنجي پيٽ ۾ پلجندڙ ٻار کي ڪهڙي غذا فراهم ڪري سگهندي ۽ اها ڀيانڪ صورتحال اڪثر ڪري ٿر جي ڳوٺاڻن علائقن ۾ پيش اچي رهي آهي، جتي صحت جي سهوليتن جو اڄ به ڪو تصور ئي ناهي، شهري علائقن کي ڇڏي باقي ٻين علائقن جي عورتن لاءِ ليڊي ڊاڪٽرياڻين جو تصور صدين کان وٺي اڄ تائين هڪ خواب بڻجي رهيل اڌورو سپنو آهي، اها حقيقت آهي ته ملڪي وجود کان وٺي هيل تائين ٿر ۾ رياست گهربل بنيادي سهوليتن تي ڪڏهن به ڪم ناهي ڪيو ۽ ٿر جي ترقي صرف سرڪاري عمارتن تائين محدود رهجي وئي آهي، وڏيرا شاهي کي مضبوط ڪرڻ لاءِ ڳوٺن ۾ رڳو سرڪار عمارتون ڏنيون ويون آهن، پر انهن ۾ بنيادي سهوليتن جي فراهمي جو تصور ئي ڏسڻ ۾ نٿو اچي ۽ لڳي ٿو ته ٿر ۾ ٻن سالن کان اڳ حڪومتن ڪوبه توجهه نه ڏنو.

موجوده سنڌ سرڪار پڻ ٿر جي حوالي سان جيڪي اهم اعلان ڪيا هئا، اهي رڳو اعلان ئي رهجي ويا آهن، انهن اعلانن ۾ ٿر جي ڳوٺاڻن علائقن ۾ تعمير ٿيل ميڊيڪل ڊسپينسرين جون ايس اين اي ايندڙ بجيٽ ۾ منظور ڪري اتي سرڪاري عملو رکي، دوائون ڏئي ٿري عوام کي صحت جهڙي بنيادي سهوليت فراهم ڪرڻ پڻ شامل هو، پر جولاءِ 2014ع جي بجيٽ ۾ انهيءَ طرف ڪوبه توجهه نه ڏنو ويو، جنهن ڪري اهو اعلان رڳو اخبارن تائين محدود رهجي ويو، جنهن بعد ٻيهر ميڊيا اهڙيون دانهون ڪيون ته وري سنڌ جي وڏي وزير سيد قائم علي شاهه ننگرپارڪر ۾ اچي صحافين کي چيو ته هڪ مهيني اندر ٿر جي ميڊيڪل ڊسپينسرين جون ايس اين اي منظور ڪيون وينديون پر افسوس جو 2 مهينا گذري وڃڻ باوجود به سنڌ حڪومت ۽ صحت کاتو اڃان تائين ان تي عمل ڪرڻ ۾ مڪمل طور تي ناڪام رهيو آهي. جڏهن ته پ پ جي ڪو چيئرمين آصف علي زرداري ٿر جي دوري دوران ٿر ۾ 150 بينير دسترخوان لڳائي، ٿر ۾ مفت کاڌو فراهم ڪرڻ جو جيڪو اعلان ڪيو هو، ان تي ذري جيترو به عمل ٿي نه سگهيو، کاڌو فراهم ٿيڻ سان يقينن انسان کي گهربل غذا ملي سگهندي آهي ۽ جيڪڏهن انهيءَ اعلان تي فورن عمل ڪرائي ٿر جي مختلف علائقن ۾ دسترخوان لڳائي کاڌو فراهم ڪيو وڃي ها ته ٿر ۾ ٻارڙن جي ٿيندڙ موت کي گهٽ ڪرڻ ۾ ضرور ٿوري گهڻي مدد ملي وڃي ها ۽ حاملا عورتن کي جيڪڏهن وقت سر کاڌ خوراڪ ملي ها ته معصوم ٻارڙن جي مرڻ جي شرح يقينن گهٽ هجي ها، پر حيرت جهڙي ڳالهه آهي جو ٿر لاءِ هروڀرو اهڙا اعلان ڇو ٿا ڪيا وڃن، جن تي عمل نٿو ڪري سگهجي. جڏهن ته هيل وفاقي سرڪار پڻ ڏڪاريل ڏيهه ٿرپارڪر کي مڪمل طور تي نظرانداز ڪري ڇڏيو آهي، وزيراعظم نواز شريف پاران ٿر جي صورتحال تي نوٽيس وٺڻ جي باوجود به وفاقي سرڪار ٿرين جي واهر ڪرڻ تي ڪنن ۾ ڪپهه وجهيو ويٺي آهي ۽ وفاقي سرڪاري ادارن ٿر سان ڪابه وفا نه ڪئي آهي ۽ پوري صوبي سنڌ جيان قدرتي آفتن جي شڪار ٿيل ٿري عوام کي پڻ بري طرح نظرانداز ڪري ڇڏڻ ڏک جهڙي ڳالهه آهي، توڙي جو پاڪ آرمي پنهنجي وس آهر ٿرين جي امدادي مدد ضرور ڪئي آهي، پر اين ڊي ايم اي جهڙا سفيد هاٿي بڻيل وفاق جا ادارا ڪنڊائتا ٿي ويا آهن ۽ هتي ٿر ۾ بدقمستي اها آهي ته جيڪڏهن ڪو وفاقي حڪومت جو نمائندو يا ڪو ماڻهو ٿر اچي ٿو ته سرڪاري پروٽوڪول ۾ اهو چئي واپس هليو وڃي ٿو ته هن کي وزيراعظم ٿر موڪليو آهي ۽ هو فورن وڃي وزيراعظم کي رپورٽ ڏيندو، پر ان جي وڃڻ بعد انهن کي ٿر ياد ئي نٿو اچي ۽ وري سنڌ حڪومت ٿر تي تيزيءَ سان ڪم ڪرڻ بدران ميڊيا جي انگن اکرن کي ڪوڙو قرار ڏئي پنهنجي اندر جي باهه کي ٿڌو ڪرڻ جي ڪوشش ڪري رهي آهي. هتي اهو ذڪر ڪرڻ ضروري آهي ته سنڌ حڪومت ٿر ۾ ست سؤ آر او پلانٽ تعمير ڪرائي رهي آهي، جن مان ڪافي آر او پلانٽ تعمير ٿيڻ جي آخري مرحلن ۾ آهن، پر آر او پلانٽ نج سياسي بنيادن تي ڏنا ويا آهن، انساني گهرج پٽاندر ڏيڻ بجاءِ پنهنجن کي خوش ڪرڻ لاءِ ڏنا ويا آهن، ڪجهه آر او پلانٽ کاري پاڻي کي مٺو ڪرڻ لاءِ اهڙن ڳوٺن ۾ ڏنا ويا آهن، جتي اڳ ۾ ئي کوهن ۾ مٺو پاڻي موجود آهي، اتي آر او پلانٽ ڏيڻ بدران هينڊ پمپس، ٽمر پمپ يا اهڙيون موٽرون ڏنيون وڃن، جيڪي مٺي پاڻي کي آسانيءَ سان ٻاهر آڻين ها، خلق لاءِ پاڻي ججهي مقدار فراهم ڪيو وڃي ها. بهرحال اهو پڻ چڱو ڪم آهي، پر ٿر ۾ پاڻي جي ذخيرن تي اڃان گهڻو ڪم ڪرڻ جي ضرورت آهي، ٿر ۾ صحت جي بيٺل ۽ ناڪاره بڻيل گاڏي کي وڌيڪ فعال ۽ مضبوط ڪرڻ سان گڏوگڏ ٻين شعبن ۾ به لاڳيتو جستجو ڪرڻ جي ضرورت آهي.

 

گهٽ لاڳت سان بجلي پيدا ڪرڻ جون ڪوششون تيز ڪيون وڃن: وزير اعظم جي هدايت

اسلام آباد (بيورو) وزيراعظم محمد نواز شريف گهٽ لاڳت وسيلي بجلي پيدا ڪرڻ جي ڪوششن جي ضرورت تي زور ڏنو آهي ته جيئن ان کي عام ماڻهن جي سگهه ۾ آڻي سگهجي، عام ماڻهن کي رليف فراهم ڪرڻ لاءِ گرمي جي ايندڙ موسم تائين بجلي جي سپلائي بهتر بڻائي وڃي ۽ بجلي جي تيز رفتار پيداوار جي رستي ۾ ايندڙ سموريون رڪاوٽون ختم ڪيون وڃن، توانائي بابت معاملن جي اهميت کي نظر ۾ رکندي توانائي جي باري ۾ ڪابينا ڪميٽي جو ايندڙ اجلاس هلندڙ هفتي ئي ٿيندو. وزيراعظم جي صدارت ۾ سومر ڏينهن هتي توانائي جي باري ۾ ڪابينا ڪميٽي جو ڇهون اجلاس وزيراعظم هائوس ۾ ٿيو. وزيراعظم اجلاس دوران هدايت ڪئي ته عام ماڻهن کي رليف فراهم ڪرڻ لاءِ گرمي جي ايندڙ موسم تائين بجلي جي فراهمي بهتر بڻائي وڃي. بجلي جي تيز رفتاري سان پيداوار ۾ ايندڙ رڪاوٽن کي ختم ڪيو وڃي. وزيراعظم توانائي جي کوٽ تي قابو پائڻ لاءِ مدد ڪرڻ تي عالمي تعاون جي به آجيان ڪئي، اجلاس ۾ گذريل پنجن اجلاسن جي فيصلن تي اڳڀرائي جو جائزو ورتو ويو، وزيراعظم کي 2012ع تائين مڪمل ٿيندڙ پاور پراجيڪٽس جو جائزو پيش ڪيو ويو، اجلاس دوران توانائي جي کوٽ ختم ڪرڻ لاءِ پاڻي، گئس، شمسي، ونڊ ۽ پن بجلي جي ڊگهي، وچي ۽ ننڍي مدي وارن منصوبن جي حوالي سان بريفنگ ڏني وئي. اجلاس ۾ ناڻي واري وزير اسحاق ڊار، پيٽروليم ۽ قدرتي وسيلن واري وزير شاهد خاقان عباسي، پاڻي ۽ بجلي جي وفاقي وزير خواجه محمد آصف، پيٽروليم واري مملڪتي وزير ڄام ڪمال، پاڻي ۽ بجلي واري مملڪتي وزير عابد شير علي، وزيراعطم جي صلاحڪار سرتاج عزيز، طارق فاطمي، وزيراعظم جي ترجمان مصدق ملڪ ۽ چين ۾ پاڪستان جي سفير مسعود خان شرڪت ڪئي.