تازيون خبرون

Daily Archives: December 26, 2014

انتهاپسندن ۽ دهشتگردن کي ملڪ ۾ پنهنجي ايجنڊا لاڳو ڪرڻ نه ڏينداسين : پرويز رشيد

اسلام آباد (بيورو) اطلاعات واري وفاقي وزير پرويز رشيد چيو آهي ته دهشتگردن کي ملڪ ۾ پنهنجي ايجنڊا لاڳو ڪرڻ نه ڏينداسين ۽ اُهو حق به ڪنهن کي نٿو ڏئي سگهجي ته اُهو بندوق ذريعي اسان کي پنهنجي رستي تي هلائڻ لاءِ مجبور ڪري. اسلام آباد ۾ پشاور سانحي جي شهيد جي ياد ۾ تقريب کي خطاب ڪندي سينيٽر پرويز رشيد چيو ته ملڪ ۾ ڪهڙو نظام لاڳو ٿيندو اُن جو فيصلو ڪرڻ جو حق رڳو عوام ۽ چونڊيل پارليامينٽ کي آهي، اسان ملڪ ۾ ڪنهن به هٿياربند لشڪر جوڙڻ جي اجازت نه ڏينداين ۽ نه ئي ڪنهن کي اُن ڳالهه جي اجازت هوندي ته اُهو اسان کي زندگي گذارڻ جو طريقيڪار سيکاري. هن چيو ته دهشتگردن عبادتگاهن، اسپتال ۽ تعليمي ادارن کي نشانو بڻايو جڏهن ته پشاور سانحي جو ڏک ايندڙ نسل به محسوس ڪندا. پرويز رشيد چيو ته انتهاپسند ۽ دهشتگرد کي پنهنجي ايجنڊا لاڳو ڪرڻ نه ڏينداسين، ڪنهن کي اُهو حق نٿو ڏئي سگهجي ته اهو بندوق ذريعي اسان کي پنهنجي رستي تي هلائڻ لاءِ مجبور ڪري. هن چيو ته قومن فائدو نقصان اجتماعي هوندو آهي، اسان کي غلطين کان سکي پنهنجي اصلاح ڪرڻي پوندي.

 

قيدي جيلن ۾ رهي حڪم هلائن ٿا، عدالتون تڪڙا فيصلا ڪن : وڏو وزير

لاڙڪاڻو(بيورو) سنڌ جو وڏو وزير سيد قائم علي شاهه 27 ڊسمبر تي شهيد محترمه بينظير ڀٽو جي ستين ورسيءَ جي سلسلي ۾ ڪيل انتظامن جو جائزو وٺڻ لاءِ ڳڙهي خدا بخش ڀٽو پهتو، جتي هن شهيد محترمه بينظير ڀٽو جي مزار آڏو ٿيندڙ جلسي جو جائزو ورتو ۽ اڳ ٺهيل اسٽيج جو معائنو ڪيو. جڏهن ته شهيد ذوالفقار علي ڀٽو ۽ شهيد بينظير جي مزارن تي حاضري ڀري. ان موقعي تي هن صحافين سان ڳالهائيندي چيوته بلاول ڀٽو زرداري ۽ آصف علي زداري ۾ ڪي به اختلاف نه آهن. هن چيوته بلاول ڀٽو ۽ آصف زرداري شهيد بينظير ڀٽو جي ستين ورسيءَ ۾ شرڪت ڪندا. هڪ سوال جي جواب ۾ هن چيوته امين فهيم جا پارٽي سان ڪيبه اختلاف نه آهن، وڏين پارٽين ۾ ننڍيون وڏيون ڳالهيون ٿينديون رهنديون آهن. هن چيوته پ پ پ جا جيڪي مخالف آهن اهي رڳو پارٽي خلاف واويلا ڪري رهيا آهن پر اهڙن هٿ ڪنڊن مان انهن کي ڪجھه به نه ورندو. جڏهن ته محترمه جي ورسيءَ تي سڪيورٽي جا خدشا آهن تنهن باوجود به جيالا ملڪ جي ڪنڊ ڪڙڇ مان اچي شهيدن جي مزارن تي حاضري ڀري ورسيءَ جي تقريب ۾ شرڪت ڪندا. عدالتون ڀلي ڪهڙيون به هجن پر ڪيس جا فيصلا تڪڙا ڪيا وڃن. قيدي جيڪي جيلن ۾ رهي حڪم هلائن ٿا ۽ انسانيت جا دشمن آهن کين سزائون ملڻ گهرجن. جڏهن ته جلسي ۾ پ پ پ جا مرڪزي اڳواڻ پڻ شرڪت ڪندا ۽ مزار آڏو ايندڙ عوام لاءِ ڪيمپون پڻ لڳايون ويون آهن جن کي انهن اندر ترسايو ويندو. جڏهن ته مزار تي صحت کاتي پاران ميڊيڪل ڪيمپون پڻ قائم ڪيون ويون آهن. جڏهن ته وڏي وزير سيد قائم علي شاهه ورسيءَ جي تيارين کي آخري شڪل ڏيڻ لاءِ ضلعي انتظاميا سان اجلاس پڻ ڪيو. ان موقعي تي ساڻس سنڌ اسيمبلي اسپيڪر آغا سراج دراني، ايم اين اي محمد اياز سومرو، پ پ پ ضلعي اطلاعات سيڪريٽري سليم سومرو،  خير محمد شيخ ۽ وڏي تعداد ۾ پ پ پ اڳواڻ پڻ گڏ هئا. جڏهن ته شهيد محترمه بينظير ڀٽو جي ورسي تي ڪلچر ونگ پاران شاعري، مقالا پڻ پڙهيا ويندا.

 

زيارت ريزيڊينسي ۾ صدر قومي جهنڊو ڦڙڪايو، پشاور سانحي قوم جي روح تي گهرو زخم رسايو آهي: ممنون حسين

زيارت(م.د) صدر ممنون حسين جو چوڻ آهي ته پشاور سانحي قوم جي روح تي گهرو زخم رسايو آهي قوم جي گڏيل دشمنن خلاف گڏجي وڙهڻو پوندو زيارت ۾ قائد اعظم ريزيڊينسي جي تقريب کي خطاب ڪندي صدر ممنون حسين جو چوڻ هو ته دهشتگردي ملڪ کي وڏو نقصان پهچايو هاڻ ان جي ازالي جو وقت آهي، قوم دهشتگردن کي شڪست ڏيئ پاڪستان کي پرامن ملڪ بڻائي ڇڏيندي، پاڪ فوج جا آفيسر ۽ جوان وڏيون قربانيون ڏئي رهي آهن انهن جي عزم ۽ حوصلن تي قوم کي فخر آهي، ڏک جي گهڙي گذري ويندي، زنده قومون پنهنجو حوصلو برقرار رکنديون آهن، قوم اتحاد جو مظاهرو ڪري دشمن تي ثابت ڪري ڇڏيو ته هو ڪنهن کان به نه ٿي ڊڄي، فوج سان هر جاءِ تي ساٿ ڏنو ويندو ته جيئن دهشتگردن کي ختم ڪري سگهجي صدر ممنون حسين وڌيڪ چيو ته دهشتگردن زيارت ريزيڊينسي کي تباهه ڪرڻ جي ڪوشش ڪئي پر قائد اعظم جي تعليم جي روشني ۾ اسان ترقي ڪري سگهون ٿا، بلوچستان حڪومت زيارت ريزيڊينسي کي ان جي اصل حيثيت ۾ بحال ڪيو. صدر پاڪستان ممنون حسين بلوچستان جي ضلع زيارت پهچي ويو اتي هن قائد اعظم جي رهائشگاهه جو دورو ڪيو ۽ قومي جهنڊو به ڦڙڪايو، صدر هينئر بلوچستان جي ٽن ڏينهن واري دوري تي آهي، پنهنجي دوري جي ٻئين ڏينهن هو اڄ زيارت پهتو ان موقعي  تي گورنر بلوچستان محمد خان اچڪزئي ۽ ڪمانڊر سدرن ڪمانڊ ليفٽيننٽ جنرل ناصر جنجوعه ۽ ٻيا عملدار به موجود هئا، جڏهن ته تقريب ۾ زيارت جي قبائلي سردارن به شرڪت ڪئي، صدر ريزيڊينسي جي مختلف حصن جو دورو ڪيو 7 اتي رکيل قائد اعظم جي استعمال هيٺ ايندڙ شيون به ڏٺيون زيارت ۾ قائد اعظم ريزيڊينسي ۾ شرڪت جي موقعي تي سيڪيورٽي جا سخت انتظام ڪيا ويا هئا جڏهن ته شهر جي مختلف حصن ۽  رستن تي صدر جي زيارت اچڻ جي حوالي سان استقباليه بينر لڳايا ويا.

 

وزيراعظم نواز شريف جي سالگرهه جي موقعي تي ڀارتي هم منصب پاران نيڪ خواهشن جو اظهار

نئين دهلي(م.ڊ) وزيراعظم نواز شريف جي 65 هين سالگرهه جي موقعي تي ڀارتي هم منصب نريندر مودي ان کي مبارڪباد پيش ڪئي آهي ڀارتي وزيراعظم نريندر مودي پنهنجي پيغام ۾ وزيراعظم نواز شريف جي سالگرهه جي موقعي تي نيڪ خواهشن جو اظهار ڪيو ۽ ان کي مبارڪباد پيش ڪئي نريندر مودي چيو ته وزيراعظم نواز شريف جي سٺي صحت جي دعا ڪريان ٿو، ياد رهي ته وزيراعظم نواز شريف ۽ ڀارتي هم منصب نريندر مودي وچ ۾ تحفن سان شروع ٿيندڙ لاڳاپا هاڻ به نيڪ خواهشن ۽ نيڪ اميدن تائين برقرار آهن.

 

بلاول ڀٽو کي ڊاڪٽرن سفر ڪرڻ کان منع ڪيو آهي، پ پ ڪڏهن به فوج خلاف ناهي رهي: شرجيل ميمڻ

ڪراچي: (اسٽاف رپورٽر) سنڌ جي اطلاعات ۽ بلديات واري صوبائي وزير شرجيل انعام ميمڻ چيو آهي ته ڪراچي جي شهرين کي جناح برج کان قائدا آباد تائين ايليويٽر برج جو جلد تحفو ڏئي رهيا آهيون. ڪراچي کي روشنين ۽ خوبصورتي جو شهر بڻائڻ جو عزم ڪيو آهي ۽ ان سلسلي جي ڪڙي جي طور تي ڪراچي ۾ خوبصورت پارڪ بڻايا پيا وڃن. نيشنل هائي وي کان سپر هائي وي ڊبل ڪيريج وي تعمير ڪيو پيو وڃي. پيپلز پارٽي ڪڏهن به فوج جي خلاف ناهي رهي پر اسان هميشه آمريت جي مخالفت ڪئي آهي. ملٽري ڪورٽس بڻائڻ جو فيصلو مشڪل هو پر ان هوندي به عوام جي جان ۽ مال جي حفاظت ۽ سانحي پشاور جهڙي عالمي سانحي کان پوءِ سمورين عوامي جماعتن جي فيصلي تي اسان انهن سان گڏ آهيون. مخدوم امين فهيم پاڪستان پيپلز پارٽي پارليامينٽرين جو صدر آهي ۽ خود پاڻ ان ڳالهه جي وضاحت ڪري چڪو آهي ته هو پيپلز پارٽي نٿو ڇڏي. اهڙن خيالن جو اظهار هن ڪي ايم سي جي شعبي پارڪس جي تحت ڪلفٽن ۾ سوا چار ايڪڙن تي تقريبن چار ڪروڙ روپين جي لاڳت سان ڇهن مهينن اندر تيار ٿيل خوبصورت ”شهيد هوش محمدپارڪ” جي افتتاح کان پوءِ خطاب ۽ صحافين جي سوالن جا جواب ڏيندي ڪيو. ان موقعي تي ايڊمنسٽريٽر ڪراچي رئوف اختر فاروقي، ڊِي جي پارڪس نياز احمد سومرو ۽ ٻيا به موجود هئا. وزير اطلاعات سنڌ پارڪ جي تختي جي نقاب ڪشائي ڪري باقائده افتتاح ڪيو ۽ پوري پارڪ جو چڪر لڳائي پارڪ جي تعمير ۽ ان ۾ عوام کي ڏنل سهولتن بابت آگاهي حاصل ڪئي ان موقعي تي خطاب ڪندي شرجيل انعام ميمڻ چيو ته پيپلز پارٽي جي 6 سالن واري دور ۾ ڪراچي کي روشنين ۽ خوبصورتي جو شهر بڻائڻ جو جيڪو عزم ۽ عوام سان واعدو ڪيو ويو آهي اسان ان کي پورو ڪرڻ ۾ مصروف آهيون. هن چيو ته هڪ پاسي عوام کي صحت افزا ۽ پرسڪون تفريح گاهن کي بهتر کان بهتر بڻايو پيو وڃي ۽ ٻئي پاسي سنڌ حڪومت ڪراچي ۾ ٽريفڪ جي دٻاءَ باوجود عوام جي مشڪيلن جي ازالي لاءِ پر عزم آهي ۽ ڪراچي جي شهرين کي جناح برج کان قاعده آباد تائين ايليويٽر برج جي منصوبي جو چند ڏينهن اندر آغاز ڪيو ويندو ۽ اها برج ايندڙ ٻن کان اڌائي سالن ۾ مڪمل ڪئي ويندي. ان کان علاوه نيشنل هائي وي کان سپر هائي وي تائين ڊبل ڪيريج وي تعمير ڪيو پيو وڃي هن چيو ته ملير تعمير ٿيندڙ ٻه پل به 2 کان 3 مهينن اندر مڪمل ٿي ويندا. ان سڀني کان پوءِ جتي ڪراچي ۾ ٽريفڪ جو مسئلو حل ڪرڻ ۾ مدد ملندي اتي عوامي جو قيمتي وقت ۽ فيول کي بچائي سگھبو. هن چيو ته اسان عزم ڪيو آهي ته اسان ڪراچي کي اهڙو ميگا سٽي بڻائي دم کڻنداسين جو ان جو مقابلو دنيا جي ڪنهن به ترقي يافته ملڪ جي شهر سان ڪري سگھبو. هن چيو ته ڄاڻايل پارڪ واري زمين فالتو سامان ۽ اسٽور طور استعمال ڪيو پئي ويو پر اسان اڄ ان زمين کي خوبصورت پارڪ جي ذريعي عوامي تفريح گاهه ۾ تبديل ڪري ڇڏيو آهي ۽ اهڙي قسم جا ٻيا پارڪس ڪراچي ۾ تعمير ڪيا ويندا. ان موقعي تي صحافين پاران ملٽري ڪورٽس جي قيام ۽ ان ۾ پيپلز پارٽي جي رضامندي جي سوال جي جواب ۾ شرجيل انعام ميمڻ چيو ته پيپلز پارٽي ڪڏهن به پاڪ فوج جي مخالف ناهي رهي پر اسان هميشه آمريت جي مخالف ۽ ان جو مقابلو ڪيو آهي. هن چيو ته پشاور سانحو هڪ افسوسناڪ عالمي سانحو هو ۽ ان ۾ معصوم ٻارن کي دهشتگردي جو نشانو بڻايو ويو هو ۽ اهو سانحو دنيا جي تاريخ جو سڀ کان دردناڪ سانحو آهي. هن چيو ته ان سانحي کان پوءِ تمام عوامي قوتن کي انهن دهشتگردن کي منهن ڏيڻ لاءِ سخت فيصلا ڪرڻا هئا ۽ ملٽري ڪورٽس جي قيام جو فيصلو پيپلز پارٽي لاءِ هڪ مشڪل فيصلو هو ان هوندي به ملڪي حالتن ۽ دهشتگردي کي ڏسندي ۽ خاص ڪري ڪراچي ۾ آپريشن کان پوءِ 5 دهشتگردي ٽوڙ عدالتن جي قيام جي باوجود 12 هزار کان وڌيڪ دهشتگردن جي گرفتاري جي باجود ان عدالتن جي سستي جي بعد ان مشڪل فيصلي کي ڪرڻ ضروري هو. هن چيو ته عوام جي جان ۽ مال جي حفاظت جي لاءِ اڪثر ڪري مشڪل کان مشڪل فيصلو ڪرڻو پوندو آهي ۽ ملٽري ڪورٽس واري فيصلي جي سموري عوامي قوتن حمايت ڪئي آهي. ڪراچي ۾ ناجائز قبضن ۽ خاص ڪري پارڪس ۽ عام ڀلائي واري پلاٽن تي قبضي وري سوال جي جواب ۾ هن چيو ته گذريل ڇهن سالن جي دوران سرڪار زمينن تي ايترا قبضا ناهين ٿيا جيترا ماضي ۾ ٿيا ۽ انهن قبضن جي خاتمي لاءِ سنڌ حڪومت ۽ بلديات کاتي جو اينٽي انڪروچمينٽ يونٽ ڏينهن رات ڪم ڪري رهيو آهي. هن چيو ته بلديات کاتي ۾ اسان کي جتي انهن قبضن جي خاتمي ۾ مشڪليون پيش اچي رهيون آهن اتي پوليس ۽ رينجرز جي مدد به گھربل آهي ۽ ان سلسلي ۾ به انهن کان مدد ورتي پئي وڃي ۽ جلد ئي اسان سڀني قبضن جو خاتمو ڪنداسين. هن چيو ته شهر ۾ صفائي سٿرائي به هڪ وڏو مسئلو آهي ۽ ان سلسلي ۾ به صوبي جي سمورن ايڊمنسٽريٽرز، ميونسپل ڪمشنرز ۽ ٽي ايم اوز کي اهي هدايتون جاري ڪيون ويون آهن ته هو عوامي مسئلن جي حل لاءِ هر سومر ڏينهن ٽي ڪلاڪ عوامي کلي ڪچهري جو انتظام ڪن ۽ اتي عوامي مسئلن کي حل ڪن. هن چيو ته اسان کي بلديات ۾ واٽر بورڊ ۽ ڪي ايم سي ۾ وڏي انگ ۾ گهوسٽ ملازمن کي به منهن ڏيڻو پئجي رهيو آهي. هاڻ تائين واٽر بورڊ ۾ 2 هزار کان وڌيڪ گھوسٽ ملازمن جي اسڪروٽني ڪئي وئي آهي. جڏهن ته ڪي ايم سي ۾ به وڏي انگ ۾ گھوسٽ ملازمن خلاف ڪريڪ ڊائون ڪيو پيو وڃي. هڪ سوال جي جواب ۾ شرجيل انعام ميمڻ چيو ته اسان ماضي جي حڪومت جي ناڪامين ۽ ڪوتاهين جو خاتمو ڪري عوام کي وڌ ۾ وڌ سهولتون فراهم ڪرڻ جون ڪوشش ڪري رهيا آهيون ۽ جلد ئي ڪراچي جي شهرين وڌيڪ نوان نوان ميگا پروجيڪٽ جا تحفا ڏنا ويندا.

 

باباءِ قوم جي 138 هين سالگرهه وڏي جوش ۽ جذبي سان ملهائي وئي

ڪراچي (اسٽاف رپورٽر) باباءِ قوم قائد اعظم محمد علي جناح جي پيدائش وارو ڏينهن اڄ ملهايو پيو ويو ان موقعي تي پوري ملڪ ۾ تقريبون منعقد ڪيون ويون برصغير جي مسلمانن کي پاڪستان جي صورت ۾ هڪ آزاد وطن ڏيندڙ ۽ اقبال جي خوابن جي تعبير لاءِ ڏينهن رات هڪ ڪندڙ پاڪستان جي باني قائد اعظم محمد علي جناح جي سالگرهه ملهائي وئي، 25 ڊسمبر 1876 تي ڪراچي جي وزير مينشن ۾ محمد علي جناح اک کولي ته ڪنهن کي خبر هئي ته هي عظيم انسان اڳتي هلي ننڍي کنڊ جي مسلمانن جو ٻيڙو پار ڪرائڻ لاءِ ڀرپور ڪردار ادا ڪندو، 1896ع ۾ قائد اعظممحمد علي جناح سياسي زندگي جي شروعات ڪندي انڊين نيشنل ڪانگريس ۾ باقاعده شموليت اختيار ڪئي پر ڪجهه عرصي کانپوءِ ان کي احساس ٿيو ته ڪانگريس صرف هندن جي پارٽي آهي جتي مسلمانن کي سٺو سلوڪ نه پيو رکيو وڃي ان ڪري 1913ع ۾ هن مسلمانن جي پارٽي واحد  پارٽي آل انڊيا مسلم ليگ ۾ شموليت اختيار ڪئي ۽ اتان کي الڳ وطن جي باقائده تحريڪ جي شروعات ڪري ڇڏي آخرڪار ان جي جدوجهد رنگ لاتو ۽ 14 آگسٽ 1947ع تي ننڍي کنڊ جي مسلمانن کي الڳ وطن جو خواب پورو ٿيو جنهن جو نالو پاڪستان رکيو ويو، آزادي کانپوءِ قائد اعظم جي طبيعت خراب ٿيڻ لڳي ۽ ڪيترين ئي بيمارين سان وڙهندي آخرڪار 11 سيپٽمبر 1948ع تي هي عظيم انسان هن دنيا مان هميشه لاءِ الوداع چئي ويو.

 

گورنر سنڌ ۽ نثار کهڙو جي مزارِ قائد تي حاضري، گلن جي چادر چاڙهي فاتحه پڙهي

ڪراچي (اسٽاف رپورٽر) ملڪ جي باني قائد اعظم محمد علي جناح جو 138 هون جنم ڏينهن ملهايو پيو وڃي، مزار تي گارڊز جي تبديلي ڪئي وئي ،سنڌ جي گورنر ڊاڪٽر عشرت العباد  خان  مزار قائد تي حاضري ڀرڻ بعد چيو آهي ته دهشتگردي خلاف جنگ قوم کي متحد ڪيو آهي ۽ فوج عوام جي مدد کانسواءِ ڪابه جنگ کٽي نٿي سگهي.گورنر عشرت العباد خان سينيئر صوبائي وزير نثار کهڙي  ۽ ٻين عملدارن سان گڏ قائد اعظم جي مزار تي حاضري ڀري گلن جي چادر چاڙهڻ بعد فاتح پڙهي.  مزار تي حاضري ڀرڻ بعد ميڊيا سان ڳالهائيندي گورنر عشرت العباد خان چيو ته ملڪ کي دهشتگردي کان پاڪ ڪرڻ جو عزم ڪيو آهي ۽ قائد اعظم جي اصولن تي هلي سمورن چئليجز کي منهن ڏئي سگهجي ٿو. هن چيو ته پاڪستان جي سرزمين کي دهشتگردي کان پاڪ بڻايو ويندو ۽ آخري دهشتگرد جي خاتمي تائين جنگ جاري رهڻ گهرجي.  هن چيو ته فوج  عوام جي مدد کانسواءِ ڪابه جنگ کٽي نٿي سگهي. هن چيو ته پشاور ۾ دهشتگردي جو بدترين واقعو پيش آيو ۽ دهشتگردي خلاف جنگ سموري قوم کي متحد ڪيو آهي. ان کان اڳ قائد اعظم جي مزار قائد تي گارڊز جي تبديلي واري تقريب ٿي، جنهن دوران پاڪستان ملٽري اڪيڊمي ڪاڪول جي ڪيڊٽس پاڪستان ايئر فورس جي جوانن کان ذميواريون ورتيون. گارڊز جي تبديلي واري تقريب دوران پاڪستان ملٽري اڪيڊمي ڪاڪول جو ڪمانڊنگ آفيسر ميجر جنرل نديم رضا مکيه مهمان هو.

 

دهشتگردي جي خاتمي لاءِ فوجي عدالتن کانسواءِ ٻيو ڪوبه رستو ناهي: سراج الحق

پشاور(م.ڊ) جماعت اسلامي جي امير سراج الحق چيو آهي ته دهشتگردي جي خاتمي لاءِ فوجي عدالتن کانسواءِ ٻيو ڪوبه رستو ناهي، پشاور ۾ ميڊيا سان ڳالهائيندي جماعت اسلامي جي امير جو چوڻ هو ته پشاور جي شهرين تمام گهڻيون قربانيون ڏنيون آهن هتي تابوتن ۽ ڪفن جو ڪاروبار عروج تي آهي پر پشاور سانحي پوري دني ۾ انسانيت کي ڏکارو ڪري ڇڏيو آهي شهيد ٻارڙن جي رت جي خوشبوءِ اڄ به محسوس ڪري رهيو آهيان اسڪول جي سانحي تي هر پاڪستاني پريشاني ۽ ڏکايل آهي، الله تعاليٰ سڀني کي اهڙي ڏينهن کان بچاءِ ان جي دعا آهي ته هي واقعو آخري هجي، هاڻ گڏجي هڪ اسلامي پاڪستان بڻائڻ جو وقت اچي ويو آهي ۽ انشاءَ الله 2015ع پاڪستان ۾ امن جو سال هوندو، سراج الحق وڌيڪ چيو ته فوجي عدالتون عبوري حل آهي جنهن ۾ جوابدارن کي صفائي جو پورو موقعو فراهم ڪيو ويندو فوجي عدالتون قائم ڪرڻ جو فيصلو انتهائي مجبوري ۾ ڪيو ويو آهي ملڪ جي سمورين پارٽين کي فوجي عدالتن تي خدشا هئا ان لاءِ انهن جو مدو 2 سال رکيو ويو آهي.

 

پي ٽي آءِ ۽ حڪومت ۾ سمورا معاملا طئي ٿي ويا ،حڪومت پاران ڌانڌلين جي جاچ لاءِ عدالتي ڪميشن جوڙڻ بابت جلد آريڊيننس جاري ڪرڻ جي خاطري

اسلام آباد (بيورو) پي ٽي آءِ ۽ حڪومت ۾ سمورا معاملا طئي ٿي ويا،حڪومت ڌانڌلين جي جاچ لاءِ عدالتي ڪميشن جوڙڻ بابت جلد آريڊيننس جاري ڪرڻ جي خاطري ڪرائي آهي، عارف علوي سمورا معاملا طئه ٿيڻ جي تصديق ڪندي چيو آهي ته فيصلن تي عملدرآمد بعد پارليامينٽ جي اجلاس ۾ شرڪت به ڪئي ويندي. ذريعن موجب ڌانڌلين جي جاچ لاءِ حڪومت ۽ تحريڪ انصاف وچ ۾عدالتي ڪميشن جي قيام ۽ ڳجهن ادارن جي شموليت سميت ٻين نقطن تي اتفاق ٿي ويو آهي،جڊيشل ڪميشن جي جوڙجڪ لاءِ جلد آريڊيننس جاري ڪيو ويندو. ذريعن موجب ڌانڌلين جي جاچ مڪمل ٿيڻ کانپوءِ حڪومت ۽ پي ٽي آءِ وچ ۾ ٿيل معاهدو عوام آڏو آندو ويندو. تحريڪ انصاف جي اڳواڻ عارف علوي سمورا معاملا طئه ٿيڻ جي تصديق ڪندي چيو ته حڪومت جڊيشل ڪميشن جي قيام تي راضي ٿي وئي آهي. اسلام آباد ۾ ميڊيا سان ڳالهائيندي عارف علوي چيو ته ڌانڌلين جي جاچ لاءِ عدالتي ڪميشن جوڙڻ بابت آرڊيننس ذريعي جاري ڪيو ويندو. عارف علوي جو وڌيڪ چوڻ هو ته حڪومت پاران سمورن فيصلن تي عملدرآمد بعد پي ٽي آءِ جا ميمبر پارليامينٽ جي اجلاس ۾ شرڪت به ڪندا.

 

ڪراچيءَ ۾ رينجرز سان مقابلي ۾ 7 دهشتگرد مارجي ويا، هٿيار هٿ

ڪراچي(م.ڊ) ڪراچي ۾ رينجرز هڪ ڪلاڪ دوران مختلف علائقن ۾ ڪارروائيندي ڪندي 7 دهشتگردن کي ماري ڇڏيو آهي. اطلاعن موجب رينجرز جنجال ڳوٺ ۾ 2 ۽ نادرن باءِ پاس وٽ مقابلي ۾ 3 دهشتگرد ماري ڇڏيا. اڄوڪي ڏينهن ۾ مارجي ويل دهشتگردن جو انگ 9 ٿي ويو آهي. اختيارين موجب ڪارروائيدهشتگردن جي موجودگي جي خفيه اطلاع تي ڪئي وئي جڏهن ته دهشتگرن وٽان وڏا هٿيار ۽ بارودي مواد به هٿ ڪيو ويو آهي.