تازيون خبرون

Daily Archives: December 8, 2014

سنڌ حڪومت ڪمند جو اگهه ٻيهر 182 روپيا مقرر ڪري ڇڏيو

ڪراچي (اسٽاف رپورٽر)سنڌ جي وڏي وزير سيد قائم علي شاهه صوبي ۾ ڪمند جو اگهه عوام جي خواهش تي ٻيهر 182 روپيا مقرر ڪرڻ جو اعلان ڪندي چيو آهي ته سنڌ حڪومت ڪمند جو اگهه 182 روپيا طئي ڪيو آهي اميد ته شوگرمل مالڪ ان کي قبول ڪندا، سنڌ ۾ حڪومت جي رٽ قائم آهي ۽ رهندي ، سنڌ ۾ لاشن ملڻ جو سختي سان نوٽيس ورتو آهي ۽ پوليس توڙي گهرو کاتي جي اختيارين کي چيو آهي ته ٻڌايو وڃي ته آخر سنڌ ۾ بي گناهه ماڻهن کي ڇو ٿو ماريو وڃي.ڪالهه وزير اعليٰ هائوس ۾ پريس ڪانفرنس کي خطاب ڪندي هن چيو ته عوامي مفادن کي نظر ۾ رکندي سنڌ حڪومت ڪمند جو اگهه 182 روپيا مقرر ڪرڻ جو فيصلو ڪيو آهي. هن چيو ته ڪجهه شوگر ملن پيڙائي شروع ڪري ڇڏي آهي جڏهن ته اميد آهي ته باقي رهيل ملون پڻ جلد پيڙائي شروع ڪنديون. وڏي وزير چيو ته سنڌ هڪ زرعي صوبو آهي ۽ سنڌ جي معيشت جو دارومدار زراعت تي آهي. اسان جي حڪومت هميشه زراعت تي خاص ڌيان ڏنو آهي جنهن ڪري سنڌ ۾ ما شا الله بهترين فصل ٿين ٿا. ڪپهه لڳاتار سرپلس ۾ آهي، کنڊ ۽ ڪڻڪ به سرپلس ۾ آهي. هڪ سال ته ايتري سرپلس ٿي وئي جو 2 لک ٽن ڪڻڪ ايڪسپورٽ به ڪئي وئي. هن چيو ته اسان جي حڪومت عوامي ۽ جمهوري آهي جنهن ڪري اسان کي سڀ کان وڌيڪ عوام جا مفاد عزيز هوندا آهن.اسان ڪڻڪ جو اگهه مهانگائي کي نظر ۾ رکندي 1200 مان وڌائي 1250 روپيا في مڻ مقرر ڪيو آهي ۽ عوام کي اٽو سستي اگهه تي مهيا ڪرڻ جي لاءِ سنڌ حڪومت ڪڻڪ تي 6. 4 بلين جي سبسڊي پڻ ڏئي رهي آهي. هڪ سوال جي جواب ۾ وڏي وزير چيو ته سنڌ ۾ حڪومت جي رٽ قائم آهي ۽ قائم رهندي ڪنهن سان به زيادتي ٿيڻ نه ڏني ويندي. سنڌ ۾ لاشن ملڻ جي واقعن جو سختي سان نوٽيس ورتو آهي ۽ ان بابت گهرو وزارت توڙي پوليس اختيارين کان رپورٽ طلب ڪئي آهي ته ٻڌايو وڃي ته بي گناهه ماڻهن کي ڇو پيو ماريو وڃي.هڪ ٻئي سوال جي جواب ۾ وڏي وزير چيو ته بلدياتي اليڪشن جي حوالي سان سنڌ حڪومت هر وقت تيار آهي ۽ اها به پارٽي بنيادن تي ڪرائي ويندي. هڪ ٻئي سوال جي جواب ۾ سيد قائم علي شاهه چيو ته حيدرآباد هڪ وڏو شهر آهي اتي جي عوام جو مطالبو هو ته يونيورسٽي ڏني وڃي ان کي نظر ۾ رکندي اتي يونيورسٽي قائم ڪرڻ جو فيصلو ڪيو آهي جيڪا پرائيويٽ پارٽنر شپ تحت ٺاهي ويندي. هن چيو ته اسان چاهيون ٿا ته سنڌ ۾ وڌ کان وڌ تعليمي ادارا قائم ٿين.

 

سنڌ جو ثقافتي ڏهاڙو، ڪراچي کان ڪشمور تائين سنڌي جهومي اٿيا، عيد جا منظر

ڪراچي (اسٽاف رپورٽر) سنڌو ماٿريءَ جي تهذيب جي ڪروڙين وارثن ثقافتي ڏهاڙو ڀرپور جوش ۽ جذبي سان ملهايو، ننڍن وڏن شهرن،ڳوٺن،وستين ۽ واهڻن ۾ ريليون ڪڍي مختلف پروگرام منعقد ڪري سنڌ جي سينڌ کي سنوارڻ جو وچن ورجايو ويو، ثقافتي عيد جي موقعي تي ڪراچيءَ کان ڪشمور تائين سنڌين جو سمنڊ رستن تي نڪري آيو، چوطرف اجرڪ ٽوپيءَ وارن جو مان مٿانهون نظر اچي رهيو هو سنڌي ثقافت جي رنگن راڄڌاني واري شهر ڪراچيءَ جي سونهن کي چارچنڊ لڳائي ڇڏيا. ڪراچي ۾ ثقافت ڏهاڙي جي مک تقريب پريس ڪلب آڏو منعقد ڪئي وئي، جنهن ۾ شرڪت لاءِ وڏي انگ ۾ ڌرتي ڌڻين جي پريس ڪلب آمد جو سلسلو جاري رهيو، گلشن،حديد، پپري،رزاق آباد، ملير،ڀٽائي آباد، سچل ڳوٺ،ابراهيم حيدري،گلشن معمار، پي آءِ اي ڪالوني، سنڌي مسلم سوسائٽي،لياري ۽ ٻين علائقن ۾ به سنڌي ثقافت جا رنگ وکري پيا . حيدرآباد شهر ۾ عيد جي خوشين جهڙا منظر ڏسڻ ۾ ايا، مختلف هنڌن تي نوجوان، ٻار، پيرسن ۽ سياسي ورڪر اجرڪ ٽوپيون پهري رقص ڪري رهيا هئا، نوابشاهه شهر به سنڌي ٽوپي ۽ اجرڪ جي رنگن سان جرڪي پيو، جسقم، جساف پاران سرفراز ميمڻ،باقي بروهي ۽ ناصر شاهه جي اڳواڻي ۾ ريلي ڪڍي وئي. نوابشاهه ۾ ايس ٽي پي پاران پڻ نثار ڪيرئي ۽ اطهر شاهه جي اڳواڻي ۾ به ثقافتي ريلي ڪڍي وئي، جنهن ۾ سمورن طبقن سان لاڳاپيل ماڻهن بنا ڪنهن فرق جي شرڪت ڪئي. سجاول جي گرلز هاءِ اسڪول ۾ ثقافتي تقريب ڪوٺائي وئي، جنهن ۾ شاگردياڻين ٽيبلوز پيش ڪيا،جڏهن ته شهري اتحاد پاران ڊگري ڪاليج ۾ تقريب ڪوٺائي وئي. ميهڙ ۾ ثقافتي ڏهاڙي تي جسقم، پ پ ، عوامي تحريڪ، صحافين پاران عبدالخالق ٻگهئي، جاويد سومري،محرم بروهي، بابل ايري ۽ عبدالله سومري جي اڳواڻي ۾ ريلي ڪڍي وئي. ڪوٽڙي ۽ ڀرپاسي جي علائقن ۾ مختلف تنظيمن ايس يو پي، جسقم، عوامي جمهوري پارٽي، ايس ٽي پي، پ پ شهيد ڀٽو پاران ريليون ڪڍيون ويون. گمبٽ جي صادق پبلڪ ڪاليج ۾ ڪوٺايل ثقافتي تقريب ۾ ٻارڙن قومي گيتن تي جهريون هڻي ڀرپور خوشيءَ جو اظهار ڪيو. ڊکڻ ۾ سياسي،سماجي ڌرين پاران ثقافتي ريلي ڪڍي، دهل ۽ شرنائين تي جهمريون هنيو ويون. ٽنڊي آدم ۾ جيئي سنڌ محاذ، ايس يو پي ۽ پ پ يوٿ پاران ثقافتي ريليون ڪڍيون ويون. ڏهرڪي ۾ سياسي، سماجي۽ ٻين ڌرين پاران ثقافتي ڏهاڙي تي ريليون ڪڍي قومي گيتن تي جمهريون هنيون ويون. تنگواڻي ۾ شهرين پاران ثقافتي ريلي ڪڍي دهل شرنائين تي جمهريون هنيون ويون. ميرپورخاص ۾ زيبسٽ ۽ لٽل فوڪس اسڪول ۾ ثقافتي تقريب منعقد ڪئي وئي، جنهن ۾ وڏي انگ ۾ ماڻهن اجرڪ ۽ ٽوپيون پهري شرڪت ڪئي. ميرپور بٺوري ۾ سياسي، سماجي ڌرين توڙي شاگردن پاران علي بندر تائين ثقافتي ريلي ڪڍي وئي. هڱورجا جي مهراڻ ماڊل اسڪول ۾ ثقافتي تقريب ڪوٺائي وئي،جڏهن ته وارهه ۾ به مختلف سياسي، سماجي ۽ ادبي ڌرين پاران سني ڪاڪيپوٽي ۽ وحيد ڪلهوڙي، جي اڳواڻي ۾ سوين شهرين پاران ريلي ڪڍي رت جا ڏيئا ٻاري شهيدن کي ڀيٽا ڏني وئي. نئين دمبالي ۾ شهرين ثقافتي ڏهاڙو ملهائي ڀرپور خوشيءَ جو اظهار ڪيو، جڏهن ته پنگرئي ۾ پريس ڪلب آڏو ثقافتي تقريب ڪوٺائي وئي. دوڙ ۾ ايريگيشن گرائونڊ تي نوجوانن طرفان ثقافتي ميلو منعقد ڪيو ويو،جنهن ۾ سنڌي ثقافت کي اجاگر ڪرڻ لاءِ ٽوپي، اجرڪ، مٽي جي ٿانون ۽ ڪتابن سميت ٻين شين جا پڻ لڳايا ويا. دوڙ ۾ ئي ايس ٽي پي ڪارڪنن سليم آرائين جي اڳواڻي ۾ ثقافتي ريلي به ڪڍي وئي. فيض گنج ۾ جسقم جي سڏ تي شهرين ٽوپيون ۽ اجرڪ پهري ريلي ڪڍي،جڏهن ته ڳڙهي ياسين جي گرلز هائير سيڪنڊري اسڪول ۽ ڳوٺ خان وڌائي جي گورنمينٽ مڊل اسڪول ۾ ڌار ڌار ثقافتي پروگرام منعقد ڪيا ويا،جنهن دوران ٻارڙن ٽيبلوز پيش ڪري گيتن تي جمهوريون هنيون. نئين دمبالي ۾ به ثقافتي ريليون ڪڍيون ويون،جڏهن ته پنگرئي ۾ مختلف پارٽين جي ڪارڪنن ۽ شاگردن ثقافتي ويس پهري پريس ڪلب ڏانهن مارچ ڪيو. هالا جي گورنمينٽ پرائمري اسڪول ۾ منقعد ڪيل رنگا رنگ تقريب ۾ شهر جي مختلف اسڪولن جي ٻارڙن سنڌي ٽوپي ۽ اجرڪ پائي گيتن تي جمهريون هنيون. پيرجوڳوٺ ۾ محمد جمن راڄڙ جي گھر ۾ ثقافتي تقريب ڪوٺائي وئي، جنهن ۾ هٿ سان ٺهيل شين رليون،گج ونجڻا،پرس،دلا ۽ ٻيون شيون نمائش لاءِ رکيون ويون. گولاڙچي ۾ پ پ،ن ليگ، گسٽا، جسقم ۽ ٻين پارٽين پاران ريليون ڪڍيون ويون، جڏهن ته شهيد فاضل راهو چوڪ تي هزارين ماڻهن گڏجي رقص ڪيو،جڏهن ته مختلف اسڪولن جي انتظاميا پاران به پروگرام منعقد ڪيا ويا. سنڌي ثقافت کي اجاگر ڪرڻ لاءِ رتيدري جي مختلف علائقن ۾ جميل پبلڪ اسڪول ۽ اقصيٰ اسڪول جي انتظاميه پاران ريلي ڪڍي وئي،جڏهن ته منگي برادريءَ جي ماڻهن به ثقافتي لباس پهري ريلي ڪڍي. نئين ديري ۾ ثقافتي ڏهاڙي تي عيد جهڙو ماحول پيدا ٿي ويو،جسقم پاران عبدالحميد سومري جي اڳواڻيءَ ۾ ميونسپل چوڪ تي ڪئمپ قائم ڪئي وئي آهي. نئين ديري جي چنگچي ڊرائيورن پاران دهل شرنائن سان ريلي ڪڍي ڳڙهي خدابخش ۾ شهيدن جي مزارن تي حاضري ڀرڻ بعد رتيديري پهچي شهيد بشير خان قريشيءَ جي مزار تي پڻ سلامي ڀري. نئين ديري ۾ ئي سپاف سٽي طرفان جاويد ڀُٽي ۽ پ پ يوٿ پاران منصور سومري، اصغر ناريجي، حليم ناريجي ۽ ٻين جي اڳواڻيءَ ۾ ثقافتي ريلي ڪڍي وئي. جيڪب آباد ۾ هزارين شهري ۽ مختلف قومپرست توڙي سياسي سماجي تنظيمن جا ڪارڪن رستن تي نڪري آيا، جنهن دوران سنڌي ثقافت جي حق ۾ نعريبازي ڪئي وئي. ڪنڌ ڪوٽ ۾ مختلف سياسي سماجي تنظيمن جي ڪارڪنن اسڪولي شاگردن ۽ شهرين سنڌي ٽوپي ۽ اجرڪ پهري قومي عيد جو ڏهاڙو جوش ۽ جذبي سان ملهائي رقص ڪيو. سنڌڙي ۾ پريس ڪلب آڏو موسيقيءَ جي تقريب ڪوٺائي وئي،جنهن ۾ مقامي فنڪارن گيت ڳائي ڌرتيءَ سان محبت جو اظهار ڪيو،جڏهن ته ڦلهڏيون ۾ نياز مري، حفيظ مري ۽ انور مريءَ جي اڳواڻي ۾ ثقافتي ريلي پڻ ڪڍي وئي. اٺهٺ موري ڀرسان ڳوٺ دهراب خان چانڊئي جي اسڪول ۾ ثقافتي تقريب ڪوٺائي وئي،جنهن ۾ شاگردن ۽ شاگردياڻين شرڪت ڪئي. منهڙي ۾ نيشنل پريس ڪلب جي صدر غلام محمد ڀٽي ۽ پ پ اڳواڻ الهبچائي جمالي،غلام قادر ڏاهري، علي اصغر ڀٽي ۽ شوڪت لاشاري جي اڳواڻي ۾ موٽرسائيڪل ريلي ڪڍي مٺائي ورهائي وئي. ڍوري ناري ۾ مختلف تنظيمن جسقم، ڀيل باشعور فورم،فشرڪ فوڪ فورم،ايس ٽي پي، ايس يو پي ، پي پي پاران راجا ڪبير راڄڙ، عارف قريشي، گل حسن سمي، سومار ڀيل ۽ جلال ڀيل جي اڳواڻي ۾ ريلي ڪڍي قومي گيتن تي رقص ڪيو ويو..

 

ڌرڻا، هڙتالون ملڪ جي وڌندڙ معيشت لاءِ زهر جي برابر آهن: نواز شريف

لاهور (م.ڊ) وزيراعظم محمد نواز شريف چيو آهي ته ڌرڻا ۽ هڙتالون ملڪ جي وڌندڙ معيشت لاءِ زهر جي برابر آهن ملڪ ۽ قوم جي ترقي ۽ خوشحالي اسان جو اولين ايجنڊا آهي ۽ جيڪڏهن ڪو ان ۾ پنهنجو حصو وجهڻ چاهي ٿو ته ان کي خوش آمديد چونداسين، واپارين ۽ عوام جي جان ۽ مال جو تحفظ حڪومت جي ذميواري آهي ۽ ان کي هر صورت ۾ نڀايو ويندو، زبردستي ڪاروبار بند ڪرائڻ جي ڪوشش ڪندڙن خلاف قانون حرڪت ۾ ايندو، حڪومت خلوص نيت سان ڳالهيون چاهي ٿي ۽ ان طرفان به ان جو اظهار هجڻ گهرجي، ذريعن موجب اهڙن خيالن جو اظهار هن راءِ ونڊ ۾ وڏي وزير پنجاب محمد شهباز شريف سان ملاقات دوران ڳالهيون ڪندي ڪيو، ملاقات ۾ تحريڪ انصاف جي اڳواڻ عمران خان پاران اڄ فيصل آباد ۾ احتجاج جو سڏ ۽ پنجاب حڪومت پاران امن جي صورتحال کي ڪنٽرول ۾ رکڻ لاءِ قدم کڻڻ تي خيالن جي ڏي وٺ ڪئي وئي، ملاقات ۾ شهيد ڪربلا جي چهلم جي موقعي تي سيڪيورٽي بابت به خيالن جي ڏي وٺ ڪئي، جڏهن ته وڏي وزير، وزيراعظم نواز شريف کي توانائي سيڪٽر ۾ کنڊ جي سرمائيڪارن سان ٿيندڙ ملاقاتن کانسواءِ ڪمند جي آبادگارن کي مقرر امدادي قيمت ڏيارڻ لاءِ کنيل قدمن کان به آگاهه ڪيو.

 

پي ٽي آءِ ڳالهين لاءِ حڪومتي تجويز رد ڪري ڇڏي، وزير اعظم ڳالهين جو اشارو ڏئي ڇڏيو

اسلام آباد(بيورو) ڳالهين لاءِ حڪومت جي تجويز تحريڪ انصاف رد ڪري ڇڏي ۽ پنهنجي پلان سي تي ڀرپرو عملدرآمد جو اشارو ڏئي ڇڏيو ذريعن مطابق وزيراعظم نوازشريف جي صدارت هيٺ اهم وفاقي وزيرن ۽ حڪومتي ذميوارن جو اجلاس ٿيو جنهن دوران هڪ ڀيرو ٻيهر تحريڪ انصافن سان ڳالهين جو اشارو ڏنو ويو ۽ فيصلو ڪيو ويو ته پي ٽي آءِ سان ون پوائنٽ ايجنڊا تي ڳالهه ٻولهه ٿيندي، وفاقي خزاني واري وزير اسحاق ڊار چيو ته تحريڪ انصاف احتجاج ملتوي ڪري ته ڳالهين ۾ اڳڀرائي ٿي سگهي ٿي، ٻئي طرف ذريعن ٻڌايو ته تحريڪ انصاف ڳالهين تي آمادگي جو اظهار ڪيو جڏهن ته قيادت احتجاج ملتوي ڪرڻ جي تجويز رد ڪري ڇڏي آهي عمران خان فيصل آباد ۾ هڙتال جي پلان جي منظوري ڏئي ڇڏي آهي ۽ تياريون مڪمل ڪيون ويون آهن.

 

جوديشل ڪميشن جي قيام ۾ عمران خان خود رڪاوٽ آهي: پرويز رشيد

اسلام آباد (بيورو) سڌ سماءَ جي وزير پرويز رشيد چيو آهي ته عمران خان جوڊيشل ڪميشن جو مطالبو ڪيو هو پر هاڻ ان کي مڃڻ لاءِ تيار نه آهي سڀ کان وڏي رڪاوٽ هو پاڻ آهي، عمران خان ياداشت وسارڻ سبب قوم عزيت جي شڪار آهي ان هو پاڪستان جي معيشت جي حوالي سان جي ايس پي کي جي ايس ايم چوي ٿو، دعا آهي ته خان صاحب جي ياداشت واپس اچي، عمران خان مشرف جي ڪرايل چونڊن کي ته مڃيو هو جيڪڏهن جمهوري اليڪشن کي نه مڃي رهيو آهي ته عمران خان جي ڪوڙ جو پول کلي ويو آهي، ڇو ته جڏهن تڪ ئي نه کليو ته عمران خان ڪوڙين رپيا ڪٿان خرچ ڪيا، عمران خان جڏهن چونڊ ڌانڌلي جا ثبوت ئي ناهن ته عمران خان ٽربيونل ڇا ڪرڻ ويندو آهي، جيڪو شخص فارم بي ڀري نه سگهيو اهو ملڪ جون حالتون ڇا ٺيڪ ڪندو، پنجاب ۾ وڏي وزير پٽواري ڪلچر جو خاتمو ڪيو آهي، عمران خان ڪي پي ڪي ۾ پنهنجي ڪارڪردگي ٻڌائي، پرويز رشيد چيو ته عمران خان فتي ۽ فساد جي سياست ڪرڻ چاهي ٿو ۽ هو ڪوڙ ڳالهائي رهيو آهي ته اچر تڪ نه کليا، عمران خان بار بار موقف تبديل ڪري رهيو آهي، پهريان چيو ته حلقا کوليو ۽ هاڻ ٿيلها کولڻ جو مطالبو ڪري رهيو آهي، وفاقي وزير چيو ته قومي اسيمبلي جو اسپيڪر اياز صادق جي تڪ ۾ ڪنهن پولنگ ايجنٽ ڪا به شڪايت داخل نه ڪرائي آهي، عمران خان مردان پولنگ اسٽيشن عورت پولنگ ايجنٽ جو حوالو ڏنو، اسان جي خيال ۾ عمران خان صرف مالي معاملن ۾ ڪوڙ ڳالهائيندو آهي پر هاڻ خبر پئي ته هو سياسي معاملن ۾ به ڪوڙ ڳالهائيندو آهي.

 

آرمي چيف سان چين جي اسٽيٽ قونصلر ۽ پبلڪ سيڪيورٽي بابت وزير گووشين گيڪون جي ملاقات

راولپنڊي(م.ڊ) چيف آف آرمي اسٽاف جنرل راحيل شريف سان آچر ڏينهن هتي چين جي اسٽيٽ قونصلر ۽ پبلڪ سيڪيورٽي بابت وزير گووشين گيڪون سندس آفيس ۾ ملاقات ڪئي. پاڪ فوج جي سڌ سماءَ واي کاتي آءِ ايس پي آر طرفان جاري ٿيل بيان مطابق ملاقات دوران گڏيل دلچسپي جي معاملن، علائقائي سلامتي ۽ دفاع جي شعبن ۾ ٻه طرفي سهڪار ۽ رابطن کي هٿي ڏيڻ جي طريقن تي غور ويچار ڪيو ويو. ان موقعي تي چين جي اسٽيٽ قونصلر ۽ سندس وفد جي ٻين ميمبرن کي خطي ۾ جاري صورتحال بابت بريفنگ ڏني وئي. چيني وفد ۾ شامل شخصيتن دهشتگردي خلاف جنگ ۽ علائقائي استحڪام لاءِ پاڪستان جي ڪوششن ۽ جاري آپريشن ضرب عضب جي ڪاميابين جي ساراهه ڪئي.

 

پيپلز پارٽي جو پارليامينٽ ۾ هارين جي معاملي تي حڪومت کي ٽف ٽائيم ڏيڻ جو فيصلو

اسلام آباد (بيورو) پيپلز پارٽي جي اڳواڻ آصف علي زرداري هارين جي معاملي کي پارليامينٽ ۾ اٿارڻ لاءِ ڪميٽي ٺاهڻ جي هدايت ڪئي آهي، ذريعن موجب پ پ پارليامينٽ ۾ هارين جي معاملي تي حڪومت کي ٽف ٽائيم ڏيڻ جو فيصلو ڪيو آهي، آصف علي زرداري پارليامينٽ ۾ هارين جي مسئلي کي اٿارڻ لاءِ پ پ جي ميمبرن جي هائوس ڪميٽي ٺاهڻ جي منظوري ڏني آهي، پ پ جي شريڪ چيئرمين آصف علي زرداري پارٽي جي ڪجهه اجلاسن کانپوءِ هارين جي معاملي کي پارليامينٽ اندر ڀرپور طريقي سان اٿارڻ جو اعلان ڪيو، آصف زرداري پارٽي جي ايندڙ چونڊ منشور ۾ هارين جو باب شامل ڪرڻ جي به هدايت ڪئي آهي جنهن لاءِ جلد پارٽي جي هڪ ڪميٽي چونڊ منشور لاءِ پارٽي جي زرعي پاليسين لاءِ سفارشون پيش ڪندي، آصف علي زرداري هدايت ۾ واضح ڪيو آهي ته هارين جي مسئلن تي حڪومت کي رعايت نه ڏني ويندي.

 

بلاول ڀٽو سنڌ حڪومت جي ڪارڪردگيءَ تي ناراض، سينيئر اڳواڻن سان سڌا سنوان رابطا شروع ڪري ڇڏيا: ذريعا

لاهور (بيورو) پيپلز پارٽي جي چيئرمين بلاول ڀٽو زرداري پارٽي جي سينيئر اڳواڻن سان سڌا رابطا شروع ڪري ڇڏيا آهن، ايندڙ ڏينهن ۾ اڪيلي سر ملاقاتن جو امڪان ظاهر ڪيو ويو آهي، ذريعن موجب بلاول ڀٽو پنهنجي والد جي ترز سياست کان متفق نه آهي ۽ هو پنجاب ۾ قيادت جي تبديلي کانسواءِ پ پ جي مٿان فرينڊلي اپوزيشن جو ليبل به لاهڻ چاهي ٿو، ذريعن موجب بلاول ڀٽو سنڌ ۾ پ پ جي حڪومت جي ڪارڪردگي کان به خوش نه آهي ۽ هو تبديلي چاهي ٿو، ٻڌايو ويو آهي ته بلاول ڀٽو ان تنازر ۾ پارٽي جي سينيئر اڳواڻن سان رابطا شروع ڪري ڇڏيا آهن ۽ ايندڙ ڏينهن ۾ ون ٽو ون ملاقاتن جو امڪان ظاهر ڪيو ويو آهي.

 

پاڪستان 62 بيلن ڊالر جي ٻاهرين قرضن ۾ ٻڏي چڪو آهي: سراج الحق

پشاور (بيورو) جماعت اسلامي جي امير سراج الحق چيو آهي ته پاڪستان 62 بيلن ڊالر جي ٻاهرين قرضن ۾ ٻڏي چڪو آهي، 15 سئو ملين سالياني ڪرپشن جي نظر ٿي وڃن ٿا، وياجي نظام الله سان جنگ آهي، اهو ئي سبب آهي جو اڄ ملڪ جو هر شعبو ۽ هر فرد افراتفري جو شڪار آهي، اسان جي سياست معيشت، تعليم گرز اهو آهي ته هر غلامي جي شعبني جي زنجيرن ۾ جڪڙيل آهي، پشاور ۾ حفظ قرآن ۽ ناظران مڪمل ڪندڙ شاگردن جي دستاربندي جي تقريب کي خطاب ڪندي هن چيو ته مفاد پرست حڪمرانن صرف ملڪ کي نه پر ايندڙ نسلن کي ٻاهرين قرضن ۾ ٻوڙيو آهي، جڏهن ته ڪرپشن جي لعنت اسان جي معيشت کي تباهه ڪري ڇڏيو آهي، هن چيو ته آمريڪا اسان جي حڪمرانن کي پنهنجي ڌوڪي ۾ رکيو آهي، جماعت اسلامي جي حڪومت آئي ته غريب ۽ ملڪ جي صدر جو پٽ هڪ ئي نصاب جا ڪتاب پڙهندا  وياجي نظام جو خاتمو ڪيو ويندو.

 

ثقافت کاتي جي صوبائي وزير حضرت شاهه عبداللطيف ڀٽائي جي عرس جو افتتاح ڪري ڇڏيو

حيدرآباد ( هه آ)  صوبائي وزير سياحت ۽ ثقافت  شرميلا  فاروقي چيو آهي  ته   ملڪ  کي هن وقت  دهشتگردي، فرقيواريت ، بدامني، غربت سميت  ڪيترا ئي  مسئلا درپيش آهن  جن جو  واحد  حل  حضرت شاهه عبداللطيف ڀٽائي  رح    ۽  صوفي  بزرگن جي  امن  محبت  ۽  ڀائيچاري  واري  پيغام  ۾ ئي  آهي  ۽ اها وقت جي اولين ضرورت آهي  ته اسين انهن صوفي  بزرگن جي  پيغام ۽ درس کي  عالمي سطح تي  اجاڳر ڪري  دنيا مان  افرا تفري  جو خاتمو آڻي    مذهبي رواداري  امن وارو ماحولقائم ڪيون  هن اهڙو اظهار اڄ ڀٽ شاهه ۾ حضرت  شاهه عبداللطيف ڀٽائي  رح  جي درگاهه  تي  گلن جي چادر چاڙهي  شآهه صاحب جي  271 هين  عرس مبارڪ  جو افتتاح ڪرڻ  بعد صحافين سان  ڳالهائيندي  ڪيو  صوبائي وزير ثقافت  شرميلا  فاروقي  وڌيڪ چيو  ته  حضرت شاهه عبداللطيف ڀٽائي  رح  بنا  ڪنهن رنگ نسل ۽ مذهبي  تفريق جي  امن  ۽ محبت  جو  پيغام  ڏنو  ۽ هن درگاهه تي  امير  توڙي  غريب  عقيدت  سان اچي  ٿو  هن چيو ته  ملڪ جي  موجوده سياسي  توڙي  معروضي  حالتن ۾ سنڌ ڌرتي جي صوفين  جي امن  واري  پيغام  جي سخت ضرورت آهي  ان سان  معاشري  ۾ برداشت ۽ رواداري واري  رجحان کي  هٿي وٺرائڻ سان  گڏ و گڏ  سماج ۾  مثبت سوچ پڻ جنم وٺندي  هڪ سوال تي  هن چيو ته  سڄي صوبي جي ڀيٽ  ۾ ڪراچي  جي امن  امان جي حوالي سان ڪراچي جي صورتحال  غير معمولي آهي  جنهن کي  منهن ڏيڻ لاءِ  سنڌ حڪومت  سمورين  سياسي پارٽين جي اتفاق  راءِ سان  ٽارگيٽيڊ آپريشن  شروع ڪيو  جنهن جا هن وقت تائين مثبت نتيجا سامهون آيا آهن  هن ٻڌايو ته  ڄاڻايل آپريشن ۾  ڪيترائي  ٽارگيٽ ڪلر گرفتار ڪيا ويا آهن جن کي سزائون پڻ  ڏنيون ويون آهن  جڏهن ته اڳوڻين  حڪومتن ۾ اهي ٽارگيٽ  ڪلر  پي رول تي آزاد  ڪرايا ويندا هئا  پر پ پ پ  حڪومت  اهڙن ڏوهاري  عنصرن کي سندن انجام تائين  پهچايو آهي هن  وڌيڪ چيو  ته فرقيواريت دهشتگردي سميت ٻيا ڪيترائي  مسئلا  درپيش آهن  ۽  انهن مسئلن  جو حل امن  ۽ ڀائيچاري  واري  جذبي ۾ ئي  آهي  ان کان اڳ  ڀٽ شاهه آمد وقت  صوبائي وزير  درگاهه تي  گلن جي چادر چاڙهي 271 هين عرس  مبار  جي 3 ڏينهن وارين  تقريبن جو باقائده  افتتاح  ڪيو  ۽ فاتح خواني  پڻ ڪئي  بعد ۾  صوبائي وزير شرميلا فاروقي  چوپائي  مال واري  کاتي  حڪومت  سنڌ طرفان ڀٽ شاهه ۾ لڳايل  جانورن جي نمائش  ۽ زراعت  کاتي حڪومت سنڌ طرفان لڳايل  صنعتي ۽ زرعي  نمائش  جو افتتاح پڻ ڪيو     ۽ مختلف  کاتن  طرفان لڳايل اسٽالن جو دورو پڻ ڪيو  ان موقعي تي صوبائي وزير  جانورن جي  نمائش  مختلف نسلن جون  ٻڪريون،  ڍڳيون  ۽  مينهون ڏٺيون جڏهن ته   جانورن جي  بهتر سار سنڀال  تي  ڀاڳين جي ساراهه ڪئي.  ان کان  علاوه زرعي ۽ صنعتي  نمائش ۾ آبادگارن لاءِ  لڳايل  اسٽالن تي  جديد زرعي اوزارن ۽ مشينري جي  واکاڻ ڪئي  ۽  لاڳاپيل کاتن کان  انهن جي ڪارڪردگي  بابت معلومات  پڻ ورتي  ان  موقعي تي صوبائي وزير شرميلا  فاروقي  ڳالهائيندي   چيو ته سنڌ  جي اڪثر  آبادي  جو ذريعه  معاش  زراعت   ۽ چوپايو  مال آهي  ۽ سنڌ حڪومت  انهن ٻنهي  شعبن کي  ترقي  وٺرائڻ لاءِ  پرڏيهي ملڪن سان  ڪيترائي  معاهدا ڪيا آهن  ۽  زراعت جي شعبي ۾ جديد  مشينري ۽ فني  معاونت فراهم ڪري  زرعي  پيداوار  وڌائڻ  جا  موقعا  فراهم ڪيا آهن  ته  جيئن  زراعت سان  لاڳاپيل  ماڻهن جي  معيار زندگي  بلند  بڻائي سنڌ اندر  هيٺين سطح تي خوشحالي آڻي سگهجي  ان موقعي تي  وڏي وزير جو صلاحڪار سرفراز راڄڙ ، سيڪريٽري ثقافت  اعجاز ميمڻ ،  ڊائريڪٽر  جنرل ثقافت  منظور احمد قناسرو،  ڊپٽي  ڪمشنر  مٽياري  فياض حسين عباسي ،  ايس ايس پي مٽياري  امجد علي شيخ ،  پ پ پ  اڳواڻ  خان محمد سهتو، عبدالعزيز ميمڻ  ۽ ٻيا پڻ ساڻس گڏ  هئا