تازيون خبرون

Daily Archives: December 22, 2014

وڌيڪ 4 دهشتگرد ڦاهي چڙهي ويا، قوم متحد ٿي چڪي آهي، دهشتگردن کان خوفزده نه ٿينداسين: نواز شريف

لاهور/فيصل آباد(م.ڊ) فيصل آباد ڊسٽرڪٽ جيل ۾ پرويز مشرف تي حملي ۾ ملوث 4 جوابدارن کي ڦاهي ڏني وئي آهي فيصل آباد ڊسٽرڪٽ جيل ۾ جن 4 دهشتگردن کي ڦاهي ڏني وئي انهن ۾ اخلاص احمد عرف روسي، غلام سرور، زبير احمد ۽ راشد محمود عرف ٽيپو شامل آهن چئن ئي جوابدارن کي اڳوڻي صدر پرويز مشرف تي حملي جي الزام ۾ ڦاهي جي سزا ڏني وئي هئي، ڊيٿ وارنٽ ملڻ کانپوءِ چئن ئي جوابدارن جي انهن جي وارثن سان ملاقات به ڪرائي وئي جنهن کانپوءِ انهن کي ڦاهي گهاٽ ڏانهن منتقل ڪيو ويو جتي ڊڪٽر انهن جو آخري ڀيرو معائنو ڪيو جنهن کانپوءِ انهن کي 3 لڳي 35 منٽن تي ڦاهي تي چاڙهيو ويو، ٻئي طرف جيل جي آس پاس سيڪيورٽي انتهائي سخت آهي ۽ جيل ويندڙ سمورن رستن تي هر قسم جي آمدرفت لاءِ مڪمل طور تي بند ڪيو ويو آهي، ڪجهه دير کانپوءِ دهشتگردن جون ميتون وارثن حوالي ڪيون وينديون، ياد رهي ته 2 ڏينهن پهريان به جي ايڇ ڪيو تي حملي جي جوابدار محمد عقيل عرف ڊاڪٽر عثمان ۽ اڳوڻي صدر پرويز مشرف تي حملي جي جوابدار ارشد محمود کي به فيصل آباد جيل ۾ ئي ڦاهي ڏني وئي هئي. ٻئي طرف وزيراعظم محمد نواز شريف چيو آهي ته پاڪستان ۾ امن قائم ڪرڻ لاءِ ڪثر نه ڇڏينداسين، پشاور سانحو وڏو امتحان آهي، قوم هن ڏک کي طاقت ۾ تبديل ڪري ثابت ڪري ڇڏيو آهي ته پاڪستان دهشتگردن جي بزدلاڻي ڪارروائي کان ڪڏهن به خوفزده نه ٿيندو، آپريشن ضرب عضب جا مثبت نتيجا نڪتا آهن، دهشتگردن کان پاڪ سرزمين کي صاف ڪنداسين، ان لاءِ پوري قوم پاڪ فوج سان گڏ آهي. اهڙين خيالن جو اظهار هن آچر تي جاتي امراه ۾ محمد شهباز شريف سان ملاقات دوران ڪيو. ان موقعي تي دهشتگردن کي ڦاهي تي چاڙهڻ جي فيصلي بعد سيڪيورٽي انتظامن سميت ملڪ جي جملي معاملن تي خيالن جي ڏي و ٺ ڪئي وئي، پنجاب جي وڏي وزير نواز شريف کي جيلن جي سيڪيورٽي جي حوالي سان به تفصيلي آگاهه ڪيو، وزيراعظم واضح ڪيو ته عوام جي جان ۽ مال جو تحفظ حڪومت جي پهرين ترجيح آهي جنهن ۾ ڪنهن به صورت ۾ ڪوتاهي نه ڪئي ويندي، هن چيو ته دهشتگردن لاءِ پاڪ سرزمين تي ڪائي پناهه نه آهي، آپريشن ضرب عضب جا مثبت نتيجا نڪتا آهن.

 

شرجيل ميمڻ ٽنڊو ڄام ۽ آسپاس ۾ 8 سولر آر او پلانٽس جو افتتاح ڪري ڇڏيو , پ پ حڪومت عوام کي پيش ايندڙ مسئلن جي پاڙ پٽي ڇڏيندي: شرجيل ميمڻ

حيدرآباد(بيورو ) بلديات ۽ اطلاعات واري صوبائي وزير شرجيل انعام ميمڻ چيو آهي ته پاڪستان پيپلز پارٽي صوبي جي عوام جي مثالي خدمت ڪري اهو ثابت ڪيو آهي ته پ پ پ ملڪ جي واحد جمهوري ۽ عوام دوست سياسي پارٽي آهي جنهن نه فقط عوام کي درپيش مسئلن جو جڙ کان خاتمو آندو آهي پر ملڪي معيشت کي مضبوط بڻائيندي ترقي جي هڪ نئين سفر جو آغاز پڻ ڪيو آهي. هن اهڙو اظهار پي ايس 50 جي مختلف علائقن ۾ ساڍا 9 ڪروڙ روپين جي لاڳت سان تعمير ڪيل 8 آر او پلانٽس جو افتتاح ڪرڻ جي موقعي تي ڳالهائيندي ڪيو. پنهنجي مختصر دوري دوران صوبائي وزير شرجيل انعام ميمڻ پي ايس50 جي يو سي هوسڙي جي ڳوٺ حرفيل پٽيل، يو سي ٽنڊو حيدر جي ڳوٺ صاحبڏنو هاليپوٽو، بهادر ڪورائي، يو سي سانوڻ خان گوپانگ جي ڳوٺ درياهه خان ناهيون، يو سي موسيٰ کٽياڻ جي ڳوٺ سيد خادم شاهه، يو سي مسو ڀرڳڙي جي ڳوٺ درياهه خان لغاري ۾ مختلف 8 آر او پلانٽس جو افتتاح ڪيو ۽ جاري ترقياتي منصوبن جو جائزو پڻ ورتو. شرجيل انعام ميمڻ وڌيڪ چيو ته سنڌ حڪومت حيدرآباد جي ٻهراڙي واري تعلقي کي ماڊل سٽي بڻائن لاءِ ڪيترائي ترقياتي منصوبا شروع ڪيا آهن جن جي مڪمل ٿيڻ سان هن تعلقي جي عوام جي معياري زندگي ۾ انقلابي تبديلي ايندي. هن وڌيڪ چيو ته آر او پلانٽ هن علائقي جي رهواسين جو پراڻو مطالبو هو جيڪو پ پ پ حڪومت پورو ڪيو آهي، جنهن جي نتيجي ۾ عوام کي پيئڻ جي صاف پاڻي جي سهولت ملندي. هن ٻڌايو ته تعلقي ٻهراڙي ۾ وڌيڪ 6 ڳوٺن ۾ 6 آراو پلانٽس جو افتتاح ايندڙ 15 ڏينهن ۾ ڪيو ويندو جن جو 90 سيڪڙو ڪم مڪمل ٿي چڪو آهي . ان موقعي تي صوبائي وزير کي بريفنگ ڏيندي ٻڌايو ويو ته تعلقي ٻهراڙي جي مختلف ڳوٺن ۾ هڪ ڪروڙ کان ڏيڍ ڪروڙ روپين جي ماليت جا 8 آر او پلانٽ تعمير ڪيا ويا جن جي مجموعي لاڳت ساڍا 9 ڪروڙ روپيا آهي جيڪي شمسي توانائي ذريعي ڪم ڪندا کيس ٻڌايو ويو ته ڄاڻايل آر او پلانٽ 2 مهينن جي مختصر عرصي ۾ مڪمل ڪيا ويا آهن جن ۾ 12 هزار کان 25 هزار گيلن صاف پاڻي جي روزاني بنياد تي گنجائش رکي وئي آهي، هلندڙ مهيني جي آخر ۾ وڌيڪ 6 ڳوٺن ۾ 6 سولر سسٽم آر او پلانٽ مڪمل ٿي ويندا بعد ۾ صوبائي وزير تعلقي جي مختلف علائقن ۾ جاري ترقياتي ڪمن جو جائزو ورتو ۽ عملدارن کي هدايت ڪئي ته اهي فوري طور ڪمن کي مڪمل ڪن ۽ ڪم جي معيار کي پڻ يقيني بڻايو وڃي. ان کان اڳ پنهنجي آمد وقت صوبائي وزير پي ايس 50 جي عوام سان ڌار ڌار ملاقاتون پڻ ڪيون ۽ انهن کان درپيش مسئلن جي ڄاڻ ورتي. صوبائي وزير عوام کي خاطري ڪرائي ته سندن مسئلا ترجيحي بنيادن تي حل ڪيا ويندا. ان موقعي تي پ پ پ اڳواڻ حاجي بدر ميمڻ، عبدالله شورو، وڏيرو ڪريم بخش جهيجو، سيد اڪرم شاهه، سيد شفقت شاهه، روشن شاهه، مولابخش مشوري، حاجي غلام النبي ڪوري ۽ ٻيا پڻ ساڻس گڏ هئا.ا

 

پاڪ فوج ڪڏهن به عورتن ۽ ٻارن کي نشانو نه بڻائيندي آهي: چوڌري نثار

اسلام آباد (بيورو) وفاقي گهرو وزير چوڌري نثار علي خان پريس ڪانفرنس ڪندي چيو آهي ته پاڪ فوج جمهوري حڪومت جي نمائندگي ڪندي آهي. پاڪ فوج ڪڏهن به عورتن ۽ ٻارن کي نشانو ناهي بڻايو ۽ نه ئي ڪڏهن بڻائيندي آهي. جيڪڏهن عورتن ۽ ٻارن کي نقصان پهچائڻو هجي ها ته دهشتگردن جا خاندا آرام سان نه رهندا هجن ها. پاڪستان اسامه بن لادن جي زال ۽ ٻارن کي به حفاظت سان پرڏيهه موڪلي ڇڏيو هو. چوڌري نثار علي خان چيو ته هيءَ سرحدن تي وڙهي ويندر جنگناهي  پر اسان جو دشمن اسان جي وچ ۾ موجود آهي جيڪو اسانجي ئي رنگ ۽ نسل سان تعلق رکي ٿو. پاڪستاني فوج هيءَ جنگ ڪيترن ئي سالن کان وڙهي رهي آهي پر هاڻي وقت اچي ويو آهي ته سڀني کي جنگ ۾ حصو وجهڻ گهرجي. قوم کي احساس هئڻ گهرجي ته اسين جنگ واري حالت ۾ آهيون. دهشتگردن جو مقابلو ڪرڻ لاءِ پاڪستان جي سيڪيورٽي هر شهري تي لاڳو ٿئي ٿي. سڀ کان وڏي انٽيليجنس عوام ئي هوندي آهي، عوام کي متحد ٿيڻ گهرجي. هن چيو ته مشڪوڪ ماڻهن جو اطلاع ڏيڻ لاءِ خاص نمبر جاري ڪري رهيا آهيون. ڪڏهن به ڪوبه مشڪوڪ شخص يا چيز نظر اچي ته شهري انهن نمبر تي ڪال ڪري سگهن ٿا. دهشتگردن جو اطلاع ڏيندڙ جو نالو راز ۾ رکيو ويندو. سمورن صوبائي آئي جيز کي هدايت جاري ڪئي وئي آهي ته ايس ايڇ او پنهنجي علائقي کان باخبر رهن ته جڏهن ته سمورن ڊي پي اوز کي پنهنجي پنهنجي علائقن ۾ سرچ آپريشن جي هدايت به جاري ڪئي وئي آهي. هن جو چوڻ هو ته پاڪستان جا نوي سيڪڙو مدرستا دهشتگردن سان لاڳاپيل ناهن پر دهشتگردن خلاف جنگ ۾ اسان سان گڏ آهن. ايئن نه چوڻ گهرجي ته مدرسن ۾ پڙهندڙ سمورا دهشتگرد آهن، پر جيڪو به پاڪستان خلاف دهشتگرد ڪارروائين ۾ ملوث آهن انهن خلاف سخت ايڪشن کنيو ويندو. اسان کي اميد آهي ته پاڪستان جي آزاد ميڊيا ان حوالي سان پنهنجي ذميواري جو احساس ڪندي. ميڊيا دهشتگردن جو بليڪ آئوٽ ڪري. هن ٻڌايو ته پارليماني ڪميٽي کي هڪ هفتي جو وقت ڏنو ويو آهي انهيءَ حوالي سان رات ڏينهن ڪم ڪري رهيا آهيون. سڀاڻي يا هڪ ٻن ڏينهن ۾ دهشتگردي خلاف سفارشون قوم آڏو رکنداسين. قوم پاڻ کي غيرمحفوظ نه سمجهي.

 

پاڪ فوج ۽ سيڪيورٽي ادارا دهشتگردي جي خاتمي لاءِ قدم کڻي رهيا آهن: خواجه آصف

اسلام آباد (بيورو) دفاع واري وزير خواجه محمد آصف چيو آهي ته پاڪ فوج ۽ سيڪيورٽي ادارا دهشتگردي جي انت لاءِ قدم کڻي رهيا آهن، سماج دشمن عنصرن جا ناپاڪ ارادا ناڪام بڻايا ويندا، دهشتگردن کي سهولتون ڏيندڙ ۽ پناهه ڏيندڙن خلاف به سخت ڪارروائي ڪئي ويندي، پاڪستان ۽ افغانستان ٻنهي کي دهشتگردي پاڙان ختم ڪرڻ لاءِ گڏجي ڪم ڪرڻ جي ضرورت آهي، عمران خان پاران ڌرڻو ختم ڪرڻ جو اعلان ملڪ جي فائدي ۾ آهي، هڪ انٽرويو ۾ خواجه آصف چيو ته سزا مليل دهشتگردن کي ڦاهي ڏيڻ جي عمل سان دهشتگردي جا وڌيڪ خدشا آهن، اسان جا سيڪيورٽي ادارا دهشتگردن جا منصوبا ناڪام بڻائڻ لاءِ خاص قدم کڻي رهيا آهن.

 

سڄي قوم دهشتگردن خلاف جنگ لاءِ تيار آهي: اياز صادق

پشاور(م.ڊ) قومي اسيمبلي جي اسپيڪر اياز صادق جو چوڻ آهي ته پشاور سانحي کانپوءِ پوري قوم دهشتگردي خلاف جنگ لاءِ تيار آهي معصوم ٻارڙن جو رت وهائيندڙ مسلمان ڪيئن ٿا ٿيسگهن، قومي اسيمبلي جي اسپيڪر اياز صادق پشاور جي ليڊي ريڊنگ اسپتال ۾ زخمي ٻارڙن جي عيادت جي موقعي تي ميڊيا سان ڳالهائيندي چيو ته آرمي پبلڪ اسڪول حملو پاڪستان جي تاريخ جو بدترين واقعو آهي جنهن کي نظرانداز نٿو ڪري سگهجي قومي اسيمبلي جي اسپيڪر جو چوڻ هو ته معصومن جو رت وهائيندڙ مسلمان چورائڻ جا حقدار ناهن پوري قوم انهن سان جنگ لاءِ تيار آهي پشاور سانحي جي جيتري مذمت ڪجي گهٽ آهي.

 

الطاف حسين پاران مولانا عبدالعزيز جي گرفتاري ۽ جامعه حفصه کي بند ڪرڻ جو مطالبو

لنڊن(م.ڊ) لال مسجد جي خطيب جو تڪرار پشاور سانحي کانپوءِ مذمت کان انڪار ڪرڻ کانپوءِ شروع ٿيو جنهن تي سول سوسائٽي مسجد ٻاهران احتجاج ڪيو ۽ الطاف حسين جامعه حفصه کي بند ڪرڻ جو مطالبو ڪيو لال مسجد جي خطيب مولان عبدالعزيز کان هڪ ٽي وي پروگرام ۾ جڏهن پشاور سانحي بابت تاثر پڇيا ويا ته هن جو چوڻ هو ته هو فقط ان واقعي جي مذمت نه ڪندو ان جي ان بيان تي سوشل ميڊيا ۽ ٻين گروهن سخت ڪاوڙ جو اظهار ڪيو، خميس جي رات ۽ جمعي تي سول سوسائٽيجي ميمبرن لال مسجد ٻاهران مظاهرو به ڪيو جمعي تي به لال مسجد ٻاهران اهلسنت والجماعت طرفان به مظاهرو ٿيو جنهن ۾ پشاور سانحي جي مذمت ۽ مولانا عبدالعزيز سان يڪجهتي جو اظهار ڪيو ويو الطاف حسين ڪراچي ۾ ڪارڪنن کي خطاب ڪندي مولانا عبدالعزيز جي رويي جي مذمت ڪندي ان کي گرفتار ڪرڻ ۽ لال مسجد سان لاڳاپيل مدرسي جامعه حفصه کي بند ڪرڻ جو مطالبو ڪيو.

 

پشاور حملي جو جهاد سان ڪو تعلق نه آهي، حملو زمين تي فساد آهي: مونالا فضل الرحمان

ڪراچي(اسٽاف رپورٽر) پشاور ۾ آرمي پبلڪ اسڪول تي حملو ۽ ٻارڙن جو موت ٻئي مذمت جوڳا آهن، حملي جو جهاد سان ڪو به تعلق نه آهي هي حملو فساد في العرض آهي، مقدس جنگ جهاد دوران به عورتن ۽ ٻارڙن ۽ بزرگن کي نقصان نه پهچائڻ جو درس ڏئي ٿي پر پشاور سانحي کي بنياد بڻائي ڪنهن هڪ مڪتب فقر يا مسجدن خلاف مهم شروع ڪرڻ مذمت جوڳو عمل آهي، مولانا عبدالعزيز جي خيالن ۽ ڳالهه ٻولهه سان اختلاف ڪري سگهجي ٿو پر ان کي بنياد بڻائي مسجدن، مدرسن ۽ عالمن خلاف مهم هلائڻ سراسر پشاور سانحي کانپوءِ پيدا ٿيندڙ قومي اتفاق راءِ کي ناڪام ڪرڻ جي ڪوشش آهي، الطاف جو بيان چڙ ڏياريندڙ ۽ افسوسناڪ آهي، الطاف حسين کي مسجد ساڙڻ جي بيان تي الله کان معافي وٺڻ گهرجي، سزائون لاڳو ڪرڻ ۾ ٻٽو معيار وڌيڪ ڏوهن جو سبب ٿيندو، سمورن ڏوهارين کي قانون مطابق سزا ڏني وڃي، عالم دهشتگردي خلاف اڳ به هئا ۽ هاڻ آهن، ماضي ۾ جهاد افغانستان ۽ ڪشمير ۾ حصو وٺڻ مذهبي جماعتن جو جرم آهي ته جرم سول ۽ فوجي حڪمرانن به ڪيو آهي، سڀني کي سزا ڏني وڃي، اهڙن خيالن جو اظهار هن گذريل ڏينهن مقامي هوٽل ۾ پريس ڪانفرنس ڪندي ڪيو، ان موقعي تي انصار العما جو اڳواڻ مولانا بدر منير، حافظ ادريس ۽ مولانا يار محمد به موجود هئا. مولانا فضل الرحمان خليل چيو ته پشاور سانحي جي جيتري به مذمت ڪئي وڃي اها گهٽ آهي ان حوالي جو ڪو جواز قابل قبول نه آهي، هن چيو ته اسڪول جي معصوم ٻارڙن کي قتل ڪرڻ هي جهاد نه پر فساد آهي، ڇو نه انهن ٻارڙن جو تعلق مسلمانن سان هجي يا غير مسلمانن سان هجي، اسلام انهن کي قتل ڪرڻ جي اجازت نٿو ڏئي.

 

دهشتگردن ۽ انهن جي پٺڀرائي ڪندڙن جو هر محاذ تي پيڇو ڪيو ويندو: رانا تنوير

مريد ڪي (م.ڊ) وفاقي وزير رانا تنوير حسين چيو آهي ته دهشتگردن ۽ انهن جي پٺڀرائي ڪندڙن جو هر محاذ تي پيڇو ڪيو ويندو، مولوي فضل الله کي حوالي ڪرڻ جي حوالي سان ۽ دهشتگردي ۾ افغان حڪومت سنجينده آهي، مولوي فضل الله گروپ کي نه ڇڏيو ويندو، مريد ڪي ۾ پنهنجي رهائشگاهه تي ميڊيا سان ڳالهائيندي هن چيو ته دنيا ڄاڻي ٿي ته دهشتگردي خلاف پاڪستان جيڪا قيمت چڪائي آهي ان جو تاريخ ۾ مثال نٿو ملي، هڪ سوال جي جواب ۾ هن چيو ته مولانا زڪي الرحمان جي رهائي عدالتن جو پنهنجو نظام آهي، ڀارت جي واوايلا پاڪستان جي اندروني معاملن ۾ مداخلت آهي جنهن کي برداشت نه ڪيو ويندو.

 

الطاف حسين کي ڌمڪيون، مولانا عبدالعزيز خلاف ڪيس داخل

ڪراچي(اسٽاف رپورٽر) الطاف حسين کي ڏنل مبينا ڌمڪي خلاف ڪراچي جي عزيزآباد ٿاڻي ۾ ايم ڪيو ايم طرفان ڪيس داخل ڪيو ويو آهي ڪيس ايم ڪيو ايم رابطه ڪميٽي جي ميمبر عارف خان ايڊووڪيٽ داخل ڪرايو ذريعن ٻڌايو آهي ته ڪيس ۾ مذهبي نفرت ڦهلائڻ، سائبر ڪرائيم ۽ دهشتگردي جا قلم شامل ڪيا آهن، ڪيس داخل ڪرائڻ جي موقعي تي ڊاڪٽر فاروق ستار، خالد مقبول صديقي، بابر غوري ۽ حيدر عباس رضوي سميت ايم ڪيو ايم جا ڪيترائي اڳواڻ عزيز آباد ٿاڻي ۾ موجود هئا ٻئي طرف ايم ڪيو ايم جي اعلامئي مطابق لال مسجد جي خطيب مولانا عبدالعزيز طرفان هڪ وڊيو پيغام ۾الطاف حسين کي ڌمڪي ڏني وئي آهي.

 

دهشتگردي ناسور بڻجي وئي آهي، مڙني سياسي جماعتن کي گڏ ٿيڻو پوندو: يوسف رضا گيلاني

پشاور (م.د) پاڪستان پيپلز پارٽي جي اڳواڻ ۽ اڳوڻي وزيراعظم يوسف رضا گيلاني چيو آهي ته دهشتگردي ناسو بڻجي چڪي آهي، دهشتگردن جا هٿ هاڻ قوم جي ڳچين تائين پهچي ويا آهن، پشاور سانحي تي سڄي قوم ڏکوئيل ۽ غمگين آهي، سمورا اختلاف وساري هاڻ سمورين سياسي قوتن کي گڏ ٿيڻو پوندو، پشاور دوري تي اڳوڻي وفاقي وزير ارباب عالمگير جي رهائشگاهه تي ميڊيا سان ڳالهائيندي يوسف رضا گيلاي چيو ته پشاور سانحو دل ڏکائيندڙ واقعو آهي جنهن سڄي قوم کي جهنجهوڙي ڇڏيو آهي، آرمي پبلڪ اسڪول جي پرنسپل کي اعليٰ سول اعزاز ملڻ گهرجي، سڀني سياسي قوتن کي هڪ ٿيڻو پوندو، افغانستان سان بهتر لاڳاپا قائم ٿيڻ تائين هن نوعيت جا واقعا ٿيندا رهندا، هن جو چوڻ هو ته دهشتگردي خلاف جنگ آمريڪا جي نه پر اسان جي پنهنجي آهي، دهشتگرد ٻين ملڪن جي جنگ وڙهي رهيا آهن.