تازيون خبرون

Daily Archives: December 18, 2014

وزيراعظم دهشتگردي وارن ڪيسن ۾ موت جي سزا تي لڳل پابندي ختم ڪري ڇڏي

اسلام آباد (بيورو) وزير اعظم ميان نواز شريف دهشتگردي وارن ڪيسن ۾ موت جي سزا تي لڳل پابندي ختم ڪري ڇڏي آهي، جنهن کانپوءِ دهشتگردي ايڪٽ تحت جن به جوابدارن کي موت جي سزا ملندي انهن تي اُها لاڳو هوندي. وزير اعظم ميان نواز شريف پشاور سانحي کانپوءِ دهشتگردي خلاف ويڙهه واري عزم کي ورجائيندي ملڪ اندر موت جي سزا تي لڳل پابندي ختم ڪري ڇڏي آهي. وزير اعظم پاران پابندي ختم ڪرڻ کانپوءِ انهي فيصلي تي 48 ڪلاڪن اندر عمل ڪيو ويندو. ملڪ ۾ دهشتگردي جي وڌندڙ خطرن کي منهن ڏيڻ لاءِ پشاور ۾ اي پي سي جي پهرين سيشن ۾ دهشتگردن خلاف ڀرپور ڪارروائي جاري رکڻ تي اتفاق ڪيو ويو آهي، وزير اعظم ميان نواز شريف چيو آهي ته دهشتگردي ٽوڙ عدالتن جي ڪارڪردگي تسلي بخش نه هجڻ سبب دهشتگرد سزائن کان بچي رهيا آهن. پشاور ۾ آل پارٽيز ڪانفرنس وزير اعظم جي صدارت هيٺ جاري آهي، جنهن جي پهرئين سيشن ۾ اتفاق ڪيو ويو آهي ته دهشتگردن خلاف ڀرپور ڪارروائي جاري رکي ويندي ۽ ان سلسلي ۾ پارليامينٽ ۾ هڪ گڏيل ٺهراءُ به پاس ڪيو ويندو. اي پي سي جي پهرئين سيشن ۾ پي ٽي آءِ جي سربراهه عمران خان پاران اها تجويز سامهون آئي آهي ته دهشتگردي جي خاتمي لاءِ ماهرن تي ٻڌل هڪ ڪميٽي ٺاهي ان کان تڪڙيون سفارشون طلب ڪيون وڃن، جڏهن ته چونڊيل نمائندن تي ٻڌل هڪ امن ڪميٽي به ٺاهي وڃي. اي پي سي ۾ تحريڪ انصاف جو سربراهه عمران خان، شاهه محمود قريشي، اپوزيشن ليڊر خورشيد شاهه، آفتاب شيرپائو، چوڌري نثار، پرويز خٽڪ ۽ ٻين پارٽين جي اڳواڻن ۽ وفاقي ڪابينا جي ميمبرن سميت ٻين شرڪت ڪئي. ان کان اڳ افتتاحي اجلاس کي خطاب ڪندي وزير اعظم ميان نواز شريف چيو ته ڪالهه جيڪا دهشتگردي ٿي ان جو نه رڳو ملڪ اندر پر سڄي دنيا ۾ ڪٿي به ڪو مثال نه ٿو ملي. نواز شريف جو چوڻ هو ته دهشتگردي خلاف جنگ ۾ پاڪستان ڳرو جاني ۽ مالي نقصان برداشت ڪيو آهي ۽ انهي مقصد لاءِ جيڪي قربانيون ڏنيون ويون آهن، اهي ڪنهن به صورت ۾ ضايع نه ٿينديون. وزير اعظم وڌيڪ چيو ته سڄي قوم خاص ڪري سياستدانن کي ڪالهه جيڪي منظر ڏسڻ لاءِ مليا آهن، اهي جيڪڏهن نه وساريا ويا ته پڪ سان تبديلي ايندي ۽ دهشتگردن جو مڪمل طور تي خاتمو اچي ويندو. هن چيو ته حڪومت جي قيام کانپوءِ هن ڊگهي مشاورت بعد طالبان سان ڳالهيون شروع ڪيون، جن جڏهن نتيجا نه ڏنا ته طالبان خلاف آپريشن شروع ڪيو ويو، جيڪو ڪاميابي سان جاري آهي ۽ ان جي پلاند ۾ دهشتگرد ملڪ اندر حملن مٿان حملا ڪري رهيا آهن. وزير اعظم چيو ته افغانستان جي صدر پاڪستان جي دوري وقت دهشتگردي خلاف جنگ ۾ دلچسپي ڏيکاري هئي ۽ رات به هن کيس فون ڪري پشاور سانحي تي افسوس جو اظهار ڪيو، جڏهن ته اڄ آرمي چيف افغانستان روانو ٿيو آهي، جتي هو اتان جي هم منصب ۽ افغانستان جي صدر سان به ملاقات ڪندو. وزير اعظم چيو ته هو ڪالهه به پشاور ۾ هو ۽ هتي جيڪي مسئلا ساڻس شيئر ڪيا ويا، انهن ۾ هڪ مسئلو اهو هو ته دهشتگردي ٽوڙ عدالتون دهشتگردن کي سخت سزائون نه ٿيون ڏين يا وري فون اچي وڃڻ جي صورت ۾ اهي ڪيس اڳتي ئي نه ٿا وڌن، تنهنڪري عدالتي نظام کي فعال بڻائي دهشتگردي جي ڪيسن۾ گهربلن کي سخت سزائون ڏيڻيون پونديون ته جيئن ٻين دهشتگردن جا حوصلا پست ٿين.

 

افغان سرڪار دهشتگردن جي ٺڪاڻن جي خاتمي لاءِ ڪارروايون ڪري: آرمي چيف

ڪابل (مانيٽرنگ ڊيسڪ) آرمي چيف جنرل راحيل شريف ڪابل ۾ افغان صدر ۽ ايساف ڪمانڊر سان ملاقات ڪئي، جنرل راحيل شريف افغان سر زمين تي دهشتگردن جا ٺڪاڻا ختم ڪرڻ جي اپيل ڪئي، افغان صدر دهشتگردي خلاف جنگ ۾ پاڪستان سان سهڪار ڪرڻ جي خاطري ڪرائي ڇڏي.آرمي چيف جنرل راحيل شريف ۽ ڊي جي آءِ ايس آءِ ليفٽيننٽ جنرل رضوان اختر هنگامي دوري تي افغانستان پهچي ويا. ڪابل ۾ آرمي چيف جنرل راحيل شريف افغان صدر اشرف غني ۽ ايساف ڪمانڊر سان ڌار ڌار ملاقاتون ڪيون، جنهن ۾ ڊي جي آءِ ايس آءِ ليفٽيننٽ جنرل رضوان اختر به موجود هو.افغان صدر ۽ آرمي چيف جنرل راحيل شريف وچ ۾ ملاقات دوران دهشتگردي خلاف اهم انٽيليجنس ڄاڻ جي مٽا سٽا ڪرڻ تي اتفاق ڪيو ويو.آرمي چيف جنرل راحيل شريف افغان سرڪار کي اپيل ڪئي ته افغانستان جي سر زمين تي دهشتگردن جي ٺڪاڻن جي خاتمي لاءِ ڪارروايون ڪيون وڃن. ٻئي جنرل افغانستان ۾ عسڪري قيادتن ۽ سياسي اڳواڻن سان ملاقاتون ڪندا، جڏهن ته آرمي چيف جي افغانستان جي صدر اشرف غني سان ملاقات به رٿيل آهي.ذريعن موجب عسڪري قيادت افغان اختيارين سان دهشتگردي خلاف ويڙهه کي وڌيڪ منظم ڪرڻ جي حوالي سان ڳالهيون ڪندي.وزير اعظم ميان نواز شريف پشاور واري اي پي سي کي ٻڌايو ته آرمي چيف صدر اشرف غني سان ملاقات ڪري دهشتگردي خلاف ويڙهه واري ميڪنزم کي حتمي شڪل ڏيڻ سميت گڏيل دلچسپي جي ٻين معاملن تي ساڻس ڳالهيون ڪندو.

 

پشاور سانحي جا وڌيڪ 5 زخمي فوت، 134 شاگردن سميت شهادتون ماڻيندڙن جو انگ 146 ٿي ويو

پشاور (بيورو) آرمي پبلڪ اسڪول پشاور تي ٿيل حملي جا 5 وڌيڪ زخمي فوت ٿي ويا آهن، جنهن کانپوءِ حملي ۾ شهادتون ماڻيندڙن جو انگ وڌي 146 ٿي ويو آهي، جنهن ۾ 134 شاگرد آهن. پشاور جي آرمي پبلڪ اسڪول تي گذريل ڏينهن دهشتگردن سفاڪاڻي ڪارروائي ڪري گُلن جهڙن ٻارڙن جون حياتيون وٺڻ لاءِ مٿن فائرنگ ڪئي ۽ ڌماڪا به ڪيا، جنهن ۾ گذريل ڏينهن تائين 132 شاگردن سميت 141 ڄڻا شهيد ٿيا هئا، جڏهن ته حملي ۾ 140 کان وڌيڪ ٻارڙا زخمي ٿيا، جن جو پشاور جي مختلف اسپتالن ۾ اعلاج جاري آهي. سي ايم ايڇ اسپتال پشاور ۾ داخل زخمين مان پنج ڄڻن اڄ شهادت جو جام نوش ڪيو، جن ۾ ٻه شاگرد ۽ ٽي اسٽاف جا ماڻهو شامل آهن. ٻن شاگردن ۽ اسٽاف جي ٽن ڄڻن جي شهيد ٿيڻ کانپوءِ پشاور سانحي جي شهيدن جو انگ وڌي 146 ٿي ويو آهي.

 

آمريڪي صدر براڪ اوبامه جو وزيراعظم سان ٽيليفون تي رابطو، پشاور واقعي تي ڏک جو اظهار

اسلام آباد (بيورو) امريڪي صدر براڪ اوباما وزير اعظم ميان نواز شريف سان ٽيليفون تي رابطو ڪري پشاور سانحي تي دلي ڏُک جو اظهار ڪيو آهي، اوباما چيو آهي ته ڏُک جي هِن گهڙي ۾ امريڪا پاڪستان سان گڏ آهي. امريڪي صدر براڪ اوباما پشاور ۾ دهشتگردن جي حملي جي نتيجي ۾ 150 جي لڳ ڀڳ شاگردن جي شهادت تي افسوس ۽ ڏُک جو اظهارڪيو.امريڪي صدر براڪ اوباما چيو ته مشڪل جي هن گهڙي ۾ امريڪي عوام پاڪستان سان گڏ آهي.هن چيو ته دهشتگردي خلاف جنگ ۾ پاڪستان جي قربانين کي نه ٿو وساري سگهجي ۽ ان سلسلي ۾ پاڪستان جي ڀرپور مدد جاري رکي ويندي.

 

پشاور واقعي جي ڏک ۾سڄي ملڪ ۾ڪاروبار بند، تعليمي ادارن ۾قرآن خوانيون

پشاور(م.ڊ) پشاور جي آرمي پبلڪ اسڪول۾ڪالهه ٿيل دهشتگردي جي واقعي سچي ملڪ کي لوڏي ڇڏيو آهي، ۽ سڄي پاڪستان جي هر گهر ۾ڏک جي لهر ڇانيل آهي، واقعي خلاف احتجاج طور سموري ملڪ جي واپاري برادري ۽ ٻين لاڳاپيل ادارن ڪاروبار کي بند ڪرڻ جو اعلان ڪيو هو، جنهن مطابق سڄي ملڪ ۾ڪاروباري ادارا ۽ مارڪيٽون بند آهن، خيبرپختونخواهه ۾سمورا تعليمي ادارا ۽ آفيسون بند آهن، جڏهن ته سنڌ،  پنجاب، بلوچستان ۾تعليمي ادارا کليل رهيا جتي پشاور جي شهيد ٿيل شاگردن جي ايصال ثواب لاءِ قرآن خواني ڪئي وئي. دهشتگردي جي انهي واقعي تي وڪيلن به سخت احتجاج ڪيو آهي، ۽ سڄي ملڪ ۾بار ڪائونسل جي اپيلن تي عدالتي ڪاررواين جو بائيڪاٽ ڪيو ويو.

 

اليڪشن ٽربيونل جي عبوري حڪمن کي هاءِ ڪورٽ ۾ چيلينج نه ٿو ڪري سگهجي: سپريم ڪورٽ

اسلام آباد (بيورو) سپريم ڪورٽ آف پاڪستان چيو آهي ته اليڪشن ٽربيونل جي عبوري حڪمن کي هاءِ ڪورٽ ۾ چيلينج نه ٿو ڪري سگهجي. چيف جسٽس جسٽس ناصر المُلڪ جي سربراهي ۾ ٽه رڪني بينچ شيخ رشيد، رضا حراج ۽ ٻين جي درخواست کي ٻڌندي پنهنجي ريمارڪس ۾ چيو ته اليڪشن ٽربيونل جي عبوري حڪم کي هاءِ ڪورٽ ۾ چيلينج نه ٿو ڪري سگهجي، متاثر ڌر کي شڪايت جي صورت ۾ وري به ٽربيونل سان ئي رابطو ڪرڻو پوندو. ان موقعي تي درخواست گذارن جي وڪيل جو موقف هو ته ٽربيونل جي فيصلن کي هاءِ ڪورٽ ۾ چيلينج ڪري سگهجي ٿو.

 

پشاور ۾ هر طرف قيامت جهڙا منظر، گهٽِ گهٽِ ۾ لاش پهچايا ويا، هر هنڌ جنازي نمازون پڙهيون ويون

پشاور(م.ڊ) پشاور ۾ هر طرف قيامت جهڙا منظر آهن، شهر جي گهٽي گهٽي ۾ لاش پهچايا ويا ۽ جنازي نمازون پڙهيون ويون، ڪور هيڊ ڪوارٽر ۾ غائباڻي جنازي نماز ادا ڪئي وئي، ڪي پي ڪي جي وڏي وزير، آرمي چيف ۽ ٻين اعليٰ عملدارن شرڪت ڪئي. پشاور ۾ آرمي پبلڪ اسڪول تي ٿيل ڌماڪي کانپوءِ شهر ۾ هر طرف قيامت جهڙا منظر آهن، 132 شاگردن ۽ اسٽاف جي 9 ماڻهن جا لاش شهر جي گهٽي گهٽي ۾ پهچايا ويا آهن، شهيد ٻارڙن جون مختلف هنڌن تي جنازينمازون پڙهيون ويون. دهشتگردن جي حملي ۾ شهيد ٿي ويل ٻارڙن جا وارث رڙيون ڪندي روئندا رهيا شهر ۾ هر اک آلي آهي، شهيدن جي وارثن سان تعزيتن جو سلسلو جاري آهي. ڪور هيڊ ڪوارٽر پشاور ۾ شهيدن جي غائباڻي جنازي نماز ادا ڪئي وئي، جنازي نماز ۾ خيبر پختون خواهه جي وڏي وزير پرويز خٽڪ، گورنر مهتاب عباسي، آرمي چيف جنرل راحيل شريف، ڊي جي آءِ ايس آءِ ميجر جنرل رضوان اختر، ڪور ڪمانڊر پشاور ۽ ٻين شرڪت ڪئي. هوڏانهن بچي ويل شاگردن ۽ ٻين شاگردن جو چوڻ آهي ته هنن جا حوصلا مضبوط آهن دهشتگرد هنن جو ڪجهه به بگاڙي نه ٿا سگهن، هو هاڻي به فوجي اسڪول ۾ پڙهندا ۽ دهشتگردن کي شڪست ڏيندا…….

 

عمران خان پاران اسلام آباد ۾ لڳل ڌرڻو ختم ڪرڻ جو اعلان، وزيراعظم پاران آجيان

اسلام آباد (بيورو) تحريڪ انصاف جي سربراهه عمران خان اسلام آباد ۾ لڳل ڌرڻو ختم ڪرڻ جو اعلان ڪندي چيو آهي ته اسڪول حملي کانپوءِ پشاور ويس ۽ اسپتال ۾ زخمي ٻارڙن جي عيادت ڪئي. ٻارڙن کي منصوبابندي تحت ماريو ويو جيڪو مون زندگيءَ ۾ پهريون ڀيرو ڏٺو آهي. وزيراعظم نوازشريف جڏهن مونکي دعوت ڏني ته مان هڪ لمحي لاءِ سوچيو ته مان قومي پارلياماني پارٽين جي اجلاس ۾ نه وڃان پر پوءِ سوچيو ته ملڪ کي هن وقت اتحاد جي ضرورت آهي. وقت جي گهرج آهي ته وزيراعظم نوازشريف جي هر طرح سان مدد ڪئي وڃي. دهشتگردي کي منهن ڏيڻ لاءِ نوازشريف جي هر طرح مدد ڪنداسين. پشاور سانحي کانپوءِ اتحاد جي ضرورت آهي. عمران خان چيو ته اسين رڳو حڪومت کان 2013ع جي چونڊن ۾ ڌانڌلي جي جانچ لاءِ جوڊيشل ڪميشن جي قيام جو مطالبو ڪيو آهي. اسان کي اميد آهي ته نوازشريف اسان جي مطالبي تي فوري طور تي جوڊيشل ڪميشن جوڙيندو. جيڪڏهن حڪومت اسان جو مطالبو تسليم ن ڪيو ته اسين ٻيهر روڊن تي نڪري اينداسين ۽ انصاف حاصل ڪرڻ لاءِ پوئتي نه هٽنداسين. هن چيو ته ملڪ ۾ حقيقي جمهوريت لاءِ صاف ۽ شفاف چونڊون ضروري آهن. واضح رهي ته تحريڪ انصاف جو اسلام آباد ۾ ڌرڻو ج126 ڏينهن تائين جاري رهيو. هوڏانهن وزيراعظم نوازشريف عمران خان پاران ڌرڻو ختم ڪرڻ جي اعلان جي آجيان ڪئي آهي. وزيراعظم پنهنجي بيان ۾ چيو آهي ته عمران جي اطمينان لاءِ مسئلي جو حل ڳوليو ويندو. گڏيل مشاورت سان تحريڪ انصاف جا خدشا ختم ڪيا ويندا. هن چيو ته عمران خان جي فيصلي سان دهشتگردن خلاف جنگ ۾ سڄي قوم جي عزم کي هٿي ملي آهي.

 

سراج الحق 2015 کي امن جي سال طور ملهائڻ جي تجويز ڏئي ڇڏي، سمورين پارٽين حمايت ڪري ڇڏي

پشاور(م.ڊ) پشاور سانحي ملڪ جي سياسي قيادت کي متحد ڪري ڇڏيو آهي، سمورين پارلياماني پارٽين موت جي سزا تي عمل جي حمايت ڪري ڇڏي. پشاور ۾ وزيراعظم نواز شريف جي صدارت هيٺ پارلياماني پارٽين جي اجلاس دوران سراج الحق 2015 کي امن جي سال طور ملهائڻ جي تجويز ڏني. سمورين پارٽين سراج الحق جي تجويز جي حمايت ڪئي، جنهن بعد 2015 کي امن جي سال طور ملهائڻ جو فيصلو ڪيو ويو. پارلياماني پارٽي جي اجلاس ۾ عمران خان دهشتگردي جي خاتمي لاءِ ماهرن تي ٻڌل ڪميٽي جوڙڻ جي تجويز ڏني. سندس چوڻ هو ته دهشتگردي خلاف جنگ ۾ هو وفاقي حڪومت سان گڏ آهن. عمران خان چيو ته ڪميٽي هفتي اندر سفارشون پيش ڪري ۽ ان جي نگراني وزيراعظم پاڻ ڪري. جماعت اسلامي جي امير سراج الحق چيو ته عوام کي اعتماد ۾ وٺي گڏيل حڪمت عملي جوڙي وڃي. اسفنديار ولي چيو ته قومي مفاد خاطر نواز شريف ۽ عمران خان اختلاف ختم ڪن. مشاهد حسين سيد چيو ته سريلنڪا وانگر گڏجي دهشتگردن خلاف ڪارروائي ڪئي وڃي، هاڻي سڀني کي متحد ٿيڻو پوندو.

 

اسرائيلي فوج به فلسطيني ٻارن تي ڪڏهن ايترو ظلم ناهي ڪيو، جيترو گذريل ڏهاڙي طالبان ڪيو: خورشيد شاهه

پشاور(م.ڊ) قومي اسيمبلي ۾ مخالف ڌر جي اڳواڻ سيد خورشيد شاهه چيو آهي ته اسرائيلي فوج به فلسطيني ٻارن تي ڪڏهن ايترو ظلم ناهي ڪيو، جيترو گذريل ڏهاڙي طالبان ڪيو. پشاور ۾ پارلياماني پارٽين جي اجلاس کانپوءِ ميڊيا سان ڳالهائيندي خورشيد شاهه چيو ته دهشتگردن معصوم ٻارڙن کي رت سان وهنجاري ڇڏيو، جنهن جي جيتري مذمت ڪجي گهٽ آهي. اپوزيشن ليڊر چيو ته تاريخ ۾ اهڙو ڏکوئيندڙ واقعو ڪڏهن به ناهي ٿيو، سڄي قوم سوڳ ۾ ورتو آهي. خورشيد شاهه چيو ته اسرائيل فلسطيني ٻارن تي ڪڏهن ايترو ظلم ناهي ڪيو، جيترو طالبان ڪالهه پشاور ۾ ڪيو. مخالف ڌر جي اڳواڻ چيو ته سمورين پارلياماني پارٽين وزيراعظم کي مڪمل سهڪار جي خاطري ڪرائي آهي.