تازيون خبرون

Daily Archives: November 25, 2014

نيپرا بجلي جي قيمتن ۾ 47 پئسا في يونٽ گهٽ ڪرڻ جي منظوري ڏيئي ڇڏي

اسلام آباد (بيورو) نيشنل اليڪٽرڪ پاور ريگوليٽري اٿارٽي بجلي جي قيمت ۾ 47 پئسا في يونٽ گهٽ ڪرن جي منظوري ڏيئي ڇڏي قيمتن ۾ گهٽتائي جو اطلاق ڪراچي اليڪٽرڪ سپلاءِ ڪمپني ۽ لائيف لائين صارفين کان سواءِ سڄي ملڪ جي تقسيم ڪندڙ ڪمپنين تي ٿيندو. نيپرا بجلي جي قيمتن ۾ 47 پئسا في يونٽ گهٽ ڪرڻ متعلق سينٽرل پاور پرجيزنگ ايجنسي جي درخواست تي ٻڌڻي ڪئي. بجلي جي قيمت ۾ گهٽتائي آڪٽوبر جي مهيني فيول ايڊجسٽمينٽ جي مد ۾ ڏني ويئي آهي.

 

سکر ۾ ايڪتا جا رنگ وکري پيا، جوڳي جاڳو اتحاد پاران مرلين ۽ صوفياڻي راڳ جي محفل، جهمريون

سکر(بيورو رپورٽ) سکر ۾ ايڪتا جا رنگ وکري پيا، جوڳي جاڳو اتحاد پاران مرلين ۽ صوفياڻي راڳ جي محفل، جهمريون، جنم جنم تائين سنڌ سان ساٿ نڀائڻ جو وچن، 7  ڊسمبر ايڪتا واري اعلان کانپوءِ سنڌ جي ٻين شهرن جيان سکر ۾ به ايڪتا جون سرگرميون زور وٺي رهيون آهن، ان ڏس ۾  جوڳي جاڳو اتحاد  پاران سکر لڳ ڳوٺ تماچاڻيءَ ۾ مرلين ۽ صوفياڻي راڳ جي محفل رچائي وئي، جنهن ۾ ناليواري صوفي راڳين محمد علي فقير، قربان جوڳي،محمد يوسف ۽ ٻين سنڌ ڌرتيءَ ۽ صوفياڻا ڪلام ڳائي محفل مٿان وجد تاري ڪري ڇڏي، جڏهن ته مرليءَ جي ناليواري فنڪارن ممتاز فقير ۽ منٺار فقير جي سنگ مرليءَ جي سرن تي جيئي سنڌ جا راڳ آلاپيا، جڏهن ته سگهڙن ۽ شاعرن غلام شبير، محبوب فقير، عبدالمجيد ۽ ٻين پنهنجون نڪور ڪويتائون پيش ڪيون، ان موقعي تي اجرڪ اوڍيل، ٽوپي ۽ گيڙو ويس پاتل جوڳين جيئي سنڌ جا زوردار نعرا هنيا، ان موقعي تي اڳواڻن چيئرمين ساحل جوڳي، مجن جوڳي، محمد جمن ۽ ٻين چيو ته هر سال جيان اسان ايڪتا ڏهاڙي جو عيد کان وڌيڪ انتظار ڪندا آهيون ۽ اسان لاءِ اهو ڏڻ مقدس آهي، جوڳين کي هر حڪومت پاران تعليم، نوڪرين، صحت ۽ ٻين شعبن ۾ نظرانداز ڪيو ويو آهي، ان باوجود سنڌ جا اسان وارث آهيون ۽ سنڌ کي وڙهائڻ جي ڳالهه ڪندڙن کي اسان ٻه اڌ ڪري ڇڏينداسين، هنن چيو ته پنهنجي جنم ڀوميءَ سان جنم جنم تائين ساٿ نڀائينداسين.

 

ڪراچي ۾ پوليو رضاڪارن ڦڙا پيئارڻ واري مهم جو بائيڪاٽ ڪري ڇڏيو ڪري ڇڏيو

ڪراچي (اسٽاف رپورٽر) ڪراچيءَ جي مختلف علائقن ۾ رضاڪارن معاوضو نه ملڻ تي پوليو کان بچاءَ جا ڦــُڙا پيئارڻ واري مهم جو بائيڪاٽ ڪري ڇڏيو، جڏهن ته اورنگي ٽائون ۽ سائيٽ ۾ ڇڪتاڻ سبب مهم شروع نه ٿي سگهي. ڪراچي جي 86 يونين ڪائونسلز ۾ ٽن ڏينهن واري پوليو خلاف مهم شروع ٿي وئي آهي جنهندوران 5 لک 75 هزار ٻارن کي ڦــُڙا پيئاريا ويندا. مهم کي ڪامياب بڻائڻ لاءِ پوليس اهلڪار پوليو ٽيمن سان گڏ ڊيوٽي ڪري رهيا آهن. نارٿ ناظم آباد ۽ گلبرگ سميت شهر جي ڪيترن ئي علائقن ۾ پوليو ورڪرز معاوضو نه ملڻ تي مهم جو بائيڪاٽ ڪري ڇڏيو آهي. نصرت ڀٽو ڪالوني ۾ احتجاج ڪندي پوليو رضاڪارن جو چوڻ هو ته کين گذريل 4 مهينن کان معاوضو نه ڏنو ويو آهي. ليڊي هيلٿ ورڪرز شڪايت ڪئي ته کين پوليو مهم جا روزانو 250 رپيا ملندا آهن جيڪي گهٽ آهن ۽ معاوضو وڌائي 500 رپيا ڪيا وڃن. ٻئي طرف سائيٽ ۽ اورنگي ٽائون ۾ اي اين پي اڳواڻ ڊاڪٽر ضياءُ الدين جي قتل بعد پيدا ٿيل ڇڪتاڻ سبب پوليو مهم شروع نه ٿي سگهي.

 

دادو ويجهو ڪنواري ماءِ گناهه لڪائڻ لاءِ تازي ڄاول نياڻي کي روڊ تي اڇلائي ڇڏيو

دادو(ڊ.ر) دادو ويجهو ڪنواري ماءِ گناهه لڪائڻ لاءِ تازي ڄاول نياڻي کي روڊ تي اڇلائي ڇڏيو دادو ڳوٺ نبي بخش سولنگي ڀرسان روڊ تي نامعلوم ماڻهن وونئڻن جي فصل ۾ تازي ڄاول معموم نينگر ڇڏي فرار ٿي ويا نينگر جي ڪيهاٽن تي صبح سوير مزوري لاءِ دادو شهر طرف وڃي رهيو هيس، ته روڊ تان گذرندي نينگر جو رڙيون هيون، پورهيت علي اصغر سولنگي نينگر کي جنگلي جانورن ۽ ڪتن کان معصومنينگر کي بچائي پنهنجي ڳوٺ نبي بخش سولنگي ۾ پنهنجي گهر کڻي ويو پورهيت علي اصغر سولنگي ميڊيا کي ٻڌايو ته ڳاڙهي ڪپڙي ۾ تازي ڄاول نينگر هئي جنهن کي گهر کڻي آيو آهيان، مان مزوري ڪري پنهنجو پنهنجي گهرواري ۽ ٻن نياڻين جو پيٽ گذر ڪندو آهيان هٿ آيل نينگري کي به پنهنجي ٻن نياڻين جيان نياڻي سمجهي نپائيندس دادو ڀرسان زمين ۾ پيل معصوم نيگري جنهن کي نوجوان اصغر سولنگي کڻي پنهنجي گهر ۾ پرورش ڪري رهيو آهي هاڻي الله پاڪ کيس ٽين نياڻي ڏني آهي.

 

سري ديوي ۽ بوني ڪپور ٻيهر گڏ فلم ڪرڻ لاءِ تياريون شروع ڪري ڇڏيون

ممبئي (شوبز نيوز) اداڪاره سري ديوي ۽ فلم ساز بوني ڪپور ٻيهر گڏ فلم ڪرڻ لاءِ تياريون شروع ڪري ڇڏيون آهن، بوني ڪپور 2012ع ۾ ڪامياب فلم ”انگلش ونگلش“ ٺاهي جنهن جي هيروئن طور هن پنهنجي زال سري ديوي کي چونڊيو. ڄاڻايل فلم سري ديوي جي ڪامياب فلمي واپسي جو ثبوت آهي، بوني ڪپور پنهنجي زال جي پسند جي مضمون تي نئين فلم ٺاهڻ جون تياريون شروع ڪري ڇڏيون آهن، جنهن جي هيروئين هڪ ڀيرو ٻيهر سندس زال بڻجندي. ذريعن مطابق نئين فلم ۾ سري ديوي جو رول ظاهر نه ڪيو ويو آهي، فلم جي اسڪرپٽ تي ڪم شروع آهي، جنهن جي شوٽنگ ايندڙ سال ڪئي ويندي

 

ساجد حسن دراني اسٽيشن ڊائريڪٽر ريڊيو پاڪستان لاهور جون ذميواريون سڀنالي ورتيون

لاهور (شوبز نيوز)ريڊيو پاڪستان لاهور جي نئين اسٽيشن ڊائريڪٽر ساجد حسن دراني پنهنجي نئين عهدي جون ذميواريون سڀنالي ورتيون آهن، هن هڪ ملاقات ۾ ٻڌايو ته هو ريڊيو لاهور جي پروگرامن ۽ ملازمن يج بهتري لاءِ ڀرپور قدم کڻندو. ساجد حسن دراني رٽائرڊ ٿيل اسٽيشن ڊائريڪٽر سيد رضا ڪاظمي کي سندس ريڊيو لاءِ خدمتن تي خراج تحسين پيش ڪيو.

 

نفيس ۽ ڪومل جذبن جي شاعره پروين شاڪرجي 62 هين سالگره ملهائي وئي

حيدرآباد (شوبز نيوز) نفيس ۽ ڪومل جذبن جي شاعره پروين شاڪر جو 62 هون جنم ڏينهن سومر ڏينهن ملهايو ويو. رپورٽ مطابق پروين شاڪر 24 نومبر 1952ع تي ڪراچيءَ ۾ پيدا ٿي. پروين شاڪر شاعري جي منظرنامي تي جيڪي نقش چٽيا آهن اهي سالن تائين ميسارجي نه سگهندا. هوءَ پنهنجي شاعري ۾ پنهنجي مجموعي”ماهه تمام” جيان چمڪندڙ نظر اچي ٿي. پهرين شعري مجموعي “خوشبو” جي اشاعت کان پوءِ ئي سندس شمار پهرين صف جي شاعرن ۾ ٿيڻ لڳو، ان کان اڳ ڪنهن به شاعر عورتن جي جذبن ۽ احساسن کي ايڏي خوبصورتي ۽ بي باڪ انداز ۾ قلمبند نه ڪيو هو. پروين شاڪر شاعريءَ کي عبادت سمجهندي هئي. هن لاءِ شاعري ذاتي شهرت ۽ خوشنصيبي جو سبب نه هئي. پروين شاڪر جي شاعري خوشبو کان شروع ٿي “صد برگ” ۽ “خودڪلامي” کان ٿيندي “انڪار” تي ختم ٿي. نازڪ جذبن جي شاعره پروين شاڪر 26 ڊسمبر 1994ع تي صبح جو لکين مداحن کي سوڳوار ڪري موت کي ڳل لائي ڇڏيو، سندس خال صدين تائين ڀرجي نه سگهندو.

 

دپيڪا پڊوڪون فلم ”پيڪو“ لاءِ بنگالي زبان سکڻ شروع ڪري ڇڏي

ممبئي(شوبز نيوز) بالي ووڊ اداڪاره دپيڪا پڊوڪون فلم ”پيڪو“ لاءِ بنگالي زبان سکڻ شروع ڪري ڇڏي آهي. دپيڪا فلم ”هيپي نيو ايئر“ لاءِ مهاراشٽرين لهجو اختيار ڪرڻ لاءِ خاص تربيت حاصل ڪئي هئي ۽ نئين فلم ”پيڪو“لاءِ بنگالي زبان سکڻ شروع ٿي وئي آهي جنهن لاءِ ڊائريڪٽر شوجيت سرڪار خصوصي ورڪشاپس شروع ڪئي آهي. بنگالي سکڻ لاءِ ان کي مشهور اداڪاره موسمي چٽرجي جون خدمتون حاصل آهن. دپيڪا شوٽنگ دوران به ان کان مدد وٺي ٿي. دپيڪا چيو ته بنگالي هڪ نرم ۽ پياري زبان آهي. فلم پيڪو جي مرڪزي ڪاسٽ ۾ اميتاڀ بچن به شامل آهي جيڪو فلم ۾ دپيڪا جو پيءُ ٿيندو.

 

پاڪستان ۽ نيوزيلينڊ وچ ۾ ٽين ۽ آخري ڪرڪيٽ ٽيسٽ سڀاڻي کان شروع ٿيندي

شارجه(اسپورٽس نيوز) پاڪستان ۽ نيوزيلينڊ وچ ۾ ٽين ۽ آخري ڪرڪيٽ ٽيسٽ (سڀاڻي) کان شارجه ڪرڪيٽ اسٽيڊيم ۾ شروع ٿيندي. گرين ڪيپس کي ٽن ميچن جي سيريز ۾ 0-1 جي سرسي حاصل آهي. ابوظهبي ۾ کيڏيل سيريز جي پهرين ٽيسٽ ۾ پاڪستان 248 رنسن جي ڳري مارجن سان فتح حاصل ڪئي. جيڪا دبئي ۾ کيڏي وئي. ٻين ٽيسٽ دلچسپ مقابلي کانپوءِ ڊرا ٿي وئي. قومي ڪرڪيٽ ٽيم ٽين ٽيسٽ ميچ ۾ شرڪت لاءِ شارجه پهچي وئي آهي. ٽيسٽ سيريز کان پوءِ ٻنهي ٽيمن وچ ۾ 2 ٽي 20 ميچن تي ٻڌل سيريز جي پهرين ڊي اينڊ نائيٽ ٽي 20 ميچ 4 ڊسمبر تي دبئي انٽرنيشنل اسٽيڊيم ۾ پاڪستان وقت موجب رات 9 وڳي کيڏي ويندي. ٻي ٽي 20 ميچ 5 ڊسمبر تي دبئي ۾ رات 9 وڳي شروع ٿيندي. پنج ڊي اينڊ نائيٽ ون ڊي ميچن تي ٻڌل سيريز جي پهرين ون ڊي ميچ 8 ڊسمبر تي دبئي ۾ منجهند 4 وڳي شروع ٿيندي. ٻي ون ڊي 12 ڊسمبر تي منجهند 4 وڳي شارجه ۾، ٽين ون ڊي ميچ 14 ڊسمبر تي شارجه ۾ منجهند 4 وڳي، چوٿين ون ڊي 17 ڊسمبر تي ابوظهبي اسٽيڊيم ۾ منجهند جو 4 وڳي جڏهن ته پنجين ۽ آخري ون ڊي ميچ 19 ڊسمبر تي شروع ٿيندي.

 

سريلنڪا ۽ انگلينڊ وچ ۾ ون ڊي سيريز جي پهرين ميچ سڀاڻي کيڏي ويندي

ڪولمبو(اسپورٽس نيوز) سريلنڪا ۽ انگلينڊ وچ ۾ 7 ون ڊي ميچن جي سيريز جي پهرين ميچ (سڀاڻي) اربع تي آرهر سيماداسا اسٽيڊيم ڪولمبو ۾ کيڏي ويندي. ٻنهي ٽيمن جي ڪپتانن ون ڊي سيريز ۾ ڪاميابي لاءِ بيان ڏنا آهن ۽ ان اعتبار سان توقع ڪئي پئي وڃي ته ٻنهي ٽيمن وچ ۾ ون ڊي سيريز سخت هوندي. واضح رهي ته انگلينڊ ۽ سريلنڪا وچ ۾ 7 ون ڊي ميچن تي ٻڌل سيريز جي پهرين ميچ 26 نومبر تي آر ڀريما داسا اسٽيڊيم ڪولمبو ۾ کيڏي ويندي. ٻي ون ڊي ميچ 29 نومبر تي ڪولمبو، ٽين 3 ڊسمبر تي همبنوٿا، چوٿين 7 ڊسمبر تي ڪولمبو، پنجيب ۽ ڇهين ون ڊي ترتيوار 10 ۽ 13 ڊسمبر پالي ڪيلي جڏهن ته ستين ۽ آخري ون ڊي 16 ڊسمبر تي ڪولمبو ۾ کيڏي ويندي