تازيون خبرون

Daily Archives: November 28, 2014

نواز- مودي ملاقات، برف پگهرجڻ لڳي، باضابطا ڳالهين جي ذميواري ڀارت تي آهي : طارق فاطمي

کٽمنڊو (م.ڊ/اي پي پي) پاڪستان ۽ ڀارت جي وزيراعظمن ڪالهه خميس ڏينهن هتي گرمجوشي سان هٿ ملائي ڪيترن ئي هفتن کان جاري افواهن ۽ تڪرارن واري ماحول کي ختم ڪري ڇڏيو جنهن سان ڏکڻ ايشيائي ملڪن جي 8 رڪني علائقائي تنظيم جي 18 هين سربراهه اجلاس جي پڄاڻي انتهائي خوشگوار ماحول ۾ ٿي. وزيراعظم محمد نواز شريف ۽ ڀارتي وزيراعظم نريندر مودي سارڪ جي 18 هين سربراهه اجلاس جي پڄاڻي واري ويهڪ ۾ جيئن ئي گرمجوشي سان هٿ ملايو ته ڪانفرنس هال تاڙين سان گونجي ويو ۽ ماحول ۾ خوشگوار تبديلي پيدا ٿي وئي. ٻنهي اڳواڻن هٿ ملايو ۽ گهٽ ۾ گهٽ 30 سيڪنڊ تائين هڪ ٻئي جو هٿ هٿ ۾ رکيو. هنن مسڪراهٽ سان خوشگوار انداز ۾ جملن جي ڏي وٺ پڻ ڪئي. ٻنهي اڳواڻن جي وچ ۾ ان ملاقات کان اڳ ۾ مختلف قسم جا افواهه موجود هئا جڏهن ته سارڪ سربراهن جي ڍليخل جي پرفضا ماڳ تي غيررسمي ويهڪ دوران مختصر ملاقات کانپوءِ ٻنهي طرفن جي وچ ۾ برف پگهري وئي ۽ ان جو حقيقي مظاهرو ڪئميرائن آڏو سارڪ سربراهه اجلاس جي پڄاڻي واري ويهڪ دوران ڏسڻ ۾ آيو جنهن کي سڄي خطي ۾ سڌوسنئون نشر ڪيو ويو، پاڪستان ۽ ڀارت جي وزيراعظمن جي پرجوش هٿ ملائڻ سان ئي کٽمنڊو جو سٽي هال تاڙين سان گونجي اٿيو، ٻئي طرف وزيراعظم جي خصوصي معاون طارق فاطمي هتي صحافين سان ڳالهائيندي چيو ته اهو هٿ ملائڻ برجسته هو. هن چيو ته سارڪ مان تمام گهڻيون اميدون آهن ۽ اها ڪانفرنس خوشگوار انداز ۾ پڄاڻي تي پهتي آهي. هن چيو ته اسان سارڪ مان تمام گهڻو مطمئن ٿي واپس موٽي رهيا آهيون، جڏهن کانئس سوال ڪيو ويو ته ڇا ان هٿ ملائڻ سان سارڪ کي ڪو فرق پوندو ته طارق فاطمي چيو ته سارڪ ملڪن جي خواهش آهي ته پاڪستان ۽ ڀارت جا ٻطرفا لاڳاپا بهتر ٿين ته جيئن علائقائي تنظيم مستحڪم ٿئي. هن ياد ڏياريو ته عالمي گادي وارن شهرن ۾ ڀارت پاران پرڏيهي سيڪريٽرين جي سطح تي ڳالهين جي ملتوي ٿيڻ تي ڳڻتي ظاهر ڪئي، وزيراعظم نواز شريف ڀارتي وزيراعظم کانسواءِ ٻين سمورن اڳواڻن سان ملاقاتون ڪيون ڇو ته پاڪستان سمجهي ٿو ته باضابطا ڳالهين جي ذميواري ڀارت تي آهي. هن چيو ته ڪا باضابطا ملاقات نه ٿي جڏهن کائنس هٿ ملائڻ کانپوءِ مستقبل بابت سوال ڪيو ويو ته هن جواب ڏنو ته پاڪستان جو موقف اهو ئي آهي پاڪ ڀارت لاڳاپا پائيدار ڳالهين ذريعي ئي اڳيان وڌي سگهن ٿا. هن چيو ته خواهش ۽ عزم موجود آهي ۽ ٻنهي طرفن کان ان جي مخلصاڻي پيروي کانسواءِ اڳيان نه ٿو وڌي سگهجي. هڪ سوال جي جواب ۾ طارق فاطمي چيو ته هو ان بابت تبصرو ڪرڻ جي پوزيشن ۾ نه آهي ته غيررسمي ويهڪ (ريٽريٽ) ۾ ڇا ٿيو. هن چيو ته ٻنهي اڳواڻن جي باڊي لينگوئيج بهتر هئي، هو مسڪرائڻ سان گڏ مطمئن ڏسڻ ۾ آيا. هن چيو ته اسان جو اصولي موقف عزت ۽ وقار سان برقرار رکيو ويو آهي اسان ڪنهن دٻاءُ ۾ ناهيون آيا. طارق فاطمي چيو ته اسان پاڪستان جي مفاد کي مٿانهون رکيو. طارق فاطمي چيو ته مجموعي طور تي سارڪ توانائي تعاون بابت معاهدي تي متفقه طور تي صحيحون ڪري هڪ اڳڀرائي ڪئي آهي. هن چيو ته موٽر گاڏين ۽ ريلويز بابت ٻين ٻن معاهدن تي فني سببن جي بنياد تي صحيحون نه ٿي سگهيون جيئن ته سينيئر عملدارن جي سطح تي ان بابت ڳالهيون نه ٿيون هيون. هن چيو ته واپار ۽ ٽرانسپورٽيشن جون وزارتون ٽن مهينن ۾ اجلاس ڪنديون ته جيئن جيڪڏهن ڪا رڪاوٽ آهي ته ان کي ختم ڪري سگهجي. طارق فاطمي چيو ته سارڪ سيڪريٽريٽ شروعاتي طور تي ٽي معاهدا تجويز ڪيا هئا تنهن هوندي به رڳو هڪ تي اتفاق ٿي سگهيو ڇو ته پاڪستان جا موٽر وهيڪلز ٽرانسپورٽيشن ۽ ريلويز بابت ٻن معاهدن تي ڪجهه خدشا هئا. هن چيو ته اسان ڪجهه ترميمون تجويز ڪنداسين ته جيئن پاڪستان جو مفاد متاثر نه ٿئي. طارق فاطمي چيو ته سارڪ ملڪن علائقائي رابطن ۽ مضبوط تعاون جي لاءِ وزيراعظم نواز شريف جي ويزن کي ساراهيو آهي. وزيراعظم جي خصوصي معاون عرفان صديقي صحافين کي ٻڌايو ته وزيراعظم نواز شريف ۽ ڀارتي وزيراعظم نريندر مودي جي وچ ۾ هٿ ملائڻ کي تمام گهڻي پذيرائي ملي، ائين لڳي ٿو ته ڄڻ سارڪ ان هٿ ملائڻ جي منتظر هئي. عرفان صديقي چيو ته ايندڙ قدم جي طور تي ڀارت کي پاڪستان سان پنهنجي پهرين کان افهام تفهيم کي پورو ڪرڻ گهرجي ۽ ان کي بحال ڪرڻ گهرجي. هتي اها ڳالهه ذڪر جوڳي آهي ته ڀارت پاران هلندڙ سال آگسٽ ۾ پرڏيهي سيڪريٽرين جي سطح تي طئي ٿيل ڳالهيون ملتوي ڪرڻ کانپوءِ ٻنهي طرفن کي گذريل ڪجهه مهينن کان ٻڏتر وارو ماحول درپيش آهي جڏهن ته جنهن کانپوءِ لائين آف ڪنٽرول ۽ ورڪنگ بائونڊري تي ڀارت پاران اشتعال انگيز فائرنگ جا واقعا پڻ پيش ايندا رهيا آهن جن جي نتيجي ۾ پاڪستان ۾ ڪيتريون ئي قيمتي جانيون ضايع ٿي چڪيون آهن. ٻئي طرف پاڪستان 2016ع ۾ اسلام آباد ۾ 19 هين سارڪ سربراهه اجلاس جي ميزباني ڪندو. ان ڳالهه جو اظهار علائقائي تعاون بابت ڏکڻ ايشيائي تنظيم (سارڪ) جي 18 هين سربراهه اجلاس جي پڄاڻي واري ويهڪ ۾ ڪيو ويو. وزيراعظم محمد نواز شريف ڪالهه خميس ڏينهن هتي پڄاڻي واري اجلاس ۾ ٿورن جو اظهار ڪندي چيو ته سندس لاءِ 18 هين سارڪ سربراهه ڪانفرنس ۾ شرڪت ڪندڙ سمورن ميمبر وفدن پاران نيپال ۾ شاندار آجيان ۽ قيام دوران فراخدلاڻي مهمان نوازي تي نيپال جي وزيراعظم، حڪومت ۽ عوام جو سچي دل سان ٿورا مڃڻ انتهائي اعزاز جي ڳالهه آهي. هن سارڪ جي صدارت سنڀالڻ تي نيپال کي مبارڪباد پڻ ڏني. وزيراعظم محمد نواز شريف پنهنجي مختصر خطاب ۾ چيو ته اسان پاڪستان ۾ 19 هين سربراهه ڪانفرنس ۾ سربراهن جي آجيان ڪرڻ جا منتظر آهيون. وزيراعظم چيو ته سارڪ سربراهه ڪانفرنس تنظيم جي پليٽ فارم تان ترقي ۽ خوشحالي جي لاءِ اڻٿڪ، برابر ۽ منصفاڻي حصيداري جي قيام جي عزم کي ورجايو آهي. هن چيو ته اسان کي انهن مسئلن جي حوالي سان حقيقت پسنداڻي، عملي ۽ مرحليوار حڪمت عملي اختيار ڪرڻ گهرجي جنهن سان تعاون جون نيون راهون کلنديون. هن پرڏيهي وزيرن، پرڏيهي سيڪريٽرين ۽ ٻين عملدارن کي مبارڪباد ڏني جن ان اهم سربراهه اجلاس جي ڪامياب پڄاڻي جي لاءِ ٺوس تياري ڪئي. هن سربراهه اجلاس جي ڪاميابي تي سارڪ جي سيڪريٽري جنرل ۽ سندس ٽيم جي ڪوششن کي به ساراهيو. وزيراعظم چيو ته اسان سربراهه اجلاس ڪانفرنس ۾ ڀرپور شرڪت تي مبصر وفدن جا به ٿورائتا آهيون. وزيراعظم محمد نواز شريف 18 هين سارڪ سربراهه ڪانفرنس جي ڪامياب منعقد ٿيڻ تي سمورن شرڪت ڪندڙن ۽ نيپال جي حڪومت ۽ عوام کي مبارڪباد ڏني.

 

قومي اسيمبلي جو اجلاس، پ پ ۽ ايم ڪيو ايم وچ ۾ سخت جملن جي ڏي وٺ

اسلام آباد (بيورو) قومي اسميبلي جي اجلاس ۾ پ پ ۽ ايم ڪيو ايم جي ميمبرن وچ ۾ سخت جملن جي ڏي وٺ ڪئي وئي، جڏهن ته متحده پاران عبدالستار بچاڻي جي بيان تي اجلاس ۾ احتجاج ڪري واڪ آئوٽ ڪيو. قومي اسميبلي جي اجلاس ۾ اسپيڪر اياز صادق جي صدارت هيٺ ٿيل اجلاس ۾ پ پ ۽ ايم ڪيو ايم جي ميمبرن هڪٻئي تي الزام لڳايا. متحده جي ميمبر آصف حسنين چيو ته سنڌ ۾ امن امان جي تمام گهڻي حالت خراب آهي پر ڌاڙيلن جو احتجاج ڪرڻ سمجهه کان ٻاهر آهي. هن چيو ته سنڌ ۾ ڪنهن کي به تحفظ حاصل ناهي، جڏهن ته ڀتو وٺڻ لاءِ پوليس ڌاڙيلن کي تنگ ڪري رهي آهي. هن چيو ته ٿر جي حالت خراب آهي جو ماڻهو بنا علاج جي مري رهيا آهن. هن چيو ته ڪراچي ۾ ٽارگيٽيڊ آپريشن باوجود ٽارگيٽ ڪلنگ جاري آهي، جڏهن ته صوبائي حڪومت ڌيان نه پئي ڏئي. آصف حسنين چيو ته ٿر ۾ انساني حقن جو مسئلو وفاقي سرڪار ڌيان ڏئي. سندس چوڻ هو ته سنڌ ۾ اقليتن کي تحفط ناهي، روزانون هندو ناريون اغوا ٿي رهيون آهن. هن چيو ته آدمشماري سنڌ ۾ نه ٿي ڪرائي وڃي، جنهن ڪري اين ايف سي ۾ سنڌ کي ناڻو نه ٿو ملي. آصف حسنين چيو ته مڪاني چونڊون بابت سموريون سياسي پارٽيون خاموش آهن. هن چيو ته تيل جوقيمتون گهٽ ٿيڻ باوجود ڀاڙا گهٽ ناهن ٿيا، جڏهن ته بجلي جون قيمتون گهٽ ناهن ڪيون ويون. هن چيو ته وفاقي سرڪارڪي اليڪٽرڪ کي پنهنجي تحويل ۾ وٺي ، ڇاڪاڻ ته اها ڪمپني مخصوص ماڻهن وٽ يرغمال بڻيل آهي. پ پ ايم اين اي عبدالستار بچاڻي خطاب ڪندي چيو ته متحده پ پ جي گذريل سرڪار کي ڪرپٽ چون پيا پر پنهنجي گورنر کي ڇو ويهاريون ويٺا آهن. هن چيو ته ايم ڪيو ايم جو مزاج آمرن سان هلڻ جهڙو آهي، صبح جي هڪ ۽ شام جو ٻئي پارٽي سان گڏ هوندا آهن. عبدالستار بچاڻي چيو ته پ پ متحده کي گڏ هلائڻ چاهي ٿي پر اها اسٽبلشمينٽ سان هلڻ چاهي ٿي . عبدالستار بچاڻي جي بيان تي متحده ميمبر پاران احتجاج ڪري بائيڪاٽ ڪيو ويو. ايم اين اي راڻا افضل قومي اسميبلي ۾ خطاب ڪندي چيو ته آدمشماري فوج جي نگراني ۾ ڪرائي ويندي. هن چيو ته جلد وزيراعظم آدمشماري بابت سي سي آءِ جو اجلاس طلب ڪندو

 

عمران خان جي رويي ۾ مثبت تبديلي آئي آهي، اميد ته هاڻي يوٽرن نه وٺندو: پرويز رشيد

اسلام آباد (بيورو) وفاقي اطلاعات واري وزير پرويز رشيد چيو آهي ته عمران خان ڪالهه عدالت ۾ پيش ٿيو جيڪا هڪ مثبت تبديلي آهي ان جي ڀليڪار ڪيون ٿا هن ميڊيا سان ڳالهائيندي چيو ته پاڪستان هڪ مهذب ملڪ آهي جتي قانون جي حڪمراني آهي پارليامينٽ آئين بڻايو ۽ رياست به ان ئي آئين جي مطابق هلي رهي آهي عمران خان ڪالهه عدالت۾ پيش ٿيو ۽ آر اوز بابت سپريم ڪورت ۾ وڃڻ جي فيصلي کي ڀليڪار چوان ٿو ۽ هي هڪ مثبت تبديل آهي.

 

اڳوڻي صدر سان سيد قائم علي شاهه جي صوبائي وزيرن سان گڏ ملاقات، ٿر ۾ سمورا آر او پلانٽ سولر انرجي تي منتقل ڪرڻ جي هدايت

ڪراچي(اسٽاف رپورٽر) پيپلز پارٽي جي شريڪ چيئرمين آصف زرداري سان وڏي وزير قائم علي شاهه ۽ صوبائي وزيرن ملاقات ڪئي، آصف زرداري صوبائي حڪومت کي ٿر ۾ سمورا آر او پلانٽس سولر انرجي تي منتقل ڪرڻ جي هدايت ڪندي چيو ته ٿر جي عوام جي خدمت ۾ ڪابه ڪوتاهي برداشت نه ڪئي ويندي…. بلاول هائوس ڪراچي ۾ وڏي وزير سيد قائم علي شاهه ۽ ٻين وزيرن اڳوڻي صدر سان ملاقات ڪئي، جنهن دوران ٿر ۽ سنڌ جي امن امان واري صورتحال تي غور ويچار ڪيو ويو، جنهن دوران صوبائي وزيرن آصف زرداري کي ٿر جي صورتحال تي بريفنگ ڏني… ملاقات دوران پ پ جي شريڪ چيئرمين آصف زرداري صوبائي حڪومت کي ٿر ۾ سمورا آر او پلانٽس سولر انرجي تي منتقل ڪري عوام کي پيئڻ جو صاف پاڻي فراهم ڪرڻ جي هدايت ڪئي. ملاقات دوران وڏي وزير قائم علي شاهه وفاق طرفان ترقياتي منصوبن ۾ نظرانداز ڪرڻ تي ڳڻتي ظاهر ڪندي چيو ته وفاق کان منتقل ڪيل ادارن لاءِ اڃا تائين فنڊ ناهن ڏنا ويا، وڏي وزير سيد قائم علي شاهه ٿر جي صورتحال بابت چيو ته پ پ حڪومت جي ٿر ۾ ٿيندڙ فوتگين تي نظر آهي، ٻارڙن جو فوت ٿيڻ بک وگهي نه پر داين ذريعي ويم ٿيڻ آهي.

 

موجوده صورتحال جو حل اهو آهي ته عمران خان چيف اليڪشن ڪمشنر بڻجي وڃي: خورشيد شاهه

اسلام آباد (بيورو) اسلام آباد قومي اسيمبلي ۾ اپوزيشن ليڊر سيد خورشيد شاهه چيو ته موجوده صورتحال جو حل هي آهي ته عمران خان چيف اليڪشن ڪمشنر بڻجي وڃي ۽ آزاداڻه ۽ منصفاڻه چونڊون ڪرائي آئين ۾ ترميم ڪري عمران خان کي چيف اليڪشن ڪمشنر بڻائڻ لاءِ تيار آهيون نجي ٽي وي سان ڳالهائيندي سيد خورشيد شاهه تجويز ڏني ته عمران خان کي آئين ۾ ترميم ڪري نئون چيف اليڪشن ڪمشنر بنائڻ لاءِ تيار آهيون عمران چيف اليڪشن ڪمشنر بڻجي آزادانه منصفاڻه اليڪشن ڪرائي. واضح رهي ته سپريم ڪورٽ پاران بار بار تاريخ ڏيڻ جي باوجود چيف اليڪشن ڪميشنر جو معاملو اڃا تائين لٽڪيل آهي. حڪومت ۽ اپوزيشن جماعتون مسلم ليگ (ن) ۽ پيپلزپارٽي جي صلاح مشوري باوجود اميدوارن تصدق حسين جيلاني ۽ رانا ڀڳوانداس عهدو قبول ڪرڻ کان انڪار ڪري ڇڏيو.

 

ڪوڙ ڳالهائڻ تي آسڪر ايوارڊ جو رواج هجي ها ته عمران خان حقدار هو: شرجيل ميمڻ

ڪراچي (اسٽاف رپورٽر) پاڪستان پپيلز پارٽي جي ڊپٽي سيڪريٽري طلاعات ۽ سنڌ جي اطلاعات واري صوبائي وزير شرجيل انعام ميمڻ چيو آهي ته تحريڪ انصاف جي اڳواڻ عمران خان بدتميزي ۾ پي ايڇ ڊي ڪئي آهي. جيڪڏهن ڪوڙ ڳالهائڻ جو آسڪرايوارڊ هن دنيا ۾ هجي ها ته اهو عمران خان کي ضرور ملي ها. عمران خان کليل چئلينج ڪريان ٿو ته هو پيپلز پارٽي جي ڌانڌلي کي ثابت ڪري. پاڪستاني قوم عمران خان جي سول نافرماني واري تحريڪ، مني لانڊرنگ سميت بل ۽ ٽيڪس نه ڏيڻ واري حڪمن کي رد ڪري ڇڏيو آهي. جمعرات واري رات پنهنجي هڪ بيان ۾ شرجيل انعام ميمڻ چيو ته عمران خان غير مهذب ۽ بدتميزي جي ذريعي ڪوڙ کي سچ ثابت ڪرڻ جي ڪوشش ڪري رهيو آهي. هن چيو ته جڏهن دليل ختم ٿي ويندا آهن ته عمران خان غير اخلاقي زبان استعمال ڪرڻ شروع ڪندو آهي. هن چيو ته عمران خان بدتميزي ۾ پي ايڇ ڊي ڪئي آهي جيڪڏهن ڪوڙ ڳالهائڻ تي آسڪرايوارڊ هجي ها ته اهو عمران خان ئي ملي ها. شرجيل ميمڻ عمران خان پاران پيپلز پارٽي تي ڌانڌلي واري الزامن جي شديد لفظن ۾ مذمت ڪندي چيو آهي ته جيڪڏهن عمران خان سمجھي ٿو ته پيپلز پارٽي سنڌ ۾ ڪنهن به قسم جي ڌانڌلي ڪئي آهي ته هو ان کي عدالت ۾ ثابت ڪري. هن عمران خان کي کليل چئلينج ڏيندي چيو ته پيپلز پارٽي جي ڌانڌلي کي ثابت ڪري. شرجيل انعام ميمڻ چيو ته تاريخ شاهد آهي ته هميشه پيپلز پارٽي خلاف چونڊن ۾ ڌانڌلي ٿي آهي. هن چيو ته عمران خان ماڊرن طالبان آهي ۽ هو زبردستي پنهنجي ڳالهه مڃائڻ چاهي ٿو. شرجيل انعام ميمڻ وڌيڪ چيو ته عمران خان پيپلز پارٽي جي قيادت خلاف بي حوده زبان استعمال ڪرڻ بند ڪري ۽ جيالن جي صبر جو امتحان نه وٺي. هن چيو ته پاڪستاني قوم عمران خان جي سول نافرماني جي تحريڪ، مني لانڊرنگ سميت بلن ۽ ٽيڪس نه ڏيڻ جي حڪمن کي رد ڪري ڇڏيو آهي.

 

پاڪستان ڀارت پاران دهشتگردي بابت لڳايل الزام رد ڪري ڇڏيا

اسلام آباد (بيورو) پاڪستان، ڀارت پاران دهشتگرديءَ بابت لڳايل الزامن کي بي بنياد قرار ڏيندي مڪمل طور رد ڪري ڇڏيو،پرڏيهي ترجمان تسنيم اسلم جو چوڻ آهي ته پاڪستان هر قسم جي دهشتگردي جي مذمت ڪري ٿو، بنگلاديش سان ڪو به تڪرار ناهي. پرڏيهي آفيس اسلام آباد ۾ هفتيوار ميڊيا بريفنگ دوران تسنيم اسلم چيو ته پاڪستان هڪ ذميوار ملڪ آهي، انهن ئي سبب ڪري اهو سارڪ جي مختلف ذيلي تنظيمن ۾ وڌي چڙهي حصو وٺي ٿو. هن چيو ته وزيراعظم نواز شريف سارڪ ڪانفرنس دوران پنهنجي خطاب دوران هٿيارن جي ڊوڙ بدران عوام جي ڀلائي لاءِ قدمن تي زور ڀريو. تسنيم اسلم چيو ته وزيراعظم نواز شريف سارڪ جي 6 ميمبر ملڪن جيسربراهن سان ڌار ڌار ملاقاتون به ڪيون ته جيئن گڏيل سهڪار کي هٿي ملي. پرڏيهي ترجمان چيو ته سارڪ ملڪن وچ ۾ ٽرانسپورٽ معاهدي کي پاڪستان بلاڪ ناهي ڪيو، ماهرن جي اجلاس بعد معاهدي جو اندروني طريقيڪار به پورو ناهي ٿيو پر اهو طريقيڪار پاڪستان کانسواءِ ڪجهه ٻين ملڪن به پورو نه ڪري سگهيا آهن. تسنيم اسلم چيو ته پاڪستان سڄي خطي جي ترقي لاءِ پاڙيسري ملڪن سان بهتر لاڳاپا چاهي ٿو،پاڙيسري ملڪن سان سٺا لاڳاپا برابري جي بنياد تي هوندا آهن ۽ پاڪستان انهن ئي بنياد تي ڀارت سان لاڳاپن جو خواهشمند آهي. پرڏيهي ترجمان چيو ته ڀارتي گهرو وزير جا دهشتگردي بابت پاڪستان مٿان لڳايل الزام بي بنياد آهن. تسنيم اسلم چيو ته پاڪستان هر قسم جي دهشتگردي جي مذمت ڪري ٿو ۽ ڀارت کي اهڙن بي بنياد الزامن کان پاسو ڪرڻ گهــُرجي ڇو ته الزامن سان مسئلا حل نه پر وڌندا آهن. پرڏيهي ترجمان وڌيڪ چيو ته بنگلاديشي وزيراعظم شيخ حسينا واجد جي وزيراعظم نواز شريف سان ملاقات بهتر رهي، جڏهن ته پاڪستان جو بنگلاديش سان ڪو به تڪرار ناهي.

 

پي ٽي آءِ پاران 30 نومبر تي اسلام آباد ۾ جلسي لاءِ ڏنل درخواست تي اڄ فيصلو ڪيو ويندو:چوڌري نثار

اسلام آباد (بيورو) حڪومت، پي ٽي آءِ پاران 30 نومبر تي اسلام آباد ۾ جلسي لاءِ ڏنل درخواست تي اڄ فيصلو ڪندي، وفاقي گهرو وزير چوڌري نثار چيو آهي ته چڙهائي کي منهن ڏيڻ لاءِ سموريون تياريون مڪمل ڪيون ويون آهن، ڪنهن کي به رياستي ادارن تي حملن جي اجازت نه ڏني ويندي. اسلام آباد ۾ ميڊيا سان ڳالهائيندي وفاقي گهرو وزير چوڌري نثار علي چيو ته پي ٽي آءِ پاران 30 نومبر تي جلسي جي درخواستتي اڄ تائين فيصلو ڪيو ويندو. چوڌري نثار علي واضح ڪيو ته اسلام آباد تي چڙهائي کي منهن ڏيڻ لاءِ سموريون تياريون مڪمل ڪيون ويون آهن،پرامن سياسي سرگرمين ۾ رنڊڪ نه وڌي ويندي،پر رياستي ادارن تي حملي جي اجازت ڪنهن به ريت نه ڏني ويندي. وفاقي گهرو وزير پي ٽي آءِ جي ڌرڻي کي ٽيهه کان 40 ماڻهن جو ميڙ قرار ڏيندي چيو ته هو 10 اهلڪار اماڻي ڌرڻو ختم ڪرائي سگهن ٿا. سندس چوڻ هو ته 30 نومبر جلسو پرامن رهيو ته اهو جمهوريت جو حصو هوندو، پي اي ٽي ۽ پي ٽي آءِ جي ڌرڻن ۾ مارجي ويل ٻن ڄڻن تي پوليس گوليون نه هلايون هيون. چوڌري نثار علي چيو ته پاڪستان دهشتگردي جي ڪنهن به جنگ ۾ شامل ناهي،آپريشن ضرب عضب کانپوءِ دهشتگرديءَ جي ڪاررواين ۾ گهٽتائي آئي آهي. وفاقي گهرو وزير چوڌري نثار علي وڌيڪ چيو ته نائين اليون تي حملو ڪندڙن جو پاڪستان سان ڪو به تعلق ناهي،جڏهن ته دهشتگردي خلاف جنگ ۾ سڀ کان وڌيڪ قربانيون پاڪستان ڏنيون آهن.

 

هٿ آيل 26 ٻارڙيون سنڀالي نه سگهندڙ ملڪ ڪئين سنڀاليندا: الطاف حسين

ڪراچي(اسٽاف رپورٽر) ايم ڪيو ايم جي سربراهه الطاف حسين چيو آهي ته ملڪ جي نظام کي بهتر بڻائڻ لاءِ انتظامي يونٽ ٺهڻ ضروري بڻجي ويا آهن، جاگيردار ۽ ڪرپٽ حڪمران اهو ڪم نه ڪري سگھندا، انتظامي يونٽ ٺاهڻ جو معاملو فوج حل ڪري… ڪراچي نائن زيرو تي هاڪي ٽيم جي مان ۾ ڏنل تقريب کي ٽيليفونڪ خطاب ڪندي الطاف حسين چيو ته جيڪي حڪمران ڪراچي مان هٿ آيل 26 ٻارڙن کي نٿا سنڀالي سگھن اهي ملڪ ڪيئن هلائيندا، ٻارڙن جو تعلق ڪنهن بهعلائقي سان هجي رابطا ڪميٽي سندن خيال رکي.. الطاف حسين چيو ته آرمي چيف جنرل راحيل شريف دهشتگردن خلاف ڪارروائي لاءِ بهتر قدم کڻي رهيو آهي، قوم آرمي چيف جو ساٿ ڏئي. ايم ڪيو ايم سربراهه الطاف حسين چيو ته انتظامي يونٽ ٺاهڻ وارو معاملو جاگيردار ۽ ڪرپٽ حڪمران حل نٿا ڪري سگھن، فوج ئي معاملو حل ڪري سگھي ٿي، آرمي چيف جڏهن به اجلاس گھرائي ملڪ ۾ نون اتنظامي يونٽن تي صلاح مشورو ڪري. الطاف حسين چيو ته هڪ وٺي قومي راند هاڪي کي پوئتي ڌڪيو پيو وڃي، ڪرڪيٽ لاءِ اربين روپين جا فنڊ جاري ڪيا پيا وڃن پر هاڪي جي رانديگرن لاءِ پگھارون به حڪومت تي بار ٿيون بڻجن.

 

پئٽرول جي قيمت ۾ ساڍا 9 روپيا في ليٽر گهٽتائي جو فيصلو

اسلام آباد (بيورو) حڪومت پاران پئٽرول 9 روپيا 66 پئسا في ليٽر سستو ڪرڻ جو فيصلو. تيل اگهن ۾ گهٽتائي لاءِ اوگرا حڪومت کي سمري موڪلي ڇڏي. ذريعن مطابق هاءِ آڪٽين جي قيمت ۾ 10 روپيا في ليٽر گهٽتائي ڪئي ويندي جڏهن ته هاءِ اسپيڊ ڊيزل 7 روپيا 12 پئسا ۽ گاسليٽ چار روپيا في ليٽر سستو ٿيندو ذريعن جو چوڻ آهي ته اوگرا پئٽروليم مصنوعات جي قيمتن ۾ گهٽتائي جي سمري پئٽروليم واري وزارت کي منظوري لاءِ موڪلي ڇڏي آهي. اگهن ۾ لاڳ عالمي منڊي۾ اگهه ڪرڻ سبب ڪئي ويندي.