تازيون خبرون

Monthly Archives: November 2014

مان زندگيءَ جو هر فيصلو مڙس جي صلاح سان ڪندي آهيان؛ريما

ڪراچي (شوبز نيوز) فلمسٽار ريما خان چيو آهي ته شاديءَ کان پوءِ ڪامياب زندگي گھارڻ لاءِ پيار ۽ محبت جو هجڻ لازمي آهي، مان زندگيءَ جو هر فيصلو مڙس جي صلاح سان ڪندي آهيان، ان ڪري اسان خوشين سان ڀريل زندگي گذاري رهيا آهيون، هڪ انٽرويوءَ دوران ريما خان چيو ته ان ڳالهه ۾ ڪو شڪ ناهي ته پيار محبت کان پوءِ ٿيندڙ شاديون تمام ڪامياب هونديون آهن پر منهنجو يقين آهي ته جيڪڏهن پيار ۽ محبت برقرار رهي ته ناڪاميءَ جو سوال ئي پيدا نه ٿو ٿئي، هن چيو ته مون کي خوشي آهي ته منهنجو مڙس سڀ فيصلا صلاح سان ڪندو آهي. اهو ئي اسان جي خوشين جو راز آهي.

 

محمد حفيظ نيوزيلينڊ خلاف آخري ٽيسٽ ميچ ۾ 3 رنسن تان ڪيريئر جي پهرين ڊبل سينچري مڪمل ڪرڻ ۾ ناڪام

شارجه(اسپورٽس نيوز) پاڪستان ڪرڪيٽ ٽيم جي اسٽار اوپننگ بيٽسمين مڪمل ڪرڻ کان محروم رهجي ويو. محمد حفيظ ٽيون ڀيرو ٽيسٽ ميچن ۾ ڊبل سينچري جي ويجهو پهچي آئوٽ ٿيندڙ يونس خان ۽ محمد يوسف کانپوءِ ٽيون پاڪستاني بيٽسمين بڻجي ويو. شارجه ۾ نيوزيلينڊ جي خلاف جاري آخري ٽيسٽ ميچ جي پهرين اننگ ۾ حفيظ انتهائي شاندار بيٽنگ جو مظاهرو ڪيو. هن ڄمي نيوزيلينڊ جي بالرن جو مقابلو ڪيو ۽ شاندار سينچري اسڪور ڪئي. هو ڪيريئر جي پهرين ڊبل سينچر کان 3 رنسون پوئتي هو ته آئوٽ ٿي ويو. حفيظ ٽيون ڀيرو 190 رنسون ٺاهڻ جي باوجود ڊبل سينچري نه ٺاهي سگهيو آهي. اڄوڪي اننگ سندس ٽيسٽ ڪيريئر جي سڀ کان بهترين اننگز آهي. ان کان اڳ سندس وڌ ۾ وڌ اسڪور 196 هو

 

سريلنڪا ۽ انگلينڊ جون ٽيمون ٻي ون ڊي ميچ ۾ اڄ آمهون سامهون ٿينديون

ڪولمبو(اسپورٽس نيوز) سريلنڪا ۽ انگلينڊ جون ڪرڪيت ٽيمون 7 ون ڊي ميچن تي ٻڌل سيريز جي ٻي ون ڊي ميچ ۾ (اڄ) ڇنڇر ڏينهن ڪولمبو ۾ آمهون سامهون ٿينديون. سريلنڪا کي سيريز ۾ 0-1 جي سرسي حاصل آهي. پهرين ون ڊي ميچ ۾ آئي لينڊرز جي ٽيم انگلينڊ کي دلچسپ مقابلي کانپوءِ 25 رنسن تان هارايو هو. سريلنڪن ٽيم ٻي ميچ کٽي سيريز ۾ ڪاميابي ڊبل ڪرڻ جي ڪوشش ڪندي ٻئي پاسي انگلينڊ ٽيم ميزبان ٽيم کي هارائي سيريز ۾ حساب برابر ڪرڻ تي زور ڏيندي ان ڪري ڪرڪيٽ جي ماهرن ٻنهي ٽيمن جي وچ ۾ سخت مقابلي جي اُميد ظاهر ڪئي آهي. ٻنهي ٽيمن جي وچ ۾ ٽين ون ڊي 3 ڊسمبر، چوٿين ون ڊي 7 ڊسمبر، پنجين ون ڊي 10 ڊسمبر، ڇهين ون ڊي 13 ڊسمبر، جڏهن ته آخري ۽ ستين ون ڊي 16 ڊسمبر تي کيڏي ويندي.

 

راس ٽيلر ٽيسٽ ميچن ۾ ڪيچن جي سينچري مڪمل ڪندڙ نيوزيلينڊ جو ٻيو ڪرڪيٽر بڻجي ويو

شارجا(اسپورٽس نيوز) نيوزيلينڊ ڪرڪيٽ ٽيم جو ڀلوڙ بيٽسمين راس ٽيلر ٽيسٽ ميچن ۾ ڪيچن جي سينچري مڪمل ڪري ورتي. اهو اعزاز حاصل ڪندڙ اسٽيفن فليمنگ بعد ٻيو نيوزيلينڊ جو ڪرڪيٽر آهي. شارجا ۾ پاڪستان خلاف جاري آخري ٽيسٽ جي پهرين اننگ ۾ ٽيلر 3 ڪيچ ورتا ۽ ان سان ئي هن ڪيريئر جون 100 ڪيچون به مڪمل ڪيون.

 

معين خان عبدالرزاق جي انٽرنيشنل ڪرڪيٽ ۾ واپسي جو اعلان ڪري ڇڏيو

ڪولمبو (اسپورٽس نيوز) پاڪستاني چيف سليڪٽر معين خان اسٽار آل رائونڊر عبدالرزاق جي انٽرنيشنل ڪرڪيٽ ۾ واپسي جو اعلان ڪندي چيو آهي ته قومي ٽيم جا دروازا ان لاءِ هميشه کليل رهندا، پنهنجي هڪ انٽرويو  ۾ هن چيو ته اسٽار آل رائونڊر جي قومي ٽيم ۾ واپسي لاءِ دروازا کليل آهن پر ان لاءِ عبدالرزاق کي دوميسٽڪ ڪرڪيٽ کيڏي پنهنجي فٽنيس ثابت ڪرڻي پوندي،هن عبدالرزاق کي هدايت ڪئي ته هو ڊوميسٽڪ ڪرڪيٽ کيڏي پنهنجي فٽنيس ثابت ڪري ته جيئن هن کي قومي ٽيم ۾ ڪم بيڪ ڪرڻ جو موقعو ملي سگهي

 

ڇا سنڌ هاءِ ڪورٽ جي حڪم تي گم ٿيل آزاد ٿي ويندا

سنڌ هاءِ ڪورٽ طرفان پورهيت سرويچ پيرزادي سميت گم ڪيل ماڻهن کي هٿ ڪري ٽن ڏينهن اندر عدالت ۾ پيش ڪرڻ جو حڪم، جي جسٽس احمد علي شيخ ۽ جسٽس سيد فاروق شاهه تي ٻڌل ٻه رڪني بئنچ ۾ گم ٿيل ماڻهن بابت ٻڌڻيون ٿيون، عدالت گم ٿيل پورهيت سرويچ پيرزادي بابت ڊي آءِ جي ڏکڻ عبدالخالق شيخ کي حڪم جاري ڪندي چيو ته گم ٿيل سرويچ پيزادي کي آزاد ڪرائي ٽن ڏينهن ۾ عدالت ۾ رپورٽ پيش ڪئي وڃي عدالت ۾ درخواست گذار گم ٿيل سرويچ پيزادو جي امڙ مهرالنساءِ جي وڪيل بئرسٽر ضمير گهمرو پنهنجا دليل ڏيندي چيو ته پورهيت سرويچ پيرزادي کي 11 سيپٽمبر تي صدر واري علائقي ريگل چوڪ ڀرسان دوائن واري ڪمپني جي موٽر سائيڪل ۽ سامان سميت کنڀيو ويو آهي جيڪو اڃان تائين گم آهي،  عدالت گم ٿيل پورهيت سرويچ پيرزادي بابت ڊي آءِ جي ڏکڻ عبدالخالق شيخ کي حڪم جاري ڪندي چيو ته گم ٿيل سرويچ پيزادو کي آزاد ڪرائي ٽن ڏينهن ۾ عدالت ۾ رپورٽ پيش ڪئي وڃي، ساڳئي بئنچ بن قاسم ٿاڻي جي پپري سنڌي ڳوٺ مان 13 آگسٽ 2014 تي اسٽيل ٽائون ٿاڻي جي ايس ايڇ او هارون ڪورائي طرفان فهيم ڀُٽي کي اغوا  ڪري گم ڪرڻ بابت گم ٿيل فهيم جي ٻڌڻي درخواست گذار گم ٿيل فهيم ڀُٽي جي والده فرزانه جي وڪيل عدالت کي ٻڌايو ته فهيم لاڙڪاڻي جو رهندڙ آهي هتي مائٽن وٽ گهمڻ آيو هو هن کي ايس ايڇ او اسٽيل ٽائون هارون ڪورائي اغوا ڪري کڻي ويو ۽ اڃان تائين گم آهي جنهن جي ايف آءِ آر عدالتي حڪم تي داخل ٿي هئي پر پوليس ملي ڀڳت ڪري اسان جي ايف آءِ آر اي ڪلاس ۾ خارج ڪري ڇڏي آهي ، عدالت ڊي آءِ جي اوڀر منير شيخ کي حڪم ڏنو ته هو ڪيس جي ٻيهر جاچ ڪري 11 ڊسمبر تي عدالت ۾ رپورٽ پيش ڪري ،ساڳي بئنچ ۾ نيول ڪالوني مان گم ٿيل علي احمد بلوچ بابت ٻڌڻي ٿي گذري عدالت ۾ گم ٿيل 21 سالن جي بي ڪام جو شاگرد علي احمد بلوچ جي والد حسنه بي بي ۽ چاچي وهاب بلوچ جي وڪيل عدالت کي دليل ڏيندي چيو ته علي احمد بلوچ کي 3 ڊسمبر تي ماڙيپور جي علائقي نيول ڪالوني مان پوليس موبائيل ۽ هڪ ڪار تي پوليس ۽ ماڻهو آيا اغوا ڪري کڻي ويا هن جو اڃان تائين ڪو به ڏس پتو ناهي، ته هو ڪٿي آهن وڪيل جا دليل ٻڌڻ کان پوءِ ، عدالت گم ٿيل علي احمد بلوچ جي آزاديءَ لاءِ آءِ جي پوليس سنڌ ، ڊي جي رينجرز ، ايس ايس پي اتر ۽ ٻين کي نوٽس جاري ڪندي 11 ڊسمبر تي جواب طلب ڪري ورتو آهي .ساڳي   بئنچ ۾ گم ٿيل ضياءِ ڪالوني ڪورنگي جي رضوان جي آزاديءَ  بابت ٻڌڻي ٿي گذري عدالت ۾ گم ٿيل رضوان جي والده جي وڪيل عدالت کي دليل ڏيندي ٻڌايو ته رضوان کي ضياءِ ڪالوني مان 21 آڪٽوبر تي ايس ايڇ او جهان خان لاشاري ، اي ايس آءِ خالد پرويز ، اي ايس آءِ انور ، پي سي عاشق ۽ نذاقت علي اغواه ڪري کڻي ويا آهن ۽ هاڻي هن کي آزاد ڪرڻ لاءِ 4 لک روپيا رشوت وٺن ٿا ٻڌڻي دوران عدالت ۾ موجود ايس ايس پي سٽي شيراز نذير ٻڌايو ته گم ٿيل رضوان پوليس وٽ نه آهي وڪيل جا دليل ٻڌڻ کان پوءِ عدالت ڪاوڙ جو اظهار ڪندي ڊي آءِ جي ڏکڻ عبدالخالق شيخ کي حڪم ڏنو ته هو گم ٿيل رضوان کي آزاد ڪرائي ذاتي طور تي تفصيلي رپورٽ سميت 11 ڊسمبر تي عدالت ۾ پيش ٿئي، گم ٿيل ماڻهن جي ٻڌڻي دوران عدالت ريمارڪس ڏيندي سخت ڪاوڙ جو اظهار ڪندي چيو ته ماڻهو قانون لاڳو ڪندڙ ادارن کان ڊڄي ڪري بلوچستان ڇڏي ڪراچي منتقل ٿيئن ٿا ، پر ڪراچي ۾ به حساس ۽ قانون لاڳو ڪندڙ ادارن جي خلاف شڪايتون ملن ٿيون ته ماڻهن کي حساس ادار ئي گم ڪري قتل ڪن ٿا پوليس به عدالت کان مٿانهون ڪم ڪري رهي آهي ۽ مسلسل عدالتي حڪمن کي نذرانداز ڪري رهي آهي عدالتن سان سرڪار ۽ پوليس جو رويو افسوس جوڳو آهي

 

16هين ۽ 17 هين گريڊ جون سڌيون ڀرتيون سنڌ پبلڪ سروس ڪميشن تي سڌو وارنسيم بخاري

قانون واري صوبائي کاتي پاران قاعدن ۾ ترميم لاءِ اماڻيل سمري وڏي وزير منظور ڪري ڇڏي آهي، جنهن کانپوءِ هڪ اڌ ڏينهن ۾ نوٽيفڪيشن جاري ٿيندو، جيڪو قانون تصور ڪيو ويندو. قاعدن ۾ ترميم سان پبلڪ سروس ڪميشن جي دائري ۾ ايندڙ مختيارڪارن، اسسٽنٽ ڪمشنرن، ڊي ايس پيز، ايڪسائيز ۽ ٽيڪسيشن آفيسرن، ليڪچرارن، ڊاڪٽر، ليبر آفيسرن، سيڪشن آفيسرن ۽ تعلقه ايجوڪيشن آفيسرن سميت 16 هين ۽ 17 هين گريڊ جون ڀرتيون ڪميشن کانسواءِ ڪرڻ لاءِ، سنڌ سرڪار بااختيار ٿي ويندي. 24 آڪٽوبر 2014ع تي سيڪريٽري قانون مير محمد شيخ 16 هين گريڊ جي سڌين ڀرتين ڪرڻ لاءِ سنڌ جي وڏي وزير کي سمري اماڻي، جنهن تي وزيراعليٰ 17 گريڊ جي به سڌين ڀرتين ڪرڻ جي تجويز ڏني.

سنڌ سول سرونٽس (اپائنٽمينٽ، پروموشن، اينڊ ٽرانسفر) رولز 1974 جي عنوان سان سنڌ جي وڏي وزير وٽ پهتل سمري جي رول نمبر 10 (اي) موجب صوبائي حڪومت جي سنڌ پبلڪ سروس ڪميشن جي دائري ۾ گريڊ 16 کان 22 وارن عهدن جي بنيادي ڀرتي ڪميشن کي امتحان يا ٽيسٽ ذريعي ڪرڻي آهي پر سمري ۾ عوامي مفاد ۾ حڪومت پاران اهڙي عمل کي جائز ۽ مناسب قرار ڏنو ويو آهي. اها سمري چيف سيڪريٽري سنڌ کي باءِ پاس ڪندي سڌو سائين قائم علي شاهه ڏانهن موڪلي وئي، جنهن تي سنڌ جي وڏي وزير 17 هين گريڊ جي بنيادي ڀرتي سليڪشن ڪاميٽي ذريعي ڪرڻ جي صلاح ڏني. سي ايم هائوس 28 آڪٽوبر تي اها سمري آئوٽ ورڊ نمبر 1859 لڳائي، چيف سيڪريٽري سنڌ ڏانهن اماڻي ڇڏي آهي. چيف سيڪريٽري سجاد سليم هوتيانه، صوبي جي گورننس سان تعلق رکندڙ هن اهم ترين انتظامي معاملي تي ڪا به راءِ ڏيڻ يا سنڌ پبلڪ سروس ڪميشن ذريعي ميرٽ جي بنياد تي ڀرتيون ڪرڻ واري عمل ڪمزور ڪرڻ لاءِ ٿيندڙ ڪوششن جي مخالفت ڪرڻ يا انهيءَ اهم معاملي تي سروسز ۽ جنرل ايڊمنسٽريشن جي کاتي وارن قانوني ماهرن ۽ پبلڪ سروس ڪميشن جي راءِ وٺڻ بنا، ساڳئي ڏينهن تي صحيح ڪري اها سمري سي ايم ڏانهن اماڻي، جنهن ۾ ڄاڻايو ويو هو ته 17 هين گريڊ جي ڀرتي سڌيءَ ريت ڪرڻ جو چيو ويو آهي! جنهن تي عمل ڪرڻ لاءِ قانون واري سيڪريٽري کي سمري اماڻي وئي آهي. قانون واري سيڪريٽري ڊائري نمبر 10404 لڳائي 5 نومبر 2014 تي اها سمري فيصلي لاءِ ٻيهر وڏي وزير ڏانهن اماڻي ڇڏي، جيڪا وڏي وزير کان منظور ٿي قاعدن ۾ ڄاڻايل ترميم جو نوٽيفڪيشن جاري ٿيڻ لاءِ چيف سيڪريٽري سنڌ جي دفتر ۾ پهچي وئي آهي.

ماهرن جو چوڻ آهي ته سنڌ پبلڪ سروس ڪميشن جي فنڪشن رولز ۽ صوبائي حڪومت جي ڪجهه ٻين قاعدن ۾ به ترميمون اڻٽر آهن پر سوال اهو آهي ته آئين ۾ ميرٽ جي بنياد تي ڀرتي ڪرڻ لاءِ سڀني اُميدوارن کي برابري وارو حق ڏيڻ ۽ ڀرتي وارو شفاف طريقو اختيار ڪرڻ جي ڏنل ضمانت جو ڇا ٿيندو؟ ائين ناهي ته پيپلزپارٽي 16 هين ۽ 17 هين گريڊ جي سڌين ڀرتين لاءِ ڪا پهرين ڪوشش ڪئي آهي. پ پ جي اڳين حڪومتن ۾ به ائين ٿيندو آيو آهي ۽ تن ڏينهن ۾ جيڪي سفارش، رشوت يا تعلقاتن ۽ مٽي مائٽي جي بنياد تي همراهه ڀرتي ڪيا ويا هئا، سي اڄ ضلعن جا مالڪ بڻيا ويٺا آهن ۽ سچ ته اهو آهي ته جن ڪرسين تي اهي ويٺل آهن، سي جيڪڏهن ساهه واريون هجن ها ته ضرور لڄي ۽ شڪي ٿين ها!

اهڙين ڪوششن جي حوالي سان ارباب غلام رحيم جي وڏ وزارت دوران 11 هين گريڊ جي ڀرتين بابت به ڪميشن جي دائري کان ٻاهر سڌين ڀرتين واريون حقيقتون خلق ڏسي ۽ پسي چڪي آهي. مان سوچيان ٿو ته عوام جي مفاد ۾ جيڪا سرڪار اڄ 16 هين ۽ 17 هين گريڊ جي سڌين ڀرتين واري سنجيده حڪمت عملي جوڙي آهي. انهيءَ ساڳئي سنڌ سرڪار کي سڀاڻي جيڪڏهن عوامي مفادن ۾ 18 کان 22 گريڊ تائين جي ڀرتين جو به سڌو سنئون اختيار استعمال ڪرڻ جو خيال آيو ته انهن کي ڪير روڪيندو؟ ۽ کانئن ڪير پڇاڻو ڪندو؟

ان سڄي پس منظر ۾ جيڪا اهليت ۽ انصاف جي لتاڙ ٿيندي آئي آهي، اهي لقاءُ لوڪ سالن کان ڏسندو آيو آهي ۽ صبر ڪندو آيو آهي ڇو ته انهن جي هٿ وس ڪجهه به نه آهي، اُهي سياستدانن جي ڄار ۾ اهڙا ته ڦاٿل آهن جو مجبوريون، مصلحتون ۽ بي وسيون ماڻهن کي دل جي دانهن ٻاهر ڪڍڻ جي اجازت ئي نه ٿيون ڏين. اسان وٽ نوڪريون هاڻ وڪري جو اهڙو وکر بڻجي چڪيون آهن، جو ان هڪ زبردست صنعتي درجو اختيار ڪري ورتو آهي. اها جيڪا ونڊ ورڇ ٿئي ٿي تنهن خلق جون وايون بتال ڪري ڇڏيون آهن.

سنڌ ۾ اڳ ئي نوڪرين جو وڪرو وڏي پئماني تي هر اداري، هر ضلعي ۽ هر سطح تي سامهون ايندو رهيو آهي. اهڙي حال ۾ هاڻي جيڪڏهن 16 هين ۽ 17 هين گريڊ جون نوڪريون به سرڪاري گرهه بڻبيون ته پوءِ چٽاڀيٽيءَ وارن امتحانن وسيلي غريب گهراڻن سان تعلق رکندڙ ذهين ۽ باصلاحيت نوجوانن ۾ سخت اداسي ۽ مايوسي اڻٽر آهي ۽ اهو ذهين شاگردن جي لاءِ موت جي برابر آهي. ائين ناهي ته پبلڪ سروس ڪميشن ذريعي ورتل امتحانن ۾ ڪا سفارش يا رشوت ٿي هلي پر گهٽ ۾ گهٽ نوڪريءَ جي حاصلات جو هڪ محنت جوڳو رستو ۽ وسيلو ته موجود آهي نه؟ جيڪي پبلڪ سروس ڪميشن جا چيئرمين يا ميمبر ٿيندا آيا آهن، سي سئو سيڪڙو اهليت جي بنياد تي ناهن ايندا پر اُهي جيئن ۽ جهڙي حال ۾ ايندا ۽ هوندا آهن، گهٽ ۾ گهٽ ٽڪو پئسو يا اٽي ۾ لوڻ برابر اهليت جو احساس ته ڪندا آهن ني!

اسان جي آڏو اهڙا ڪيترا نوجوان آهن، جن پنهنجي محنت ۽ جستجو سان نوڪريون حاصل ڪيون آهن ۽ انهن جي حاصلات سندن خوشحاليءَ جو سبب ته بڻي ئي آهي پر ان سان گڏوگڏ ٻين بيروزگار نوجوانن ۾ ان همٿ ۽ حوصلي جا جواز به پيدا ڪيا آهن. اهو اتساهه ۽ اها اُميد هنن کي زندگيءَ جي ڊوڙ ۾ وڌ کان وڌ پاڻ تي ڀاڙڻ جو احساس ۽ اعتماد ڏياريندي آئي آهي ۽ هو جيئڻ جا نوان جتن ڪندي ڏٺا ويا آهن. هنن کي هڪ دلاسو ۽ آسرو هجي ٿو ته هڪ ڏينهن هوندو، جڏهن سندن ڪوششون رنگ لائينديون ۽ هو به پنهنجي علم، عقل ۽ لياقتن جي آڌار تي سکيا ستابا ٿيندا.

پر سنڌ سرڪار جا سانباها، جيڪي چغليون هڻي رهيا آهن، انهن واضح طور تي بيروزگار ۽ باصلاحيت نوجوانن جي اُميدن تي پاڻي ڦيري ڇڏيو آهي. اخبارن ۾ خالي آسامين جا ڌڙا ڌڙ اشتهار شايع ٿي رهيا آهن پر سوال اهو آهي ته انهن ۾ جن قانونن، قاعدن ۽ گهرجن جي گهر ڪئي وڃي ٿي، ڇا اهڙن ضابطن جو تقدس سرڪار خود پاڻ برقرار رکي سگهندي. اسان وٽ اڳ ۾ به اهڙا اشتهار مايوس نوجوانن ۾ زندگيءَ جي نئين اُمنگ طور ڏٺا ويا آهن پر انهن خوابن سان جيڪو حشر هتي پاڻ وٽ ٿيندو آيو آهي، سو به ڪنهن کان لڪل يا ڳجهو ناهي! اسان وٽ اشتهار حقيقت ۾ پنهنجن ماڻهن کي نوازڻ لاءِ ڪتب ايندا رهيا آهن. اشتهارن ۾ جيڪي تقاضا ٿيل هوندي آهي، سچائي وري ان جي ابتڙ سامهون ايندي آهي. ماڻهو هزارن ۽ لکن جي تعداد ۾ درخواستون جمع ڪرائيندا آهن پر نوڪريون پوءِ به ايم پي اي، ايم اين ايز يا صاحب اقتدار  پارٽي جي عهديدارن ۾ ورهايون وينديون آهن ۽ انهن جي بنگلن تي جڙيل لسٽن جي آڌار تي سرڪاري ادارا آرڊر جاري ڪندا آهن ۽ ان سڄي عمل ۾ جيڪا قائدن ۽ ضابطن جي لتاڙ ٿيندي آهي. اهڙن ڀڃڪڙين کي ڏسندي دنيا دنگ رهجي ويندي آهي. نيتجي ۾ نااهل، هڏ حرام ۽ ڪوڙين ڊگرين ۽ ڪوڙين عمرين ذريعي بدنام ڏوهاري به سرڪاري ملازم بڻجي رهيا آهن، جيڪو ماڻهو لکين روپيا ڀري نوڪري وٺي ٿو، سو گهر ويٺي پگهار ته کڻندو آهي پر نوڪري نه ڪندو آهي! ۽ ان سڄي نتيجي ۾  جيڪو ادارن جو توازن بگڙي ٿو، تنهن جا جڳ جهان اڳ ئي کٽيا کاڌيون ويٺو آهي.

سياسي مداخلت سنڌ جي بيورو ڪريسي کي يا ته بيوس ڪري ڇڏيو آهي يا وري پاڻ سان ملائي ڇڏيو آهي، جنهن جي نتيجي ۾ سمورن ادارن جو تمام خراب حشر ٿيو آهي. جڏهن اسان (NTS) نيشنل ٽيسٽنگ سروس جي ويب سائيٽ ڏسون ٿا ته اُتي فقط وفاقي ادازرن جون ۽ ٻين ٽنهي صوبن جي نوڪرين جا پراجيڪٽ ڏسجن ٿا. ڪي پي ڪي، پنجاب ۽ بلوچستان ۾ ته پوليس ۾ ساهين جي ڀرتين لاءِ به اين ٽي ايس جون خدمتون ورتيون وڃن ٿيون ۽ ميرٽ جي بنياد تي اُتي ڀرتيون به ٿين ٿيون پر سنڌ ئي اهو صوبو آهي، جيڪو مٿين مڙن ئي ساراهه جوڳين سرگرمين کان بي نياز آهي.

ان کان علاوه سي ايس ايس جي امتحانن لاءِ تياري ڪندڙ ۽ ان حوالي سان تجربا ڪندڙ نوجوان جن جي من ۾ هزارين خواهشون ۽ ارادا هوندا آهن، انهن مٿان سنڌ حڪومت پاران آفيسرن جي سڌيءَ ريت ڀرتي ڪرڻ واري خبر وڄ بڻجي ڪڙڪي ۽ ڪري آهي. حڪومت جي سڌي ڀرتين واري عمل سان باصلاحيت ۽ ذهين بيروزگار نوجوانن ۾ اداسيءَ جو احساس ته وڌندو ئي وڌندو پر هاڻ سنڌ جون سرڪاري توڙي پرائيويٽ لائبريريون به ويران ٿيڻ جا اهڃاڻ ۽ جواز وڏي پئماني تي پيدا ٿي ويا آهن. ڇو ته انهن ۾ وڏو انگ انهن نوجوانن جو هوندو آهي، جيڪي اتي ويهي چٽاڀيٽي وارن امتحانن جي تياري ڪندا رهيا آهن. گڏوگڏ، پبلشنگ ادارا پڻ بند ٿيڻ جا امڪان وڌي ويا آهن. جڏهن پڙهڻ وارا ئي نه هوندا ته ڪتاب ڪير وٺندو؟ ۽ جڏهن ڪتابن جي خريداري زبردست حد تائين گهٽجي ويندي ته پوءِ نوجوانن جي رهنمائي لاءِ رات ڏينهن هڪ ڪري تحريرون ۽ سٺا ڪتاب لکندڙ ليکڪ به ڪنهن ٻي ڪرت سان لڳندا.

نتيجو اهو ٿيندو جو زمينون به وڏيرن وٽ، ڪارخانا به انهن جا ۽ آخرڪار اهم نوڪريون به انهن جون! پوءِ ادارن جي اهڙي ڀينگ ڏسبي جيئن اڄڪلهه پاڻ وٽ بدنام زمانه بلديات واري کاتي جو حال ڏسجي ٿو، جنهن ۾ 16 هين ۽ 17 هين گريڊ جون اهم نوڪريون به سڌيءَ ريت سنڌ سرڪار ورهايون هيون ۽ نتيجي طور هاڻي سنڌ جي شهرن جي روڊن رستن جا حال، جيڪي گواهيون ڏئي رهيا آهن يا جيڪا غلاظت ۽ گندگي شهرن جي زينت بڻيل آهي، اها گهڻو ڪجهه وائکو ڪري رهي آهي.

گذريل هڪ هفتي کان سڄي شهر شڪارپور سيلابي ريلن جا منظر پيش ڪري رهيو آهي، چنگچين ۽ رڪشائن وارن پنهنجو ڪاروبار بند ڪري ڇڏيو آهي. روڊن، رستن تان گذرڻ ماڻهن لاءِ وڏي ۾ وڏو مسئلو بنيل آهي پر ڪنهن کي ڪا پرواهه ئي ناهي!

جيڪڏهن ائين ئي ٻين ادارن ۾ نالائق، نااهل ۽ سفارشي يا رشوتي ماڻهو 16 هين ۽ 17 هين گريڊ ۾ سڌيءَ ريت ڀرتي ٿيا ته پوءِ سنڌ صوبي جو ته الله ئي واهي آهي ۽ لڳي ٿو ته سنڌ جي بيروزگار نوجوانن کي ڪن ٻين صوبن يا ڪنهن ملڪ ڏانهن ڳڀي جي ڳولا لاءِ نڪرڻو پوندو. سنڌ کانسواءِ باقي مڙن ئي صوبن ۾ اتان جي پبلڪ سروس ڪميشن جو واءُ سواءُ گهڻي حد تائين تسلي جوڳو ڏسڻ ۾ اچي ٿو پر سنڌ ۾ ان حوالي سان ڪاري وارا ڪک آخر ڇو ڏسبا آيا آهن؟ اهو هڪ اهڙو سوال آهي، جيڪو سنڌ جي هزارين ۽ لکين بيروزگار باصلاحيت نوجوانن جي ذهن ۾ سدائين گونجندو ئي رهي ٿو پر ان جو سنڌ سرڪار اڄ ڏينهن تائين ڪنهن به تسلي جوڳي جواب ڏيڻ  ۾ ڪا دلچسپي نه ڏيکاري آهي. ها ايترو ضرور آهي ته هن اهليت جي آڌار تي روزگار جي تلاش ۾ مصروف ماڻهن جون پريشانيون ضرور وڌايون آهن ۽ 16 هين 17 هين گريڊ ۾ سڌين ڀرتين واري خبر به اهڙيءَ ئي سلسلي جو تسلسل آهي!

 

نواز- مودي ملاقات، برف پگهرجڻ لڳي، باضابطا ڳالهين جي ذميواري ڀارت تي آهي : طارق فاطمي

کٽمنڊو (م.ڊ/اي پي پي) پاڪستان ۽ ڀارت جي وزيراعظمن ڪالهه خميس ڏينهن هتي گرمجوشي سان هٿ ملائي ڪيترن ئي هفتن کان جاري افواهن ۽ تڪرارن واري ماحول کي ختم ڪري ڇڏيو جنهن سان ڏکڻ ايشيائي ملڪن جي 8 رڪني علائقائي تنظيم جي 18 هين سربراهه اجلاس جي پڄاڻي انتهائي خوشگوار ماحول ۾ ٿي. وزيراعظم محمد نواز شريف ۽ ڀارتي وزيراعظم نريندر مودي سارڪ جي 18 هين سربراهه اجلاس جي پڄاڻي واري ويهڪ ۾ جيئن ئي گرمجوشي سان هٿ ملايو ته ڪانفرنس هال تاڙين سان گونجي ويو ۽ ماحول ۾ خوشگوار تبديلي پيدا ٿي وئي. ٻنهي اڳواڻن هٿ ملايو ۽ گهٽ ۾ گهٽ 30 سيڪنڊ تائين هڪ ٻئي جو هٿ هٿ ۾ رکيو. هنن مسڪراهٽ سان خوشگوار انداز ۾ جملن جي ڏي وٺ پڻ ڪئي. ٻنهي اڳواڻن جي وچ ۾ ان ملاقات کان اڳ ۾ مختلف قسم جا افواهه موجود هئا جڏهن ته سارڪ سربراهن جي ڍليخل جي پرفضا ماڳ تي غيررسمي ويهڪ دوران مختصر ملاقات کانپوءِ ٻنهي طرفن جي وچ ۾ برف پگهري وئي ۽ ان جو حقيقي مظاهرو ڪئميرائن آڏو سارڪ سربراهه اجلاس جي پڄاڻي واري ويهڪ دوران ڏسڻ ۾ آيو جنهن کي سڄي خطي ۾ سڌوسنئون نشر ڪيو ويو، پاڪستان ۽ ڀارت جي وزيراعظمن جي پرجوش هٿ ملائڻ سان ئي کٽمنڊو جو سٽي هال تاڙين سان گونجي اٿيو، ٻئي طرف وزيراعظم جي خصوصي معاون طارق فاطمي هتي صحافين سان ڳالهائيندي چيو ته اهو هٿ ملائڻ برجسته هو. هن چيو ته سارڪ مان تمام گهڻيون اميدون آهن ۽ اها ڪانفرنس خوشگوار انداز ۾ پڄاڻي تي پهتي آهي. هن چيو ته اسان سارڪ مان تمام گهڻو مطمئن ٿي واپس موٽي رهيا آهيون، جڏهن کانئس سوال ڪيو ويو ته ڇا ان هٿ ملائڻ سان سارڪ کي ڪو فرق پوندو ته طارق فاطمي چيو ته سارڪ ملڪن جي خواهش آهي ته پاڪستان ۽ ڀارت جا ٻطرفا لاڳاپا بهتر ٿين ته جيئن علائقائي تنظيم مستحڪم ٿئي. هن ياد ڏياريو ته عالمي گادي وارن شهرن ۾ ڀارت پاران پرڏيهي سيڪريٽرين جي سطح تي ڳالهين جي ملتوي ٿيڻ تي ڳڻتي ظاهر ڪئي، وزيراعظم نواز شريف ڀارتي وزيراعظم کانسواءِ ٻين سمورن اڳواڻن سان ملاقاتون ڪيون ڇو ته پاڪستان سمجهي ٿو ته باضابطا ڳالهين جي ذميواري ڀارت تي آهي. هن چيو ته ڪا باضابطا ملاقات نه ٿي جڏهن کائنس هٿ ملائڻ کانپوءِ مستقبل بابت سوال ڪيو ويو ته هن جواب ڏنو ته پاڪستان جو موقف اهو ئي آهي پاڪ ڀارت لاڳاپا پائيدار ڳالهين ذريعي ئي اڳيان وڌي سگهن ٿا. هن چيو ته خواهش ۽ عزم موجود آهي ۽ ٻنهي طرفن کان ان جي مخلصاڻي پيروي کانسواءِ اڳيان نه ٿو وڌي سگهجي. هڪ سوال جي جواب ۾ طارق فاطمي چيو ته هو ان بابت تبصرو ڪرڻ جي پوزيشن ۾ نه آهي ته غيررسمي ويهڪ (ريٽريٽ) ۾ ڇا ٿيو. هن چيو ته ٻنهي اڳواڻن جي باڊي لينگوئيج بهتر هئي، هو مسڪرائڻ سان گڏ مطمئن ڏسڻ ۾ آيا. هن چيو ته اسان جو اصولي موقف عزت ۽ وقار سان برقرار رکيو ويو آهي اسان ڪنهن دٻاءُ ۾ ناهيون آيا. طارق فاطمي چيو ته اسان پاڪستان جي مفاد کي مٿانهون رکيو. طارق فاطمي چيو ته مجموعي طور تي سارڪ توانائي تعاون بابت معاهدي تي متفقه طور تي صحيحون ڪري هڪ اڳڀرائي ڪئي آهي. هن چيو ته موٽر گاڏين ۽ ريلويز بابت ٻين ٻن معاهدن تي فني سببن جي بنياد تي صحيحون نه ٿي سگهيون جيئن ته سينيئر عملدارن جي سطح تي ان بابت ڳالهيون نه ٿيون هيون. هن چيو ته واپار ۽ ٽرانسپورٽيشن جون وزارتون ٽن مهينن ۾ اجلاس ڪنديون ته جيئن جيڪڏهن ڪا رڪاوٽ آهي ته ان کي ختم ڪري سگهجي. طارق فاطمي چيو ته سارڪ سيڪريٽريٽ شروعاتي طور تي ٽي معاهدا تجويز ڪيا هئا تنهن هوندي به رڳو هڪ تي اتفاق ٿي سگهيو ڇو ته پاڪستان جا موٽر وهيڪلز ٽرانسپورٽيشن ۽ ريلويز بابت ٻن معاهدن تي ڪجهه خدشا هئا. هن چيو ته اسان ڪجهه ترميمون تجويز ڪنداسين ته جيئن پاڪستان جو مفاد متاثر نه ٿئي. طارق فاطمي چيو ته سارڪ ملڪن علائقائي رابطن ۽ مضبوط تعاون جي لاءِ وزيراعظم نواز شريف جي ويزن کي ساراهيو آهي. وزيراعظم جي خصوصي معاون عرفان صديقي صحافين کي ٻڌايو ته وزيراعظم نواز شريف ۽ ڀارتي وزيراعظم نريندر مودي جي وچ ۾ هٿ ملائڻ کي تمام گهڻي پذيرائي ملي، ائين لڳي ٿو ته ڄڻ سارڪ ان هٿ ملائڻ جي منتظر هئي. عرفان صديقي چيو ته ايندڙ قدم جي طور تي ڀارت کي پاڪستان سان پنهنجي پهرين کان افهام تفهيم کي پورو ڪرڻ گهرجي ۽ ان کي بحال ڪرڻ گهرجي. هتي اها ڳالهه ذڪر جوڳي آهي ته ڀارت پاران هلندڙ سال آگسٽ ۾ پرڏيهي سيڪريٽرين جي سطح تي طئي ٿيل ڳالهيون ملتوي ڪرڻ کانپوءِ ٻنهي طرفن کي گذريل ڪجهه مهينن کان ٻڏتر وارو ماحول درپيش آهي جڏهن ته جنهن کانپوءِ لائين آف ڪنٽرول ۽ ورڪنگ بائونڊري تي ڀارت پاران اشتعال انگيز فائرنگ جا واقعا پڻ پيش ايندا رهيا آهن جن جي نتيجي ۾ پاڪستان ۾ ڪيتريون ئي قيمتي جانيون ضايع ٿي چڪيون آهن. ٻئي طرف پاڪستان 2016ع ۾ اسلام آباد ۾ 19 هين سارڪ سربراهه اجلاس جي ميزباني ڪندو. ان ڳالهه جو اظهار علائقائي تعاون بابت ڏکڻ ايشيائي تنظيم (سارڪ) جي 18 هين سربراهه اجلاس جي پڄاڻي واري ويهڪ ۾ ڪيو ويو. وزيراعظم محمد نواز شريف ڪالهه خميس ڏينهن هتي پڄاڻي واري اجلاس ۾ ٿورن جو اظهار ڪندي چيو ته سندس لاءِ 18 هين سارڪ سربراهه ڪانفرنس ۾ شرڪت ڪندڙ سمورن ميمبر وفدن پاران نيپال ۾ شاندار آجيان ۽ قيام دوران فراخدلاڻي مهمان نوازي تي نيپال جي وزيراعظم، حڪومت ۽ عوام جو سچي دل سان ٿورا مڃڻ انتهائي اعزاز جي ڳالهه آهي. هن سارڪ جي صدارت سنڀالڻ تي نيپال کي مبارڪباد پڻ ڏني. وزيراعظم محمد نواز شريف پنهنجي مختصر خطاب ۾ چيو ته اسان پاڪستان ۾ 19 هين سربراهه ڪانفرنس ۾ سربراهن جي آجيان ڪرڻ جا منتظر آهيون. وزيراعظم چيو ته سارڪ سربراهه ڪانفرنس تنظيم جي پليٽ فارم تان ترقي ۽ خوشحالي جي لاءِ اڻٿڪ، برابر ۽ منصفاڻي حصيداري جي قيام جي عزم کي ورجايو آهي. هن چيو ته اسان کي انهن مسئلن جي حوالي سان حقيقت پسنداڻي، عملي ۽ مرحليوار حڪمت عملي اختيار ڪرڻ گهرجي جنهن سان تعاون جون نيون راهون کلنديون. هن پرڏيهي وزيرن، پرڏيهي سيڪريٽرين ۽ ٻين عملدارن کي مبارڪباد ڏني جن ان اهم سربراهه اجلاس جي ڪامياب پڄاڻي جي لاءِ ٺوس تياري ڪئي. هن سربراهه اجلاس جي ڪاميابي تي سارڪ جي سيڪريٽري جنرل ۽ سندس ٽيم جي ڪوششن کي به ساراهيو. وزيراعظم چيو ته اسان سربراهه اجلاس ڪانفرنس ۾ ڀرپور شرڪت تي مبصر وفدن جا به ٿورائتا آهيون. وزيراعظم محمد نواز شريف 18 هين سارڪ سربراهه ڪانفرنس جي ڪامياب منعقد ٿيڻ تي سمورن شرڪت ڪندڙن ۽ نيپال جي حڪومت ۽ عوام کي مبارڪباد ڏني.

 

قومي اسيمبلي جو اجلاس، پ پ ۽ ايم ڪيو ايم وچ ۾ سخت جملن جي ڏي وٺ

اسلام آباد (بيورو) قومي اسميبلي جي اجلاس ۾ پ پ ۽ ايم ڪيو ايم جي ميمبرن وچ ۾ سخت جملن جي ڏي وٺ ڪئي وئي، جڏهن ته متحده پاران عبدالستار بچاڻي جي بيان تي اجلاس ۾ احتجاج ڪري واڪ آئوٽ ڪيو. قومي اسميبلي جي اجلاس ۾ اسپيڪر اياز صادق جي صدارت هيٺ ٿيل اجلاس ۾ پ پ ۽ ايم ڪيو ايم جي ميمبرن هڪٻئي تي الزام لڳايا. متحده جي ميمبر آصف حسنين چيو ته سنڌ ۾ امن امان جي تمام گهڻي حالت خراب آهي پر ڌاڙيلن جو احتجاج ڪرڻ سمجهه کان ٻاهر آهي. هن چيو ته سنڌ ۾ ڪنهن کي به تحفظ حاصل ناهي، جڏهن ته ڀتو وٺڻ لاءِ پوليس ڌاڙيلن کي تنگ ڪري رهي آهي. هن چيو ته ٿر جي حالت خراب آهي جو ماڻهو بنا علاج جي مري رهيا آهن. هن چيو ته ڪراچي ۾ ٽارگيٽيڊ آپريشن باوجود ٽارگيٽ ڪلنگ جاري آهي، جڏهن ته صوبائي حڪومت ڌيان نه پئي ڏئي. آصف حسنين چيو ته ٿر ۾ انساني حقن جو مسئلو وفاقي سرڪار ڌيان ڏئي. سندس چوڻ هو ته سنڌ ۾ اقليتن کي تحفط ناهي، روزانون هندو ناريون اغوا ٿي رهيون آهن. هن چيو ته آدمشماري سنڌ ۾ نه ٿي ڪرائي وڃي، جنهن ڪري اين ايف سي ۾ سنڌ کي ناڻو نه ٿو ملي. آصف حسنين چيو ته مڪاني چونڊون بابت سموريون سياسي پارٽيون خاموش آهن. هن چيو ته تيل جوقيمتون گهٽ ٿيڻ باوجود ڀاڙا گهٽ ناهن ٿيا، جڏهن ته بجلي جون قيمتون گهٽ ناهن ڪيون ويون. هن چيو ته وفاقي سرڪارڪي اليڪٽرڪ کي پنهنجي تحويل ۾ وٺي ، ڇاڪاڻ ته اها ڪمپني مخصوص ماڻهن وٽ يرغمال بڻيل آهي. پ پ ايم اين اي عبدالستار بچاڻي خطاب ڪندي چيو ته متحده پ پ جي گذريل سرڪار کي ڪرپٽ چون پيا پر پنهنجي گورنر کي ڇو ويهاريون ويٺا آهن. هن چيو ته ايم ڪيو ايم جو مزاج آمرن سان هلڻ جهڙو آهي، صبح جي هڪ ۽ شام جو ٻئي پارٽي سان گڏ هوندا آهن. عبدالستار بچاڻي چيو ته پ پ متحده کي گڏ هلائڻ چاهي ٿي پر اها اسٽبلشمينٽ سان هلڻ چاهي ٿي . عبدالستار بچاڻي جي بيان تي متحده ميمبر پاران احتجاج ڪري بائيڪاٽ ڪيو ويو. ايم اين اي راڻا افضل قومي اسميبلي ۾ خطاب ڪندي چيو ته آدمشماري فوج جي نگراني ۾ ڪرائي ويندي. هن چيو ته جلد وزيراعظم آدمشماري بابت سي سي آءِ جو اجلاس طلب ڪندو

 

عمران خان جي رويي ۾ مثبت تبديلي آئي آهي، اميد ته هاڻي يوٽرن نه وٺندو: پرويز رشيد

اسلام آباد (بيورو) وفاقي اطلاعات واري وزير پرويز رشيد چيو آهي ته عمران خان ڪالهه عدالت ۾ پيش ٿيو جيڪا هڪ مثبت تبديلي آهي ان جي ڀليڪار ڪيون ٿا هن ميڊيا سان ڳالهائيندي چيو ته پاڪستان هڪ مهذب ملڪ آهي جتي قانون جي حڪمراني آهي پارليامينٽ آئين بڻايو ۽ رياست به ان ئي آئين جي مطابق هلي رهي آهي عمران خان ڪالهه عدالت۾ پيش ٿيو ۽ آر اوز بابت سپريم ڪورت ۾ وڃڻ جي فيصلي کي ڀليڪار چوان ٿو ۽ هي هڪ مثبت تبديل آهي.