تازيون خبرون

Daily Archives: November 28, 2014

صحت بابت عالمي اداري بلوچستان ۾ پوليو مهم معطل ڪري ڇڏي

ڪوئيٽا (بيورو) صحت بابت عالمي اداري بلوچستان ۾ گهر گهر وڃي پوليو کان بچاءَ جا ڦــُڙا پيئارڻ واري مهم معطل ڪري ڇڏي، جڏهن ته پشاور ۾ 12 هزار کان وڌيڪ والدين ٻارن کي پوليو جا ڦــُڙا پيئارڻ کان انڪار ڪري ڇڏيو آهي. صحت بابت عالمي اداري گذريل ڏينهن ڪوئيٽا ۾ چئن پوليو رضاڪارن جي قتل بعد سڄي بلوچستان ۾ گهر گهر وڃي پوليو کان بچاءَ جا ڦــُڙا پيئارڻ واري مهم معطل ڪئي آهي. عالمي اداري پوليو مهم معطل ڪرڻ بابت صوبائي حڪومت کي به آگاهه ڪري ڇڏيوآهي. بلوچستان حڪومت طرفان سرڪاري اسپتالن ۽ پوليو مرڪزن ۾ ٻارن جي ڦــُڙا بدستور پيئاريا ويندا پر گهر گهر مهم سڪيورٽي خدشن سبب معطل ڪئي وئي آهي. ٻئي طرف خيبر پختون خواهه جي صحت کاتي پوليو مهم بابت رپورٽ جاري ڪري ڇڏي، جنهن موجب پشاور شهر ۾ 12 هزار 224 والدين ٻارن کي ڦــُڙا پيئارڻ کان انڪار ڪري ڇڏيو آهي. حساس يونين ڪائونسل شاهين مسلم ٽائون ۾ 344 جڏهن ته يونين ڪائونسل مٿرا ۾ 499 والدين ٻارن کي ڦــُڙا پيئارڻ جي اجازت نه ڏني.

 

جسمم اڳواڻ آصف پنهور جو قتل، سنڌ يونيورسٽي ۾ ڇڪتاڻ برقرار، چڪريون، 20 شاگرد زخمي، 50 کان وڌيڪ گرفتار

ڄامشورو/باقراڻي (نمائندن وٽان) حيدرآباد مان اڻڄاتل ماڻهن پاران کنڀي گم ڪرڻ بعد بيدرديءَ سان قتل ڪيل جسمم اڳواڻ آصف پنهور جو چچريل لاش باقراڻي ڀرسان هٿ آيو هو، واقعي خلاف مختلف شهرن ۾ احتجاجي مظاهراڪري ڌرڻا هنيا ويا آهن. گذريل رات دير سان باقراڻي جي ڳوٺ شير محمد جتوئي ڀرسان هٿ آيل لاش جي سڃاڻپ جسمم جي گم ڪيل اڳواڻ آصف پنهور طور ڪئي وئي. اطلاع ملڻ تي پوليس پهچي مقتول قومپرست اڳواڻ جو لاش چانڊڪا اسپتال نيو ويو،جتي سندس پوسٽ مارٽم ڪيو ويو. مقتول آصف پنهور جو لاش سندس ڀاءُ راشد پنهور وصول ڪري گولاڙچي روانو ٿي ويو. وارثن جو چوڻ آهي ته آصف پنهور کي 100 ڏينهن اڳ حيدرآباد مان کنڀي گم ڪيو ويو هو. مقتول قومپرست اڳواڻ آصف پنهور کي گولاڙچي ڀرسان اباڻي قبرستان ۾ مٽيءَ ماءُ حوالي ڪيو ويندو.هوڏانهن قومپرست اڳواڻ آصف پنهور جي قتل خلاف مختلف شهرن ۾ احتجاجي مظاهرا ڪري ڌرڻا هنيا ويا آهن سنڌ يونيورسٽي جي شاگرد آصف پنهور جو تشدد ٿيل لاش ملڻ کانپوءِ گذريل رات کان ميدان جو جنگ بڻيل ڪئمپس ۾ شروع ٿيل ڇڪتاڻ تي اڃا تائين ضابطو اچي نه سگهيو آهي، شاگردن پاران هاسٽل گيٽ وٽ ڌرڻو هڻڻ ۽ بعد ۾ رينجرز ۽ پوليس سان چڪرين توڙي آنسو گئس جي استعمال سان زخمي ٿيل 20 کان مٿي شاگردن کي اسپتال منتقل نه ڪيو ويو، جڏهن ته هاسٽلن تي رينجرز ۽ پوليس پاران جاري سرچ آپريشن ڪري هاسٽلن جي مک گيٽ سميت ننڍن ننڍن گيٽن کي بڪتربند گاڏين سان ٽوڙي پوليس توڙي رينجرز هاسٽلن ۾ داخل ٿي سخت تشدد بعد 50 کان مٿي شاگردن کي گرفتار ڪري ورتو، گرفتار ڪيل شاگردن کي مختلف گاڏين ۾ وجهي مختلف ٿاڻن ۽ نامعلوم هنڌن تي منتقل ڪيو ويو، جنهن دوران شاگرد اڀ ڏاريندڙ دانهون ڪندا رهيا ته اسان کي اسپتال پهچايو پر کين اسپتال بدران مختلف هنڌن ڏانهن منتقل ڪيو ويو، جنهن بعد ڪنهن اڻ وڻندڙ واقعي کي منهن ڏيڻ لاءِ يونيورسٽي ڏي ايندڙ ويندڙ سمورا رستا سيل ڪيا ويا ۽ اتي وڏي انگ ۾ رينجرز ۽ پوليس جي نفري مقرر ڪئي وئي ۽ رينجرز جو گشت پڻ وڌايو ويو. هوڏانهن سنڌ يونيورسٽي انتظاميا پوائنٽ بسون بند ڪري اڻ اعلانيل مدي تائين تدريسي عمل بند ٿي ويو آهي، پوائنٽ بسون نه هلڻ ڪري سوين شاگرد، شاگردياڻيون، ملازم توڙي آفيسر ڪئمپس پهچي نه سگهيا، جڏهن ته پاڻمرادو پهتل شاگردن ۽ شاگردياڻين کي مين گيٽ وٽان رينجرز ۽ پوليس روڪي واپس روانو ڪري ڇڏيو، ٻئي ڏينهن به رينجرز ۽ پوليس جو مين بوائز هاسٽل ۽ ماروي گرلز هاسٽل سميت سمورين هاسٽلن ۾ ڪڙو برقرار رهيو، جنهن سبب اتي رهندڙ شاگردن ۽ شاگردياڻين ۾ خوف حراس ڇانيل هو، جن جي ٻاهر نڪرڻ تي پڻ پابندي لڳائي وئي هئي. هوڏانهن گرفتار ڪيل شاگردن ۾ قمبر جي سينيئر صحافي ڪامريڊ ولي محمد مڱڻهار جو پٽ مصري مڱڻهار پڻ شامل آهي. جنهن موجب اسان کي لوڻي ڪوٽ ٿاڻي تي رکي ايس ايڇ او نثار شاهه سميت ٻين سخت تشدد جو نشانو بڻايو آهي.

 

پ پ شهري علائقن جي عوام کي ڀت سان لڳائي رهي آهي: بابر غوري

ڪراچي (اسٽاف رپورٽر) ايم ڪيو ايم اڳواڻ بابر غوري چيو آهي ته سنڌ ۾ نفرتن ۽ لسانيت واري سياست ٿي رهي آهي، شهرن جا مسئلا حل ڪرڻ ۾ رنڊڪون وڌيون پيون وڃن، صوبي جو عوام پيپلز پارٽي کي ڪڏهن به معاف نه ڪندو. ڪراچي ۾ حيدر عباس رضوي سان گڏ نيوز ڪانفرنس ڪندي بابر غوري چيو ته پي پي شهري مسئلن کي حل ڪرڻ ۾ رنڊڪون پئي وجهي، جيڪا انساني حقن جي ڀڃڪڙي آهي. متحده اڳواڻ چيو ته سنڌ ۾ نفرتن ۽ لسانيت واري سياست ٿي رهي آهي، جنهن تي صوبي جو عوام پيپلز پارٽي کي ڪڏهن به معاف نه ڪندو. بابر غوري چيو ته سنڌ جي عوام لاءِ تعليم جا موقعا ختم ڪرڻ افسوس جي ڳالهه آهي. سندس چوڻ هو ته پي پي سان لاڳاپيل اڳوڻي وزيراعظم راجا پرويز اشرف کي حيدرآباد ۾ يونيورسٽي جي قيام جو اعلان ڪرڻو هو، جيڪو نه ڪيو ويو. پير مظهر بابت ڳالهائيندي ايم ڪيو ايم اڳواڻ چيو ته پ پ واضح ڪري ته پيرمظهرالحق جو بيان پارٽي جي پاليسي آهي، جيڪڏهن نه ته هن وقت تائين سندس خلاف ڪارروائي ڇو ناهي ڪئي وئي. ان موقعي تي حيدر عباس رضوي جو چوڻ هو ته حيدرآباد ۽ سکر لاءِ 40 سيڪڙو نوڪرين جي ڪوٽا هجڻ گهرجي.

 

ڪورنگي ۾ فائرنگ، هڪ ڄڻو مارجي ويو، سرجاڻي مان لاش هٿ

ڪراچي(اسٽاف رپورٽر) ڪراچي جي علائقي ڪورنگي ۾ بنگالي پاڙي ويجهو هڪ شخص مارجي ويو جڏهن ته سرجاڻي ٽائون جي علائقي خدا جيبستي مان هڪ شخص جو تشدد ٿيل لاش مليو آهي پوليس مطابق ضابطي جي ڪارروائي لاءِ لاش اسپتال منتقل ڪيا ويا آهن.

 

سوناڪشي سنها تامل فلم ”لنگا“ سان ڏکڻ ڀارتي فلمن ۾ پنهنجي ڪيريئر جي شروعات ڪري ڇڏي

ممبئي (شوبز نيوز) بالي ووڊ جي دبنگ گرل سوناڪشي سنها اڄ ڪلهه تامل زبان سکڻ جو ڪورس ڪري رهي آهي، سوناڪشي سنها تامل فلم ”لنگا“ سان ڏکڻ ڀارتي فلمن ۾ پنهنجي ڪيريئر جي شروعات ڪري چڪي آهي، جنهن جو هيرو رجني ڪانت آهي، سوناڪشي تامل زبان سکي رهي آهي، سوناڪشي موجب فلم جي پروموشن يا ان سان لاڳاپيل ڪمن لاءِ هوءَ جڏهن چنائي ويندي آهي ته اتي سڀني کي تامل ۾ ڳالهائيندو ڏسي بيچيني محسوس ڪندي آهي، سوناڪشي چيو ته تامل سکڻ لاءِ مون ڪورس شروع ڪيو آهي، هاڻي اهو ڏينهن پري ناهي جڏهن مان به چنائيءَ جي پروگرامن ۾ تامل ڳالهائي سڀني کي حيران ڪنديس، ذڪر لائق ڳالهه اها آهي ته ايس روي ڪمار جي هدايتن ۾ ٺهندڙ فلم ”لنگا“ ۾ رجني ڪانت ۽ سوناڪشي سنها کان سواءِ انشڪا شيٺي به اهم رول ۾ اچي رهي آهي هيءَ فلم 21 ڊسمبر تي رليز ڪئي ويندي.

 

پريانڪا چوپڙا باجي رائو مستاني فلم جي سيٽ تي هوش سنڀالي نه سگهي

ممبئي (شوبز نيوز) بالي ووڊ اداڪارا پريانڪا چوپرا فلم جي شوٽنگ دوران بيهوش ٿي ڪري پئي، ڀارتي ميڊيائي رپورٽن موجب پريانڪا چوپڙا پنهنجي نئين ايندڙ فلم ”باجي رائو مستان ي“ جي شوٽنگ ۾ مصروف هئي ته هن ڪيمرا سامهون پنهنجو سين فلمرائڻ کان اڳ مٿي جي سور جي شڪايت ڪئي ۽ پوءِ شوٽنگ دوران اوچتو سيٽ تي ڪري پئي ۽ بيهوش ٿي وئي، پريانڪا چوپڙا جي بيهوش ٿيڻ سبب فلم جي شوٽنگ روڪي وئي ۽ اداڪارا کي طبي معائني لاءِ فوري طور ڊاڪٽر کي گھرايو ويو، ڊاڪٽر جو چوڻ هو ته لاڳيتو شوٽنگ جي ٿڪ سبب هوءِ بيهوش ٿي، واضح رهي ته گذريل ڏينهن پريانڪا چوپڙا فلم ”باجي رائو مستاني“ جي شوٽنگ بابت سماجي رابطن واري ويب سائيٽ تي چيو هو ته فلم جي شوٽنگ ختم ڪري سمهڻ ويندي آهيان ته ٿڪ کان چور ٿي بستري تي ڪري پوندي آهيان ۽ پوءِ ڪو هوش ناهي رهندو، ۽ اهو به ته فلم ۾ مان ڏکيو ترين ڪردار ادا ڪري رهي آهيان.

 

سونهن جي عالمي مقابلي لاءِ سڄي دنيا مان 125 نِرتڪيون لنڊن پهچي ويون

لنڊن (ڪلچرل نيوز) سونهن جي عالمي مقابلي لاءِ سڄي دنيا مان 125 نِرتڪيون لنڊن پهچي ويون، چونڊ 14 ڊسمبر تي ٿيندي، مقابلي ۾ حصو  وٺندڙ سهڻين جو گروپ فوٽو سيشن ۽ هلڪو ڦلهو انٽرويو به ورتا ويا، گذريل سال جي فاتح فلپائن جي ميگان ينگ به لنڊن پهتل آهي، هِن سال جي مقابلن ۾ مس هنڊراس جي سونهن راڻي ماريه هوزي الوارد کي ڀيٽا پيش ڪئي ويندي، ماريه ۽ ان جي ڀيڻ صوفيه کي 13 نومبر تي اغوا کان پوءِ قتل ڪيو ويو هو، مس ورلڊ مقابلن جي شروعات  1951ع ۾ لنڊن کان ٿي هئي

 

ارپتا جي شادي ۾ شاهه رخ خان ۽ سلمان خان وچ ۾ شڪايتون دور ٿي ويون ته مان تمام گهڻو خوش ٿيس؛عامر خان

ممبئي (شوبز نيوز) سلمان ۽ شاهه رخ خان ۾ صلح ٿي وئي آهي پر ٽئي خان کي ان صلح واري رات ننڊ نه آئي، ان جو اظهار هن بي خوف ميڊيا تي به ڪيو، اهو خان ڪو ٻيو نه پر عامر خان آهي جنهن انڪشاف ڪيو ته ارپتا جي شاديءَ  واري رات جڏهن شاهه رخ خان شاديءَ ۾ شرڪت لاءِ سلمان جي گھر پهتو ۽ اتي هنن ٻنهي جي موجودگيءَ ۾ ارپتا کي پيار ڏنو ته ٻنهي خانن جون شڪايتون دور ٿي ويو ۽ هو هڪ ٻئي سان ٻکين پيا، پر ان رات مون کي ننڊ ڪانه آئي، صحافين سان ڳالهائيندي عامر خان چيو ته مون کي اهو ٻڌي تمام خوشي ٿي ۽ مون کين مبارڪ به ڏني، ان جي ڪو هڪ ڪلاڪ پوءِ ٻنهي جي ڪال آئي ۽ اها ڪال وڊيو ڪال هئي (فيس ٽائم) جنهن جي ڪري اسان ٽنهي گڏجي صبح تائين گپ شپ ڪئي، جنهن ڪري منهنجي سڄي رات جي ننڊ ڦٽي وئي.

 

فلپ هيوز جي لاڏڻي جو سوڳ، پاڪستان ۽ نيوزي لينڊ جي ٽيمن وچ ۾ آخري ٽيسٽ جي ٻئين ڏينهن جي راند روڪي وئي

شارجه(اسپورٽس نيوز) آسٽريليا جي نوجوان ڪرڪيٽر فلپ هيوز جي موت جي سوڳ ۾ پاڪستان ۽ نيوزي لينڊ جي ٽيمن وچ ۾ آخري ٽيسٽ جي ٻئين ڏينهن جي راند روڪي وئي. هاڻي ٻنهي ٽيمن وچ ۾ ٻئين ڏينهن جي راند (اڄ) جمعي کان شروع ٿيندي. هيوز جي ڪملهي موت جي سوڳ ۾ پاڪ نيوزي لينڊ ٽيمن اڳ ۾ ميچ هڪ ڪلاڪ دير سان کيڏڻ جو فيصلو ڪيو پر بعد ۾ ٻنهي ٽيمن جي رانديگرن پنهنجن پنهنجن بورڊز اختيارين کي درخواست ڪئي ته اڄوڪي راند روڪي وڃي جنهن تي ٻنهي ملڪن جي بورڊ اختيارين گڏيل رضامندي سان ٻئين ڏينهن جي راند معطل ڪرڻ جو فيصلو ڪيو ۽ هاڻي ٻنهي ٽيمن وچ ۾ ٻئين ڏينهن جي راند (اڄ) جمعي کان شروع ٿيندي.

 

پاڪستان ٽينس فيڊريشن جي جنرل ڪائونسل جو اجلاس اڄ ٿيندو

اسلام آباد (اسپورٽس نيوز)پاڪستان ٽينس فيڊريشن جي جنرل ڪائونسل جو اجلاس (اڄ) جمعي تي پي ٽي ايف ٽينس ڪمپليڪس اسلام آباد ۾ ٿيندو، اجلاسن جي صدارت پاڪستان ٽينس فيڊريشن جو صدر سيد ڪليم امام ڪندو، جنهن ۾ فيڊريشن ۽ سمورن يونٽس جا نمائندا شرڪت ڪندا. اجلاس ۾ 12 ڊسمبر تي فيڊريشن ۾ ٿيندڙ چونڊن کي حتمي شڪل ڏني ويندي ۽ گذريل چئن سالن ۾ سمورن يونٽس جي سرگرمين جو پڻ جائزو ورتو ويندو. واضح رهي ته پاڪستان ٽينس فيڊريشن جي موجوده نمائندن جي عهدن جي 4 سالن جو عرصو گذريل ڏينهن مڪمل ٿيو هو.