تازيون خبرون

Daily Archives: December 16, 2014

اسان جو پلان ڊي ترقي وارو آهي تباهي وارو نه: نواز شريف

بلڪسر/چڪوال (اين اين آءِ/اي پي پي) وزيراعظم محمد نواز شريف چيو آهي ته اسان جو پلان ڊي ترقي وارو آهي تباهي وارو نه آهي، جڏهن به ملڪ ترقي جي شاهراهه ٿئي ٿو ته رستي ۾ جبل اڀا ڪيا وڃن ٿا، پر رڪاوٽون اسان جي وڌندڙن قدمن کي روڪي نٿيون سگهن، 2018ع ۾ اسان پنهنجو لوڊشيڊنگ جي اذيت، گئس جي کوٽ، مهانگائي، بيروزگاري ۽ دهشتگردي جي لعنت جي خاتمي ۽ معيشت کي مضبوط بڻائڻ جو رڪارڊ کڻي قوم وٽ وينداسين، جن کي هڪ صوبي ۾ حڪومت ملي آهي اهي ترقي روڪڻ جي لاءِ ڌرڻا هڻڻ، ٽائر ساڙڻ، رستا بند ڪرڻ، واپاري سرگرمين ۾ رنڊڪ وجهڻ لاءِ شهر بند ڪرائڻ، مارڌاڙ جون تقريرون ڪرڻ، ترقي جو رستو روڪڻ، پارليامينٽ تي حملو ڪرڻ ۽ جمهوريت کي گاريون ڏيڻ جو رڪارڊ کڻي عوام سامهون ايندا،پيٽروليم مصنوعات ۽ بجلي جي قيمتن ۾ گهٽتائي سان آبادگارن، واپارين ۽ مزدورن کي فائدو پهچندو. ايف ڊبليو او موٽروي منصوبو مڪمل ڪرڻ سان گڏوگڏ حڪومت کي 206 روپيا به ادا ڪندي. منصوبا مقرر مدي ۾ مڪمل ٿيندا ته ملڪ ترقي ڪندو ۽ وسيلا زيان ٿيڻ کان بچي ويندا، ڪراچي کان لاهور تائين موٽر وي منصوبي جو پيڙهه جو پٿر جلد رکيو ويندو. اسان جا منصوبا ملڪ جي ترقي لاءِ گيم چينجرز ثابت ٿيندا، عوام ڪنهن کي به انهن ۾ رڪاوٽ وجهڻ جي اجازت نه ڏيندي، هن اهڙن خيالن جو اظهار ڪالهه سومر ڏينهن هتي اسلام آباد- لاهور موٽر وي (ايم 2) کي جديد بڻائڻ ۽ نئين سر تعمير جي منصوبي جي افتتاحي تقريب کي خطاب ڪندي ڪيو. ان موقعي تي اطلاعات، نشريات جو وفاقي وزير سينيٽر پرويز رشيد، انجنيئر ان چيف ليفٽيننٽ جنرل خالد اصغر، ڊائريڪٽر جنرل ايف ڊبليو او ميجر محمد افضل، چيئرمين اين ايڇ اي شاهد اشرف تارڙ، ايم اين اي سردار ممتاز ٽمن، ميجر (ر) طاهر اقبال ملڪ، ملڪ ابرار احمد، راجا جاويد اخلاص، ايم پي اي سردار ذوالفقار علي خان دهلا، چوڌري لياقت علي خان، وزيراعظم جو خاص معاون ملڪ سليم اقبال سميت ضلعي جا معززين به موجود هئا. وزيراعظم چيو ته اسلام آباد – لاهور موٽر وي ايم 2 جو منصوبو به اسان ئي مڪمل ڪيو هو ۽ ان جي خوبصورتي ۽ جديد بڻائڻ جو آغاز به اسان ڪري رهيا آهيون، ڏکڻ ايشيا ۾ پنهنجي نوعيت جو هر منفرد منصوبو آهي ۽ هن جي تعريف غير ملڪي ڪن ٿا، ملڪي تاريخ ۾ پهريون ڀيرو 6 ڦاڪن وارو موٽر وي ٺاهيو ويو آهي، ان کي خوبصورت بڻائڻ سان گڏوگڏ حفاظتي جهنگلن کي به بهتر بڻايو ويندو. ان تي ڪئميرا به لڳايا ويندا، موٽر وي جي تعمير اسان پنهنجي وسيلن مان ڪئي آهي ۽ ڪنهن کان خيرات ناهي گهري. ايف ڊبليو او منصوبو مڪمل ڪرڻ سان گڏوگڏ حڪومت کي 206 ارب روپيا ادا ڪندي جڏهن ته ساڍا 9 ارب روپيا پهرئين ڏينهن ئي ادا ڪيا ويندا. هن چيو ته 30 ارب روپين جي منصوبي جي ماليت اڄ 249 ارب روپين تائين پهچي وئي آهي، جيڪڏهن منصوبا مقرر مدي ۾ پورا ٿين ته ان سان ملڪ کي فائدو ٿيندو ۽ وسيلا زيان نه ٿيندا. هن چيو ته موٽر وي نه رڳو پنهنجي وسيلن سان مڪمل ڪيو آهي پر هاڻي اهو آمدني جو ذريعو بڻجي ويو آهي ، ايف ڊبليو او، غير ملڪي ماهرن ۽ تعميراتي ڪمپني کي به ان منصوبي ۾ شريڪ ڪندي، ٻاهر کان ايف ڊبليو او کي ٽيڪنالاجي به ملندي، اسان اميد ڪريون ٿا ته هي ٽيڪنالاجي سڄي ملڪ ۾ پکڙجي ويندي ۽ سڀ ئي ترقي جي عمل ۾ پنهنجو ڪردار ادا ڪندا، هن چيو ته ايف ڊبليو او بلوچستان ۾ مشڪل ترين علائقن ۾ به رستا ٺاهيا آهن، جتي ڪا به پرائيويٽ ڪمپني رستا ٺاهڻ لاءِ تيار نه هئي. اسان جي موٽر وي دنيا جي بهترين موٽر وي ٺهندي. منصوبو مڪمل ڪرڻ لاءِ ڏيڍ سال جو هدف ڏنو آهي، موٽر وي وسيلي 17 سالن ۾ ڪروڙين شهرين محفوظ سفر طئي ڪيو آهي ملڪ کي وڏي بچت ٿي آهي، عالمي بئنڪ جي سروي موجب ان جي ماليت ۾ پنجوڻ تي اضافو ٿيو آهي، وزيراعظم چيو ته اسان جو پلان ڊي ترقي وارو آهي تباهي وارو نه آهي، ڊي سان ڊولپمينٽ يعني ترقي ٿئي ٿي ۽ ڊي سان ڊسٽرڪٽشن تباهي به ٿئي ٿي، جن وٽ تباهي واري ڊي آهي الله تعاليٰ انهن کان پاڪستان کي محفوظ رکي، ملڪ جڏهن ترقي جي راهه تي گامزن ٿئي ٿو ته ان جي رستي ۾ رنڊڪون اڀيون ڪيون وڃن ٿيون ته جيئن نه ڪو موٽر وي بڻجي ۽ نه ئي وري ملڪ تيزي سان ترقي ڪري، پر اهي رڪاوٽون اسان جا وڌندڙن قدم روڪي نٿيون سگهن. هن چيو ته موٽر وي جي تعمير جڏهن کان شروع ٿيندي هئي ته ان وقت کان ان جي راهه ۾ رڪاوٽون وڌيون ويون، اسان جي چونڊيل حڪومت ختم ڪئي وئي ۽ اسان ٻيهر حڪومت ۾ اچي ان منصوبي کي مڪمل ڪيو، ترقي ڪندڙ اڄ به موٽر وي تي سفر ڪن ٿا ۽ اهو مڪمل ٿيڻ کانپوءِ اسان کي ڪيترائي ڀيرا تنقيد جو نشانو بڻايو ويو ۽ بجري جو هڪ هڪ ٽڪرو تلاش ڪيو ويو ته جيئن ان کي غلط ثابت ڪيو وڃي ۽ اسان کي بدنام ڪيو وڃي. پر ديانت، محنت ۽ شفافيت سان قوم ۽ ملڪ کي اسان پنهنجو هي اثاثو مڪمل ڪري ڏيکاريو. ان لاءِ جڏهن به هاڻ شفاف چونڊون ٿين ٿيون ته عوام اسان کي ئي چونڊي ٿو، هن چيو ته 2018ع ۾ اسان پنهنجي لوڊشيدنگ جي اذيت، گئس جي کوٽ، مهانگائي، بيروزگاري ۽ دهشتگردي جي لعنت جي خاتمي ۽ معيشت کي مضبوط بڻائڻ جو رڪارڊ کڻي عوام وٽ وينداسين پر ٻئي طرف جن وٽ هڪ صوبي جي حڪومت آهي اهي ترقي روڪڻ لاءِ ڌرڻو ڏين، ٽائر ساڙي رستا بند ڪرڻ، واپاري سرگرمين ۾ رڪاوٽون وجهڻ جي لاءِ شهر بند ڪرڻ، مارڌاڙ جون تقريرون ڪرڻ، ترقي جو رستو روڪڻ، پارليامينٽ تي حملو ڪرڻ، جمهوريت کي گاريون ڏيڻ جو رڪارڊ کڻي عوام وٽ ويندا ته اسان کي ووٽ ڏيو ۽ ڏسو ته اسان ڪهڙي طرح هڪ صوبي جو حال ڪيو آهي باقي ملڪ جو به اهڙو ئي حال ڪرڻ چاهيون ٿا، وزيراعظم چيو ته پيٽروليم قيمتن ۽ بجلي جي قيمتن ۾ گهٽتائي سان آبادگارن، واپارين ۽ مزدورن کي فائدو پهچندو، صنعتون هلنديون، ترقي جو ڦيٿو ڦرندو، هن چيو ته اسان اسلام آباد کان لاهور موٽر وي ٺاهيو آهي، اسلام آباد کان پشاور تائين موٽر وي کي مڪمل ڪيو آهي ۽ هاڻي پشاور کان ڪابل تائين موٽر وي ٺاهڻ چاهيون ٿا. جڏهن ته ڪراچي کان لاهور تائين موٽر وي ٺاهڻ جو منصوبو به آهي ۽ ان جو پيڙهه جو پٿر جلد رکيو ويندو ۽ وري گوادر کان ڪاشگر تائين رستا ئي رستا ٺهندا.موٽر وي سان گڏوگڏ وک وک تي صنعتي زون به ٺاهيا ويندا، صنعتي زون ٺاهڻ جي لاءِ سروي ڪئي وڃي، صنعتون بحال ٿيڻ سان پاڪستان جي روانگي واپار ۾ اضافو ٿيندو، نون صوبن سان گڏوگڏ پراڻن منصوبن کي به مڪمل ڪرڻو آهي، ڌرڻن جي سياست نه هجي ها ته ڪيترن ئي منصوبن تي ڪم شروع ٿي وڃي ها. بجلي جي کوٽ کي ختم ڪرڻ ۽ ان کي سستو ڪرڻ اسان جو مشن آهي، ديامر ڀاشا ڊيم، داسو ڊيم، مونجي ڊيم، نيلم جهلم منصوبو، تربيلا فور، ڪراچي پورٽ قاسم، ساهيوال ڪول پاور پراجيڪٽ ۽ قائداعظم سولر پارڪ مڪمل ٿيڻ سان بجلي وڌيڪ سستي ٿي ويندي. هن چيو ته حڪومت جذبي ۽ خلوص سان ڪم ڪري رهي آهي، گوادر کان نوابشاهه تائين پائيپ لائين وڇائڻ جي لاءِ اشتهار ڏئي ڇڏيو آهي، گوادر ۽ ايران کان پائيپ لائين ايندي ته خوشحالي جو هڪ وڏو دور شروع ٿيندو، ڳوٺن کان شهرن تائين رستا ٺهندا، تيل جي قيمتن ۾ گهٽتائي سان ماڻهن جي خريداري جي قوت وڌندي، خنجراب کان راءِ ڪوٽ تائين رستو مڪمل ٿي ويو آهي. مارگلا جي جبلن جي هيٺيان سرنگهه کوٽي موٽر وي کي اسلام آباد تائين آندو ويندو، هن چيو ته اسان جا منصوبا ملڪ جي ترقي جي لاءِ گيم چينجر ثابر ٿيندا، ايندڙ ٻن سالن اندر بلوچستان جي هر ننڍي شهر تائين گئس پهچائي ويندي. ترقياتي منصوبا ملڪ جي مستقبل جي لاءِ تمام ضروري آهن، عوام ڪنهن کي به انهن ۾ رخنو وجهڻ جي اجازت نه ڏيندي.

 

سرڪار فوري طور جوڊيشل ڪميشن قائم ڪرڻ جو اعلان ڪري ٻي صورت ۾ نواز شريف لاءِ حڪومت هلائڻ ڏکي بڻجي ويندي:عمران خان

لاهور (بيورو) تحريڪ انصاف پاران لاهور جي 26 هنڌن تي ڌرڻا هنيا ويا، ڪپتان جي ڪارڪنن پاران روڊ بلاڪ ڪرڻ سبب ڪاروهنوار ٺپ ٿي ويو، جڏهن ته احتجاج سبب روڊ تي ڦاٿل ايمبولنسز ۽ رڪشي ۾ هڪ معصوم ٻارڙِي ۽ نينگر سميت 3 مريض رستي ۾ ئي فوت ٿي ويا. تحريڪ انصاف پاران چونڊ ڌانڌلين خلاف پلان سي تحت فيصل آباد ۽ ڪراچي کانپوءِ لاهور ۾ احتجاج ڪيو پيو وڃي. پي ٽي آءِ جا ڪارڪن صبح سوير 7 وڳي گهرن مان ٻاهر نڪري آيا. گلبرگ، مغل پوره، جــِي ٽي روڊ، مال روڊ، شاليمار روڊ، والٽن روڊ، رائيونڊ روڊ ۽ ملتان روڊ، پي ايم جــِي، يتيم خانو چوڪ، شاهدره موڙ ۽ ٺوڪر نياز بيگ سميت 26هنڌن تي ڌرڻا هنيا ويا آهن. ڌرڻن سبب روڊن تان پبلڪ ٽرانسپورٽ غائب، پيٽرول پمپس بند جڏهن ته تعليمي ادارن ۽ آفيسن ۾ حاضري گهٽ رهي. لاهور ۾ ڌرڻن سبب مختلف روڊن تي ايمبولنسز به ڦاسي پيون جنهن سبب مريض ۽ انهن جا مائٽ پريشان رهيا. شاهدره واري علائقي ۾ پي ٽي آءِ جي احتجاج سبب رستو نه ملڻ ايمبولنس ٽريفڪ ۾ ڦاسي پئي جنهن ڪري ان ۾ موجود 15 ورهين جو نينگر فوت ٿي ويو جڏهن ته 17 ڏينهن جي سدره رياض به اسپتال نه پهچڻ سبب رستي ۾ دم ڌڻيءَ حوالي ڪيو. جوڙا پل وٽ رستو نه ملڻ ڪري رڪشي تي سوار مريض 40 ورهين جو امانت علي فوت ٿي ويو. پي ٽي آءِ جــَي صوبائي صدر اعجاز چوڌري جي قيادت ۾ ناصر باغ وٽ ڌرڻو هنيو ويو، جنهن ۾ عورتون ۽ ٻار به وڏي انگ ۾ موجود هئا. پي ٽي آءِ ڪارڪنن ۽ وڪيلن، جــِي پي او چوڪ تي ٽائرن کي باهه ڏئي روڊ بلاڪ ڪري ڇڏيو، ان موقعي تي گو نواز گو جا نعرا به هنيا ويا. ڪارڪنن پنجاب اسيمبلي آڏو، مال روڊ نهر جي پل ۽ لبرٽي گول چڪر تي ٽائرن کي باهيون ڏئي روڊ بند ڪري ڇڏيا. ڀــُٽا چوڪ وٽ ڌرڻي سبب ڊفينس ويندڙ رستا بند ويا، جڏهن ته چونگي امر ســِڌو وٽ ڪارڪنن ميٽرو بس تي پٿراءُ ڪيو جنهن بعد سڄي شهر ۾ ميٽرو بس سروس معطل ڪئي وئي. فيروز پور روڊ بلاڪ ٿيڻ سبب لاهور کان قصور ويندڙ رستو بند ٿي ويو جڏهن ته ماڊل ٽائون، اتفاق اسپتال جو رستو به بند ڪيو ويو. ملتان روڊ تي يتيم خاني چوڪ کي ٽائرن کي باهه ڏئي بند ڪيو ويو جنهن سبب رائونڊ، منصوره، ملتان چونگي ڏانهن ويندڙ رستو بلاڪ ٿي ويو. ٺوڪر نياز بيگ چوڪ بند ٿيڻ سبب موٽر وي ۽ ملتان روڊ بلاڪ ٿي ويو، شاهدره چوڪ تي ٽائرن کي باهه ڏئي روڊ بلاڪ ڪيو ويو. شاهدره چوڪ تي ڌرڻي سبب رنگ روڊ، بتي چوڪ، مينار پاڪستان ڏانهن ويندڙ جڏهن ته ڀيڪــَي وال چوڪ تي ڌرڻي سبب اقبال ٽائون سميت ٻين علائقن ڏانهن ويندڙ روڊ بند ٿي ويا. اڪبر چوڪ تي ٿيندڙ احتجاج سبب ٽائون شپ، جوهر ٽائون ۽ فيصل ٽائون ڏانهن ايندڙ ويندڙ رستا بند آهن. ٻئي طرف صوبائي حڪومت امن امان برقرار رکڻ لاءِ سڄي شهر ۾ 20 هزار کان وڌيڪ سڪيورٽي اهلڪارن کي مقرر ڪيو ويو آهي. ڊي سي او لاهور ڪيپٽن رٽائرڊ محمد عثمان جو چوڻ آهي ته پي ٽي آءِ 18 پوائنٽس بند ڪرڻ جي خاطري ڪرائي هئي پر 26 هنڌ بند ڪيا ويا آهن. ڊي سي او موجب 26 هنڌن کانسواءِ سڄي لاهور ۾ ٽريفڪ روان دوان آهن، جڏهن ته موٽر سائيڪل سوارن کي گــُذرڻ جي جاءِ ڏني پئي وڃي. ڌرڻي کي خطاب ڪندي تحريڪ انصاف جي سربراهه عمران خان چيو آهي ته لاهور واسين ڌانڌلين خلاف فيصلو ٻڌائي ڇڏيو آهي، سرڪار فوري طور جوڊيشل ڪميشن قائم ڪرڻ جو اعلان ڪري، ٻي صورت ۾ نواز شريف لاءِ حڪومت هلائڻ ڏکي بڻجي ويندي. لاهور ۾ چيرنگ ڪراس وٽ تحريڪ انصاف جي ڌرڻي کي خطاب ڪندي عمران خان چيو ته نواز شريف وٽ ٻه رستا بچيا آهن، يا ته هو فوري طور جوڊيشل ڪميشن قائم ڪري اليڪشن جي جاچ ڪرائي، نه ته ٻيو رستو نه رڳو سندس ڏکيائين ۾ واڌ ڪري ڇڏيندو، پر ان جو حڪومت ڪرڻ ۾ ناممڪن بڻجي ويندو، ڇاڪاڻ ته هاڻي سندن پلان ڊي به تيار آهي. هن چيو ته لاهور واسين فيصلو ٻڌائي ڇڏيو آهي ته 2013 جي اليڪشن ۾ ڌانڌلي ٿي ۽ نواز شريف چونڊون ڌانڌلي ڪري کٽيون. هن چيو ته تحريڪ انصاف هڪ جمهوري پارٽي آهي ۽ ملڪ ۾ شفاف اليڪشن ڏسڻ چاهي ٿي، پر حڪومت انصاف حاصل ڪرڻ لاءِ کين رستن تي وٺي آئي. عمران خان چيو ته پي ٽي آءِ هڪ سئو 24 ڏينهن جو دنيا جو سڀ کان وڏو پرامن ڌرڻو هنيو، پر اڃا تائين کين انصاف ناهي مليو. هن چيو ته هو 2013 جي اليڪشن جو احتساب چاهين ٿا، جيڪڏهن نواز ليگ کٽيو آهي ته ان جا ماڻهو ووٽن جي ٻيهر ڳڻپ کان ڇو ڊڄي رهيا آهن ۽ ڇا جي لاءِ عدالتي حڪم تي پويان لڪيل آهن. تحريڪ انصاف چيئرمين جو چوڻ هو ته هو حڪومت کان به شيءِ نه پر پنهنجو حق انصاف گهري رهيا آهن، سرڪار ڀلي ڇا به ڪري هو انصاف وٺڻ کانسواءِ واپس نه ويندا. عمران خان لاهور جي واپاري برادري، وڪيلن، ٽرانسپورٽرز ۽ عوام جا ٿورا مڃيندي چيو ته هو ملڪ جي مستقبل ۽ جمهوريت جي جنگ وڙهي رهيو آهي. هن چيو ته تحريڪ انصاف جي جدوجهد سان هڪ ڏينهن حقيقي جمهوريت ايندي، جنهن کي عوام ياد رکندو. تحريڪ انصاف سربراهه مطالبو ڪيو ته فيصل آباد ۾ مارجي ويل ڪارڪن حق نواز جي قتل ڪيس ۾ راڻا ثناءُ الله کي جيل ۾ وڌو وڃي، هو ڏوهاري آهي، جيڪڏهن کيس ماڊل ٽائون واقعي کانپوءِ جيل موڪليو وڃي ها ته فيصل آباد حالتون خراب نه ٿين ها.

 

پي ٽي آءِ شهر بند ڪرڻ جي پنهنجي سڏ جي ناڪامي تي مايوس آهي: پرويز رشيد

اسلام آباد (بيورو) اطلاعات، نشريات ۽ قومي ورثي جي وفاقي وزير سينيٽر پرويز رشيد لاهور جي علائقي چنگي امر سڌو ۾ هڪ خانگي نيوز چينل جي رپورٽر تي پي ٽي آءِ جي ڪارڪنن جي حملي جي شديد مذمت ڪئي آهي. ڪالهه سومر ڏينهن پنهنجي بيان ۾ هن چيو ته پي ٽي آءِ شهر بند ڪرڻ جي پنهنجي سڏ جي ناڪامي تي مايوس آهي، هن چيو ته ميڊيا جو ڪم حقيقتون ڏيکارڻ آهي ۽ پنهنجي من پسند تصوير پيش ڪرڻ لاءِ ميڊيا کي مجبور ڪرڻ وحشي ذهنيت جي عڪاسي آهي، هن چيو ته ميڊيا تي حملو اظهار راءِ جي آزادي تي حملو آهي.

 

نظام بچائڻ لاءِ اسپيڪر ۽ 2 وزيرن جي قرباني ڏئي ڇڏيو، آصف زرداري جو نواز شريف کي مشورو

اسلام آباد: اڳوڻي صدر آصف علي زرداري وزيراعظم کي اسپيڪر ۽ 2 وزيرن جي قرباني ڏئي سسٽم بچائڻ جو مشورو ڏئي ڇڏيو آهي، ذريعن ٻڌايو ته اڳوڻي صدر آصف علي زداري پنهنجي هڪ سينيٽر کي حڪومت جي اهم اتحادي پارٽي جي سربراهه وٽ موڪليو ته وزيراعظم نواز شريف کي منهنجي طرفان مشورو ڏيو ته نظام جي بهتري ۽ ان کي هلائڻ لاءِ جيڪڏهن اسپيڪر ۽ 2 وزيرن جي قرباني ڏيڻي پئي ته ڏئي ڇڏيو ڇو ته مون به وزيراعظم يوسف رضا گيلاني جي قرباني ڏني هئي پر مون سمورن اسيمبلي ميمبرن جي قرباني ڏيڻ لاءِ هڪ فهرست ترتيب ڏني هئي ياد رهي ته پاڪستان تحريڪ انصاف طرفان اسپيڪر اياز صادق، ريلوي واري وفاقي وزير خواجه سعد رفيق، دفاع واري وفاقي وزير خواجه آصف ۽ منصوبابندي واري وفاقي وزير احسن اقبال جي تڪن ۾ ڌانڌلي جي جاچ جو مطالبو ڪيو پيو وڃي.

 

سنڌ حڪومت اسٽاڪ ۾ موجود ڪڻڪ جي قميت گهٽائي ڇڏي

ڪراچي (اسٽاف رپورٽر) سنڌ حڪومت 15 ڊسمبر 2014 کان 15 جنوري 2015 تائين اسٽاڪ ۾ موجود 3 لک ميٽرڪ ٽن ڪڻڪ جي قيمت کي 3450 رپيا في ٻوري مان گهٽائي 3250 رپيا في هڪ سئو ڪلوگرام ٻوري ڪري ڇڏي آهي ۽ ان وقت دوران هڪ پوائنٽ 5 ميٽرڪ ٽن ڪڻڪ ساڳي قيمت تي برآمد ڪرڻ جو به فيصلو ڪيو آهي، اجلاس ۾ اهو به فيصلو ڪيو ويو ته گهٽ ڪيل ڪڻڪ جي قيمت تي عمل هڪ مهيني لاءِ لاڳو هوندو، ان کانپوءِ ڪڻڪ جي قيمت هلندڙ مارڪيٽ ريٽ مطابقڪئي ويندي، سيد قائم علي شاهه ٻين صوبن کان سنڌ ۾ ڪمند جي آمد تي به پابندي عائد ڪئي آهي ۽ وفاقي حڪومت کي چيو آهي ته هو ٽي سي پي ۽ پاسڪو کي سنڌ صوبي تائين پنهنجو ڪاروبار وڌائڻ لاءِ حڪم جاري ڪري، ان ڳالهه جو فيصلو سومر تي سنڌ جي وڏي وزير سيد قائم علي شاهه جي صدارت ۾ مهيا ڪڻڪ جو اسٽاڪ ۽ ان جي مارڪيٽنگ ميڪنيزم ۽ سنڌ چيمبر آف ايگريڪلچر جي وفد سان ڊاڪٽر نديم قمبر جي سربراهي ۾ جدا جدا اجلاس ۾ ڪيو ويو، ڪڻڪ جي مارڪيٽ جي 3 رڪني وزارت ڪميٽي صوبائي ناڻي وزير سيد مراد علي شاهه، صوبائي وزير صحت مهتاب ڏهر ۽ صوبائي وزير ايڪسائيز اينڊ ٽيڪسيشن گيانچند اسيراڻي اجلاس کي ملڪ ۾ ڪڻڪ جي موجوده مارڪيٽ جي صورتحال بابت آگاه ڪيو.

 

چوڌري نثار ۽ سراج الحق وچ ۾ ملاقات سياسي صورتحال تي ڳالهيون

اسلام آباد (بيورو) گهرو وزير چوڌري نثار علي خان جماعت اسلامي جي سربراهه سراج الحق سان ملاقات ڪري ملڪ جي سياسي صورتحال تي ساڻس خيالن جي ڏي وٺ ڪئي آهي، چوڌري نثار چيو آهي ته سراج الحق ۽ جماعت اسلامي جو مثبت ڪردار ساراهه جوڳو آهي. گهرو وزير چوڌري نثار علي خان جماعت اسلامي جي سربراهه سراج الحق سان ملاقات ڪئي.ان موقعي تي ملڪ جي سياسي صورتحال تي خيالن جي ڏي وٺ ڪئي وئي، جڏهن ته پي ٽي آءِ جي ڌرڻن جي حوالي سان به معاملن تي ڳالهايو ويو.

 

ڊاڪٽر مليحه لوڌي گڏيل قومن ۾ پاڪستان جي مستقل نمائنده مقرر

اسلام آباد(بيورو) پاڪستان سومر ڏينهن ڊاڪٽر مليحه لوڌي کي گڏيل قومن ۾ مستقل نمائنده مقرر ڪيو آهي. پرڏيهي آفيس وزيراعظم محمد نواز شريف جي فيصلي مطابق ڊاڪٽر مليحه لوڌيءَ جي گڏيل قومن ۾ پاڪستان جي مستقل نمائنده طور مقرري جو اعلان ڪيو آهي ۽ هوءَ فبيروري 2015ع ۾ پنهنجون ذميواريون سنڀاليندي. ان کان اڳ ڊاڪٽر مليحه لوڌي 2 ڀيرا 1993ع کان 1996ع ۽ 1999ع کان 2002ع تائين آمريڪا ۾ پاڪستان جي سفير طور تي خدمتون انجام ڏئي چڪي آهي. هوءَ 2003ع کان 2008ع تائين برطانيه ۾ پڻ پاڪستان جي هاءِ ڪمشنر رهي آهي. ڊاڪٽر مليحه لوڌي هٿيارن کان پاڪ ڪرڻ وارن معاملن گڏيل قومن جي سيڪريٽري جنرل جي ايڊوائيزري بورڊ ۾ پڻ 2001ع کان 2005ع تائين ميمبر طور خدمتون انجام ڏنيون. ڊاڪٽر مليحه لوڌي لنڊن اسڪول آف اڪنامڪس اينڊ پوليٽيڪل سائنس ۾ پڻ پڙهائي چڪي آهي ۽ هوءَ هارورڊ يونيورسٽيءَ جي انسٽيٽيوٽ آف پوليٽڪس جي فيلو پڻ رهي چڪي آهي. ان کان علاوه واشنگٽن ڊي سي ۾ ووڊرو ولسن سينٽر ۾ انٽرنيشنل اسڪالر پڻ خدمتون انجام ڏنيون آهن. هوءَ نيشنل ڊفينس يونيورسٽيءَ جي سينيٽ جي ميمبر پڻ آهي ۽ لنڊن ۾ واقع انٽرنيشنل انسٽيٽيوٽ آف اسٽريٽجڪ افيئر جي ايڊوائيزري ڪائونسل جي پڻ ميمبر آهي. ڊاڪٽر مليحه لوڌي پهرين پاڪستاني عورت هوندي جيڪا گڏيل قومن ۾ پاڪستان جي نمائندگي ڪندي، اها وزيراعظم محمد نواز شريف طرفان پنهنجي پرڏيهي پاليسيءَ واري ٽيم ۾ ڪنهن سينيئر عهدي تي عورت جي مقرري هوندي. وزيراعظم ان عهدي لاءِ هڪ اهڙي شخصيت جي چونڊ ڪئي آهي جنهن کي نه رڳو سفارتي سطح تي اهميت حاصل آهي پر هوءَ ملڪ جي هڪ وڏي دانشور پڻ آهي. ڊاڪٽر مليحه لوڌي پهريون ڀيرو اڳوڻي وزيراعظم شهيد بينظير ڀٽو طرفان آمريڪا ۾ سفير طور مقرر ڪئي وئي هئي. هن آمريڪا ۾ ٻن مختلف قسمن جي انتظاميه سان گڏ ڪم ڪيو جن ۾ صدر بل ڪلٽن ۽ صدر جارج ڊبليو بش جي انتظاميه شامل آهن. سندس آمريڪا ۾ ٻيو ڀيرو مقرريءَ وارو دؤر چئلينجن کان ڀرپور هو، ڇاڪاڻ ته ان وقت نائين اليون وارو واقعو پڻ پيش آيو هو. هن مختلف موقعن تي پاڪستان جو مؤقف ڀرپور نموني پيش ڪيو ۽ سفارتي حوالي سان پاڪستان جي مفادن لاءِ پوريءَ ريت ڪوششون ورتيون. ڊاڪٽر مليحه لوڌي پنهنجي ڪيريئر جي شروعات صحافت سان ڪئي ۽ هوءَ هڪ قومي اخبار جي ايشيا جي پهرين ايڊيٽر پڻ رهي. هوءَ 2 ڪتاب پڻ لکي چڪي آهي ۽ 2010ع ۾ هڪ مشهور مجموعي ”پاڪستان بيانڊ دي ڪرائيسز اسٽيٽ“ کي پڻ ايڊيٽ ڪيو. هن کي عوامي خدمتن جي مڃتا طور حڪومت طرفان هلال امتياز جو اعزاز پڻ مليل آهي.

 

بلاول ۽ آصف زرداري وچ ۾ ڪي به اختلاف ناهن آغا سراج دراني

لاڙڪاڻو (مانيٽرنگ ڊيسڪ) سنڌ اسيمبلي جي اسپيڪر آغا سراج دراني چيو آهي ته بلاول ۽ آصف زرداري وچ ۾ڪي به اختلاف ناهن، پارٽي ۾ڌڙا بند ڪندڙن خلاف سخت ڪارروائي ڪئي ويندي. لاڙڪاڻي ۾نجي ٽي وي سان سان ڳالهائيندي آغا سراج دراني چيو ته وڏي وزير جي تبديلي بابت کيس ڪابه خبر ناهي، اهڙو فيصلو ٿيو ته پارٽي قيادت ڪندي. آغا سراج دراني چيو ته وڏو وزير سيد قائم علي شاهه ٽي ڀيرا وڏو وزير رهيو آهي، جنهن کي وڏي وزير هئڻ جو سٺو تجربو پڻ آهي. آغا سراج دراني چيو ته بلاول ڀٽو زرداري ۽ آصف زرداري وچ ۾ڪي به اختلاف ناهن، مخالف اجايو شوشا ڇڏي رهيا آهن. هن چيو ته پ پ مخالف اڳ به شهيد راڻي ۽ بيگ نصرت ڀٽو وچ ۾اختلافن سميت محترم بينظير ڀٽو ۽آصف زرداري وچ ۾ اختلاف هئڻ جا اجايا شوشا ڇڏيا هئا، پر ان ۾ هو ڪامياب نه ٿيا. آغا سراج دراني وڌيڪ چيو ته  پي ٽي آءِ ۽ نواز ليگ وچ ۾ ڇڪتاڻ سان پنجاب ۾ ماحول خراب ٿي رهيو آهي. هن چيو ته عمران خان ۽ نواز شريف وچ ۾ ذاتي تڪرار آهي جيڪو سياست ۾نه هئڻ کپي،عمران خان نواز شريف خلاف غير پارلياماني زبان استعمال ڪري رهيو آهي.

 

عام چونڊون 2018 ۾ ٿينديون، هڪ، ٻن وفاقي وزيرن جي قرباني به ٿيندي: منظور وساڻ

ڪراچي (اسٽاف رپورٽر) عام چونڊون 2018 ۾ ئي ٿينديون، پر 2015 ۾ پنجاب جي 4 تڪن ۾ قومي اسيمبلي جي اليڪشن ٿيڻ جا واضح امڪان آهن گڏ ئي هڪ ٻن وفاقي وزيرن جي قرباني به ڏيڻي پوندي. دعا آهي ته ايندڙ سال گذريل سال کان بهتر هجي ۽ پاڪستان جي عوام لاءِ امن ۽ خوشحالي آڻي. بلاول ڀٽو زرداري، بينظير ڀٽو شهيد ۽ آصف علي زرداري جو پٽ ۽ ذوالفقار ڀٽو شهيد جي ڏوهٽو آهي پارٽي ۽ قوم کي ان مان بي حد اميدون آهن. انشاءَالله هو بي بي شهيد جي مشن کي پڄاڻي تائين  پهچائيندو. اهڙن خيالن جو اظهار صوبائي وزير جيل، معدنيات، معدني ترقي ۽ اينٽي ڪرپشن واري وزير منظور حسين وساڻ اڄ پنهنجي آفيس ۾ ايندڙ پارٽي ڪارڪنن ۽ ملندڙن سان ڳالهائيندي ڪيو. هن چيو ته مون محترمه بينظير ڀٽو شهيد کي هڪ بهادر ۽ مدبر سياستدان ڏٺو. جڏهن کان بي بي سياست جي شروعات ڪئي آئون ان سان گڏ رهيس.  بي بي جي شهادت پاڪستان لاءِ وڏو سانحو هو. بي بي شهيد کي مشڪل حالتن ۾ پاڪستان جي سڀ کان وڏي جمهوري جماعت کي هلائڻ جو ڪريڊٽ وڃي ٿو. ان جي قرباني جي ڪري اڄ اسان جمهوري هوا ۾ ساهه کڻي رهيا آهيون ۽ سياسي جماعتون مڪمل تحفظ سان پنهنجا جلسا جلوس، ريليون ۽ احتجاج ريڪارڊ ڪرائي رهيا آهن، جڏهن ته پاڪستان پيپلز پارٽي ان جي بلڪل برعڪس نهايت سخت حالتن ۾ جدوجهد ڪئي. صوبائي وزير منظور وساڻ چيو ته اينٽي ڪرپشن کاتي ۾ وڌيڪ تبديليون آڻڻ چاهيان ٿو ته جيئن سٺا نتيجا سامهون آڻي سگهجن. هن چيو ته پهريان هيٺين گريڊ جي ملازمن خلاف جاچ ٿيندي هئي هاڻ 20 گريڊ تائين جي ڪجهه آفيسرن خلاف اينٽي ڪرپشن قانون تحت انڪوائري ٿي رهي آهي.

 

لاهور ۾ هڙتال جي نتيجن کان پوءِ پلان سي ڪامياب ٿي ويو: شاهه محمود قريشي

لاهور (م.ڊ) پاڪستان تحريڪ انصاف جي وائيس چيئرمين شاهه محمود قريشي چيو آهي ته لاهور ۾ هڙتال جي نتيجن کان پوءِ پلان سي ڪامياب ٿي ويو حڪومت سان اڄ ٿيندڙ نشست ۾ ان جو رويو ڏسنداسين جيڪڏهن جڊيشل ڪميشن جي رستي ۾ رنڊڪ ۽ هيلن بهانن سان فرار جي ڪوشش ڪئي ويئي ته پوءِ پلان ڊي تي عمل ٿيندو لاهور ٿابت ڪري ڇ ڏيو آهي ته هو عمران خان جي سوچ سان گڏ ۽ تبديلي لاءِ تيار آهي ۽ ان چونڊ ڌانڌلي جي جاچ لاءِ تياري ڪري ڇڏي آهي اهڙن خيالن جو اظهار هن اولڊ ايئرپورٽ تي ميڊيا سان ڳالهائيندي ڪيو شاهه محمود قريشي چيو ته پي ٽي آءِ جي ڪارڪنن ڪاروبار بند ڪرائڻ لاءِ ڪوئي زور زبردستي ناهي ڪئي پر مڪمل طور تي پرامن رهيا جڏهن ته حڪومت جي ماڻهن ڪجهه هنڌن تي ماحول خراب ڪرڻ جي ضرور ڪوشش ڪئي آهي هن چيوته اسان ڪراچي وانگر لاهور ۾ احتجاج کي پرامن رکڻ جو عزم ظاهر ڪيو هو ۽ ان تي قائم رهياسين ڇو ته ايئن ٿيڻ ئي سڀني جي مفاد ۾ هو هن چيو ته لاهور وارن جهڙي طرح تعاون ڪيو آهي اهو اسان جي توقع کان وڌيڪ آهي تاجرن رضاڪاراڻي طور تي پنهنجو ڪاروبار بند ڪيو ۽ ثابت ڪيو ته لاهور وارا عمران خان جي سوچ ۽ تبديلي سان گڏ آهن. هن چيو ته هڙتال جي ڪاميابي جو چٽو ثبوت آهي ته پي ٽي آءِ 18 هنڌن تي احتجاج جو اعلان ڪيو هو پر عوام رضاڪاراڻي طور تي ٻاهر نڪري مختلف شاهرائن کي بند ڪيو هن چيو ته سردار اياز صادق پاران ٻيهر عدالت سان رجوع ڪرڻ سان عوام خان جي ان موقف جي تصديق ٿي ويئي آهي ته هو اسٽي آرڊر جي پويان لڪي رهيا آهن جيڪڏهن ان جي تڪ ۾ شفاف چونڊون ٿيون آهن ته پوءِ کيس گهٻرائڻ جي ڪهڙي ضرورت آهي سومر جي ڏينهن 122 ۾ ووٽن جي تصديق جي شروعات ٿيڻي هئي پر ڇو سردار اياز صادق کي اسٽي آرڊر جي ضرورت پيش آئي ان مان لڳي ٿو ته دال ۾ ضرور ڪجهه ڪارو آهي ان ٻڌايو ته حڪومت کي پنهنجن مطالبن کان آگاهه ڪري ڇڏيو آهي ۽ چيو ته کيس تسليم ڪيو وڃي. جيڪو پي او آرز بحث هيٺ آهن اهي اڳتي وڌايا وڃن اسان جو هي مثبت رويو آهي پر اڄ اڱاري تي حڪومت سان ٿيندڙ نشست ۾ ڏسنداسين ته حڪومت جو رويو ڇا آهي جيڪڏهن جڊيشل ڪميشن جي رستي ۾ رنڊڪ ۽ هيلن بهانن سان راهه فرار اختيار ڪئي ويئي ته پوءِ ضرور پلان ڊي تي عمل ٿيندو.