تازيون خبرون

Daily Archives: November 21, 2014

دهشتگردي جو الزام هڻي ڀارت پنهنجا گناهه لڪائي رهيو آهي: وزير اعظم

مظفرآباد (م.د) وزيراعظم نوازشريف چيو آهي ته ڀارت پاران پاڪستان تي دهشتگردي جا الزام پنهنجن ئي گناهن تي پردو وجهڻ جي ڪوشش آهي ڪشمير جي معاملي تي ڪوئي سمجهوتو نٿو ٿي سگهي پاڪستان ڪشميرين جي حمايت ڪندو رهندو. مسئلي کي هر سطح تي کنيو ويندو والاريل ڪشمير تي ڀارتي ظلم انساني حقن جي خلاف ورزي آهي. بيگناهه ڪشميري عوام تي ٿيندڙ ظلم نظرانداز نٿو ڪري سگهجي. طاقت سان مسئلو حل نه ٿيندو، عالمي برادري جي اخلاقي دٻاءُ جي ذريعي ڀارت کي ڳالهه ٻولهه جي ميز تي آڻي سگهجي ٿو. ڀارتي فوج جي اشتعال انگيز ڪارروائين سان امن جي قيام جون ڪوششون متاثر ٿي سگهن ٿيون خميس تي مظفرآباد ۾ آزاد ۽ ڄمون ڪشمير ڪائونسل سان خطاب ۾ وزيراعظم نوازشريف ڪشمير جي مسئلي تي ڳالهين کان انڪار تي سخت ڪاوڙ جو اظهار ڪندي چيو ته عالمي برادري جي اخلاقي داءُ جي ذريعي ڀارت کي ڳالهين جي ميز تي آڻي سگهجي ٿو حڪومت ڪشمير جي مسئلي کي عالمي سطح تي اٿاريو جنهن جو عالمي برادري به نوٽيس ورتو وزيراعظم چيو ته لائين آف ڪنٽرول ۽ ورڪنگ بائونڊري تي هلندڙ ڀارتي جارحيت اعتماد سازي جي عمل کي نقصان پهچايو وزيراعظم واضح ڪيو ته ڪشمير جي معاملي تي ڪوئي سمجهوتو نٿو ٿي سگهي ۽ ڪشمير جي مسئلي جي حل لاءِ خاص ڪوششون جاري رکنداسين ڇو ته طاقت جي زور تي مسئلي کي حل نٿو ڪري سگهجي. وزيراعظم نوازشريف چيو ته ان زندگي ۾ ڪشميرين جي حق خوداراديت جي حمايت ڪئي ايتري قدر جو اڳوڻي ڀارتي صدر اٽل بهاري واجپائي جي اڳيان به کلي ڪشمير مسئلي تي ڳالهه ٻولهه ڪئي. هن چيو ته ڪشميري ڀارت جي رياستي دهشتگردي جو شڪار آهن ۽ انهن کي حقن کان محروم رکيو پيو وڃي. وزيراعظم چيو ته مالي مشڪلاتن جي باوجود 969 ميگاواٽ نيلم جهلم پراجيڪٽ تي ڪم جاري آهي هن چيو ته مري ۽ مظفرآباد ايڪسپريس وي به رڪارڊ مدت ۾ مڪمل ڪيو ويندو. هن ٻڌايو ته منگلا اپريزنگ منصوبي جي سينٽرل ورڪنگ پارٽي منظوري ڏني آهي. صحت جي شعبي لاءِ مختص فنڊ وڌائڻ جي ضرورت آهي.

 

دهشتگردن خلاف ڪارروائي بنا فرق جي جاري آهي: آرمي چيف

واشنگٽن(م.ڊ) چيف آف آرمي اسٽاف جنرل راحيل شريف چيو آهي ته پاڪ فوج طرفان دهشتگردن خلاف آپريشن ”ضرب عضب“ بنا ڪنهن متڀيد جي هلي رهيو آهي ۽ ان جو مقصد دهشتگردي جي مڪمل پاڙ پٽڻ آهي. امريڪا ۾ پاڪستان جي سفير جليل عباس جيلاني طرفان امريڪا جو دورو ڪندڙ پاڪستاني فوجي وفد جي اعزاز ۾ ڏنل آجياڻي جي تقريب کي خطاب ڪندي جنرل راحيل شريف چيو ته مان اها ڳالهه واضح طور چوان ٿو ته اهو آپريشن بنا ڪنهن رنگ ۽ نسل ۽ متڀيد جي هر قسم جي دهشتگردن خلاف جاري آهي، پوءِ اهو حقاني نيٽ ورڪ هجي يا تحريڪ طالبان پاڪستان يا ڪو ٻيو دهشتگرد گروهه. هن چيوته ضرب عضب آپريشن پختي عزم ۽ خلوص سان شروع ڪيو ويو آهي ۽ ان لاءِ سياسي حڪومت سان مشاورت پڻ ڪئي وئي آهي ۽ ان آپريشن کي سڄي قوم جي حمايت حاصل آهي جنهن تي پاڪ فوج کي ان ڳالهه تي وڏو فخر آهي ته ان آپريشن ۾ وڏيون ڪاميابيون مليون آهن. جنرل راحيل شريف چيو ته ضرب آپريشن رڳو فوجي فرض ناهي پر اهو دهشتگردي جي هر قسم ۽ روپ کي شڪست ڏيڻ بابت هڪ تصور آهي. هن چيو ته دهشتگردي خلاف مهم رڳو وزيرستان ۽ خيبر قبيلائي علائقن تائين محدود ناهي پر ان جو دائرو سڄي ملڪ تائين وڌايو ويو آهي. هن چيو ته افغانستان جي نئين صدر ڊاڪٽر اشرف غني جي انتظاميه تحت ايندڙ ڪجهه مهينن اندر پاڪستان ۽ افغانستان وچ ۾ دهشتگردي خلاف جنگ ۾ وڏي سهڪار جي اميد آهي جنهن سان خطي ۾ امن ۽ استحڪام ايندو. هن چيو ته داعش کي پاڪستان ۽ افغانستان ۾ پنهنجين ڪاررواين کي وڌائڻ جي اجازت نه ڏني ويندي. هن پنهنجي امريڪي دوري تي اطمينان جو اظهار ڪندي چيو ته اهو تمام سٺو رهيو ۽ دوري دوران هن جون ڪيترن ئي اهم فوجي عملدارن سان لاڀائتيون گڏجاڻيون ٿيون آهن. ان موقعي تي امريڪا ۾ پاڪستان جي سفير جليل عباس جيلاني دهشتگردي خلاف پاڪستان جي عزم ۽ اداري جو حوالو ڏيندي چيو ته پاڪستان ۽ امريڪا جي ناتن ۾ بهتري اچي رهي آهي پر دهشتگردي خلاف جنگ ۾ هاڪاري اڳڀرائي جو دارومدار ٻنهي ملڪن جي ناتن ۾ وڌيڪ مضبوط هئڻ تي آهي. جليل عباس جيلاني چيو ته دفاعي ناتا پاڪستان ۽ امريڪا وچ ۾ موجود وسيع تر ناتن ۾ اهم حيثيت رکن ٿا. ان موقعي تي ميڊيا سان مختصر ڳالهه ٻولهه ڪندي امريڪا جي خاص ايلچي ڊن فيلڊ مين چيو ته پاڪستان جي آرمي چيف جنرل راحيل شريف جون پنهنجي دوري دوران امريڪي اختيارين سان تعميري ۽ هاڪاري گڏجاڻيون ٿيون آهن جنهن جا بهتر نتيجا سامهون ايندا. ٻئي طرف پاڪستان جي آرمي چيف جنرل راحيل شريف آمريڪي قومي سلامتي جي صلاحڪار سوزن رائس سان ملاقات ڪئي جنرل راحيل شريف ورڪنگ بائونڊري ۽ لائن آف ڪنٽرول تي ڀارتي جارحيت کان ان کي آگاهه ڪيو، ان دوران هن جو چوڻ هو ته دهشتگردن خلاف بنا فرق جي ڪارروائي جاري آهي آرمي چيف جنرل راحيل شريف جي آمريڪيدوري ۾ ان جي اهم سياسي ۽ فوجي اختيارين سان ملاقاتن جو سلسلو جاري آهي آرمي چيف جنرل راحيل شريف آمريڪي هم منصب سان ملاقات کانپوءِ آمريڪي جي پاڪستان ۽ افغانستان لاءِ خصوصي نمائندي ڊينيئل ايف فيلڊ مين سان به ملاقات ڪئي، دوري دوران پاڪستاني عسڪري وفد آمريڪي نيشنل سيڪيورٽي ايڊوائزر سوزن رائس سان ملاقات ڪئي جنهن ۾ علائقائي سلامتي ۽ آمريڪي فوج جي افغانستان مان نڪرڻ کانپوءِ افغانستان جي صورتحال بابت ٻه طرفن معاملن تي خيالن جي ڏي وٺ ڪئي وئي.

 

رياستي ادارن جو تحفظ حڪومت جي ذميواري آهي: پرويز رشيد

اسلام آباد (بيورو) وفاقي اطلاعات واري وزير پرويز رشيد چيو آهي ته عمران خان پاران روزانو شريف ڀائرن جي ڪردار ڪشي ڪئي پئي وڃي وزيراعظم ڪڏهن عمران خان جي ذاتي زندگي تي نه ڳالهايو آهي رياستي ادارن جو تحفظ حڪومت جي ذميواري آهي ۽ قانون شڪني ڪنهن صورت برداشت نه ڪيو ويندو هڪ انٽرويو ۾ هن چيو ته عمران خان پاران روزانو شريف ڀائرن جي ڪردار ڪشي ڪئي پئي وڃي ۽ وزيراعظم اڄ ڏينهن تائين ان جي باري ۾ جواب نه ڏنو آهي ۽ نه ئي عمران خان جي ذاتي زندگي تي ڪا راءِ ڏني آهي پر ان جي باوجود به تحريڪ انصاف جي سربراهه پاران شريف ڀائرن تي الزامن جو سلسلو افسوسناڪ آهي. پرويز رشيد چيو ته شريف ڀائرن جي اخلاق ۽ ڪردارجي تعريف ته ان جا مخالف به ڪندا آهن ۽ آئون ان ڳالهه جو گواهه آهيان. هن چيو ته عمران خان جي لڳايل الزامن جي تحقيقات لاءِ قائم ڪيل عدالتي ڪميشن ان ۾ ڪوئي ٻيو رڪن شامل ڪرڻ جي باري ۾ فيصلو ڪندي حڪومت کي اهو اختيار حاصل نه آهي جو هو سپريم ڪورٽ جي ججن کان سواءِ ڪنهن ٻين ميمبرن کي ڪميشن ۾ شامل ڪري.

 

ملڪ کي ترقي جي راهه تان هٽائيندڙن کي عوام رد ڪري ڇڏي: صدر ممنون حسين

اسلام آباد، لاهور (بيورو/م.ڊ) صدر مملڪت ممنون حسين چيو آهي ته جيڪي ماڻهو ملڪ کي ترقي جي راهه تان هٽائڻ چاهن ٿا، عوام انهن کي رد ڪري ڇڏي، ملڪ کي درپيش چئلينجن سان گڏيل ڪوششن ذريعي ئي منهن ڏئي سگهجي ٿو، ملڪ هن وقت ڪنهن سياسي مهم جوئي جو متحمل نٿو ٿي سگهي، پاڪستان جي ضرورت سياسي مهم جوئي بدران گڏيل سوچ ويچار آهي. هو پنجاب جي وڏي وزير شهباز شريف سان وزيراعليٰ هائوس ۾ ملاقات دوران ڳالهائي رهيو هو. پنجاب جي وڏيوزير صدر مملڪت کي جاري ترقياتي ڪمن ۽ بجلي جي منصوبن تي بريفنگ به ڏني. صدر مملڪت پنجاب جي وڏي وزير جي ويزن جي تعريف ڪئي ۽ چيو ته پنجاب جي ترقي لاءِ شهباز شريف قابل قدر قدم کنيا آهن. ان موقعي تي ڳالهائيندي صدر مملڪت چيو ته ملڪ هن وقت ڪنهن سياسي مهم جوئي جو متحمل نٿو ٿي سگهي، پاڪستان جي ضرورت سياسي مهم جوئي بدران گڏيل سوچ ويچار آهي، صدر مملڪت چيو ته ملڪ کي درپيش چئلينجن سان گڏيل ڪوششن ذريعي ئي منهن ڏئي سگهجي ٿو ۽ قومي مسئلن کي حل ڪرڻ لاءِ اسان کي سنجيدگي جو مظاهرو ڪرڻو پوندو. ملاقات ۾ ان ڳالهه تي به ويچاريو ويو ته وڌيڪ ڪهڙا ڪهڙا ترقياتي ۽ بجلي جا منصوبا شروع ڪري سگهجن ٿا.

 

ڊي جي آءِ ايس آءِ جي پاڪ هوائي فوج جي سربراهه سان ملاقات، ملڪي سلامتي جي معاملن تي ويچار

اسلام آباد (بيورو) آءِ ايس آءِ جي نئين مقرر ٿيل ڊائريڪٽر جنرل ليفٽيننٽ جنرل رضوان اختر پاڪ هوائي فوج جي سربراهه ايئر چيف مارشل طاهر رفيق بٽ سان ملاقات ڪئي. آءِ ايس آءِ ڊائريڪٽر جنرل جو عهدو سنڀالڻ بعد اها سندس ايئر چيف سان پهرين ملاقات هئي. ملاقات ۾ ملڪي سلامتي جي معاملن تي ويچاريو ويو. ايئر چيف آءِ ايس آءِ ڊي جي لاءِ نيڪ خواهشن جو اظهار ڪيو ۽ ان ڳالهه کي ورجايو ته هي ادارو اوهان جي اڳواڻي ۾ ملڪي مفادن جي بهترين نظرداري ڪندو. ايئر چيف وڌيڪ چيو ته آءِ ايس آءِ هميشه پاڪستاني عوام جي خواهشن مطابق ملڪي مفادن جي حفاظت ڪئي آهي. ان موقعي تي پاڪ هوائي فوج جي سربراهه آءِ ايس آءِ ڊي جي کي هڪ يادگاري شيلڊ پيش ڪئي.

 

شرجيل انعام ميمڻ جو تحريڪ انصاف جي اڳواڻن عارف علوي ۽ نادر لغاري سان رابطو، تعاون جي خاطري

ڪراچي (اسٽاف رپورٽر) سنڌ جي بلديات ۽ اطلاع واري وزير شرجيل انعام ميمڻ پاڪستان تحريڪ انصاف جي مرڪزي اڳواڻ عارف علوي ۽ سنڌ جي صدر نادر اڪمل لغاري سان ٽيلفون تي ڳالهه ڪري ان کي 21 نومبر تي لاڙڪاڻي ۾ ٿيندڙ جلسي جي حوالي سان سنڌ حڪومت پارن مڪمل تعاون ۽ يقين ڏياريو آهي. شرجيل انعام ميمڻ تحريڪ انصاف جي اڳواڻن جي جلسي جي موقعي تي سنڌ حڪومت پاران مڪمل سيڪيورٽي جي فراهمي جوبه يقين ڏياريندي چيو آهي ته ان حوالي سان تحريڪ انصاف کي ڪنهن به قسم جي درڪار مدد سنڌ حڪومت ان کي فراهم ڪندي. صوبائي وزير تحريڪ انصاف جي اڳواڻن سان ڳالهين دوران چيو ته پيپلز پارٽي هڪ جمهوري جماعت آهي ۽ هوءَ جمهوريت تي يقين رکي ٿي ۽ سمجهي ته مڙني سياسي جماعتن کي پنهنجن سرگرمين کي آزاداڻا طور تي انجام ڏيڻ لاءِ مدد فراهم ڪئي وڃي.

 

خطي ۾ امن ۽ استحڪام لاءِ افغانستان سان صحتمند ۽ دلي ناتا قائم ڪرڻ جا خواهشمند آهيون: پاڪستان

اسلام آباد(بيورو) پاڪستان چيو آهي ته هو خطي ۾ امن ۽ استحڪام لاءِ افغانستان سان صحتمند ۽ دلي ناتا قائم ڪرڻ جو خواهشمند آهي. اها ڳالهه پرڏيهي آفيس جي ترجمان تسنيم اسلم خميس ڏينهن هتي هفتيوار پريس بريفنگ ڏيندي چئي. هن چيو ته افغانستان جي صدر اشرف غني جو تازو پاڪستان جو دورو حقيقي معنيٰ ۾ انتهائي ڪامياب رهيو. هن چيو ته پاڪستان ۽ افغانستان جي ناڻي وارن وزيرن وچ ۾ ملاقات انتهائي اهميت واري آهي ڇاڪاڻ ته ان ملاقات ۾ معيشت، واپار،ڳانڍاپن ۽ عوامجي عوام سان رابطن سان لاڳاپيل 42 اهم فيصلا ڪيا ويا. هن چيو ته پاڪستان افغانستان جي ترقي جي حوالي سان ڪيترائي منصوبا شروع ڪيا آهن. هن چيو ته افغان صدر جو پاڪستان جو دورو رڳو علامتي نه پر انتهائي ڪامياب آهي. هن چيو ته افغان صدر جي پاڪستان جي دوري دوران گڏيل سهڪار جي ڪيترن ئي شعبن جي نشاندهي ڪئي وئي آهي. پاڪستان ۽ روس جي ناتن جي حوالي سان هڪ سوال تي تسنيم اسلم چيو ته پاڪستان روس کي اهم عالمي ملڪ قرار ڏئي ٿو جيڪو خطي جي استحڪام ۽ ترقي ۾ هڪ اهم ڪردار ادا ڪري سگهي ٿو.هن چيو ته پاڪستان ۽ روس جا ناتا اهم رخ طرف وڌي رهيا آهن ۽ پاڪستان روس کان سماجي ۽ اقتصادي ترقي جي حوالي سان سهڪار چاهي ٿو. هن چيو ته روس جو دفاع وارو وزير سرگئي شوگوف هن وقت سرڪاري دوري تي اسلام آباد آيل آهي. ڪشمير جي مسئلي تي پرڏيهي ترجمان چيو ته ڄمون ۽ ڪشمير هڪ مڃيل تڪرار آهي ۽ گڏيل قومن واري اداري جي سلامتي ڪائونسل ان تڪرار تي ڳالهين لاءِ هڪ پليٽ فارم مهيا ڪري ڇڏيو آهي. هن چيو ته پاڪستان گڏيل قومن واري اداري جي پاڪستان ۽ ڀارت لاءِ فوجي مبصر گروپ تي زور ڀري ٿو ته اهو جنگ بندي جي خلاف ورزين جي حوالي سان اثرائتو ڪردار ادا ڪري. هن چيو ته پاڪستان دهشتگردي جو شڪار آهي جتي اٽڪل 55 هزار ماڻهن پنهنجن جانين جو نذرانو ڏنو آهي ۽ اسان جي هٿياربند فوجين به دهشتگردن خلاف بنا ڪنهن متڀيد جي جامع فوجي آپريشن شروع ڪري ڇڏيو آهي.

 

جاگيرداراڻي نظام جي هوندي ملڪ ۾ حقيقي معنيٰ ۾ تبديلي نٿي اچي سگهي : الطاف حسين

لنڊن(م.ڊ) متحده قومي موومينٽ جي قائد الطاف حسين رڪنيت سازي مهم دوران پوري ملڪ مان ايم ڪيو ايم ۾ شامل ٿيندڙ ماڻهن کي دل جي گهراين سان ڀليڪار چيو آهي پنهنجي هڪ بيان ۾ هن چيو ته ڪراچي جي پري پري وارن علائقن سان گڏوگڏ پنجاب، بلوچستان، خيبرپختونخواهه، گلگت بلتستان ۽ آزادڪشمير جي سمورن ننڍن وڏن شهرن، ڳوٺن جي شاگردن، وڪيلن، استادن، ڊاڪٽرن، انجنيئرن، مزدورن ۽ مختلف شعبن سان تعلق رکندڙ نوجوانن، بزرگن ۽ مائرن، ڀينرن ايم ڪيو ايم جي هن رڪنيت سازي مهم ۾ جهڙي طرح ڀرپور نموني حصو ورتو ۽ جهڙي طرح جوش جذبي سان گڏ ايم ڪيو ايم جي قافلي جو حصو بڻيا اها ڏاڍي خوشي جي ڳالهه آهي الطاف حسين چيو ته عوام ان حقيقت کي چڱي طرح سمجهي وئي آهي ته جاگيرداراڻي نظام جي هوندي ملڪ ۾ حقيقي معنيٰ ۾ تبديلي نٿي اچي سگهي ۽ جاگيرداراڻو نظام اها ئي پارٽي ختم ڪري سگهي ٿي جنهن جي قيادت جاگيردارن، وڏيرن ۽ وڏن وڏن سرمائدارن تي نه پر غريبن ۽ پوئتي پيل طبقي سان تعلق رکندي هجي، الطاف حسين جو چوڻ هو ته مون کي يقين آهي ته ايم ڪيو ايم جي قافلي ۾ شامل ٿيندڙ نوان ميمبر پاڪستان ۾ حقيقي تبديلي ۽ ملڪ کي ترقي ۽ خوشحالي تائين پهچائڻ ۾ ڀرپور ڪردار ادا ڪندا.

 

پاڪستان ۽ ظالم طبقي جو نظام گڏجي نٿا هلي سگهن: سراج الحق

لاهور (م.ڊ) جماعت اسلامي جي امير سراج الحق چيو آهي ته پاڪستان ۽ هي ظالم طبقو وڌيڪ گڏجي نٿو هلي سگهي سياسي برهمڻ پنهنجو پاڻ کي قانون کان مٿانهون سمجهن ٿا، جماعت اسلامي جي عام اجتماع جي تيارين لاءِ مينار پاڪستان جي دوري تي ميڊيا سان ڳالهائيندي هن چيو ته ملڪ کي ٻه ٽڪرا ڪندڙ ظالم طبقي عوام ۽ ادارن کي يرغمال بڻائي رکيو آهي هي ماڻهو قومي دولت تي علاج لاءِ لنڊن وڃن ٿا، سراج الحق چيو ته 65 سالن ۾ هڪ ڏينهن به اهو نظام قائم نه ٿيو جنهن لاءِ پاڪستانبڻيو، ظالم طبقي پاڪستاني معيشت کي به يرغمال بڻائي رکيو آهي.

 

تحريڪ انصاف سنڌ جي ورهاڱي خلاف آهي، ملڪ ۾ لساني بنيادن تي صوبا نه بڻجڻ گهرجن: عمران خان

اسلام آباد (بيورو) تحريڪ انصاف جي چيئرمين عمران خان چيو آهي ته ملڪ ۾ لساني بنيادن تي صوبا نه بڻجڻ گهرجن، جڏهن ته سنڌ جي ورهاست جي حق ۾ به ناهيون. عمران خان چيو ته ڌرڻو اسان جو آئيني حق آهي ۽ اسان جو ڪوبه مطالبو آئين کان ٻاهر ناهي، انصاف لاءِ هر قانوني رستو اختيار ڪيو پر انصاف نه مليو، موجوده نظام ۾ انصاف حاصل ڪرڻ ڏکيو بڻجي ويو، اسين انصاف ۽ قانون جي حڪمراني لاءِ نڪتا آهيون جڏهن ته آرمي چيف ملاقات ۾ چونڊ ڌانڌلين جي جانچ ۾ آئي ايس آئي جي شموليت جو يقين ڏياريو هو. عمران خان چيو ته حڪومت ڳالهين لاءِ 30 نومبر جو سڏ واپس وٺڻ جو چيو جيڪڏهن سڏ واپس ورتو ته حڪومت تي دٻاءُ ختم ٿي ويندو. هن چيو ته هر هنڌ تاريخي جلسا ڪيا پر بلاول ڀٽو جي جلسي ۾ ماڻهن کي زبردستي آندو وڃي آهي. سنڌ جون حالتون بلوچستان کان به خراب آهن، ڪالاباغ ڊيم جي معاملي تي سنڌ ۾ تمام گهڻو خوف آهي پر يم سنڌ جي راضي کانسواءِ نه بڻجڻ گهرجي، اسين سنڌ جي ورهاست جي حق ۾ ناهيون جڏهن ته لساني بنيادن تي صوبا نه ٺهڻ گهرجن