تازيون خبرون

Daily Archives: December 2, 2014

حڪومت عمران جي مطالبن کي تسليم نه ڪيو ته پلان سي زيڊ تائين وڃي سگهي ٿو: پرويز الاهي

لاهور (بيورو)چوڌري ڀائرن، عمران خان جي پلان سي جي حمايت جو اعلان ڪيو آهي، چوڌري پرويز الاهي چيو آهي ته جيڪڏهن حڪومت عمران خان جي مطالبن کي تسليم نه ڪيو ته پلان سي زيڊ تائين وڃي سگهي ٿو. لاهور ۾ چوڌري شجاعت حسين ۽ چوڌري پرويز الاهي ماڊل ٽائون واري رهائشگاهه پهچي عوامي تحريڪ جي سربراهه ڊاڪٽر طاهر القادري کان طبيعت پڇي. ان موقعي تي ميڊيا سان ڳالهائيندي چوڌري پرويز الاهي چيو ته حڪومت ملڪي حالتن کي سمجهي عمران خان جا چار تڪ کولڻ وارا مطالبا منظور ڪري، جيڪڏهن سرڪار ائين نه ڪيو ته عمران جو پلان زيڊ تائين به وڃي سگهي ٿو. پرويز الاهي چيو ته جيڪڏهن پلان زيڊ تائين ويو ته پوءِ نوان قاعدا ايندا ۽ سرڪار ڏچي ۾ پئجي ويندي، ان ڪري وقت ضايع ڪرڻ بدران حڪومت عقل جو مظاهرو ڪري. پرويز الاهي وڌيڪ چيو ته حڪومت بند گهٽيءَ ۾ داخل ٿي چڪي آهي، جيڪڏهن سرڪار انصاف چاهي ٿي ته شهباز شريف کي استعفيٰ ڏيڻي پوندي. چوڌري شجاعت حسين چيو ته، ان ۾ ڪو شڪ ناهي ته آصف زرداري سٺو رانديگر آهي پر هن وقت پيپلزپارٽي ن ليگ سان گڏ ويٺل نه پر بيٺل آهي. چوڌري شجاعت حسين چيو ته عمران خان سوچي سمجهي اعلان ڪيو آهي، وٽس هاڻي ٻيو ڪو چانس ناهي.

 

سپريم ڪورٽ مان وزيراعظم جي نااهلي جو فيصلو نه ايندو: اعتزاز احسن

لاهور(م.ڊ) پيپلز پارٽي جي اڳواڻ اعتزاز احسن جو چوڻ آهي ته سپريم ڪورٽ مان وزيراعظم جي نااهلي جو فيصلو نه ايندو 4 ڊسمبر تي خبر پئجي ويندي ته 16 ڊسمبر تي ڇا ٿيندو افسوس آهي عمران خان شيخ رشيد جي هٿن ۾ کيڏي رهيو آهي لاهور هاءِ ڪورٽ ۾ ميڊيا سان ڳالهائيندي اعتزاز احسن جو چوڻ هو ته عمران خنا جو پلان اي ۽ بي ناڪام ٿي چڪو عمران خان سان گڏ بيٺل ماڻهن به سول نافرماني نه ڪئي 4 ڊسمبر کانپوءِ خبر پئجي ويندي ته 16 ڊسمبر تي ملڪ بند ٿيندو يا نه هن چيو ته عمران خان پنهنجي لاءِ مشڪل هدف چونڊي ٿو مستقبل ۾ عمران، زرداري الائنس جي خبر ناهي عمران خان جي ڪرپشن بابت الزامن ۾ ڪنهن حد  تائين سچائي آهي اعتزاز احسن جو چوڻ هو ته عمران خان جي جلسن ۾ شريڪ ماڻهن جي تعداد سان ڪم ٿيندي نظر نٿو اچي،  ٽاڪ شوز ۾ وزيرن جو لهجو سخت ٿيڻ شروع ٿي ويو آهي حڪومت کي لهجو نرم ڪرڻ گهرجي هڪ سوال جي جواب ۾ اعتزاز احسن چيو ته سپريم ڪورٽ مان وزيراعظم جي ناهالي جو فيصلو نه ايندو اها پيپلزپارٽي ئي هئي جنهن خلاف فيصلو آيو.

 

عمران خان ملڪ دشمن ايجنڊا جو اعلان ڪيو آهي: شهباز شريف

لاهور(م.ڊ) پنجاب جي وڏي وزير شهباز شريف جو چوڻ آهي ته عمران خان ملڪ دشمن ايجڻڊا جو اعلان ڪيو آهي ان جي ملڪ بند ڪرڻ جي ڌمڪي  پاڪستان خلاف جنگ جو اعلان آهي عمران خان ملڪ بند ڪرڻ لاءِ ان تاريخ کي چونڊيو جنهن ڏينهن پهريان به دشمنن پاڪستان ٽوڙيو هو پنجاب جي وڏي وزير شهباز شريف پلاننگ اينڊ ڊولپيمينٽ جي وزير احمد اقبال سان لاهور ۾ ملاقات ڪئي ملاقات ۾ ملڪي صورتحال، سياسي معاملن ۽ ترقياتي منصوبن تي خيالن جي ڏي وٺ ڪئي وئي شهباز شريف چيو ته لنڊن پلان جي ناڪامي کانپوءِ عوام پلان سي کي به سي آف ڪري ڇڏيندي هن جو چوڻ هو ته عمران خان جي پاڪستان بند ڪرڻ جي ڌمڪي ملڪ ۽ قوم جي مفادن جي منافي آهي وفاقي وزير احسن اقبال جو ان موقعي تي چوڻ هو ته عمران خان جي ڪال تي ڪوبه ڪاروباري ماڻهو ڪن نه ڏئي.

 

انجلي مينگهواڙ ڪيس: سنڌ هاءِ ڪورٽ ٻڌڻي کان انڪار ڪري ڇڏيو

ڪراچي  ( اسٽاف رپورٽر ) سنڌ هاءِ ڪورٽ جي ٻه رڪني بئنچ انجلي مينگهواڙ  عرف سلميٰ بي بي  جي وڪيل جي اعتراض کان پوءِ ڪيس جي ٻڌڻي ، ٻڌڻ کان انڪار ڪندي ڪيس بابت ٻي بئنچ تشڪيل ڏيڻ لاءِ ڪيس چيف جسٽس ڏانهن اماڻي ڇڏيو آهي  ،عدالت جي حڪم سان انجلي پناه  شيلٽر هوم واپس هلي وئي ،  عدالت  انجلي جي والدين کي انجلي سان  ملائڻ جي اجازت  ڏئي ڇڏي انجلي والدين کي ڌڪا ڏيندي رهي ملڻ کان انڪار سياسي سماجي تنظيمن  جا اڳواڻ ۽ ڀرچونڊي پير عدالت۾ موجود هئا . ڪيس جي ٻڌڻي سنڌ هاءِ ڪورٽ جي جسٽس احمد علي شيخ ۽ جسٽس سيد فاروق شاه تي ٻڌل ٻه رڪني بئنچ ۾ ٿي  گذري عدالت ۾ ريٽائرڊ جج جي فوت ٿيڻ سبب بورڊ  ڊسچارج ڪيا ويا هئا ، ٻڌڻي چيمبر ۾ ٿي عدالت ۾ رياض سيال جو وڪيل مجيب پيرزادو ، انجلي جو وڪيل غلام قادر جتوئي ۽ انجلي جي والد جو وڪيل سيد علي احمد طارق پيش ٿيا ، ٻڌڻي دوران انجلي پاران غلام قادر جتوئي چيو ته آءُ انجلي جو وڪيل آهيان تنهن ڪري ڪيس ۾ هي سنڌ هاءِ ڪورٽ جي جسٽس احمد علي شيخ ۽ جسٽس فاروق شاه تي ٻڌل ٻه رڪني بئنچ  ڌر ٻڻيل آهي  هي ڪيس ڪنهن ٻئي بئنچ ڏانهن منتقل  ڪيو وڃي ، عدالت چيو ته اوهان ڪو به وڪالت نامي جو پاور فائل نه ڪيو آهي تنهن ڪري پهرين اوهان عدالت ۾ وڪالت نامي جو پاور فائل ڪيو پوءِ ڪيس بابت اعتراض واري درخواست ڏيو انجلي جي وڪيل عدالت ۾ اعتراض واري درخواست داخل ڪرائي ڇڏي ، عدالت اعتراض واري داخل درخواست کان پوءِ مختصر فيصلي ۾  ڪيس ٻڌڻ کان انڪار ڪندي ڪيس لاءِ ڪا ٻئي بئنچ تشڪيل ڏيڻ لاءِ  ڪيس چيف جسٽس ڏانهن اماڻي ڇڏيو آهي ، عدالت کي انجلي عرف سمليٰ بي بي جي  والدين چيو اسان کي انجلي سان ملاقات ڪرائي وڃي ، عدالت حڪم ڏنو ته ڪورٽ روم ۾ انجلي کي والدين سان ملاقات ڪرائي وڃي انجلي عرف سلميٰ بي بي والدين سان ملڻ جو انڪار ڪندي والدين کي ڌڪا ڏيندي رهي انجلي جي امڙ انجلي جي پيرن تي پوتي رکندي رهي پر انجلي ملڻ کان اعتراض ڪندي رهي ، عدالت شام جو ساڍي چار وڳي ڪيس جي ٻڌڻي  تي فيصلو ٻڌايو ته انجلي جي وڪيل غلام قادر جتوئي جنهن ڪيس ۾ وڪالت جو پاور فائل به نه ڪيو آهي ۽ هن  سنڌ هاءِ ڪورٽ جي بئنچ تي اعتراضات ڪيا آهن تنهن عدالت ڪيس ٻڌڻ کان انڪار ڪندي انجلي جو ڪيس هي بئنچ نه ٿي ٻڌي سگهي عدالت انجلي جو ڪيس ڪنهن ٻئي بئنچ ڏانهن اماڻڻ لاءِ چيف جسٽس ڏانهن ڪيس اماڻي ڇڏي آهي ، عدالت انجلي کي ايندڙ ٻڌڻي تائين پناه شلٽر هوم اماڻي ڇڏيو آهي ، پوليس پاران عدالت ۾ سلميٰ بي بي عرف انجلي سان نڪاح ڪندڙ رياض سيال کي نه آندو ويو هو ، ٻڌڻي دوران عدالت ۾  انجلي ۽ رياض سيال جي حمايت ۾ سياسي ، سماجي ، مذهبي اڳواڻ ، انساني حقوق جا نمائندا ۽  ڀرچونڊي شريف جا پير به پيش ٿيا ، عدالت ۾ ٻڌڻي کان پوءِ  عدالت ٻاهران ميڊيا سان ڳالهائيندي هندو پاڪستان فورم جي جنرل سيڪريٽري جيپال ڇاپڙا ، پاڪستان هندو ڪائونسل جي اڳواڻ امرناٿ . پي ٽي آءِ اڳواڻ ايڊووڪيٽ ڌرمندر ڪمار  ، اين جي اوز اڳواڻن عاجز گبول ، قوم پرست اڳواڻ اعجاز سامٽيو ، الاهي بخش چاچڙ ۽ ٻين چيو  ته انجلي جي عمر 12 سال کان گهٽ آهي تنهن ڪري انجلي مينگهواڙ جو زبردستي مذهب تبديل ڪري هن کي مسلمان ڪيو ويو آهي تنهن ڪري انجلي کي واپس والدين حوالي ڪيو وڃي ۽ جيڪو اسيمبلي مان گهٽ عمر  جي شادي وارو بل پاس ٿيل آهي ان تي عمل ڪيو وڃي  ، عدالت ۾ ٻڌڻي کان پوءِ ميڊيا سان ڳالهائيندي  ڀرچونڊي شريف ڏهرڪي جي گادي نشين جي صاحبزادي حضرت پير عبدالمالڪ عرف مجن شاه ، ميان اسلم ، مولانا عبدالجيد قادري ، حافظ الله بخش قادري ، ۽ ٻين چيو ته اسان ڪا به زبردستي نه ڪئي آهي اسلام ۾ زبردستي نه ڪئي ويندي آهي سلميٰ بي بي پاڻ پنهنجي مرضي سان  اسلام قبول ڪري مسلمان ٿي آهي ۽ اسلام قبول ڪرڻ لاءِ مذهب جي قيد نه  آهي ، عدالت ۾ انجلي جي والد قندن جي وڪيل داخل درخواست ۾ موقف اختيار ڪيو ويو آهي ته انجلي جو ڪراچي جي جوڊيشنل مجسٽريٽ جي عدالت ۾ 164 جا بيان ريڪارڊ ڪرايا وڃن ۽ نادرا کان عمر جي نشاندهي ڪرائي وڃي

 

رجنتي ڪانت ۽ سوناڪشي سنها جي نئين تامل فلم ”لنگا“ 12 ڊسمبر تي سينيما گهرن جي زينت بڻبي

نئين دهلي (شوبز نيوز)مشهور بالي ووڊ اداڪار رجنتي ڪانت ۽ سوناڪشي سنها جي نئين تامل فلم ”لنگا“ 12 ڊسمبر تي سينيما گهرن جي زينت بڻبي. ڀارتي سڌ سماءَ جي ذريعن موجن لنگا سوناڪشي سنها جي پهرين تامل فلم آهي، جنهن هوءَ رجنتي ڪانت سان گڏجي ڪردار ادا ڪري رهي آهي ۽ فلم 12 ڊسمبر تي رجنتي ڪانت جي سالگرهه جي ڏينهن رليز ڪئي ويندي، جنهن جو مداحن کي انتظار آهي، سوناڪشي پنهنجي تازي انٽرويو ۾ چيو آهي ته رجنتي ڪانت سان ڪم هڪ بهترين تجربو رهيو آهي ۽ هن رجنتي ڪانت کان گهڻو سکيو آهي، بالي ووڊ اداڪاره جو چوڻ هو ته رجنتي ڪانت فلم انڊسٽري جو سادو انسان آهي ۽ ان سان گڏ ڪم دوران گهر کان پري هجڻ جو احساس ناهي ٿيو.

 

ماڌوري ڊڪشٽ جي ڊمانڊ وڌي وئي

ممبئي (شوبز نيوز) بالي ووڊ جي حسين اداڪاره ماڌوري ڊڪشٽ اڄڪلهه نگار خانن جي زبردست ڊمانڊ بڻجي چڪي آهي، ذريعن موجب ماڌوري ڊڪشٽ جي فلم گلاب گينگ جي  ڪاميابي کان پوءِ سندس ڊمانڊ وڌي وئي آهي، پر ماڌوري نمايان هدايتڪارن زويا اخت، راج ڪمار سنتوشي ۽ نکل ايدواني جي فلم جي آفرز رد ڪري چڪي آهي ڇو جو هو نون اداڪارن جي ماءُ جو ڪردار ادا ڪرڻ ۾ دلچسپي نه ٿي رکي.ا

 

اداڪار فرحان اختر فلم لاءِ پنهنجو وڌزن وڌائڻ شروع ڪري ڇڏيو

ممبئي (شوبز نيوز) اداڪار فرحان اختر هدايتڪار بيجوئي نمهيار جي فلم لاءِ پنهنو وزن وڌائڻ شروع ڪري ڇڏيو آهي، نمهيار فرحان خان کي نئين فلم ۾ ڪردار جي مناسبت سان گهٽ ۾ گهٽ 8 ڪلو وزن وڌائڻ جي هدايت ڪئي آهي، جنهن تي عمل ڪندي هن وزن وڌائڻ واريون ترڪيبون شروع ڪري ڇڏيون آهن. ان فلم جي ڪاسٽ ۾ ليجنڊ اداڪار اميتاڀ بچن پڻ شامل آهي. فلم جو پروڊيوسر ونود چوپڙا آهي.

 

فلم دل والي دلهنيا لي جائينگي جي هزار هفتن جو جشن

ممبئي (شوبز نيوز) دل والي دلهنيا لي جائينگي اعتبار جي لحاظ کان هڪ ڪلاسيڪل فلم آهي، جڏهن ته راج ۽ ثمرن ته هندستان ۾ رومانس جي آئيڪن سمجهيو وڃي ٿو، هن فلم جي رليز کي هڪ هزار هفتا مڪمل ٿي ويا آهن ۽ ان موقعي تي يشڪراج فلم ان جو هڪ نئون ٽريلر جاري ڪيو آهي. 1995 ۾ رليز ٿيندڙ شارخ خان ۽ ڪاجل جي مشهور فلم دل والي دلهينا لي جائينگي 19 سالن کان مسلسل جي ممبئي جي سينيمائن گهرن ۾ لڳل آهي، جڏهن ته 12 ڊسمبر تي فلم جا جڏهن هزار هفتا پورا ٿي ويندا ته ان ٺيٽر مان هٽائڻ جو فيصلو ڪيو ويو آهي. گذريل ڪيترن ئي سالن کان ان فلم جو هڪ شو صبح ساڍي يارهين وڳي کان ڏيکاريو پيو وڃي، ممبئي جي معروف انگريز اخبار مڊوي سان ڳالهائيندي مراٺا مندر جي مئنيجنگ ڊائريڪٽر منهوج جو چوڻ هو ته فلم ڪافي عرصي کان سٺو بزنس ڪري رهي هئِ پر گذريل ڪجهه وقت کان ٽڪيٽن جي وڪري ۾ لاٿ آئي آهي.

 

اسد شفيق جي ڇڪي ٽيسٽ ميچ ۾ گھڻن ڇڪن جوعالمي رڪارڊ جوڙي ڇڏيو

شارجا (اسپورٽس نيوز) پاڪستان ۽ نيوزيلينڊ ۾ کيڏيل آخري ٽيسٽ ميچ دوران پاڪستاني بيٽسمين اسد شفيق ڇڪو هنيو ته اهو ميچ جو 28 هون ڇڪو هو جنهن سان گڏ ئي ٽيسٽ ۾ گھڻن ڇڪن جوعالمي رڪارڊ جڙي ويو، ميچ ۾ گڏيل طور 29 ڇڪا لڳا جنهن ۾ نيوزيلينڊ طرفان 22 هنيا ويا، نيوزيلينڊ طرفان ڊبل سينچري ٺاهيندڙ ڪپتان بريڊن ميڪ ڪولم 11 ڇڪا هنيا، پاڪستان پهرين اننگ ۾ 5 ڇڪا هنيا، جڏهن ته ٻي اننگ ۾ اسد شفيق ڇڪو هڻي ٽيسٽ ۾ گھڻن ڇڪن جو عالمي رڪارڊ ٺاهيو، ان کان اڳ ٽيسٽ ميچ ۾ سڀ کان وڌيڪ 27 ڇڪا 2006ع ۾ پاڪستان ۽ انڊيا وچ ۾ فيصل آباد ۾ کيڏيل ٽيسٽ ۾ لڳا هئا. ان کان اڳ نيوزيلينڊ جي ٽيم پاڪستان خلاف پهرين اننگ ۾ 690 رنسون ٺاهي آئوٽ ٿي هئي جو به ٽيسٽ ۾ سڀ کان وڌيڪ اسڪور آهي. ان کان اڳ نيوزيلينڊ هلندڙ سال ويلنگٽن ۾ هندستان خلاف 680 رنسون 8 رانديگر آئوٽ تي اننگ ڊڪليئر ڪئي هئي جيڪو به ٽيسٽ اننگ ۾ سڀ کان وڌيڪ اسڪور هو.

 

پاڪستاني آل رائونڊر عبدالرزاق اڄ 35هين سالگرهه ملهائيندو

اسلام آباد (اسپورٽس نيوز) قومي ڪرڪيٽ ٽيم جو اسٽار آل رائونڊر عبدالرزاق (اڄ) اڱاري تي پنهنجي 35هين سالگرهه ملهائيندو، عبدالرزاق 2 ڊسمبر 1979 تي لاهور ۾ پيدا ٿيو، هن پنهنجي ٽيسٽ ڪيريئر جي شروعات 5 نومبر 1999ع کان برسبين ۾ آسٽريليا خلاف ڪئي ۽ 2006ع ۾ ويسٽ انڊيز خلاف آخري ٽيسٽ کيڏي، هن 1996ع ۾ ون ڊي ڪيريئر شروع ڪيو ۽ آخري ڀيرو 2011ع ۾ ملڪ جي نمائندگي ڪئي، هن 2006ع ۾ انگلينڊ خلاف ٽي – 20 ڪيريئر شروع ڪيو ۽ گذريل سال ڏکڻ آفريقا خلاف آخري ٽي – 20 ميچ کيڏي، سندس ڳاڻيٽو ڪرڪيٽ جي دنيا جي بهترين آل رائونڊرس ۾ ٿئي ٿو ۽ هن ڪيترائي ڀيرا پاڪستان کي ڪاميابيون ڏيارڻ ۾ اهم ڪردار ادا ڪيو.