تازيون خبرون

Daily Archives: December 5, 2014

حڪومت سردار محمد رضا نئون چيف اليڪشن ڪمشنر مقرر ڪري ڇڏيو

اسلام آباد /ڪراچي(نمائندن وٽان) صدر مملڪت ممنون حسين، سردار محمد رضا خان کي چيف اليڪشن ڪمشنر مقرر ڪري ڇڏيو، جنهن جو نوٽيفڪيشن پڻ جاري ڪيو ويو آهي. وزيراعظم ميان نواز شريف جِي سفارش تي صدر ممنون حسين جسٽس رٽائرڊ سردار محمد رضا خان کي چيف اليڪشن ڪمشنر مقرر ڪرڻ واري سمري منظور ڪئي. صدر پاڪستان جِي منظوري کانپوءِ سردار محمد رضا خان جي چيف اليڪشن ڪمشنر طور مقرري جو نوٽيفڪيشن پڻ جاري ڪيو ويو. ان کان اڳ پارليامينٽ هائوس ۾ سينيٽر رفيق رجوانا جِي سربراهي ۾ پارلياماني ڪميٽي جو اجلاس ٿيو، جنهن ۾ ن ليگ ۽ پيپلز پارٽي کانسواءِ ايم ڪيو ايم، اي اين پي ۽ تحريڪ انصاف جي ميمبرن به شرڪت ڪئي. اجلاس دوران جسٽس رٽائرڊ طارق پرويز، جسٽس رٽائرڊ تنوير احمد خان ۽ جسٽس رٽائرڊ سردار محمد رضا خان جي نالن تي غور ڪيو ويو، جن مان ڪميٽي ميمبرن سردار محمد رضا خان جي نالي تي اتفاق ڪيو. واضح رهي ته جسٽس رٽائرڊ سردار محمد رضا خان جو تعلق خيبرپختونخواهه سان آهي، جيڪو سپريم ڪورٽ جو جج پڻ رهي چڪو آهي، جڏهن ته هن وقت هو وفاقي شرعي عدالت جَي چيف جسٽس طور خدمتون سرانجام ڏئي رهيو آهي. ٻئي طرف قومي اسيمبلي ۾ مخالف ڌر جي اڳواڻ سيد خورشيد شاهه چيو آهي ته رٽائرڊ جسٽس سيد سردار رضا کي چيف اليڪشن ڪمشنر چونڊڻ صحيح فيصلو آهي ۽ پ پ ان فيصلي تي خوش آهي، هن چيو ته اها ڳالهه خوشي جهڙي آهي ته ڪميٽي گڏيل فيصلو ڪيو، مخالف ڌر جي اڳواڻ چيو ته اسان کي اميد آهي ته جسٽس سردار رضا قوم جي اميدن تي پورو لهندو ۽ صفاف چونڊن جي مقصد کي حاصل ڪرڻ لاءِ پنهنجي صلاحيتن جو ڀرپور استعمال ڪندو، هن چيو ته چيف اليڪشن ڪمشنر جي مقرري کي شفاف ۽ سڀني کي قابل قبول بڻائڻ لاءِ تمام ممڪنا آئيني تقاضائن کي پورو ڪندو، هن چيو ته تمام پارلياماني پارٽين جي اڳواڻن جو شڪر گذار آهي جو انهن ان عمل ۾ پنهنجو ڀرپور ڪردار ادا ڪيو ۽ ان جي تعاون سبب ان اهم ترين چونڊ جو عمل اتفاق راءِ سان ٿي سگهيو.

 

ڪنهن به ملڪ خلاف اڳرائي جا ارادا ناهن: پرويز رشيد

ڪراچي (اسٽاف رپورٽر) سُڌ سماءُ جي وفاقي وزير پرويز رشيد چيو آهي ته پاڪستان جا ڪنهن به ملڪ خلاف اڳرائي وارا ارادا نه آهن. پاڪستان ٻين ملڪن جي اندروني معاملن ۾ مداخلت نه ٿو ڪري ۽ چاهي ٿو ته ٻيا ملڪ به پاڪستان جي اندروني معاملن ۾ مداخلت نه ڪن ڇاڪاڻ ته پاڪستان ڪنهن به ٻئي ملڪ لاءِ اڳرائي وارا ارادا نه ٿو رکي. هن چيو ته دفاعي نمائش ۾ شريڪ پرڏيهين به نمائش جي تعريف ڪئي آهي، جنهن مان اُن جي ڪاميابي جو اندازو لڳائي سگهجي ٿو. هن چيو ته حڪومت کي دفاعي ڪانفرنس جي پڄاڻي تي پيش ٿيندڙ سفارشن جو بي چيني سان انتظار آهي. پرويز رشيد چيو آهي ته ڌرڻا نه پر فوجي نمائش پاڪستانجي اصل سڃاڻپ آهي، پرڏيهي وفد پاڪستاني دفاعي مصنوعات تي اعتماد جو اظهار ڪيو آهي فوجي نمائش جو معائنو ڪرڻ کانپوءِ ميڊيا سان ڳالهائيندي پرويز رشيد چيو ته دفاعي نمائش ۾ پوري دنيا مان ماڻهن شرڪت ڪئي جيڪو پاڪستان تي اعتماد جو اظهار آهي، 80 ملڪن جا وفد دفاعي سامان خريد ڪرڻ ۽ ڏسڻ آيا آهن، نمائش جي مقابلي ۾ ڌرڻو ڪابه شيءِ ناهي، پاڪستان جي اصل سڃاڻپ فوجي نمائش آهي، هن جو چوڻ هو ته پاڪستان ۾ عالمي معيار جو دفاعي سامان تيار ٿي رهيو آهي، هي نمائش 18 ڪروڙ ماڻهن جي محنت، صلاحيت، عزم ۽ تخليق جي نمائش هئي ۽ پوري قوم کي پاڪستان انجنيئرز ۽ دفاعي ماهرن تي فخر آهي، پرويز رشيد چيو ته ڌرڻو پاڪستان ۾ سمورين سياسي پارٽيون، گروهه ڪنهن به بنياد تي هڻي سگهن ٿا پر دفاعي نمائش پاڪستان جي ڪاميابي آهي ۽ ان تي اسان کي خوشي جو اظهار ڪرڻ گهرجي، اطلاعات واري وزير چيو ته ڪابه ڳالهه دليل ۽ اصول سان مڃائي وڃي ٿي ڌمڪي سان نه، پاڪستان جي ڪهڙي به شهر کي بند ڪرڻ جو حق نه ڏنو ويندو ۽ ڪنهن کي پنهنجون خوشيون کسڻ نه ڏينداسين.

 

پارلياماني ڪميٽي سردار رضا کي اتفاق راءِ سان چيف اليڪشن ڪمشنر مقرر ڪرڻ جي منظوري ڏئي ڇڏي

اسلام آباد (بيورو) پارلياماني ڪميٽي، وفاقي شرعي عدالت جي چيف جسٽس سردار رضا کي اتفاق راءِ سان چيف اليڪشن ڪمشنر مقرر ڪرڻ جي منظوري ڏئي ڇڏي آهي، ڪميٽي چيئرمين رفيق رجوانه چيو آهي ته سردار رضا جو نالو وزيراعظم ڏانهن موڪليو ويندو، ڪنهن پارٽي جي غير حاضر هئڻ سبب ڪميٽي جي فيصلن تي اثر ناهي پوندو. اسلام آباد ۾ چيف اليڪشن ڪمشنر جي مقرري لاءِ پارلياماني ڪميٽي جو اجلاس چيئرمين رفيق رجوانه جي صدارت هيٺ ٿيو، جنهن ۾ پ پ ايم ڪيو ايم ۽ عوامينيشنل پارٽي جي ميمبرن شرڪت ڪئي، جڏهن ته تحريڪ انصاف جو ميمبر شهريار آفريدي اجلاس ۾ شريڪ نه ٿيو. اجلاس ۾ حڪومت ۽ مخالف ڌر پاران پارلياماني ڪميٽي ڏانهن موڪليل جسٽس سردار رضا، جسٽس رٽائرڊ طارق پرويز ۽ جسٽس رٽائرڊ تنوير احمد جي نالن تي غور ڪيو ويو. اجلاس ۾ پيپلزپارٽي جي ميمبر سينيٽر اسلام الدين شيخ، چيف اليڪشن ڪمشنر لاءِ جسٽس سردار رضا جو نالو پيش ڪيو، جنهن تي سمورن ميمبرن اتفاق ڪيو. اجلاس کانپوءِ ميڊيا سان ڳالهائيندي ڪميٽيءَ جي چيئرمين رفيق رجوانه ٻڌايو ته چيف اليڪشن ڪمشنر لاءِ ڪميٽي ڏانهن 3 نالا موڪليا ويا هئا، جن مان جسٽس سردار رضا جي نالي تي اتفاق ڪيو ويو آهي. رفيق رجوانه چيو ته سردار رضا جو نالو منظوري لاءِ وزيراعظم نواز شريف ڏانهن موڪليو ويندو. تحريڪ انصاف جي اجلاس ۾ شرڪت نه ڪرڻ بابت سوال جي جواب ۾ ڪميٽي چيئرمين رفيق رجوانه چيو ته ڪنهن به ميمبر جي شرڪت نه ڪرڻ سان ڪميٽي جي فيصلن تي اثر ناهي پوندو، ڪميٽي جي فيصلي تي کيس فخر آهي، هو تاريخي فيصلي تي قوم کي واڌايون ڏئي ٿو. پارلياماني ڪميٽيءَ جي چيئرمين رفيق رجوانه چيو ته جمهوري ادارن کي مضبوط ڪرڻ لاءِ خورشيد شاهه سميت سمورن پارلياماني اڳواڻن جو اهم ڪردار آهي، اميد آهي ته سردار رضا آئين جي دائري ۾ رهي اليڪشن ڪميشن جي مضبوطي لاءِ ڪردار ادا ڪندو. واضح رهي ته جسٽس سردار رضا 1948 ۾ ايبٽ آباد ۾ پيدا ٿيو، 1968 ۾ سول جج ٿيو. سردار رضا پشاور هاءِ ڪورٽ جو چيف جسٽس، وقتي چيف اليڪشن ڪمشنر ۽ 8 سالن تائين سپريم ڪورٽ جو جج پڻ رهي چڪو آهي، جڏهن ته هن وقت هو وفاقي شرعي عدالت جي چيف جسٽس طور ذميواريون نڀائي رهيو آهي. چيف اليڪشن ڪمشنر ٿيڻ لاءِ سردار رضا کي وفاقي شرعي عدالت جي چيف جسٽس جي عهدي تان استعيفيٰ ڏيڻي پوندي.

 

موجوده نظام غير رياستي قوتن کي منهن ڏيڻ لاءِ اڻپورو آهي:آرمي چيف

ڪراچي (اسٽاف رپورٽر) آرمي چيف جنرل راحيل شريف چيو آهي ته موجوده نظام غير رياستي قوتن کي منهن ڏيڻ لاءِ اڻپورو آهي، خطي ۾ پائيدار امن لاءِ ڪشمير ۽ فلسطين مسئلن جو حل انتهائي ضروري آهي. ڪراچي ۾ اٺين عالمي دفاعي نمائش آئيڊياز 2014ع جي ڪانفرنس کي خطاب ڪندي آرمي چيف چيو ته پاڪستان دنيا لاءِ مثال آهي جيڪو گذريل 35 سالن کان جنگ جي حالت ۾ آهي ۽ هن امن لاءِ ڪيتريون ئي قربانيون ڏنيون. هن چيو ته دهشتگردن کان عالمي امن کي خطرو آهي ۽ بدلجندڙ حالتن سان دفاعي گهــُرجون به تبديل ٿي رهيون آهن جڏهن ته مخصوص حالتن سبب پناهگيرن جو ٻئي ملڪ وڃڻ به خطري جو سبب آهي. جنرل راحيل شريف چيو ته غير رياستي قوتن سبب اندروني سڪيورٽي متاثر ٿي رهي آهي، غير رياستي عنصرن تي ضابطو نه آندو ويو ته صورتهال ڳنڀير ٿي سگهي ٿي. هن چيو ته اين جي اوز ۽ ملٽي نيشنل ڪمپنيون به ملڪي سڪيورٽي کي خطري ۾ وجهن ٿيون ۽ ملڪي سلامتي پاڙيسري ملڪن جي سڪيورٽي سان سلهاڙيل آهي. آرمي چيف چيو ته اندروني سڪيورٽي سان ئي پرڏيهي خطرن کي منهن ڏئي سگهجي ٿو ۽ رڳو بارڊر سڪيورٽي سان ملڪ جي اندروني سڪيورٽي ممڪن ناهي. جنرل راحيل شريف چيو ته پاڪستان هن وقت ڏکئي مرحلي مان گذري رهيو آهي، جنهن ۾ غربت، بيروزگاري، فوڊ سڪيورٽي ۽ پاڻي جي کوٽ به نوان سڪيورٽي چيلينجز آهن. هن چيو ته مذهب ۽ گروهي سڃاڻپ به جنگن جا نوان سبب بڻجي رهيا آهن ۽ اسان کي پنهنجي نظرين توڙي ثقافت جي تحفظ لاءِ ڪم ڪرڻو پوندو. ان کان اڳ آرمي چيف جنرل راحيل شريف عالمي دفاعي نمائش آئيڊياز 2014ع جو دورو ڪيو ۽ پرڏيهي توڙي پرڏيهي ڪمپنين پاران هٿيارن جي لڳايل اسٽالن جو جائزو ورتو. ان موقعي تي آرمي چيف کي هٿيارن بابت بريفنگ ڏني وئي جڏهن ته جنرل راحيل شريف پاڪستان آرڊيننس فيڪٽري، پاڪستان ايرا ناٽيڪل ڪمپليڪس ۽ ٽيلي ڪميونيڪيشن سميت مختلف اسٽالن تي هٿيارن جو معائنو ڪيو ۽ تعريف ڪئي.

 

پرويز خٽڪ ڪي پي ڪي حڪومت بچائڻ لاءِ ڳجهو ملاقاتون ڪري منٿون ڪندو هو، چوڌري نثار جو انڪشاف

اسلام آباد (بيورو) وفاقي گهرو وزير چوڌري نثار علي خان چيو آهي ته خيبرپختونخواهه جي وڏي وزير خيبرپختونخواهه ڪنٽينر تي بيهي حڪومت خلاف الزام هڻندو هو ۽ اندروني طور تي حڪومت سان پنهنجي حڪومت بچائڻ لاءِ اپيل به ڪندو هو. اسلام آباد ۾ ميڊيا سان ڳالهائيندي چوڌري نثار علي خان جو چوڻ هو ته پرويز خٽڪ سان پراڻا لاڳاپا هئا پر هڪ پاسي حڪومت ۽ وزيرن تي سنگين الام هنيا وي ته ڪجهه عرصو اڳ ۾ ته پنجاب هائوس ۾ خفيه ملاقاتون ڪري حڪومت بچائڻ جي اپيل ڪندو هو ۽ انهيءَ دوران هن چيو ته حڪومت عمران خان کي استعيفيٰ جي معاملي ۾ سمجهائي. هن چيو ته منافقت سان ملڪ ۾ انقلاب نٿو اچي جيڪڏهن عمران خان چاهي ته هو ملڪ خيبرپختونخواهه جي وڏي وزير جي خفيه ملاقات جو ريڪارڊ به ڏيڻ لاءِ تيار آهيان. چوڌري نثار علي خان چيو ته تحريڪ انصاف جي اڳواڻن جي سنگين هڻڻ باوجود حڪومت پي ٽي آئي سان ڳالهيون ڪرڻ جو فيصلو ڪيو آهي انهيءَ باري ۾ وزيراعظم کي به رپوٽ ڏني آهي ۽ اميد ته تحريڪ انصاف سان ڳالهين جو سلسلو جلد سروع ٿي ويندو.

 

قائد اعظم جي مزار تي سيڪيورٽي خدشن سبب حفاظت انتظام سخت ڪيا ويا آهن: شرجيل ميمڻ

ڪراچي (اسٽاف رپورٽر)سڌ سماءَ واري وزير شرجيل انعام ميمڻ چيو آهي ته قائد اعظم جي مزار تي سيڪيورٽي خدشن سبب حفاظتي انتظام سخت ڪيا ويا آهن، ڪراچي ۾ داعش جو نيٽ ورڪ سامهون آيو ته ان خلاف ٻين دهشتگردن وانگر ايڪشن وروتو ويندو، ڪراچي آپريشن تي وفاقي حڪومت تعاون ۾ آهي، نه صرف زباني دعوا ڪيا آهن، 12 ڊسمبر تي پي ٽي آءِ جا ماڻهو پرامن احتجاج ريڪارڊ ڪرائين، سنڌ حڪومت قانون هٿ ۾ کڻندڙن سان سختي سان منهن ڏيندي، شهرين ۽ ٽرانسپورٽرن کي 12 ڊسمبر تي هر قسم جي سيڪيورٽِي مهيا ڪئي ويندي، اهڙن خيالن جو اظهارهن قائد اعظم جي مزار تي سيڪيورٽي جي انتظامن جو جائزو وٺڻ ۽ حاضري ڀرڻ کانپوءِ ميڊيا سان ڳالهائيندي ڪيو، ان موقعي تي ڪشمنر ڪراچي شعيب احمد صديقي، ايڊمنسٽريٽر رئوف احمد فاروقي به ساڻس گڏ هئا، واضح رهي ته قائد اعظم جي مزار تي ميڊيا جي وڏي تعداد وفاقي اطلاع واري وزير پرويز رشيد جي اچڻ جي اطلاع تي اتي موجود هو ۽ مزار تي ان حوالي سان سيڪيورٽي سخت ترين اتنظام ڪيا ويا هئا ۽ مزار کي عام شهرين لاءِ بند ڪيو ويو هو، شرجيل انعام ميمڻ مزار تي مهمانن جي ڪتاب ۾ تاسر به لکيا. هن چيو ته وڏي وزير جي هدايت تي قائد اعظم جي مزار تي سيڪيورٽي انتظامن جو جائزو وٺڻ آيو آهيان، ان ڪري رينجرز جي اضافي نفري مقرر ڪئي وئي آهي جيڪا مستقل طور مقرر رهندي، هن چيو ته وفاقي حڪومت ڪراچي ۾ جاري ٽارگيٽيڊ آپريشن لاءِ جيڪي واعدا ڪيا هئا انهن کي پورو نه ڪيو ويو، سنڌ حڪومت وفاقي حڪومت کي مطالبو ڪيو آهي ته آپريشن جا خرچ نه پر سيڪيورٽي ادارن کي جن شين جي ضرورت آهي اهي مهيا ڪئي وڃي.

 

عمران خان جيترا ماڻهو ته هڪ فنڪار به گڏ ڪري ويندو آهي: آصف زرداري

لاهور (بيورو) اڳوڻي صدر آصف علي زرداري پ پ کي فعال بڻائڻ لاءِ پنجاب جي ڳوٺ ڳوٺ ۾ وڃڻ جو اعلان ڪيو ويو آهي، سندن چوڻ ته ايندڙ اليڪشن تائين پارليامينٽ کي مضبوط ڪرڻو آهي، عمران نيازي ۽ ٻين کي چيو  ته پاليامينٽ کي مضبوط ڪرڻو آهي.  امونڪي ۾ ڪارڪنن کي خطاب ڪندي چيو ته عمران نيازي ڳالهيون ڪري ملڪ بند نه ڪري، عمران خان جيترا ماڻهو جلسي ۾ گڏ ڪندو آهي ته اوترا ته هڪ فنڪار به گڏ ڪري ويندو آهي. هن چيو ته خطي ۾ باهه ٻريل آهي، ڪا چڻنگ اڏي پاڪستان ۾ نه اچي، ان لاءِ سڀني کي گڏجي ملڪ جي ڀلائي لاءِ ڪم ڪرڻو پوندو. اڳوڻي صدر جو چوڻ هو ته ملڪ ۾ غربت ۽ افلاس موجود آهي، عوام ۾ سياسي شعر جي هو دل سان آجيان ڪري ٿو. ان موقعي تي آصف علي زرداري پاران پارٽي کي ٻيهر پبجاب ۾ فعل بڻائڻ لاءِ پنجاب جي ڳوٺ ڳوٺ ۾ وڃڻ جو اعلان ڪيو ويو.

 

قومي اسيمبلي جو اجلاس، معذورن تي تشدد ۽ سنڌ ۾ ڪوٽا سسٽم تي عمل نه ٿيڻ خلاف احتجاج

اسلام آباد (بيورو) قومي اسيمبلي ۾ جماعت اسلامي پاران لاهور ۾ معذورن تي تشدد ۽ ايم ڪيو ايم سنڌ ۾ ڪوٽا سسٽم تي عمل نه ٿيڻ خلاف احتجاج ڪيو آهي، متحده جي ميمبر رشيد گوڊيل چيو آهي ته ملڪ ۾ داعش جو وجود ثابت ٿي چڪو آهي، ڇا حڪومت تڏهن آگاهه ڪندي، جڏهن داعش جو قبضو ٿي ويندو. اسپيڪر اياز صادق جي صدارت هيٺ قومي اسيمبلي جو اجلاس ٿيو، جنهن ۾ مختلف معاملن تي بحث ڪيو ويو. اجلاس ۾ جماعت اسلامي، لاهور ۾ معذورن تي تشدد خلاف واڪ آئوٽ ڪيو، جماعت اسلامي جي ميمبر صاحبزاده طارق الله چيو ته لاهور ۾ معذورن کي تشدد جو نشانو بڻائڻ مذمت جوڳو عمل آهي. پارلياماني سيڪريٽري رجب علي بلوچ چيو ته معذورن تي تشدد ناهي ڪيو ويو، پيهه ٿي هئي، واقعي بعد ايس ايڇ او ۽ ڊي ايس پي کي معطل ڪيو ويو آهي. اجلاس ۾ سنڌ ۾ ڪوٽا سسٽم تي عمل نه ٿيڻ خلاف ايم ڪيو ايم ميمبرن واڪ آئوٽ ڪيو، آصف حسنين جو چوڻ هو ته سنڌ ۾ ڪوٽا سسٽم تي عمل نه پيو ٿئي، سنڌ پبلڪ سروس ڪميشن تحت من پسند ماڻهن جون ڀرتيون ٿي رهيون آهن، لياري ڪاليج ۾ به ڪراچي واسين کي نظر انداز ڪيو پيو وڃي. آصف حسنين چيو ته ڪوٽا سسٽم بابت بابر غوري پاران وزيراعظم کي لکيل خط تحت ڪميٽي قائم ٿيڻ گهرجي. ايم ڪيو ايم جي پارلياماني ليڊر رشيد گوڊيل چيو ته ملڪ ۾ داعش جو وجود ثابت ٿي چڪو آهي، گذريل ڏينهن لاهور مان گرفتار ڪيل دهشتگرد وٽان داعش جو لٽريچر مليو آهي. رشيد گوڊيل چيو ته ڇا حڪومت داعش بابت تڏهن آگاهه ڪندي، جڏهن ملڪ تي داعش جو قبضو ٿي ويندو. اجلاس ۾ آگاهي ڏيندي ناڻي واري پارلياماني سيڪريٽري چيو ته تيل اگهن ۾ لاٿ بعد ٽرانسپورٽ جا ڪرايا گهٽائڻ صوبائي حڪومتن جو ڪم آهي. پارلياماني سيڪريٽري چيو ته تيل اگهن جي ڪري روينيو ٽارگيٽ هڪ چيلينج بڻجي ويو آهي پر ڊي سي او ڪم ڪري رهيا آهن.

 

ڌرڻن سان ملڪ کي نقصان پهچي رهيو آهي، نظام کي خطرو نه ٿيڻ گهرجي: پرويز مشرف

ڪراچي (اسٽاف رپورٽر) اڳوڻي صدر پرويز مشرف چيو آهي ته ڌرڻن سان ملڪ کي نقصان پهچي رهيو آهي ۽ سڀ سياست چمڪائي رهيا آهن پر ملڪ ۾ ڪجهه به ٿئي نظام کي خطرو نه ٿيڻ گهرجي. ڪراچي ۾ يوٿ پارليامينٽ کي خطاب ڪندي پرويز مشرف چيو ته اسان جو وجود ڀارت جي ليڊرن کي پسند نه هو جنهن جي بنياد تي ڪشمير مسئلو شروع ٿيو، اسانجي وجود کي 1947 کان ئي خطرا هئا جنهن سبب پهريان 30 سالن ۾ ئي ٽي جنگيون وڙهيون ويون جڏهن ته مغربي سرحد کان به 50 کان 60 جي ڏهائي کان پاڪستان کي غير مستحڪم ڪرڻ جي ڪوشش شروع ٿي جيڪا اڃا به جاري آهي. افغانستان ۾ سوويت يونين جي جارحيت سبب اسانکي پنهنجي فورسز وڌائڻي پئي ڇو ته اسانجي مفاد ۾ هو ته سوويت يونين کي افغانستان کان ڪڍيو وڃي. هن چيو ته اسانکي پنهنجي معيشت کي ٺيڪ ڪرڻو پوندو اُن کانسواءِ ڪوبه ملڪ ترقي نه ڪندو ملڪ ۾ ڪنهن به جمهوريت حڪومت معيشت جي بهتري لاءِ ڪم نه ڪيو رڳو فوجين ئي ملڪي معيشت لاءِ ڪم ڪيو. اڳوڻي صدر چيو ته بلوچستان ۾ ۾ مغربي سرحد تي ڇڪتاڻ ڪا نئين ڳالهه ناهي جڏهن ته خيبرپختونخواهه ۾ القائدا ۽ طالبان آهن ۽ بلوچستان ۾ مذهبي ۽ عليحدگي پسند گروپ اسان کي سڀ کان پهريان مستحڪم  ۽ مضبوط پاڪستان بڻائڻو پوندو جنهن کانسواءِ عالمي برادري خاص ڪري مسلم ملڪن ۾ پاڪستان جو اهم ڪردارن هئڻ گهرجي. پاڪستان ڪمزور ملڪ ناهي .

 

تحريڪ انصاف سردار رضا جي مقرري تي بي اعتمادي ظاهر ڪري ڇڏي

اسلام آباد (بيورو) تحريڪ انصاف، چيف اليڪشن ڪمشنر جي عهدي لاءِ جسٽس سردار محمد رضا جي مقرري تي بي اعتمادي ظاهر ڪري ڇڏي، شيرين مزاري جو چوڻ آهي ته کين اعتماد ۾ نه ورتو ويو رڳو اطلاع ڏنو ويو. هڪ بيان ۾ تحريڪ انصاف جي ترجمان شيرين مزاري چيو ته هــُو جسٽس سردار محمد رضا جو احترامڪن ٿا پر سندس مقرري بابت کين اعتماد ۾نه ورتو ويو ۽ رڳو سرسري طور اطلاع ڏنو ويو. هن چيو ته تحريڪ انصاف پنهنجي موقف تي قائم آهي ۽ بنا دير چئني صوبائي اليڪشن ڪميشن جي ميمبرن کي تبديل ڪري اليڪشن ڪميشن جي نئين سر جوڙجڪ ڪئي وڃي.