تازيون خبرون

Daily Archives: December 29, 2014

دهشتگردي ۽ انتهاپسندي ملڪي ترقي ۾ وڏي رڪاوٽ آهن: نواز شريف

لاهور (م.ڊ) وزيراعظم محمد نواز شريف چيو آهي ته حڪومت، پاڪ فوج سميت ٻيا قانون لاڳو ڪندڙ ادارا ۽ قوم دهشتگردي جو ناسو ختم ڪرڻ لاءِ پرعزم آهي، انشاالله هن مقصد ۾ ڪامياب ٿينداسين، دهشتگردي جي انت لاءِ نيشنل پلان جي پاڻ نگراني ڪري رهيو آهيان، جلد نتيجا آڏو ايندا، انتهاپسندي، دهشتگردي ملڪ جي ترقي ۽ خوشحال ۾ سڀ کان وڏي رنڊڪ آهي، ان کان نجاد حاصل ڪرڻ کانسواءِ اسان ترقيافته ملڪن ۾ نٿا بيهي سگهون، حڪومت دهشتگردي جي اتن تي ڌيان ڏيڻ سان گڏ معيشت جي ترقي ۽ عوام کي رليف ڏيڻ لاءِ به انقلابي قدم کڻي رهي آهي، اهڙن خيالن جو اظهار هن گذريل ڏينهن جاتي امرا راءِ ونڊ ۾ محمد شهباز شريف سان ملاقات ۾ ڪيو.

 

ٽمبر مارڪيٽ متاثرن جو ازالو ڪيو ويندو، جاچ ٽيم جوڙي ڇڏي آهي: شرجيل ميمڻ

ڪراچي(اسٽاف رپورٽر) سنڌ جي اطلاعات ۽ بلديات واري وزير شرجيل انعام ميمڻ چيو آهي ته ٽمبر مارڪيٽ سانحي جي مڪمل جاچ ڪرائي ويندي ۽ ان ۾ جن جن ماڻهن کي نقصان ٿيو آهي، ازالو ڪيو ويندو. سانحي تي  سياست ڪرڻ ڪراچي جي عوام سان زيادتي جي برابر آهي. وزيراعليٰ سنڌ، مون ۽ سنڌ حڪومت تي الزام لڳائيندڙ پاڻ عوام کي ٻڌائين ته هو ڪهڙي وقت سانحي واري هنڌ پهتا. ڪي ايم سي، واٽر بورڊ ۽ ٻين سرڪاري ادارن ۾ گوسڙو ملازمن ۾ اهي ماڻهو به شامل آهن جيڪي خود ايم ڪيو ايم جي رابطا ڪميٽي جا ميمبر رهيا آهن. ايم ڪيو ايم جي قائد جا ٿورائتا آهيون جو هن پارٽي جي گوسڙو ملازمن کي ڊيوٽين تي حاضر ٿيڻ جي هدايت هدايت ڪئي. پر افسوس ان جي هدايت تي به اڃان تائين عمل نه ڪيو ويو آهي. سانحي لاءِ ڪمشنر ڪراچي ۽ ايڊمنسٽريٽر ڪراچي تي ٻڌل ڪميٽي جوڙي وئي آهي، جيڪا هڪ هفتي اندر ان سانحي جا سبب ۽ ان جي نقصانن جو اندازو لڳائي رپورٽ پيش ڪندي ۽ سنڌ حڪومت سمورن متاثرن کي معاوضو ادا ڪندي. اهڙن خيالن جو اظهار هن آچر تي ڪمشنر ڪراچي هائوس ۾ هنگامي پريس ڪانفرنس ڪندي ڪيو. ان موقعي تي ڪمشنر ڪراچي شعيب احمد صديقي، ايڊمنسٽريٽر ڪراچي رئوف اختر فاروقي، ايم ڊي واٽر بورڊ هاشم رضا زيدي، ڊپٽي ڪمشنر سائوٿ سليم راجپوت، سينيئر ڊائريڪٽر ميونسپل سروسز  ڪي ايم سي مسعود عالم، پيپلز پارٽي ڪراچي ڊويزن جو صدر عبدالقادري پٽيل ۽ ٻيا به موجود هئا. شرجيل انعام ميمڻ چيو ته رات هڪ وڳي 19 منٽن تي باهه لڳڻ جو اطلاع ويجهي فائر بريگيڊ کي ڏني وئي ۽ ان جي ڪجهه منٽن اندر ئي ٻه گاڏيون واقعي واري هنڌ پهچي ويون ۽ ڪلاڪ اندر اندر باهه جي شدت کي نظر ۾ رکندي باهه کي ٽئين درجي جي باهه قرار ڏيندي 28 فائر ٽينڊرز کي موقعي تي پهچايو ويو هو، هن چيو ته واٽر بورڊ پاران باهه کي وسائڻ لاءِ گهٽ ۾ گهٽ 6 لک گيلن پاڻي فراهم ڪيو ويو ۽ ان سلسلي ۾ ايڊمنسٽريٽر ڪراچي، ڪمشنر ڪراچي ۽ ايم ڊي واٽر بورڊ سان هو مسلسل رابطي ۾ هو ۽ خود ڪمشنر ڪراچي رات 3 وڳي واقعي واري هنڌ موجود هو، صوبائي وزير جاويد ناگوري به رات 5 وڳي واقعي واري هنڌ موجود هو، جڏهن ته ڪي ايم سي ۽ ڊي ايم سيز جو مڪمل عملو به موجود هو. هن چيو ته ايم ڪيو ايم جي رابطا ڪميٽي پاران ڪيل پريس ڪانفرنس ۾ لڳايل سمورا الزام بي بنياد آهن ۽ ان ۾ ڪنهن قسم جي ڪابه سچائي نه آهي. شرجيل ميمڻ چيو ته اسان گهربل سمورا وسيلا استعمال ۾ آڻيندي صبح ساڍي 10 وڳي تائين باهه تي مڪمل طور تي ڪنٽرول ڪري ورتو هو. هن چيو ته جيڪڏهن اسان ايم ڪيو ايم جي دوستن جي الزامن کي تسليم ڪري وٺون ته ٻڌائين ته باهه تي ڪيئن ڪنٽرول ڪيو ويو ۽ جيڪڏهن سرڪاري ۽ حڪومتي مشينري نه هئي ته باهه ڪنهن وسائي. هن چيو ته اسان عملي سياست تي يقين رکون ٿا ۽ رات جو سانحي واري هنڌ تي فوٽو سيشن ڪرڻ بجاءِ اسان عملي اپائن کي يقيني بڻائڻ تي ڌيان ڌنو. شرجيل انعام ميمڻ چيو ته اسان ان ڳالهه کي تسليم ڪريون ٿا ته اسان کي بلديات کاتي ۾ مسئلن کي منهن ڏيڻو پئجي رهيو آهي ۽ ان ۾ سڀ کان وڏو مسئلو گوسڙو ملازم آهن. هن چيو ته ڪي ايم سي، واٽر بورڊ سميت ٻين بلدياتي کاتن ۾ وڏي پيماني تي گوسڙو ملازم اهڙا آهن جن جو تعلق ايم ڪيو ايم سان آهي ۽ 10 ڊسمبر تي ايم ڪيو ايم جي اڳواڻ الطاف حسين جن ٻن رابطا ڪميٽي جي ميمبرن خالد سلطان ۽ عادل خان جيڪي واٽر بورڊ جي سينيئر آفيسرن جي عهدن تي فائز آهن ۽ اهي پگهارون کڻي رهيا آهن. هن چيو ته هاڻ به هو سچ ڳالهائي رهيو آهي ۽ وقت اچڻ تي پورو سچ به عوام آڏو آندو ويندو ۽ ٻڌائيندو ته بلدياتي ادارن ۾ ڪيترا اهڙا گوسڙو ملازم آهن جيڪي ماضي ۾ ۽ حال ۾ سياست به ڪري رهيا آهن ۽ هن وقت هو سائوٿ آفريڪا ۽ ٻين ملڪن ۾ موجود آهن ۽ پگهارون ادارن مان کڻي رهيا آهن. هن چيو ته ادارن جي حالت زار کي بهتر بڻائڻ ۾ ايم ڪيو ايم جي قائد الطاف حسين پاران انهن سمورن ملازمن کي پنهنجن ڊيوٽين تي وڃڻ ۽ انهن کي ڊيوٽين تي حاضر ٿيڻ جون هدايتون ڏنيون هيون، جنهن تي اسان ان جا ٿورائتا آهيون، پر افسوس ان ڳالهه جو آهي ته هدايتن تي اڃان تائين عملدرآمد نه ٿي رهيو آهي. هڪ سوال جي جواب ۾ شرجيل انعام ميمڻ چيو ته سانحن تي سياست ڪرڻ افسوسناڪ عمل آهي ۽ سياست کي صرف اشوز تي ئي ٻڌل هجڻ گهرجي. هڪ ٻي سوال جي جواب ۾ شرجيل انعام ميمڻ چيو ته منهنجي استعيفيٰ ڏيڻ سان جيڪڏهن ادارن جي حالت بهتر ٿي وڃي ٿي ته ان تي کيس ڪوبه اعتراض نه آهي، پر استعيفيٰ جو مطالبو ڪندڙ هن قوم کي ٻڌائين ته جڏهن هن شهر ۾ 12 مئي وارو سانحو پيش آيو ته ڇا وسيم اختر استعيفيٰ ڏني. عيد ميلاد النبي صلعم سانحو ٿيو ته ڪنهن استعيفيٰ ڏني. هڪ ٻي سوال تي هن چيو ته هڪ سال اڳ اسان فائر بريگيڊ کاتي ۾ نون فائر ٽينڊرز لاءِ سوا 3 ارب رپيا جي رقم مختص ڪئي هئي جڏهن ته ان تي عدالت اسٽي آرڊر ڏئي ڇڏيو آهي ۽ هاڻ اسان ڪراچي جي تنگ ۽ ننڍين گهٽين کي ڏسندي مني فائر ٽينڊرز خريد ڪري رهيا آهي. ان موقعي تي پيپلز پارٽي ڪراچي ڊويزن جي صدر عبدالقادر پٽي چيو ته جڏهن به پيپلز پارٽي هن صوبي يا ملڪ ۾ ڪو وڏو پروگرام ڪري ٿي ته ان جي جلد بعد ٻي ڏينهن ئي ڪنهن قسم جو سانحو رونما ڪري ميڊيا کي ٻي طرف مائل ڪيو ويندو آهي. هن چيو ته سانحي جي فوري بعد سرڪاري مشينري ۽ پيپلز پارٽي جي ماڻهن جي اتي موجودگي جي باوجود الزام لڳائڻ جي سياست هن شهر ۽  ملڪ کي ڪنهن قسم جو ڪو فائدو نه پهچندو.

 

فوجي عدالتون جمهوريت کي بچائڻ لاءِ جوڙيون پيون وڃن:پرويز رشيد

اسلام آباد(بيورو) سڌ سماءَ واري وفاقي وزير پرويز رشيد چيو آهي ته ماضي ۾ فوجي عدالتون جمهوريت کي ختم ڪرڻ لاءِ ٺهيون پر هاڻي جمهوريت کي بچائڻ ۽ دهشتگردي جي خاتمي لاءِ جوڙيون پيون وڃن. هڪ بيان ۾ پرويز رشيد چيو ته جمهوريت ۽ دهشتگردي هڪ ٻئي جو ضد آهن. هن چيو ته پنهنجي نسلن کي وحشين ۽ جانورن کان بچائڻو آهي، پوءِ ڀلي سندن پنهنجيون حياتيون ڇو نه هليون وڃن. پرويز رشيد چيو ته کين ڪابل جو امن اوترو ئي عزيز آهي جيترو اسلام آباد جو، وزيراعظم نواز شريف افغانستان کي هڪ سوچ تي آڻڻ ۾ پنهنجو ڪردار ادا ڪيو آهي. سندس چوڻ هو ته ٻئي ملڪ گڏجي دهشتگرديءَ خلاف جنگ ڪندا، امن خطي جو گڏيل اثاثو آهي. سڌ سماءَ واري وفاقي پرويز رشيد وڌيڪ چيو ته کيس يقين آهي ته عمران خان پارليامينٽ ۾ واپس ايندو ۽ هــُو ساڻن گڏجي جمهوريت کي مستحڪم ڪندو.

 

فوجي عدالتن کي قبول ڪرڻ جو فيصلو زهر جو ڍڪ پيئڻ وانگر سمجھي ڪيو آهي: خورشيد شاهه

سکر(بيورو) قومي اسيمبليءَ ۾ مخالف ڌر جي اڳواڻ سيد خورشيد احمد شاھ چيو آهي ته، پيپلز پارٽي فوجي عدالتن کي قبول ڪرڻ جو فيصلو زهر جو ڍڪ پي ڪيو آهي.فوجي عدالتن جو قيام انتقامي قانون نه بڻجي وڃي، ان لاءِ سو چي سمجھي فيصلا ڪرڻا پوندا. سکر آءِ بي اي ۾ تقريب بعد ميڊيا سان ڳالهائيندي سيد خورشيد احمد شاھ چيو ته، پيپلز پارٽي پنهنجي پاليسي جلسن ۾ نه پر سينٽرل ايگزيڪٽو ڪاميٽي جي اجلاس ۾ طئي ڪندي آهي. هن چيو ته، سيڪيورٽي سببن جي ڪري بلاول ڀٽو زرداري ورسي جي تقريب ۾ شرڪت نه ڪئي. پ پ ۾ اختلافن جون ڳالهيون ڪندڙن اڳيان واضح ٿي چڪو آهي ته پارٽي ۾ ڪي به اختلاف ناهن. هن چيو ته، فوجي عدالتن کي قبول ڪرڻ جو فيصلو زهر جو ڍڪ پيئڻ وانگر سمجھي مجبوري ۾ ڪيو آهي،  آصف علي زرداري فوجي عدالتن تي اک رکڻ جو اعلان ڪيو آهي. فوجي عدالتون سياسي مقصدن لاءِ ۽ سياستدانن خلاف استعمال نه ٿيڻ ڏينداسين. ائين نه ٿئي جو فوجي عدالتن جوقيام انتقامي قانون بڻجي وڃي ان ڪري سوچي سمجھي فيصلا ڪرڻا پوندا. هن چيو ته، آصف زرادري ٻلي جي ڳالھ ڪئي آهي ۽ ملڪ ۾ گھڻائي ٻلا آهن. پرويز ۾شرف وٽ نه هاڻ وردي آهي ۽ نه ئي کيس عوامي حمايت حاصل آهي.

 

سنڌ جي وڏي وزير ٽمبر مارڪيٽ ڪراچي ۾ لڳل باهه جو نوٽيس وٺندي فوري طور تي رپورٽ طلب ڪري ورتي

ڪراچي(اسٽاف رپورٽر)سنڌ جي وڏي وزير سيد قائم علي شاهه ٽمبر مارڪيٽ ڪراچي ۾ لڳل باهه جو نوٽيس وٺندي فوري طور تي ان جي رپورٽ طلب ڪري ورتي آهي. هن ڪراچي جي ڪمشنر ۽ ايڊمنسٽريٽر ڪراچي کي هدايت ڪئي ته اهي ان واقعي جي جاچ ڪن ته باهه لڳڻ جا ڪهڙا سبب هئا ۽ باهه ايڏو ڇو پکڙجي وئي. هن واسطيدار انتظاميه کي اها به هدايت ڪئي ته شهر ۾ ڪنهن به ان قسم جي اوچتي صورتحال پيدا ٿيڻ جي صورت ۾ فوري طور تي ريسڪيو ڪارروائي ٿيڻ گهرجي ته جيئن صورتحال تي فوري ضابطو آڻي سگهجي. وڏي وزير ٽمبر مارڪيٽ ۾ باهه لڳڻ جي واقعي تي دلي ڏک جو اظهار ڪندي متاثرن سان دلي همدردي جو به اظهار ڪيو آهي.

 

ملڪ ۾ سياسي ۽ معاشي دهشتگردي جاري آهي: سراج الحق

لاهور(م.ڊ) جماعت اسلامي جي امير سراج الحق چيو آهي ته معاشي ۽ سياسي دهشتگردي جي خاتمي لاءِ هر طبقي کي ٻاهر نڪرڻو پوندو. لاهور ۾ جماعت اسلاميءَ رڪشا ريلي ڪڍي، جنهن جي اڳواڻي سراج الحق ڪئي. ان موقعي تي خطاب ڪندي سراج الحق چيو ته ملڪ ۾ سياسي ۽ معاشي دهشتگردي جاري آهي. هن چيو ته معاشي دهشتگردن ادارا تباهه ڪري ڇڏيا، ٻارڙا به قرضي بڻجي چڪا آهن. سراج الحق چيو ته جاگيردار، سيڙپڪار ۽ سهولتڪار طبقي طاقت جي ايوانن تي قبضو ڪيوآهي. سندس چوڻ هو ته سياستدانن ايوان تائين پهچڻ بعد عوام کان منهن موڙين ٿا. سراج الحق چيو ته مزدور پنهنجي مسئلن جو حل چاهين ٿا ته پنهنجي ساٿين کي اسيمبلين تائين پهچائين. جماعت اسلامي جي امير چيو ته سندس پارٽي غريبن ۽ پورهيتن سان گڏ آهي. هن چيو ته عدالتي ڪميشن بڻجڻ بعد تحريڪ انصاف کي پارليامينٽ ۾ اچڻ گهرجي. سراج الحق چيو ته حڪومت کي هاڻي واعدا پورا ڪرڻ گهرجن، واعدا پورا ٿيا ته ڳالهه اڳتي وڌندي.

 

ڀارت پاڪستان تي حملن لاءِ دهشتگردن کي تربيت ڏئي رهيو آهي: پرويز مشرف

لنڊن(م.ڊ) آل پاڪستان مسلم ليگ جي سربراهه ۽ اڳوڻي صدر جنرل (ر) پرويز مشرف چيو آهي ته ڀارت پاڪستان تي حملن لاءِ دهشتگردن کي تربيت ڏئي رهيو آهي، اڳوڻي صدر خبردار ڪيو ته افغانستان مان اتحادي فوجن جي نڪرڻ کانپوءِ پاڪستان ۽ ڀارت وچ ۾ پراڪسي وار جو خطرو آهي، نيٽو ڀارت کي افغانستان جي سرزمين کي پاڪستان خلاف بيس جي طور تي استعمال ڪرڻ کان روڪي برطانوي اخبار دي ٽائمز کي ڏنل انٽرويو ۾ مشرفچيو ته پاڪستان ۾ ٿيندڙ دهشتگرد حملن جو ذميوار ڀارت آهي، ياد رهي ته اڳوڻو صدر جنرل (ر) پرويز مشرف پنهنجن ڪيترن ئي بيانن ۾ چئي چڪو آهي ته پاڪستان ۾ ٿيندڙ دهشتگردي جي واقعن ۾ ڀارت سڌو سنئون ملوث آهي جڏهن ته افغانستان ۾ به پاڪستان خلاف ڪارروائين ۾ مصروف آهي.

 

ٿر ۾ موت جا لامارا جاري، موت جو فرشتو وڌيڪ 3 گل ڪومائي ويو

ٿرپارڪر(رپورٽر) ٿرپارڪر ۾ موت جو سلسلو جاري آهي سول اسپتال مٺي، ڏيپلو ۽ ڇاڇرو ۾ وڌيڪ 3 ٻارڙا فوت ٿي ويا آهن 88 ڏينهن ۾ ٻارڙن سميت 281ماڻهو فوت ٿي ويا آهن غذائي کوٽ کانپوءِ هاڻ ٿڌ جي شدت ٿر واسين جي زندگي کي مشڪل بڻائي ڇڏيو آهي، ٿرپارڪر جي علائقي مٺي، ڏيپلو، ڇاڇرو، ننگر پارڪر ۽ ٻين ڏڪار سٽيل علائقن ۾ موت جي تعداد وڌندي پئي وڃي ٿڌ ۾ اضافي سبب بي يارو مددگار ٿري معصوم ٻارڙا نمونيا سميت ڪيترين ئي بيمارين ۾ مبتلا ٿي ويا آهن حڪومت طرفان مناسب قدم نه کڻڻ، اسپتالن ۾ دوائن جي کوٽ ۽ سهولتن جي فقدان سبب روزانو ڪيترين ئي مائرن جون هنجون اجڙي ٿيون وڃن.

 

شهيدن جي رت جي هر قطري جو حساب ورتو ويندو: شهباز شريف

لاهور (م.ڊ) پاڪستان ڄائي برطانوي باڪس عامر خان لاهور ۾ پنجاب جي وڏي وزير شهباز شريف سان ملاقات ڪئي، عامر خان پشاور سانحي جي مذمت ڪندي ٻارن ۽ استادن جي شهادت تي گهري ڏک ۽ افسوس جو اظهار ڪيو شهباز شريف جو چوڻ هو ته شهيدن جي رت جي هڪ هڪ قطري جو حساب ورتو ويندو، پنجاب جي وزير سان ملاقات ۾ عامر خان پشاور سانحي جي شهيدن جي ايصال ثواب لاءِ دعا ڪئي،  شهباز شريف چيو ته پشاور سانحي هر پاڪستاني جي دل کي زخمي ڪيو آهي، قوم دهشتگردي خلاف گڏ ٿي چڪي آهي دهشتگردن کي سر بچائڻ لاءِ به جڳهه نه ملندي،  هن جو چوڻ هو ته پاڪساني باڪسرن کي جديد تربيت جي ضرورت آهي، جڏهن ته صوبائي حڪومت صحت منداڻين سرگرمين کي هٿيار ڏيرڻ لاءِ جامع پروگرام تي عمل ڪري رهي آهي هن عامر خان کي سلور لائيٽ ويلٽر ويٽ ڪيٽيگري جو چيمپيئن بڻجڻ تي مبارڪباد به ڏني ۽ چيو ته عامر خان باڪسنگ جي ميدان ۾ پاڪستان جو نالو روشن ڪيو آهي، عامر خان ان موقعي تي پاڪستاني باڪسرن کي عالمي معياري جي تربيت ڏيڻ جي خواهش جو اظهار ڪيو.

 

حڪومت ۽ تحريڪ انصاف ڳالهين ۾ اڳڀرائي نه ٿي، ڊيڊ لاڪ برقرار

اسلام آباد(بيورو) حڪومت ۽ تحريڪ انصاف ۾ تڪراري معاملن تي اڳڀرائي نه ٿي سگهي آهي ۽ اڱاري ڏينهن ٻيهر ڳالهين جو فيصلو ڪيو ويو آهي. اسلام آباد ۾ تحريڪ انصاف اڳواڻ جهانگير ترين جي رهائشگاهه تي ڳالهين ۾ ڌريون هڪ دفعو ٻيهر لفظ ڌانڌلي جي تعريف تي متفق نه ٿي سگهيون. تحريڪ انصاف جي ڪميٽي موقف اختيار ڪيو ته حڪومت طرفان آل پارٽيز ڪانفرنس ۾ عدالتي ڪميشن جي حوالي سان جيڪو مسودو پيش ڪيو ويو اهو اطمينان جوڳو نه هو ۽ تڪرارينقطن کي خارج ڪيو ويو هو. هنن چيو ته ٻنهي ڌرين اتفاق ڪيو ته حڪومت طرفان پيش ڪيل نئين مسودي تي ٻئي ٽيمون پنهنجي پنهنجي قيادت کي اعتماد ۾ وٺنديون ۽ ڳالهين جو ايندڙ دور اڱاري تي ٿيندو. ٻئي طرف بني گالا ۾ ميڊيا سان ڳالهائيندي جهانگير ترين چيو ته ڳالهين ۾ ٻنهي ٽيمن جن معاملن تي اڳڀرائپ ڪئي آهي ان کان پنهنجي قيادت کي آگاهه ڪيو ويندو ۽ وڌيڪ هدايتون ورتيون وينديون. هن چيو ته جيڪڏهن ڪو سمجهي ٿو ته ڳالهين جي عمل کي ڊيگهه ڏيڻ سان تحريڪ انصاف پنهنجو رستو وڃائي ويهندي ته اهو غلط آهي. cسندس چوڻ هو ته هنن چئن مهينن کان وڌيڪ عرصي تائين ڌرڻو هنيو آهي، هنن معاملي کي حل ڪرڻ لاءِ تمام گهڻي لچڪ ڏيکاري ۽ هو صفحن کان اڌ صفحي تي اچي ويا آهن. جهانگير ترين چيو ته هاڻي بال مسلم ليگ ن جي ڪورٽ ۾ آهي هو چاهين ته معاملا جلد حل ٿي سگهن ٿا، جيڪڏهن ڊيگهه ٿي ته حل ڏکيو ٿي ويندو آهي. هن چيو ته هو حڪومت جي نيت تي شڪ ڪرڻ بدران کين معاملا حل ڪرڻ لاءِ وڌيڪ وقت ڏيڻ چاهين ٿا. حڪومتي ڪميٽي جي ميمبر احسن اقبال چيو ته پي ٽي آءِ قيادت سان ٿيل ڳالهين ۾ هنن فاصلا گهٽ ڪيا آهن. هن چيو ته ٻئي ڌريون لاڳاپيل قيادت سان ملڻ کانپوءِ اڱاري تي ٻيهر ملاقات ڪنديون.