تازيون خبرون

Daily Archives: December 10, 2014

هٿياربند فوج دهشتگردي خلاف جنگ ۾ عظيم قربانيون ڏنيون: نواز شريف

اسلام آباد(بيورو) وزيراعظم نواز شريف چيو آهي ته قبائلي علائقن ۾ ڪامياب آپريشن کانپوءِ امن سان پوري خطي ۾ استحڪام ايندو، هٿياربند فوج دهشتگردي خلاف جنگ ۾ عظيم قربانيون ڏنيون آهن هن اها ڳالهه پنهنجي صدارت هيٺ ٿيل اعليٰ سطحي اجلاس ۾ چئي، اجلاس ۾ آرمي چيف جنرل راحيل شريف، گورنر خيبرپختونخواهه ۽ وفاقي خزاني وارو وزير اسحاق ڊار، پرڏيهي صلاحڪار سرتاج عزيز ۽ خصوصي معان طارق فاطمي به شريڪ هئا، وزيراعظم ان موقعي تي وڌيڪ چيو ته هٿياربند فوج دهشتگردي خلاف جنگ ۾ عظيم قربانيون ڏنيون آهن آپريشن ضرب عضب دهشتگردن جي چيلهه ڀڃي ڇڏي، آءِ ڊي پيز جي حوالي سان هن چيو ته آءِ ڊي پيز پاڪستان ۾ استحڪام لاءِ عظيم قربانيون ڏنيون حڪومت آءِ ڊي پيز جي ٻيهر بحالي ۽ آبادڪاري جي ذميواري پوري ڪندي، ذريعن مطابق اجلاس ۾ ڊي جي ملٽري آپريشن ضرب عضب ۽ خالي ڪرايل علائقن تي بفرينگ ڏني ۽ آءِ ڊي پيز جي واپسي ۽ بحالي جي منصوبي جو جائزو ورتو ويو.

 

تحريڪ انصاف ڪراچيءَ ۾ گڙ ٻڙ ڪئي ته قانون حرڪت ۾ ايندو: وڏو وزير

ڀٽ شاهه (بيورو) سنڌ جي وڏي وزير سيد قائم علي شاهه ڀٽ شاهه ۾ ميڊيا سان ڳالهائيندي  چيو آهي  ته ڪراچي ۾ تحريڪ انصاف جي جمهوري احتجاج ۾ مداخلت نه ڪئي ويندي پر جيڪڏهن انهيءَ دوران ڪنهن به گڙٻڙ ڪئي ته قانون به حرڪت ۾ ايندو. عمران خان 12 ڊسمبر تي آئين جي دائري ۾ رهي احتجاج ڪيو ته ٺيڪ آهي ۽ جيڪلڏهن ڪابه گڙٻڙ ڪئي ته پوءِ قانون به حرڪت ۾ ايندو. هن چيو ته حضرت شاهه عبداللطيف ڀٽائي  جو آفاقي ڪلام  انسانيت  جي  ڀلائي  جو درس ڏي ٿو ۽ سندس صوفياڻي تصور  ۾  محبت،پيار،گڏ جي  رهڻ ۽ مذهبي هم آهنگي جو پيغام سمايل آهي  جنهن تي عمل ڪرڻ سان اسان  اڄوڪي دنيا ۾ ڦهليل افراتفري، بدامني، دهشتگردي،۽ عوام سان ٿيندڙ زيادتين کي روڪي سگهون ٿا.هن اهڙو اظهار اڄ حضرت شاهه عبداللطيف ڀٽائي رح جي 271 هين  عرس جي پڄاڻي تي ڀٽ شاهه ۾ سندس درگاهه تي چادر چاڙهن کانپوءِ صحافين سان ڳالهائيندي ڪيو  وڏي وزير سيد قائم علي شاهه  وڌيڪ چيو ته  دنيا ۾  امن امان جي  قيام لاءِ شاهه سائين اڄ کان 300 سال اڳ پنهنجي پيغام جي صورت ۾ هڪ آئين ڏنو جنهن تي عام ماڻهو  طرفان عمل ڪرڻ سان  معاشري ۾ بهتري ايندي  ۽ گڏ وگڏ ملڪي ترقي جي راهه پڻ هموار ٿيندي  هن چيو ته شاهه سائين  پنهنجي  ڪلام سڄي ڪائنات  جي خوشحالي ۽  آباد هجڻ  جي دعا ڪئي آهي هڪ سوال تي  هن چيو ته سنڌ اندر  تازو ئي نوجوانن جي ملندڙ لاشن واري واقعي  تي کيس گهرو افسوس آهي  ۽ هن ان سلسلي ۾ وفاقي حڪومت توڙي وفاقي گهرو کاتي سان انتظامي توڙي سياسي سطح تي رابطو ڪيو آهي  ۽ ان  معاملي ۾ سنجيده پڻ آهي ته جيئن  ان واقعي  جي مڪمل طور تي  انڪوائري ڪرائي مقتولن جو سدباب ڪري سگهجي هن چيو ته هن وقت سنڌ جو هي حساس معاملو آهي جنهن جي صحيح نشاندهي ڪري  ان جي چڱي طرح جاچ ڪرائي وڃي ته جيئن ان سلسلي کي روڪي سگهجي  هن چيو ته  ملڪ ۾ امن امان قائم ڪرڻ جي ذميواري وفاق جي پڻ آهي  تنهنڪري سنڌ حڪومت  صوبي  جي صورتحال تي  ضابطي لاءِ  رينجرز جون خدمتون حاصل ڪيون آهن  هن چيو ته جيتوڻيڪ دهشتگردي  خلاف ويڙهه  ۾ پوليس توڙي رينجرز جي  سوين اهلڪارن  جانين جون قربانيون ڏيڻ باوجود  هڪ مثالي ڪردار ڪيو آهي  تنهن باوجود به  دهشتگردي خلاف اها  جنگ جاري آهي هن چيو ته موجوده حڪومت ۾  ڪيترائي  دهشتگرد ماريا ويا آهن ۽ سوين دهشتگرد گرفتار ڪري کين سزائون ڏنيون ويون آهن  جنهن جو مثال ماضي ۾ ڪٿي به نٿو ملي  هن چيو ته دهشتگردن پنهنجي گرفتار ساٿين کي آزاد ڪرائڻ لاءِ  ڪراچي جيل ۾ سرنگهه لڳائڻ جي  ڪوشش ڪئي پر سنڌ حڪومت سندن اهڙي ڪوشش کي ناڪام بڻائي ڇڏيوهن چيو ته  سنڌ پوليس  ۾ پيشور مهارت توڙي  جديد هٿيارن  جي کوٽ کي پورو ڪرڻ لاءِ سنڌ حڪومت ڪوششون  ورتيون  پر اهڙين ڪوششن کان اڳ ئي  حالتن کي خراب ڪرڻ لاءِ حملا ڪيا ويا  هن  چيو ته جيڪڏهن  بهتري  ڏانهن ڪو قدم کينو وڃي  ته ان تي اڳواٽ شڪ شبه  نه ڪيا وڃن  سيد قائم علي شاهه چيو ته سنڌ ڪراچي کان ڪشمورتائين هڪ آهي  ۽ان  ۾ ڪنهن به قسم جو فرق نه آهي  ۽ سنڌ جو  عوام  پڻ مضبوط آهي ۽ عوام جي مضبوطي سان ئي ملڪ  مضبوط ٿيندو هڪ ٻئي سوال  تي هن چيو ته  اسان جمهوري ماڻهو آهيون ۽ قانون آئين مطابق  جدو جهد ڪندا رهندا سين ڇاڪاڻ ته شهيد ذوالفقار علي ڀٽو پڻ  آئين مطابق پنهنجي جدوجهد ڪئي  هن چيو ته جيڪڏهن  ڪنهن قانون کي هٿ ۾ کنيو ته قانون حرڪت ۾ ايندو سنڌ ۽ پنجاب ۾ بلدياتي چونڊن جي حوالي سان هڪ سوال تي  وڏي وزير چيو ته سنڌ اسيمبلي طرفان  قانون پاس ڪرڻ باوجود تڪ بندين جو ڪم  اڃا رڪيل آهي ۽ سپريم ڪورٽ جي  فيصلي تي مڪمل طرح سان  عمل درآمد  ڪيو ويندو  جنهن  مطابق اليڪشن ڪميشن تڪ بندين جي ذميواري پوري  ڪندي  جيتوڻيڪ اليڪشن ڪميشن جي بيان مطابق سنڌ  ۾ 6 مهينن  تائين چونڊون نه ٿيون ٿي سگهن ڇاڪاڻ ته  ان کان اڳ تڪبندين  جو مرحلو پورو ٿيڻو آهي  ڀٽ شاهه ۾ صوفي ازم يونيورسٽي بابت هڪ سوال تي وڏي وزير چيوته پ پ پ  جي شريڪ چيئرمين ۽ اڳوڻي صدر آصف علي زرداري  معاشري مان افراتفري جي خاتمي لاءِ صوفي ازم يونيورسٽي قائم ڪرڻ جو فيصلو ڪيو  جنهن لاءِ ڀٽ شاهه ۾ زمين جي نشاندهي پڻ ڪئي وئي آهي ۽ تمام جلد يونيورسٽي جي نيئن عمارت قائم ڪئي ويندي  هن چيو ته عارضي عمارت ۾ قائم يونيورسٽي ۾ استادن توڙي نصاب جي کوٽ  جو مسئلو درپيش آهي  جنهن پڻ تمام جلد  پور ڪيوويندو  هڪ ٻئي سوال تي هن چيو ته قومي مالياتي ايوارڊ جي مد ۾ سنڌ حڪومت جا وفاق ڏانهن 50 کان 60 ارب روپيا  رهيل آهن جن جي وصولي  لاءِ هن وفاق سان رابطو پڻ ڪيو آهي ان کان اڳ وڏي وزير سيد قائم علي شاهه ڀٽ شاهه آمد  وقت درگاهه حضرت شاهه عبداللطيف ڀٽائي  تي  چادر چاڙهي سندس سالياني  عرس  مبارڪ  جي  تقريبن جي پڄاڻي ڪئي ۽ فاتح خواني پڻ ڪئي  ان موقعي تي وڏي وزير  مستحق  عورتن ۾ ڪپڙا پڻ ورهايا  بعد ۾ وڏي وزير  اوقاف کاتي حڪومت سنڌ طرفان درگاهه  جي کاٻي طرف  7 ملين روپين جي لاڳت سان تعمير ڪيل  شاهه سائين جي قديمي ۽ تاريخي تخت گاهه حويلي جو افتتاح پڻ ڪيو  ان موقعي تي کيس ٻڌايو ويو  ته  شاه سائين جي هي  تخت گاهه 25 فٽ ڊگهي 53 فٽ ويڪري آهي  جنهن ۾ گنبد وارا 3 ڪمرا  شامل آهن  جنهن جو ڪم سيپٽمبر 2012 ۾ شروع ڪيو ويو جيڪو جون 2014 ۾ مڪمل ٿيو آهي جڏهن ته حويلي جو اندريون ۽ ٻاهريون ڪم مڪمل طور ڪاشيءَ جو ٿيل آهي  جنهن اندر شاهه سائين جي استعمال ۾ ايندڙ کٽ ۽ سندس لٺ پڻ رکيل آهي  . ان موقعي تي ثقافت واري صوبائي وزير شرميلا فاروقي، صوبائي صلاحڪار سرفراز راڄڙ، پ پ پ ضلعي مٽياري جو صدر امير علي شاهه  هاشمي ، سيڪريٽري ثقافت اعجاز ميمڻ، سيڪريٽري اوقاف غلام مصطفيٰ ڦل ، ڊويزنل ڪمشنرحيدرآباد سيد آصف حيدر شاهه  ڊي آئي جي حيدرآباد  ثناالله  عباسي ، ڊي سي مٽياري فياض حسين عباسي ، ايس ايس پي مٽياري  امجد  علي شيخ ۽ ٻيا پڻ ساڻس  گڏ هئا.

 

وزيراعظم ناهلي ڪيس: سپريم ڪورٽ سموريون درخواستون خارج ڪري ڇڏيون وزيراعظم توڙي گهرو وزير جي بيان ۽ آءِ ايس پي آر جي ٽوئٽ ۾ ڪو به تضاد ناهي: سپريم ڪورٽ

اسلام آباد (بيورو) ســُپريم ڪورٽ، وزيراعظم نواز شريف جي نااهليءَ بابت سموريون درخواستون خارج ڪري ڇڏيون، عدالت پنهنجي فيصلي ۾ چيو آهي ته وزيراعظم توڙي گهرو وزير جي بيان ۽ آءِ ايس پي آر جي ٽوئٽ ۾ ڪو به تضاد ناهي. چيف جسٽس ناصر المــُلڪ جي سربراهي ۾ سپريم ڪورٽ جي 7 رڪني بينچ، وزيراعظم نواز شريف جي نااهلي بابت درخواستن تي ٻڌڻي ڪئي. ٻڌڻي دوران چيف جسٽس ريمارڪس ڏنا ته سپريم ڪورٽ جي ٽه رڪني بينچ، 6 سوال اٿاريا جن ۾ پنجون سوال اهم آهي جنهن ۾ پڇيو ويو آهي ته ڇا آرٽيڪل 66 ڪــَي تحت پارليامينٽ ۾ ميمبرن کي مڪمل ڇوٽ حاصل آهي؟ عدالتي بينچ، درخواست گــُذار گوهر نواز سنڌو کان پڇاڻو ڪيو ته وزيراعظم جي تقرير جو ڪهڙو حصو ڪوڙ تي ٻڌل آهي، جنهن تي گوهر نواز سنڌو چيو ته وزيراعظم ايوان ۾ پنهنجي تقرير دوران چيو ته هن فوج کي سهولتڪار ناهي بڻايو جڏهن ته آءِ ايس پي آر وزيراعظم بيان جي ترديد ڪئي. جسٽس آصف سعيد کوسا پڇاڻو ڪيو ته وزيراعظم ايوان ۾ وفاقي گهرو وزير چوڌري نٿار بابت ڳالهه ڪئي هئي پوءِ وچ ۾ اهو ڪيڏانهن اچي ويو. جسٽس ثاقب نثار چيو ته اهم عمارتن جي حفاظت فوج جي حوالي هئي اهڙي ريت آئين تحت فوج ملوث هئي. چيف جسٽس ريمارڪس ڏنا ته ڪنهن جي خواهش تي وزيراعظم کي نااهل قرار نه ٿو ڏئي سگهجي. دليل ٻــُڌڻ بعد سپريم ڪورٽ وزيراعظم جي نااهلي بابت سموريون درخواستون خارج ڪري ڇڏيون. عدالت پنهنجي فيصلي ۾ قرار ڏنو ته وزيراعظم نواز شريف، وفاقي گهرو وزير چوڌري نثار جي بيان ۽ آءِ ايس پي آر جي ٽوئيٽ ۾ ڪو به تضاد ناهي.

 

اليڪشن ڪميشن جا ميمبر استعيفيٰ ڏين، خورشيد پاران اسيمبلين جو مدو چار سال ڪرڻ جي تجويز

اسلام آباد (بيورو)  مخالف ڌر جي اڳواڻ سيد خورشيد شاهه به اليڪشن ڪميشن جي چارئي ميمبرن کان استعيفيٰ جو مطالبو ڪري ڇڏيو، اسيمبلين جو مدو پنج سالن مان چار سال ڪرڻ لاءِ آئين ۾ ترميم جي تجويز به ڏئي ڇڏي. نجي ٽي وي سان ڳالهائيندي خورشيد شاهه چيو ته اليڪشن ڪميشن جا ميمبر ٽربيونلز جا فيصلا 3 مهينن ۾ به ڪرڻ ۾ ناڪام رهيا آهن. ايئن لڳي ٿو ته اٺ لک روپيا پگهار سبب اُهي استعيفيٰ نه ڏئي رهيا آهن. خورشيد شاهه چيو ته اسيمبلين جي مدي ۾ 5 سالن بجاءِ چار سال ڪرڻ لاءِ آئين ۾ترميم ڪئي وڃي. قومي اسيمبلي ۾ مخالف ڌر جي اڳواڻ سيد خورشيد شاهه چيو آهي ته فيصل آباد ۾ وزيراعظم کي ان جي پنهنجي ٽيم نقصان پهچايو ايئن لڳي ٿو ته وزيراعظم نواز شريف پاڻ ئي عمران خان کي ليڊر بڻائڻ چاهي ٿو، اسلام آباد ۾ ميڊيا سان ڳالهائيندي خورشيد شاهه چيو ته پيپلز پارٽي ڪنهن به طرح سان حڪومت جي حمايتي ناهي، اسان رياست جي حمايت ڪري رهيا آهيون، جيڪڏهن هن موقعي تي مسلم ليگ ن بجاءِ عمران خان جي حڪومت به هجي ها ۽ اهي ئي حالتون هجن ها ته پيپلزپارٽي ان جي حمايت ڪري ها جڏهن سياسي ڪارڪنن جو ڪارڪنن سان رستن تي مقابلو ٿيندو آهي ته ملڪ ۾ گهرو ويڙهه شروع شروع ٿي ويندي آهي، مخالف ڌر جي اڳواڻ جو چوڻ هو ته هر دور ۾ اهڙا ماڻهو هوندا آهن جيڪي حڪومت کي هلڻ ناهن ڏيندا، پيپلز پارٽي جي گذريل حڪومتي دور ۾ ميمو اسڪينڊل منظرعام تي آيو هو ته نواز شريف پاڻ ئي ان کي سپريم ڪورٽ ۾ کڻي ويو هو عمران خان ۽ حڪومت کي احساس هجڻ گهرجي ته ان ويڙهه سان رياست کي نقصان ٿيندو، فيصل آباد ۾ گذريل ڏينهن پيش ايندڙ واقعو افسوسناڪ آهي فيصل آباد ۾ نواز شريف کي ان جي پنهنجي ٽيم نقصان پهچايو ان صورتحال ۾ حڪومت کي صبر ڪرڻ گهرجي ها، ايئن لڳي ٿو ته مسلم ليگ ن عمران خان کي ليڊر بڻائڻ چاهي ٿي.

 

سنڌ اسيمبلي ۾ الطاف حسين ۽ بينظير ڀٽو يونيورسٽي قائم ڪرڻ لاءِ بل منظور

ڪراچي (اسٽاف رپورٽر) سنڌ اسيمبلي ۾ الطاف حسين ۽ بينظير ڀٽو يونيورسٽي قائم ڪرڻ لاءِ ٻه بل اڪثريتي راءِ سان منظور ٿي ويا، اجلاس دوران بجلي بند هجڻ تي ڊپٽي اسپيڪر بل ٽارچ جي روشني ۾ پڙهيو سنڌ اسيمبلي جو اجلاس ڊپٽي اسپيڪر شهلا رضا جي صدارت ۾ ٿيو، حيدرآباد ۾ الطاف حسين يونيورسٽي قائم ڪرڻ جو بل پيش ڪيو ويو ته ميمبرن اڪثريت راءِ سان ان جي حق ۾ فيصلو ڏيندي ان کي منظور ڪيو ايوان کي خطاب ڪندي ايم ڪيو ايم جي اسيمبلي ميمبر رئوف صديقي چيو تهڪنهن دور ۾ الطاف حسين جي يونيورسٽي ۾ داخلا بند هئي پر هي انهي جي ڪوششن جو نتيجو آهي، رئوف صديقي الطاف حسين يونيورسٽي قائم ڪرڻ لاءِ آصف زرداري ۽ ملڪ رياض ۽ ڊاڪٽر سڪندر مينڌرو جو به شڪريوادا ڪيو، پيپلز پارٽي جي اسيمبلي ميمبر اشفاق منگي ايوان کي خطاب ڪندي مطالبو ڪيو ته ڪشمور ۽ دادو ۾ به يونيورسٽي قائم ڪئي وڃي ان کانپوءِ ايوان جي بجلي بند ٿي وئي، جنريٽر جو انتظام نه هجڻ سبب پيش ڪيل شهيد بينظير ڀٽو يونيورسٽي جو بل ٽارچ جي روشني ۾ پڙهيو ويو ۽ اڪثريت راءِ سان منظور ٿيو، اڄ سنڌ اسيمبلي ۾ جعلي عاملن خلاف قرارداد به پيش ٿي ايم ڪيو ايم جي اسيمبلي ميمبر ڪامران اختر قرارداد پيش ڪندي مطالبو ڪيو ته جعلي عاملن خلاف ڀرپور ڪارروائي جي ضرورت آهي

 

بلاول ڀٽو ۽ آصف زرداري وچ ۾ اختلاف وڌي ويا، سبب اويس مظفر ۽ فريال جي پارٽي معاملن ۾ مداخلت نڪتو: ذريعا

لاهور(م.ڊ) آصف علي زرداري ۽ بلاول ڀٽو وچ ۾ اختلاف وڌي ويا آهن اختلافن جو بنيادي سبب اويس مظفر ۽ فريال ٽالپر جي پارٽي معاملن ۾ مداخلت نڪتو جڏهن ته اهي به اطلاع آهن ته سنڌ جي وڏي وزير سيد قائم علي شاهه ۽ قومي اسيمبلي ۾ مخالف ڌر جو اڳواڻ سيد خورشيد شاهه به بلاول ڀٽو کي پسند ناهن جڏهن ته آصف علي زرداري بلاول ڀٽو کي پارٽي معاملن کان پري رکڻ جو فيصلو ڪيو آهي ذريعن مطابق بلاول ڀٽو پارٽي کي بينظير ڀٽو جي مشن مطابق هلائڻ ۽ انهن جي ساٿين کي گڏکڻي هلڻ چاهي ٿو ۽ پارٽي جو فرينڊلي اپوزيشن جو تاثر ختم ڪرڻ کي به ترجيح ڏئي ٿو، جڏهن ته ان جي مقابلي ۾ آصف زرداري اڃان به مفاهمتي سياست ڪرڻ چاهي ٿو ذريعن مطابق بلاول ڀٽو ڪيترن ئي اڳواڻن جي ڪرپشن سبب ناراض نظر اچي پيو ان سموري صورتحال کانپوءِ بلاول ڀٽُ فيصلو ڪيو آهي ته هو شهيد بينظير ڀٽو جي پراڻن ساٿين کي گڏ ڪرڻ لاءِ تمام جلد ان حوالي سان باقاعده رابطن جو سلسلو شروع ڪندو، ذريعن جو اهو به چوڻ آهي ته بلاول ڀٽو زرداري کي ان جي ويجهن ساٿين الڳ گروپ جوڙڻ جو به مشورو ڏنو آهي ان سلسلي ۾ بلاول ڀٽو کي پنهنجي ڀيڻ بختاور ۽ آصفه کان علاوه شهيد بينظير ڀٽو جي ڀيڻ ۽ بلاول ڀٽو جي ماسي صنم ڀٽو جي به مڪمل حمايت حاصل آهي جڏهن ذريعن وٽان معلوم ٿيو آهي ته بلاول ڀٽو کي احتياط کان ڪم وٺڻ ۽ سياست کان ڪجهه عرصو پري رهڻ جو مشورو ڏنو ويو آهي ۽ هي مشورو ڪنهن ٻئي نه پر سندس والد آصف علي زرداري ڏنو آهي.

 

پاڪستان ۾ غريب ۽ هيٺئين طبقي جي حڪمراني جو انقلاب ضرور ايندو: الطاف حسين

لنڊن (مانيٽرنگ ڊيسڪ) متحده قومي موومينٽ جي قائد الطاف حسين چيو آهي ته حق پرست شهيدن جون قربانيون رائيگان نه وينديون ۽ شهيدن جي مقدس خون جي صدقي پاڪستان ۾ غريب ۽ هيٺئين طبقي جي حڪمرانن جو انقلاب ضرور ايندو 9 ڊسمبر يوم شهداءِ حق جي موقعي تي پنهنجي خصوصي بيان ۾ الطاف حسين سمورن حق پرست شهيدن کي زبردست خراج عقيدت پيش ڪندي چيو ته حق پرست شهيدن جي حق پرستي جي نظرئي، مشن، مقصد ۽ ڪاز لاءِ پنهنجين جانين جو نذرانو پيش ڪيو پر ڪنهن ظالم قوت اڳيان سر نه جهڪايو قوم جي بهتر مستقبل لاءِ پنهنجين قيمتي جانين جو نذرانو پيش ڪندڙ حق پرست شهيد ايم ڪيو ايم جو قيمتي سرمايو آهن، الطاف حسين چيو ته حق پرست شهيدن جي لازوال قربانين جو ثمر آهي جو اڄ ايم ڪيو ايم جو حق پرست فڪر ۽ فلسفو ڪشمير ۽ گلگت بلتستان سميت پوري پاڪستان ۾ ڦهلجي چڪو آهي، پوري ملڪ ۾ جاگيرداراڻي نظام خلاف غريب ۽ هيٺئين طبقي جي حڪمراني جو شعور تيزي سان وڌي رهيو آهي.

 

عمران خان جو نئين پاڪستان وارو ماڊل افسوسناڪ آهي:شرجيل ميمڻ

ڪراچي (اسٽاف رپورٽر) سنڌ جي اطلاعات ۽ بلديات واري وزير شرجيل انعام ميمڻ چيو آهي ته فيصل آباد سانحو پنجاب حڪومت جي نااهلي جو کليل ثبوت آهي. عمران خان جي نئين پاڪستان جي حقيقت هاڻ هن ملڪ جي عوام تي ظاهر ٿي چڪي آهي ته هو جهيڙي ۽ مارڌاڙ جي پاليسي اختيار ڪري ورتي آهي. ڪراچي ۾ 12 ڊسمبر تي تحريڪ انصاف جي احتجاجتي کين مڪمل سڪيورٽي فراهم ڪئي ويندي. پي ٽي آئي جي ليڊرشپ کي گهرجي ته هو ڪراچي جي صورتحال کي نظر ۾ رکي احتجاج لاءِ ڪجهه جايون مختص ڪري وٺي ها ته کين سڪيورٽي فراهم ڪري سگهجي. زبردستي ڪاروبار ۽ ٽرانسپورٽ بند ڪرائڻ ملڪ جي معيشيت لاءِ فائديمند نه آهي البته جيڪڏهن ڪير پاڻ احتجاج تي ڪاروبار ۽ ٽرانسپورٽ بند ڪري ٿو ته ان ۾ حڪومت کي ڪوبه اعتراض نه هوندو. هو اڱاري تي سنڌ اسيمبلي جي اجلاس کان اڳ ميڊيا سان ڳالهائي رهيو هو. شرجيل انعام ميمڻ چيو ته فيصل آباد ۾ گذريل ڏينهن جيڪو ڪجهه ٿيو اهو افسوس جوڳو آهي. ان واقعي پنجاب حڪومت ۽ ن ليگ جي نااهلي کي ثابت ڪيو آهي. هن چيو ته جيڪڏهن ڪا هڪ جماعت احتجاج ڪري ٿي ته ٻي جماعت کي گهرجي ته هو پنهنجن ڪارڪنن کي انهن آڏو نه بيهاري. هن چيو ته اهڙي طرح جي سياست سان ملڪ جهيڙي طرف وڃي سگهي ٿو. هن چيو ته عمران خان ۽ ان جي پارٽي جي ليڊرشپ پاران سڀاڻي کان پوءِ ان جي نئين پاڪستان جو ماڊل به عوام سامهون اچي ويو آهي ته هو جهيڙي، مار ڌاڙ جي سياست چاهي ٿو. شرجيل ميمڻ چيو ته اهڙي قسم جا واقعا ٻيهر رونما نه ٿين ان جو ڀرپور خيال رکڻو پوندو ڇو ته جيڪڏهن ٻيهر ڪٿي به ايئن ٿيو ته اهو ملڪ لاءِ خطرو هوندو. هن چيو ته ڪراچي ۾ 12 ڊسمبر تي عمران خان جي سڏتي کين مڪمل سڪيورٽي فراهم ڪئي ويندي ۽ پيپلز پارٽي پنهنجن ڪارڪنن کي ڪنهن به صورت ۾ انهن آڏو نه آڻيندي. هن چيو ته پرامن احتجاج سمورين سياسي جماعتن جو حق آهي ۽ اسان اڳ به عمران خان ۽ ان جي پارٽي کي ڪراچي ۽ لاڙڪاڻي ۾ ٿيندڙ جلسن ۾ سڪيورٽي فراهم ڪئي آهي. هن چيو ته سنڌ حڪومت پاڻ به پي ٽي آءِ  جي مقامي ليڊرشپ سان 12 ڊسمبر جي حوالي سان ڳالهائيندي ان کي چوندي ته هو ضرور پنهنجو احتجاج ڪن پر، پرامن طور ڪن. هن چيو ته ڪراچي جي صورتحال ۽ هتي دهشتگردي جي حوالي سان سڀ آگاهه آهن ان لاءِ اسان چاهيون ٿا ته تحريڪ انصاف 12 ڊسمبر تي ڪجهه هنڌ مختص ڪري اسان کي ٻڌائي ته کين مڪمل سڪيورٽي فراهم ڪري سگهجي. هڪ سوال جي جواب ۾ شرجيل انعام ميمڻ چيو ته زبردستي ڪاروبار ۽ ٽرانسپورٽ کي بند ڪرائڻ ملڪي معيشيت کي تباهي طرف ڌڪڻ جي برابر آهي ۽ ان جي اسان ڪنهن به صورت ۾ اجازت نه ڏينداسين البته جيڪڏهن ڪير پنهنجو ڪاروبار ۽ ٽرانسپورٽ رضاڪاراڻي طور بند ڪري ٿو ته حڪومت کي ان تي ڪوبه اعتراض نه هوندو. هن چيو ته زبردستي ڪاروبار بند ڪرائڻ سان جتي ملڪي معيشيت کي نقصان ٿئي ٿو ته ٻي طرف لکن جي تعداد ۾ روزانه پورهئي تي ڪم ڪندڙن کي به بک کي منهن ڏيڻو ٿو. ان لاءِ منهنجي پي ٽي آءِ سميت سمورين سياسي جماعتن کي گذارش آهي ته هو احتجاج ضرور ڪن پر ڪاروبار ۽ ٽرانسپورٽ کي زبردستي بند ڪرائڻ کان پاسو ڪن.

 

مهان ڏاهي ڪامريڊ سوڀي گيانچنداڻي جون آخري رسمون لاڙڪاڻي ۾ ادا ڪيون ويون, ماحول سوڳوار،مڙه تي گلن جي ورکا

لاڙڪاڻو (بيورو) مهان ڏاهي ڪامريڊ سوڀي گيانچنداڻي جون آخري رسمون لاڙڪاڻي ۾ ادا ڪيون ويون، مڙهه کڄڻ وقت ماحول سوڳوار ٿي ويو، مڙهه تي گلن جي ورکا ڪري قومي گيت پيش ڪيا ويا، سيد جلال محمود شاهه، صنعان قريشي ۽ ڊاڪٽر مشتاق ڦل سميت سياسي سماجي، ادبي ڌرين توڙي مٽن مائٽن ۽ دوستن وڏي انگ ۾ آخري رسمن ۾ شرڪت ڪئي…. گذريل ڏينهن بيماري سبب 95 ورهين جي ڄمار ۾ سنڌ کان وڇڙي ويل مهان ڏاهو ڪامريڊ سوڀو گيانچنداڻي جون آخري رسمون لاڙڪاڻي ۾ ادا ڪيونويون.. ڪامريڊ سوڀي جو مڙهه آخري ديدار لاءِ سندس رهائشگاهه کان ٻاهر آندو ويو، جتي وڏي انگ ۾ ماڻهن سندس ديدار ڪيو… آخري ديدار واري رسم کانپوءِ سندس مڙهه شمشان گهاٽ نيو ويو، جتي اگني سنسڪار ڪيو ويو، پنچائت جي فيصلي تحت ڪامريڊ جي شمشان گهاٽ ۾ سماڌي ٺاهي ويندي.. ڪميونسٽ پارٽي طرفان مڙهه تي گلن جي ورکا ڪئي وئي، جسقم طرفان قومي ترانو پڙهيو ويو. آخري رسمن ۾ ايس يو پي سربراهه سيد جلال محمود شاهه، جسقم چيئرمين صنعان قريشي، ڊاڪٽر مشتاق ڦل، امداد قاضي، هندو پنچائت جي وائيس چيئرمين ڊاڪٽر ڌرم پال ۽ ٻين اديبن، دانشورن توڙي سياسي سماجي اڳواڻن وڏي انگ ۾ شرڪت ڪئي… آخري رسمن ۾ شريڪ اڳواڻن چيو آهي ته سوڀي جو وڇوڙو سنڌ لاءِ وڏو نقصان آهي، ڪامريڊ ڪڏهن به موقف تبديل نه ڪيو ۽ سدائين سنڌ جي حقن جي ڳالهه ڪندو رهيو. لاڙڪاڻي جي ڳوٺ ٻنڊي ۾ 3 مئي 1920 تي جنم وٺندڙ ڪامريڊ سوڀي گيانچنداڻي جي وڇوڙي تي لاڙڪاڻي جو ماحول سوڳوار آهي.

 

ڏڪاريل ڏيهه ۾صبح سان ئي موت جي راڪاس7 گلن جهڙن ٻارڙن کي مرجهائي ڇڏيو

ٿرپارڪر (نمائندو) ڏڪاريل ڏيهه ۾ اڄ صبح سان ئي موت جي راڪاس 7 گلن جهڙن ٻارڙن کي مرجهائي ڇڏيو، 4 ٻارڙا مٺي سول اسپتال ۽ 3 ڇاڇري ۾ فوت ٿي ويا، ڏڪار سبب 70 ڏينهن دوران فوت ٿي ويلن ٻارڙن جو انگ 185 ٿي ويو آهي…. مٺي جي سول اسپتال ۾ جنيسر جو ٻن ڏينهن جو ٻارڙو، 21 ڏينهن جو رميش ميگهواڙ، ٻن ڏينهن جو قيمت مينڌرو ۽ 14 ڏينهن جو رميش خوراڪ جي کوٽ سبب فوت ٿي ويو.. ڇاڇري جي اسپتال ۾ 6 مهينن جو ريشم فوت ٿي ويو، جڏهن ته ڳوٺ راڪڙا ۾ 4 ڏينهن جي رضيه ۽ 7 ڏينهن جي جميلا فوت ٿي ويا آهن، ڏڪار سبب 70 ڏينهن دوران فوت ٿي ويلن ٻارڙن جو انگ 185 ٿي ويو آهي.. مٺي، ڇاڇرو، اسلام ڪوٽ ۽ ٻين شهرن جي اسپتالن ۾ ڪيترائي ٻارڙا داخل آهن، اسپتال اندر دعوائن جي کوٽ ۽ خوراڪ نه هئڻ ڪري ٻارڙن جي حالت ويتر خراب ٿيندي پئي وڃي…. بک ۽ مختلف بيمارين ۾ وڪوڙيل سوين ٻارڙن جي حالت ڳڻتي جوڳي هئڻ باوجود حڪومت امدادي ڪمن ۾ تيزي ناهي آندي، جنهن سبب ٻارڙن جي فوت ٿيل جو سلسلو جاري آهي… وزيراعظم طرفان معاملي جو نوٽيس وٺڻ باوجود ٿر جي صورتحال جيئن جو تئين آهي. سنڌ سرڪار ۽ مقامي انتظاميا جي بي حسي سبب ٿري سخت تڪليفن کي منهن ڏئي رهيا آهن، روز ٻارڙا فوت ٿيڻ سبب ماحول سوڳوار بڻيل آهي.