تازيون خبرون

Daily Archives: December 27, 2014

قومي ايڪشن پلان تي عملدرآمد لاءِ خاص ٽيم قائم، نگراني پاڻ ڪندس: وزير اعظم

اسلام آباد(بيورو) وزيراعظم نواز شريف قومي ايڪشن پلان تي عملدرآمد لاءِ خصوصي ٽيم قائم ڪري ورتي آهي ڪميٽي ۾ چوڌري نثار، پرويز رشيد، احسن اقبال، سرتاج عزيز، خواجه آصف ڪميٽي جا ميمبر هوندا، ان موقعي تي وزيراعظم جو چوڻ هو ته قومي ايڪشن پلان تي عملدرآمد جي معاملن جي پاڻ نگراني ڪندس، پلان تي گهٽ ۾ گهٽ وقت ۾ عملدرآمد يقيني بنايو ويندو، هن جو چوڻ هو ته شهرن ۽ گهٽين ۾ دهشتگردن خلاف ڪارروايون فيصلائتيون آهن، قبائلي علائقن ۾ ضرب عضب ۾ دهشتگردن خلاف ڪارروايون فيصلائتيون آهن وزيراعظم اجلاس ۾ اٽارني جنرل کي هدايت ڪئي ته خصوصي عدالتون قائم ڪرڻ لاءِ سمورين پارٽين سان فوري رابطو ڪريو.وزيراعظم نواز شريف جي منظوري کانپوءِ دهشتگردي خلاف ايڪشن پلان تي عملدرآمد شروع ڪيو ويو آهي، گهرو وزارت چئن ئي صوبن ۽ اسلام آباد انتظاميه کي پوري ملڪ مان 7 هزار شڪي ماڻهن جي گرفتاري جا حڪم جاري ڪري ڇڏيا آهن ذريعن ٻڌايو آهي ته گهرو وزارت پوري ملڪ مان 6 هزار 7 سئو 77 شڪي ماڻهن کي حفاظتي تحويل ۾ وٺڻ جو فيصلو ڪيو آهي امڪاني طور تي حفاظتي تحويل ۾ ورتلن ۾ 14 سئو 16 ماڻهن جو تعلق پنجاب سان آهي، خيبرپختونخواهه مان 4000 کان وڌيڪ ۽ بلوچستان مان 338 شڪي ماڻهن کي حفاظتي تحويل ۾ ورتو ويندو، فهرست ۾ سنڌ مان هڪ هزار ۽ اسلام آباد مان 23 ماڻهن جا نالا شامل آهن، گهرو وزارت چئن ئي صوبن ۽ اسلام آباد انتظاميه کي انهن ماڻهن کي حفاظت ۾ وٺڻ جا حڪم جاري ڪري ڇڏيا آهن، جڏهن ته پوليس انهن ماڻهن کي گرفتار نه ڪندي جن جي باري ۾ هو اهو سمجهن ته انهن جو تعلق ڪنهن پابندي مڙهيل تنظيم سان ناهي، جڏهن ته ان جي ذميواري لاڳاپيل پوليس اسٽيشن جي ايس ايڇ او تي هوندي، جن ماڻهن کي گرفتار ڪرڻ جا حڪم جاري ڪيا ويا آهن انهن جو رڪارڊ دهشتگردي ٽوڙ ايڪٽ 1997ع جي شيڊيول فور ۾ موجود آهي شيڊول چار ۾ آءِ ايس آءِ، آءِ بي ۽ سي آءِ ڊي پوليس پنهنجن گڏيل اجلاسن ۾ وقفي وفقي سان پابندي مڙهيل تنظيمن جي ڪارڪنن ۽ حمايت ڪندڙڻ جا نالاشيڊول چار ۾ داخل ڪندي رهندي آهي ان ۾ شامل ماڻهن کي پنهنجو علائقو ڇڏي ٻي جاٰءِ تي وڃڻ لاءِ پوليس کي رپورٽ ڪرڻ لازمي هوندو آهي.

 

ملڪ جي مختلف حصن ۾ رود حادثا، ٻارڙن ۽ عورتن سميت 23 ڄڻا فوت

لسٻيلا/ايبٽ آباد/ گوادر/لوئر اورڪزئي: ايجنسي جي علائقي سره ميلا ۾ ڪوچ ڪلٽي ٿيڻ سبب 2 ٻارن ۽ عورت سميت 12 ڄڻا فوت ۽ 8 زخمي ٿي پيا اورڪزئي ايجنسي کان ڪوهاٽ ويندڙ مسافر ڪوچ سره ميلا جي علائقي ۾ تيز رفتاري سبب ڪلٽي ٿي پئي جنهن جي نتيجي ۾ 2 ٻارن ۽ عورت سميت 12 ڄڻا فوت ۽ 8 زخمي ٿي پيا جن ۾  3 عورتون ۽ ٻار به شامل آهي، ريسڪيو ٽيمن حادثي واري جاءِ تي پهچي لاشن ۽ زخمين کي ڪوهاٽ اسپتال منتقل ڪري ڇڏيو جتي زخمين کي طبي امداد فراهم ڪئي پئي وڃي.لسٻيلي ڀرسان وندر ۾ مسافر بس ڪلٽي ٿيڻ جي نتيجي ۾ 5 عورتن سميت 30 ڄڻا زخمي ٿي پيا، لسٻيلي ڀرسان وندر ۾ مسافر بس ڪلٽي ٿيڻ جي نتيجي ۾ 5 عورتن سميت 30 ڄڻا زخمي ٿي پيا، جن مان ڪيترن جي حالت ڳڻتي جوڳي ٻڌائي پئي وڃي. گودار کان ڪراچي ويندڙ مسافر بس تيز رفتاري سبب ڪلٽي ٿي وئي، جنهن جي نتيجي ۾ 5 عورتن سميت 30 ڄڻا زخمي ٿي پيا. پوليس ۽ ريسڪيون ٽيمن واقعي واري هنڌ پهچي زخمين کي ڊسٽرڪٽ هيڊ ڪواٽر اسپتال منتقل ڪيو ، جتي کين طبي امداد ڏني پئي وڃي. اسپتال ذريعن موجب، حادثي جي زخمين ۾ عورت سان گڏ ٻارڙا به شامل آهن، جن مان ڪجهه جي حالت ڳڻتي جوڳي آهي. ايبٽ آباد ڀرسان مسافر بس کاهي ۾ ڪرڻ جي نتيجي ۾ 6 ڄڻا فوت ۽ 10 کان وڌيڪ زخمي ٿي پيا آهن. حويليان ڀرسان بودلا واري علائقي ۾ مسافر بس تيز رفتاري سبب کاهي ۾ پئي پئي، جنهن جي نتيجي ۾ 6 مسافر فوت ۽ 10 کان وڌيڪ زخمي ٿي پيا. پوليس ۽ ريسڪيو ٽيمن واقعي واري هنڌ پهچي لاش ۽ زخمين کي ٻاهر ڪڍڻ لاءِ ڪوششون جاري آهن، جڏهن ته 4 لاشن ۽ 6 زخمين کي ٻاهر ڪڍيو ويو آهي. پوليس موجب، حادثو تيز رفتاري سبب پيش آيو، لاشن ۽ زخمين کي ٻاهر ڪڍڻ لاءِ ڪوششون جاري آهن.

 

دهشتگرد ڀٽڪيل آهن، سندن ڪو به دين مذهب ناهي، امن امان قائم ڪرڻ لاءِ تڪڙا قدم کڻڻا پوندا: صدر

ڪوئيٽا(م.ڊ) صدر ممنون حسين چيو آهي ته فوج ۽ حڪومت دهشتگردن جي مستقل خاتمي جو پڪو ارادو ڪيو آهي، دهشتگرد ڀٽڪيل آهن، سندن ڪو به دين مذهب ناهي، امن امان قائم ڪرڻ لاءِ تڪڙا قدم کڻڻا پوندا.. ڪوئيٽا ۾ صدر ممنون حسين سان سياسي ۽ قبائلي اڳواڻن ملاقات ڪئي. ان موقعي تي صدر ڳالهائيندي چيو ته حڪومت دهشتگردن جي مڪمل خاتمي لاءِ پرعزم آهي، حڪومت ۽ فوج مستقل بنيادن تي ڪارروائي ڪري دهشتگردن جو خاتمو ڪرڻ جو پهه ڪيو آهي.. صدر ممنون حسين چيو ته بلوچستان ۾ امن امان جي بحالي لاءِ تڪڙا اپاءُ ورتا وڃن، دهشتگردي ۾ ملوث ماڻهو گمراهه آهن، جن جو ڪو به مذهب نه آهي، بيگناهه ماڻهن کي قتل ڪندڙ انسان نه پر حيوان آهن.. هن چيو ته پاڪ چين اقتصادي راهداري سان بلوچستان ۾ ترقي جا دروزا کلندا، پاڪ-چين اقتصادي راهداري منصوبن سان گهڻو فائدو بلوچستان جي عوام کي ٿيندو. صدر چيو ته پرڏيهي ڪمپنيون بلوچستان ۾ سيڙپڪاري ڪرڻ چاهين ٿيون، پر پرڏيهي سيڙپاڪارن کي امن امان بابت خدشا آهن. ممنون حسين وڌيڪ چيو ته ملڪ مان 2018 تائين بجلي جي لوڊشيڊنگ جو خاتمو ڪيو ويندو……

 

ايشيا جي عظيم ليڊر محترمه بينظير ڀٽو شهيد جي 7 ورسي اڄ ملهائي ويندي، انتظام مڪمل

لاڙڪاڻو (بيورو) دنيا جي عظيم سياستدان، اڳوڻي وزير اعظم۽ پاڪستان پيپلز پارٽي جي شهيد چيئرپرسن محترمه بينظير ڀٽو جي ستين ورسي اڄ پيپلز پارٽي پاران ڳڙهي خدابخش ڀٽو ۾ عقيدت ۽ احترام سان ملهائي پئي وڃي. ان حوالي سان پيپلز پارٽي پاران ورسي جي تقريبن جا سمورا انتظام مڪمل ڪيا ويا آهن ۽ مک تقريب ڳڙهي خدابخش ۾ رٿي وئي آهي. ڳڙهي خدابخش ڀٽو کي پ پ پ جي جهنڊن، شهيد محترمه بينظير ٽو جي تصويرن ۽ بينرن سان سينگاريو ويو آهي ۽ شهيدن جي مزار ويجهو محترمه شهيد سميت سمورن شهيدن جي تصويرن جا اسٽال لڳايا ويا آهن. جڏهن ته ملڪ جي ڪنڊ ڪڙڇ کان شهيد محترمه بينظير ڀٽو جا جيالا هر سال جيان عقيدت طور ڀيٽا ڏيڻ لاءِ ڳڙهي خدابخش ڀٽو پهچڻ شروع ٿي ويا آهن. جڏهن ته پ پ پ جو شريڪ چيئرمين ۽ اڳوڻو صدر آصف علي زرداري، سندس نياڻي بختاور ڀٽو زرداري، شيري رحمان سميت پارٽي جا ڪيترائي مرڪزي ۽ صوبائي اڳواڻ نئون ديرو هائوس پهچي ويا آهن. جڏهن ته آصف علي زرداري، شيري رحمان ۽ ٻين اڳواڻن سان گڏجي ڳڙهي خدابخش ڀٽو شهيد محترمه بينظير ڀٽو ۽ ٻين شهيدن جي مزارن تي گلن جون چادرون چاڙهي فاتحه خواني ڪئي. اڳواڻي صدر آصف علي زرداري جي مزار تي آمد کان اڳ پوليس پاران مزار کي سيل ڪري سخت سيڪيورٽي جا انتظام ڪيا ويا. آءِ جي سنڌ غلام حيدر جمالي پڻ ڳڙهي خدابخش ڀٽو پهچي ورسي جي حفاظتي انتظامن جو جائزو ورتو. آءِ جي پاران پوليس کي ڦول پروف انتظام ڪرڻ جون سخت هدايتون ڪيون ويون آهن. ڳڙهي خدابخش ڀٽو ۾ ماڻهن کي واڪ ٿرو گيٽس ذريعي اسپيشل برانچ ۽ پ پ پ جا ڪارڪن تلاشي ڪرڻ بعد مزار اندر ڇڏي رهيا آهن. جڏهن ته وڏي تعداد ۾ ٽريفڪ پوليس اهلڪار، ليڊي پوليس اهلڪارن سميت اسپيشل ڪمانڊوز ۽ رينجرس اهلڪارن کي پڻ مقرر ڪيو ويو آهي. 6500 پوليس اهلڪارن کي نئون ديرو، ڳڙهي خدابخش مقرر ڪري نئون ديرو ۽ ڳڙهي خدابخش ڀٽو کي ٻن ريڊ زون ۾ ورهايو ويو آهي ۽ مزار اندر ۽ پنڊال ٻاهران ڪلوز سرڪٽ ذريعي مانيٽرنگ ڪندا ۽ ڳڙهي خدابخش ڀٽو ۾ پوليس انتظاميه پاران مک ڪنٽرول روم پڻ قائم ڪيو ويو آهي. جڏهن ته سنڌ جي وڏي وزير سيد قائم علي شاهه، آغا سراج دراني ۽ ٻين ورسي جي انتظامن جو ٻيهر جائزو ورتو.

 

27 ڊسمبر تي شهيد بينظير ڀٽو جي ستين ورسي ڀرپور نموني ملهائي ويندي: قائم علي شاهه/ فريال ٽالپر

 

 

لاڙڪاڻو (بيورو)  وڏي وزير سيد قائم علي شاهه ۽ فريال ٽالپر چيو آهي ته 27 ڊسمبر تي شهيد بينظير ڀٽو جي ستين ورسي ڀرپور نموني ملهائي ويندي. ڀٽو هائوس نئين ديري ۾ پي پي سنڌ جي صدر سيد قائم علي شاهه ۽ فريال ٽالپر جي گڏيل صدارت هيٺ شهيد بينظير ڀٽو جي ورسي جي حوالي سان گڏجاڻي ٿي. گڏجاڻي ۾ لاڙڪاڻي ڊويزن جي چونڊيل نمائندن، ضلعي ۽ تعلقي جي عهديدارن شرڪت ڪئي. ان موقعي تي لاڙڪاڻي ڊويزن جي اڳواڻن بريفنگ ڏيندي چيو ته ورسي تقريب ۾ پي پي جا جيالا قافلن جي صورت ۾ شرڪت ڪندا. ان موقعي تي سيد قائم علي شاهه ۽ فريال ٽالپر، لاڙڪاڻي ڊويزن جي قيادت کي هدايت ڪئي ته ورسي ۾ ڪارڪنن جي وڌ کان وڌ شرڪت کي يقيني بڻايو وڃي ته جيئن پنهنجي عظيم ليڊر کي ڀيٽا پيش ڪري سگهجي. گڏجاڻي دوران شهيد بينظير ڀٽو لاءِ دعا پڻ گهري وئي.

 

پي ٽي آءِ جوڊيشل ڪميشن آرڊيننس جو مسودو رد ڪري ڇڏيو

اسلام آباد(بيورو) پي ٽي آءِ جوڊيشل ڪميشن لاءِ آرڊيننس جو مسودو رد ڪري ڇڏيو آهيجهانگير رين چيو آهي ته مسودو طئه ٿيل ڳالهين کان مختلف آهي، تحريڪ انصاف جي سيڪريٽري جنرل جو چوڻ آهي ته خزاني واري وزير اسحاق ڊار ان کي وزيراعظم هائوس ۾ آل پارٽيز ڪانفرنس دوران مسودو ڏنو هو جيڪو ٻنهي پارٽين وچ ۾ طئه ٿيل ڳالهين کان مختلف آهي، هن جو چوڻ هو ته مسودو ان حالت ۾ قابل قبول ناهي، جڏهن ته اڄ حڪومت سان ٿيندڙ ڳالهين ۾ ان مسودي تي ڳالهيون ٿيندوين ۽ ان کي حتمي شڪل ڏيڻ  جي ڪوشش ڪئي ويندي.

 

اتر وزيرستان ۾ ڊرون حملو، 7 دهشتگرد مارجي ويا

اتر وزيرستان(م.ڊ) اتر وزيرستان ۾ دهشتگردن جي ٺڪاڻن تي ڊرون حملن ۾ 7 دهشتگرد مارجي ويا آهن. شوال ۽ ڪَنڊَ وارن علائقن ۾ آمريڪي جاسوس جهازن 2 ڊرون حملا ڪيا، جنهن جي نتيجي ۾ 7 دهشتگرد مارجي ويا آهن. مارجي ويلن ۾ ازبڪ ۽ پنجابي طالبان به شامل آهن، ڊورن حملي ۾ پنجابي طالبان ۽ پرڏهين جي ٺڪاڻن کي نشاڻو بڻايو ويو. اتر وزيرستان ۾ دهشگردن جي ٺڪاڻن مٿان ڊورن حملن جو سلسلو جاري آهي، جنهن ۾ ڪيترائي اهم دهشتگرد پڻ مارجي ويا آهن.. ذريعن موجب، مارجي ويلن ۾ پرڏيهي دهشتگرد به شامل آهن، جڏهن ته ٺڪاڻا به تباه ڪيا ويا آهن…

 

فيصل آباد جيل ۾ 2 دهشتگردن کي 14 جنوري تي ڦاهي ڏني ويندي

فيصل آباد(م.د) ننڪانه صاحب حملي ۾ ملوث 2 دهشتگردن کي 14 جنوري تي فيصل آباد سينٽرل جيل ۾ موت جي سزا ڏني ويندي لاهور جي دهشتگردي جي خاص عدالت جي جج ٻنهي دهشتگردن کي موت جي سزا جي تاريخ مقرر ڪئي، ٻنهي دهشتگردن جي موت واري سزا تي عملدرآمد لاءِ جيل سرپنٽنڊنٽ دهشتگردي جي خاص عدالت جي ايڊمنسٽريٽر جج کي درخواست موڪلي هئي جنهن ۾ موقف اختيار ڪيو ويو ته ٻنهي دهشتگردن جا ٽرائل مڪمل آهن ۽ اپيلون رد ٿي چڪيون آهن جن کي ڦاهي تي لڙڪائڻ جو حڪم جاري ڪيو وڃي جنهن تي عدالت سموريون قانوني ڪارروايون مڪمل ٿيڻ تي 14 جنوري تي کين ڦاهي ڏيڻ جا حڪم جاري ڪيا آهن ياد رهي ته ٻئي دهشتگرد ننڪانه صاحب ۾ سک برادري جي گردواري تي حملي ۾ ملوث هئا.

 

پشاور اسڪول کي يونيورسٽي جو درجو ڏنو وڃي: سراج الحق

پشاور(م.ڊ) جماعت اسلامي جي امير سراج الحق چيو آهي ته مرڪزي سرڪار کي سمورين سياسي پارٽين امن قائم ڪرڻ لاءِ اعتماد ڏنو آهي هاڻ نواز شريف ۽ ان جي ٽيم جو امتحان آهي ته ڪهڙي طرح لائحه عمل بڻائين ٿا جڏهن ته حالتن جي تقاضه آهي ته قبائلي علائقن ۾ صلاحڪارن جي مشوري سان نظام ڏنو وڃي پشاور ۾  آرمي پبلڪ اسڪول جي سانحي ۾ شهيد ٿيندڙ پرنسپال طاهره قاضي جي تعزيت کانپوءِ ميڊيا سان ڳالهائي رهيو هو، جماعت اسلامي جي امير سراج الحق جو چوڻ هو ته قبائلي علائقن جا سٺا ۽ خراب اثر پشاور ۾ پيدا ٿيندڙ حالتن جي تقاضا آهي ته حڪومت قبائلي علائقن جي اهميت جو احساس ڪري ۽ قبائلي صلاحڪارن جي مشوري سان ان بي آئين سرزمين کي آئين ڏنو وڃي، 20 لک کان وڌيڪ آءِ ڊي پ يز آهن ۽ انهن جو ان حالت ۾ رهڻ پاڪستان سان زيادتي آهي، حڪومت انهن جي باعزت واپسي ۽ بحالي لاءِ فوري قدم کڻي سراج الحق جو چوڻ هو ته آرمي پبلڪ اسڪول سانحي کانپوءِ ڪجهه قوتون مسجدن ۽ مدرسن خلاف پروپئگنڊا ڪري رهيون آهن ديني مدرسن ۾ 21 لک ٻارڙا تعليم پرائي رهيا آهن انهن لاءِ رقم مقرر ناهي ڪئي وئي ديني مدرسن کي به نظام ڏنو وڃي هن جو چوڻ هو ته مرڪزي حڪومت کي امن قئام ڪرڻ لا ءِسمورين سياسي پارٽين مينڊيٽ ڏنو. هن آرمي پبلڪ اسڪول کي يونيورسٽي جو درجو ۽ سال 2015ع کان امن جو سال قرار ڏيڻ جو مطالبو ڪيو.

 

شهيد بينظير ڀٽو قتل ڪيس فوجي عدالتن ۾ منتقل ڪرڻ جو فيصلو حڪومت ڪندي: رحمان ملڪ

اسلام آباد(بيورو) اڳوڻي وفاقي گهرو وزير رحمان ملڪ، چيف جسٽس کي شهيد بينظير ڀٽو  قتل ڪيس روزاني بنيادن تي هلائڻ جي اپيل ڪري ڇڏي آهي، رحمان ملڪ چيو آهي ته شهيد بينظير ڀٽو قتل ڪيس فوجي عدالتون منتقل ڪرڻ ڪرڻ جو فيصلو حڪومت ڪندي. اسلام آباد ۾ ميڊيا سان ڳالهائيندي رحمان ملڪ چيو ته فوجي عدالتون قائم ڪرڻ ڏکيو فيصلو هو پر موجوده صورتحال ۾ اهڙي عدالتن کانسواءِ ٻيو ڪو به رستو ناهي. هن چيو ته هن وقت خيبرپختونخواهه جنگ واري صورتحال۾ آهي، دهشتگردن جي خاتمي لاءِ سڀئي پارٽيون متحد آهن، آخري دهشتگرد جي خاتمي تائين ڪارروائي جاري رهڻ گهرجي. رحمان ملڪ چيو ته پشاور اسڪول حملي ۾ شهيد ٿيل ٻارڙن کي اعليٰ اعزاز سان نوازيو وڃي. هڪ سوال جي جواب ۾ رحمان ملڪ چيو ته دهشتگردن جو ٽرائل تڪڙي بنيادن تي اڪلائڻ سٺو عمل آهي، چيف جسٽس کي اپيل آهي ته شهيد بينظير ڀٽو قتل ڪيس جي به روزاني بنيادن تي ٻڌڻي ڪئي وڃي. رحمان ملڪ وڌيڪ چيو ته شهيد بينظير ڀٽو قتل ڪيس فوجي عدالتن ۾ منتقل ڪرڻ جو فيصلو حڪومت ڪندي.