تازيون خبرون

Daily Archives: December 2, 2014

قائدِ ايوانَ ۽ قائدِ حذب اختلاف جي ملاقات، چيف اليڪشن ڪمشنر جي نالي تي ڊيڊ لاڪ برقرار

اسلام آباد (بيورو) وزيراعظم نوازشريف ۽ مخالف ڌر جي اڳواڻ سيد خورشيد شاهه وچ ۾ چيف اليڪشن ڪمشنر جي مقرري لاءِ ٽيون ڀيرو ٿيندڙ ملاقات ۾ به اتفاق نه ٿي سگهيو آهي. وزيراعظم سان خورشيد شاهه ملاقات ڪئي جڏهن ته ان موقعي تي ناڻي وارو وفاقي وزير اسحاق ڊار به موجود هيو. هڪ ڪلاڪ کان مٿي هلندڙ ملاقات دوران چيف اليڪشن ڪمشنر جي نالي تي مشاورت ڪئي وئي ۽ مخالف ڌر جي اڳواڻ وزيراعظم کي هڪ ٻيو نالو پيش ڪيو جنهن تي به اتفاق نه ٿي سگهيو. مخالف ڌر جي اڳواڻ خورشيد شاهه ميڊيا سان ڳالهائيندي چيو ته 5 ڊسمبر کان پهرين اليڪشن ڪمشنر جي مقرري جو معاملو ڪيو ويندو جڏهن ته انهيءَ لاءِ وزيراعظم سان ڪجهه نون ۽ ڪجهه پراڻن نالن تي مشاورت ڪئي وئي پر سپريم کي 5 ڊسمبر کان پهرين اٽارني جنرل ذريعي چيف اليڪشن ڪمشنر جي نالي کان آگاهه ڪيو ويندو. هن چيو ته چيف اليڪشن ڪمشنر جي نالي تي سڀاڻي ٻيهر وزيراعظم سان ڳالهه ٻولهه ٿيندي هن وقت ڪنهن به نالي کي عام نه ڪيو ويندو ڇو ته شريف ماڻهو ڀڄي وڃن ٿا. مخالف ڌر جي اڳواڻ خورشيد ساهه جي مطالبي تي وزيراعظم نواز شريف تحريڪ انصاف سان ڳالهين لاءِ راضپو ظاهر ڪيو آهي مخالف ڌر جي  اڳواڻ خورشيد شاهه چيو  آهي ته وزيراعظم سان ان جي ملاقات دوران خزاني وارو وزير اسحاق ڊار به اتي موجود هو جنهن کي وزيراعظم ڳالهيون اڳتي وڌائڻ جي هدايت ڪئي هن ڇيو ته پئٽرول جي قيمتن ۾ وڌيڪ گهٽتائي جي گنجائش آهي وزيراعظم کي چيو آهي ته وڌيڪ 6 روپيا قيمت گهٽ ڪيو، خورشيد شاهه چيو ته وزيراعظم اسحاق کي چيو ته ڳالهين جو عمل جاري رکيو وڃي هن چيو ته احتجاج ڪري سگهجي ٿو ڪنهن ۾ به طاقت ناهي ته اسنا جي ملڪ پاڪستان کي بند ڪري سگهي.

 

خالد محمود سومرو ۽ قومپرست ڪارڪنن جي قتل خلاف سنڌ ٽئين ڏينهن به بند ، ڪيترائي ڪارڪن گرفتار

ڪراچي/سکر/حيدرآباد/لاڙڪاڻو(نمائندن وٽان) نوري آباد مان ٻن ڄڻن جي مليل لاشن مان هڪ نوجوان جي سڃاڻپ ملير مان کنڀي گم ڪيل جسمم ڪارڪن واجد لانگاهه طور ٿي، واجد لانگاهه کي 13 آگسٽ تي ملير جي پپري واري علائقي مان کنڀي گم ڪيو ويو هو. خبر موجب گذريل رات نوري آباد مان ٻن نوجوانن جي مليل لاشن مان هڪ لاش جي سڃاڻپ ملير جي علائقي پپري مان کنڀي گم ڪيل واجد لانگاهه طور ٿي آهي، واجد لانگاهه کي 13 آگسٽ تي پوليس پپري مان کنڀي گم ڪري ڇڏيو هو، سندس وارثن بازيابي لاءِ سنڌ هاءِ ڪورٽ ۾ پڻ پٽيشن داخل ڪرائي هئي. شهيد ڊاڪٽر خالد محمود سومري ۽ قومپرست ڪارڪنن جي قتل خلاف جسقم، سنڌ بچايو ڪميٽي ۽ قومي عوامي تحريڪ جي سڏ تي سنڌ ۾ مڪمل هڙتال ڪئي وئي،جڏهن ته ڪارڪنن احتجاجي مظاهرا ڪري ڌرڻا پڻ هنيا. ڪراچيءَ جي سنڌي وسندين ملير، گلشن حديد، سچل ڳوٺ، ڀٽائي آباد،اسٽيل ٽائون،گھگھر ڦاٽڪ، رزاق آباد، شاھه ٽائون، چڪرا ڳوٺ، ابراھيم حيدري،مارئي ڳوٺ ۽ ٻين علائقن ۾ ڪاروبار بند رهيو. قومپرست جماعتن ۽ جي يو آءِ جي ڪارڪنن مختلف علائقن ۾ احتجاجي مظاهرا پڻ ڪيا. حيدرآباد جي قاسم آباد، وحدت نگر، لطيف آباد، قدم گاهه موليٰ علي، واڌو واهه ۽ ٻين علائقن ۾ ڪاروبار مڪمل طور بند رهيو، جڏهن ته روڊن رستن تي ٽريفڪ به گهٽ نظر آئي. هڙتال بعد سنڌ بچايو ڪميٽي ۽ عوامي تحريڪ جي ڪارڪنن ڊاڪٽر نياز ڪالاڻي ۽ روشن ڀٽي جي اڳواڻي ۾ حيدر چوڪ تي احتجاجي مظاهرو ڪري ڌرڻو هنيو. ٽنڊي محمد خان ۾ هڙتال بعد قومپرست ڪارڪنن احتجاجي مظاهرو ڪري ڌرڻو هنيو. ڪوٽڙيءَ ۾ سنڌ بچايو ڪميٽيءَ جي سڏ تي مڪمل شٽربند هڙتال رهي،جڏهن ته وڪيلن عدالتي ڪارروائي جو بائيڪاٽ ڪري احتجاجي مظاھرو ڪيو. سکر ۾ شاهي بازار، گرم گودي، ڇوهارا مارڪيٽ، گهنٽا گهر چوڪ ۽ ٻيا علائقا بند رهيا، جنهن بعد قومپرست ڪارڪنن احتجاجي مظاهرو پڻ ڪيو. لاڙڪاڻي ۾ شاهي بازار، صديقي مارڪيٽ، ريشم گلي،بندر روڊ، سنڌو چوڪ ۽ ٻيا سمورا ڪاروباري مرڪز بند رهيا، جنهن بعد قومپرست ڪارڪنن ممتاز شيخ ۽ جميل گاد جي اڳواڻي ۾ احتجاجي مظاھرو ڪيو. ميرپور خاص جا سمورا ڪاروباري مرڪز بند رهيا، روڊن رستن تان ٽرانسپورٽ به غائب رهي، جڏهن ته جسقم، قومي عوامي تحريڪ ۽ ٻين جماعتن جي ڪارڪنن احتجاج پڻ رڪارڊ ڪرايو. نوشهري فيروز ۾ هڙتال سبب سمورا ڪاروباري مرڪز بند رهيا، جنهن بعد قومپرست ڪارڪنن خالد تنئي، عزيز ڦل، گل مورئي،وزير وڳڻ ۽ خادم سيال جي اڳواڻي ۾ الله والا چوڪ تي احتجاجي مظاهرو ڪيو. نوابشاهه ۾ واپارين ڪاروبار مڪمل طور بند رکيو،جڏهن ته سوين قومپرست ڪارڪنن روڊن تي نڪري احتجاج ڪيو. خيرپور ۾ ڊاڪٽر خالد محمود سومري جي شهادت واري واقعي خلاف جيئي سنڌ قومي محاذ پاران ڏنل هڙتال جي سڏ تي شهر ۾ مڪمل طور شٽر بند هڙتال ڪئي وئي، ھڙتال سبب شھر جون مک بازارون شاهي بازار ، رنگ بازار ،صرافا بازار ، حيدري بازار ، سبزي مارڪيٽ ۽ ٻيو ڪاروباري مرڪز بند ڪيا ويا، جڏهن ته جسقم ڪارڪن احتجاجي مظاھرو پڻ ڪيو. قمبر ۽ شهدادڪوٽ ۾ به واپاري مرڪز بند رهيا، جڏهن ته قومپرست ڪارڪنن احتجاجي مظاهرا ڪري ڌرڻا هنيا. ڪنڌڪوٽ ۾ مڪمل شٽربند هڙتال ڪئي وئي، جنهن بعد ڪارڪنن احتجاجي مظاهرو ڪري نعريبازي ڪئي. گهوٽڪي ۾ هڙتال سبب شهر مڪمل طور بند رهيو، جنهن بعد قومپرست ڪارڪنن نصرالله ڪلادي،محبوب گهوٽي ۽ اڪرم ٿهيم جي اڳواڻي ۾ پيپلز چوڪ تي ڌرڻو هڻي نعريبازي ڪئي. ميرپورماٿيلي ۾ دبئي مارڪيٽ،بينظير شاپنگ سينٽر ۽ ٻيا ڪاروباري مرڪز به نه کلي سگهيا، جڏهن ته جسقم ڪارڪنن ڪامريڊ حميد سومري جي اڳواڻي ۾ احتجاجي مظاهرو ڪيو. دولتپور ۾ شٽربند هڙتال بعد جسقم ڪارڪنن عظيم انڙ ۽ اياز انڙ جي اڳواڻي ۾ احتجاجي مظاهرو ڪيو، جڏهن ته قاضي احمد، نواب ولي محمد، دوڙ،ٻانڌي،سڪرنڊ، منھڙو، سٺ ميل ۽ ٻيا ننڍا وڏا شھر به مڪمل طور بند رھيا. باقراڻي،خير محمد آريجا، رشيد وڳڻ، ڳيريلي،محراب سنديلو، پراڻو آباد، قلندر آباد ۽ ٻين شهرن ۾ به شٽر بند هڙتال ڪري احتجاجي مظاهرا ڪيا ويا. ڪنڊياري،ٺارو شاھه پڊعيدن، محرابپور، مٺياڻي، موري،درياخان مري، ڦل، ڀرياسٽي، درٻيلي ۽ محمد ديري جتوئي ۾ به هڙتال بعد احتجاجي مظاهرا ڪيا ويا. سن،لاکا، مانجهند، آمري، خاڻوٺ، آمري، لڪي شاهه صدر، نور پور، منظور آباد ۽ علي آباد ۾ به ڪاروبار نه کلي سگهيو، جڏهن ته قومپرست جماعتون سراپا احتجاج رهيون. جوھي ۾ هڙتال بعد جسقم، ايس يو پي ۽ ايس ٽي پي ڪارڪنن غلام نبي باهوٽي، يونس سولنگي،حڪيم ٻٻر، غلام قادر لغاري ۽ شوڪت باهوٽي جي اڳواڻي ۾مخدوم بلاول پارڪ کان پريس ڪلب تائين احتجاجي ريلي ڪڍي. ڪڪڙ،ٿرڙي محبت گمبٽ، ٺري ميرواھه ۽ راضي ديري ۾ به ڪاروبار مڪمل طور بند رهيو، جڏهن ته وڳڻ ۾ هڙتال بعد جسقم ڪارڪنن مختيار پنهور جي اڳواڻي ۾ انڊس هاءِ وي تي ڌرڻو هڻي نعريبازي ڪئي. خيرپور ناٿن شاهه، ٽنڊي آدم، ساماري، ڪنري، مٺياڻي، ۽ ٻين شهرن ۾ ڪاروبار نه کلي سگهيو،هڙتال بعد قومپرست‎ ڪارڪنن احتجاجي مظاهرا ڪري ڌرڻا پڻ هنيا. ميرپوربٺوري، جهوڪ شريف، سيوڻ، ڀٽ شاھه، تلهار، شهدادپور، عرضي ڀٽو، راڻيپور، ھنڱورجا، ڦريدآباد، ڏهرڪي، سجاول، نيو سعيد آباد ۽ ڄام صاحب ۾ به شٽر بند هڙتال ڪئي وئي. ڳڙهي خيري،هالا، خيرپور ناٿن شاهه، ‎تنگواڻي، واهي پانڌي ۽ سڪرنڊ سميت سمورن ننڍن وڏن شهرن ۾ شٽربند رهيا، جڏهن ته قومپرست جماعتن جي ڪارڪنن احتجاجي مظاهرا ڪري ڌرڻا پڻ هنيا. مختلف شهرن ۾ احتجاج دوران ميڊيا سان ڳالهائيندي قومپرست اڳواڻن چيو ته سنڌ دوست مذهبي اڳواڻ خالد محمود سومري ۽ قومپرست اڳواڻن جي شهادت جا واقعا امن پسند ڌرتيءَ جو ماحول خراب ڪرڻ جي سازش آهي. قومپرست اڳواڻن مطالبو ڪيو ته ڊاڪٽر خالد محمود سومري، آصف پنهور، وحيد لاشاري ۽ سرويچ پيرزادي جي قتل ۾ ملوث ذميوارن کي وائکو ڪري سخت سزا ڏني وڃي، ٻي صورت ۾ وڌيڪ سخت احتجاج ڪيو ويندو.

 

وزيراعظم ڪراچي ۾ دفاعي نمائش آئيڊيا 2014ع جو افتتاح ڪري ڇڏيو

ڪراچي(اسٽاف رپورٽر) وزيراعظم نواز شريف دفاعي نمائش آئيڊيا 2014ع جو افتتاح ڪري ڇڏيو افتتاحي تقريب کي خطاب ڪندي هن جو چوڻ هو ته خودمختاري جو تحفظ پهرين ترجيح آهي پاڪستان مضبوط ترين دفاعي ملڪ آهي وزيراعظم آپريشن ضرب عضب جو هدف هر صورت ۾ حاصل ڪرڻ جو عزم به ڪيو، وزيراعظم نواز شريف دفاعي نمائش آئيڊيا 2014ع جو افتتاح ڪيو دفاعي نمائش ۾ ايئر ڪرافٽ،ٽينڪ، جديد هٿيار ۽ ٽيڪنالوجي جي مهارت، دفاع لاءِ جديد ترين فوجي سامان موجود آهي، وزيراعظم ميان نواز شريف نمائش کي خطاب ڪندي چيو ته جديد دفاعي سامان صرف ترقي يافته ملڪن جو استحقاق ناهي هن جو چوڻ هو ته پاڪستان وٽ هن وقت مضبوط ترين دفاعي نظام آهي خودمختاري جو تحفظ رياست جي پهرين ترجيح آهي وزيراعظم چيو ته خودمختاري جو تحفظ هر ملڪ جي پهرين ترجيح آهي، قومي سلامتي کي پيش ايندڙ چئلينجز کي منهن ڏيڻ لاءِ رياست کي هر وقت تيار رهڻو آهي. وزيراعظم نواز شريف چيو ته قبائلي علائقن ۾ امن قائم ڪري رهنداسين آپريشن ضرب عضب ڀرپور طريقي سان جاري رهندو، وزيراعظم وڌيڪ چيو ته ملڪ کي دهشتگردي کان علاوه غربت ۽ بيروزگاري جهڙا مسئلا به سامهون آهن قبائلي علائقن ۾ امن قائم ڪري رهنداسين ڪراچي جي ايڪسپور سينٽر ۾ جاري دفاعي نمائش آئيڊياز 4 ڊسمبر 2014ع تائين جاري رهندي.

 

عمران خان شوق پورو ڪري وٺي، هاڻي ڳالهيون 16 ڊسمبر کانپوءِ ئي ٿينديون: سعد رفيق/ پرويز رشيد

اسلام آباد (بيورو) سـُڌ سماءُ واري وفاقي وزير پرويز رشيد چيو آهي ته عوام ڪپتان جو اصل چهرو ڏسي ورتو آهي، خواجا سعد رفيق جو چوڻ آهي ته عمران خان شوق پورو ڪري وٺي، هاڻي ڳالهيون 16 ڊسمبر کانپوءِ ئي ٿينديون. تحريڪ انصاف جَي جلسي کانپوءِ رد عمل ۾ پرويز رشيد جو چوڻ هو ته ڪپتان جو اصل چهرو عوام ڏسي ڇڏيو آهي، ڪپتان کي ڪوڙ ڳالهائيندي شرم ئي نٿو اچي. هـُن چيو ته عمران خان توهان پاڻ ڌرڻو ختم ڪرڻ چاهي ٿو بس هاڻ کيس رستو کپي. ريلوي واري وفاقي وزير خواجا سعد رفيق چيو ته ڌانڌلين سان کيس نه پر عمران خان کي کٽرايو ويو هو. سعد رفيق چيو ته ڪپتان ڀلي شوق پورو ڪري وٺي، 16 ڊسمبر کانپوءِ ئي ساڻس ڳالهيون ڪيون وينديون. وفاقي وزير چيو ته پرويز مشرف جا چمچا عمران خان کي پلان جوڙي ڏين پيا، ڪپتان اقتدار لاءِ هر طريقو استعمال ڪري رهيو آهي پر کيس ڪجهه به پلئه نه پوندو. سعد رفيق چيو ته عمران خان ڪوڙ ڳالهائڻ جو عالمي چيمپئن بڻجي ويو آهي، پاڪستان کي بند ڪيو ويو ته هو خاموش نه ويهندا..

 

جنرل راحيل شريف جي جان ڪيري سان ملاقات، فوجي انٽيليجنس تعاون کي وڌيڪ موثر بنائڻ تي اتفاق

واشنگٽن (م.ڊ) چيف آف آرمي اسٽاف جنرل راحيل شريف آمريڪي پرڏيهي وزير جان ڪيري سان ملاقات ڪئي، ملاقات ۾ ٻنهي ملڪن وچ ۾ سيڪيورٽي لاڳاپا ۽ علائقائي معاملا بحث هيٺ آيا، پرڏيهي کاتي ۾ ٿيندڙ ان ملاقات ۾ جنرل راحيل شريف علائقائي سلامتي جي معاملن جي حوالي سان پاڪستان جو تصور پيش ڪيو. آءِ ايس پي آر جي ڊائريڪٽر جنرل ميجر جنرل عاصم باجوه موجب ملاقات ۾ آمريڪي پرڏيهي وزير جان ڪيري دهشتگردي خلاف جدوجهد ۾ پاڪستان جي ڪردار ۽دهشتگردي خلاف جاري جنگ ۾ پاڪستان جي قربانين جو اعتراف ڪيو. ميجر جنرل عاصم باجوه پنهنجي هڪ ٽوئٽ ۾ ٻڌايو ته آمريڪي پرڏيهي وزير ان موقعي تي پاڪ فوج جي پروفيشنلزم جي ساراهه ڪئي ۽ ان کي متحد ڪندڙ هڪ حقيقي قوت قرار ڏنو. امريڪي پرڏيهي وزير پاڪ افغان لاڳاپن ۾ بهتري کي علائقائي استحڪام ڏانهن هڪ قدم قرار ڏيندي ان جي آجيان ڪئي ۽ ان حوالي سان آمريڪا طرفان ڀرپور سهڪار جو يقين ڏياريو. واضح رهي ته جنرل راحيل شريف وطن واپسي لاءِ روانگي کان اڳ ڪجهه ڏينهن ڪيليفورنيا ۾ گذارڻ کان پوءِ واشنگٽن پهتو، جتي هن آچر تي هفتي وار موڪل باوجود آمريڪي پرڏيهي کاتي ۾ پرڏيهي وزير جان ڪيري سان ملاقات ڪئي.

 

سپريم ڪورٽ بلدياتي چونڊن بابت سنڌ ۽ پنجاب حڪومت جا جواب رد ڪري ڇڏيا

اسلام آباد(بيورو) سپريم ڪورٽ،مڪاني چونڊن بابت سنڌ ۽ پنجاب جا داخل ڪرايل جواب رد ڪندي ڪي پي ڪي کي بايو ميٽرڪ سسٽم تحت بلدياتي اليڪشن ڪرائڻ جي اجازت ڏئي ڇڏي ،چيف جسٽس رمارڪس ڏيندي چيو آهي ته هڪ مهينو مهلت ڏيڻ باوجود سنڌ ۽ پنجاب جي حڪومتن ڪي به قدم ناهن کنيا. سپريم ڪورٽ ۾ مڪاني چونڊن بابت ڪيس جي ٻڌڻي چيف جسٽس ناصرالملڪ جي سربراهي ۾ بينچ ڪئي. ٻڌڻي دوران مڪاني چونڊن بابت سنڌ ۽ پنجاب جي حڪومتن جو جواب رد ڪندي کين هدايت ڪئي ته ٻئي صوبا اليڪشن ڪميشن سان گڏجي بلدياتي چونڊن جو شيڊول طئه ڪن. چيف جسٽس ناصرالملڪ ان موقعي تي رمارڪسڏنا ته هڪ مهيني جي مهلت ڏيڻ باوجود سنڌ ۽ پنجاب صوبي جي حڪومتن ڪجهه به ناهي ڪيو. اعليٰ عدالت جو چوڻ هو ته تڪبندين ۾ صوبائي حڪومتن جو ڪو به ڪردار ناهي،انڪري ٻئي صوبا اليڪشن ڪميشن سان رابطو ڪري حڪمت عملي جوڙين. ڪيس جي ٻڌڻي دوران عدالت ڪي پي ڪي پاران بلدياتي چونڊن بابت داخل ڪرايل جواب کي تسليءَ جوڳو قرار ڏيندي پشاور ۾ بايو ميٽرڪ سسٽم تحت ووٽنگ ڪرائڻ جي اجازت پڻ ڏني. ڪي پي ڪي حڪومت سپريم ڪورٽ ۾ جواب داخل ڪرائيندي موقف اختيار ڪيو ته هو اپريل ۾ مڪاني چونڊن ڪرائڻ لاءِ تيار آهن. ڪي پي ڪي حڪومت پاران داخل ڪرايل جواب ۾ وڌيڪ موقف اختيار ڪيو ته مڪاني چونڊون لاءِ سڄي صوبي ۾ پولنگ هڪ ئي ڏينهن ڪئي ويندي. ڪي پي ڪي سرڪار موقف اختيار ڪيو هو ته پشاور ۾ بايو ميٽرڪ سسٽم تحت مڪاني چونڊون ڪرايون وينديون

 

ملڪ ۾ ڏڦيڙ پکيڙڻ جي سازش پئي ٿئي، جمهوريت بچائڻ چاهيون ٿا: آصف علي زرداري

لاهور(بيورو) پيپلز پارٽيءَ جي شريڪ چيئرمين ۽ اڳوڻي صدر آصف علي زرداري چيو آهي ته هو جمهوريت جا محافظ آهن،ڪنهن به سازش جو حصو نه بڻجندا،تڪڙ ڪندڙ ٻڌي ڇڏين ته سياست ون ڊي يا ٽي ٽوئنٽي ميچ ناهي. لاهور ۾ ميڊيا سان ڳالهائيندي آصف علي زرداري چيو ته هو جمهوريت کي دشمنن کان بچائڻ چاهين ٿا. پيپلز پارٽيءَ جي شريڪ چيئرمين جو چوڻ هو ته تڪڙ ڪندڙ ٻڌي ڇڏين ته سياست ون ڊي يا ٽي ٽوئنٽي ناهي پر ،موجوده حالتون ٽيسٽ ميچ جيان آهن. هن چيو ته پيپلزپارٽي کي حڪومت خلاف تحريڪ هلائڻ جي ڪابه جلدي ناهي موجوده صورتحال ۾ ڪنهن به سازش جو حصو نه ٿو بڻجي سگهي. آصف زرداري جو چوڻ هو ته تيز بالر کي وڪيٽ نه ملندي آهي ته اهو ٿڪجي پوندو آهي. اڳوڻي صدر آصف علي زرداري وڌيڪ چيو ته پاڪستان ۾ ڏڦير پکيڙڻ جي ڪوشش ڪئي پئي وڃي،عالمي قوتون پنهنجي مفادن لاءِ ڪم ڪري رهيو آهن.

 

حڪومت کي 16 ڊسمبر کان اڳ پي ٽي آءِ سان ڳالهيون ڪرڻ گهرجن: سراج الحق

اسلام آباد (بيورو) جماعت اسلامي جي امير سراج الحق چيو آهي ته حڪومت کي 16 ڊسمبر کان اڳ پي ٽي آءِ سان ڳالهيون ڪرڻ گهرجن، جاچ لاءِ ڪنهن اداري کان مدد وٺڻ عدليه جو حق آهي.اسلام آباد ۾ طاهر القادري سان عيادت کانپوءِ ميڊيا سان ڳالهائيندي ڊاڪٽر طاهر القادري چيو ته هُو چاهي ته حڪومتکي پي ٽي آءِ سان ڳالهيون ڪرڻ گهرجن. هن چيو ته حڪومت کي سياسي بحران جي خاتمي لاءِ ٻه قدم اڳتي وڌڻ گهرجي. هن چيو ته حڪومت کي پي ٽي آءِ سان 16 ڊسمبر کان اڳ ڳالهيون ڪرڻ گهرجن، جاچ لاءِ ڪنهن اداري کان مدد وٺڻ سپريم ڪورٽ جو حق آهي. هن وڌيڪ چيو ته ڊاڪٽر طاهر القادري کيس ٻڌايو ته هُو پنهنجو علاج ملڪ جي اسپتال مان ئي ڪرائيندو.

 

جي يو آءِ (ف) طرفان 5 ڊسمبر تي سڄي ملڪ ۽ پهرين مارچ تي اسلام آباد ۾ ڌرڻو هڻڻ جو اعلان

سکر(بيورو) جي يو آءِ طرفان ڊاڪٽر خالد محمود سومرو جي قتل خلاف 5 ڊسمبر تي سڄي ملڪ ۾ ڌرڻا هڻڻ ۽ پهرين مارچ تي اسلام آباد ۾ ڌرڻو هڻڻ جو اعلان ڪري ڇڏيو، مولانا فضل الرحمان چيو آهي ته ڊاڪٽر خالد محمود سومرو جي شهادت وڏو سانحو آهي، واقعي جي جاچ کان پهرين ڪنهن کي قاتل قرار نٿو ڏئي سگهجي، رياست قاتلن جو پيڇو ڪري… جي يو آءِ سربراهه مونا فضل الرحمان سکر ۾ پريس ڪانفرنس ڪندي 5 ڊسمبر تي سڄي ملڪ ۾ ڌرڻا هڻڻ ۽ پهرين مارچ تي اسلام آباد ۾ ڌرڻو هڻڻ جو اعلان ڪيو. مولانا فضل الرحمان چيو ته ڊاڪٽر خالد محمود سومري جي شهادت وڏو سانحو آهي، واقعي جي جاچ کان پهرين ڪنهن کي قاتل قرار نٿو ڏئي سگهجي، رياست قاتلن جو پيڇو ڪري انصاف ڏياري… هن چيو ته خالد محمود سومرو جي قاتلن جو پيڇو ڪرڻ سندن نه پر رياست جو ڪم آهي، جيڪڏهن رياست قاتل گرفتار نٿي ڪري سگهي ته پوءِ ڪليئر ٻڌائي. هن چيو ته لاڙڪاڻي ۾ ڊاڪٽر خالد محمود سومري جي جنازي نماز ۾ لکين ماڻهن شرڪت ڪئي، هن تاريخ ۾ لاڙڪاڻي اندر اهڙي جنازي نماز نه ڏٺي آهي، هو مظلوم بڻجي ويا آهن، مسلسل کين نشانو بڻايو پيو وڃي… جي يو آءِ سربراه چيو ته 2001 کان مذهبي اڳواڻن کي نشانو بڻايو پيو وڃي، آمريڪا سڄي دنيا کي پنهنجي ماتحت بڻائڻ چاهي ٿي، جنهن ڪري هو دنيا ۾ جنگ مڙهي رهيو آهي.. مولانا فضل الرحمان چيو ته خالد محمود سومرو جي شهادت تي ڪارڪنن ۾ سوڳ جي لهر پکڙيل آهي، هنن جو قانوني حق آهي ته هو احتجاج ڪن، هن وقت پاڪستان جنگ واري صورتحال کي منهن ڏئي رهيو آهي… هن چيو ته پاڪستان ۾ دهشتگردي عروج تي آهي تنهن هوندي به سموريون مذهبي پارٽيون صبر کان ڪم وٺي رهيون آهن، هو پهرين به چئي چڪو آهي ته جنگ آمريڪا جي ايجنڊا آهي، آمريڪا جنگ ذريعي پنهنجا مقصد حاصل ڪرڻ گهري ٿو، آمريڪا 2001 کان مذهبي پارٽين کي نشاڻو بڻائي رهيو آهي… مولانا فضل رحمان چيو ته طالبان ۽ ٻين پابندي مڙهيل تنظمين کي دهشتگرد قرار ڏئي پنهنجو فرض پورو نٿو ڪري سگهجي… ان موقعي تي مولانا عبدالغفور حيدري چيو ته 5 ڊسمبر تي سڄي ملڪ ۾ ڌرڻا هنيا ويندا، پهرين مارچ تي اسلام آباد ۾ تاريخ جو سڀ کان وڏو ڌرڻو هنيو ويندو… هن چيو ته مولانا فضل رحمان تي 3 ڀيرا قاتلاڻا حملا ڪيا ويا پر صوبائي حڪومتن حملن تي اطمينان جوڳو جواب ناهي ڏنو.

 

ماڻهو شهرن کي بند ڪرڻ بابت عمران خان جي اپيل کي رد ڪري ڇڏيندا: خواجه سعد رفيق

اسلام آباد (بيورو) وفاقي ريلوي وزير سعد رفيق چيو آهي ته عوام شهرن کي بند ڪرڻ بابت عمران خان جي اپيل کي رد ڪري ڇڏيندي ڪاروباري سرگرميون جاري رهنديون هڪ انٽرويو ۾ ريلوي واري وزير چيو ته تحريڪ انصاف سان ڌمڪين جي خوف ۾ ڳالهيون نٿيون ٿي سگهن هڪ بيان ۾ هن چيو ته حڪومتکي تلوار جي نوق تي رکي ڳالهين لاءِ ڌٻاءُ وڌو پيو وڃي سعد رفيق چيو ته ماڻهو شهرن کي بند ڪرڻ بابت عمران خان جي اپيل کي رد ڪري ڇڏيندا ۽ ڪاروباري سرگرميون جاري رکندا. هن چيو ته عمران خان ملڪ دشمن قوتن جي هٿ ۾ کيڏي رهيو آهي ۽ اهي ملڪي سلامتي لاءِ خطرناڪ ثابت ٿي سگهن ٿا سعد رفيق چيو ته عمران خان پنهنجا الزام کڻي سپريم ڪورٽ وڃي جنهن سان اسان ڊيل ڪري رهيا آهيون اهي پڙهيل لکيل ۽ شريف ماڻهو نه آهن. هن چيو ته تحريڪ انصاف کي ٿورڙو زمين تي اچڻ ڏيو پوءِ ڳالهه ڪنداسين. اسان جيترو ان جي پويان وڃون ٿا اهي اوترو ئي پهاڙن تي چڙهن ٿا.