تازيون خبرون

Daily Archives: December 24, 2014

پشاور،ڪوئيٽا ۽ واگها بارڊر سانحن ۾ ملوث جوابدارن کي معاف نه ڪرڻ جو اعلان

اسلام آباد(بيورو) وزيراعظم نواز شريف، پشاور،ڪوئيٽا ۽ واگها بارڊر سانحن ۾ ملوث جوابدارن کي معاف نه ڪرڻ جو اعلان ڪندي چيو آهي ته دهشتگردي ۽ ان جا بنيادي ڪارڻ ختم ڪري قوم جو بنا ڪنهن فرق جي تحفظ يقيني بڻايو ويندو. وزيراعظم نواز شريف جي صدارت هيٺ اسلام آباد ۾ قومي سلامتي ۽ پارلياماني لينڊرن جا الڳ الڳ اجلاس ٿيا، اجلاس دوران پاڪ فوج ۽ ڳجهن ادارن جي عملدارن قومي سلامتي بابت وزيراعظم کي بريفنگ ڏني. اجلاس ۾ وفاقي وزير، قانوني ماهر ۽ صلاحڪار ۽ پوليس ۽ ٻين قانون نافذ ڪندڙ ادارن جا اعليٰ عملدار شريڪ ٿيا، اجلاس دوران دهشتگردي ٽوڙ قانونن ۽ موجوده صورتحال کي منهن ڏيڻ جي حڪمت عملي تي مشاورت ڪئي وئي، ان کان علاوه دهشتگردي جي بنيادي سببن ۽ انهن کي منهن ڏيڻ بابت قانونسازي جي معاملن تي به غور ڪيو ويو، اجلاس دوران آءِ جي اسلام آباد وزيراعظم کي وفاقي گادي واري شهر جي اهم عمارتن جي سيڪيورٽي بابت بريفنگ ڏني ان کان علاوه ان کي لال مسجد جي صورتحال کان به آگاهه ڪيو ويو اجلاس کي خطاب ڪندي وزيراعظم نواز شريف واضح ڪيو ته پشاور، ڪوئيٽا ۽ واگها بارڊر سانحي ۾ ملوث جوابدارن کي ڪنهن به ريت نه ڇڏيو ويندو. وزيراعظم چيو ته دهشتگردن خلاف بنا فرق جي ڪارروائي ڪري، شرپسندي ۽ ان جي بنيادي ڪارڻن جو خاتمو ڪرڻو پوندو. سندس چوڻ هو ته مذهب، رنگ ۽ نسل جي فرق کي پاسيرو رکي سمورن شهرين جي حفاظت يقيني بڻائي ويندي. وزيراعظم نواز شريف چيو ته شهرين جي جان ۽ مال جي حفاظت سندن پهرين ترجيح آهي،عوام کي دهشتگردن جي رحم ۽ ڪرم تي نه ڇڏيو ويندو. وزيراعظم نواز شريف ان موقعي تي لاڳاپيل عملدارن کي انٽيليجنس ڄاڻ تي بنا دير عملدرآمد کي يقيني بڻائي وڃي. اجلاس کان اڳ وزيراعظم، ڦاهيءَ جي سزا تي عملدرآمد بابت قانوني ماهرن سان صلاحون پڻ ڪيون. وزيراعظم نواز شريف جي سربراهي ۾ ٿيل اهم اجلاس ۾ دهشتگردي جي خاتمي لاءِ ڪيسن جا تِکا فيصلا ۽ دهشتگردن کي تڪڙيون سزائون ڏيڻ لاءِ آئين ۾ ترميمون ڪرڻ جو اصولي فيصلو ڪيو ويو آهي جڏهن ته پوري ملڪ ۾ دهشتگردن جي ٺڪاڻن ۽ سندن همدردن جو مڪمل صفايو ڪيو ويندو، (اڄ) اربع ڏينهن پارلياماني ليڊرن جي اجلاس ۾ گهرو وزير جي سربراهي ۾ قائم ايڪشن پلان ڪميٽي جي تجويزن جي حتمي منظوري ڏني ويندي. تفصيل موجب وزيراعظم جي سربراهي ۾ ٿيل اجلاس ۾ آرمي چيف جنرل راحيل شريف، گهرو وزير چوڌري نثار علي خان، ناڻي وزير اسحاق ڊار، آءِ ايس آءِ ڊي جي ليفٽيننٽ جنرل رضوان اختر سميت اعليٰ سول ۽ فوجي حڪام شريڪ ٿيا. ذريعن موجب اجلاس ۾ گهرو وزير پارلياماني ايڪشن پلان ڪميٽي طرفان تيار ڪيل 7 1  تجويزن تي شريڪ ٿيلن کي بريفنگ ڏني ۽ ٻڌايو ته هيستائين 8  تجويزن تي مڪمل اتفاق راءِ ٿي ويو آهي ۽ باقي تجويزن تي ڪميٽي جي اجلاس ۾ اتفاق راءِ جو امڪان آهي. گهرو وزير ٻڌايو ته فوجي عدالتن جي قيام جي تجويز جي جماعت اسلامي مخالفت ڪئي آهي جڏهن ته ٻين پارٽين ان تجويز جي حمايت ڪندي چيو آهي ته آئين ۽ قانون ۾ جيڪڏهن ترميم ڪرڻي پئي ته تمام پارٽيون سينيٽ ۽ قومي اسيمبلي ۾ حمايت ڪنديون. هن ٻڌايو ته انهن تجويزن ۾ افغان مهاجرن جي تڪڙي واپسي، ڪرمينل جسٽس لا ۾ ضروري ترميمون، دهشتگردن جي مشهوري خلاف ميڊيا تي مڪمل پابندي لڳائڻ سميت ٻيون تجويزون شامل آهن. ذريعن موجب وزيراعظم اجلاس ۾ چيو ته دهشتگردي جي خاتمي لاءِ هر قسم جا قدم کنيا ويندا ۽ دهشتگردن جو مڪمل صفايو ڪيو ويندو. اجلاس ۾ آرمي چيف جنرل راحيل شريف دهشتگردن خلاف جاري ضرب عضب آپريشن جي تازي صورتحال تي بريفنگ ڏني

 

افغان آرمي چيف ۽ ايساف ڪمانڊر جي جنرل راحيل سان ملاقات، طالبان خلاف ڪارروائي تي اتفاق

راولپنڊي (بيورو) افغان آرمي چيف ۽ ايساف ڪمانڊر پاڪستان پهچڻ بعد آرمي چيف جنرل راحيل شريف سان ملاقات ڪئي آهي، آءِ ايس پي آر چيو آهي ته ٻنهي ڪمانڊرز پشاور سانحي تي افسوس جو اظهار ڪندي طالبان خلاف ڪارروائي  جي خاطري ڪرائي آهي. آءِ ايس پي آر موجب، افغان آرمي چيف جنرل شير محمد ڪريمي ۽ ايساف ڪمانڊر جون هيئل  پاڪستان پهچڻ بعد جي ايڇ ڪيو راولپنڊي جو دورو ڪيو. ايساف ڪمانڊر ۽ افغان فوج جي سربراهه شير محمد ڪريمي، آرمي چيف جنرل راحيل شريف سان ملاقات ڪئي، ملاقات دوران ٻنهي ڪمانڊرز پشاور سانحي تي افسوس جو اظهار  ڪيو. آءِ ايس پي آر موجب، ٻنهي ڪماندرز طالبان خلاف ڪارروائي جي خاطري ڪرائي آهي. ملاقات دوران ڳالهائيندي نيٽو ڪمانڊر چيو ته افغان آرمي ۽ اتحادي فوج آپريشن تيز ڪري ڇڏيو آهي، دهشتگردي جي خاتمي لاءِ پاڪستان سان هر ممڪن سهڪار ڪيو ويندو. ذريعن موجب، آرمي چيف جنرل راحيل شريف جو چوڻ هو ته افغان سرحد وٽ طالبان خلاف آپريشن ۾ سهڪار ڪيو ويندو،دهشتگردي خلاف انٽيليجنس شيئرنگ تيز ڪئي وڃي.

 

آرمي چيف جي وزيراعظم سان ملاقات، مادرِ وطن تي هڪ به دهشتگرد جو وجود برداشت ناهي: نواز شريف

اسلام آباد (بيورو) وزيراعظم نواز شريف چيو آهي ته مادرِ وطن تي هڪ به دهشتگرد جو وجود برداشت ناهي، دهشتگردي خلاف پوري قوم متحد آهي، بنا ڪنهن فرق جي ڪاروائي ڪري ملڪ مان دهشتگردن جو خاتمو يقيني بڻايو ويندو، دهشتگردن خلاف قدمن تي قومي اڳواڻن کي به اعتماد ۾ ورتو پيو وڃي. هو وزيراعظم هائوس ۾ آرمي چيف جنرل راحيل شريف سان ملاقات دوران ڳالهائي رهيو هو. ملاقات ۾ قومي سلامتي ۽ قومي ايڪشن پلان سميت ٻين اهم معاملن تي ويچاريو ويو. ملاقات ۾ آپريشن خيبر ون ۾ ٿيل پيشرفت تي به ڳالهايو ويو. آرمي چيف جنرل راحيل شريف آپريشن ۾ حاصل ڪيل هدفن جي حوالي سان وزيراعظم کي بريفنگ ڏني. وزيراعظم نواز شريف آرمي چيف جنرل راحيل شريف کي (اڄ) اربع ڏينهن ٿيندڙ ڪانفرنس کان آگاهه ڪيو. ذريعن موجب ملاقات ۾ دهشتگردي روڪٿام ورڪنگ گروپ جي سفارشن تي ويچاريو ويو، وزيراعظم سفارشن تي آرمي چيف کي اعتماد ۾ ورتو

 

صدر ممنون حسين سان چيف اليڪشن ڪمشنر سردار محمد رضا جي ملاقات

اسلام آباد (بيورو) صدر مملڪت ممنون حسين چيو آهي ته چونڊ سڌارا وقت جون اهم گهرجون آهن انهن تي سنجيدگي سان ڪم ٿيڻ گهرجي صدر اهڙن خيالن جو اظهار چيف اليڪشن ڪمشنر جسٽس (ر) سردار محمد رضا سان ڳالهائيندي ڪيو جنهن ايوان صدر ۾ اربع تي انهن سان ملاقات ڪئي صدر ممنون حسين چيو ته ان جون دعائون چيف اليڪشن ڪمشنر سان آهن ۽ ان جي دعا آهي ته ان جي دور ۾ ڪجهه اهڙو ڪم ڪيو وڃي جنهن سان قوم هڪ ڊگهي عرصي تائين فائدو وٺندي رهي صدر سنڌ ۽ پنجاب ۾ نيون تڪبنديون بروقت ۽ عوامي خواهشن مطابق ٿيڻ گهرجن چيف اليڪشن ڪمشنر جسٽس (ر) سردار محمد رضا صدر جا ٿورا مڃيندي چيو ته هو پنهنجي بهترين صلاحيتن مطابق پنهنجون ذميواريون نڀائيندو.

 

چوڌري نثار جي صدارت هيٺ نيشنل ايڪشن پلان ڪميٽي جو اجلاس دهشتگردي سميت ٻين معاملن تي غور

اسلام آباد (بيورو) دهشتگردي جي خاتمي لاءِ ڪونسل قائم ڪرڻ، دهشتگردي جي ڪيسن کي تڪڙي بنيادن تي اڪلائڻ، مدرسن جي نظام ۾ سڌارو آڻي مذهبي تنظيمن جي فنڊن جي آڊٽ سميت نيشنل ورڪنگ گروپ جون ٻيون اهم سفارشون منظوري لاءِ قومي ايڪشن پلان ڪميٽيءَ جي اجلاس ۾ پيش ڪيون ويون آهن. اسلام آباد ۾ وفاقي گهرو وزير چوڌري نثار جي صدارت هيٺ قومي ايڪشن پلان ڪميٽيءَ جو ٻيو اجلاس ٿيو، جنهن ۾ نيڪا جي ڪوآرڊينيٽر حامد خان ۽ پارلياماني ڪميٽي جي نمائندن شرڪت ڪئي. اجلاس ۾ دهشتگردي جي خاتمي لاءِ نيشنل ورڪنگ گروپ پاران جوڙيل 22 نقاطي سفارشون قومي ايڪشن پلان ڪميٽيءَ جي اجلاس ۾ پيش ڪيو ويون آهن. نيشنل ورڪنگ گروپ سفارش ڪئي آهي ته ڪرمنل جسٽس سسٽم تيز ۽ اثرائتو بڻايو وڃي،دهشتگردي وارن ڪيسز جي تڪڙي ٻڌڻي ڪري ڪيسز کي اڪلائڻ جو وقت مقرر ڪيو وڃي. ذريعن موجب، ڳجهي ڄاڻ جي مٽا سٽا لاءِ قانون لاڳو ڪندڙ ادارن ۾ فاصلو گهٽائڻ جو فيصلو ڪندي انٽيليجنس شيئرنگ جي نظام کي وڌيڪ مضبوط ۽ اثرائتو بڻائڻ جي سفارش ڪئي وئي آهي. نيشنل ورڪنگ گروپ اها به سفارش ڪئي آهي ته مدرسن جي سسٽم ۾  سڌارا  آڻي مذهبي تنظيم جي فنڊن جو آڊٽ ڪيو وڃي، ملڪ ۾ ڪم ڪندڙ سمورن ادارن ۽ تنظيم جي رجسٽريشن به ڪئي وڃي. دهشتگردي جي خاتمي لاءِ ڪونسل قائم ڪرڻ سميت 22 نقاطي سفارشون اڄ ئي اجلاس مان منظور ٿيڻ جو امڪان آهي، جنهن بعد سفارشون حتمي منظوري لاءِ وزيراعظم نواز شريف ڏانهن موڪليون وينديون.

 

پيپلز پارٽي پشاور سانحي تي پارليامينٽ جو گڏيل اجلاس گهرائڻ جو مطالبو ڪري ڇڏيو

اسلام آباد (بيورو) پيپلزپارٽي، پشاور سانحي تي پارليامينٽ جو گڏيل اجلاس گهرائڻ جو مطالبو ڪري ڇڏيو آهي، سينيٽ ۾ مخالف ڌر جي اڳواڻ اعتزاز احسن چيو آهي ته حڪومت مولانا عبدالعزيز خلاف ڪارروائي ڪئي ته مفلوج ٿي وئي هئي، جيڪڏهن تحريڪ طالبان جي همدرد خلاف ڪارروائي نٿي ڪري سگهجي ته پوءِ دهشتگردي خلاف جنگ ڪيئن کٽي ٿي سگهجي.؟ پارليامينٽ هائوس اسلام آباد ۾ سينيٽ جو اجلاس ڊپٽي چيئرمين صابر بلوچ جي صدارت هيٺ جاري آهي، جنهن ۾ ٻي ڏينهن به پشاور سانحي تي بحث ڪيو پيو وڃي. اجلاس کي خطاب ڪندي سينيٽ ۾ اپوزيشن ليڊر اعتزاز احسن چيو ته دهشتگرد ڪملو به پڙهن ٿا ۽ ٻارڙن کي به قتل ڪن ٿا، دهشتگرد اهڙي بدترين مخلوق آهن، جن جو انسانيت سان ڪو به واسطو ناهي. اعتزاز احسن چيو ته اسان جي ٻارڙن کي قلم ڏيڻ بدران بندوق ۽ آپگهاتي جيڪيٽ ڏنا ويا، بي بـَدڪ بدران بي  بندوق ۽ ٽي ٽوپي بدران ٽي ٽينڪ جو سبق پڙهايو پيو وڃي. هن چيو ته وفاقي گهرو وزير چوڌري نثار صحيح چوي ٿو ته 90 سيڪڙو مدرسن ۾ هٿياربند تربيت نه ٿي رهي آهي، مسئلو صرف ان 10 سيڪڙو مدرسن جو آهي، جتي هٿياربند تربيت ڏني پئي وڃي. اعتزاز احسن چيو ته دهشتگردي خلاف جنگ جنرل راحيل شريف ۽ ان جا فوجي وڙهي رهيا آهن، حڪومت سي ڊي اي جي مسجد ۾ ويٺل طالبان جي همدردي خلاف ڪارروائي ڪئي ته مفلوج جي ٿي وئي، جيڪا سرڪار مولانا عبدالعزيز خلاف ڪارروائي نٿي ڪري سگهي اها جنگ ڪيئن کٽيندي. هن چيو ته اسان ڪنهن مسجد کي ڪيرائڻ جي حق ۾ ناهيون،مسجد کي ڪيرايو نه پر آباد ڪيو ويندو آهي، هي وقت دهشتگردي خلاف ڪارروائي جو آهي پر حڪومتي ڪميٽيون ٺاهڻ ۾ پوري آهي. سينيٽ ۾ اپوزيشن ليڊر چيو ته پشاور ۾ اسڪول تي حملو ڪندڙ دهشتگرد افغانستان، منڊي بهاءُ الدين ۽ بهاولپور ۾ رابطو ڪندا رهيا پر لاڳاپيل اختيارين کي سـُـڌ نه پئي. اعتزاز احسن مطالبو ڪيو ته پشاور سانحي تي سينيٽ جو گڏيل اجلاس گهرائي ايوان ۽ قوم کي حقيقتن کان آگاهه ڪيو وڃي، جڏهن ته موجوده صورتحال تي وزيراعظم کي به قوم کي خطاب ڪرڻ گهرجي.

 

پاڪستان کي آءِ ايم ايف کان 1.05 ارب ڊالر ملي ويا

ڪراچي (اسٽاف رپورٽر) پاڪستان کي آءِ ايم ايف کان 1.05 ارب ڊالر ملي ويا آهن. اسٽيٽ بئنڪ آف پاڪستان ڄاڻايو آهي ته پاڪستان کي آءِ ايم ايف جي 3 سالا توسيعي فنڊ سهولت تحت 1.05 ارب ڊالر مليا آهن. آءِ ايم ايف اها رقم پاڪستان جي معاشي ڪارڪردگي جي چوٿين ۽ پنجين جائزي کان پوءِ جاري ڪئي آهي. جيڪو پٺئين هفتي مڪمل ڪيو ويو. جائزو مڪمل ٿيڻ جي نتيجي ۾ 720 ملين ايس ڊي آر (1.05 ارب) ڊالر جاري ڪيا ويا جنهن سان ڄاڻايل انتظام تحت فراهم ڪيل مجموعي رقم 2.2 ارب ايس ڊي آر (3.2 ارب) ڊالر ٿي وئي.

 

آصف علي زردري بلاول کي پرچائڻ جي مشن تي لنڊن پهچي ويو، بينظير ڀٽو جي ورسي ۾ شرڪت لاءِ راضي ڪندو

اسلام آباد (بيورو) آصف علي زرداري پنهنجي پٽ بلاول کي پرچائڻ لاءِ لنڊن پهتو پاڪستان واپس اچي 27 ڊسمبر بينظير ڀٽو جي ورزي ۾ شرڪت لاءِ راضي ڪندو خانگي ٽِي وي موجب اڳوڻي صدر زرداري جي ويجهن ذريعن ان ڳالهه جي تصديق ڪئي ته آصف علي زرداري پنهنجي پٽ کي پاڪستان واپس آڻڻ لاءِ لنڊن ويل آهي ذريعن سان ڳالهائيندي ٻڌايو ته 27 ڊسمبر تي به بلاول ڀٽو تقريب ۾ شرڪت ڪرڻ بدران لنڊن ۾ رهڻ کي ترجيحي ڏي ٿو ۽ هي پارٽي لاءِ نهايت شرمساري جو سبب هوندو ۽ اهو ئي سبب آهي جو زرداري سمورا اختلاف پاسي تي رکندي پٽ کي پرچائڻ لاءِ وڃڻ جو فيصلو ڪيو ان کان اڳ 30 نومبر تي لاهور ۾ منعقد يوم تاسيس جي تقريب جي موقعي تي بلاول جي غير موجودگي تي نوجوان اڳواڻ جي پنهنجي والد جي اختلافن جون خبرون چوٽ تي چڙهي ويون هيون ٻئي پاسي فرحت الله بابر پيءُ ۽ پٽ وچ ۾ اختلافن جي خبرن کي من گهڙت ڪوٺيندي چيو ته بلاول ۽ زرداري وچ ۾ اختلافن جي حوالي سان سموريون رپورٽون بي بنياد آهن.

 

پنجاب ۾ ايم ڪيو ايم جي اڳواڻن کي فوري طور تي سيڪيورٽي فراهم ڪئي وڃي: الطاف حسين

لنڊن (م.ڊ) متحده قومي موومينٽ جي اڳواڻ الطاف حسين پنجاب ۾ ايم ڪيو ايم جي اڳواڻن کي ملندڙ ڌمڪين تي سخت ڳڻتي جو اظهار ڪندي وزيراعظم نوازشريف وفاقي گهرو زوير چوڌري نثار علي خان چيف آر آرمي اسٽاف جنرل راحيل شريف ۽ آءِ ايس آءِ جي سربراهه جنرل رضوان اختر کان مطالبو ڪيو آهي ته پنجاب ۾ ايم ڪيو ايم جي اڳواڻن کي فوري طور سيڪيورٽي فراهم ڪئيوڃي پنهنجي هڪ بيان ۾ الطاف حسين چيو ته پنجاب ۾ ايم ڪيو ايم جي اڳواڻن کي ڳولي ڳولي ٽارگيٽ ڪلنگ جو نشانو بڻايو پيو وڃي گذريل ڇهن مهينن ۾ ايم ڪيو ايم ۽ پنجاب جا 3 اڳواڻ شهيد ٿي چڪا آهن 18 جون 2014 تي لاهور ۾ ايم ڪيو ايم جي قومي اسيمبلي ميمبر ۽ سينيئر اڳواڻ محترمه طاهره آصف کي دهشتگردن ٽارگيٽ ڪلنگ جو نشانو بڻائي شهيد ڪيو 9 ڊسمبر 2014 تي سيالڪوٽ جي نائب صدر ڀائو محمد انور کي دهشٽگردن شهيد ڪيو ۽ 18 ڊسمبر 2014 تي ايم ڪيو ايم چنيوٽ ڊسٽرڪٽ جي سينيئر نائب صدر اصغر عباس جعفري کي دهشتگردن ٽارگيٽ ڪلنگ جو نشآنو بڻائي شهيد ڪيو پر اڃا تائين پنجاب حڪومت ڪنهن هڪ شهيد اڳواڻ جي قاتل کي گرفتار ناهي ڪيو. الطاف حسين چيو ته گذريل هڪ هفتي کان ايم ڪيو ايم پنجاب جي صدر ۽ رابطا ڪميٽِ جي ميمبر ميان عطيق ايم ڪيو ايم خيبرپختونخواهه ۽ فاٽا جي صدر بئريسٽر محمد علي سيف ۽ پنجاب جي ٻين سينيئر اڳواڻن کي ڌمڪيون ڏنيون پيون وڃن ايم ڪيو ايم جي سينيئر اڳواڻن ۽ حق پرست قومي اسيمبلي ميمبرن ۽ سينيٽرن پنجاب حڪومت جي ڪابينه جي ميمبرن کان بار بار مطالبو ڪيو ته پنجاب ۾ ايم ڪيو ايم جي اڳواڻن کي سيڪيورٽي فراهم ڪئي وڃي پر واعدن جي باوجود پنجاب حڪومت ٽال مٽول کان ڪم وٺي رهي آهي ۽ حڪومت پنجاب اڃا تائين ايم ڪيو ايم جي اڳواڻن کي سيڪيورٽي فراهم نه ڪئي آهي.

 

دهشتگردن خلاف فيصلائتي ڪارروائي ڪئي ويندي: شهباز شريف

لاهور(م.ڊ) پنجاب جي وڏي وزير شهباز شريف چيو آهي ته شهيدن جون رت رائيگان نه ويندو ۽ دهشتگردن خلاف فيصلائتي ڪارروائي ٿيندي وزيراعليٰ هائوس لاهور ۾ ڊينمارڪ جي سفير جيسپر مولر سورنسن پنجاب جي وڏي وزير شهباز شريف سان ملاقات ڪئي، ملاقات دوران گڏيل دلچسپي جي معاملن، ٻه طرفي واپار ۽ سرمائيداري کي هٿي ڏيڻ بابت خيالن جي ڏي وٺ ڪئي وئي، ان موقعي تي ڊينمارڪ جي سفير پشاور سانحي جي سخت مذمت ۽ ان سانحي ۾ ٿيندڙ جاني نقصان تي تعزيت جو اظهار ڪيو ملاقات دوران شهباز شريف جو چوڻ هو ته پورو ملڪ پشاور جي اسڪول ۾ دهشتگردي سبب معصوم ٻارن جي شهادت تي ڏکايل آهي دهشتگردي خلاف فوج، پوليس ۽ شهرين قربانيون ڏنيون آهن انهن شهيدن جو رت رائيگان نه ويندو ۽ دهشتگردن خلاف فيصلائتي ڪارروائي ٿيندي.