تازيون خبرون

Daily Archives: December 27, 2014

سنڌ هاءِ ڪورٽ قومپرست ڪارڪن کي آزاد ڪرڻ جو حڪم ڏيئي ڇڏيو

ڪراچي (اسٽاف رپورٽر) سنڌ هاءِ ڪورٽ قومپرست جماعت جي ڪارڪن کي ڪيسن مان بري ٿيڻ جي باوجود حراست ۾ رکڻ جي خلاف درخواست منظور ڪندي امتياز هسن ميراڻي کي آزاد ڪرڻ جو حڪم ڏيئي ڇڏيو ڪيس جي ٻڌني سنڌ هاءِ ڪورٽ جي جسٽس سجاد علي شاهه ۽ جسٽس شوڪت علي ميمڻ تي ٻڌل ٻه رڪني بئنچ ڪئي درخوست گذار ذوالفقارعلي ميراڻي جي وڪيل عاقب راڄپر موقف اختيار ڪيو هو ته امتياز حسين ميراڻي کي حيدرآباد پوليس 45 مختلف ڪيسن ۾ گرفتار ڪيو هو ڄاڻايل شخص دهشتگردي ٽوڙ جي خاص عدالت حيدرآباد مان سمورن ڪيسن ۾ 20 ڏينهن اڳ آزاد ٿي چڪو آهي ان جي باوجود امتياز هسين ميراڻي کي آزاد نه پيو ڪيو وڃي عدالت جئي سنڌ قومي محاذ جي ڪارڪنن امتياز حسين ميراڻي کي آزاد ڪرڻ جو حڪم ڏيئي ڇڏيو.

 

ملڪ مان دهشتگردي جي لعنت جو خاتمو آندو ويندو: شهباز شريف

لاهور(م.ڊ) پنجاب جي وڏي وزير شهباز شريف چيو آهي ته جيستائين سٺي ۽ خراب طالبان جو فرق ختم نٿو ٿئي، ملڪ کي تباهي کان ڪو به نٿو بچائي سگهي، دهشتگرديءَ جي پاڙ پٽي پاڪستان کي پر امن ملڪن جي فهرست ۾ شامل ڪيو ويندو. لاهور ۾ ماڊل ٽائون واري رهائشگاهه تي پنجاب جي وڏي وزير شهباز شريف سان سينيئر صحافين، ڪالم نگارن ۽ دانشورن ملاقات ڪئي، ملاقات دوران آرمي پبلڪ اسڪول حملي ۾ شهيد ٿيل ٻارڙن جي دعا پڻ گهري وئي. ملاقات کانپوءِ ميڊيا سان ڳالهائيندي پنجاب جي وڏي وزير شهباز شريف چيو ته پشاور ۾ دهشتگردن معصوم ٻارڙن کي بربريت جو نشانو بڻايو، ٻارڙن جي شهادت پاڪستان توڙي عالمي برادري کي لوڏي ڇڏيو آهي. هن چيو ته قومي ايڪشن پلان تي سياسي پارٽين جو متحد ٿيڻ تاريخي قدم آهي، ملڪ مان دهشتگردي جي لعنت جو خاتمو آندو ويندو. هڪ سوال جي جواب ۾ شهباز شريف چيو ته جيستائين سٺي ۽ خراب طالبان جو فرق ختم ڪري ڪارروائي نٿي ڪئي وڃي، ملڪ کي تباهي کان ڪو به نٿو بچائي سگهي. پنجاب جي وڏي وزير شهباز شريف چيو ته حڪومت دهشتگردن خلاف بنا ڪنهن فرق جي ڪارروائي ڪئي پئي وڃي، دهشتگردي جي لعنت جو خاتمو آڻي پاڪستان کي پر امن ملڪن جي فهرست ۾ شامل ڪيو ويندو.

 

ڪوٽ لکپت جيل تي حملي جو منصوبو ناڪام ، 2 عورتون ۽ هڪ نوجوان گرفتار

لاهور(بيورو) پوليس ۽ حساس ادارن ڪارروائي ڪري ڪوٽ لکپت جيل تي حملي جو منصوبو ناڪام بڻائي ڇڏيو لاهور ۾ واقع ڪوٽ لکپت جيل سان لاڳاپيل علائقي فريد ڪالوني ۾ حساس ادارن ۽ پوليس ڪارروائي ڪري 2 عورتن ۽ هڪ نوجوان کي گرفتار ڪري ورتو، پوليس ترجمان مطابق خفيه اطلاع تي سرچ آپريشن دوران دهشتگردن کي گرفتار ڪيو ويو آهي جڏهن ته انهن وٽان هڪ راڪيٽ لانچر بيگ، بم ناڪاره بڻائيندڙ فارمولو، ڪوٽ لکپت جيل جو نقشو، سي سي ٽي وي ڪيمرا، آرمي جيڪٽ، 6 موبائيل فون، ڪيتريون ئي سمون، ليپ ٽاپ ۽ تير ڪمان هٿ ڪيو ويو آهي.

 

پشاور ۾ سرچ آپريشن، 200 کان وڌيڪ شڪي گرفتار

پشاور(م.ڊ) پشاور ۾ قانون نافذ ڪندڙ ادارن سرچ آپريشن دوران 200 کان وڌيڪ شڪي ماڻهن کي گرفتار ڪري ورتو آهي، پوليس مطابق فقير آباد ٿاڻي جي حدن ۾ زرياب ڪالوني، رنگ روڊ، چارسده روڊ ۽ لاڳاپيل علائقن ۾ ڪارروائي دوران 2 سئو کان وڌيڪ شڪي ماڻهن کي گرفتار ڪيو ويو آهي، جن ۾ غير قانوني طور رهندڙ افغاني به شامل آهن، گذريل رات پشاور جي علائقي نوٿيا ۾ به سرچ آپريشن ۾ 100 جي ويجهو شڪي ماڻهن کي گرفتار ڪيو ويو هو.

 

آر آر آءِ ڏوڪري پاڪستان ۾ سارين جي تحقيق جو بهترين ادارو آهي؛ سارنگيا اڳواڻ

ڏوڪري(رپورٽر)سارنگيا جي مرڪزي اڳواڻن چيو آهي ته آر آر آءِ ڏوڪري پاڪستان ۾ سارين جي تحقيق جو بهترين ادارو آهي، جنهن ملڪ ۾ ايري 6 چانورن جهڙيون جنسون ڏئي زرعي انقلاب آندو. نيشنل پريس ڪلب ۾ پريس ڪانفرنس ڪندي سنڌ ايگريڪلچر ريسرچ نان گزيٽيڊ يونين جي مرڪزي نائب صدر رستم جتوئي، آر آر آءِ اڳواڻن وزير نائچ ۽ سرفراز جتوئي سان گڏجي پريس ڪانفرنس ڪندي چيو ته چانورن جو تحقيقاتي ادارو ڏوڪري بهتر نموني ڪم ڪري رهيو آهي، جنهن شر پسند عنصر ڊائريڪٽر ۽ ٻين کي بليڪ ميل ڪرڻ لاءِ اداري جي منفي پروپيگنڊا ڪري رهيا آهن. هنن چيو ته ڊائريڪٽر نور محمد بلوچ جي سربراهي ۾ اداري جا سائنسدان ٿوري پاڻي تي ساريالي جنس تي ڪم ڪري ملڪ ۾ زرعي تبديلي آڻي رهيا آهن، جن جي حوصلا افزائي ٿيڻ گهرجي. هنن چيو ته آر آر آءِ ڏوڪري ملڪي معيشيت ۾ ريڙه جي هڏي وارو ڪردار ادا ڪري رهيو آهي، جنهن کي بند ڪري پنجاب منتقل ڪرڻ جي سازش ڪنهن صورت ۾ برداشت نه ڪئي ويندي.

 

ڏوڪري؛گوسڙو ماسترن ۽ بند پيل پيل اسڪول کولرائڻ لاءِ ايس يو پي، جست ۽ شهرين طرفان مظاهرو، ڌرڻو

ڏوڪري(رپورٽر)ڏوڪري تعلقي جي گوسڙو ماسترن ۽ بند پيل پيل اسڪول کولرائڻ لاءِ ايس يو پي، جست ۽ شهرين طرفان سنڌ جي قديم ثقافتي ماڳ موهن جو دڙو تي صابر علي جروار ، ديشي شبير، ميڊم نسيم مغل، ڪامريڊ شبن جتوئي، الطاف ٻگهيو ۽ ٻين جي اڳواڻي ۾ بينر ۽ پلي ڪارڊ کڻي اسٽوپا اڳيان احتجاجي مظاهرو ڪري ڌرڻو هنيو. ان موقعي تي ڌرڻي کي خطاب ڪندي اڳواڻن چيو ته سازش تحت سنڌ جي تعليم تباهه ڪري قوم کي اوندهه ۾ رکيو پيو وڃي. هنن چيو ته ڏوڪري تعلقي ۾ گوسڙو ماسترن ۽ ماسترياڻين جي وڌندڙ انگ ۽ بند پيل اسڪول سماج جي منهن کي چماٽ آهي، جنهن کي ڪنهن به صورت ۾ برداشت نه ڪيو ويندو. هنن چيو ته گوسڙو ماستر مختلف ڪاروبار ۽ صحافت ۾ مشغول آهن، جنهن سبب معصوم ٻارن جون زندگيون تباهه ٿي رهيون آهن. اڳواڻن وڏي وزير، تعليم جي وزير ۽ سيڪريٽري کان مطالبو ڪيو ته ڏوڪري تعلقي ۾ بند پيل اسڪول کولرائي گوسڙو ماسترن خلاف ڪارروائي ڪئي وڃي، ٻئي صورت ۾ ڏوڪري شهر ۾ شٽر بند هڙتال ڪئي ويندي.

 

سال اڳ قتل ڪيل قادر بخش ۽ شهناز مگسي جي قاتلن ۽ ملڪيت تي قبضي خلاف عورتن جو احتجاج

ڏوڪري(رپورٽر)سال اڳ قتل ڪيل ڀيڻ ڀاءُ قادر بخش ۽ شهناز مگسي جي قاتلن جي گرفتاري ۽ سندن ملڪيت تي قبضي خلاف پيرسن امڙ الهه بچائي مگسي جي اڳواڻي ۾ وارث عورتن جو لاڙڪاڻو موهن جو دڙو روڊ تي ٽائر ساڙي هٿن ۾ ڪلام پاڪ کڻي احتجاجي مظاهرو ڪري ڌرڻو هنيو ويو. ڌرڻي سبب لاڙڪاڻو، باڊهه، باقراڻي، خيرپور ۽ موهن جو دڙوايندڙ ويندڙ ٽريفڪ 1 ڪلاڪ تائين بند ٿي وئي. ان موقعي تي هٿن ۾ ڪلام پاڪ کڻي مقتول قادر بخش ۽ شهناز مگسي جي پيرسن امڙ الهه بچائي مگسي دانهيندي چيو ته سازش تحت سندس پٽ قادر بخش ۽ ڌي شهناز کي قتل ڪرڻ بعد سندن ننهن کي به گهٽا ڏئي قتل ڪري ساڻن ظلم ڪيو ويو. هن الزام مڙهيندي چيو ته سندن مائٽ منظور مگسي سندس اولاد کي قتل ڪرائي سندس ڪروڙين روپين جي ملڪيت تي قبضو ڪري کيس ۽ سندس پوٽن کي گهر مان ڪڍي ڇڏيو آهي. هنن ڏوڪري پوليس تي ڌر هئڻ جو الزام مڙهيندي چيو ته ڏوڪري پوليس جوابدارن کان لکين روپيا رشوت وٺي سندن خون لوڙهي ملڪيتن تي قبضا ڪرائي رهي آهي. هنن وڏي وزير، آءِ جي سنڌ، ڊي آءِ جي لاڙڪاڻو ۽ ايس ايس پي لاڙڪاڻو کان مطالبو ڪيو ته سندس پٽ قادر بخش، شهناز بيگم ۽ ننهن جي قتل ۾ ملوث جوابدارن کي گرفتار ڪري کين انصاف مهيا ڪيو وڃي. ٻئي طرف ايئر پورٽ پوليس جوابدار گرفتار ڪرائڻ جي خاطري ڪرائي احتجاج ختم ڪرايو.

 

هاڻي پاڪستان ۾ ٻارن جي موضوع تي فلمون ٺاهڻ جو وقت اچي ويو آهي آسڪر ايوارڊ يافتا شرمين اوبيد چنائي

لاهور(شوبز نيوز)پاڪستان جي پهرين آسڪر ايوارڊ يافتا اداڪارا ۽ فلم ڊائريڪٽر شرمين اوبيد جو چوڻ آهي ته هاڻي پاڪستان ۾ ٻارن جي موضوع تي فلمون ٺاهڻ جو وقت اچي ويو آهي. شرمين اوبيد چنائي جو چوڻ آهي ته اڄ جا  ٻار تمام گهنا بهادر آهن  ڇو ته هو دهشتگردي جي هن ماحول ۾ پنهنجي تعليم جاري رکيو پيا اچن ۽ اسان کي نئين نسل ۾ اهڙو شعور پيدا ڪرن جي ضرورت آهي جنهن سان همت ۽ بهادري جو جزبو پيدا ٿئي.شرمين اوبيد جو چوڻ هو ته اسان کي نئين نسل جو حوصلو وڌائن گهرجي ته جيئن هو پنهنجي زندگي بهادري سان گزاري سگهن.سندس اهو به چوڻ هو ته پشاور سانهي کان پوءِ هو سوچڻ تي مجبور ٿي وئي آهي ته ڪهڙي طرح اسان کي پنهنجي نئين نسل کي بچائڻو آهي..شرمين جو اهو به چوڻ هو ته هو  هاڻي ٻارن جي موضوع تي فلم ٺاهيڻ جي تياري ڪري رهي آهي جنهن تي ڪم هلي رهيو آهي .

 

اداڪارن لاءِ سٺو دؤر هاڻي شروع ٿيو آهي: راهول ڀٽ

ممبئي(شوبز نيوز) بالي ووڊ اداڪار راهول ڀٽ چيو آهي ته اداڪارن لاءِ سٺو دؤر هاڻي شروع ٿيو آهي. بالي ووڊ اداڪار راهول ڀٽ پنهنجي انٽرويو ۾ چيو ته پهرئين دؤر ۾ ڪجهه هيرو مقبول هئا، نون اداڪارن کي گهٽ موقعو ملندو هو پر هاڻي اداڪارن لاءِ سٺو دؤر شروع ٿي ويو آهي ۽ بالي ووڊ انڊسٽريءَ ۾ نَون اداڪارن کي موقعو ڏنو وڃي ٿو ته هو پنهنجون صلاحيتون مڃرائين، جڏهن ته هاڻي سٺن موضوعن تي فلمون ٺهڻ شروع ٿي ويون آهن. ان ڪري بالي ووڊ انڊسٽري ۾ مقابلو شروع ٿي ويو آهي، ان جو فائدو اهو آهي ته هرڪو پنهنجي ڪم کي بهتر ڪرڻ ۾ مصروف آهي.

 

تڪراري فلم ”دي انٽرويو“ رليز ڪئي وئي

نيويارڪ(شوبز نيوز): آمريڪي فلم اسٽوڊيو سوني پڪچرز تڪراري فلم دي انٽرويو رليز ڪري ڇڏي آمريڪا ۽ اتر ڪوريا وچ ۾ ڇڪتاڻوڌائيندڙ تڪراري فلم کي آخرڪار ڪرسمس جي موقعي تي 3 سئو جاين تي رليز ڪيو ويو آهي دي انٽرويو اتر ڪوريا جي حڪمران ڪم جونگ آن جي قتل جي موضوع تي ٺاهي وئي آهي هي فلم ٺاهڻ تي سوني پڪچرز جي ويب سائيٽ هيڪ ڪئي وئي هئي ۽ گذريل ڏينهن ساڍن 9 ڪلاڪن تائين اتر ڪوريا ۾ به انٽرنيٽ سروس معطل رهي هئي.