تازيون خبرون

Daily Archives: November 26, 2014

ڳالهين لاءِ تيار آهيون پر اڳڀرائي ڀارت کي ڪرڻي پوندي:نواز شريف

کٽمنڊو (مانيٽرنگ ڊيسڪ) وزيراعظم نواز شريف سارڪ سربراهي ڪانفرنس ۾ شرڪت لاءِ نيپال پهچي ويو، کٽمنڊو ايئرپورٽ تي سندس شاندار استقبال ڪيو ويو، سندس چوڻ آهي ته پاڪستان ڳالهين لاءِ تيار آهي پر اڳڀرائي ڀارت کي ڪرڻي پوندي. وزيراعظم نواز شريف اسلام آباد کان نيپال جــَي گاديءَ واري شهر کٽمنڊو پهتو. کٽمنڊو پهچڻ تي وزيراعظم نواز شريف جي نيپال جي نائب وزيراعظم آجيان ڪئي. ان موقعي تي وزيراعظم جي مان ۾ آجياڻي جي تقريب به منعقد ڪئي وئي ۽ ٻنهي ملڪن جا ترانا پڻ وڄايا ويا. وزيراعظم نواز شريف سان سندس خاص مددگار عرفان صديقي ۽ طارق فاطمي به گڏ آهي،جڏهن ته پرڏيهي صلاحڪار سرتاج عزيز اڳ ئي کٽمنڊو پهتل آهي. وزيراعظم اڄ سارڪ سربراهي ڪانفرنس کي خطاب ڪندو ۽ 27 نومبر تي سارڪ ملڪن جي سربراهن سان ڌار ڌار ملاقاتون به ڪندو جنهن ۾ دهشتگردي جي خاتمي۽ واپار کي هٿي وٺرائڻ تي خيالن جي ڏي وٺ ڪئي ويندي. ڪانفرنس جي موقعي تي وزيراعظم نواز شريف جي پنهنجي ڀارتي هم منصب نريندر مودي سان ملاقات جو امڪان پڻ آهي. کٽمنڊو روانو ٿيڻ کان اڳ اسلام آباد ايئرپورٽ تي ميڊيا سان ڳالهائيندي وزيراعظم چيو ته يورپي يونين ۽ دنيا جون ٻيون علائقائي تنظيمون زبردست ترقي ڪري چڪيون آهن پر سارڪ کي 30 سال ٿي ويا آهن ۽ ان ۾ ڪا به خاص اڳڀرائي نه ٿي سگهي آهي. نواز شريف چيو ته پاڪستان – ڀارت جي ڇڪتاڻ وارن لاڳاپن سبب به سارڪ ترقي نه ڪري سگهي آهي، پاڪستان ڳالهين لاءِ تيار آهي پر ان لاءِ ڀارت کي اڳڀرائي ڪرڻي پوندي. هن چيو ته پرڏيهي سيڪريٽري سطح جي ڳالهين کي ڀارت ملتوي ڪيو پر ڪنهن هڪ وزيراعظم کي ڳالهيون ختم ڪرڻ جو اختيار نه هو. وزيراعظم چيو ته پاڪستان خطي ۾ امن ۽ استحڪام چاهي ٿو، بهتر سڪيورٽي ۽ معاشي سهڪار جي قدمن سان خطي کي خوشحال بڻائي سگهجي ٿو. نواز شريف چيو ته هــُو سارڪ کي يورپي يونين وانگر معاشي ترقي ۽ واپار جو فورم بڻائڻ چاهين ٿا ڇو ته خطو امن ۽ اقتصادي سهڪار جي فضا ۾ ترقي ڪري سگهي ٿو.

 

غداري ڪيس: ٻِين ماڻهن کي شامل ڪرڻ واري حڪم کي چئلينج ڪرڻ جو فيصلو

اسلام آباد(بيورو) حڪومت غداري ڪيس ۾ ٻين ماڻهن کي شامل ڪرڻ واري خاص عدالت جي حڪم کي چئلينج ڪرڻ جو فيصلو ڪري ورتو، سپريم ڪورٽ ۾ اڄ اپيل داخل ڪرائڻ جو امڪان ظاهر ڪيو پيو وڃي.. ذريعن جو چوڻ آهي ته گذريل ڏينهن وزيراعظم نواز شريف جي صدارت هيٺ ٿيل اجلاس ۾ فيصلو ڪيو ويو ته پرويز مشرف خلاف هلندڙ غداري ڪيس ۾ ٻين ماڻهن کي شامل ڪرڻ بابت خاص عدالت جي فيصلي کي سپريم ڪورٽ ۾ چئيلينج ڪيو ويندو. ذريعن موجب اجلاس ۾ اڳوڻي وفاقي وزير ۽ غداري ڪيس ۾ عدالت پاران نامزد ڪيل زاهد حامد، قانون واري سيڪريٽري، بچاءَ واري وزير ۽ ٻين شرڪت ڪئي. اجلاس ۾ زاهد حامد کي ذميواري ڏني وئي ته هو خاص عدالت جي فيصلي خلاف سپريم ڪورٽ ۾ اپيل داخل ڪري. ذريعن موجب سپريم ڪورٽ ۾ اپيل اڄ داخل ڪئي ويندي.

 

عمران خان 90 جي ڏهاڪي ۾ ڪا به ٽيڪس نه ڏيندو هو، الزام لڳائڻ کان اڳ پنهنجي اندر ۾ جهاتي پائي ڏسي: پرويز رشيد

اسلام آباد (بيورو) سڌ سماءُ واري وفاقي وزير پرويز رشيد چيو آهي ته عمران خان 90 جي ڏهاڪي ۾ ڪا به ٽيڪس نه ڏيندو هو، نجڪاريبورڊ جي چيئرمين محمد زبير جو چوڻ آهي ته تحريڪ انصاف جا 82 سيڪڙو چونڊيل نمائندا ٽيڪس چور آهن. اسلام آباد ۾ پريس ڪانفرنس کي خطاب ڪندي پرويز رشيد چيو ته الزام لڳائڻ کان پهرين عمران خان کي پنهنجي اندر ۾ جهاتي پائڻ گهرجي. هن چيو ته حڪومت هاڻي قرض ڏيڻ ۽ معاف ڪرڻ وارو معاملو ختم ڪري ڇڏيو آهي، ان معاملي کي بئنڪن تي ڇڏي ڏنو آهي. پريس ڪانفرنس کي خطاب ڪندي نجاري بورڊ جي چيئرمين محمد زبير چيو ته تحريڪ انصاف جي سيڪريٽري جنرل جهانگير ترين وٽ 90 واري ڏهاڪي ۾ ڪجهه به نه هو. هن چيو ته چوڌري ڀائرن ۽ جهانگير ترين پنهنجا قرض معاف ڪرايا. محمد زبير جو چوڻ هو ته جهانگير ترين ملڪ جو سڀ کان وڌيڪ امير ماڻهو آهي، هن 24 ڪروڙ 70 لک رپيا قرض معاف ڪرايو. هن چيو ته کين پڇڻ جو حق آهي ته تحريڪ انصاف قيادت امير ڪيئن ٿي؟ نجڪاري بورڊ جي سربراهه چيو ته ڪا به ڪمپني سياسي پارٽي کي فنڊز نه ٿي ڏئي سگهي .

 

حڪومت پاران پيٽروليم شين جي قيمتن ۾ هڪ ڀيرو ٻيهر 9 رپيا گهٽتائي جو امڪان

اسلام آباد(بيورو) حڪومت پاران مهانگائي جي ماريل عوام کي هڪ ٻيو تحفو ڏيڻ جون تياريون ڪيون ويون آهن، ايندڙ مهيني پيٽروليم شين ۾ هڪ ڀيرو ٻيهر 9 رپيا گهٽتائي ڪرڻ جو امڪان آهي. ذريعن موجب وفاقي سرڪار عوام کي رليف ڏيڻ جون تياريون ڪري رهي آهي. پيٽروليم واري وزارت جي ذريعن جو چوڻ آهي ته پهرين ڊسمبر کان تيل جي اگهن ۾ لاٿ ڪئي پئي وڃي. پيٽرول جي في ليٽر اگهه ۾ هڪ ڀيرو ٻيهر 9 رپيا ۽ ڊيزل جي قيمت ۾ 6 رپيا گهٽتائي ڪئي ويندي.واضح رهي ته عالمي منڊي ۾ قيمتون گهٽجڻ سبب ملڪ ۾ به تيل جا اگهه گهٽايا پيا وڃن.

 

آمريڪي ڊپلوميسي خطي ۾ ناڪام ٿي چڪي آهي:خواجا آصف

اسلام آباد (بيورو) بچاءَ واري وزير خواجا آصف چيو آهي ته داعش ملڪ لاءِ خطرو آهي، لاهور ۾ داعش جا پمفليٽ ورهائڻ واري عمل کي سنجيدگيءَ سان ڏٺو پيو وڃي، آمريڪي ڊپلوميسي خطي ۾ ناڪام ٿي چڪي آهي، آپريشن ضرب عضب ۾ ڪو به فرق نه پيو ڪيو وڃي. اسلام آباد ۾ قومي سلامتي بابت تقريب کي خطاب ڪندي خواجه آصف چيو ته داعش کي شام جي حڪومت خلاف ٺاهيو ويو هو ۽ اها تنظيم اسلام جي بدنامي جو سبب بڻي آهي. هن چيو ته داعش ملڪ لاءِ خطرو آهي، لاهور ۾ داعش جا پمفليٽ ورهائڻ واري عمل کي سنجيدگي سان ڏٺو پيو وڃي. خواجا آصف چيو ته خطي ۾ امن قائم ڪرڻ لاءِ افغانستان ۾ امن ۽ استحڪام ضروري آهي، امن ۽ معيشت هڪ ٻئي سان ڳنڍيل آهن. سندس چوڻ هو ته سرحدن تي ڀارتي اڳرائي جو سلسلو هلي رهيو آهي، جيڪو ڪنهن به ريت خطي جي امن لاءِ سٺو سنئوڻ ناهي. خواجا آصف چيو ته سارڪ ڪانفرنس سان پاڪ ڀارت ڇڪتاڻ ختم ٿيندي، جڏهن ته پاڪستان افغانستان ۾ مداخلت نه ڪري رهيو آهي ۽ نه ئي اهڙو ڪو ارادو آهي. هن چيو ته آمريڪن ڊپلوميسي خطي ۾ ناڪام ٿي چڪي آهي، پاڪستان کي پنهنجي قومي مفادن کي ترجيح ڏيڻ گهــُرجي. بچاءَ واري وزير چيو ته آپريشن ضرب عضب ۾ ڪو به فرق نه ڪيو وڃي، اها ڪارروائي سمورن دهشتگردن خلاف آهي. خواجا آصف چيو ته دهشتگرديءَ تي ڪنٽرول ڪرڻ لاءِ پاڪستان روس کان جديد هٿيار خريد ڪندو.

 

پاڙيسري ملڪن سان ويجهڙائي وارا لاڳاپا حڪومت جي اهم ترجيحي رهي آهي: نريندر مودي

نئين دهلي (م.ڊ) ڀارتي وزيراعظم نريندر مودي چيو آهي ته پاڙيسري ملڪن سان ويجها تعلق ان جي حڪومت جي اهم ترجيحي رهي آهي 26 کان 27 نومبر تائين جاري رهندڙ 18هين سارڪ سربراهي ڪانفرنس ۾ شرڪت لاءِ نيپال جي دوري جي موقعي تي نريندر مودي چيو ته پاڙيسري ملڪن سان ويجها تعلقاتن کي هٿي ڏيڻ جا خواهشمند آهيون ۽ هي ان جي حڪومت جي اهم ترجيحي آهي هن چيو ته ٻطرفو علائقائي بنيادن تي ڪيترن ئي ترقياتي منصوبن تي ڪنهن نتيجي تائين پهچڻ جي اميد آهيهن چيو ته چئن مهينن دوران نيپال جو ٻيو دورو نيپال سان منفرد ۽ خصوصي تعلقات جي عڪاسي ڪري ٿو وزيراعظم نريندر مودي باضابطه پروگرام ۾ وزيراعظم نوازشريف سان ملاقات جو ڪوئي ذڪر نه ڪيوآهي. جڏهن ته هو بنگلاديش جي وزيراعظم شيخ حسينه، افغانستان جي صدر اشرف غني، سريلنڪا جيصدر مهندرا راجا سان ملاقات ڪندو.

 

اتر وزيرستان ۾ ضرب عضب آپريشن، 20 دهشتگرد مارجي ويا

اُتر وزيرستان (مانيٽرنگ ڊيسڪ) اتر وزيرستان ۾ ضرب عضب آپريشن دوران جيٽ جهازن جي بمباري ۾ وڌيڪ 20 دهشتگرد مارجي ويا. آءِ ايس پي آر موجب پاڪ فوج جو دهشتگردن خلاف اتر وزيرستان جي مختلف علائقن ۾ ضرب عضب آپريشن ڪاميابيءَ سان جاري آهي. آپريشن دوران جيٽ جهازن جي بمباري ۾ وڌيڪ20 دهشتگرد مارجي ويا جڏهن ته دهشتگردن جا ڪيترائي ٿاڪ پڻ تباهه ٿي ويا.

 

غداري جا الزام سياست زده آهن، مونکان بدلو ورتو پيو وڃي، ڪاميابي حق ۽ انصاف جي ٿيندي: پرويز مشرف

ڪراچي (اسٽاف رپورٽر) آل پاڪستان مسلم ليگ جي اڳواڻ پرويز مشرف چيو آهي ته منهنجي خلاف غداري جا الزام سياسي آهن ۽ اها ڪارروائي بدلو وٺڻ لاءِ ڪئي پئي وئي، حق ۽ انصاف جي جيت ٿيندي، پاڪستان ۾ ڏکڻ جمهوريت نافذ نه ٿي سگهي، نظام کي اتان جي ماحول موجب ٺاهڻو پوندو، اسان کي جمهوري هجڻ گهرجي، هڪ ڊرون حملي جي اجازت ڏني هئي، منهنجي دور ۾ صرف 9 ڊرون حملا ٿيا هئا، ڀارت مخالف نه آهي، صرف پاڪستان جي مفاد ۾ يقين رکان ٿو، بي بي سي کي ڏنل انٽرويو ۾ هن چيو ته پاڪستان ۾ مغربي جمهوريت نافذ نٿي ڪري سگهجي ۽ ان نظام کي اتان جي ماحول موجب بڻائڻو پوندو. هن غداري جي سنگين ڪيس جي باري ۾ سوال تي چيو ته اهي الزام من گهڙت آهن ۽ اهو پوري طرح سياسي آهن. پرويز مشرف چيو ته بدلي جي ڪارروائي جاري آهي ۽ مونکي نشانو بڻايو پيو وڃي، پورو يقين آهي ته آخر حق ۽ انصاف جي جيت ٿيندي، هن چيو ته هڪ حملي جي اجازت ڏني هئي، هڪ دفعي مان چيو هو ته جڏهن ته منهنجي زماني تقريبن 9 ڊرون حملا ٿيا هئا، مان صرف هڪ دفعي جي ڳالهه ڪري رهيو آهيان ته وقت تمام گهٽ هو ۽ اسان کي هم دهشتگرد گروپ جا شاهد ڏيکاريا ويا هئا ته پوءِ اسان حملي جي اجازت ڏني هئي.

 

توهين وارو پروگرام: مير شڪيل الرحمان، شائسته لوڌي ۽ وينا ملڪ سميت ٻين کي 26، 26 سال قيد جو حڪم

گلگت (م.ڊ) دهشتگردي ٽوڙ عدالت توهين واري پروگرام نشر ڪرڻ تي نجي ٽي وي چينل جي مالڪ مير شڪيل الرحمان سميت 4 جوابدارن کي 26، 26 سال قيد ۽ 13، 13 لک روپيا ڏنڊ جي سزا ٻڌائي ڇڏي گلگت جي دهشتگردي ٽوڙ عدالت جي جج راجا شهباز گذريل مهينن کان ٻڌڻي هيٺ ڪيس جو فيصلو ٻڌائيندي قرار ڏنو آهي ته چينل جي مالڪ مير شڪيل الرحمان، پروگرام جي ميزبان شائسته لوڌي ۽ مهمان وينا ملڪ ۽ اسد خٽڪ توهين وارو پروگرام بڻائڻ ۾ ڏوهي قرار ڏنا ويا آهن عدالت چئن ئي جوابدارن کي 26، 26 سال قيد ۽ 13، 13 لک روپيا ڏنڊ جي سزا جو حڪم ڏيندي آءِ جي اسلام آباد، آءِ جي پنجاب ۽ آءِ جي سنڌ کي جوابدارن کي فوري طور گرفتار ڪرڻ جو حڪم ڏنو آهي، عدالت پنهنجي فيصلي ۾ وڌيڪ حڪم ڏنو ته نجي ٽي وي چينل جي مالڪ مير شڪيل الرحمان جو پاسپورٽ ۽ ملڪيت ضبط ڪئي وڃي جڏهن ته عدالت فيصلو ٻڌائيندي ڪيس حل ڪري ڇڏيو .

 

بينظير انڪم سپورٽ پروگرام جي چيئرمين انور بيگ عهدي تان استعفيٰ ڏئي ڇڏي

اسلام آباد (بيورو)  بينظير انڪم سپورٽ پروگرام جي چيئرمين انور بيگ عهدي تان استعيفيٰ ڏئي ڇڏي آهي، وزيراعظم نواز شريف سندس استعيفيٰ منظور ڪري ورتي آهي. بينظير انڪم سپورٽ پروگرام جي چيئرمين انور بيگ، نيپال روانگي کان اڳ وزيراعظم نواز شريف سان ملاقات ڪري استعيفيٰ پيش ڪئي. ذريعن موجب، انور بيگ اداري جي ڪارڪردگي مان مطئمن نه هئڻ ۽ پروگرام ۾ ٻن ميمبرن کي شامل ڪرڻ تي اعتراض بعد استيعفيٰ ڏني آهي. ذريعن جو چو آهي ته وزيراعظم نواز شريف، انور بيگ جي استعيفيٰ منظور ڪري ورتي آهي. واضح رهي ته انور بيگ کي هڪ سال اڳ نومبر ۾ بينظير انڪم سپورٽ پروگرام جو چيئرمين مقرر ڪيو ويو هو.