تازيون خبرون

Daily Archives: November 25, 2014

ڊي جي آءِ آيس آءِ جي وزير اعظم سان ملاقات، ملڪي صورتحال تي ڳالهيون

اسلام آباد (بيورو) وزيراعظم نواز شريف چيو آهي ته پاڪستان جي دفاع ۾ آءِ ايس آءِ پٺي جي ڪنڊي جو ڪردار ادا ڪري رهي آهي، پاڪستان جي دفاعي لائين تي فخر آهي، آءِ ايس آءِ دفاعي لائين جو پهريون گهيرو آهي، آءِ ايس آءِ جي جوانن جي پاڪستان جي دفاع لاءِ ڏنل قربانيون قابل واکاڻ آهن. هو آءِ ايس آءِ ڊي جي ليفٽيننٽ جنرل رضوان اختر سان ملاقات ۾ ڳالهائي رهيو هو. سومر ڏينهن آءِ ايس آءِ ڊي جي ليفٽيننٽ جنرل رضوان اختر وزيراعظم نواز شريف سان ملاقات ڪئي، جنهن ۾ آپريشن ضرب عضب سميت آءِ ڊي پيز جي حوالي سان ويچاريو ويو. خانگي ٽي وي موجب وزيراعظم هائوس ۾ ٿيل ان ملاقات ۾ ملڪي سلامتي جي حوالي سان به تفصيلي ڳالهايو ويو، ملڪي سيڪيورٽي صورتحال تي ويچاريو ويو. هن آءِ ايس آءِ جي پيشيوراڻا معاملن، آپريشن ضرب عضب، آپريشن خيبر ون، ڪنٽرول لائين ۽ ورڪنگ بائونڊري سميت ملڪ کي پيش چئلينجن،پاڪ افغان بارڊر جي صورتحال تي بريفنگ ڏني. آءِ ايس آءِ ڊي جي ڳجهي ادارن جي ڪاميابين جي حوالي سان وزيراعظم کي آگاهه ڪيو جنهن تي وزيراعظم نواز شريف آءِ ايس آءِ جي ڪردار کي ساراهيندي چيو ته پاڪستان جي دفاع ۾ آءِ ايس آءِ پٺي جي هڏي جو ڪردار ادا ڪري رهي آهي، پاڪستان جي دفاعي لائين تي فخر آهي، آءِ ايس آءِ دفاعي لائين جو پهريون گهيرو آهي. آءِ ايس آءِ جي جوانن جون پاڪستان جي دفاع لاءِ ڏنل قربانيون قابل واکاڻ آهن.

 

سنڌ جي وڏي وزير جو وزيراعظم کي خط، وفاقي بيوروڪريسي ۾ ڪوٽا تحت مقررين جو مطالبو

ڪراچي (اسٽاف رپورٽر) وفاقي ڪاموراشاهيءَ ۾ سنڌ جي نمائندگي اٽي ۾ لوڻ برابر آهي، وڏي وزير سيد قائم علي شاهه وزيراعظم نواز شريف کي خط لکي وفاقي بيوروڪريسيءَ ۾ سنڌ کي آئين ۾ مقرر ڪيل ڪوٽا ۽ آباديءَ سان حساب سان جائز حق ڏيڻ جي گهــُر ڪري ڇڏي آهي. وڏي وزير سيد قائم علي شاهه وزيراعظم نواز شريف کي خط لکي شڪايت ڪئي آهي ته وفاق ۾ سنڌ جي نمائندگي نه هئڻ برابر آهي. وڏي وزير جو چوڻ آهي ته وفاق ۾ وفاقي ڪامورا شاهي ۾ سنڌ کي آئين ۾ مقرر ڪيل ڪوٽا ۽ آبادي تحت حق ڏنا وڃن. وڏي وزير اهو به مطالبو ڪيو آهي ته سنڌ صوبي جي اهل آفيسرن جي وفاق ۾ مقرري نه روڪي وڃي، سنڌ کي وفاقي سيڪريٽري ۽ چيف سيڪريٽري وارين پوسٽن ۾ به حق ڏنا وڃن. وڏي وزير سيد قائم علي شاهه خط ۾ وڌيڪ چيو آهي ته سنڌ جي ڪوٽا تي عمل نه ٿيڻ ڪري کين مايوسي ٿي آهي. واضح رهي ته وفاق جي مختلف ادارن ۾ سنڌ جي ڪوٽا نظرانداز ٿيڻ سبب هزارين عهدن تي ٻين صوبن جو ڊوميسائيل رکندڙ ماڻهو ڀرتي ٿيل آهن.

 

ملڪ ۾ جھموريت کي هر گز پٽڙي تان لهڻ نه ڏنو ويندو: قائم علي شاهه

ٺٽو (ڊ ر)  وزير اعليٰ سنڌ سيد قائم علي شاه چيو آهي ته ملڪ ۾ جھموريت کي هر گز پٽڙي تان لهڻنه ڏنو ويندو ڇاڪاڻ ته پيپلز پارٽي ۽ پ پ پ جي قيادت جھموريت جي بالادستي لاءِ بيمثال قربانيون ڏنيون آهن. هن چيو ته 30 نومبر تي پيپلز پارٽي لاهور ۾ يوم تاسيس جي موقعي تي ڀرپور جلسو ڪري رهي آهي جنهن ۾ 18 آڪٽوبر تي ٿيل ڪراچي واري جلسي وانگر عوام، پ پ جا ڪارڪن ۽ جيالا ڀرپور شرڪت ڪندا. هن چيو ته پاڪستان پيپلز پارٽي جي چيئرمين بلاول ڀٽو زرداري جون هدايتون آهن ته 30 نومبر تي يوم تاسيس جي موقعي تي لاهور ۾ 18 آڪٽوبر وانگر تاريخي جلسو ڪيو وڃي ان حوالي سان مختلف ضلعن ۾ پارٽي ڪنوينشن ۽ گڏجاڻيون جاري آهن. وزير اعليٰ سنڌ عمران خان جي 30 نومبر  تي اسلام آباد ۾ ٿيندڙ جلسي جي حوالي سان چيو ته 30 نومبر تي ٿيندڙ جلسي ۾ سندس پارٽي جي مرضي آهي عمران خان کي جيڪو مسئلو پاڻ سمجھ ۾ اچي ٿو اهو ان لاءِ ۽ ان جي پارٽي جي لاءِ صحيح آهي پر اسان سمجھون ٿا ته اهو آئين جي مطابق اهم ناهي. اهڙين ڳالهين جو اظهار هن اڄ 30 نومبر تي لاهور ۾  يوم تاسيس جي موقعي تي پيپلز پارٽي پاران جلسو ڪرڻ جي حوالي سان ضلعي ٺٽي ۽ سجاول جي پ پ پ قيادت ۽ ڪارڪنن سان ڪيل گڏجاڻيءَ کان اڳ پريس ڪانفرنس دوران ڪيو. ان موقعي تي وزير اعليٰ سنڌ سيد قائم علي شاه ميڊيا سان ڳالهائيندي وڌيڪ چيو ته سنڌ حڪومت عمران خان کي لاڙڪاڻي ۾ جلسي ڪرڻ جي لاءِ فول پروف سيڪيورٽي مهيا ڪئي ان حوالي سان هڪ هفتو اڳ آءِ جي سنڌ پوليس ۽ ٻين لاڳاپيل عملدارن کي جلسي جي سيڪيورٽي جو پابند بڻايو ويو هو. هن چيو ته عمران خان جو لاڙڪاڻي واري جلسو نه پر هڪ ڪارنر گڏجاڻي هئي. وزير اعليٰ سنڌ چيو ته پ پ پ ماضي ۾ لاهور ۾ شهيد ذوالفقار علي ڀٽو ۽ شهيد محترمه بينظير ڀٽو به تاريخي جلسه ڪيا هئا جن ۾ لکن جي تعداد ۾ ماڻهن شرڪت ڪئي هئي. ان کان علاوه گجرانواله ۾ به ماضي ۾ وڏا جلسا ڪيا ويا. وزير اعليٰ چيو ته محترمه شهيد بينظير ڀٽو پاران 18 آڪٽوبر 2007 تي پڻ هڪ عظيم الشان جلسو ڪيو ويو جنهن ۾ ڪراچي ايئرپورٽ کان ايندي ماڻهن جي حجوم ۾ محترمه کي 14 ڪلاڪ لڳي ويا هئا. ان کان علاوه 18 آڪٽوبر 2014 تي پ پ پ جي چيئرمين بلاول ڀٽو زرداري پاران ڪيل هڪ عظيم الشان جلسو به دنيا ڏٺو جنهن ۾ عوامي سمنڊ ڏسڻ وٽان هو ۽ ان ۾ 30 لک کان وڌيڪ ماڻهن ملڪ جي ڪنڊ ڪڙڇ کان علاوه ٻاهرين ملڪن کان اچي ڪري ماڻهن شرڪت ڪئي.  هن صحافين سان ڳالهائيندي وڌيڪ چيو ته بلاول ڀٽو زرداري پاران 18 آڪٽوبر جي جلسي ۾ خطاب ڪندي چيو هو ته ٻيو جلسو 30 نومبر يوم تاسيس لاهور ۾ ڀرپور نموني سان ملهايو ويندو انهيءَ حوالي سان هر ضلعي جي پ پ پ جي قيادت سان گڏجاڻين ۽ ڪنوينشن جي پڻ هدايت ڪئي اٿس. بعد ۾ وزير اعليٰ سنڌ سيد قائم علي شاه پاران جيمخانه مڪلي ۾ ٺٽي ۽ سجاول ضلعن جي چونڊيل نمائندن، ضلعي پ پ پ قيادت، ڪارڪنن ۽ معززين سان 30 نومبر لاهور ۾ يوم تاسيس واري جلسي بابت ڪوٺايل ڪنوينشن ڪري سندن مسئلا ۽ شڪايتون ٻڌيون ۽ مختلف ماڻهن کان نوڪرين ۽ ٻين مسئلن تي پڻ درخواستون وصول ڪيون. ان موقعي تي وزير اعليٰ سنڌ ڪنوينشن کي خطاب ڪندي چيو ته ضلعي ٺٽي ۽ سجاول جي عوام پاران 18 آڪٽوبر 2014 تي چيئرمين بلاول ڀٽو زرداري جي سڏ تي ڪراچي ۾ تاريخي جلسي ۾ ڀرپور شرڪت ڪري پيپلز پارٽي ۽ ان جي قيادت جو ساٿ ڏنو جيڪو قابل تعريف آهي ۽ 30 نومبر لاهور ۾ ٿيندڙ يوم تاسيس واري جلسي ۾ شرڪت لاءِ پڻ هتان جي ماڻهن ۾ تمام گھڻو جوش ۽ جذبو ڏسي رهيو آهيان. هن چيو ته لارڪاڻي ۾ عمران خان جي جلسي طرف اشارو ڪندي چيو ته اهو جلسو نه پر جلسڙي هئي ۽ هُن پنهنجن دوستن کي چيو ته توهان ڪٿي مون کي آندو آهي هتي ته منهنجي جاءِ ئي نه آهي. هن چيو ته سنڌ ۾ جڳهه آهي ته صرف شهيد ذوالفقار علي ڀٽو، شهيد بينظير ڀٽو آهي ۽ هاڻي اسان جي قائد پ پ پ جي چيئرمين بلاول ڀٽو زرداري جي آهي. هن چيو ته جيتري قدر ٺٽي ۽ سجاول ضلعن جي ماڻهن جا مسئلا آهن انهن کي سنڌ حڪومت هر حال ۾ حل ڪرڻ جي ڪوشش ڪري رهي آهي، اسان عوام جي مسئلي کي پنهنجو مسئلو سمجھون ٿا. هتان جي ماڻهن مختلف شڪايتون ڪيون آهن پر انهن مان هڪ شڪايت سرڪاري زمينن تي قبضي جي به آهي، جيڪڏهن سرڪاري زمينن تي قبضو آهي ته اها تمام سرڪاري زرعي زمين هارين جي آهي ڇوته پُراڻي زماني کان اهو نعرو آهي ته جو کيڙي سو کائي ان ڪري اها زمين هتي جي غريب هارين ۾ ورهائي ويندي. هن چيو ته سجاول ضلعي جي تعلقي جاتي ۾ جڏهن آيس ته ذوالفقار علي ڀٽي جي زماني ۾ پڻ هارين کي زمين ڏني ويئي هئي ان ۾ مون کي شهيد ذوالفقار علي ڀٽو لينڊ ريفارمز جو وزير جو قلمدان ڏنو هو. هن چيو ته لاڙڪاڻي ۾ شهيد ذوالفقار علي ڀٽو پنهنجي تقرير ۾ چيو هو ته آئون ٻئي ٻاهون اوهان تي رکان ٿو ۽ منهنجي جيڪا 6 هزار ايڪڙ زمين آهي اها سڀئي غريب هارين ۾ تقسيم ڪيان ٿو ۽ هن اها زمين کين ڏني ۽ ان کان پوءِ اسان وڏن زميندارن کان جيڪي اسان کان رسي ناراض ٿيا انهن کان زمين ورتي ۽ هارين ۾ تقسيم ڪئي ان کان علاوه هارين ۾ ٽريڪٽر به ورهايا ويا هئا جنهن تي جنرل ضياءِ تمام گھڻو گند ڪيو ۽ وڙهيو به. هن شهيد ملت ۽ اسان جي ڪارڪنن کي تخت دار تائين پهچايو پر پوءِ به پ پ ڪارڪن پوئتي نه هٽيا ۽ ڀت وانگر پ پ سان گڏ هڪ ئي جاءِ تي بيٺا رهيا. هن ڊپٽي ڪمشنر ٺٽو ۽ ڊپٽي ڪمشنر سجاول کي هدايت ڪئي ته ٺٽي ۽ سجاول ۾ جيڪا به سرڪاري زرعي زمين آهي ان بابت آگاه ڪن ۽ جيڪڏهن ڪابه سرڪاري زمين ڪنهن جي قبضي ۾ آهي ته ان باري ۾ پڻ ٻڌائين ته جئين ان تان قبضو هٽرائي هتان جي غريب ۽ مسڪين هارين ۾ ورهائينداسين. هن چيو ته هڪ گڏجاڻي ۾ چيف سيڪريٽري پاران ڪراچي ۾ اربين روپين جي سرڪاري زمين تي قبضن بابت آگاه ڪيو ۽ چيو ته اينٽي انڪروچمينٽ فورس کان انهن زمينن تان قبضو هٽرايو جنهن تي مون هن کي چيو ته بلڪل ڪراچي ۾ سرڪاري زمينن تان قبضو هٽرايو ويندو ساڳئي ريت سموري سنڌ ۾ به سرڪاري زمينن تي قبضا آهن ان جو اعتراف ڪيان ٿو. هن چيو ته اهي قبضا مشرف پاران لوڪل گورنمينٽ جو نئون قانون ٺاهيو جنهن تحت ناظمن پاران مخلتف سرڪاري زمينن جا قبضا ڏنا ويا هئا ۽ هاڻي 2013 ۾ پ پ پ حڪومت پاران نئون قانون جوڙي انهن زمينن تان قبضا هٽرايا پيا وڃن. هن چيو ته سرڪاري زرعي زمين ورهائڻ واري سلسلو ٻئي ڪنهن به صوبي ۾ ناهي اهو صرف پيپلز پارٽي جي سنڌ حڪومت جو ڪارنامو آهي، اسان جي حڪومت هارين سان گڏ غريب هارياڻين کي به زرعي زمين ڏني ۽ عورتن کي پنهنجي پيرن تي بيهاريو آهي. هن چيو ته پ پ پ ڪو چيئرمين آصف علي زرداري جي هدايتن تي سنڌ حڪومت گذريل دور ۾ بينظير انڪم سپورٽ پروگرام تحت تقريبن 70 ارب روپيه غريب عورتن ۾ تقسيم ڪيا. هن چيو ته ٺٽي ۽ سجاول ضلعن جو ٻيون مسئلو نوجوانن ۾ بيروزگاري جو آهي ان حوالي سان نوجوانن کان درخواستون وصول ڪيون آهن ۽ بيروزگاري کي ختم ڪرڻ لاءِ به سنڌ حڪومت پڙهيل لکيل نوجوانن کي جلد روزگار مهيا ڪندي. هن چيو ته اسان ٿر ۾ ڏڪار ۽ ٻارن ۾ مختلف بيمارين جي حوالي سان اُتي جي اسپتالن ۾ ڊاڪٽرن جي کوٽ هئي جنهن جي مد نظر اسان 450 کان وڌيڪ ڊاڪٽر کي مقرر ڪيو آهي ۽ وڌيڪ 1100 ٻين ڊاڪٽرن کي ڀرتي ڪنداسين. هن چيو ته جن نوجوانن ۽ دوستن کي روزگار نه مليو آهي ان حوالي سان هتان جي چونڊيل نمائندن ۽ پ پ قيادت کان لسٽون وٺنداسين ۽ ان ۾ غريب ۽ پڙهيل لکيل نوجوانن کي روزگار ڏينداسين. هن چيو ته جڏهن شهيد ذوالفقار علي ڀٽو سنڌ ۾ اسٽيل مل پئي ٺهرائي ته ڪجھ ماڻهن کيس چيو ته مل نه ٺهرائي صوبو نه هلي سگھندو ان تي شهيد ذوالفقار علي ڀٽو چيو ته اسٽيل مل ته ٺهندي پر پورٽ قاسم به ٺهندو ۽ سنڌ جي ماڻهن کي روزگار به ملندو ۽ اسان به ان شهيد ڀٽو جا پوئلڳ آهيون ۽ عوام جي خدمت ڪندا رهنداسين. وزير اعليٰ سنڌ وڌيڪ چيو ته دولهه دريا خان پُل جي حالت خراب آهي انهيءِ تي ڪم هلي رهيو آهي ۽ جلد ان جو ڪم مڪمل ڪيو وينديو ته جيئن ڳري ٽريفڪ جا بحال ٿي سگھي. ان موقعي تي هن ٺٽي ۽ سجاول ضلعن جي انتظاميه کي هدايت ڪئي ته هو وٽن ايندڙ پ پ جي عهديدارن ۽ ڪارڪنن کي وڏو وزير سمجھي سندن مسئلا ٻڌن ۽ انهن جو ازالو ڪن. وزير اعليٰ ٺٽي ۽ سجاول ضلعن جي ترقياتي ڪمن جي حوالي سان ڳالهائيندي چيو ته پ پ پ جي چيئرمين بلاول ڀٽو زرداري سنڌ جي ترقياتي رٿائن کي پاڻ ڏسندو. هن اهو پڻ اعلان ڪيو ته ترڪي پاران تعمير ڪيل گھر جلد 2010 جي ٻوڏ متاثرن ۾ تقسيم ڪيا ويندا ۽ ان کان علاوه هن سنڌ حڪومت پاران ٻوڏ متاثرن لاءِ وڌيڪ ٻه هزار گھر تعمير ڪرڻ جو پڻ اعلان ڪيو. ان موقعي تي پ پ ٺٽو ۽ سجاول جو صدر ارباب وزير ميمڻ، اڳوڻو صوبائي وزير صادق علي ميمڻ، ايم پي اي محمد علي ملڪاڻي، غلام قادر پليجو، حميرا علواڻي، سابق ايم اين اي بابو غلام حسين ميمڻ، ڊپٽي ڪمشنر ٺٽو آغا شاهنواز بابر، ڊپٽي ڪمشنر سجاول شوڪت حسين جوکيو، ايس ايس پي ٺٽو فدا حسين مستوئي، ايس ايس پي سجاول جان محمد برهماڻي کان علاوه پ پ ضلعي ٺٽي ۽ سجاول جا اڳواڻ، ڪارڪن وڏي انگ ۾ موجود هئا.

 

عمران خان منهنجي سوالن جا جواب ڏئي، بازيگر واري زبان استعمال نه ڪري: پرويز رشيد

اسلام آباد (بيورو) وفاقي سڌسماءَ واري وزير سينيٽر پرويز رشيد چيو ته عمران خان منهنجي سوالن جي جواب ۾ بازيگر واري زبان استعمال ڪرڻ کان پاسو ڪري پنهنجي هڪ بيان ۾ سينيٽر پرويز رشيد چيو ته وقت اچي ويو آهي ته عمران خان کي اصل حقيقت کي ٻڌڻ لاءِ جرئت جو مظاهرو ڪندي تيار ٿيڻ گهرجي هن چيو ته عمران خان جي ڪوڙ جي فئڪٽري گذريل 8 سالن کاڪم ڪري رهي آهي پر ساڳين 8 ڏينهن لاءِ ان کي سچ ۽ حقيقت جو مقابلو ڪرڻو پوندو. هن عمران خان کي مشورو ڏنو ته هو منهنجي سوالن جي جواب ۾ بازيگر واري زبان استعمال ڪرڻ کان پرهيز ڪري.

 

سپريم ڪورٽ پاران جسٽس انور ظهير جمالي جون خدمتون واپس وٺڻ جو فيصلو

اسلام آباد(بيورو) سپريم ڪروٽ جسٽس انور ظهير جمالي جون خدمتون واپس وٺڻ جو فيصلو ڪري ورتو آهي سپريم ڪورٽ پاران جاري ڪيل هڪ اعلامئي مطابق 5 ڊسمبر کان جسٽس انور ظهير جمالي جون خمدتون واپس ورتيون وينديون اليڪشن ڪميشن کي ان باري ۾ آگاهه ڪيو ويو آهي ياد رهي ته سپريم ڪورٽپاران مستقل چيف اليڪشن ڪمشنر جي مقرري لاءِ ڏنل ڊيڊ لائن اڄ مڪمل ٿي رهي آهي ۽ مستقل چيف اليڪشن ڪمشنر جي مقرري اڃان تائين عمل ۾ نه اچي سگهي آهي.

 

سپريم ڪورٽ پاران چيف اليڪشن ڪمشنر جي مقرري لاءِ وڌيڪ مهلت ڏيڻ کان انڪار , حڪومت کي هڪ ڪلاڪ به وڌيڪ نه ڏنو ويندو: سپريم ڪورٽ

اسلام آباد (بيورو) سپريم ڪورٽ چيف اليڪشن ڪمشنر جي مقرري لاءِ وڌيڪ مهلت ڏيڻ کان انڪار ڪري ڇڏيو، جسٽس گلزار چيو آهي ته حڪومت کي هڪ ڪلاڪ به وڌيڪ نه ڏنو ويندو، اپوزيشن ليڊر ايندو ته وري وزيراعظم پرڏيهه هليو ويندو، وزيراعظم ۽ اپوزيشن ليڊر کي نوٽيس جاري ڪيو ويندو. سپريم ڪورٽ ۾ چيف جسٽس ناصرالملڪ جي سربراهي ۾ 3 رڪني بئنچ چيف اليڪشن ڪمشنر جي مقرري بابت ڪيس جي ٻڌڻي ڪئي، اٽارني جنرل ۽ ٻيا عدالت ۾ پيش ٿيا. اپوزيشن ليڊر ملڪ کان ٻاهر آهي، هڪ پارٽي اعتراض ڪيو اي جي اپوزيشن ليڊر ايندو ته وزيراعظم هليو ويندو، ڪوششن جو رڪارڊ پيش ڪيو وڃي، سپريم ڪورٽ طرفان چيف اليڪشن ڪمشنر جي مقرري لاءِ ڏنل ٻي ڊيڊ لائين به اڄ ختم ٿي ويندي، چيف اليڪشن ڪمشنر مقرر نه ٿيو، حڪومت طرفان عدالت کان وڌيڪ مهلت گھرڻ جو امڪان ظاهر ڪيو پيو وڃي. سپريم ڪورٽ جي حڪومت کي چيف اليڪشن ڪمشنر جي مقرري لاءِ ڏنل ڊيڊ لائين هڪ دفعو ٻيهر ختم ٿي وئي آهي پر حڪومت چيف اليڪشن ڪمشنر مقرر ناهي ڪري سگهي. واضع رهي ته حڪومت ۽ مخالف ڌر چيف اليڪشن ڪمشنر جي لاءِ جسٽس ر راڻا ڀڳوان داس ۽ جسٽس تصدق حسين جيلاني جي نالن تي اتفاق ڪيو هيو پر انهن ٻنهي شخصيتن عهدو قبول ڪرڻ کان معذرت ڪري ڇڏي هئي. حڪومت ۽ مخالف ڌر جا سربراهه چيف اليڪشن ڪمشنر جي لاءِ نئين نالي تي غور ڪري رهيا آهن پر اڃان تائين اهو سامهون ناهي آندو ويو. ذريعن جو چوڻ آهي ته حڪومت چيف اليڪشن ڪمشنر جي مقرري لاءِ سپريم ڪورٽ کي اڄ وڌيڪ مهلت ڏيڻ لاءِ درخواست ڪندي ۽ موقف اختيار ڪندي ته اپوزيشن ليڊر جي ٻاهرين ملڪ هجڻ سبب مشاورت ناهي ٿي سگهي ان ڪري ڪجهه ڏينهن وڌيڪ مهلت ڏني وڃي. چيف جسٽس ناصرالملڪ جي سربراهي ۾ 3 رڪني بئنچ چيف اليڪشن ڪمشنر مقرري ڪيس جي ٻڌڻي به ٿوري دير ۾ ڪري رهي آهي.

 

ڏڪاريل ڏيهه ٿر تي موت جو قبضو برقرار، وڌيڪ 4 ٻار فوت

ٿرپارڪر (نمائندو) ڏڪاريل ڏيهه ٿر تي موت جو قبضو برقرار آهي، گذريل ڏينهن وڌيڪ 4 معصوم ٻارڙن کان حياتيون کسجي ويون،جنهن بعد 56 ڏينهن دوران فوتي ٻارڙن جو انگ وڌي هڪ سئو 41 ٿي ويو آهي. مٺيءَ جي سول اسپتال ۾ 15 ڏينهن جو معشوق علي علاج جي بهتر سهولت نه ملڻ ڪري فوت ٿي ويو. ڇاڇري جي ڳوٺ ڪڪراريو ۾ خوراڪ جي کوٽ جو شڪار 18 مهينن جي ٻار راشد علي پساهه پورا ڪيا. مٺي مان ريفر ڪيل 8 ڏينهن جو ٻارڙو راشد علي بجير حيدرآباد ۾ فوت ٿي ويو. سنڌ سرڪار هر نئين ڏينهن ٿر ۾ ڏڪار متاثرن کي سموريون سهولتون فراهم ڪرڻ جون دعوائون ته ڪري رهي آهي پر روزانو مرندڙ معصوم ٻارڙا حڪومت جي اهڙين دعوائن کي ڪوڙو ثابت ڪري رهيا آهن.

 

بلاول ڀٽو ٽنڊو محمد خان ۾ هندن جي مندر سڙڻ جو نوٽيس ورتو، تعمير ڪرائڻ جو حڪم

حيدرآباد (بيورو) پاڪستان پيپلزپارٽي جي چيئرمين بلاول ڀٽو زرداري ضلعي ٽنڊو محمد خان ۾ هڪ مندر جي سڙڻ جي واقعي جو نوٽيس وٺندي ٽنڊو محمد خان جي ڊپٽي ڪمشنر آصف علي ميمڻ کي هدايت ڪئي آهي ته متاثر مندر جي جاءِ تي هڪ نئون مندر تعمير ڪيو وڃي جڏهن ته يو سي غلام شاهه باگراڻيجي ڳوٺ گهرام وساڻ، يو سي مويا جي ڳوٺ ڪرمڻ داس ۽ يو سي سعيد متو جي ڳوٺ مير گل حسن ٽالپر ۾ نوان مندر تعمير ڪرايا وڃن. هن ڊپٽي ڪمشنر آصف ميمڻ کي هدايت ڪئي ته اقليتن جي عبادگاهن جي تحفظ ۽ حفاظت کي يقيني بڻائي وڃي ڇاڪاڻ ته اهي به هن ملڪ جا آزاد شهري آهن. هن چيو ته پاڪستان پيپلزپارٽي جي حڪومت سڀني شهرين کي بنا فرق، رنگ ۽ نسل جي خدمت ڪرڻ ۽ تحفظ فراهم ڪرڻ ۾ پختو يقين رکي ٿي ۽ ان ڳالهه تي ڪنهن به قسم جو سمجهو تو هرگز نه ڪيو ويندو ۽ سڀني کي مڪمل تحفظ فراهم ڪيو ويندو.

 

سنڌ جي سينيئر سياستدانن پاران مسئلن جي حل لاءِ هڪ پليٽفارم تان جدوجهد ڪرڻ جو فيصلو

ڪراچي (اسٽاف رپورٽر) سنڌ جي اڳوڻن ٽن وڏن وزيرن ۽ سينيئر سياستدانن پاران سنڌ جي مسئلن جي حل لاءِ گڏ ٿي هڪ پليٽفارم تان جدوجهد ڪرڻ جو فيصلو ڪيو آهي، اتحاد سنڌ سطح تي هجي يا ملڪ گير هجي ان تي اتفاق نه سگهيو، ملڪ ۾ انارڪي، مهانگائي، غربت، ڪرپيشن ۽ بيڊگورنينس جو دور آهي، اسان ڪنهن جي به خلاف نه آهيون ملڪ جي بقا ۽ سلامتي لاءِ گڏ ٿيا آهيون، اهڙن خيالن جو اظهار سنڌ جي اڳوڻن وڏن وزيرن ۽ مسلم ليگ ن جي ناراض اڳواڻ سيد غوث علي شاهه، لياقت علي جتوئي ، ڊاڪٽر ارباب غلام رحيم، اڳوڻي اسپيڪر قومي اسيمبلي الاهي بخش سومرو، مسلم ليگ فنڪشنل سنڌ جي سربراهه ۽ وفاقي وزير پير صدرالدين شاهه راشدي، ظفر شاهه ، ڪامران ٽيسوري ۽ ٻين ڊاڪٽر ارباب غلام رحيم جي رهائشگاهه تي منعقد اجلاس کانپوءِ ميڊيا سان ڳالهه ٻولهه ڪندي ڪيو، ڊاڪٽر ارباب غلام رحيم چيو ته اڄوڪي اجلاس جو بنيادي مقصد سنڌ جي مسئلن تي ويهي ڳالهائڻ هو ۽ اسان ان ڏس  ۾تفصيلي ڳالهيون ڪيون آهن ۽ هڪ اتحاد به جوڙي رهيا آهيون پر سنڌ جي اڳوڻي وڏي وزير ممتاز ڀٽو جي غيرموجودگي سبب اڃا اعلان نه ڪيو آهي، ارباب غلام رحيم چيوته ٿر ۾ جيڪا ترقي ٿي اها منهنجي ايامڪاري ۾ ٿي منهنجي وقت ۾ ٿيل ڪم خود شاهدي ڏئي ٿي. هڪ سال اڳ وڏي وزير اتي ويو ته وزير اعظم جي موجودگي ۾ چيائين ته هتي رستا نه آهن، ۽ هاڻ چوي ٿو ته موٽروي بڻيل آهي، ڇا اهو سڀ ڪجهه هڪ سال ۾ ٿيو، هن جو چوڻ هو ته ٿر ۾ رليف پهچائڻ صوبائي حڪومت جي ذميواري آهي، وزيراعظم جنهن امدادي پيڪيج جو اعلان ڪيو هو ان رقم جو وڏي حصو ملي چڪو آهي ۽ ٿر ۾ ماڻهن کي امداد به ملي رهي آهي، ٿر ۾ امن امان جي صورتحال صوبي جي ٻين علائقن کان بهتر آهي ، هڪ سوال جي جواب ۾ هن چيو ته اسيمبلين ۾ ايندڙن سان ڇا ٿ ٿئي، ڇا ميڊيا نه ڏٺو؟ اسيمبلي پاس بروهي ڌاڙيل کي به جاري ڪئي وڃي ٿي، مناسب وقت  ۾ايوان ۾ به ايندس ، ايم ڪيو ايم ۽ ڌار صوبي بابت هڪ سوال جي جواب ۾ هن چيو ته اسان ايم ڪو ايم وارن کي چونداسين تي تڪرار ڳالهه نه ڪيو، سنڌ جي عوام کي ورهائڻ بدران سنڌ جي اهم اشوز تي گڏجي ويهي آواز اٿارجي، هن چيو ته اسان ايم ڪيو ايم سان ڳالهيون ڪندا آهيون ته سڀ اعتراض ڪندا آهن پر پ پ اتحاد ۾ گڏ هوندي آهي ته ماڻهو خاموش هوندا آهن ان وقت اعتراض چو نٿو ڪيو وڃي. ،…. لياقت جتوئي چيو ته گذريل اجلاس ۾ ملاقاتن جو هڪ سلسلو شروع ڪيو هو جيڪو هلي رهيو آهي ، اسان جو ڪو به ذاتي مفاد نه آهي، اسان ملڪ ۽ صوبي جي ڀلائي لاءِ گڏ ٿيا آهيون، هن چيو ته ڪرپشن جي انتها ٿي وئي آهي حڪمراني نالي ڪا به شي نه آهي هر شي وڪجي رهي آهي، ملڪ ۽ صوبي ۾ لاء آهي ته آرڊر نه آهي، جيڪا جنهنجي مرضي پوي ٿي اهو ڪري ٿو، ڪير به پڇڙ وارو نه آهي، پوليس جي موجودگي ۾ ڌاڙيل ڪارروئي ڪن ٿا ۽ بيگناهه ماڻهن خلاف جعلي ايف آءِ آر داخل ٿين ٿيون ترقي جي نالي تي کربين رپيا ڦر لٽ ڪيا ويا، لاڙڪاڻي پيڪيج ۾ 40 ارب رپين جون گهوٻيون لڳيون. هن چيو ته گذريل 4 سالن ۾ 70 ارب رپين جو گبن ٿيو آهي، اسان جي معيشت جو دارومدار زراعت تي آهي پر معيشت مڪمل طور تي تباهه ٿي چڪي آهي غربت سبب ماڻهو پنهنجا پچا وڪرو ڪرڻ تي مجبور آهن، منهنجي دادو ضلعي ۾ ساڍا ست هزار ۽ لاڙڪاڻي ۾ ساڍا اٺ هزار اسڪول بند آهن چونڊن ۾ ڌاندلي جي انتهائ ٿي وئي ، ٽربيونل جي فيصلا غيرقانوني آهن، اهي جلد ختم ٿي ويندا اهو عجيب فيصلو آهي ته منهنجي صوبائي تڪ ۾ ڌاندلي ثابت ٿي ۽ مونکي ڪامياب قرار ڏنو ويو ۽ ساڳئي تڪ جي قومي اسيمبلي واري تڪ ۾ منهنجي درخواست رد ڪئي وئي . هن چيو ته نوڪريون به وڪجي رهيون آهن هتي اگهه مقرر ٿي ويا آهن، سڄو ملڪ انارڪي جي ور ڇڙهيل آهي، اسان ذاتي مفادن لاءِ گڏ نه ٿيا آهيون، سنڌ جا مسئلا حل ڪرائڻ لاءِ سڀ ڪجه ڪيون پيا، سنڌ جي معاملي تي ٻين ماڻهن سان به ملنداسين، ايم ڪيو ايم سان به ملنداسين، انهن سان ڳالهوين ڪنداسين ۽ انهن جا به مسئلا ٻڌنداسين، هن چيو ته ٿر ۾ ماڻهو مري رهيا آهن پر سيد قائم علي شاهه رڳو دعوائون ڪري رهيو آهي، وفاقي وزير پيرصدرالدي شاهه راشدي چيو ته اسان سڀني مسلم ليگين کي گڏ ڪرڻ چاهيون ٿا ۽ انهن کي هڪ ڏسڻ چاهيون ٿا، اسان نذرياتي سياست ڪري رهيا آهيون، مسلم ليگي ناراض ٿي گهرن ۾ ويٺا آهن انهن کي گڏ ڪرڻ چاهيون ٿا اسان ملڪ ۽ سنڌ جي خدمت ڪرڻ چاهيون ٿا اسان ڪنهن سان گڏ نه پر ملڪ ۽ صوبي سان گڏ آهيون ، اسان هن ملڪ لاءِ قربانيون ڏنيون آهن، پيرصدر الدين شآهه راشدي وڌيڪ چيو ته سنڌ ۽ پوري ملڪ جي سطح تي مسلم ليگ کي متحد ڪرڻ چاهيون ٿا مينار پاڪستان تي هر پارٽِي جلاس ڪري رهي ۽ پر مسلم ليگي ڇڙوڇڙ يا ناراضي ٿي گهرڻ ۾ ويٺا آهن انهن کي گڏ ڪنداسين، سيد عوث علي شاهه چيو ته مسلم ليگ پاڪستان جي خالق پارٽي ۽ مان پنجاب جي ليگي اڳواڻ ذوالفقار کوسي سان رابطي ۾ آهيان ۽ ناراض يا غِيرفعال ٿي گهرن ۾ ويٺلن کي گڏ ڪرڻ چاهيون ٿا ، هن چيو ته هي حڪومتون ڌاندلي تي ٺهيون آهن فرق ايترو  ۽ته پنجاب ۾ ڌاندلي خلاف ڏرڻا هنيا پيا وڃن ۽ اسان هتي عدالتن ۾ آهيون افسوس اهو آهي ته اسان جي عملن کي ڪمزوري سمجهو پيو وڃي. هن چيو ته نواز شريف کي سنڌ ۾ ڌاندلين خلاف اسٽينڊ وٺڻ کپي ها، پر ان بدران هن پيپلزپارٽِي جو ساٿ ڏنو آهي ۽ هاڻ اهي ٻئي اتحادي آهن، اسان سڄي ملڪ ۾ مسلم ليگ کي منظم ڪنداسين.

 

 

دل جي تڪليف آهي دعا ڪيو ته چاق ٿيان: ڊاڪٽر طاهر القادري

لاهور (بيورو) پاڪستان عوامي تحريڪ جي سربراهه ڊاڪٽر طاهر القادري چيو آهي ته دل جي تڪليف آهي، گهُمي نه ٿو سگهان، دعا ڪيو ته چاق ٿيان، سڀ پروگرام مڪمل ۽ واعدا نڀائي وڃڻ گهران ٿو. عوامي تحريڪ جو سربراهه جو ڊاڪٽر طاهر القادري اوچتو بيمار ٿيڻ سبب گهمڻ ڦِرڻ کان لاچار ٿي ويو آهي. ڊاڪٽر طاهر القادري جو چوڻ آهي ته هو رڳو قوم سان ڪيل واعدا پاڙڻ لاءِ ڏيهه وريو آهي، سندس چوڻ آهي ته طبيعت سخت خراب هجڻ ڪري هو گهمڻ ڦرڻ کان لاچار ٿي ويو آهي ۽ ڳالهائي به نه ٿو سگهي، کيس ڳالهائڻ ۾ به ڪمزوري ٿي رهي آهي. ڊاڪٽر طاهر القادري جو چوڻ آهي ته سندس دل تي وڏو دٻاءُ ۽ کيس بلڊ پريشر آهي، ڊاڪٽرن کيس مڪمل طور تي آرام ڪرڻ جو مشورو ڏنو آهي ۽ جيڪڏهن هو آرام نه ڪندو ته سندس طبيعت ٺيڪ نه ٿيندي. هن چيو ته سندس صحت يابي لاءِ دعا ڪئي وڃي ته جيئن هو چاق ٿي قوم سان ڪيل واعد پاڙي ۽ پروگرام نڀائي سگهي. هن چيو ته ڊاڪٽرن سندس دوا به تبديل ڪري ڇڏي آهي.