تازيون خبرون

Daily Archives: November 29, 2014

ايم ڪيو ايم پير مظهرالحق خلاف سنڌ اسيمبلي ۾ التوا واري رٿ جمع ڪرائي ڇڏي

ڪراچي (اسٽاف رپورٽر) متحدهه قومي موومينٽ پير مظهر الحق جي حيدر آباد ۾ يونيورسٽي نه ٺاهڻ واري بيان خلاف ۽ سنڌ پبلڪ سروس ڪميش جي اختيارن بابت سنڌ اسيمبلي ۾ التوا واري رٿ جمع ڪرائي ڇڏي آهي. متحده قومي موومينٽ جي سيد سردار احمد ۽ ٻين ميمبرن پاران سنڌ اسيمبلي جي سيڪريٽري وٽ جمع ڪرايل التوا واري رٿ ۾ موقف اختيار ڪيو ويو آهي ته پير مظهر جو بيان تعصب تي ٻڌل آهي ۽ پير مظهر اهڙو بيان ڏئي ثابت ڪيو آهي ته هو سنڌ جي ورهاست چاهي ٿو. متحده جي ميمبرن پاران جمع ڪرائي رٿ ۾ سنڌ پبلڪ سروس ڪميشن جي اختيارن ۽ ان اداري بابت سندن اعتراضن کي به شامل ڪيو ويو آهي. رٿ ۾ چيو ويو آهي ته سنڌ اسيمبلي جي ايندڙ اجلاس ۾ التوا واري رٿ تي بحث ڪيو وڃي.

 

پاڪستان خير سگالي جذبي تحت 36 ڀارتي مهاڻن کي آزاد ڪري ڇڏيو

ڪراچي (اسٽاف رپورٽر) پاڪستان خير سگالي جذبي تحت 36 ڀارتي مهاڻن کي آزاد ڪري ڇڏيو آهي، جيڪي واهگها بارڊري ذريعي پنهنجي ملڪ روانا ٿي ويا، جمع تي خير سگالي جذبي تحت 36 ڀارتي مهاڻن کي ملير جيل ڪراچي مان آزاد ڪيو ويو، جن کي لاهور لاءِ روانو ڪيو ويو، جتان تمام مهاڻا واهگا بارڊر ذريعي نهنجي گهرن ڏانهن روانا ٿي ويا، مهاڻن ٻڌايو ته اسان حڪومت پاڪستان جا احسان مند آهيون جو هن اسان کي پنهنجي گهرن ڏانهن وڃڻ جي اجازت ڏني، اسان ڀارتي حڪومت کي به درخواست ڪريون ٿا ته گرفتار پاڪستاني مهاڻن کي آزاد ڪيو وڃي، ڇو ته مهاڻا تمام غريب ماڻهو هوندا آهن ۽ انهن جو دارمدار مڇي مارڻ تي هوندو آهي. واضح رهي ته 6 مهينا اڳ به پاڪستان 153 قيدين کي آزاد ڪيو هو.

 

ڪراچي ۾ جي ايس ٽِي ۽ پي ايس ٽي جي 1188 اين ٽي ايس پاس اميدوارن ۾ آرڊر ورهايا ويا

ڪراچي (اسٽاف رپورٽر) سنڌ جي تعليم واري سينيئر صوبائي وزير نثار احمد کهڙو جمعي ڏينهن اين جي وي اسڪول ۾ ڪراچي اندر نيشنل ٽيسٽنگ سروسز (اين ٽي ايس ) طرفان جونيئر اسڪول ٽيچر (جي ايس ٽي) ۽ پرائمري اسڪولٽيچر (پي ايس ٽي) جي امتحان ۾ ڪامياب ٿيل 1188 استادن ۾ آفر ۽ مقرري جا آرڊر ورهايا. ان موقعي تي منعقد ٿيل تقريب کي خطاب ڪندي سينيئر صوبائي وزير نثار احمد کهڙو چيو ته اهي نوڪريون يونين ڪائونسل سطح تي ڏنيون پيون وڃن. نوڪريون ماڻيندڙ استاد پهرين مقرري واري هنڌ تان 3 سالن تائين بدلي نه ڪرائي سگهندا. هن چيو ته سمورا مقررين ۽ آفرز وارا ليٽر ميرٽ جي بنياد تي ڏنا پيا وڃن. هن نوڪريون ماڻيندڙ استادن کي مبارڪون پڻ ڏنيون.

 

ڏوڪري ڀرسان رينجرز جو آپريشن، هڪ ڄڻو مارجي ويو، اهلڪار سميت 2 زخمي، 5 گرفتار

ڏوڪري(رپورٽر) ڏوڪري ويجهو باڊهه ٿاڻي جي حد ڳوٺ منڌرا ۾ صبح سوير رينجرز اٽالن ڪڙو چاڙهي بشير جوڻيجو جي گهر تي چڙهائي ڪري سرچ آپريشن ڪيو. ان موقعي تي ٻنهي ڌرين ۾ فائرنگ جي نتيجي ۾ 3 ڄڻا مرچ جوڻيجو، ممتاز جوڻيجو ۽ رينجرز اهلڪار زخمي ٿي پيا، جن کي ڳڻتي جوڳي حالت ۾ چانڊڪا اسپتال لاڙڪاڻو منتقل ڪيو ويو، جتيزخمن جا سور نه سهندي ممتاز جوڻيجو موقعي تي فوت ٿي ويو. ٻئي طرف رينجرز اهلڪارن طرفان سرچ آپريشن دوران 5 ڄڻن نياز علي جوڻيجو، آصف علي، نصرت علي، محرم علي ۽ هڪ نامعلوم کي مبينا هٿيارن سميت گرفتار ڪرڻ جي دعوى ڪئي آهي. هوڏانهن صحافين جي ٽيم اڳيان بشير جوڻيجو جي گهر ڀاتين مسمات زبيده خاتون، سهڻي خاتون ۽ عمراه خاتون جي اڳواڻي ۾ عورتن ۽ معصوم ٻارن رينجرز آپريشن خلاف سخت احتجاج ڪيو. ان موقعي تي صحافين سان ڳالهائيندي مسمات سهڻي خاتون چيو ته رينجرز اهلڪارن مخالفن جي چوڻ تي سندن خلاف ڪارروائي ڪئي آهي. هنن الزام هڻندي چيو ته اهلڪارن سندن مردن تي پڪڙي گوليون هڻي قتل ڪيو آهي. هنن اعلى اختيارين کان مطالبو ڪيو ته کين انصاف فراهم ڪيو وڃي.

 

مورو پوليس ۽ ڦورن ۾ مقابلو، هڪ ڦورو مارجي ويو ، ٻه فرار

مورو (رپورٽر) مورو پوليس مقابلو هڪ ڦورو آصف سومرو مارجي ويو، ٻه ڄڻا فرار، پسٽل ۽ هڪ موٽر سائيڪل هٿ، ڦورو مختلف ڪيسن ۾ گهربل هيو، ايس ايڇ او مورو، لاش پوسٽ ماررٽم بعد وارثن حوالي، تفصيل موجب؛ مورو ڀرسان قومي شاهراھ ٽئين ميل وٽ ڦر جي ارادي سان ويندڙ ٽن موٽر سائيڪل سوار ڦورن کي مورو پوليس پاران روڪڻ جي ڪوشش ڪئي ته ڦورو نه بيٺا ۽ فرار ٿيندي ڪيلي جي فصل ۾ لهي ويا جنهن تي مورو پوليس ۽ ڦورن وچ ۾ مقابلو ٿي پيو ۽ پوليس جي فائرنگ ۾ هڪ ڦورو آصف سومرو شديد زخمي ٿي پيو جنهن پنهنجي گرفتاري پيش ڪئي ۽ ٻه ڦورو فرار ٿيڻ ۾ ڪامياب ٿي ويا جڏهن ته زخمي ڦورو کي مورو پوليس ٿاڻي تي آڻڻ کانپوءِ مورو اسپتال پهچايو جتي ڦورو زخمن جا سور نه سهندي فوت ٿي ويو جڏهن مارجي ويل ڦورو مورو شهر جي ملڪ ڪالوني جو رهواسي آهي ان موقعي تي ايس ايڇ او مورو علي اڪبر کوکر ٻڌايو ته اسان صبح جي وقت گشت دوران قومي شاهراھ تي گشت ڪري رهيا هئاسين جنهن دوران هي ٽي ڄڻا ون ٽو فائيو موٽر سائيڪل تي سوار ٿي اچي رهيا هئا جن مٿان شڪ جي بنياد تي روڪڻ جي لاءِ چيو ته هي فرار ٿي ويا ۽ ڪجھ مفاصلي تي هڪ ڪيلي جي فصل ۾ لهي ويا جتي هنن اسان مٿان فائرنگ ڪري ڏني جنهن دوران ٻنهي طرفن کان مقابلو ڪيو ويو جنهن ۾ هڪ ڦورو آصف سومرو زخمي ٿي پيو جيڪو ٻاهر اچي اسان کي گرفتاري ڏني ۽ ٻيا فرار ٿي ويا جڏهن هنن وٽان هڪ موٽر سائيڪل ۽ پسٽل پڻ هٿ ڪيو آهي ايس ايڇ او مورو وڌيڪ ٻڌايو ته هي ڦورو هو ۽ هن مٿان مورو ٿاڻي تي مختلف ڏوهن جا 30 کان مٿي ڪيس داخل ٿيل آهن جڏهن ته ٻين ٿاڻن تي پڻ هن مٿان ڪيترائي ڪيس داخل آهن هي مختلف ڏوهن ۾ ملوث هو ۽ هن سان جيڪي ٻه فرار ٿي ويا آهن انهن ۾ هڪ لوٽو عرف قمرالدين مهر ۽ عمران مهر آهي جن جي تلاش جاري آهي هن ٻڌايو ته مورو شهر ۾ جيڪي به ڏوھ ٿي رهيا هئا انهن ۾ هي ڦورو گهڻو ملوث رهيا آهن جن وٽان ڪافي شيون برآمد پڻ ڪيون ويون آهن ۽ جيڪي به مورو ۽ ان جي آسپاس ۾ ڏوهاري رهن ٿا انهن خلاف تمام جلد هڪ وڏو آپريشن ڪيو ويندو ان ڪري ڏوهارين کي گهرجي ته هو ڏوهن جي دنيا ڇڏي اسان کي پاڻ گرفتاري ڏين نه ته ٻي صورت ۾ بخش نه ڪيو ويندو. هوڏانهن مارجي ويل ڦورو آصف سومرو جي لاش جو پوسٽ مارٽم ڪرڻ بعد وارثن حوالي ڪيو ويو لاش گهر پهچڻ تي گهر ۾ ڪهرام مچي ويو ياد رهي ته مارجي ويل آصف سومرو جي امڙ مورو شهر جي مختلف پاڙن ۾ گهرن اندر مزدوري ڪري گهر جو چرخو هلائيندڙ هئي جنهن ڪجھ وقت اڳ پوليس جي پٽ مٿان ناجائز ڪوڙا ڪيس داخل ڪرڻ ۽ گرفتار ڪري تشدد ڪرڻ واري عمل خلاف احتجاج پڻ ڪيو هيو پر هن ماءُ سان ڪو به تدارڪ نه ڪيو ويو جڏهن ته مورو شهر ۽ ان جي آسپاس اهي پڻ چوٻول هلي رهيا آهن ته نوجوان کي پوليس گهران کنڀي کڻي وڃي ڪوري مقابلي ۾ ماريو آهي.

 

سوشل ميڊيا تي گوسڙو ماسترن ۽ بند پيل اسڪولن خلاف هلايل مهم ڏوڪري تعلقي ۾ شدت اختيار ڪري وئي

ڏوڪري(رپورٽر)سوشل ميڊيا تي گوسڙو ماسترن ۽ بند پيل اسڪولن خلاف هلايل مهم ڏوڪري تعلقي ۾ شدت اختيار ڪري وئي، ايس يو پي تعلقه ڏوڪري جي سڏ تي ايس يو پي، جسقم، جست ۽ شهرين طرفان گوسڙو ماسترن خلاف صابر جروار، الطاف ٻگهيو، ديشي شبير جتوئي، رڪ سنڌي جي اڳواڻي ۾ ڪيترن ئي شهرين، اسڪولي شاگردن ۽ شاگردياڻين بينر ۽ پلي ڪارڊ کڻي ٽائون هال ۾ 4 ڪلاڪ علامتي بک هڙتال ڪري ريلي ڪڍي شهر جو گشت ڪيو ۽ گوسڙو ماسترن خلاف سخت نعريبازي ڪئي. ان موقعي تي ريلي کي خطاب ڪندي اڳواڻن چيو ته سنڌ جي تعليم کي هٿ وٺي تباهه ڪيو ويو آهي، جنهن جا ذميوار گوسڙو ماستر به آهن. هنن چيو ته ڏوڪري تعلقي جا ڪيترائي پرائمري اسڪول بند پيل آهن ۽ گوسڙو ماستر صحافت ۽ ٻين ڌنڌن ۾ هئڻ ڪري معصوم زندگيون تباهه ٿي رهيون آهن، جنهن تي خاموشي اختيار ڪرڻ ڏوهه برابر آهي. هنن وڏي وزير، گورنر، تعليم جي وزير ۽ ٻين کان مطالبو ڪيو ته گوسڙو ماستر صحافين خلاف قانوني قدم کڻي کين نوڪرين تان برطرف ڪيو وڃي، ٻئي صورت ۾ سخت احتجاج ڪيو ويندو.

 

شازيا خشڪ ڇهن لکن کي ٺڪرائي ڇڏيو، سنڌي ثقافت ڊي فنڪشن جي دعوت فري ۾ قبولي ورتي

ڪراچي(پ ر) سنڌ ۾ ڪئين مڻيادار ماڻهو آهن جن کي پئسي سان خريدي نه ٿو سگهجي جنهن جو تازو مثال سامهون آيو آهي اُوڻٽيهين نومبر ڇنڇر ڏينهن لاءِ شازيا  خشڪ کي سنڌ پنجاب جي چئن شهرن مان هڪئي وقت دعوتون مليون جن مان هڪ فنڪشن مشهور صحافي ملاح معرفت شازيا کي ملتان جي ملڪ طاهر مصطفيٰ ملتاني ڇهن لکن ۾ ڏيڻ چاهيو ساڳي وقت سنڌي اليڪٽرانڪ ميڊيا ملير ڪراچي جي مير ذوالفقار حسن ٺڳڙ، مرتضيٰ چانڊيو، آصف جتوئي ۽ ناز شر ملير مان اچي شازيه خشڪ کي سنڌ ايڪتا فنڪشن جي دعوت ڏني شازيه خشڪ ڇهن لکن جي فنڪشن کي ڇڏي ملير ۾ ايڪتا جي فنڪشن کي سنڌ امان جو سڏ چئي مانُ ڏنو ۽ ملير وارن کان پئسا وٺن کان انڪار ڪيائين شازيه خشڪ سان چڳا خاصا پرفارمر سازندا گڏ هوندا آهن انهن جو خرچ مير ذوالفقار ۽ حسين ٽڳڙ شازيه خشڪ جي سازندي الهجڙئي مگڻهار کي ڏنو مير ذولفقار چيو ته شازيه خشڪ اسانجي قومي هيرز منجهان هڪ آهي حسن ٽڳڙ چيو ته شازيه خشڪ کي سڄي دنيا ۾ ڪاميابيون سنڌي عوام جي دعائن سان مليون آهن شازيه خشڪ سنڌي اليڪٽرانڪ ميڊيا کي گڏجي ڪم ڪرڻ تي مبارڪون ڏنيون آهن.

 

ممبئي وڃڻ لاءِ رڪشا ۾ سفر کي ترجيح ڏيندو آهيان: عمران هاشمي

ممبئي(شوبز نيوز) بالي ووڊ اداڪار عمران هاشمي چيو آهي ته ممبئي وڃڻ لاءِ رڪشا ۾ سفر ڪرڻ کي ترجيح ڏيندو آهيان. ڀارتي ميڊيا مطابق اداڪار عمران هاشمي پنهنجي تازي ڏنل انٽرويو ۾ چيو ته هو اڄڪلهه ممبئيءَ ۾ اُنگلي جي مشهوريءَ لاءِ مصروف آهي ۽ هو اتي رڪشا تي سفر ڪرڻ کي ترجيح ڏيندو آهي. فلم اُنگلي جي ڪهاڻي عام انسان جي چوڌاري گهمي ٿي، جنهن کي روزمره جا مسئلا درپيش آهن. اها ڪهاڻي غريب انسان جي حالتن ۽ مشڪلاتن جو حقيقي آئينو آهي. فلم 28 نومبر تي سئنيما گهرن جي زينت بڻجي چڪي آهي.

 

شفقت چيما کي پنجابي فلم ”جگا جگ دا“ ۾ ڪاسٽ ڪيو ويو

لاهور(شوبز نيوز) پاڪستاني فلم انڊسٽري جي ولن شفقت چيما کي پنجابي فلم ”جگا جگ دا“ ۾ ڪاسٽ ڪيو ويو آهي. هڪ ملاقات دوران چيو ته کيس بحران باوجود نين فلمن ۾ اهم ڪردارن لاءِ ڪاسٽ ڪيو پيو وڃي ۽ هدايتڪار شهزاد حيدر نئين پنجابي فلم ”جگا جگ دا“ ۾ ڪاسٽ ڪيو آهي.

 

تمام جلد پنهنجي چاهيندڙن لاءِ نئون موسيقي جو البم مڪمل ڪري رليز ڪنديس؛ فريحه پرويز

لاهور (ڪلچرل نيوز) ڳائڻي فريحه پرويز  چيو آهي ته تمام جلد پنهنجي چاهيندڙن لاءِ نئون موسيقي جو البم مڪمل ڪري رليز ڪنديس، خدا جو شڪر آهي ته منهنجا جيترا به البم رليز ٿيا آهن انهن ڪاميابي ماڻي آهي، خاص ڳالهه ٻولهه دوران هن چيو ته هاڻي تازو ئي مون آمريڪا جو دورو ڪيو جيڪو ڪامياب ويو، آمريڪا جي جنهن به رياست ۾ پرفارم ڪيو اتي اميد کان وڌيڪ موٽ ملي، فريحه پرويز چيو ته منهنجي خواهش آهي ته ملڪ ۾ امن امان ٿئي ۽ ٻيون ڀيرو لائيو ڪنسرٽن جو سلسلو شروع ٿئي جيئن ماڻهن کي سٺي تفريح جا موقعا ملي سگھن.