تازيون خبرون

Daily Archives: December 1, 2014

نواز شريف ”ميري عزيز هم وطنو“ وارن کان 10 ڀيرا بهتر آهي : آصف زرداري

لاهور (بيورو) اڳوڻي صدر آصف علي زرداري چيو آهي ته هڪ بگهڙ اسلام آباد ۾ تنبو لڳائي آلودگي پکيڙي رهيو آهي، نواز شريف ”ميري عزيز هم وطنو“ وارن کان 10 ڀيرا بهتر آهي. لاهور ۾ پيپلز پارٽي جَي يوم تاسيس واري تقريب کي خطاب ڪندي آصف زرداري، ڪپتان کي ڇتي تنقيد جو نشانو بڻائيندي چيو ته هڪ بگهڙ گاديءَ واري شهر ۾ تنبو کوڙي آلودگي پکيڙي رهيو آهي. آصف زرداري چيو ته سياستدانن کي سوچي سمجهي هلڻو پوندو،ڪپتان ڀلي بالنگ ڪرائي وٺي کين ڪا تڪڙ ناهي،عمران خان ننڍڙي سوچ جو مالڪ آهي،نواز شريف کي ڪيرائڻ سندس وس جي ڳالهه ناهي. آصف زرداري واضح ڪيو ته پيپلز پارٽي چاهي ته وزيراعظم کي ڪيرائي سگهي ٿي پر نواز شريف ”ميري عزيز هم وطنو“ وارن کان 10 ڀيرا بهتر آهي. اڳوڻي صدر چيو ته جمهوريت لاءِ پيپلز پارٽي کان وڌيڪ ٻي ڪنهن به جماعت قربانيون ناهن ڏنيون. پ پ جي يومتاسيس تقريب دوران گو نواز گو ۽ رو عمران رو جا نعرا پڻ لڳا، جنهن تي آصف زرداري چيو ته ڀلي ڪهڙا به نعرا لڳايا وڃن،کيس سڀ سٺا لڳندا آهن.

 

خالد محمود سومرو جي شهادت: سنڌ ۾ سوڳ برقرار، شٽر ڊائون

ڪراچي (نمائندن وٽان) سنڌ جي حقن لاءِ هر دور ۾ سگهارو آواز اٿاريندڙ ڌرتيءَ جي دلير پٽ ڊاڪٽر خالد محمود سومري جي شهادت تي سنڌ ۾ ٻئي ڏينهن به سوڳ برقرار رهيو، ،واقعي خلاف جــَي يــُو آءِ جــَي سڏ تي سنڌ سميت ملڪ جي مختلف شهرن ۾ به هڙتال بعد احتجاجي مظاهرا ڪري ڌرڻا هنيا ويا ، حيدرآباد ۾ ڪاروبار مڪمل طور بند رهيو،جڏهن ته مختلف علائقن ۾ جي يو آءِ ڪارڪنن احتجاجي مظاهرا ڪري ڌرڻا هنيا. لاڙڪاڻي شهر جا سمورا ننڍا، وڏا ڪاروباري مرڪز اڄ ٻئي ڏينهن به بند رهيا،جي يو آءِ ڪارڪنن روڊن تي نڪري مختلف هنڌن تي احتجاجي مظاهرا ڪيا. سکر شهر مڪمل طور بند رهيو،جنهنبعد ڪارڪنن احتجاجي مظاهرو ڪيو. روهڙي ۾ جي يو آءِ ڪارڪنن پاران عبدالقيوم، محمد صالح ۽ غلام الله جي اڳواڻي ۾ روهڙي نيشنل هاءِوي تي ٽائرن کي باهيون ڏئي احتجاجي مظاهرو ڪري ڌرڻو ھنيو ويو. وڳڻ ۾ هڙتال بعد جي يو آءِ جي ڪارڪنن قاري محمد عثمان مغيري جي اڳواڻي ۾ ڳوٺ ٿرڙي هاشم وٽ انڊس هاءِ وي تي ڌرڻو هڻي نعريبازي ڪئي، جنهن بعد مڇريل ڪارڪنن ٻيهر وڳڻ باءِ پاس وٽ ڌرڻو هنيو. سيتاروڊ ۾ جي يو آءِ ڪارڪنن توڙي قومي عوامي تحريڪ جي ڪارڪنن ۽ جسقم پاران غلام رسول کونهاري، مشهور ميمڻ، راشد ميمڻ، اختيار لغاري ۽ محبوب سنڌي جي اڳواڻي ۾ احتجاجي مظاهرو ڪيو ويو. ميهڙ ۾ مڪمل طور شٽربند هڙتال ڪئي وئي ، جي يو آءِ ڪارڪنن مولانا مسعود پنهور، مختيار پنهور ۽ ٻين جي اڳواڻي ۾ احتجاجي مظاهرو ڪري ٽائرن کي باهه ڏئي ڌرڻو هنيو ويو. سرهاڙي ۾ جي يو آءِ ڪارڪنن عبدالرحيم لغاري جي اڳواڻي ۾ احتجاجي ريلي ڪڍي نعريبازي ڪئي. رتيديري شهر جا سمورا ڪاروباري مرڪز بند رھيا، جي يو آءِ ڪارڪنن مولانا عبدالغفار جوئي،محمد مراد معرفاڻي ۽ مولانا طارق سومري جي اڳواڻيءَ ۾ احتجاجي مظاھرو ڪري باءِ پاس تي ٽائرن کي باھه ڏئي ڌرڻو هنيو. نئين ديري ۾ مڪمل شٽر بند ۽ ڦيٿا روڪ هڙتال ڪئي وئي،جنهن بعد مولانا عبدالقدوس پنهور، مولانا محمد طارق پنهور، مولانا محمد ايوب چني،ڪامريڊ حسين بخش ناريجي ۽ ٻين جي اڳواڻي ۾ مختلف سياسي، سماجي ۽ قومپرست ڌرين جي ڪارڪنن احتجاجي ريلي ڪڍي سکر – لاڙڪاڻو روڊ تي ٽائر ساڙي ڌرڻو هنيو. سجاول ۾ مڪمل طور شٽربند ۽ ڦيٿاروڪ هڙتال ڪئي وئي،جڏهن ته جي يو آءِ ڪارڪنن احتجاجي مظاهرو ڪري ڌرڻو هنيو. بدين،ڪڍڻ، کوسڪي، سيراڻي ۽ ٻين شهرن ۾ شٽربند ۽ ڦيٿاروڪ هڙتال ڪئي وئي، جڏهن ته جي يو آءِ ڪارڪنن عبدالغني گوپانگ ۽ جمن خاصخيلي جي اڳواڻي ۾ قطر مسجد کان ريلي ڪڍي قاضيا واهه پل تي ٽائرن کي باهه ڏئي ڌرڻو هنيو. شاهپور چاڪر ۾ شٽربند هڙتال بعد جي يو آءِ ڪارڪنن احتجاجي مظاهرو ڪري ڌرڻو هنيو،جڏهن ته لکي غلام شاهه ۾ مڪمل طور ڪاروبار بند ڪيو ويو ۽ جي يو آءِ ڪارڪنن احتجاجي مظاهرو ڪري ڌرڻو هنيو. قمبر ۽ اوٻاوڙي ۾ هڙتال ڪئي وئي،جڏهن ته جي يو آءِ جي ڪارڪنن احتجاجي مظاهرا ڪيا. محرابپور ۾ جي يو آءِ ڪارڪنن ڊاڪٽر خالد محمود سومري جي قتل خلاف احتجاجي مظاھرو ڪري ڌرڻو ھنيو. خيرپور ۾ جميعت علماءِ اسلام جو شهيد ٿي ويل اڳواڻ ڊاڪٽر خالد محمود سومرو جي شهادت واري واقعي خلاف ٺيڙهي ۽ ٻٻرلوءِ باءِ پاس تي، مولانا مير محمد ميرڪ ، جسقم جي مرڪزي جنرل سيڪريٽري امجد خان مهيسر ، مفتي اصغر علي آرائين ، مولانا سعد الله سومري جي اڳواڻي ۾ جي يو آءِ ۽ جسقم جي هزارين ڪارڪنن احتجاجي مظاهرو ڪري ڌرڻو هنيو. فيض گنج، پڪاچانگ، اڪري چودڳي، ڪرونڊي، واهي پانڌي ۾ به ڪاروبار نه کلي سگهيو، جڏهن ته ڪارڪنن احتجاجي مظاهرا پڻ ڪيا . جوهي ۾ جي يو آءِ ۽ جي ٽي آءِ پاران مولوي دوست محمد جمالي، مولوي حڪيم ٻٻر،قاري عبدالعزيز ۽ ٻين جي اڳواڻي ۾ ڪارڪنن احتجاجي مظاهرو ڪري دادو روڊ تي ڌرڻوهنيو. ميرپورماٿيلي ۾‎ هڙتال سبب ننڍا وڏا ڪاروباري مرڪز بند رهيا، جڏهن ته جي يو آءِ جي ڪارڪنن امير اسحاق لغاري جي اڳواڻي ۾ ‎ريلي ڪڍي قومي شاهراهه تي ڌرڻو هنيو. ريليءَ تي قومي شاهراهه وٽ اڻڄاتل موٽر سائيڪل سوار هٿياربندن فائرنگ ڪري ٽن ڄڻن کي زخمي ڪري وڌو. سڪرنڊ جي يو آئي ف سنڌ جي جنرل سيڪريٽري ۽ اڳوڻي سينيٽر ڊاڪٽر خالد محمود سومرو جي شهادت واري واقعي خلاف جي يو آئي ف پاران حافظ عبدالرشيد پرهياڙ ، مولوي عبدالقيوم چنا ۽ مولانا حذب الله کوسو جي اڳواڻي ۾ قومي شاهراهه انڙ پيٽرول پمپ وٽ ٽائرن کي باهيون ڏئي ڌرڻو هنيو ڌرڻي سبب روڊ جي ٻنهين پاسن کان سوين گاڏيون بيهي ويون مظاهرين سخت نعريبازي ڪندي مطالبو ڪيو ته شهيد ڊاڪٽر خالد محمود سومرو جي قاتلن کي فوري طور گرفتار ڪيو وڃي. سڪرنڊ ۾ جي يو آءِ ڪارڪنن پاران عبدالقيوم چنا، مولانا حزب الله کوسي، عبدالرشيد پرهياڙ، جي اڳواڻي ۾ احتجاجي مظاهرو ڪيو ويو. نوابشاهه، نئين آباد ۽ ٽنڊي جان محمد ۾ به هڙتال سبب سمورا ڪاروباري مرڪز ۽ ٽرانسپورٽ بند رهي،جڏهن ته ڪارڪنن احتجاجي مظاهرا ڪيا. ميرپور بٺوري ۾ جي يو آءِ ڪارڪنن پاران مولوي طفيل احمد، ڊاڪٽر قادر نظاماڻي جي اڳواڻي ۾ علي بندر کان احتجاجي ريلي ڪڍي وئي، جنهن ۾ اسڪولي شاگردن ۽ عام شهرين به شرڪت ڪئي. فريد آباد ۾ جي يو آءِ ڪارڪنن جوهر بروهي، علي حسن چانڊيي، حبيب بروهي، عبدالرسول سولنگي ۽ ٻين جي اڳواڻي ۾ ڪارڪنن ميهڙ فريد آباد مين روڊ تي احتجاجي مظاهرو ڪيو. ڪنڌڪوٽ،وارهه،پيرومل، راڌڻ ۽ ٻين شهرن ۾به ڪاروبار مڪمل طور بند رهيو. گهوٽڪي،مديجي ۽ ٻين شهرن ۾ به شٽربند هڙتال بعد جي يو آءِ ڪارڪنن احتجاجي مظاهرا ڪري ڌرڻا هنيا.. هڱورجا ۾ هڙتال سبب ڪاروباري مرڪز بند رهيا، جنهن بعد جي يو آءِ ۽ جسقم جي ڪارڪنن مولانا راشد رباني، حافظ راشد، ظهور دائي،منعان ميمڻ ۽ ٻين جي اڳواڻي ۾ احتجاجي ريلي ڪڍي قومي شاهراهه تي پريس ڪلب آڏو ڌرڻو هنيو. باڊهه ۾ جي يو آءِ، جسقم، ايس ٽي پي، جسمم ۽ ٻين پارٽين جي ڪارڪنن مولوي نصير احمد ڀُٽي،ڪامريڊ قادر بروهي،امتياز ڪانڌڙي ۽ ٻين جي اڳواڻي ۾ درگاهه شريف کان احتجاجي ريلي ڪڍي حيدر چوڪ تي ٽائرن کي باهه ڏئي ڌرڻو هنيو ويو. ڳڙهي خيري ۾ سمورا ڪاروباري مرڪز بند رهيا، جڏهن ته جي يو آءِ جي سوين ڪارڪنن مدني مسجد کان مولانا خالق داد بروهي،ثناءُ الله ۽ عبدالباسط بروهي جي اڳواڻي ۾ احتجاجي مظاهرو ڪري سنڌ – بلوچستان دنگ تي ڌرڻو هنيو. مٽياري ۾ مڪمل طور هڙتال ڪئي وئي ، جي يو آءِ ، جسقم، سياسي، سماجي ۽ ٻين تنظيمن جي ڪارڪنن پاران رشيد ڏيٿي، عيدو ڪلهوڙي، امير علي کوسي، طارق ميمڻ، سارنگ منگواڻي جي اڳواڻي ۾ قومي شاهراهه تي ڌرڻو هنيو ويو. موري ۾ ڪاروبار مڪمل طور بند رهيو، جڏهن ته جي يو آءِ ڪارڪنن پاران قاري عبيدالله، عبدالوحيد ۽ ٻين جي اڳواڻي ۾ احتجاجي ريلي ڪڍي وئي، جنهن ۾ جسقم ، قومي عوامي تحريڪ،جست ، جسمم ۽ ٻين ڪارڪنن به شرڪت ڪئي. سيٺارجا، رپڙي،ٺري ميرواهه ۽ عرضي ڀٽي ۾ به ڪارڪنن احتجاج ڪري ڌرڻا هنيا،  ڪي اين شاه ۾ جنرل سيڪريٽري ۽ علامه ڊاڪٽر خالد محمود سومرو جي قتل خلاف ڪي اين شاه ۾ شٽر بند هڙتال ڪري پورو شهر بند ڪرايو ويو. جنرل سيڪريٽري ۽ اڳوڻو سينيٽر علامه ڊاڪٽر خالد محمود سومرو جي قتل خلاف ڪي اين شاه ۾  جي يو آءِ تعلقي ۽ سٽي جي اڳواڻن حافظ حاجن لغاري، اسحاق کوهارو، انور کوهارو،ايس ٽي پي اڳواڻ فقير علي حسن جانوري سميت سوين ڪارڪنن  جي اڳواڻي ۾ احتجاجي ريلي ڪڍي شهر جو گشت ڪري پورو شهر بند ڪرايوويو ۽ بعد ۾ احتجاجي ريلي ڪڍي پريس ڪلب اڳيان ڌرڻو هڻي ويهي رهيا. ڌرڻي کي خطاب ڪندي اڳواڻ اسحاق کوهارو چيو ته ڊاڪٽر خالد محمود سومري جي قاتلن کي فوري طور گرفتار ڪيو وڃي جتي ايس ٽي پي اڳواڻ فقير علي حسن جانوري چيوته جي يو آ ءِ سنڌ جي جنرل سيڪريٽري   ڊاڪٽر خالد محمود سومرو جي  واقعي جي شديد لفظن ۾ مذمت ڪريون ٿا ان موقعي تي جي يو آءِ اڳواڻ حافظ حاجن لغاري چيوته ڊاڪٽر خالد محمود سومرو جي شهادت کي علماءِ ديوبند جي خلاف سازش آهي ڊاڪٽر خالد محمود سومري تي فجر جي نماز دوران قاتلانه حملو ڪيو ويو جنهن مان اهو صاف ظاهر آهي ملڪ ۾ حڪومت نالي ڪا به شي ناهي هتي ڪنهن جي به جان و مال محفوظ ناهي هنن صوبائي حڪومت کان مطالبو ڪيو آهي ان موقعي تي انورکوهارو چيو ته شهيد ڊاڪٽر خالد محمود سومري جي قاتلن کي جلد کان جلد گرفتار ڪري سخت کان سخت سزا ڏني وڃي هنن شهيد ڊاڪٽر خالد محمود سومري جي لاءِ دعاڪئي ته رب العزت کيس جنت الفردوس ۾ جاءِ عطا فرمائي ۽ ڪارڪنن کي صبر ڪرڻ جي توفيق عطا ڪري

 

ڊاڪٽر خالد محمود سومري جي قاتلن جي نشاندهي ۽ اطلاع ڏيندڙن لاءِ 20 لک رپيا انعام جو اعلان

ڪراچي (اسٽاف رپورٽر) سنڌ سرڪار، جي يو آءِ جي شهيد اڳواڻ ڊاڪٽر خالد محمود سومري جي قاتلن جي نشاندهي ۽ اطلاع ڏيندڙن لاءِ 20 لک رپيا انعام جو اعلان ڪري ڇڏيو،وڏي وزير سيد قائم علي شاهه هدايت ڪئي آهي ته واقعي جي تڪڙي جاچ ڪري قاتلن کي گرفتار ڪيو وڃي. وڏي وزير سيد قائم علي شاهه پاران ڪراچي مان جاري ڪيل بيان موجب شهيد ڊاڪٽر خالد محمود سومري جي قاتلن جي نشاندهي ۽ اطلاع ڏيندڙن کي 20 لک رپيا انعام ڏنو ويندو. وڏي وزير سيد قائم علي شاهه، واقعيجي جاچ لاءِ ڊي آءِ جــِي لاڙڪاڻي جي سربراهي ۾ جوڙيل ڪميٽي کي هدايت ڪئي آهي ته قاتلن کي بنا دير گرفتار ڪري سندن انجام تي رسايو وڃي. واضح رهي ته گــُذريل ڏينهن سکر ۾ مسجد اندر نماز دوران جــَي يـُو آءِ سنڌ جي سيڪريٽري جنرل ۽ اڳوڻي سينيٽر ڊاڪٽر خالد محمود سومري کي دهشتگردن گوليون هڻي شهيد ڪيو هو

 

اشتهاري مهم جو مقصد عمران خان ۽ ان جي غير قانوني ڌرڻي کي بي نقاب ڪرڻ آهي: پرويز رشيد

اسلام آباد (بيورو) سڌ سماءَ واري وفاقي وزير پرويز رشيد چيو آهي ته ميڊيا تي اشتهاري مهم جو مقصد پي ٽي آءِ چيئرمين عمران خان ۽ سندس غير قانوني ڌرڻي کي بي نقاب ڪرڻ آهي. هڪ بيان ۾ پرويز رشيد چيو ته عمران خان جو ڌرڻو آئين ۽ پارليامينٽ جي خلاف آهي جڏهن ته قوم جي ٽيڪسن جا لکين رپيا غير قانوني ڌرڻي جي سڪيورٽي تي خرچ ٿي رهيا آهن. هنچيو ته ميڊيا تي اشتهارن جو مقصد عمران خان ۽ ان جي غير قانوني ڌرڻي کي بي نقاب ڪرڻ آهي، کيس پتو هئڻ گهرجي ته اشتهاري مهم جي ادائگي حڪومت نه ڪري رهي آهي.

 

”ٻلي سئو ڪوئا کائي هلي آهي حج تي“عمران خان پ پ قيادت خلاف بدبودار گفتگو بند ڪري: شرجيل ميمڻ

ڪراچي: (اسٽاف رپورٽر)  پاڪستان پيپلز پارٽي جي مرڪزي ڊپٽي سيڪريٽري اطلاعات ۽ سنڌ جي اطلاعات کاتي واري صوبائي وزير شرجيل انعام ميمڻ چيو آهي ته عمران خان پيپلز پارٽي جي قيادت جي خلاف بدبودار گفتگو ۽ بدڪلامي فوري بند ڪري. عمران خان جو مثال اهو آهي ته “ سو ڪوئا کائي ٻلي حج تي هلي”. عمران خان پيپلز پارٽي جي قيادت کي ان ڪري تنقيد جو نشانو بڻائي رهيو آهي ته پيپلز پارٽي حڪومت ڪيرائڻ ۽ جمهوريت کي ڊي ريل ڪرڻ ۾ سندس ساٿ نه ڏنو. ڇنڇر واري واري ڏينهن پنهنجي هڪ جاري ڪيل بيان ۾ شرجيل انعام ميمڻ چيو عمران خان جا الزام ڪوڙ جي کٺڙي آهن ۽ عوام کي بيوفوق بڻائڻ جي ڪوشش آهي. هن چيو ته اقتدار جي هوس عمران خان کي انڌو ڪري ڇڏيو آهي ۽ ان ڪري هو پيپلز پارٽي جي قيادت خلاف بدبودار زبان استعمال ڪري رهيو آهي. شرجيل انعام ميمڻ چيو ته عمران خان جو مثال اهو آهي ته “سو ڪوئا کائي ٻلي حج تي هلي”. هن چيو ته عمران خان جلسا، جلوس ۽ ميڊيا تي بازاري زبان استعمال ڪري رهيو آهي. اسان کيس خبردار ڪيون ٿا ته هو فوري طور تي پيپلز پارٽي جي قيادت خلاف بدڪلامي جو سلسلو بند ڪري. هن چيو ته عمران خان ايتري تنقيد ڪري جيتري هو سڀاڻي برداشت ڪري سگھي. شرجيل انعام ميمڻ چيو آهي ته عمران خان ڪارنر ميٽنگن جي ذريعي هن ملڪ ۾ جنهن ڪلچر کي هٿي وٺرائڻ جي ڪوشش ڪري رهيو آهي هن ملڪ جو عوام خاص ڪري نوجوان اهڙي قسم جي بدتميزي واري ڪلچر کي ڪنهن به صورت برداشت نه ڪندا.

 

پيٽرول 9 روپيا 66 پئسا سستو ٿي ويو، نوٽيفڪيشن جاري

اسلام آباد (بيورو) اوگرا پيٽروليم شين جي اگهن ۾ گهٽتائيءَ جو نوٽيفڪيشن جاري ڪري ڇڏيو، جنهن موجب پيٽرول 9 رپيا 66 پئسا في ليٽر سستو ٿيڻ بعد ان جي نئين قيمت 84 رپيا 66 پئسا في ليٽر ٿي وئي. اوگرا پاران جاري ڪيل نوٽيفيڪشن موجب پيٽرول 9 رپيا 66 پئسا في ليٽر جڏهن ته هاءِ اسپيڊ ڊيزل 7 رپيا 12 پئسا في ليٽر سستو ٿي ويو. نوٽيفڪيشن موجب پيٽرول جي نئين قيمت 84 رپيا 53 پئسا ٿي وئي جڏهن ته هاءِ اسپيڊ ڊيزل هاڻي 94 رپيا 9 پئسا في ليٽر ۾ ملي سگهندو. لائيٽ ڊيزل پنج رپيا 39 پئسا في ليٽر گهٽتائي سان 77 رپيا 98 پئسا في ليٽر ۾ ملندو. هاءِ اوڪٽين جي قيمت ۾ به 10 رپيا 18 پئسا في ليٽر لاٿ ڪئي آهي جنهن بعد ان جينئين قيمت 106 رپيا 27 پئسا في ليٽر ٿي وئي. گاسليٽ به 4 رپيا 34 پسئا في ليٽر گهٽتائي سان 83 پئسا 18 پئسا في ليٽر ۾ فراهم ٿيندو. پيٽروليم شين جا نوان اگهه رات 12 وڳي کان پوءِ لاڳو ٿي ويا آهن.

 

عمران خان ملڪ جا وڏا شهر بند ڪرڻ جي ڌمڪي ڏئي ڇڏي

اسلام آباد(بيورو) عمران خان ملڪ جا وڏا شهر بند ڪرڻ جي ڌمڪي ڏئي ڇڏي، اسلام آباد ۾ ڌرڻي کي خطاب ڪندي پاڪستان تحريڪ انصاف جي سربراهه عمران خان اعلان ڪيو آهي ته 4 ڊسمبر کان ملڪ جا مختلف وڏا شهر بند ڪرڻ شروع ڪري ڇڏينداسين، 16 ڊسمبر تي پورو پاڪستان بند ڪيو ويندو، هن چيو ته مطالبا پورا نه ٿيا ته 16 ڊسمبر بعد اڳيون پروگرم (ڊي) ايندو، تحريڪ انصاف جو ڌرڻو جاري رهندو، 4 ڊسمبر تي لاهور، 8 ڊسمبر تي فيصل آباد، 12 ڊسمبر تي ڪراچي ۽ 16 ڊسمبرتي پورو پاڪستان بند ڪري ڇڏينداسين، عمران وڌيڪ چيو ته سمورا رستا بند ڪري اسان جي لاءِ ڪو به رستو ناهي ڇڏيو ويو، انصاف جو نظام طاقتور کي نه پر ڪمزور کي پڪڙيندو آهي، پاڪستان ۾ سڀ کان وڏا لٽيرا آصف علي زرداري ۽ نواز شريف آهن، ميان صاحب توهان ته اربون روپيا چوري ڪيا توهان کي ڊاڪو نه چوان ته ٻيو ڇا چوان؟، آصف علي زرداري ۽ نواز شريف 25 سالن ۾ ڪٿي کان ڪٿي پهچي ويا، ٻنهي وٽ اقتدار کان اڳ ڇا هيون، عوام غريب ٿيندو پيو وڃي ۽ هي ٻئي ڄڻا امير ٿيندا پيا وڃن، 1998 ۾ زرداري نواز پارٽنر شپ جي وقت ڊالر 15 روپين جو هو، ٻنهي ڄڻن ملڪ کي ايترو لٽيو آهي جو هاڻي ڊالر 103 روپيا ٿي ويوآهي، نواز شريف ۽ زرداري جو پيسو ملڪ کان ٻاهر آهي. تحريڪ انصاف جي وائيس چيئرمين شاهه محمود قريشي چيو آهي ته تقريرن جو وقت ختم ٿي ويو هاڻ فيصلي جو وقت اچي ويو آهي هاڻ فيصلا تحريڪ انصاف نه پر عوام ڪندي عمران خان جي فيصلن تي عوام لبيڪ چيو عوام کان سوال ڪيان ٿو ته خاموشي سان گهر هليا وڃون؟ اسلام آباد ۾ تحريڪ انصاف جي جلسي کي خطاب ڪندي شاهه محمود قريشي چيو ته تحريڪ انصاف جي ايندڙ قدم لاءِ عوام تيار آهي پر شايد نواز شريف تيار ناهي عوام ثابت ڪري ڇڏيو ته ضد انهن جو به پڪو آهي نواز شريف سان گڏ هڪ مداري آهي جنهن جو نالو زرداري آهي موجوده حڪومت عوام جي سمنڊ سامهون نٿي بيهي سگهي هن چيو ته هن ملڪ ۾ صاف پاڻي نه ملڻ سبب ٿر جي ٻارڙن جي زندگي کسي پئي وڃي جيڪڏهن اهڙو ملڪ قبول ناهي ته پوءِ اچو هٿ مٿي ڪيو ۽ نظام کي بدلائڻ جو واعدو ڪيو جيستائين تبديلي نه ايندي عمران خان وڙهندو رهندو تبديلي جو پيغام کڻي عمران خان سان گڏ هر ڪنڊ ڪڙڇ ۾ وينداسين پاڪستان عوامي مسلم ليگ جي سربراهه شيخ رشيد پاڪستان تحريڪ انصاف جي جلسي کي خطاب ڪندي چيو آهي ته جيڪڏهن اڳوڻي چيف جسٽس، اڳوڻي آرمي چيف ۽ اڳوڻي وزيراعظم مٿان ڪيس هلي سگهي ٿو ته نواز شريف تي ڇو نٿو هلي سگهي هن چيو ته نانگ جي چال ۽ نواز شريف جي سياست ۾ ڪوبه فرق ناهي هن وڌيڪ چيو ته مون پنهنجي زندگي ۾ ايڏو وڏو جلسو ڪڏهن به ناهي ڏٺو ۽ نه ڪڏهن ڏسندس پاڪستان جي عوام گو نواز گو جو فيصلو ٻڌائي ڇڏيو آهي عمران خان مون کي حڪم ڪري آئون عوام سان گڏ وزيراعظم هائوس هليو ٿو وڃان هن نواز شريف تي تنقيد ڪندي چيو ته جڏهن وقت گذري ويندو آهي ته وزيراعظم حويليان خطاب ڪرڻ لاءِ پهچي ويندو آهي. خيبرپختونخواهه جي وڏي وزير پرويز خٽڪ چيو آهي ته مولانا فضل الرحمان بهادر آهي ته سڀاڻي رستا بند ڪري ڏيکاري مان کولي ڏيکاريندس اڄ شرافت ڏيکاري سڀاڻي شرافت نه ڏيکارينداسين توکي رستي تي گهلينداسين اسلام آباد ۾ تحريڪ انصاف جي جلسي کي خطاب ڪندي پرويز خٽڪ چيو ته عمران خان 300 ڪئنال جي گهر ۾ رهي ٿو ته ڇا ٿيو هو ڪنهن جي پيءُ جو مال ناهي ماڻهو چون ٿا ته پرويز خٽڪ نچي ٿو اهڙي جنون ۾ ڪير نه نچندو.

 

حڪومت ايندڙ چونڊن کان اڳ لوڊشيڊنگ ختم ڪندي: خواجه آصف

اسلام آباد (بيورو) پاڻي ۽ بجلي جي وفاقي وزير خواجه آصف چيو آهي ته لوڊشيڊنگ جي خاتمي لاءِ ڪوشش ڪري رهيا آهيون، وزيراعظم خود 2017 تائين لوڊشيڊنگ جي خاتمي جي پروگرام جي مانيٽرنگ ڪري رهيو آهي، ايندڙ چونڊن کان اڳ لوڊشيڊنگ جو خاتمو ٿي ويندو، هڪ انٽرويو ۾ وفاقي وزير خواجه محمد آصف چيو ته حڪومت لوڊشيڊنگ جي خاتمي لاءِ گڏيل حڪمت عمليتيار ڪئي آهي، سيالڪوٽ ۾ هڪ تقريب کي خطاب ڪندي وفاقي وزير چيو ته حڪومت ايندڙ عام چونڊن کان اڳ لوڊشيڊنگ جو خاتمو ڪندي. هن چيو ته حڪومت گڏيل احترام ۽ برابري جي بنياد تي آمريڪا سان بهتر لاڳاپا چاهي ٿو، وفاقي وزير چيو ته آمريڪا کي فوجي ڪارروائي تي اعتماد ڪرڻ گهرجي، جيڪا قبائلي علائقن ۾ دهشتگردن خلاف بنا فرق جي ڪاميابي سان جاري آهي.

 

عمران خان جا اي ۽ بي پلان ناڪام ٿي چڪا، سي به ناڪام ٿي ويندو: اعتزاز احسن

لاهور(م.ڊ) پيپلز پارٽي جي سينيٽر اعتزاز احسن جو چوڻ آهي ته عمران خان جا اي ۽ بي پلان ناڪام ٿي چڪا جيڪڏهن سي پلان نواز شريفجي استعيفيٰ آهي ته اهو به ناڪام ٿيندو بلاول هائوس لاهور ۾ 47 يوم تاسيس ۾ شرڪت کان پهريان ميڊيا سان ڳالهائيندي اعتزاز احسن چيو آهي ته عمران خان جا پرامن جلسا سٺي ڳالهه آهي پر نواز شريف تي لشڪر ڪشي ۽ گن پوائنٽ تي استعيفيٰ وٺڻ بلڪل صحيح ناهي، هن جو چوڻ هو ته 2013ع جي اليڪشن آر اوز جي هئي پولنگ بيگز مان ردي نڪتي ۽ مرضي جي رزلٽ بڻائي وئي، اعتزاز احسن ۽ پيپلز پارٽي جمهوريت جا حامي آهن ۽ هو جمهوريت جو هميشه ساٿ ڏيندا.

 

مولانا فضل الرحمان لاڙڪاڻي پهتو، ڊاڪٽر خالد محمود سومرو جي پٽن سان تعزيت،اهم اجلاس طلب

لاڙڪاڻو(بيورو) جميعت علماءِ اسلام (ف) جي سربراهه مولانا فضل الرحمان چيو آهي ته قاتل ائين نه سمجهن ته ڊاڪٽر خالد محمود سومرو کي شهيد ڪرڻ سان اهي پنهنجي مقصد ۾ ڪامياب ٿي ويا آهن. شهيد جي ڇڏيل مشن ۽ نقش قدم تي هلنداسين. اهڙيون ڳالهيون هن ڪالهه لاڙڪاڻي ۾ شهيد ڊاڪٽر خالد محمود سومرو جي پٽن مولانا راشد محمود ، مولانا ناصر محمود سومرو ۽ ٻين وارثن سان تعزيت ڪرڻ بعد ميڊيا سان ڳالهائيندي ڪيون. هن چيو ته اهو حملو ڊاڪٽر خالد محمود سومرو مٿان نهپر منهنجي مٿان ٿيو آهي ۽ پهريان به منهنجي مٿان حملو ڪيو ويو، جنهن ۾ مان معجزاڻي طور محفوظ رهيس. هن چيو ته اسان جي اهم ساٿي کي ڪمزور مجرمن، قاتلن نشانو بڻائي هن کي اسان کان جدا ڪيو آهي، جنهن الله جي دين لاءِ پنهنجي زندگي وقف ڪئي. ڊاڪٽر خالد محمود سومرو مسجد ۾ نماز دوران شهيد ٿي اعليٰ مقام حاصل ڪيو. هن کي مرده نه چيو وڃي هو شهيد آهي ۽ شهيد قيامت تائين زنده رهندا آهن. هن چيو ته ظالمن ڊاڪٽر خالد محمدو سومرو کي شهيد ڪري منهنجي چيلهه ڀڃي ڇڏي آهي ۽ اسان پنهنجي بهادر، وفادار، مفلس ڀاءُ کان محروم ٿي ويا آهيون. هن چيو ته قاتلن خالد محمود سومري کي شهيد ڪيو پر هاڻ سڄي پاڪستان مان جميعت علماءِ اسلام جو ٻچو ٻچو خالد محمود سومرو بڻجندو. هو هڪ بهادر، عقابر، مدبر، انسان دوست هو. جنهن مذهب، ملڪ جي عوام لاءِ وڏي جدوجهد ۽ جاکوڙ ڪري شهادت جو رطبو ماڻيو. هن چيو ته شهادت ڪنهن ڪنهن جي نصيب ۾ ايندي آهي. سندس اسلام، ملڪ ۽ عوام لاءِ قرباني رنگ لائيندي. هن چيو ته هي وڏو انتهائي ڏکائيندڙ واقعو ۽ صدمو آهي. ڪارڪن نه گهٻرائن. اهي پنهنجي قوت ۽ طاقت مدرسن ۾ ديني ڪم ۽ انسان ذات جي خدمت ۾ صرف ڪن. مولانا فضل الرحمان سخت حفاظتي انتظامن هيٺ مدرسي پهتو. ان مواقعي تي ڪارڪن الله اڪبر جا نعرا هڻي قاتلن ٿي لعنت وسائي، مولانا فضل الرحمان ڊڪٽر خالد محمود سومرو جي پٽن مولانا ناصر محمود سومرو، راشد محمود سومرو ۽ ٻين سان تعزيت ڪئي ۽ ڏک جو اظهار ڪيو ۽ کين آٿت ڏني. ان موقعي تي مولانا فضل الرحمان مولانا راشد محمود سومرو کي پنهنجي پيءَ جي پڳ ٻڌرائي.