تازيون خبرون

Daily Archives: December 10, 2014

سياسي جرڳو ٻيهر سرگرم، جوڊيشل ڪميشن تي سڀئي متفق آهن ته پوءِ دير ڇا جي؟ سراج الحق

اسلام آباد (بيورو) سياسي جرڳي هڪ ڀيرو ٻيهر حڪومت ۽ پي ٽي آءِ سان ڳالهيون شروع تي زور ڀريو آهي جماعت اسلامي جي امير سراج الحق چيو آهي ته جيڪڏهن گاڏي جون بريڪون فيل ٿي ويون ته سڀئي ڏسندا ئي رهجي ويندا، رحمان ملڪ جو چوڻ هو ته ميمو گيٽ تي ڪميشن بڻجي سگهي ٿي ته ڌانڌلي تي ڇو نٿي بڻائي وڃي، اسلام آباد ۾ سياسي جرڳي جو اجلاس اڳوڻي گهرو وزير رحمان ملڪ جي گهر ۾ ٿيو اجلاس کانپوءِ ميڊيا سان ڳالهائيندي سراج الحق جو چوڻ هو ته 1977ع ۾ به سياسي پارٽين هڪ ٻئي برداشت نه ڪيو اڄ ٻيهر ملڪ ان ئي صورتحال جو نقشو پيش ڪري رهيو آهي جنهن کي ملڪ برداشت نه ٿو ڪري سگهي، اڳوڻي گهرو وزير رحمان ملڪ جو چوڻ هو ته ڪراچي ۾ هڙتال دوران ملڪ دشمن طاقتون ڪم ڏيکارينديون ته وڏي خونريزي جو خطرو آهي حڪومت ۽ تحريڪ انصاف معاملي کي نه وڌائين جيڪڏهن ڌانڌلي تي ڪميشن نه بڻائي وئي ته جرڳو سپريم ڪورٽ سان رابطو ڪندو جرڳي جو چوڻ هو ته ان جي ڪوششن سان حڪومت، تحريڪ انصاف ۽ عوامي تحريڪ کي37 ڀيرا ڳالهين جي ميز تي ويهاريو ويو هاڻ وقت اچي ويو آهي ته ڌريون واعدا پورا ڪن. سراج الحق چيو ته جوڊيشل ڪميشن تي سڀئي متفق آهن ته پوءِ دير ڇو پئي ڪئي وڃي.

 

ڪارڪنن تي عابد شير علي ۽ راڻا ثناءِ الله جي غنڊن حملو ڪيو، قربانيون رائيگان نه وينديون، ظالمن جو مقابلو ڪيو ويندو: عمران خان

فيصل آباد (مانيٽرنگ ڊيسڪ) فيصل آباد ۾ زندگي روان دوان ٿي وئي، ڪاروبار کلي ويو، تحريڪ انصاف طرفان واقعي خلاف سڄي ملڪ ۾ سوڳ ملهايو پيو وڃي، قتل ٿيل ڪارڪن جي جنازي نماز اڄ ادا ڪئي ويندي، واقعي جو ڪيس عابد شير علي ۽ راڻا ثناءُ الله سميت 3 سئو ماڻهن خلاف داخل ڪيو ويو آهي، راڻا ثناءَ الله چيو آهي ته هو فائرنگ ڪندڙ شخص کي اڄ ظاهر ڪندو ته هو ڪير آهي. تحريڪ انصاف طرفان گذريل ڏينهن فيصل آباد ۾ احتجاج ۽ پر تشدد واقعن کانپوءِ اڄ شهر کلي ويآهي، واپارين پنهنجا دوڪان کولي ڇڏيا آهن جڏهن ته تعليمي ادارا به کلي ويا آهن. شهر ۾ مارجي ويل پي ٽي آءِ ڪارڪن جي جنازي نماز اڄ ادا ڪئي ويندي، عمران خان جي ڪيل اعلان تحت مختلف شهرن ۾ غائبانه جنازي نماز به ادا ڪئي ويندي. تحريڪ انصاف جي مارجي ويل ڪارڪن جو ڪيس وفاقي مملڪتي وزير عابد شير علي ۽ اڳوڻي صوبائي وزير راڻا ثناءُ الله سميت 3 سئو ڄڻن تي داخل ڪيو ويو آهي جڏهن ته ڪابه گرفتاري عمل ۾ ناهي آئي. هوڏانهن تحريڪ انصاف جي سربراهه عمران خان چيو آهي ته فيصل آباد ۾ تحريڪ انصاف جي ڪارڪنن تي عابد شير علي ۽ راڻا ثناءِ الله جي غنڊن حملو ڪيو، ڪارڪنن جون قربانيون رائيگان نه وينديون، ظالمن جو مقابلو ڪيو ويندو… فيصل آباد جي ڊي ٽائپ چوڪ تي ڪارڪنن کي خطاب ڪندي عمران خان چيو ته ملڪ کي ظالمن مان ڇوٽڪارو ڏياريو ويندو، نواز شريف هميشه ظلم جي سياست ڪئي آهي، پوليس ۽ گلو بٽن سان گڏجي عوام تي ظلم ڪيو آهي، هاڻي پاڪستان جو عوام ظالمن جو مقابلو ڪندو. ٻئي طرف اڳوڻي صوبائي وزير راڻا ثناءُ الله چيو آهي ته فيصل آباد ۾ پي ٽي آءِ جو هڪ نه پر ٻه ڪارڪن مارجي ويا آهن، هڪ ڪارڪن ٽائرن کي باهه ڏئي رهيو هيو ته کيس ڪپڙن کي باهه لڳي وئي جنن تي هن واهه ۾ ٽپو ڏنو جنهن جو لاش نه پيو ملي. هن چيو ته شهر ۾ فائرنگ ڪندڙ شخص کي اڄ ظاهر ڪيو ويندو ته هو ڪير آهي.

 

هن وقت به 1970ع واريون حالتون نظر اچي رهيون آهن، ايم ڪيو ايم لاءِ هاڻي حڪومت ۾ جاءِ ناهي: منظور وساڻ

ڪراچي (اسٽاف رپورٽر) صوبائي وزير منظور وساڻ چيو آهي ته ايم ڪيو ايم لاءِ هاڻي حڪومت ۾ جاءِ ناهي، پر سهڪار جاري رکيو ويندو. ڪراچي ۾ سنڌ اسيمبلي ٻاهران ميڊيا سان ڳالهائيندي منظور وساڻ چيو ته پيپلز پارٽي ۽ ايم ڪيو ايم وچ ۾ اسلام آباد جي برسات وانگر جهيڙا ٿيندا رهندا آهن. هن چيو ته عمران خان کي جذباتي نه ٿيڻ گهرجي، سمورا معاملا ڳالهين ذريعي حل ٿيڻ گهرجي. سندس چوڻ هو ته هن وقت به 1970ع واريون حالتون نظر اچي رهيون آهن جڏهن ته ملڪ کي ڪمزور ڪرڻ لاءِ اهڙيون حالتون پيدا ڪيون پيون وڃن. صوبائي وزير منظور وساڻ چيو ته معيشت جي تباهي سبب ملڪ ۾ ترقي نه ٿي رهي آهي.

 

جهنگ ۾ پراڻي دشمني تان هڪ ئي خاندان جا 6 ڄڻا قتل

جهنگ (م.ڊ) پراڻي دشمني تان مخالفن هڪ ئي خاندان جي 6 ماڻهن کي قتل ڪري ڇڏيو جهنگ جي تعلقي اٺاره هزاري ۾ پراڻي تڪرار تان اڻڄاتل ماڻهن هڪ گهر ۾ گهري 6 ماڻهن کي قتل ڪري ڇڏيو مارجي ويندڙن ۾ 4 عورتون، هڪ بارڙي ۽ هڪ مرد شامل آهي، پوليس ڪيس داخل ڪري لاشن کي اسپتال منتقل ڪري ڇڏيو آهي پوليس جو چوڻ آهي ته مقتول خاندان جي ڪيترن ئي سالن کان مائٽن سان دشمني هلندي اچي پئي ۽ شاهدن جي روشهني ۾ شروعاتي طور تي اهو چئي سگهجي ٿو ته واردات ذاتي دشمني سبب ٿيو آهي.

 

حيدرآباد: تيز رفتار ڪار ۽ موٽر سائيڪل وچ ۾ ٽڪر، پي پٽ سميت 3 ڄڻا فوت ٿي ويا

حيدرآباد(بيورو) حيدرآباد جي قاسم آباد واري علائقي ۾ تيز رفتار ڪار ۽ موٽرسائڪل جي ٽڪر ۾ پي پٽ سميت 3 ڄڻا فوت ٿي ويا. گهوڙا گرائونڊ وٽ تيز رفتار ڪار ۽ موٽرسائڪل ۾ ٽڪر ٿي پيو، جنهن جي نتيجي ۾ سبزي مارڪيٽ جو راهوسي 40 ورهين جو محمد يوسف آرائين ۽ سندس پٽ فرقان آرائين ٿڏي تي فوت ٿي ويا، جڏهن ته ميمڻ سوسائٽي جو راهوسي ڪار ڊرائيور ڪاشف ميمڻ سخت زخمي ٿي پيو… زخمي کي سول اسپتال منتقل ڪيو ويو، جتي هن زخمن جا سور نه سهندي ڌم ڌڻي حوالي ڪري ڇڏيو. ٽنهي فوتين جا لاش سول اسپتال مان پوسٽ مارٽم بعد وارثن حوالي ڪيا ويا. حادثي سبب روڊ مڪمل طور تي بند ٿي ويو ۽ ڪيتريون ئي گاڏيون بيهجي ويون…

 

فواد خان نئين فلم ۾ ايڪشن هيرو طور نظر ايندو

ممبئي (شوبز نيوز)اداڪار فواد خان پنهنجي ايندڙ فلم ۾ ايڪشن هيرو طور نظر ايندو. ذريعن مطابق بالي ووڊ جي فلم خوبصورت ۾ ڪم ڪندڙ پاڪستاني اداڪار فواد خان پاڪ ڀارت لاڳاپيل پروڊڪشن فلم ٺاهڻ جو ارادو ڪري چڪو آهي جنهن ۾ هو پاڻ ايڪشن هيرو نظر ايندو. فواد خان مطابق هو فلمن ۾ مختلف قسمن جا ڪردار ڪرڻ پسند ڪندو آهي ۽ ايڪشن هيرو بڻجڻ لاءِ هن کي پنهنجو وزن وڌائڻو پوندو. فواد چيو ته هن کي شوگر جي بيماري آهي ان لاءِ هو پنهنجي خوراڪ محتاط طريقي سان استعمال ڪندو آهي ته جيئن صحتمند ۽ چست رهي.

 

پاڪستان ۾ موسيقي ۽ فلم جي بحران تي ڏک ٿيو: گلوڪار رجب علي

لاهور (شوبز نيوز) مشهور گلوڪار رجب علي اڄ ڪلهه لنڊن کان لاهور آيل آهي. هو هتي پي ٽي وي، ريڊيو ۽ ٻين شعبن ۾ پنهنجا گانا رڪارڊ ڪرائڻ ۽ شوبز دوستن سان ملڻ ۾ مصروف آهي. رجب علي هڪ ملاقات ۾ ٻڌايو ته پاڪستان ۾ ميوزڪ ۽ فلم جو بحران ڏسي ڏک ٿيو آهي. مون کي اميد آهي ته حالتون جلد بهتر ٿي وينديون.

 

ليجنڊ اداڪار الياس ڪشميري جي ستين ورسي جمعي تي ملهائي ويندي

فيصل آباد (شوبز نيوز)پاڪستان فلم انڊسٽري جي ليجنڊ اداڪار الياس ڪشميري جي ستين ورسي جمعي 12 ڊسمبر تي ملهائي ويندي. ان موقعي تي سڄي ملڪ جي نگار خانن ۾ خاص تعزيتي تقريبون منعقد ڪيون وينديون. جڏهن ته ليجنڊ اداڪار جا مداح پڻ سندس روح جي ايصال ثواب لاءِ قرآن خوانين ۽ فاتحه خوانين جو اهتمام ڪندا. الياس ڪشميري 5 ڏهاڪن تي مشتمل پنهنجي فلمي سفر ۾ اهم ڪردارن کي يادگار بڻايو. مرحوم اداڪار کي 83 سالن جي عمر ۾ شوگر جي بيماري ٿي جنهن تي ڊاڪٽرن سندس هڪ پير پڻ ڪٽيو پر پوءِ به هو بچي نه سگهي ۽ 12 ڊسمبر 2007ع تي لاڏاڻو ڪري ويو.

 

”سلم ڊاگ ملين ائر“ مان شهرت حاصل ڪرڻ خوشگوار احساس هو: فريده پنٽو

لاس اينجلس (شوبز نيوز) ڀارتي اداڪاره فريده پنٽو چيو آهي ته فلم ”سلم ڊاگ ملين ائر“ مان ان کي جيڪا شهرت ملي اهو هڪ خوشگوار احساس هو پر ان سان گڏ هڪ چيلينج به هو. ڀارتي ميڊيا مطابق فريده چيو اهي ته سندس اصل جدوجهد ان فلم کان پوءِ شروع ٿي. فريده هڪ ميگزين کي انٽرويو ڏيندي ٻڌايو ته مون کي پنهنجي ڪيريئر جو پهريون ڏاڪو چڙهڻ کان اڳ آخري ڏاڪي تي پهچڻو پيو ۽ ڪنهن بلندي تان ڪرڻ تمام گهڻو ڏکوئيندڙ هوندو آهي. هن چيو ته با معنيٰ ڪم ڳولهڻ تمام گهڻو ڏکيو ڪم آهي ان لاءِ هن ڪمرشل فلمن بدران اهي فلمون ڪيون جيڪي بامعنيٰ هيون. منهنجي لاءِ اهو وڏو اعزاز هو.

 

انٽر ڊائريڪٽوريٽ اسڪولز بوائز هاڪي چيمپيئن شپ ۾ اڄ وڌيڪ چئن ميچن جو فيصلو ٿيندو

اسلام آباد (اسپورٽس نيوز)فيڊرل بورڊ آف انٽر ميڊيئيٽ اينڊ سيڪنڊري ايجوڪيشن جي انتظام هيٺ فيڊرل بورڊ انٽر ڊائريڪٽوريٽ اسڪولز بوائز هاڪي چيمپيئن شپ جون وڌيڪ چار ميچون اڄ اربع تي پاڪستان اسپورٽس ڪمپليڪس اسلام آباد ۾ کيڏيون وينديون. چيمپيئن شپ ۾ فيڊرل بورڊ سان لاڳاپيل 9 مختلف اسڪولن جون ٽيمون حصو وٺي رهيون آهن. چيمپيئن شپ جا سيمي فائينل مقابلا 11 ڊسمبر جڏهن ته فائينل ۽ ٽين پوزيشن جا مقابلا 12 ڊسمبر تي کيڏيا ويندا.