تازيون خبرون

Daily Archives: December 9, 2014

عمران خان جو پلان سي ملڪ ۾ انارڪي پيدا ڪرڻ آهي: پرويز رشيد

اسلام آباد(بيورو) اطلاعات واري وفاقي وزير پرويز رشيد چيو آهي ته عمران خان جو پلان اي جمهوريت تي حملو، پلان بي ڌرڻي کانپوءِ جمهوريت جو گهيراءُ ۽ پلان سي ملڪ ۾ انارڪي پيدا ڪرڻ آهي پريس ڪانفرنس کي خطاب ڪندي هن چيو ته ريڊ زون واري غنڊه گردي اڄ فيصل آباد ۾ ڪئي وئي پي ٽي آءِ جي ڏنڊا بردارن کليل دڪانن تي حملو ڪيو رستن تي باهه ڏئي ٽريفڪ بند ڪرڻ جي ڪوشش ڪئي وئي، وفاقي وزير جو چوڻ هو ته پي ٽي آءِ سربراهه جي شهرن کي بند ڪرڻ واري اعلان تي پوري ملڪ مان مخالف ردعمل آيو عمران خان کي تسليم ڪرڻو پوندو ته ان جي ڪال تي ڦيٿاروڪ ۽ پرتشدد واقعا ٿيا، اڄ ڪاروباري ۽ تعليمي ادارا کليل رهيا فيصل آباد ۾ صبح کان ٽريفڪ معمول تي هئي هن وڌيڪ چيو ته جمهوري طاقتن جي اتحاد عمران خان جي اي ۽ بي پلان کي ناڪام بڻائي ڇڏيو پلان سي تحت شهر بند ڪرڻ جي ڪال جي فيصلآباد جي شهرين مذمت ڪئي آهي. پرويز رشيد چيو آهي ته  عمران خان ڪوڙ ڳالهائڻ جو چيمپئن آهي، کيس اعتراف ڪرڻ گهرجي ته فيصل آباد جي ماڻهن سندس سڏ کي موٽ نه ڏني، جنهن تي هنن هٿ سان رتو ڇاڻ ڪرائي، هن چيو ته عمران خان پاڻ اسلام آباد ۾ ڪارڪنن کي خطاب ۾ چوندو رهيو آهي ته انهن کي ڳچين مان پڪڙيو، گهليو ته اهي جملا ڀڙڪائڻ نه آهن ته ڇا آهن؟ هن چيو ته عمران خان پي ٽي وي تي حملي جي هدايت ڏيڻ کان انڪار ڪيو، چيائين ته هو ڪنٽينر ۾ سُتل هو ۽ کيس ڪا خبر ئي نه هئي، جيڪا ڳالهه غلط ثابت ٿي. هن چيو ته فيصل آباد ۾ اڄ جيڪو ڪجهه ٿيو آهي، اهو سڄي قوم ڏٺو آهي ته ڏنڊا ڪنهن جي هٿ ۾ هئا، پٿراءُ ۽ فائرنگ ڪنهن پئي ڪئي؟ هن چيو ته فيصل آباد جي سموري غنڊه گردي عمران خان جي چوڻ تي ٿي آهي، کيس پنهنجي ڏوهه جو اعتراف ڪرڻ گهرجي ۽ تسليم ڪرڻ گهرجي ته فيصل آباد جي ماڻهن سندس سڏ کي موٽ نه ڏني.

 

فيصل آباد: پي ٽي آءِ جو احتجاج، ناولٽي چوڪ ميدان جنگ بڻجي ويو، هڪ مارجي ويو

اسلام آباد/فيصل آباد (مانيٽرنگ ڊيسڪ) تحريڪ انصاف پاران فيصل آباد ۾ احتجاج ڪيو پيو وڃي، پِي ٽــِي آءِ ۽ ن ليگ ڪارڪنن ۾ چڪرين سبب ناولٽي چوڪ جنگ جو ميدان بڻجي ويو، فائرنگ ۾ تحريڪ انصاف جو هڪ مارجي ويو ۽ ڪيترائي زخمي ٿي پيا. تحريڪ انصاف پاران چونڊ ڌانڌلين خلاف احتجاج لاءِ فيصل آباد شهر جي 9 هنڌن کي احتجاج جو مرڪز بڻايو ويو جتي انتظاميه پاران 4 هزار کان وڌيڪ پوليس اهلڪار مقرر ڪيا ويا, تحريڪ انصاف ۽ نواز ليگ ڪارڪنن ناولٽي پل ڀرسان هڪ ٻئي تي پٿراءُ ڪيو ۽ چڪرين دوران هڪ ٻئي جا ڪپڙا به ڦاڙي ڇڏيا. ڇڪتاڻ واري صورتحال کي نظر ۾ رکندي مظاهرين کي ڇڙوڇڙ ڪرڻ لاءِ انتظاميه واٽر ڪينن جو به استعمال ڪيو پر سادا ڪپڙا پهريل شخص جي فائرنگ ۾ پي ٽي آءِ جا 2 ڪارڪن زخمي ٿي پيا. زخمين کي الائيڊ اسپتال منتقل ڪيو ويو جتي هڪ ڪارڪن زخمن جا سور نه سهندي دم ڏنو. پهرين مرحلي ۾ پي ٽي آءِ ڪارڪن ملت چوڪ تي گڏ ٿيا جتي هنن ٽائر ساڙي احتجاج ڪيو ۽ روڊ بلاڪ ڪري ڇڏيو جڏهن ته نواز ليگ ڪارڪنن به پهتا جن پي ٽي آءِ جا بينر ڦاڙي ڇڏيا. ٻنهي جماعتن جا ڪارڪن هٿين پئجي ويا پر پوليس صورتحال تي ضابطو آندو. الائيڊ چوڪ تي پي ٽي آءِ جي عورت ورڪرز احتجاجي ڌرڻو هنيو. ان موقعي تي پي ٽي آءِ ڪارڪنن طرفان گو نواز گو ۽ ن ليگي ڪارڪنن ” رو عمران رو“ جا نعرا هنيا. جڏهن ته صورتحال تي ضابطي لاءِ انتظاميه وڌيڪ پوليس نفري ۽ واٽر ڪينن گاڏيون طلب ڪري ورتيون آهن.فيصل آباد ۾ تحريڪ انصاف جي هڙتال واري سڏ جي موقعي تي پي ٽي آءِ جي ڪارڪنن زبردستي تعليمي ادارا بند ڪرائڻ شروع ڪيا، جڏهن ته شهر جي مختلف چوڪن، چوراهن تي ٽائر ساڙي روڊ بلاڪ ڪيا ويا، ان موقعي تي نواز ليگي ڪارڪنن ۽ پي ٽي آءِ جي ڪارڪنن وچ ۾ پهرين نعريبازي، بعد ۾ پٿراءُ ۽ لٺبازي ٿي، جنهن کانپوءِ فائرنگ جي ڏي وٺ ۾ هڪ ڪارڪن مارجي ويو ۽ ڪيترائي زخمي ٿي پيا. ڊاڪٽرن جو چوڻ آهي ته سيني ۾ گولي لڳڻ سبب اصغر علي جو موت واقع ٿيو، پي ٽي آءِ دعويٰ ڪئي آهي ته مقتول اصغر علي سندن ڪارڪن هو.فيصل آباد جي ملت روڊ، عبدالله پور، ستيانه روڊ، نڙ والا روڊ، گهنٽا گهر چوڪ ۽ ٻين هنڌن تي پي ٽي آءِ ڪارڪنن جو احتجاج جاري آهي ۽ اتي ٽائر سڙي رهيا آهن، جڏهن ته ڪارڪنن وچ ۾ چڪرين جو سلسلو به تيز ٿي ويو آهي، جنهن تي پوليس ضابطو آڻڻ ۾ مڪمل طور تي ناڪام ٿي وئي آهي. پي ٽي آءِ ۽ نواز ليگ جي ڪارڪنن وچ ۾ چڪرين جي شروعات نعريبازي ۾ ٿي، جنهن ۾ هڪڙن ڪارڪنن گو نواز گو ۽ ٻين رو عمران رو جا نعرا هنيا.نعريبازي کانپوءِ ڪارڪنن هڪٻئي تي پٿراءُ ڪيو، جنهن کانپوءِ ڏنڊا کڻي هڪٻئي کي تشدد جو نشانو بڻايو ويو ۽ آخر ۾ وري هٿياربند ڪارڪنن فائرنگ شروع ڪري ڇڏي، جنهن ۾ هڪ ڪارڪن هيل تائين فوت ۽ ڪيترائي زخمي ٿي پيا آهن. فيصل آباد جي انتظاميه جو چوڻ آهي ته پي ٽي آءِ جي ڪارڪنن تشدد جي واٽ ورتي آهي ۽ زبردستي دڪان ۽ تعليمي ادارا بند ڪرائڻ جي ڪوشش ڪئي وئي. فيصل آباد جي انتظاميه صورتحال تي ضابطي لاءِ ڀرپاسي جي ضلعن مان 1500 پوليس اهلڪار ۽ واٽر ڪينن گاڏيون طلب ڪيون آهن پر اڃا تائين فيصل آباد ۾ صورتحال معمول تي نه آئي آهي.فيصل آباد جي انتظاميه اڻ وڻندڙ صورتحال کي نظر ۾ رکندي سمورين سرڪاري اسپتالن ۾ ايمرجنسي لاڳو ڪري عملي جون موڪلون رد ڪري ڇڏيون آهن. شاهه محمود قريشي چيو آهي ته پي ٽي آءِ جو احتجاج پر امن آهي ۽ عمران خان به اِن احتجاج جو حصو ٿيڻ لاءِ فيصل آباد پهچي رهيو آهي. عمران خان پنهنجي ٽئيٽ ۾ چيو آهي ته هو منجهند جو ساڍين ٽين وڳين گهنٽا گهر چوڪ فيصل آباد پهچندو، جتي احتجاج جو حصو ٿيندو. تحريڪ انصاف جي چيئرمين عمران خان چيو آهي ته امن امان جي صورتحال خراب ڪرڻ جي ذميوار حڪومت آهي ۽ فيصل آباد ۾ پهچي حڪمرانن خلاف ايف آءِ آر درج ڪرائيندس، بني گالا کان فيصل آباد روانگي کان پهريان ميڊيا سان ڳالهائيندي عمران خان جو چوڻ هو ته ڪنهن کي ڪوبه شڪ نه هجڻ گهرجي ته پرامن احتجاج سمورن پاڪستانين جو حق آهي ۽ انهن کي تحفط ڏيڻ رياست جو فرض آهي پر فيصل آباد ۾ شريف خاندان پنهنجن گلو بٽن ذريعي تشدد ڪري رهي آهي، تشدد جو رستو اختيار ڪرڻ شريف خاندان جي پراڻي عادت آهي جڏهن ته ان کان پهريان ماڊل ٽائون ۾ به ان قسم جي راند کيڏي وئي هئي، هن چيو ته جيڪڏهن ڪا غلطي ڪيون ها ته پوليس جو ڪم هو روڪڻ گلو بٽن جو نه، ن ليگ جا گلو بٽ تياري سان آيا هئا ۽ انهن مان هڪ شخص مظاهرين تي گوليون هلائي رهيو هو ۽ پوليس صرف ان کي ڏسندي رهي جڏهن ته راڻا ثناءُ الله پهريان ئي چئي چڪو هو ته احتجاج ڪندڙن کي ڏسي وٺنداسين، تحريڪ انصاف جي چيئرمين جو چوڻ هو ته شريف خاندا ن پنجاب ۾ پوليس اسٽيٽ بڻائي رکيو آهي ۽ جيڪڏهن لاهور ۾ طاقت جو مظاهرو ڪيو ويو ته ان جو مقابلو ڪري ڏيکاريندس، اسان جو ڏوهه هي آهي ته اسان انصاف گهري رهيا آهيون جڏهن ته حڪومت جائز مطالبا مڃڻ بجاءِ پنهنجي طاقت جو مظاهرو ڪري رهي آهي هن چيو ته مولانا فضل الرحمان نواز شريف جي چوڻ تي 30 نومبر تي پشاور ۾ اسان جي قافلي کي روڪيو پر اسان ان تي پوليس استعمال نه ڪئي، ڇو ته اسان جمهوري ماڻهو آهيون ان لاءِ اسان تشدد بجاءِ امن جو رستو اختيار ڪيو ۽ قافلي جو رستو بدلائي اسلام آباد پهتاسين جڏهن ته شريف فيملي هميشه کان ئي طاقت جو استعمال ڪندي رهي آهي. عمران خان چيو ته اليڪشن ٽربيونل جو فيصلو خوش آئند آهي ۽ جلد سچ سامهون اچي ويندو انصاف وٺڻ لاءِ اسان کي ڏيڍ سال لڳي ويو پر ٿيلهن ۾ پيل ثبوت جلد عوام سامهون اچي ويندو.

 

وزيراعظم جو فيصل آباد ۾ احتجاج دوران پُرتشدد واقعن جو نوٽيس، شرپسندن خلاف بنا فرق ڪاروائي جو حڪم

اسلام آباد (بيورو) وزيراعظم نواز شريف جو فيصل آباد ۾ تحريڪ انصاف جي احتجاج دوران پُرتشدد واقعن جو نوٽيس، شرپسندن خلاف بنا ڪنهن فرق ڪاروائي جو حڪم ڏئي ڇڏيو. وزيراعظم نواز شريف جي ترجمان مصدق ملڪ موجب وزيراعظم نواز شريف شرپسندن خلاف بنا ڪنهن فرق جي ڪاروائي ڪرڻ جي هدايت جاري ڪندي فيصل آباد ۾ پرتشدد صورتحال تي ضابطي آڻڻ جو حڪم ڏنو آهي. وزيراعظم جي ترجمان مصدق ملڪ چيو ته تحريڪ انصاف زبردستي دڪان بند ڪرائڻ جي ڪوشش ڪئي، تشدد ڪنهن به صورت حڪومتي پاليسي نه آهي، ڪنهن پارٽي کي شٽرڊائون هڙتال جي اجازت نه آهي، زبردستي دڪان بند ڪرائڻ ۽ ٽريفڪ روڪرائڻ غير قانوني آهي، ڌرڻن ۽ جلسن جي سيڪيورٽي تي اربين رپيا خرچ ٿي چڪا آهن.

 

سياستدان ئي ملڪ ۽ قوم جي تقدير بدلائيندا آهن: خورشيد شاهه

سکر (بيورو) قومي اسيمبلي ۾ مخالف ڌُر جي اڳواڻ سيد خورشيد احمد شاهه چيو آهي ته سياستدان ئي ملڪ ۽ قوم جي تقدير بدلائيندا آهن ۽ ادارا ٺاهيندا آهن، جنهن جو عظيم مثال شهيد ذوالفقار علي ڀٽو چئن سالن ۾ 7 ميڊيڪل ڪاليجز ٺاهي پيش ڪيو، جڏهن ته ان کان اڳ پاڪستان ۾ رُڳو 4 ميڊيڪل ڪاليج قائم هئا، شهيد ڀٽو ماڻهن ۾ هڪ نئين تعميري سوچ پيدا ڪئي ۽ يونيورسٽي گرانٽس ڪميشن جوڙي تعليم جي ميدان ۾ انقلاب آڻي ڇڏيو ته جيئن اسانجي ملڪ جا نوجوانپرڏيهه وڃي جديد تعليمي ۽ تعميري سوچ کڻي واپس اچن ۽ پنهنجي ملڪ اندر قومي ترقي لاءِ نيون راهون کولي سگهن. اهڙن خيالن جو اظهار هُن غلام محمد مهر ميڊيڪل ڪاليج سکر ۾ ڪاليج کي ڪوسٽر فراهم ڪرڻ واري تقريب کي خطاب ڪندي ڪيو. هن چيو ته اسانجي ٻهراڙي جي علائقن ۾ صحت جون سهولتون نه هئڻ برابر آهن، ڊاڪٽرن جي سخت اڻاٺ آهي اسانجي ڪوشش آهي ته صحت جي نظام کي بهتر ڪرڻ سان گڏوگڏ ماءُ جي صحت ۽ نوجوانن کي صحتمند بڻايون ته جيئن صحتمند سماج جوڙي سگهجي، اسان ماڻهن جي مسئلن کي پنهنجو مسئلو سمجهون ٿا جنهن جي حل لاءِ سموريون ڪوششون ورتيون وينديون. هن چيو ته ڊاڪٽري پيشو عظيم پيشو آهي ڇاڪاڻ جو اهو انساني صحت کي محفوظ بڻائي ٿو. سيد خورشيد احمد شاهه ٻڌايو ته غلام محمد مهر ميڊيڪل ڪاليج سکر ۾ ترقياتي ڪمن لاءِ 250 ملين رُپيا هلندڙ سال ۾ منظور ٿي چڪا آهن ۽ 2015ع ۾ گرلز هاسٽل جي تعمير لاءِ 500 ملين رُپيا جاري ٿيڻا آهن. اِن کان اڳ بينظيرڀٽو شهيد يونيورسٽي لاڙڪاڻو جي وائيس چانسلر پروفيسر ڊاڪٽر اصغر چنه خطاب ڪندي ٻڌايو ته سيد خورشيد احمد شاهه جي ايم اين اي فنڊن مان 3 ڪوسٽر سکر ڪاليج کي فراهم ڪيا ويا آهن ۽ ٽيچنگ اسپتال سکر ۾ ٿيليسيميا ۾ مبتلا ٻارڙن لاءِ بلڊ بينڪ ۽ پيٿالاجيڪل ليبارٽري کي بهتر ڪيو پيو وڃي. ان موقعي تي ايم اين اي سيد خورشيد احمد شاهه غلام محمد مهر ميڊيڪل ڪاليج جي پرنسپال ابرار شيخ کي ڪوسٽرن جون چاٻيون فراهم ڪيون.

 

اڳوڻي صدر زرداري جو بلاول کي احتياط کان ڪم وٺڻ ۽ سياست کان ڪجهه وقت جو وقفو ڪرڻ جو مشورو

اسلام آباد (بيورو) اڳوڻي صدر ۽ پيپلزپارٽي جي شريڪ چيئرمين آصف علي زرداري پنهنجي سياسي ڪيريئر جي لانچ جي ٻن مهينن بعد ئي پيپلزپارٽي چيئرمين بلاول ڀٽو زرداري کي احتياط کان ڪم وٺڻ ۽ سياست کان ڪجهه عرصي جو وقفو ڪرڻ جو مشورو ڏئي ڇڏيو. هڪ رپورٽ موجب اڳوڻي صدر ۽ پيپلزپارٽي جي شريڪ چيئرمين بلاول هائوس ۾ پنهنجي قيام دوران پارٽي جي هڪ گروپ سان ڳالهائيندي چيو ته بلاول جي بيان سان پيپلزپارٽي جا ايم ڪيو ايم سان ناتا خراب ٿي ويا ۽ هن پنهنجي پٽ کي سياست کان وقتي طور تي پري رهڻ جو مشورو ڏنو. پيپلزپارٽي 6 2 سالا بلاول ڀٽو زرداري جي سياسي ڪيريئر جو آغاز ڪراچي ۾ 8 1 آڪٽوبر تي ٿيل جلسي دوران ڪرايو هو. ان کان پهريان عيد جي موقعي تي هن ايم ڪيو ايم جي سربراهه الطاف حسين کي مخاطب ڪندي چيو هو ته هو پنهنجي نامعلوم ماڻهن کي سنڀالي رکي، جيڪڏهن سندس ڪارڪنن کي رهنڊ به آئي ته هو سندن جيئڻ حرام ڪري ڇڏيندو. ايم ڪيو ايم ان بيان تي سخت رد عمل ظاهر ڪندي سنڌ جي اتحادي حڪومت کان علحدگي اختيار ڪري ڇڏي هئي.

 

آرمي چيف سان ڏکڻ آفريقا جي هم منصب جي ملاقات، دفاعي سهڪار وڌائڻ تي اتفاق

راولپنڊي (م.ڊ) آرمي چيف جنرل راحيل شريف سان ڏکڻ آفريقا جي آرمي چيف جي ملاقات، ملاقات ۾ گڏيل دلچسپي جي معاملن تي ويچار ۽ ٻنهي ملڪن ۾ دفاعي سهڪار وڌائڻ تي اتفاق ڪيو ويو. پاڪ فوج جي سُڌ سماءَ واري شعبي آءِ ايس پي آر موجب ڏکڻ آفريقا جي آرمي چيف جنرل هيڊڪوارٽرز راولپنڊي ۾ آرمي چيف جنرل راحيل شريف سان ملاقات ڪئي. خوشگوار ماحول ۾ ٿيل ان ملاقاتن ۾ ٻه طرفا ناتن ۽ گڏيل دلچسپي جي معاملن تي ويچاريو ويو، ٻنهي هم منصبن جي ملاقات ۾ دفاعي سهڪار وڌائڻ تي اتفاق ڪيو ويو. آءِ ايس پي آر موجب ڏکڻ آفريقا جي آرمي چيف دهشتگردي خلاف جنگ ۾ پاڪستان جي ڪردار کي واکاڻيو، ڏکڻ آفريقا جي آرمي چيف دهشتگردي خلاف اتر وزيرستان ۾ جاري آپريشن ضرب عضب ۾ ڪاميابين تي آرمي چيف جنرل راحيل شريف کي واڌايون ڏنيون.

 

مڪاني چونڊن جون تياريون: سپريم ڪورٽ سنڌ ۽ پنجاب کي مهيني جي مهلت ڏئي ڇڏي

اسلام آباد (بيورو) سپريم ڪورٽ، سنڌ ۽ پنجاب جي حڪومتن کي مڪاني چونڊن جي حوالي سان تيارين لاءِ هڪ مهيني جي مهلت ڏئي ڇڏي. سپريم ڪورٽ ۾ مڪاني چونڊن ۽ چيف اليڪشن ڪمشنر جي مقرري بابت ڪيس جي ٻڌڻي ٿي. ان موقعي تي اليڪشن ڪميشن، سنڌ ۽ پنجاب ۾ مڪاني چونڊن بابت رپورٽ جمع ڪرائي. رپورٽ ۾ عدالت کي خاطري ڪرائي وئي آهي ته ٻئي صوبائي حڪومتون مڪاني چونڊن خاطر جلد تڪبندين لاءِ قدم کنيا ويندا. اليڪشن ڪميشن اختيارين جو چوڻ هو ته ڪينٽومينٽ بورڊ ۾ مڪاني چونڊن لاءِ آئيني مسودو ملي ويو آهي. عدالت، سنڌ ۽ پنجاب ۾ مڪاني چونڊن جي تيارين لاءِ هڪ مهيني جي ملهت ڏيندي ڪيس جي ٻڌڻي 8 ڊسمبر تائين ملتوي ڪري ڇڏي جڏهن ته عدالت چيف اليڪشن ڪمشنر سردار رضا جي مقرري بعد داخل درخواست به اڪلائي ڇڏي.

 

سنڌ جي وڏي وزير پاران سوڀي جي وڇوڙي تي ڏک جو اظهار، ڪامريڊ تاريخ جو امين هو: قائم علي شاهه

ڪراچي (اسٽاف رپورٽر) وڏي وزير سيد قائم علي شاهه ڪامريڊ سوڀو گيانچنداڻي جي وڇوڙي تي ڏک جو اظهار ڪندي چيو آهي ته ڪامريڊ سوڀو سنڌ جي تاريخ جو امين هيو، سندس لاڏاڻو سنڌ لاءِ وڏو نقصان آهي. جاري ڪيل پنهنجي بيان ۾ وڏي وزير سيد قائم علي شاهه ڪامريڊ سوڀو گيانچنداڻي جي وڇوڙي کي سنڌ لاءِ وڏو نقصان قرار ڏنو آهي. سيد قائمعلي شاه چيو آهي ته ڪامريڊ سوڀو گيانچنداڻي سنڌ جي تاريخ ۽ تهذيب جو امين هو، ڪامريڊ جو خال ڪڏهن به ڀرجي نه سگهندو.. وڏي وزير چيو ته ڪامريڊ سوڀو گيانچنداڻي جون سنڌ لاءِ ڪيل خدمتون ڪڏهن به وساري نٿيون سگهجن…

 

ننڍي کنڊ جو مهان ڏاهو سوڀو گيانچنداڻي 95 سالن جي ڄمار ۾ ديهانت ڪري ويو، سنڌ ۾ سوڳ

لاڙڪاڻو (بيورو) ننڍي کنڊ جو مهان ڏاهو ۽ سنڌ جو سپوت ڪامريڊ سوڀو گيانچنداڻي 95 ورهين جي ڄمار ۾ ديهانت ڪري ويو، سندس وڇوڙي تي هند ۽ سنڌ جا ڪروڙي سنڌي سوڳوار آهن، جڏهن ته سوڀي گيانچنداڻي جو اگني سنسڪار اڄ ڪيو ويندو. ڪامريڊ سوڀوگيانچنداڻي صبح جو ننڊ مان اٿڻ بعد چانهه پيئڻ بعد اُس جو تڙڪو وٺڻ لاءِ ڪرسي تي ويٺو ته هيٺ ڪِري پيو. ڪامريڊ جي پٽ نرمل داس کيس فوري طور تي چانڊڪا اسپتال جي ايمرجنسي وارڊ منتقل ڪيو جتي ڊاڪٽرن سندس ديهانت ٿيڻ جي تصديق ڪئي جنهن بعد ڪامريڊ جي اَرٿيءَ کي گهر منتقل ڪيو ويو. ڪامريڊ جي ديهانت واري خبر ٻــُڌڻ سندس مائٽ، دوست، قومپرست پارٽين جي ڪارڪنن سميت مختلف شعبن سان واسطو رکندڙ ماڻهو سندس رهائشگاهه تي پهچي ويا آهن. ڪامريڊ سوڀوگيانچنداڻي ڪافي عرصي کان ڇاتي جي انفڪيشن ۾ مبتلا هــُو ۽ کيس 2 ڀيرا ڪراچي جي اسپتالن مان سندس علاج ڪرايو ويو جتي سنڌ سرڪار وس آهر مالي سهائتا پڻ ڪئي. ڪامريڊ سوگيانچنداڻي جي پٽ نرمل داس موجب سندس والد جون آخري رسمون اڄ ادا ڪيون وينديون، ڇاڪاڻ ته ڪامريڊ جون نياڻيون ۽ ويجها مائٽ ٻاهرين ملڪن مان اچڻا آهن. ڪامريڊ سوڀوگيانچنداڻي جي ديهانت تي سنڌي ادبي سنگت جي سيڪريٽري جنرل مشتاق ڦل ست ڏينهن سوڳ ملهائڻ جو اعلان ڪيو آهي،

 

ڪراچي: سپر هاءِ وي تي 2 گاڏين وچ ۾ ٽڪر، 5 ڄڻا فوت

ڪراچي (اسٽاف رپورٽر) ڪراچي ۾ سپر هاءِ وي تي 2 گاڏين وچ ۾ ٽڪر جي نتيجي ۾ 5 ڄڻا فوت ٿي ويا. ريسڪيو ذريعن مطابق حادثو سپر هاءِ وي تي سهراب ڳوٺ ويجهو پيش آيو جنهن ۾ 2 گاڏيون پاڻ ۾ ٽڪرائجي ويون حادثي ۾ 5 ڄڻا فوت ٿي ويا جڏهن ته ڪيترائي زخمي ٿي پيا فوت ٿيندڙن جي لاشن ۽ زخمين کي فوري طور تي ايمبولينس وسيلي اسپتال منتقل ڪيو ويو آهي.